الاختشوا ماتوا

في كل بلاد العالم هنالك نظام للضمان الإجتماعي أو التأمينات الاجتماعية ينشأ من أجل حماية العاملين وأسرهم عند تعرضهم لأى من مخاطر الحياة المتمثلة في الشيخوخة والعجز والوفاة وإصابات العمل وما إلى ذلك حيث يتم إستقطاع نسبة من مرتب العامل على مدى سنوات عمله حتى إذ ما تقاعد لأى سبب كان يقوم نظام التأمينات بإعادة هذه الإستحقاقات له على داير المليم (وفى بعض الأنظمة معاها حاجه) نتيجه الأرباح التى يجنيها (النظام) عبر أكتنازه وتدويره لهذه الأموال الطائلة .
يعني بالعربي كده نظام التأمينات الإجتماعية معمول (أساساً) من أجل تأمين حياة (كريمة) للمشتركين فيهو بعد تركهم للعمل عشان الناس دى بعدما تتقاعد ما تمشى (تشحد) وكده ، عندنا (كالعادة) فالوضع مختلف تماماً .. وقد تعرفت على هذا الإختلاف من خلال عدة رسائل وردتنى عبر البريد الإليكترونى يشكو أصحابها (لطوب الأرض) ورب السماء عما يقوم به (الصندوق القومي للضمان الإجتماعي) من (همبته) وقلع (راسو عديل) !
تخيل معي عزيزى القارئ أن جميع العاملين في طول البلاد وعرضها .. في القطاع الخاص والهيئات العامة والشركات والبنوك وأصحاب الأعمال الذين يستخدمون عاملاً فأكثر وأصحاب المهن الحرة وأصحاب الحرف (الناس دى كووووووولها) شهرياً يذهب ما يعادل 25% من مرتبها (7% المؤمن عليه و18% صاحب العمل) إلى هذا الصندوق الذى من أولي مهامه (ضمان) حياة كريمة لمشتركيه الذين يودعون بعض من مرتباتهم لديه (بالسنوات) !
طيب .. ماذا يفعل (الصندوق) بكل هذه الأموال ؟ سألت أحد الذين (يشكون لطوب الأرض) فأجابنى :
– شوف يا أستاذ معظم الأبراج الشاهقه فى أحسن مواقع في الخرطوم دى بتاعت الصندوق ! ومش كده وبس كمان أغلب المخططات السكنية القاعدين يعلنوا عنها فى الجرائد والتلفزيونات دى بتاعت الصندوق ! ومش كده وبس الصندوق ده عندو شركات شغاله في سوق الله وأكبر ده .. ومش كده وبس !
– أها شنو؟
– بنص القانون يا أستاذ كل أموال الصندوق الثابتة والمنقولة وجميع عملياته الإستثمارية مهما كان نوعها (معفاة) من جميع أنواع الضرائب والرسوم والعوائد والعمولات التى تفرضها الحكومة أو أى سلطة أخرى ! يعنى بيستثمروا فى قروشنا دى لا ضرائب لا رسوم لا عوائد لا يحزنون ! يعنى (ربح) مضمون !
– طيب وإنتا المزعلك هسه شنو؟
– أيوااا يا أستاذ ح أقول ليك بس في الأول إنتا متأكد إنك أخدت حبوب (الضغط) الليله !
– قول عادى بقينا نتوقع أى حاجه فى البلد دى !
– طيب يا أستاذ قول أنا أشتغلتا عشرين سنه ومشيت أشيل قروشى الكان بيستقطعوها منى الناس ديل وقاعدين الزمن ده (كووولو) يستثمروها ويشغلوا فيها مفروض يدونى أرباح عليها كم؟
– والله أنا بفتكر إنو يشوفو نسبة (الأرباح) السائده كم ويضربوها ليك فى عشرين سنة حسب كمية قروشك العندهم ! ويدوك ليها زائداً إجمالي المبلغ الأساسى الكانو بيستقطعوهوا !
– إنتا يا أستاذ (موتوأكد) إنك بلعتا الحبوب !
– يا زول قول .. يعنى ح يكون أكتر من (الخط الإتسرق) !
– الناس ديل يا أستاذ بعد (جري ومساسقة) أدوني قروشى ناقصة 18%
– (في إندهاش) : معقوله ؟ ليه كده ؟
– (وهو يضحك باكياً) : قال أيه رسوم إدارية !!

كسرة :
إدارية يا ظلمة !! الإستثمار قروشوا خليناها (وما عارفنها بتمشى وين) .. كمان تشيلو من (اللحم الحي) والله صحى الإختشوا ماتوا .. حسبنا الله ونعم الوكيل … حسبنا الله ونعم الوكيل ..!

13 تعليق

  1. سلامات …

    إنشاءالله ما تنفعهم .. وتدخل عليهم بالساحق و الماحق .. ببركة هذا الشهر الكريم

  2. البروف والسمار .
    سلامات .
    سهيل مبروك البرنجية . حالتك جايى إطناشر .
    يابروف الناس ديل مابشيلو 18% ديل بيشيلو 25% ولمن سألتهم لية قالولى نحن مرتباتنا وكهربتنا ومكيفاتنا دى نطلها من وين وبعدين نحن لو خليناك بتقدر تطلعا براك من الشركة دى ؟ والله قرش ماتطلعو .
    هذا ماقالوة لى ناس التأمين بالحرف الواحد.
    حسبنا الله ونعم الوكيل .
    لكن قالولى لوعندك زول قرن فى التأمينات دى ممكن يطلع ليك سلفية منهم …

  3. يا حنين .. انا عاوز اشتري بيت … عندك زول قرن يشوف لينا طريقة سلفيه ؟؟؟ و مابقصر معاهو

  4. السلام عليكم البروف والسمار الكرام
    صوم مقبول وذنب مغفور وخواتم مباركة إنشاء الله
    والله هذه مشكلة تطرقت إليها في وقتها …. وكنت أنا قد حكيت في إحدى مداخلاتي قصة أستاذي الذي جاء ( يشحذني) وقال لي أنه نزل المعاش منذ عامين ولم يستلم شيئا حتى الآن (كان الكلام في شهر 12سنة 2010 وأظنه لم يستلم حتى الآن. وقد كرهت انا نفسي وكدت أقضي خجلا وحياءا من أستاذي وأسفا علي البلد التي يضطر فيها مثل هذا أن يشحذ … فقد كنت أعرف قدر الأستاذ وعزة نفسه وأنه ما هان عليه سؤالي ولا سؤال غيري لولا الضرورة الشديدة …. وعندما سألت عن الأمر قيل لي أن ولايتنا ( البحر الأحمر ) قد أوقفت التعيينات والترقيات وال… و.. والمعاشات أيضا منذ خمسة سنوات – طيب عرفنا التعيينات والبدلات والزيادات أفلا يحتاج أصحاب المعاشات حتى إلى مصروف يومي؟ الحاصل أن الصندوق القومي لا يدفع لهم لأن ولايتهم لا تورد! فمن أين يعيشون؟ أم أن دخول المعاش معناه أن الواحد لم يعد بحاجة إلى الأكل والشرب واللبس وغيرها؟ هل يتوقف عن الحياة لأنه دخل المعاش؟ ثم ما سر ظاهرة الأبراج التي تبنيها كل نقابة وأهلها يتضورون جوعا؟ هذا الرجل معلم قديم وقد درسني أنا من 1973إلى 1976 وغيره كثيرون أفلا يحق لهم في برج المعلم وقاعة المعلم وغيرها من الأبقار الحلوب؟ أخوتي …. نحن في بلد لم تعد تستحي …. ألا يستحي هؤلاء المسؤلون من أن يتركوا معلميهم وآبائهم وأعمامهم يشحذون؟ أم أن ذنبهم أنهم لم يدركوا زمن الإنقاذ في شبابهم؟ يحضرني بيت متداول ركيك يقول : تموت الأسد في الغابات جوعا …. ولحم الضأن تأكله … القطط … معليش

  5. الأحباء الأعزاء .. ما عندنا شئ غير نردد : حسبنا الله ونعم الوكيل !

  6. البروف : لالالا اوعك تقول حسبى الله ونعم الوكيل تعرف ليه
    لانو ممكن بره يعملو ضريبة على حسبى الله – ودمغة على نعم الوكيل مش بتريحنا الحركه دى لازم يسوو لينا فيها ضريبة .. اوعو توروهم محل بريحنا وين ؟؟؟ لكن يا بروف مش فى حاجه غريبه شوية انو الله نعم الوكيل سايب الناس ديل كم وعشرين سنه ؟؟؟ غايتو يا هم صاح يا ربنا بيمد ليهم فى طغيانهم يعمهون
    يا نحن غلط وربنا بيعذب فينا بيهم ؟؟!!!
    حسبى الله ونعم الوكيل

  7. والله يابروف والله العظيم انا شفتو في نفسي وبالجد مفجوع من ناس التأمينات ديل وملدوغ منهم لدغة شديدة ولي سنتييييييين بساكك فيهم بس في 5 مليون بالقديم ولي هسة انا في مربع (امشي وتعااااااااااااااااااال بكرة), حسبي الله ونعم الوكيل

  8. براكم ياجماعة قلتو صندوق التامينات يعنى ماتمنينو على اموالكم طيب ماتتفكر فى قوله تعالى: ” إنا عرضنا الأمانة على السماوات والأرض والجبال فأبين أن يحملنها وأشفقن منها وحملها الإنسان إنه كان ظلوما جهولا *
    وخير الكلام ماقل ودل
    كسرة:
    الوافر ضراعو أمنتو الرسول مأمون الوداعه برد دار أبوه

  9. والله يااستاذديل نقعدنحسبن كداااااللحول ماتفرق معاهم ديل اكلوالجمرفي بطونهم مال الايتام وبعدين ماسمعتوبسمسرةمديرالتامينات ومرتوكمان في اراضي الابراج دي وبعدين اموال المعلمين دي تعالولينافي المهندسين تلقوبرج المعلم نورالدائم ومستشفي المعلم نورالدائم ولعلمكم نورالدائم هومعلم بسيط لايملك قوت يومه الاان جاءت الانقاذفاتي عضومجلس اربعيني وامين مال المعلمين وبعدان كان يتلقي اعانات من اهله صارمن اصحاب المال والجاه والسلطان وهوالمسؤل عن استثمارات المعلمين وتحول برج المعلم بقحرة قادرللمهندسين ةمستشفي المعلم للسجانة

  10. والادهي والامر إنك لو عايز توقف الإستقطاع ما حتقدر ودونكم قضية معلمي ولاية الخرطوم.

  11. يا جماعة الموضوع ما بي البساطة دي. والمشكلة في تحايل أصحاب العمل علي القانون وعدم التأمين على العاملين بالراتب الحقيقي. وأرجو من الأخ الفاتح مراسلتي حتى أوضح له الحقائق حتى لا ننهش في لحم الناس بلا علم ونبقى ذنوب علينا ساي

    1. أخونا محمد أحمد تحياتي وكل سنة وإنت طيب
      كنت أتمنى طالما قد تداخلت في هذا المكان الذي هو ملتقى لناس كتار أن يكون توضيح الحقائق لهم وليس بعد مراسلتك من (الأخ الفاتح) ونتفادى جميعا النهش في لحم الناس بلا علم .. أرجو أن أسمع منك تلك الحقائق هنا أخي محمد أحمد.

  12. أنا والله يا جماعة أي حاجة فيها تأمينات في البلد دي ما قادر أفهما عندك صندوق التأمينات عندك مركز شوامخ للتأمينات عندك الصندوق القومي للتأمينات عندك التأمين الصحي المصيبة الكبرى يكونوا كلهم يستقطعوا منا عشان كده الراتب بيجي نص

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: