قرشين حلوين

يبدو أن الحكومة بعد أن فشلت في محاربة الفقر .. قالت أحسن تحارب (مخرجاتو) فقد أوردت الصحف قبل أيام قلائل خبراً جاء فيه بأن وزارة التنمية والرعاية الاجتماعية بولاية الخرطوم قد كشفت عن انشاء 40نقطة (ارتكاز) بولاية الخرطوم وذلك للحد من ظاهرة التسول وأنها من أجل نجاح هذه المهمة فقد قامت باللتنسيق التام بينها وبين الشرطة وامن المجتمع وقد جاء فى نهاية الخبر الذى نقلته SMC أن 90% من المتسولين هم من دول الجوار !
العبد لله يعتقد بان القائمين على أمر مكافحة التسول بإنشائهم لهذه النقاط الإرتكازية إنما يهدرون موارد الدولة
فإنشاء 40 نقطة إرتكاز ليس بالشئ البسيط كما أن ما يتبع ذلك من تواجد شرطي وأمنى وترحيل وإعاشة لهولاء المتسولين شئ مكلف ومن غير المعقول أن يقوم المواطن بدفع هذه النفقات ليجد نفسه قد أصبح نفسه متسولاً !
لذلك فالعبد لله يقترح على المسئولين الإستفادة من هؤلاء المتسولين (بدلا من أن يكونوا عالة على الدولة والمواطنين) وذلك بإنشاء (المجلس الأعلى للتسول) والذى يقوم بتنظيم أعمال هذه المهنة وأهو برضو الحكومة تطلع ليها بي (قرشين حلوين) .
تبدأ الحكاية بإعلان يتم بثه فى جميع الوسائط الإعلامية يقول .. عزيزى المتسول عزيزتى المتسولة .. تسول وفقاً للقانون وذلك بتسجيلك فى (المجلس الأعلي للتسول) .. عزيزى المتسول .. سجل الآن وأحصل على الرخصة !!
– (صوت جهورى) : سجل الآن .. حصولك على الرخصة يضمن لك التسول بحرية !!
الحصول علي (رخصة متسول) ليس بالأمر الشاق والرسوم التى قررها المجلس الأعلي للتسول جعلها تكون في متناول كل متسول .. 100 رسوم كشف طبي 150 جنيه رسوم رخصة (متسول تحت التدريب) ثم 250 جنيه رسوم (مدرسة تعليم فنون التسول) والتى تقوم بتأهيل المتسول تحت التمرين نظرياً وعمليا على أحدث تكنولوجيا التسول .. 120 رسوم الرخصة النهائية والتى تتيح للمتسول التسول فى محلية واحدة يقوم بتحديدها أما إذا أراد المتسول الحصول علي (رخصة عامة) تتيح له التسول في أى محلية عندها تكون الرسوم 450 جنيها !
بعد المهلة التى أعطتها الحكومة للمتسولين (لتوفيق أوضاعهم) تبدأ الشرطة والنظام العام فى عمل كشات وكمائن للقبض علي المتسولين (البدون رخصة) وتقطيعهم إيصال مخالفة (متسول بدون ترخيص) مقدارها 30 جنيها أو الحبس لحين السداد !
ولأن التلاتين جنيه غرامة (ما هينة) وقد تكون هى محصلة (تسول يوم بحالو) فسوف يضطر المتسولون (الغير مرخصين ) بالترخيص ! خاصة بعد إنشاء (جهاز التهرب التسولي) وكشات وكماين (مباحث التسول) !
– أقيف هنا يا زول .. رخصتك وينا؟
– إنتا ما شايفا معلقا أهي فى رقبتى
– طيب رخصتك بتقول إنك متسول فى أم درمان البجيبك الخرتوم شنو ورخصتك ما عامة !
– والله في الحقيقة أصلو .. يعني
– لا أصلو ولا فصلو .. الإيصال إنقطع يلا أطلع لينا 30 جنيه !!
بعد التأكد من أن معظم المتسولين قد أصبحو تحت مظلة (المجلس الأعلى للتسول) يتم إنشاء (جهاز ضرائب المتسولين) وعمل ملف ضريبى لكل متسول يحتوى على صورة من (رخصة العميل) ويحمل رقمه .
– ضريبتك يا حاج تلاته مليون ونص !
– (فى دهشة) : قلتا كم ؟
– قلنا ليكا تلاته مليون !! حكاية إنك أطرش وما بتسمع دى أعملا هناك فى الشغل !
– لكن يا ولدى القروش دى مش كتيره؟
– يا حاج أحمد ربك دفعناك تلاته مليون وإنتا بتتسول فى (كافورى) والله الزول داك بيتسول فى (الملجه) دفعناهو 4 مليون !
يوماً بعد يوم تتزايد إيرادات (المجلس الأعلي للتسول) وفروعه الممتده على أرض السودان (الفضل) ويقام فى وسط كل مدينة برجاً شاهقا ذو نوافذ زجاجية (مظللة)يحمل إسمه مؤثث بأحدث وأفخر الأثاثات والستائر والموكيت (وطبعن التكييف المركزى الباااارد) تقبع أمامه أرتالا من السيارات الفارهة هى سيارات (العاملين) عليه !
كسرة :
بعد أن قالت وزارة التنمية والرعاية الإجتماعية بأن 90% من المتسولين هم من دول الجوار تأكدت تماما بأن هذه الوزارة تستخدم آلات حاسبة (صينية) !

Advertisements

27 تعليق

  1. السلام عليكم
    90 بالمائه من دول الجوار نقول اقتنعنا يعنى العشرة بالمائه سودانييييييييين
    هل عمل نقاط هو الحل ,, الحل الحكومه تشوف ليه هم بيتسولو والمحتاج فعلا مفروض يتوفر ليه مصدر رزق
    وزى ما بيقول المثل علمنى صيد السمك ولا تعطنى سمكه .. ياحليل عمر بن عبد العزيز لمن قال انثرو الحب على رؤوس الجبال حتى لا يقال جاع طائر فى زمان عمر
    ونحن عندنا جاع شعب كامل ولله الحمد

  2. حاج أحمد السلاوى | رد

    يا الفاتح .. ياخ ماقلنا ليك بلاش من الأفكار الجهنمية دى ..
    الجماعة ديل بكرة يطبقوها عملياً فينا ..والخيل يجقلبن والشكر لحماد..
    انا غايتو باقى لى الرخصة العامة بس..وحجزت لى زاوية فى كافورى مافى زول يجى ينافسنى فيها ..

  3. يا سلولو – عمك بشيل ويدى فى الافكار لناس عبد المنتقم.
    الخوف بعد شوية يشيلو عبدالمنتقم ويعينوهو مكانو.

  4. والله يا بروف خليتنا نشك فيك / انت معاهم و لا معانا

  5. البروف : اى نعم التنظيم مهم لكن انت اتلومتا معانا شخصيا فردك مفروض اول ناس ترخص وتعمل تدصيق نحنا بعدين تشوف المواطنين لانو الاقربون اولى بالمعروف ..
    بعدين قصة دول الجوار دى حلوه خلاس اسى عليك الله نحنا من كترة دول الجوار الخشت فينا مش بقينا الجالية السودانيه فى الخرطوم ؟؟!!!!!
    اكتر حاجه محيرانى انو الحبش ديل برغم انهم كتار فى بلدنا لكن ما بيشحدو يا ربى يكونو بينشحدو ؟؟!!!!

  6. والناس البشحدوا جنب الجوامع رسومهم تكون كم ؟ ضرائبهم كم ؟ فيها قيمة مضافة ودمغات شهيد وجريح والذى منه

  7. البروف والسمار .
    صباح الخير .الشحدة المقننة دى كويسة ومفيدة للدولة وبالطريقه دى الحكومة تكون إتخلصت من كمية كبيرة من العطالة لأنو فى ناس كتار حايقدمو فى المهنة الجديدة دى لكن المشكلة تكون شريحة المتسولين ديل أكتر شريحة مستهدفة من قبل المحليات ولو ولدك دخل الجامعه وولى أمرة وظيفتة متسول حايفرضو عليهو رسوم أكتر من رسوم الشهادة عربية لأنها وظيفة مرموقة والوالى بيطلع قرار ويقول حانزيد رسوم الموية لفئات رجال الاعمال والمتسولين .
    مالك ياخ

  8. والله بالجد مبسوطة منك وخاصة قبل فترة تحدث والي الخرطوم عن الظواهر السلبية في الولاية (بالطبع لم يتحث عن سلبيات الوالي!!!!!!!!!!!! ) وذكر من ضمنها وقال (ظاهرة التسول غير المنظم ) معناها عندهم الفكرة وبي كدا ممكن يكون مقال اليوم دراسة جدوي جيدة للحكومة

  9. تقول حاجة نفيسة لصديقتها آسيا: أماني بت الحرم قالوا ختبا واحد أبوهو متسول عندو رحصة دبلوماسية .. بدفع ضرايب 5 مليون في السنة .. أريتو حال بتي يا يمة .. ويأتي حاج صالح لشلتو تحت النيمة يا جماعة الخير .. حاج برهان مما طلع الرخصة العامة بقى ما شغال بينا الشغلة .. بقى يومو كلو مقضيهو في المنشية وأركويت .. وقال حالف لو ما عمل ليهو عمارة معاهم ما بجي .. يرد عليه حاج مدثر: هو النافعاهو بت أخوهو المفتشة في ضرايب المتسولين .. عاملة ليهو إعفا من الضرايب بإنو ما شغال الفترة دي !! وكمان ود عمو الشغال في جهاز السودانيين المتسولين بالخارج .. قال إحتمال يجيب ليهو زيارة للسعودية في العشرة الأواخر من رمضان !!!
    .
    .
    والله يا بروف .. إت بتجنن ليك زول يوم !!!

  10. الأحباء الأعزاء … والله أنا بقيت أشك فيكم عديييييييييييييييييييل كده ! يا ربي برضو حسن كابوس؟

  11. حاج أحمد السلاوى | رد

    الفاتح .. أمس إتصل على السيد الوالى وقال لى عاوزنك تشرف علينا على جهاز المتسولين السودانيين فى مدينة جدة والمنطقة الغربية كووولها … رايك شنو ؟؟أهو برضو قرشين حلوين للأيام السودا الجاية ..
    شنباتى .. مش حتقدر تزوغ منى كدا ولا كدا .. جهز ضرايبك.. إنت وكل الفاعدين معاك فى الحُفر بتاعتكم خارج مكة ..

  12. الله يديكم العافية والله صراحة مفرقين علينا غربتنا وهمنا….والناس ديل ما بستبعد عليهم أي شيء كل شيء وارد.
    لكن الواحد وصل مرحلة المسطول الوزع ورق أبيض فاضي على أساس انه منشورات ولما ناس الأمن قبضوه قالوا ليه يازول منشورات شنو الورق دة مافيه أي كتابة؟؟؟قال ليهم هي عاوزة ليها كنابة.

    تحياتي لكم جميعاً وخلينا نحلم ببكرة احلى……………

  13. سلاوى..
    والله خبر سعيد..طيب المستشار بتاعك منووووووو!؟؟ انااااااااااااااااااااااااااا

  14. حاج أحمد السلاوى | رد

    شنباتى ..ح أرد عليك زى رد المسطوا اعلاه فى مداخلة أم خولة … هى عاوزة ليها مستشار ..ولا إستشارة ؟؟؟
    واحد من جماعة الإنقاذ فى بداياتها واظنو صلاح كرار قال إنتهى عهد التسول وفى النهاية الشعب السودانى كوووولو بقا متسول..فى حين إنو وزير الخارجية السابق مصطفى عثمان قال إنو الشعب السودانى كان كلو متسول قبال الإنقاذ ياريت لو خلونا على تسولنا القديم..

  15. كراااااامة لله
    ساعدوووووني يااااااا جماعة
    هوي ما تفهموني غلط،، أنا بشحد لي كلمتين أكتبن معاكم
    النبي يا جماعة الناس ديل كشوا الببيعوا ما يكشوا البشحدوا؟
    الحل الوحيد في البلد دي انك تسرق. حصل شفتوا ليكم حرامي كشو؟؟؟؟

  16. كيييف,دا كلامك..مستشار ومفوضية ومجغمية ولجان طالعة ولجان نازلة واستقبالات واحتفالات,كمان ما تنسى انى مندوبكم الداااائم لدى المطار ! اممممممممممممممم..
    يعنى ماشين نقلع منهم جايين نقلع منهم ! شنو ليك؟

  17. اخي جبرا والاخوه الاعزاء
    انا متاكده انو الرخصه دى حيطلعه كل الشعب الفضل بس المشكله ياجبره ح يتسولو وين والبديهم منو ما الشعب كله متسول
    يا اخوى ياحاج احمد عندى اخواني معاكم هناك ح ارسل معهم ورقه صغيرونه عشان تعفيهم لينا موش نحن معرفه وكده وبالمره نكون استفدنا من الفاتح جبره العرفنا على بعض
    وانت يايسين شمباتى (ان مطوعه اعمل ليك عرس المتسول )

    1. يا بت وراق لما الشعب كله يرخص للتسول أكيد في واحدين وبالذات البيتسولوا في كافوري والمنشية ديل بيغنوا بسرعة وأولادم بيتخرجوا ويرطبوا وبكدا فكرة أخونا الفاتح تتضح بإختفاء ظاهرة التسول بعد مالشعب كلوا يشتري ليهو عقارات ويبيعا أصل المتسول يومة ما بيقل من 60 جـ * 30= 1800 في الشهر والولد الكبير كمان 1800 ، المرة برده 1800 يعني دخل الأسر البتتكون من ثلاثة متسولين بعمل5400 في الشهر فهمتي الفكرة يلى بس هم ينفذوا فكرة الفاتح وربنا يوفقك برخصة عامة .

  18. بت وراق..
    ما قصرتى والله !ودا فى ياتو كوشة ؟؟

  19. ياسين شمباتى
    اكيييييد فى كوشه هو فى عرس من غير كوشه (عشان تلبس الحريره وتضوق الضريره ) للمعلوميه ح يكون عرس المتسول احسن من عرس الشهيد التراجعوا منو الجماعه وطلع اوانطه ساكت واذا اتلقى التسول تراكه عرسته وبقيت مستشار

  20. عرفنا الرخص طلعت و الدجهاز التنظيمي قام و اتحددت المناطق و ده كلو هين و معقول لكن الماعملنا حسابو هو يشحدو من منو اذا كان الشعب كلو في الدائرة دي الا في ناس فيهم باقي كرامة و حسبهم اغنياء من التعفف و واسفا على الشعب الفضل.
    كسرة:
    عليكم الله خلو لي الناصية بتاعت مقر الحزب في شارع المطار لاني عايز اتم حق العرس

  21. بت وراق..
    الحريرة بلبسها لكن الضواقة بى كم !؟؟

  22. حاج أحمد السلاوى | رد

    شنباتى .. بنضوقك مجاناً .. إنت بس تعال..

  23. سلاوى..
    لاااااااااااااااااااااااااااا,,خليتها ليك انت الضواقة دى ! آيييييييي

  24. ألسلام عليكم
    أولا أنا مقتنع بأن 90% من المتسولين من دول الجوار لأن 90% من الماشين في الشارع من دول الجوار و 99% من العاملين المنتجين من دول الجوار فلماذا لا ننكر عليهم أن ينتجوا وننكر عليهم التسول؟ المتسولون مفيدون لنا فنحن لدينا من النفاق ما يجعلنا نتظاهر بالغنى رغم جوعنا وفقرنا وهواننا كما أن هؤلاء المتسولون يجعلوننا نعتقد أن هناك من هو أسوأ حالا مننا …. وأيضا لا تنسوا أن هناك من يخرج من الصبخ ليتصدق بجنيه وهو يتوقع أن تعود له هذه الصدقة بفوائد عديدة جدا في نفس اليوم
    ثم إيه حكاية الرخص دي؟ لا زلت أذكر رخصة إفطار الصائم والكشف الطبي بتاعها ( أتمنى أن يعاد نشرها ) و (لمستقرن لها) ورسوم عدم إقامة حفلة أو عزاء و غيرها ولكنني أخشى أن يستفيد عبد المنتقم من بعض أفكار البروف فنجد أنفسنا في خاجة إلى رخصة أو تصريح للبس الجزمة أو لف العمامة و …. يا حيذا لو غملوا رسوم على توليغ السيجارة …. بحسب الكبريت أو الولاغة المستعملة وبالنظر لإلى ماركة السيجارة …. ح تقول إيه يا بروف؟

  25. بروف تحياتى

    كلتا بتاعين كلام / و عمره الكلام ما ودى لى قدام
    كلام فى كلام / احسن نشوف ليهم سيد بتاع ( سودانى ) و يا ساخر سبيل ارضى بالقليلو الله عايز تلحق عم صابر/ و نلاقيك ماسك قلم البك فى ناصية مروى بوك شوب

  26. اها لو دايرين لينا اربعة رخس انا والبنات وأمهم في تخفيض في الحاله دي

    وش منطط عيونه:)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: