الماكلين ليها شنو؟

عزيزى القارئ .. اللحم ضار بالجيب وبالصحة .. عشان كده لازم نخليهو (نعمل شنو) وهنالك العديد من الغذاءآت الضاره (برضو لازم نخليها) وقد إجتهد (العبدلله) في حصر بعض هذه الأغذيه من أجل حث الشعب السوداني (الفضل) على مقاطعتها وتركها )للجماعة الطيبين) !
السكر الأبيض : سعرو كل يوم يزيد .. مع إنو ماده قاتله .. فعند إحترقه داخل الجسم يقوم بتدمير كميات لابأس بها من فيتامين ب هذه الفيتامينات التي تعمل على تحسين عمليات هضم وامتصاص الأغذية وبالتالي نقصها يؤدي إلى ضعف البنية والاضطرابات العصبية والعضلية والصداع والشعور بالأرق والقلق النفسي والكآبة والضجر .. (يلا خلونا نخلي السكر إحتمال الكآبه والنفسيات دى نروح)
الرغيف: الرغيفه بقت (عاوزه ليها مايكروسكوب) .. خمسين رغيفه ما تشبع ليها زول .. عشان كده حقو نضرب عن تناولو لأنو سبب أساسي لما يعرف بالكرش وهو بيزيد من معدلات السمنة والعجب لو كان (بالبروميد) سرطان وأحمد شرفي على طول ..
الفول : فقد ثبت علمياً أن تناول طبق كامل من الفول قد يصيب الشخص بحالة عدم ضوح الفكر؟ (يعنى البلاهة) والسبب هو البروتين الموجود فيه وهو عبارة عن مجموعة من الأحماض الأمينية الضرورية لبناء الأنسجة والعضلات ولكنه في نفس الوقت يعتبر صعب الهضم لو أخذ بكميات كبيرة إذ أن ما زاد عن حاجة الجسم من البروتين يؤدي إلى ارتفاع نسبة اليوريا واليوريا مادة سامة إن لم يتخلص منها جسم الإنسان فإنها قد تؤدي في أوقات معينة إلى الوفاة فنواتج هضم البروتين تؤدي إلى تعطيل عدد كبير من وظائف الجسم وأهمها وظائف المخ ما يؤدي إلى التبلد .. (يلا بلا فول بلا عدس هو أنحنا ناقصين تبلد) الحليب : الرطل عمل جنيهين .. يلا نخليهو .. لأنو الدراسات أثبتت أن تناول الانسان للحليب البقري باستمرار قد يكون له أثر سلبي تراكمي، بل يمكن أعتباره غذاء غيرصحي بالمرة ، لأنه ملوث بالعديد من مسببات وناقلات الأمراض وقد التحليلات أن الحليب يحتوي على كميات ضارة من مبيدات الأعشاب ،والمبيدات الحشرية والمواد السامة كما يساعد تناول الحليب ومشتقات الألبان على زيادة الوزن والسمنة وبالرغم من الحليب يبستر أكثر من مرة قبل أن يصل إلى مائدتك (عند الخواجات طبعن عندنا بيزيدوهو موية وبنسلين) فإن عددالبكتيريا يتضاعف في الحليب كل ((20دقيقة إذا تركته في درجة حرارة الغرفة !.. يلا بلا حليب بلا بطيخ .. !
الزيت : لا تحزن عزيزى المواطن لعدم مقدرتك على شراء الزيت الأصبح الرطل بتاعو بالشئ الفلانى فقد تأكد بأنه عند قلي الطعام بالزيوت تتولد مواد تسمى “الجذور الحرة” وهي كيميائيات شديدة التفاعل وتعمل على تدمير الدهون الأساسية المهمة في الغذاء , وهي تزيد من خطر الإصابة بالسرطان وأمراض القلب والشيخوخة المبكرة , ويمكن أن تدمر العناصر الغذائية مثل فيتامين (و) .. (يلا فليذهب الزيت غير مأسوف عليه) !
الشاي : كباية الشاى قربت تعمل ألف جنيه .. نقاطعوا طوااالي .. مش الدراسات أكدت بأن الشاي يسبب الغثيان و فقدان الشهية وتناوب حالتي الإمساك و الإسهال وأن مادة الكافين الموجوده فيهو معاها مادة الثانين الحامضية القابضة وهي بدورها تزيد حموضة المعدة بجانب الأثر القابض على شرايين المعدة الذي يؤدي إلى المغص .كما تتحد مادة الثانين مع بعض المعادن المهمة في الجسم مكونة مركبات غير قابلة للذوبان و الامتصاص مما يؤدي إلى حرمان الجسم من هذه المعادن ( مثل الحديد و الزنك ) ، وكمان الدراسات أكدت بأن شرب الشاي الساخن جداً يؤدي إلى تخريب الغشاء المخاطي للبلعوم و المريء مما يهيئ الخلايا السرطانية للنمو لدى بعض الأشخاص .(أها نبقي لى جنس السرطانات دى؟)
الموز : كيلو الموز عمل جنيهين .. زمان كان فاكهة الفقراء .. هسه بقي مشكله .. بس نخليهو لأنو الموز
بيتسبب في اضطرابات المعدة ، لأن مادة النشاء الموجودة فيه تقاوم الهضم وتتسبب بعسر الهضم .
كما يشجع وجوده في المعدة علي تكاثر البكتريا المؤدية للاسهال .(إقتنعتوا؟) !
الطماطم : طارت في السماء .. سعر الكيلو حصل عشرين جنيه على الرغم من أنها تحتوي علي مادة سامة هي النيكوتين وقد حذر من العديد من مراكز الأبحاث إذ أنهم إكتشفوا أنها سبب من أسباب أمراض المفاصل
(وأنا أقول الكراسى داخل المساجد كترت كده ليه؟) .. يلا خلو (الطماطم) عشان تصلوا واقفين ووجع الركب ده يروح .. !!
الملح : الملح ذاتو عمل ليهو عظمة وبقى الكيس أبو ألف جنيه (ما يملح ليهو يومين) يلا نضرب عن شراء الملح لأنو ذاااتو بيسبب إرهاق وتعب الكلى مما يؤدي إلى ضعف كفائتها وزياده تناوله تؤدي إلى توترات عصبية وعضلية ونفسية وصداع مستمر وشعور بالقلق والكآبة والضيق والضجر (وأنحنا ما ناقصين ضجر!)
الأغذية المعلبة : كل الأغذيه المعلبه سهرها زاد .. يلا نخليها لأنها تحتوي على مادة حمضية لحفظ المواد الغذائية من العفن وهي تسبب التهابات حادة او مزمنة في المعدة وتؤدي إلى الإصابة بقرحة المعدة.
أن هذة المعلبات قليلة الألياف وتحتوي على سعرات حرارية كبيرة وهذا يسبب الإصابة بسرطان القولون والمستقيم .كما أن تناول كميات كبيرة منها مما يؤدي إلى السمنة أو البدانة بكل مضاعفتها مثل الإصابة بمرض السكر والقلب والأوعية الدموية كما تؤدى إلى تكوين الحصوات في المرارة وتسبب الإمساك المزمن.
كسرة :
عزيزى المواطن عزيزتى المواطنة .. كل الأكل ضار بالصحة .. أضرب عن الأكل .. لنكون أول شعب فى العالم (يضرب كله عن الطعام) !!

22 تعليق

  1. دا انا غلباااااااان | رد

    ناكل فى خاطرنا يعنى
    واللا ناكلها فى حنانا

  2. اخى جبرا والاخوه الاعزاء
    عشان الماكلين ليها شنو دى بالزات الحكومه فكرت ليكم فى حل يريح كل الشعب الفضل وهو عند دخولى الوزاره التى اعمل بها وجدته اعلان مفادهو( ايها المجاهدين الشرفاء فلنزهب الى النيل الازرق جهادا)بعد ماكملو نص الشعب فى الجنوب وبعد دى فصلوه دايرين يكملو النص التانى وبى كده يكون كل الشعب راح فى حق الله وبى كده لايكون فى اكل ولاشراب (ولا طمطم ولا بطيخ)

  3. وبما انو لبن الام خير غذاء للطفل وبما انو الدراسات اثبتت انو نحنا شعب طفولى بكل ماتحمله الطفوله من معنى فعلينا بالاتى :
    الحل الاول :
    بدل ما نكل كل الاسره نجتهد ناكل امهاتنا بس ونرجع نرضع تانى نحنا من امهاتنا واولادنا من زوجاتنا
    الحل الثانى :
    تستجلب الحكومه مرضعات للشعب لانو اتحرمت عليه كل المراضع الاخرى وكل اسره يدوها مرضعه ونخلص
    وبكده يكون الشعب اتناول غذاء مضمون ومغذى وقومى يا المرا موتى .

  4. افليقا
    انت ياخوى ماسمعته بان لبن الام فيه ماده تسمى اللاكتوز تسبب الحسلسيه لمعظم اطفال افريقيا

  5. افليقا
    انت ماسمعته بان لبن الام فيهو ماده تسمى الاكتوز تسبب حساسيه للاطفال الرضع

  6. السلام عليكم ، البرف و الاخوان ، نحن نرجع للاصل كسرة فتريته فطيره وملاحها من جناحها ، و كل الهواميك دى نخليها ورانا ، نكد الدوم و نمص اللالوب ، الدفيق و القضيم والحمبك و القنقليز وقالوا : الكدم ولا العدم ، سؤال : الايام دى قايمين على الصمغ دايرين يقرضوه زى القباله ………….. عجبى

  7. نسيت يا استاذ جبرا إنو جميع انواع الإضرابات ممنوعة بحكم القانون؟!

  8. البروف والسمار سلامات .
    والله يابروف أنا إقتنعت بى كلامك دة . إنت جادى والا الامراض دى جبتها من راسك ؟
    بعد كدة الاكل دة اليلقاليهو زول ياكلو .

  9. ياجبرا صعبتها شديد نقبل وين
    تانى الا الشهاده والعمل الصالح
    ياحاج كوكو الفتريته والفطيرة دى اكلات مابيعرفوها اولاد الايسكريم والكاتشب

  10. تحذير من سقوط قمر صناعي أمريكي على السودان

    الاربعاء 23 شوال 1432الموافق 21 سبتمبر 2011

    الإسلام اليوم/ وكالات

    حذر مركز البحوث السوداني من اصطدام القمر الصناعي الأمريكي “يوارس، الباحث عن طبقات الغلاف الجوى العليا”, أواخر الشهر الجاري، فيما نفت الهيئة القومية للاستشعار بمصر احتمالية سقوط القمر على الأراضي المصرية.

    وقال الراصد الفضائي بمركز البحوث السوداني، الدكتور أنور محمد عثمان لفضائية “الشروق” السودانية: إنه لا يمكن تحديد المنطقة التي سيقع فيها القمر, إلا قبل ساعتين أو ثلاث ساعات، مما يعني صعوبة التقليل من مخاطره.

    وأشار إلى أن عددًا كبيرًا من أجزاء القمر ستنفجر داخل الغلاف الجوي، لكن يتوقع سقوط 26 قطعة منه مصحوبة بألسنة نارية مما ينذر بخطر الحريق الذي يهدد الملايين، خاصة وأنه يقع على مساحة تتراوح بين 400 إلى 500 كلم وسيخلف حفرة عميقة.

    وقال عثمان: إنه إذا تسبب سقوط القمر في أي خسائر، فإن على الدولة التي تمتلكه دفع تعويضات كبيرة للدولة المتضررة التي لن تحصل على أي جزء من أجزائه المتناثرة.

    يشار إلى أن وكالة “ناسا” للطيران وعلوم الفضاء الأمريكية قد حذرت من اتجاه قمر صناعي يزن ستة أطنان تقريبًا إلى كوكب الأرض بعد أن خرج من مداره، ونبهت ناسا إلى احتمالية أن يصطدم القمر ببشر على سطح الأرض أعلى من المعتاد.

    ويبلغ طول القمر 35 قدمًا وعرضه 15 قدمًا فيما يبلغ وزنه 13 ألف رطل، وتم إرساله مع فريق من رواد الفضاء في عام 1991 ومن المتوقع أن يتحطم على سطح كوكب الأرض.

    كان القمر قد تعطل في عام 2005 وأصبح لا قيمة له, ومن المتوقع أن يرتطم بالأرض على مساحة 800 كيلو متر.

  11. لازم يكون في إخلاء في المناطق الشمالية

  12. الأحباء الأعزاء سلام … كمان القصة جابت ليها أقمار صناعية ؟ والله حكايتنا حكاية

  13. القال ليك بلدنا خراب …………………………..
    والقال ليك بلدنا جيعان ……………………….

    وبعدين القمر كان وقع مايقع مافى قمر وقع من تلاته وعشرين سنة فى السودان والناس لى هسى عايشة

    والبقع من السماء بتتقبلا الواطه بس البقع من الواطه دى الا توديك ود الاحد

    كسره:
    السكر والعيش والفول والعدس واللبن … الخ ديل بيصرفوهم فى اى صيدلية ولا حكر على ناس الامدادات

  14. طالما الموضوع جاب ليهو قمر صناعى ح يقع وكده والمكان ما معروف وين اذا ومن باب الاحتياط نودعكم
    (نودع كيف نفارق كيييف لا لا لا مابنقدر نودعكم ) ابقو عشره على العقاب

  15. يااااارب يقع فى القصر الجمهورى وفى اوضة كدة بعرفها كويييييس!

  16. حاج أحمد السلاوى | رد

    شنباتى .. أها وبعد كدا .. ؟؟
    هو لاكين قالوا ليك حيقع فى مساحة 500 كيلومتر مربع .. مش فى أوضة ولا أوضتين ..
    غايتو ربنا يستر ويجيب العواقب سليمة ويجى هوا شدييييييد يشيل القمر دا ويوديهو امريكا الشمالية يرميهو عليهم فى بلدهم ..يعنى نحنا ناقصين دمار اكتر من الحاصل عندنا .. مش كفاية علينا .هناى ….وهناى …وهناى …وهناى.. وكل الهنايات ..
    طيب فرضنا وقع فى دولة امازونيا العظمى .. التعويضات حتكون قدر شنو ؟ وحيدفعوها كيف ؟ وحيدفعوها وين ؟ ويا ربى المتضررين حيلقوا منها حاجة ولا حتروح كوووولها شمار فى مرقة ودعم للحرب الدايرة فى النيل الأزرق وكردفن ..؟؟؟

  17. المصيبة ياجماعة إنو ما معروف حيقع وين وبكدا ربنا يحقق دعاء الكيزان ( إن شاالله نموت شهداء )أأأأأأأأأأأأأأأأأأأمين يا كيزان

  18. سلاوى..
    خلاص يقع فى الاوضة والروايش تتوزع على البيوتات اياها !

  19. البروف والأخوان الكرام ، السلام علبكم

    والنيم ناكلو ولا ماناكلو ؟

    اما موضوع القمر الصناعي ربنا يلطف ويستر

  20. تحياتنا لجميع الاخوان
    اهو أخونا محمد عمر حاب ليكم خبر وقوع القمر الصناعي ودي عليها حتة فكرة بدل ماالشعب ( الفضل) يمشي الجهاد في النيل الازرق ورونا القمر ده ح يقع وين وكل الشعب يمشي يرابط هناك ، جهاد وكده ولا شنو ياجبرا …..

  21. عطاء لتاجير مواقع امنه :
    بعد ان تاكد سقوط القمر فى السودان تعلن ولاية الخرطوم عن مزاد علنى كبير لتاجير مناطق امنه توفر فيها الولاية ملاجى للمستثمرين بنظام البوت لملم عيالك وفوت كما تنوه لوجود اماكن سياحية خاصه فى الملاجئ وكافتيريات حتى يوم السبت وترحيل عبر بصات الولاية الاستثمارية الفرص محدوده .

  22. غايتو الأمريكان ديل حقارين جنس حقارة … عارفين الجماعة ما ح يشتكو أو يحتجو زى ما حصل فى ضرب القافلة بتاعت بورتسودان .. !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: