عشان ما نرفس وكده

بينما كان (حاج صديق) يجلس وسط زوجته وأبنائه يشاهدون النشرة الرئيسية في التلفزيون أذاعت المذيعة خبراً مفاده أن (المجلس التشريعى لولاية الخرطوم) يدعو المواطنين لمقاطعة شراء اللحوم بعد أن وصلت أسعارها إلى أرقام قياسية .
– عليك الله الناس ديل ما غبيانين يا أبومحمد
– كيفن يا حاجة؟
– هو هسه القادر يشتري ليهو لحمة منو؟
– والله صدقتى يا حاجه هسه لينا كم سنه البيت ده ما دخلتو لحمة
ما أن إنتهت نشرة الأخبار حتى تم الإنتقال إلى أستديو البرامج الحوارية حيث كانت الحلقة عن (مقاطعة اللحوم) :
– (المذيعة) : في البداية يحدثنا عضو المجلس الأستاذ (فلان الفلتكاني) عن هذا التوجيه الذى أصدره المجلس بمقاطعة اللحوم .. إتفضل يا استاذ
– بسم الله الرحمن الرحيم .. هذا هو دور المجلس وهو يقوم به خير قيام .. المجلس قلبو على المواطن عشان كده في ظل الغلاء والأسعار السائبه دى لازم المجلس يتدخل تدخل فاعل وقوى ويطلب من المواطنين يتوقفوا عن شراء السلع .. كل السلع السهرها يزيد مش اللحمة وبس
– (المذيعة) : عن خطورة أكل اللحوم يحدثنا الدكتور (علان العلاني)
– والله اللحمة دى يا جماعة لو إنتو عارفين ختره جنس ختورية ، اللحم ده شئ خطر شديد وله أثار مدمرة على صحة المواطن وهو منبع الكثير من الأمراض التي تجتاح الإنسان، وهو سريع التعرض للعدوى وللميكروبات التي تنتقل إليه من الأتربة والذباب وإنتو براااكم شايفين الضبان البيكون راكى فى اللحمة عند الجزارين قدر شنو؟
– شكراً ليك يا دكتور على التنبيه ده .. طيب ننتقل للشيخ (فرتكان الفرتكانى) يحدثنا عن مشروعية شراء اللحوم الباهظة
– بسم الله الرحمن الرحيم وبه نستعين .. أما بعد فإن الله يوصينا بعدم التبذير لأن المبذرين أخوان الشياطين وشراء اللحم بأثمان باهظة لا شك أنه تبذير وهو حرام والله أعلم.
– (الحاجه وهي تقوم بقفل التلفزيون) : مش اللحمة دى خليناها من زماااان
في اليوم التالي (لقرار المقاطعة) وبينما كان حاج صديق يقوم بشراء مستلزمات أسرته من السوق إندهش من خلو (الجزر) من أى مشترين ، كان الجزارون يجلسون أمام محلاتهم الخالية من الزبائن بينما اللحوم تتكدس على الطاولات والشناكل !
ما أن خرج حاج صديق من السوق إلى الشارع الرئيس حتى تناهى إلى سمعه أصوات مايكرفون :
– يلا علينا جااااي … العجالي عشرين .. عشرين العجالي
– نحنا عاوزين نبيع .. نحنا عاوزين نعيش
– يلا علينا جاي .. بي عشرين .. كلو الليلة ح ياكل لحمة
– بس بي عشرين .. بي عشرين بس ..
ما أن وصل عم صديق غلى مصدر الصوت حتى وجد (بوكس) يهرع نحوه المواطنون من جميع الإتجاهات (الأعمي شايل المكسر) موظفين .. عمال .. نساء .. أطفال .. بعد (مدافرة) وصل (عم صديق) إلى البائع وهو يقول في نفسه :
– دى فرصة تاني ما بتتعوض .. الأولاد ليهم سنتين ما أكلو ليهم لحم
– (ثم) : بالله أدينى كيلو ونص من الفخده دى !
ما أن دخل عم صديق إلى منزله حتى وضع الكيس (بزهو) على التربيزة وهو يسأل أولاده والحاجه !
– أنقروا جايب ليكم الليله شنو؟
– طماطم؟
– كذباً كاذب
– موز؟
– كذباً كاذب
وهنا لم يستطع طفله الشقى (حمادة) الإنتظار فقام بخطف الكيس وفتحه
– لحمممممممممممممه !
في لحظة إنطلقت تظاهرة تجوب ارجاء المنزل .. (الشعب يريد شية بالفحم) .. (الشعب يريد شية بالفحم) !!
سرعان ما قامت الحاجه بتوضيب اللحمة .. وتنويع طبخها .. شئ (شية بالفحم) وشئ (دمعة) وشئ ما بعرف شنو و(طبعن) تركت بعضاً منها (لليوم الأسود) ، تغدى الجميع (غدوة كاااربه) .. بعد الغداء ذهب حاج صديق إلى الصالون حيث إستلقى على السرير ليطالع أحدي الصحف الإجتماعية التى قام بإحضارها معه !
ما أن قرأ حاج صديق (المانشيت الرئيس) حتى أخذ (يرفس) فقد كان المانشيت يقول :
مصدر مسئول ينفي أن تكون بقايا الحمير التى تم العثور عليها في أطراف العاصمة قد أستخدمت فى الإستهلاك الآدمى !

كسرة :
الشعب يريد رقابة صارمة وفحص للحوم الفى الأسواق والمطاعم (فى الوكت ده بالذات) عشان ما (نرفس) وكده !

Advertisements

19 تعليق

  1. نؤيد الرقابة على كل شئ وليس اللحوم فقط

  2. البروف :
    نرفس شنو يا بروف هو نحنا ما رفسنا من الحاله الاستحمارية النحنا فيها دى حنرفس من اللحمه ؟؟
    بنفس مستوى المقاطعه حقو نقاطع التصريحات الحكوميه عشان المسئولين ديل ما يلقو زول يسمعم يقومو يحسو ويبطلو النقه ويشتغلو شوية . هرونا نقه بدون فايده .
    يا بروف كدى شوف لينا زول خبير يورينا كيفية التمييز بين اللحوم قبل الاكل مش بالاعراض الجانبيه بعد الاكل ؟؟ تكون عملت خير وممكن نعمل مشروع تمييز نوع اللحمه بالاشعه فوق النهيقية واهو قرشين حلوين
    وبكره نسمع عن معامل عرد هش لاب لتمييز اللحوم
    وممكن نسمع عن واحد فحص اللحمه من المعمل واكلا طلعت بتاعة حمير رغم الفحص قام ودوهو الاردن
    الله فى

  3. عووووووووووووووووووووووووع يا عمك …
    نرفس ليه يا عمك … ما نقوم استارتر احسن

  4. الأسباب التي أدهشت المسئولين وراء استبشار الشعب بقرارهم الأثيم !!!!!!!!!!!!!!!!
    1. موية فول، موية جبنة ، دكوة وعيش .. أحمدك يا رب :
    درج المواطن السوداني على دمج هذه الأصناف الثلاث كإستراتيجية طويلة المدى وعلى هذه الوجبة والتي يطلق عليها المواطنون اسم البوش ( فتة الفول ) تربى هذا الجيل العظيم ( جيل الفتة ) واللي همّ نحنا وبلا فخر طبعاً .. فطور وعشاء .. عيش بي(2000) جـ + موية فول بي( 300) + دكوة بي(500) + زيت بي(1000) = 3800 *2 فطور وعشا * 30الشهر = 228 جنيه بالجديد .. وطبعا ما زال المسئولون متحيرون ….
    2. اللهم أنعم علينا وأكرم ببيض ، ولبن ، وشاي ، وسكر :
    البيض ، والذي أصيبت أسعاره بحالة أخطر من جنون اللحم والطماطم ، حيث وصل سعر البيضة الواحدة الي(700)جـ بالقديم سعر البيضة ، وعلى فرض أن كل فرد في العائلة سيطمع في التهام بيضة يوميا ستكون حاجة الأسرة من البيض في حدود 120 جنيه شهريا.. أما السكر والشاي ، واللبن فخبط عشواء كدااااااااااااااااااا يساوي لينا حوالي 300 الشهر في المتوسط فتكون الحسبة بالتمام والكمال 420 جـ + ما قبله (فتة الفول) = 648 جـ يلى أنحنا ماشين كويس أهو .. وده إذا ما اعتبرنا أن الشاي يرفع الضغط والحليب يصيب بالإسهال والسكر من السموم البيضاء.
    3. تجاوز الخطوط الحمراء الدجاج :
    حيث قفزت أسعار الدواجن إلى 20 جنيها للكيلو وعلى طريقة المحاسبين القانونيين والمراجعين .. فإذا كان وزن هذه الدجاجة قبل ما يسيح الثلج يساوي كيلو ونصف فسيتخطى سعرها 30 جنيها ، أي أن الأسرة الظريفة إذا طمعت في شراء دجاجة واحدة أسبوعيا، على أساس ورك محندق أو صدر حنين لكل فرد مع مراعاة عدالة توزيع الأجنحة على كل فرد فستحتاج الأسرة إلى حوالي 150 جنيها شهريا ، وبطبيعة الأشياء لم تقف الأسماك مكتوفة الزعانف والخياشيم ، حيث قفزت أسعارها هي الأخرى إلى 16 جنيهات للأنواع العادية كالبلطي مثلاً وكالعادة نجد أنه إذا احتاجت كل أسرة معذبة إلى كيلو واحد أسبوعيا فهي تحتاج إلى حوالي 65 جنيه شهريا للفوز بتذوق طعم السمك دون الشبع .. ليصبح المجموع بالكامل على ما قبله مساياً الـ( 863 ) في الشهر
    4. 30جـ كهرباء لا تكفي :
    ما بين كهرباء ونفايات ومياه وموبايل للتواصل في البكيات والأفراح والشغل الماسورة طبعاً فالحديث ربما يكون ثقيل الدم لدرجة تفور الدم وتدفعنا لاحتساء كوب شاي إضافي مما يرهق الميزانية المسبقة للأسرة المنهكة ، فإذا افترضنا اجراء الفرد في الأسرة 4 مكالمات يوميا ، وفق نظرية دقيقة mtn لكل مشترك سيحتاج في المتوسط حوالي (4000) يومياً *30 = 120 جـ شهرياً والمرة برده معإنها مستحيلة المرة تتكلم بيـ( 4000) يوميا حيساوي 240 جـ في الشهر + نفايات 30 جـ = 270 + أنبوبة الغاز *2 = 30 = 300جـ + الكهربا في الشهر 60 +30 مدعومة = 90جـ + ما قبله = 1253 جـ في الشهر للأسرة المسكينة وإذا سألك أحدهم عن أم الكوارث فلا تتردد أن تجيب فوراً رسوم الجامعة ورسوم المدرسة والكراريس ، والملابس وما في داعي نطمم بطنكم اكثر من كده لكن ياربي ما في مسئول بيقرا منتدى ساخر سبيل ده ……………

  5. الرفس الرفس الرفس,,,,دى على وزن النبق النبق النبق…

  6. الأحباء الأعزاء ..الحاله بقت سعبه خلااااس .. والجماعة قافلين دى من طين ودى من عجين !! غايتو الله يجيب العواقب ساليمة

  7. انا الشى المحيرنى إنو السيد الوالى دا لم يتحرك إلا بعد جاتو التعليمات من السيد النائب الأول وسألت نفسى يا ربى ما كان حاسس بالمشكلة الحاصلة ولا شنو ؟ والأدهى من كدا إنووعد بمشاريع جاية ( المشاريع دى معناها أنسوا الموضوع كلو ) وما قام بمحاولة حل المشكلة اللى هم عارفنها وهى الجبايات والضرائب الكتييييييييييييييييييرة الواقعة على الشعب الفضل وكل واحد يحملها على التانى وفى النهاية المواطن المسكين يتحمل كل تبعات الجبايات دى .. بمعنى آخر الجزار أو التاجر يجيب فلوس من وين عشان يشترى بضاعة وعشان يدفع ضرائب لأمنا الحكومة عشان تديها لنوام ( مقصودة ) الشعب الكرام كمنحة على أدائهم الجيد خلال دورتى الإنعقاد الأولى والتانية أو لممثلينا القاعدين فى الدوحة ليهم سنة بيتفاوضوا مع واحدة من الفصائل الغير رئيسية وساكنين فى الفنادق وياكلوا ويشربوا على حساب الشعب المسكين دا غير النثريات ومصاريف الجيب اليومية وبدل اللبس ..أو ……… أو ………
    على أى الحالات السيد الوالى وعد يتحقيق الرفاهية وتخفيض الأسعار ومحاربة الجشع..لاكين كييييف ؟؟ الله اعلم ..
    وعش يا حمار لحد ما النجيلة تقوم.. عشان تشبع ..
    وخلونا النشوف آخرتها شنو ..!!

  8. ناس حاج صديق ديل ياعمك بكونو نسو طعم اللحمة وبعدين كان رفسو وكان نطحو وكان نططو كلو واحد

    بس ما ينبحو لانو الجماعة القافلين دى من طين ودى من عجين عايزين ينومو من غير ازعاج

  9. كلامك صاح يا المحتار .. لأنو سيدنا الوالى ما صحا وعرف إنو فى مشكلة إلا بعد ما لكزوهو..وقام من النوم مخلوع..

  10. اخى جبرا والاخوه الاعزاء
    سوف نقاطع نقاطع اللحوم الحمرا من ضان وماعز وعجالى وجمال وحمير وكل من يمشى على اربع وسوف نقاطع اللحوم البيضاء من جداد وحمام واسماك وكل ماله ريش وزعانف وسوف نقاطع الالبان السائله والجامده من جبن وزبادى وسوف نقاطع البيض والعيش والزيت والدكوه والطماطم وسوف نقاطع كلما يقطع بالاسنان ويمدق الاضراس ويتزوق بالسان وسوف نقاطع المستشفيات التى تمدها الامدادات وسوف نقاطع التعليم الاساس والثانوى وكل الجامعات الخاص منه والحكوميات وسوف نقاطع العوئد والعتب وسوف نقاطع المياه والكهرباء والهواء وسوف نتمدد فى الساحات جاحظين العينين فى السماء راجين من المولى موت رحيم
    كسره
    وبعد كل تلك المقاطعات سنكون قاطعنا النفايات لانو اصلا ما ح يكون فى نفايات

  11. استغفر الله العظيم من كل ذنب عظيم, البروف والاحباب السمار, السلام عليكم, بكل صراحة امس وصلني المقال بي المجموعة البريدية حوالي الساعة حداشر كدا, وبالجد كل كتابات ابونا البروف في الصمييييييييم لدرجة بقيت انا وزملائي وناس البيت والجيرات من المتابعين للمنتدي, المهم وانا طاااالع من المكتب زي الساعة خمسة كدا وكعادتي بقوم بفتح الراديو في الفيستو بتاعة ناس الشغل رغم انو من يوم وقفوا الببي سي وانا حولت لي طيبة والفرقان, المهم ما أسمع ليك الا برنامج حواااااري علي الهوا والله والله ياأخواننا مستضيفين فيهو عضو في المجلس التشريعي ودكتور (طبيب)و معاهم زول تاني , المهم والموضوع كان عن اللحمة ودار بالضبط الحوار الكان في المقال, والله يااخوان ما اتمالكت نفسي وماحسيت الا بي واقع في الراديو بالبنية من غير ماأحس, غايتو امة تفقع مرارتك وتديك ليها في يدك, عليك الله يابروف هسه عضو المجلس يقول نحن بنناشد المواطنين عشان ينضموا للحملة ويقاطعو اللحمة واي حاجة سعرها زاد تحت شعار الغالي متروك, عليكم النبي زول في يدو السلطة يناشدنا نحن ديل!!!!, بس مامشكلة والله يا……. زي ماجيتوا حتمشوا وليكم يوووووووووووم

  12. والأمررررر من كدا الدكتور يقعد يقول لينا اللحمة مضرة بالصحة, ياخ هو نحن لاقينها لمن تضرنا, احيييييييييييييي منهم؟

  13. وجتها وجتها وجتها وجتها وجتهاااااااااااااااااااا

  14. اخوونا الفاتح
    انت متأكد حاج صديق اخر المطاف مشي رقد عشان ينوم يعني بالجد بالجد كدة آكلو لحمة ..
    المهم يكونوا اكلو واستمتعوا ( هي من شنو ما مهم ) .
    بس اوع يكون صاحبنا صحي من النوم وتكون الفرحة دي حلمة وتبقي مقلب ….
    لكم جميعا تحياتي .

  15. والله انا خايف يجي اليوم اليقولوا لينا قاطعوا الدواء .
    لكن برضو حيجي واحد يوضح لينا الاثار السلبية حقت الدواء !!!
    يا ربي القمر الصناعي ده حيقع فينا وينقذنا ؟!!!!
    جبره ياخوي انت عارف الشعب يريد شنو إلا قل الينضم سااااااكت .

  16. مافى زول فيكم سالنى وجته شنو لاجبرا ولا الاخوه الاعزاء وانا كنت لقيت لى حل جزري يفكنا منهم لكن ما ح اقول ليكم كييييتن فيكم
    ياخوي ياجبرا دايراك انت او احد المحللين يورينى العلاقه بين الدولار ودخول الحمام شنو ومن يتوصل الى الاجابه الصحيحه له جائزه كبييييييره وهى عباره عن ربع كيلو لحم ضاااااااااااانى ورطل حليب طازج
    على حسب قول الراوي كان دخول الحمامات العامه بى 500 فاصبح 1000 (بالقديم طبعا) فماهى العلاقه بين الدلار ودخول الحمام

  17. والله بتاعة الحمام دي قوييييييييييييييييييييييييييييية شديد يابت وراق

  18. سلام لكل الاحباب وارجو ان تقبلونى صديق جديد قديم معكم ولكم جميعاً الصحه
    ولااقول الا حسبنا الله ونعم الوكيل فيهم

  19. يا بروف ،الله يكفينا شر الرفس والرفس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: