قفة صابر

خرج (عم صابر) من منزله وهو يفكر فى كيفية الحصول على حق المواصلات الذى يمكنه للذهاب إلى المعاشات لصرف معاشه الشهري ، لم يكن بإستطاعته الإستدانه من (آدم ( سيد الدكان ففى ذمته له أكثر من (تسعين ألف) كما لم يكن بإستطاعته ايضاً الإستدانه من فوزى (الجزار) أو عوض (بتاع الخضار) أو محمد (سيد القالة) فكل هؤلاء قد إستلف منهم ولم يستطع التسديد لهم منذ وقت طويل .
تحسس عم صابر جيب جلابيته وجد جسماً معدنياً صغيراً يقبع هنالك .. أخرجه فكانت خمسمية جنيه .. أتجه مباشرة قاطعاً الظلط للجهة الأخرى نحو عوضية ست الشاى .. جلس على أحد البنابر وخاطبها قائلاً :
– بالله يا عوضية كبي ليا كباية شاى !
– ساده وللا بي لبن يا حاج
– ساده يا بتى .. اللبن ده كان زمااان
مع كل رشفة شاى كان عم صابر يعمل تفكيره محاولا حل المعضلة التى تواجهه وهى إيجاد ثمن المواصلات حتى يستطيع الذهاب إلى المعاشات لإستلام معاشه الشهري .
– عوضية أنا ماشى أجيب معاشى وعاوز ليا دين الله والرسول أركب بيهو المواصلات
– عاوز كم يعنى يا حاج !
– يعنى قولى خمسة ألف !
أمسك عم صابر بالخمسة ألف التى أعطتها له عوضية بعد أن أعطاها خمسمية الشاى وقام من البنبر يا الله يا الله متجها نحو الحافلة التى كان سائقها ينادى :
– السوق .. السوق
توقفت الحافلة فى سوق أم درمان أمام الجامع الكبير وكان على (عم صابر) وهو يتجه إلى حافلات الخرطوم أن يمر بأكشاك الكتب المتناثرة أمام الجامع ، وهو يسير بين الأكشاك ناظرا لعناوين الكتب التى كان بعضها مفترشاً على الأرض إستوقفه عنوان كتاب صغير مهترئ ( تحضير الجان المسلم ميمون) !
أمسك عم صابر بالكتيب الصغير ، نفض عنه الغبار ثم قال مخاطباً صاحب المكتبة :
– الكتاب ده بي كم ؟
– خمسة الف يا حاج !
– طيب عشان (ميمون) ده مسلم وكده ممكن تخفضوا لينا شوية ؟
– خلاص جيب ألفين يا حاج !
كان النهار قد إنتصف وبدأت حرارة الشمس فى الإزدياد لذا آثر (عم صابر) العودة للمنزل وترك قصة المعاشات دى ليوم تانى خاصة أن ما تبقى لديه من (قروش عوضية) ألفين ونص لا تمكنه من العودة إلى منزله فى حالة إنو (لقى المعاش ما نزل) ، لذا قرر ركوب الحافلة عائداً إلى المنزل ..
ما أن جلس عم صابر على كرسى الحافلة حتى قام بفتح الكتاب الذى جاء فيه بأنه من خلال هذا الكتاب يمكنه تحضير الجان (ميمون) والإستعانة به فى توفير معايش الحياة بعد أن فشل جميع (البشر) الذين تقع علي عاتقهم هذه المسئولية.
ما أن وصل (عم صابر) إلى صالون المنزل الذى يستخدمه كغرفة خاصة به حتى استلقى على السرير وأخرج نظارته الطبية رافعاص الكتاب فى إتجاه ضوء النافذة حيث بدأ في قراءة محتوياته فى شغف كانت صفحات الكتاب المهترئة تحكى عن كيف يمكن للجان ميمون أن يساعد كل من يقوم بتحضيره وينفذ له كل طلباته من مأكل ومشرب وقروش (كاش) كمان .
– أهو ده الأنا عاوزو ذاتو .. عشان نتفكا من المعاش الما جايب مشوارو ده
هنا دخلت إلى الصالون حاجة (سعدية) زوجة (عم صابر) تساله :
– أحضر ليك حاجه تاكلها ؟
– لا أنا عاوز أحضر (ميمون)
– قلت أحضر ليك شنو؟ – مواصلة- عندنا عدس وفى كمان رشوشة
– متضايقا حضرى أى حاجه والسلام .. خلاس فرجت !
بعد أن تناول (عم صابر) الغداء عاد من جديد لمتابعة القراءة حتى إذا ما وصل إلى صفحة 16 هب قائماً فى تركيز فقد كان عنوان الصحة (خطوات تحضير الجان ميمون) :
1- أبدأ بالدخول إلى مكان مظلم لا تدخله الشمس
– دى بسيطة
2- قم بالصوم عن أكل اللحوم بأنواعها والبيض وكل ما هو حى لمده سبعة أيام وأفطر على الخبز وزيت النبات
– دى برضو بسيطة هو أنحنا قادرين ناكل لحوم مع الكيلو الحصل أربعين ألف ده !!
3- أشعل خمسة من أعواد الند ووقية من بخور اللبان والمستكه فى مجمرة ثم أتلو الأسماء السيريالية التاليه 4444 !!
– ما مشكلة إن شاء الله نقراها (مليون ألف مرة) يعنى شنو؟ مش أخير من العذاب اليوماتي ده؟
4- ثم بعد قراءة الأسماء كل مأئة مرة اطلب من ملك الجان (ميمون) أن ينزل بقولك :
يا ميمون ملك الجان أنزل وبان عليك الأمان !
– نقول ومالو !
5- بعد نزول ميمون ملك الجان أطلب منه ما تريد !
– هو في غيرها .. قفة الملاح الجننتنا دى !!
بدأ عم صابر فى الإعتكاف في صالون منزله بعد أن قام بإطلاق البخور وقراءة الإسماء المطلوبه مستعينا (بمسبحة) وورقة وقلم (لزوم حفظ العدد) .
فى اليوم المحدد لنزول الجان ميمون بدأ على عم صابر الإضطراب كان الوقت ليلاً والهدوء يلف المكان ، بدأت أرجاء الغرفة تهتز .. وإعصار من الدخان يتشكل .. ويتشكل ليصبح ماردا ضخما :
– شبيك لبيك .. عبدك ميمون بين يديك !
– (وهو يرتجف) : اس اس اس السلام عليكم أيها الجان ميمون
– وعليكم السلام .. طلباتك !
– هو في غيرها يا ميمون ؟ قفة الملاح يا ميمون .. . ما عاوزين حاجه بس كل يوم تجيب لينا قفة ملاح
إختفي الجان ميمون .. وجد (عم صابر) أمامه – حسب طلبو – (قفة ملاح) جديده (لنج) .. نظر داخلها وأخذ يصيح :
– اللحمة وين ؟ الطماطم وين ؟ الخضار وين !
هرع عم صابر يقرا فى الكتاب من جديد (عشان يصلح غلطتو) وجد مكتوباً علي الصفحة الأخيرة (لا يمكن تحضير الجان ميمون إلأ مرة واحدة فقط) !
كسرة :
إذا وجدت شخصا أشعثاً أغبراً جالساً القرفصاء فى المحطة الوسطى (يومياً) واضعاً أمامه قفه ملاح (جديده لنج) وهو يقول :
– اللحمة وين؟ الطماطم وين؟ الخضار وين؟
لا تعتقد بأنه (ثورة مضادة) يسعي لإثارة المواطنين … أنه (عم صابر) !

21 تعليق

  1. حاج أحمد السلاوى | رد

    جبرا .. قلت الكتاب دا لقاهو وين ؟ ممكن نلقا منه نسخة عشان نستعين بيهو خاصة ونحنا عرفنا الطريقة الصحيحة للإستعمال .. عندى طلب وااااحد بس وح أريحكم جنس راحة .. إنت والشعب السودانى كوووووولو ..

  2. صباح الخير على أحلى ناس
    حاج أحمد طلبك ده الله أعلم ميمون ولا شمشون ولا غيرهم يقدروا ينفذوا
    ده ح يقول ليك زي نكتة أدروب، قلت لي الكبري من وين لي وين؟؟؟؟
    عموماً لو لقيت ميمون ده ح أقول ليه ظبط لي حادث حركة كارب يخبطني فيه بص سياحي (بس ما أفراس لأنو حق جمال الوالي وهو تبع الجماعة ديل) ،،،…،،، على الأقل ناس البيت يستفيدو بالدية، وأكون ساعدت في دعم المخزون الإستراتيجي للبترول
    كسرة: أبوي الفاتح؛ سجارتك دي متأكد إنها برنجية

  3. حاج أحمد السلاوى | رد

    أخونا منصور .. إنت دحين عرفت طلبى حيكون شنو ؟؟؟؟؟؟
    بس خلى ميمون ( العريس .. قريتوها زماااااااااااااااااان ..ولا إنت من جيا ناش شنباتى ونازل ؟؟؟) يوصل لحد عندى ..وحترتاحوا راحة ابدية ..(بس ما تفهمونى غلط فى أبدية دى .. بقيت ليكم زى حمودة العركى )..وخلو الباقى عليا ..
    أها قلت شنو آآآآآآآ منصور أخوى .. عندك لى واسطة لميمون دا ..ولا أمشى المحطة الوسطى أفتش الكتاب ؟؟؟

  4. الاخوان الفاتح وحاج احمد وومنصور تحياتي لكم جميعا والله الواحد سعيد جداً ببالتواصل معكم . اولا احكي ليكم النكتة دي
    واحد في شارع الجمهورية بذوره في مناشير للعربات وكت الزحمة ديك ويكورك منشور …. منشور وهو يوزع وأي واحد رافع يدو ……
    واحد قال لزولنا ورقتي جاتني فاضية …. ؟ قال ليه ما الورق كوووووولو فاضي هي دي عاوزة ليها كتابة ……………
    عرفت ياحا احمد منصور عرفها طايرة هي عاوزة ليها كتابة ..
    ماتنسونا من لمن تلقو الكتاب من صالح القريشات وتقوموا تعملو نائمين وبكرة نلقي الكتاب ففي السوق السودان .
    تحياتي لكم جميعا ….

  5. معقوله بقينا نحلم بأبسط الحقوق المفروض تتوفر للمواطن
    الله المستعان

  6. أخونا منصور نسيت اقول ليك ربنا يكفيك حوادث الباصات ……..
    ماتبقي الحكاية بعدين كسير وكده وبعدين يعملو لينا دمغة جديدة وقسموها دمغة مكسرين علي وزن دمغة جريح و دمغة شهيد ومواسيييير وكدة ….
    سلمك الله تحياتي لكم جميعاً
    قلت ليا تأكدت من السجارة ؟؟؟؟

  7. الحبيب جبرا..سلامات وكفارة..
    والله بالغت مع عمنا صابر دا ! انا والله اتوجعت شديييييد وحسيت بى المو دا ,,,الله يجازى الكان السبب..

  8. السلاوى..
    جيلى انا جيل العطااااااااااااااااااااااااء

  9. جبرا والسمار ——هو ميمون دة جان وعضو فى المؤتمر الوطنى ؟ لانى بعرف ناس فى الوطنى دة ممكن ولمرة واحدة فقط يجيبو ليك قفة الخضار بدون لحمة ويكبو منك الزوقة زى ماعمل ميمون مع صابر — ارجو من سلاوى مراجعة كشوفات الحزب –

  10. وهو سلاوى بقى حزب هناى ولا شنو !؟؟ وى

  11. السلام عليكم ، البرف و الاخوان ، تعرفوا القرض و النبق ، الفقراء اتقاسموا النبقه و قرضه تكفى تلاته ، و الدبرسه خلوها ، د/ شمباتى هناى دى تقال لما يستقبح من اعضاء المرأة و هى من الاسماء السته و عملوها خمسه عشان هناى دى ، و ميمون القرد ده خليه يبقى بتاع قفاف ، سؤال خبيث : هو فى ناس لسه بتفكر فى لحم و خضار بالقفه ……….. عجبى

  12. بروف تحياتى

    كلتا بتاعين كلام / و عمره الكلام ما ودى لى قدام
    كلام فى كلام / احسن نشوف ليهم سيد بتاع ( سودانى ) و يا ساخر سبيل ارضى بالقليل و الله عايز تلحق عم صابر/ و بكره نلاقيك ماسك قلم البك فى ناصية مروى بوك شوب

  13. كوكو..
    انا ذاتى قاصد كدة ! وى…

    عثمان..
    انت زعلان للدرجة دى؟؟حاسب على نفسك ياخوى..

  14. السمار الأعزاء
    أخوي حاج أحمد كان ما عرفت طلبك ده إلا أكون بنغالي، بالمناسبة هو أدروب قبل الكبري كان عايز شنو؟
    عزيزي جبرا: الناس إضامنت معاي وعايزين يعرفوا نوع السجارة.
    تاني بالمناسبة : البلاقي الكتاب يصوروا لينا ويرسل لينا نسخة في السعودية
    بشارة: الزمن ده الحادث ما بكسر، بيقتل طوالي لأنو أساساً ماف حاجة يكسرها، الشعب كلو مكسور

  15. مواطن سودانى (مُخلَص) يغنى للهناية المرتقبة : والربيع اهو فات وانتى ما جيتى,,عمرت الساحات وانتى ما جيتى..
    حاشية :-
    الهناية= الهناية السودانية !!
    الربيع= ربيع الثورات العربية..
    الساحات= ساحات التغيير-ساحات التحرير-ساحات الفدااااااااء !!

  16. في اعتقادي انو لو ميمون دة قاعد معانا في السودان حايكون حالو من حالنا الغلبان بس حفظا لماء الوجه و محافظة على سمعة الجان جاب القفة و زاغ من الراجل المسكين لانو لو عصر عليو بي وبن اللحمة والخضار والله الا يدين من اخوانو الجان و ده بعني انو اولادو يجوعو و احتمال القفة تكون سجمانة يعني ربع ضان على حبت بامية مع كم حبة طماطم و كدة يعني ما حاجة قدر الجان و سمعتو هو يا اخوانا الجماعة خلو قروش في السوق لي انس ولا جان؟؟؟؟!!!!

  17. يا بروف : طوالى كده مره القلم وين عشان الشيك ومره اللحمه وين يعنى مره واحده كده مافى حم ينتهى بحلمنا الجميل

  18. واحد أمريكي سأل واحد سوداني: إنت أحلامك شنو؟
    رد عليهو السوداني: آكل وإشرب وأقري عيالي وألقى ليهم شغل يستر حالهم.
    قال له الأمريكي: أنا أسألك عن أحلامك .. وليس عن حقوقك … !!!

    كسرة:
    عرفت أمنية حاج السلاوي أن نظل (لن نذل ولن نهان .. ولن نطيع الأمريكان) وبكدا حنبقى كلنا مرتاحين زي راحتنا دي !!

  19. جبرة والسمار الكرام … التحيات والسلام
    المستغرب فيهو إن ميمون وجد القفة ولم يجد الخضار…. أصلو في محليتنا الأكياس ممنوعة وما لاقين حاجة نشيل فيها العيش غير (جيب الساعة) عشنا وشفنا عشرة عيشات يخشو في جيب الساعة …. بالحالة دي ح يجي يوم يكونن بالملي جرام
    بالمناسبة كتاب شمس المعارف الكبرى موجود في الانترنت …. ولكن أين تجد مكان للخلوة وأقمار قوقل تدخل القبور ,اين تجد اللبان والبخور الذي لم تنته صلاحيته؟ وغن وجدته فلا يكون بالدين وإنما نقدا ….. لا تمغصونا زيادة … الحاصل معروف ولن ينفع فيه جان مسلم ولا كافر …. فكل الجان قد صوتوا معانا في الانتخابات وبطاقاتهم معروفة للمؤتمر الوطني والشعبي والسر في العصاية …. ترى هل سيرجع السودان كما كان ولو بعد ألف عام؟

  20. الإخوة الأحباب الأعزاء ..
    سلام وتحيات
    معليش والله ماسكاني نزلة .. دكتور شمباتي ده شافا بى عينو .. وطبعن مع السجائر والتدخين الما منو وقفه ده أبت كلو كلو تزح .. غايتو الله يكون في العون .. النزله هينه .. مش كده؟

  21. الف لاباس عليك يا بروف,,,لكن التدخين دا جننا جن !@
    الله يقطعو ويقطع الانقاذ!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: