حليناها ليكم

تقوم لجنة خماسية منبثقة عن المكتب القيادي للمؤتمر الوطني بمهمة رسم ملامح تشكيل حكومة الجمهورية الثانية والتى غالباً ما تأتي فى شكل (تنقلات) حيث يذهب الوزير الفلانى من الوزارة (أ) إلى الوزارة (ب) التى تركها (صاحبها) ذاهباً إلى الوزارة (ج) وهكذا دواليك !
وحتى لا ينفق متخذو القرار كثيراً من الجهد والوقت والإجتماعات حتى يصلوا إلى وضع (التوليفه) النهائية لحكومة الجمهورية الثانية ولان (العبدلله) مقتنع تماما إلى أن المسألة غير محتاجه و(مش بدها) كما يقول إخواننا (الشوام) فالعبدلله يهدى هذا الإقتراح الذى يمكن بواسطته (حل) هذه المسالة لمدة ثلاثين سنة قادمة (يعنى حتى الجمهورية السادسة) ! وذلك بدون أى (تعب) أو إهدار وقت يحتاج إليه الوطن) من أجل بلوغ ذرى المجد) !!
والإقتراح وما فيهو هو ان تضع (الحكومة) جدولاً دائرياً (سنويا) على مدى (الثلاثين سنة القادمة) يتم بموجبه (تنقل) الوزراء فيه (أتوماتيكياً) يعنى وزير (الزراعة) السنة الجاية يمشى وزير (داخلية) والسنة اللى بعدها وزير (خارجية) واللى بعدها وزير ( ثقافة) وهكذا على أن يذهب وزير (الثقافة) إلى (الخارجية) والسنة اللى بعديها وزير (داخلية) واللى بعديها وزير (إعلام) وهكذا .. ولا غبار أن يرتاح الوزير بعد تنقله عبر كل (تلاته وزارات) وياخد ليهو (إستراحة محارب) إسبوعين تلاته يرتاح فيها من (وعثاء السفر) .
ولا شك أن وضع هذا (البرنامج الأتوماتيكى) له الكثير من الفوائد التى تجنيها الدولة والمواطن على حد سوا ، على الأقل فإن الوزير الفلاني ح يكون عارف روحو (فى السنة الفلانية) ح يكون وزير شنو!! وعلاوة على عدم إهدار الوقت فى التشاور و(التناصح) والتحنيس واللازم منو وإصدار المراسيم عند كل تعديل ففى هذا البرنامج يتم إصدار (مرسوم واحد) فى بداية البرنامج يحدد لكل وزير (جدول) بإسم الوزارة التى سوف يعتليها فى بداية كل عام خلال الثلاثين سنة القادمة .
ومن إيجابيات هذا البرنامج أنه سوف يتيح (للوزراء الأماجد) التنقل بين كل بقاع الدنيا والأخذ من تجاربها مما سوف يكون له بالغ الأثر فى إثراء تجربتهم فالمسئول عن وزارة (الصناعة) لابد أنه سوف يقوم بزيارة البلاد الصناعية كاليابان والصين وسينغافورة ولكن بعد توليه فى العام التالى لزمام وزارة الطاقه فسوف يشمل جدول زياراته أمريكا وكندا وفنزويلا وكافة الدول المصدرة للبترول أما عند تقلده (للحج والأوقاف) فهو بلا شك إلى (البيت الحرام) سائر وبإسرته معتمر !!
ولعل من أبرز فوائد هذا التنقل الأوتوماتيكى هو قلة الأخطاء التى يرتكبها الوزير وهو يضطلع بمهام الوزارة المعنية (فى سنة واحدة) إذ انها بلا شك سوف تكون أقل كثيرا ما إذا كان وزيراً لتلك الوزارة لأعوام طويلة ..
يعنى كل وزير ممكن (يجلط) ليهو جلطه جلطتين تلاته فى السنة ومفيش حد يحس بيهم لحدت ما يروح يمسك الوزارة التانية !!
ومن أبرز فوائد ومميزات هذا البرنامج الأتوماتيكى لتنقل السادة الوزراء هو إتاحة الفرصة كاملة لمعرفة فى أى وزارة يجد السيد الوزير نفسو … فالوزير بلا شك (بشر) .. والبشر لديهم ميول ومواهب ومقدرات لا يمكن التعرف عليها إلا عن طريق (الممارسة) الشئ الذى يقوم به هذا البرنامج (الأتوماتيكى) فبعد أن يقوم (السيد الوزير) باللف على جميع الوزارات (التلاتين) يمكن أن يحدد (لقى نفسو فى ياتو وزارة) ويقول :
– بس خلاص … انا لقيت نفسى فى (المالية) دى !!
ولأن إنتقال الوزير (لدينا) يواكبة إنتقال لكل (الطاقم المساعد) لديه إبتداء من (السائقين) مروراً (بالسكرتارية) وإنتهاء بمدراء المكاتب فإن هذا البرنامج الأتوماتيكى من شأنه إنعاش سوق (الأثاث) فسكرتارية وزير (الخارجية) ستعمل فوراً على تغيير ألوان مكتب (سكرتارية وزير النقل) فور إنتقالها إليه لأن (أثاث النقل) ياعينى إندونيسى بينما هى تموت فى (الإيطالى) !
كما أن مدير مكتب (وزير الغابات) الذى غادر ليتولى وزارة (السياحه) سوف يقوم فور إنتقاله للوزارة الجديده بتغيير العربة (الكامرى الزرقاء) موديل السنة التى كانت مخصصة لمدير مكتب وزير السياحه بأخرى (بيضاء) لأن سعادتو ما بحبش (اللون الأزرق) لأنو ما لون سياحى وكدا !!
بعد أن تكتمل دورة البرنامج بعد (تلاتين سنة) هى عدد الوزارات التى قام الوزراء باللف عليها يتم إصدار قرار بجعل ذلك اليوم (عطلة رسمية) تسمى عطلة إنتهاء (البرنامج الأتـوماتيكى لتنقلات الوزراء) ويقام على شرف ذلك إحتفال ضخم يتم فيها تكريم الوزراء على أنجازاتهم إبان توليهم لتلك الوزارات ومنح كل وزير (تلاتين نجمة إنجاز) هى عدد الوزارات التى تولاها إبان برنامج التنقلات الأتوماتيكى الذى غطى (سته جمهوريات) …. ثم يعلن فى نهاية الحفل بداية (الدورة التانية من البرنامج) من (أول وجديد) والتى تستمر حتى الجمهورية الما عارف رقم كم !!!

كسرة :
أفتكر في برنامج الدورة التانية ده لازم يكون فى إحتياطى لكل وزير .. عشان (موت الله) وكده !

14 تعليق

  1. الحبيب والحبايب في شهر المحبة .. لكم عظيــــم محبتي
    وبالنسبة للف الوزراء ودورانهم في الوزارات خلال ال30 سنة الأولى (فال الله لا فالك) ولتكتمل عناصر الإقتراح ويكون متحسباً حتى لـ (موت الله)فعلى كل وزير تزكية من يراه مناسباً ليكون (وزير ظل) يعمل حنباً إلى جنب مع الوزير إبان فترة توليه في الساقية المدورة شرطاً أم يكون أصغر منه بـ 25 عاماً على الأقل .. يريحنا منهم اللا نام لا أكل الطعام .. وليلحقوا بالركب المزبلي سي حسني .. ومعمر .. وصالح .. وزين العابدين .. وبشار .. (وبس) !!

  2. انت بى صحك خلعتنى (موت الله وكده ) من ماجات الحكومه دى شفته واحد فبهم مات موت الله (ياطياره وقعت ياعربيه انقلبت)
    واضافه للمقترح بتاعك لازم تكون نهاية كل وزير فى وزارة الاوقاف عشان الحج والعمره والمقفره من الله على كل مااقترفت يداه فى هذا الشعب قبل مايركب الطياره او العربيه

  3. السؤال المافي محلو:
    هو الحكومة دي حاتكون قاعدة و حاكمة تاني تلتين سنة (حسبي الله و نعم الوكيل و انا لله و انا اليه راجعون).

  4. البروف والجماعه .
    سلامات وكل سنة وإنتو طيبين .
    بمناسبة كل وزير يمشى بى حاشيتة للوزارة الجديدة . عندنا فى محلية كررى وخلال ثمانية أعوام كل من يأتى رئيسا للمحلية بيجيب معاهو جماعتو من سواقين ومحاسبين وحراسة وجميع طاقمه وبعد أن يرفعوهو لى منصب آخر بيوصى رئيس المحلية الجديد بأن يبقى عشرة على ناسى القدام ديل وخليهم فى موقعم لأنهم ناس نضيفين .الى أن إزدحمت المحلية بما لا تطيق من موظفين وبقت زحمة فى المحلية وصار الوظفون بمعدل خمسة موظفين فى وظيفة واحدة .
    الله فى …

  5. انت يا بروف ما يعملوها قرعه واى زول يرضى بنصيبو !!!
    كمان فى اقتراح تانى من مصلحة الشعب انو ننزل الوزارات فى عطاء وناجرا ليهم تلاته سنه على الاقل قروشنا ترجع لينا ونرفع سعر الوزارة يعنى الماليه الشهر بى مليار يعنى التلاته سنه بى كم ؟؟ عشان ذاتو نشوف الوزير العندو من الما عندو – ونعمل امنيه للوزارة الواحد يخت ايجار سنه مقدم لانو بعدين ممكن وزير يستوز تلاته شهور يرجع الدفعو وارباحو وقوم يكبر اللفه حنسوى شنو يعنى – ومن المهم جدا يخت شيك ضمان ورهن عقارى .. تعرف يا بروف كده قورشنا بترجع فى شهر واحد بس ..

  6. عطاء لاستوزار وزراء لمدة ثلاث اعوام :
    يعلن الامين العام لمجلس الوزراء المكلف ( لانو دى برضو فى العطاء ) عن طرح عدد 25 وزارة اتحادية وعدد 50 وزارة دوله للايجار لمدة ثلاث سنوات وفق شروط العقد الموضحة بكراسة العطاءات بالاسعار المحدده فى الكراسه وبما انو عينى بارده الوزراء القدام قادرين والقادر بسوى فهم مستثنيون من دفع رسوم الكراسه باعتبار الزماله القديمه وكده . اخر موعد لاستلام الطلبات الخميس 25 اغسطس – الامين العام مقيد جدا جدا بقبول اعلى سعر للايجار مع امكانية ايجار وزارتين فى وقت واحد مع تخفيض 5 % للوزارة التانيه . تقدم الطلبات فى ظروف مفتوحه شديد وناصية عشان الشعب يعرف الناس البتعزو ومستعده تدفع عشان تبقى وزراؤه وانتو وذوقكم شوفو قيمة الشعب كم وانتو راجين من الوزارة كم ويفضل عمل دراسة جدوى مسبقه عن العملية قبل الدخول علما بان رسوم الكراسه لا ترد والايجار يدفع مقدما مع وضع شيك ضمان بالقيمه عن الثلاث سنوات ودفع مقدم سنه – ملحوظه : الايجار لا يشمل العتب ورسوم النفايات فهى على الشعب الا اذا ذادت نفايات الوزير عن القدر المتعارف عليه خلال الثلاث سنوات ( وطبعا اكيد حتذيد ) فىى وزير بدون نفايات ؟؟؟

  7. اصلو القصة يااولادى ذى لعبة الكوتشينة فيها الشايب والولد والبت والجوكر والارقام يلا الكتشينة دى كلو
    مرة بتتشكا بس الورق ثابت شايب الشيرية يمشى محل شايب الدينارى وولد الهارد يجى محل ولد الاسود
    والشعب ده زى الارقام مافارق فى الكش بس المهم الصور فى اللعبة والجوكر ثابت اه النجر الشعب خمسين
    اصلو 23 سنة جارنو لما بقى معرج الحصل شنو هسى الكش بقى ماعاجبكم ولا شنو ولا الناس دايره تخرخر
    اللعبو وخلصونا اصلو الناس دى شكلها ما حاتفتح لى يوم القيامة مع تعريجتم دى وخلو اللعب والكش ده لى امكم
    وزع الورق ده وخلى اللعب شغال

  8. اخى جبرا
    سلامات وين اهلنا الطيبين ناس( حاج احمد السلاوى-كوكو-شمباتى -سهيل -يسين-) كدى اسال منهم ما يكونوا دخلو السوق وبلعهم

  9. سلام يا بروف ويا كرام — إنشاء الله من عتقاء شهر الصيام
    الذي تحلم به يا بروف اسمه (التداول السلمي للسلطة) وده ذاتو الخايفين منو جماعتك لأنهم جمعوا الثروة والسلطة وخلوهم مقرونات فإذا كان تداول الثروة بالوراثةالشرعية ( بسبب النكاح أو النسب أو الولاء) فلا بد أن يكون تداول السلطة كذلك ….. وبعدين ليه انت عايز احتياطي ليه؟ قايل الناس ديل ما والدين ولا شنو؟ ديل ما يكمل نصف دينهم إلا بي اربع نساء…. وما ملكت أيمانكم
    الأخAFLAIGA هو انت الاقتراحات بتاعتك دي ترجع (ليك) قروشك؟ في شهر واحد؟ مين الح يستلما؟ والله اقتراحاتك دي ما فكر فيها عبد المنتقم خاصة بتاع العطاء ده …. اتخيل طرحوا 40 وزارة اتحادية و 400ولزارة ولائية في عطاءات وكل واحدة الرسوم بتاعتها ألف جنيه بس ( بي بتاع نميري عليه الرحمة) طبعا ح يتقدموا 20 مليون سوداني من داخل السودان و 40 مليون سوداني من دول الجوار والرسوم دي لا ترد … شوفا تطلع ليهم كم

  10. هاشمو 2 :
    تحياتى .
    تعرف لمن نلم القروش دى نعمل شنو ؟؟ نشيل قروشنا ونتخارج نخليها ليهم زى ما قال جبرا ..
    طبعا ما حيلقو طريقة غير يبيعوها – نقوم نجى نشتريها منهم وتبقى ملك حر ومافى زول يقدر يغالتنا بعد ده ممكن ننتدبهم يشتغلو معانا يخدمونا بى قروشنا اللى هى قروشم ولا كيف ؟؟

  11. السلام عليكم ، البرف الاخوان ، ما زمان قلنا يعملوا القصه بى القرعه ، ويخلونا نحن بره ، لانو ما عندنا مؤهلات التماسيح ، كرش و حلق و فم ثعبانى ، و افليقا لا نو دورة التلاتين دى فى ناس ما بيلحقوها من امراض اللغف المعروفه ، عشان كده يجوز توريث المنصب اذا لا قدر المولى و اختاروا للمجاوره ، سؤال خبيث : حسه دى فاتحين استيراد العربيات المستعمله ليه ؟ ……………. عجبى

  12. الموت ما افتكر انو حايموت حانموت نحنا لكن ممكن يشيلو فايض عماله زيي اخونا صاح صاح يا

  13. بت وراق…سلام..
    انا وابوى السلاوى جينا السودان واتلخمنا مع الغلا دا !
    وكوكو ظهر,وسهيل شكلو حايم فى السوق بالجد جد! شئ ملايات وشئ لبسات وكدة..
    شكرا للتفقد وخليك قريبة…

  14. دا انا غلباااااااان | رد

    البروف والاخوان
    السلام عليكم
    الشئ حكومه واللا كرة طائره

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: