نحس شديد

نحن شعب ما محظوظ أبداً .. يعني شعب منحوس .. كثير من الدلائل والبراهين تؤكد ذلك إبتداء من (الجو السخن) معظم شهور العام .. مروراً بالكتاحات والعجاج .. إنتهاء بالحكومات التى يتم إختيارها لنا بعناية فائقة !
ورد في صحف الأيام الماضيات أن وكالة ناسا قد فقدت سيطرتها على قمر صناعي أمريكي يسمى UARS بعد أن خرج من مداره المحدد والقمر المشار إليه يبلغ وزنه 6 أطنان (بس) وهو يسير بسرعة عاليه مما يجعل مسألة تخمين مكان وقوعة أمرا متعسرا ولكن ناسا عادت لتؤكد أنه بالإمكان تحديد مكان وقوع القمر ولكن قبل ساعتين فقط من ذلك !
المشكلة ان المنطقة التى سوف يقع عليها هذا القمر الكارثه قيل أنها في (السودان) !! مافيش حظ ردئ ونحس أكتر من كده .. القمر ده ليهو خمسة سنين لافي حول الكرة الأرضية بسرعة ألاف الأميال فى الدقيقة الواحدة .. من دون دول العالم كوووووولها .. يقع عندنا فتأمل ؟
مرات كتيره يجينى شعور البلد دى محسوده (وضاربنها عين) وعاوزه يبخروها بي (بخور مسبع) من عند التيمان .. لكن أرجع واقول لنفسى .. ويحسدونا علي شنو؟ على الجوع وللا علي الفقر وللا علي المرض … خلاااس يعني (سويسرا) وللا (السويد) وللا النرويج !
مرات بقول (النحس) ده غضب من رب العالمين علشان الناس بقت بعيده عن ربها حيث إنتشر الظلم وملأ الفساد الجو والبر والبحر !!
طيب لو ناس (ناسا) ديل إتصلوا قبل ساعتين وقالو لينا القمر ده للأسف ح يقع عندكم فى الحتة الفلانية أها (السلطات) ح تعمل أيه وح تتعامل مع الكارثة دى كيف؟ وهل هنالك أجهزة وآليات للتعامل مع مثل هذه الكوارث ! العبد لله يعتقد جازما بأن المسئولين لا يضعوا لمثل هذه الكوارث أى إحتياطات .. وأنهم بيهتمو بالآليات من فصيلة (البرادو) أكتر .. غايتو بس ربنا يكضب الشينة ويبعد عننا الكوارث ما ظهر منها وما بطن !
بمناسبة النحس الملازمنا ده تحكى تلك النكته القديمة أن عوض المنحوس .. زول نحس للغاية .. (يلاقي العضم في الفشفاش) ، ما أن يدخل ليهو فى حاجه إلا تبوظ .. بعد تخرجه من الجامعة حاول البحث عن عمل عدة سنوات لكن نحسه لا يساعده علي ذلك .. وفي المرة الوحيده التى تم إستيعابه للعمل بأحدى الشركات تم التخلص من الشركة الحكومية بالبيع ليجد عوض نفسه في الشارع مرة أخري .
شقيقة عوض المغتربة بإحدى الدول .. أرسلت له فيزاء لزيارتها حتى يستطيع البحث عن عمل هنالك .. أكمال (عوض) كل الإجراءات .. ركب الطائرة .. بعد دقائق من الإقلاع .. جاء صوت (الكابتن) منبها الركاب بأن الطائرة تعانى من عطب فى أحدى عجلاتها متسائلا إن كان هنالك شخص يمكنه المجازفة يقوم بالتبرع بتغيير اللستك المعطوب !
كل الركاب (عملوا نائمين) ما عدا عوض (ما سودانى وكده) الذى أبدى أن يقوم بالمخاطرة وتغيير اللستك .. صفق له جميع الركاب .. تم ربط عوض بسير قوى تم تثبيته داخل الطائرة .. خرج عوض وقام بفك اللستك البايظ .. ووضع اللستك الجديد وفى أثناء ذلك فلت من يده اللستك القديم إلا أن قائد الطائره أخبره بأنو ما مشكلة وأنهم سوف يقومون بتزويد الطائرة بلستك آخر عند محطة الوصول !
ما أن وصلت الطائرة المطار حتى وجد عوض شقيقته فى إستقباله ، وما أن جلسا داخل العربة منطلقين نحو المدينة حتى أخذت تبكى :
– مالك بتبكى فى شنو ؟
– أبوى يا عوض ابوى
– مالو ما هسه خليتو فى البيت هناك في أحسن حال !
– أبوى مات يا عوض !
– لا حولة ولا قوة إلا بالله
– هسه قبل ساعتين وشوية ضربوا ليا ورونى الخبر
– مات بشنو ؟ مات كيفن؟ ما خليتو هسه كويس
– والله بس قالو شايل الإبريق بتاعو ماشى يتوضأ عشان يصلي المغرب جاهو ليك (لستك) من السماء .. !!
كسرة :
بالله قصة القمر الصناعي ده مش زى قصة لستك )عوض( .. ده نحس شديد !

Advertisements

21 تعليق

  1. تحياتي لكم جميعا إخوتي
    كيف يالفاتح تقول آمنا الحيكومة ماح يشتغلوا بالموضوع ح يكونوا ليه لجنة و اللجنة ح تجتمع بالفول السوداني و البلح داك الماخمج واللجنة ح تكون لجان ومنسقين و اللجان تنبثق منها لجان اخري ومال تسيييير وكدة ولاندكروزرات لزيارة المناطق المتوقع الوقوع فيها وعمل دراسات وسوف يسافر وفد في غضون الايام القادمة للولايات المتحدة الامريكية ( لناسا طبعن ) وديل ماناسا وكده وينزلوا في الفنادق الماخمج ديك تسعة نجوم وكدة عشان يعرفو حجم المشكلة ومنها الي الصين .
    شفت الحكاية كيف بسيطة وتحت السيطرة بس انت ماتستعجل وتقول الجماعة ماشغالين بينا شفت الحكاية بسيطة كيف …….. 

  2. بس ياريت يا بروف يقع فوق راس (ابونا ) داااااك بلحقو الصح !!

  3. مساء سعيد بعد تحية السلام
    البلد دي ما منحوسة نفسها كبلد لكن منحوسة على المستوى الشخصي للأفراد.
    الترجمة بالفرنسية: يعني كل واحد مكجوج في نفسو فيصبح البلد اجمالاً بلداً حظو ينعل قفاهو..
    هسي انا قبيل فرحت فتحت البوست أول ما نزل قلت الليلة اتجدع واكتب جنس تعليق،، طق الكهرباء قطعت،، اتخيلوا الكهرباء تقطع في السعودية، أها السعودية برضو مكجوجة؟
    أها برضو يوم عربيتي في الورشة، فاستلفت لي عربية دكتور يمني معانا، طلعتي بي جاي عملت بيها حادث كسرت أبو أهلها،، أها لي هسي انا مديون بي سبب الحادث ده.
    كسرة: معظم السودانيين تفاءلوا بهذا القمر خيراً وقالوا سيتم تعويضنا عن الأضرار .. هم ناس تعويضات التاكسي التعاوني صرفوا ولا لسّا؟؟؟!!

  4. صحي قالوا فيهو دهب ؟ .. قالوا الجماعة طالعين الجبال دايرين يشوفوا أول ما يقع عشان يشيلو الفيها النصيب .. مع إنو الوكالة قالت لمس إجزاء هذا القمر خطير للغاية … وحتى الآن ما تزال إحتمال وقوعه في السودان يساوي واحد على 3200 كسائر دول العالم … نحنا بقينا بتاعين مشاكل بشكل !!!!

  5. البروف والزوار سلام
    انتو تحلمو وللا شنو؟ البلد منحوسة والقمر لن يسقط على أرضها لأنها منحوسة …. ولكن بعضنا لازال يحلم بأن يسقط القمر فوق رأس ابيه حتى ينال التعويضات من ناسا أو يو اس أي …. ولكن كم من البلد خالي وكم منها مسكون؟ حتى لو وقع في السودان فلن يسقط إلا في صحراء وجل ما سيحدثه من أضرار هو حفرة كبيرة ربما تتفجر منها عيون يستعمل مائها كشفء …… ولكن حتى لو سقط فوق القصر الجمهوري فهل سيكون قد أحدث أضرارا؟ أشك في ذلك وهل سنجرؤ على المطالبة بتعويضات لم نحصل عليها عند تدمير مصنع الشفاء؟
    عموما ليس لدي مانع في أن يسقط على رأسي وينقذني من الإنقاذ إذا كان ورثتي سيحصلون على تعويضات مجزية

  6. السلام عليكم ،البرف و الاخوان ، القمر و وقع فى المحيط ، حنطالب امريكا بساعات رعب عشناها و حنشوف احسن المحامين الدوليين عشان نضمن المبالغ ، لانو كل فرد من الشعب الفضل حيقدم عريضه ، سؤال خبيث : ياربى قروش التعويضات دى حيستلمها منو؟ …………….. عجبى

  7. لمْ يبقَ للصبرِ احتمالْ
    يا سادتي ..
    سأذيعُ سراً ليسَ ضرباً من خيالْ
    أَخفيْتُهُ حتى فشاهُ أبي و قالْ :
    يا بْنِي وُلدْتَ بليلةٍ كانتْ دقائقُها ثِقالْ
    كانَ الظلامُ جحافلاً
    و السيلُ قد غمرَ الجبالْ
    و سَطا بها ذئبٌ على سِرْبِ السِّخالْ
    و بِليلةِ الميلادِ قد خُسِفَ الهلالْ
    يا سادتي .. و الحقُّ أجدرُ أن يُقالْ
    إني امرؤٌ شُؤْمٌ , و أنحَسُ كلَّ فالْ
    و إليكُمُ بعضُ الوقائعِ
    من مُفكَّرةِ الكوارثِ و الَوَبالْ :
    أمي بيومِ ولادتي
    مَرِضَتْ بأورامِ الطِّحالْ
    و أبي تعرَّضَ لاعتقالْ
    و أخي رآهُ مقيداً .. فبَكى و بالْ
    عُمري بعمرِ الإحتلالْ
    و خُتِنْتُ في يومٍ فكانَ الإنفصالْ
    و بِعُرسيَ الميمونُ قدْ عبر اليهودُ إلى القنالْ
    و لأنني زُرتُ الكويتَ و عُدْتُ , حلَّ بها النكالْ
    و حججتُ للبيتِ العتيقِ
    فعاثَ فيهِ أبو رِغالْ
    أحببتُ فاتنةً فماتتْ
    بُغْتةً دونَ اعتلالْ
    و عرَفتُ مسؤولاً فقيلَ : أُقيلَ
    ثمَّ عرفتُ آخَرَ فاستقالْ
    ولأنَّ شخصاً كاد يشبهني
    تدلّى عنُقُهُ فوق الحبالْ
    يا نحْسُ .. هل لكَ مِنْ زوالْ ؟!
    كمْ مرَّةَ قد غبْتُ عنكَ
    فَرُحْتَ تَتْبَعُ كالظلالْ
    إن عِشْتُ عاماً آخراً
    فَلَرُبَّما تلِدُ البغالْ
    و لَرُبَّما حاضَ الرِّجالْ
    ………………………………
    للشاعر السوري محمد شيخ علي

  8. أقترح دعوة الشاعر المنحوس أعلاه إلى السودان على شرف أمسية ثقافية لمساندة السودان للشعب السوري فيما يمر به من محن أهو بالمرة يتعرفلينا على كم غفير من المسئولين ونسأل الله أن ينحسلينا حكومتنا .. لكن المصيبة نحن شعب ما محظوظ أبداً .. يعني شعب منحوس كما قال الأخ الفاتح ……..

  9. دا انا غلبااااااان | رد

    الشمس غابت وينو القمر طيب ؟

    اها جااااااااااكم امسكو

  10. الأحباء الأعزاء .. الناس التانية دى وين .. وين قروب a , وقروب b , وقروب شنو ما بعرفو داك !

  11. في قروب الثورة ينفع ؟

  12. نحن قاعدين يا الفاتح منططين عيونا نعاين في اللحمه الطارت و القمر الوقع ، ساكتين من الخوف.
    تحياتي لي لطفي والبركه فيكم في العندليب.

  13. اخى جبرا والاخوه الاعزاء
    لم يقع القمر الصناعى ولكن كنا مع موعد للحزن لرحيل الفنان زيدان ابراهيم صاحب الكلمه المعبره والحن الجميل له المقفره والرحمه وللاسف تبقى لنا من الغناء ما يفقع المراره ويحرق القلب زى قنبله وحرامي القلوب (بالله فى نحس اكتر من كده )

  14. أبونا الفاتح ،، من سوء مآلات الحال أن أعلن الشعب السوداني مقاطعة اللحمة لكي ترخص،، الناس دي شككتني في الموضوع ، هم كانوا بيآكلوا لحمة كل يوم؟؟؟!!!
    طيب الفايدة شنو لما اللحمة تبقى بي ألف جنيه والطماطم والمعجون والزيت والصابون والبصل والليمون والقرفة والكمون في السماء؟ مش كان من باب أولى نعمل مقاطعة للحكومة على الأقل كان رخصت عدد المستشارين والوزراء والنثريات ونوام البرلمان؟
    بمناسبة المقاطعة: انطلقت حملة بالفيس بوك ضد المبالغة في شراء الذهب للزواج وغلاء المهور بصورة عامة.. كدي النسوان ديل يرجو الجاييهم.

  15. البروف : قاعدين لكن النحس مصاقرنا عرسنا تانى وبرضو مصاقرنا تعرف المشكلة فينا نحنا ذاتنا .
    فى عرسى الاول مشيت للحلاق طلع مجنون وعندو نفسيات وعرست بى صلعه – زميلى جا عرسى وخمش قروش الشقه وشتت لى يوم الليله ما لميت فيهو – جيت اسافر طلع الاسم مطابق لى زول محظور واتاخرت من السفر عشان اثبت العكس . تصحى الصباح تلقى الجمره كملت ولمبة البنزين ولعت والغاز قطع والمعجون كمل والصابونه وقعت فى الحفره والمويه قطعت وانت بتستحم تمرق يقطعوك ايصال مرور تبركن يقطعوك ايصال بركنه تطلع تقضى خدمه حكوميهخ تلقى الموظف مافى او الشباك قفل ..اقول ليك شيئ نحنا النحس ذاتو مش منحوسين ..

  16. ونحنا السودانيين لا معرضين عن ذكر ربنا ولا بتاعين زنا ولا بتاعين سفاسف امور ودى اسباب ضنك العيش اها برضو ما منحوسين لله فى لله ساكت كده .

  17. ياجماعة الخييييييييييييييييييييييييييييييييييييييييييييييييييييير قالوا ليكمالمابقدر يعيش فى الخرطوم يخليييييييييييييييييها
    ماتملونا فقر الحاجات قاليه ونحن منحوسين وتجرسوا لينا ساكت وعلى راى الفنان النور الجيلانى(ودع قووووووم سيب الخرطوم ) اظنه كان بيقرا المستقبل بان والى الخرطوم ح يطرضنى من الخرطوم ………عجبي (بعد اذن كوكو طبعا)

  18. حاج أحمد السلاوى | رد

    ولدنا أفليقا .. إذا كان دا كوووولو حصل ليك .. إنت ما منحوس .. إنت تكون شقى حال ..
    الأخت بت وراق ..معليش وأستأذنك فى التصحيح لبعض الحروف ..وتاخدى الموضوع بدون حساسية ..
    الصحيح أن نقول ونكتب الحاجات غالية ..وليست قالية ..
    والى الخرطوم ح يطردك ( وليس ح يطرضك ) من الخرطوم عشان شنو ؟ هى دى الخرطوم مسجلة بإسمه ..ولا كيف ؟
    مع تحياتى للجميع.

  19. اخي حاج احمد والله ماقيها اي حساسيه ولا حاجه زمان كنا بنكتب صاح لكن من شدة الوجع الفينا الحمد لله لسه بقى فى باقى حروف بتتكتب
    لك الشكر

  20. اخي حاج احمد هى مسجله باسمه بس دى طلع ليها شهادة بحث
    تانى غلطه قصدى اقول مافيها قلت ماقيها بدل الفا كتبنا القاف دى الكبر ياخوى يا جاج احمد
    بس اهم شي انك فهمتني

  21. كتر الالم وراح الوجع وبقينا زي مطر العشم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: