للبيع

• للبيـــع
جـابى ضرائب بحالة جيدة .. (عكليتة) وذو (روح شريرة) ولا يمكن أن يمر منو (عميل) دون أن يجبره على سداد ما عليه بأى طريقة كانت حتى لو إستدعى ذلك أخذ (أطفال) العميل كرهائن … للجـاديـن فقــط !

• للبيـــع
مشروع زراعى يقع علي بعد 30 كيلو جنوب الخرطوم ، لم ينتج (ليمونة واحدة) منذ أكثر من عشرين عاماً دفع فيه المغتربون حصاد غربتهم وشقاهم ، تنبيه : البيع لا يشمل (المسئول الذى جلس على رئاسة المشروع 20 سنة) لحاجه المجتمع إليه فى تبصير المواطنين بأمور دينهم من خلال الإذاعات والقنوات الفضائية

• للبيـــع
وظائف شاغرة بمؤسسة حكومية … للـراغبيـن في ملئها تسجيـل اسمـائهـم وتقـديـم (الـواسطـات) قبل (المعاينات الوهمية) بفتـرة كافية !

• للبيـــع
معلق رياضى يجيد (فن التنبؤ ) بحيث يستطيع أن يتنبأ (للمستمعين ) إن كانت الكرة سوف تخرج (ركنية) أم ضربة (تماس) قبل أن يحدث ذلك .. لم يمارس في حياته أي نوع من أنواع الرياضة .. يجيد التحدث بأربعه (لغات) .. التونسية .. الجزائرية .. المصرية .. وعربى (جوبا) .. التسليم فوراً ..

• للبيع
كرسى مستشار لا (يشار) … بجميع مخصصاته من منزل و(عربات) وتذاكر سفر وبدل سفريات وبدل عطلات وبدل (بدلات) … الكرسى مريح ومصمم حسب (المواصفات) المحلية .. ضمان مدى الحياة !
• للبيع
موظف يحمل (دكتوارة التفنن) في تعطيل مصالح المواطنين كما إنه حاصل على دورات مكثفة في ( فن التعامل البيروقراطى) … يجيد شرب القهوة والشاى وقراءة الجرائد وحل كلماتها المتقاطعه كما يتقن التحدث في (الثابت والمحمول) لساعات طويلة أثناء ساعات العمل الرسمية !

• للبيـــع
عدد (2) أندية (غمة) بلاعبيهم وإدارييهم ومشجعيهم .. ملحوظة: الناديان لم يتحصلا على (علبة صلصة) منذ عشرات السنين علي الرغم من ملايين الدولارات التى تصرف عليهما .!

• للبيـــع
مستوصف طبى به كافة (التخصصات) وجميع الأجهزة الطبية عالية (التقنية) .. لا يمكن لأى مريض أن يتم إستقباله حتى لو عندو جلطه في (النخاع الشوكى) ما لم يسدد مبلغ (خمسة مليون) مقدماً تحت الحساب .. ليس هنالك أي إستثناء لأى حالة .. (الواطة ليل) .. البنوك (قافلة) ..لا إستثناء ولا تأجيل .. يمكن أخذ (المشغولات الذهبية ) فقط كرهائن حتى تسديد الحساب بعد أن يلتحق (المريض) بالرفيق الأعلى ! – الوسطاء لا يمتنعون !
• للبيـــع
مخبز يقوم بتصنيع الخبز الفاخر بالبروميد المسرطن ، العرض يشمل المخبز فقط ولا يشمل البروميد إذ سوف يتم إستخدامه فى مخابز أخري لعدم وجود رقابة ..

• للبيـــع
إذاعة FM تقوم بإذاعه جميع الأغنيـات الهـابطــة على مدار الساعة .. بها عدد مقدر من برامج (الونسة) والدردشة و(الميوعه) على الهواء .. البيعه تشمل طاقم من المذيعين والمذيعات (عمر يوم) وكذلك المستمعين لهذه الإذاعه !

• للبيـــع
أمنيات لشعب كان يحلم بأن (ياكل مما يزرع) و (يلبس مما يصنع) فأصبح (يضحك مما يسمع) كتلك المقولة التى أطلقها ذلك المسئول مؤخراً والتى تقول (الما قادر علي العيشة فى الخرطوم يشوف ليهو حته تانية) ، تنبيه : على المشترى ترحيل (الأمنيات) مباشرة بعد رسوء العطاء عليه وذلك بعد أن يوضح لنا (نطير وين تطير عيشتنا) !

• للبيـــع :

قنـاة تلفزيونية فضائية … بجميـع مـوظفيهـا وكـوادرهـا ومذيعيها ومقدمى برامجها (اللزجه)… العـرض لفتـرة محـدودة!

• للبيـــع
عدد من الشركات الكبرى التى تقوم من آن لآخر بتنظيم مسابقات لعملائها (بمليارات الجنيهات) بينما يعانى مصابو (الفشل الكلوى) من المواطنين من تكلفة عمليات عمليات الغسيل الباهظة (ثلاث مرات إسبوعياً) .. ملحوظة : البيع يشمل جميع الشركات دفعة واحدة لعدم (استفادة المجتمع) !
• للبيع
عربة (حكومية) – لوحة صفراء- موديل 2012 مهمتها توصيل الأولاد للمدارس وإعادتهم .. إحضار (الخبز) من (الفرن) .. توصيل المدام (بيت أهلها) .. إحضار (الحنانة) .. الذهاب إلى شاطئ (أبوروف) لشراء (الشاف) و(الطلح) واللازم منو … العربة (مظللة) .. مكيفة.. والتنك بتاعا (مليان) على طول .. (الحكومة) غير مقيده بقبول أدنى أو أعلى عطاء …

• للبيع
مدينة رياضية تحولت بعض أجزائها إلى قطع سكنية ، البيع يشمل فقط (حلبة الملاكمة) وميدان (الكرة الطائرة) ودائرة السنتر وخط 18 لأن هذه هي الأجزاء المتبقية من المدينة (الوسطاء لا يمتنعون لأنهم وآخرون المسئولون عن تشليع هذه المدينة)

• للبيـــع
مفتى جاهز لتفصيل فتاوى حسب الطلب لا تمس حياة المواطن بصورة مباشرة بينما يعجز (المقص الذى يستخدمه) ويصيبه الصدأ والكساح من إصدار أي فتاوى تمس حياة المواطن المغلوب على أمره كالغلاء الطاحن والأسعار الطالعه كل يوم والصرف الحكومى البذخى وإهدار المال العام .. وتطاول (عمارات) بعض المسئولين في (البنيان) .. وتفشى الفقر والرشوة والمحسوبية والعطالة والعنوسة والأمراض الخطيرة وأكل أموال الناس بالباطل ! ملحوظة : البيع يشمل (المفتى والمقص) معاً !

• للبيـــع
عدد من الشركات الحكومية (الرايحة) والتى لم يتمكن المراجع العام من العثور عليها ، يتم البيع بنظام (حمدو في بطنو) ، الحكومة غير مسئوله عن البحث عن هذه الشركات وعلي المشتري أن يشترى (وبعدين يفتشا وين) !

كسرة :
البضاعة لا ترد ولا تستبدل

Advertisements

28 تعليق

  1. ودع قووووووووووم سيب الخرطوم ترلم ترلم ترلم سيب الخرطوم قوم فارقه هئ هئ هئ

  2. بدل العطاءات الكتيرة دي مش اسهل بيع السودان (بشكله الجديد الجذا) في عطاء واحد تسهيلا للمستثمرين

  3. سلامات ..

    يا بروف .. عرضت كل المقتنيات الفوق دي و خليت مجلس الوزراء و القصر الجمهوري لشنو ؟؟؟

    علي الأقل ديل نواصي سنقل

  4. عزيزى جبرا والاعزا
    بعد البيع دى يله نحلم انو الدنيا خضراااااااااااااااااااااااء وستائره بمبى وانو نحن عايشين فى مجمعات سكنيه كاملة الخدمات ملاعب خضراء للاطفال والعاب للصبيان وحول تلك الميادين شللالات وهواء نقى وجميل والسوبر ماركت تجد فيها كل مالزا وطاب فى متناول اليد وبارخص الاسعار ولكل فرد عربه وبيت وعمل وجميعهم مكندشات ولانشعر بالحرارت والتعليم متاح للجميع وبالاجبار لمن لا يريد التعليم والمستشفيات لكل فرد ملف لمتابعة حالته ونظافه واطباء متخصصين وتشخيص صحيح وكل دول العالم تجى تتعالج عندنا والشوارع كبيييييره اتجاهين والظلط مظبط والمجارى لا تراها ولاتقع فيها ويزورك بتاع الصحه فى البيت عشان يتاكد من انك داخل بيتك مراعى للصحه وعربية النفايات تجي مرتين فى اليوم
    والغاز بالمواسير والميه مويه نقيه عزبه والكهرباء سعره رخيييييس اه اه اه اها اها احييييييي وانا بكتب في الاحلام دى حسيت بى قلبي وجعنى وقلة استغفر الله حتى الحلم بقى فى السودان متعب

    1. الفاضلة بت وراق
      إنتي مالك محمومة ولا شنو ؟؟! ما تستاهلي شكلك يا كبرتي ولا بقتي تحلمي أحلام يقظة
      الحلمتي بيه دي الجنة ياخي والأماني الع\بة تتراقص حيالك
      ولك ودي

  5. للبيع:
    مواطن سوداني، يجيد العيش تحت كافة الظروف، صبور وولوف، لا يشتكي ولا يتذمر حتى لو طلعت فوق قلبو ٢٢ سنة.. لا يعرف المطالبة بحقوقه، هتيف بارع يكبر ويهلل خلف الأكاذيب.. إقتصادي لا يكلفك مصاريف علاج، فهو يأكل الزلط والمواد المسرطنة ولا يتأثر حتى لو نقلت له دم فاسد.
    ملحوظة: صنع خصيصاً للأجواء الحارة.

  6. تحياتى لك استاذى الجليل…
    وابدعت يا منصور نبيل…
    بالجد دة حالنا مغلوبين على امرنا وليس لنا حتى حق الشكوى
    حسبنا الله ونعم الوكيل

  7. البروف الفاتح ..
    البيع كاش ..ولا بالأقساط ؟؟

  8. ما تعالوا نبيعوا كله و نسافر كندا / بس مين يشترى / والله يابروف دا دش ومات فى ايدنا

  9. للبيع :
    ضمير ميت لايحس بمعاناه الشعب
    للبيع :
    شعب مات قلبه
    للبيع :
    حكومه لاندرى كيف تفكر فى العرض امام الله
    للبيع :
    افكار جهنميه كفكره مطالبه الشعب بمقاطعة اللحوم
    للبيع :
    شعارات براقه كالربط على البطون واكل الكسرة وتحت تحت هم يتعالجو بالدولار وبرة السودان
    الله ليييييييييييييييييييييييييييينا

  10. أنا ذاتي عندك حاجة للبيع :
    ضمير حي يفرفر والله شغال معانا بالخسارة لقيناه ما نافع , مافي زول عامل فيها دون كيشوت يشيله مننا بنص السعر !!! أنا والكاشف أقصد جبرة أخوي

  11. حاج أحمد السلاوى | رد

    يا الفاتح … زماااااااااااااااااااان فى جماعة إتهموا المرحوم عبدالله خليل وقالوا ليه صحيح إنت سافرت عشان تبيع السودان ؟ قال ليهم أيوة صحيح.. لاكين مع الأسف ما لقيتش حد يشترى ..
    تخيل يا الفاتح الكلام دا حصل زمان لامن السودان كان قمة فى كل شىء من دول أفريقيا السوداء .. فما بالك اليوم؟ تفتكر فى حد يشترى ؟ ما ظنيتو ..وبقت عليك جابوهو بالطيارة وباعوهو بالخسارة..

  12. جبرا العزيز والسمار .
    سلام .
    والله ياجبرا دى كلها حقايق توجع القلب . بالله حالنا بقى كدة .
    حسبنا الله ونعم الوكيل .
    حقو نرجع نقول … إستغفر الله العظيم وأتوب إلية…

  13. إتو عارفين ديل لو لقينا ليهم مستثمر أجنبي .. بشرط إنو يشيلهم معاهو برة … البلد حتبقى زي ما قالت بت وراق .. بس المشكلة يابروف تاني حتكتب عن شنو؟
    يعني إلا تقول أولادنا في المدارس هارينهم بمكيفات الفريون والمسئولين قاعدين لي تحت الإسبيليت .. !!

    كسرة بملاح:
    يا جماعة الخير مظاهرات السجم الصغيرونة البديناها دي .. ما تشيلو معانا فيها ينوبكم ثواب !!!

  14. حاج أحمد السلاوى | رد

    اب احمد يشيلوا معاك شنو ؟ والبشيل معاك منو ؟ عشان يجونا تانى ناس سيدى فلان وسيدى فلتكان الخدوا حقهم ورجعوا ممتلكلتهم وسدو دى بطينة والتانية بعجينة .. ؟

  15. لو كدي يا السلاوي فلينعم هؤلاء الشباب ديل بطول البقاء .. وبطلوا جرسة .. طالما هم لم تلد حواء السودان غيرهم وغير ناس سيدي .. !!

  16. أبوي الفاتح
    أنا بشتري منك أصلي شردت برا البلد دي وعايز لي حاجة تميزني.
    بس بشرط ……. بكتب ليك شيك تقبضوا لما الحكومة دي تتغير!!!!

  17. منصور نبيل…
    اوجعت قلبى واجريت مدامعى..بارك الله فيك وحفظك…

    سلاوى..
    نشيل مع اب احمد ومع يغرو حتى يتم التغيير والبجى بعدداك انحنا بنعرفو برااااانا ! بس اليتقلعوا ديل الله لا كسبهم خير فى الدارين…

  18. ترررررن تررررن تررررن جرس المزاد فتح علينا جاى والحاضر يكلم الغايب
    كلو كلو للبيع اكبر مزاد فى العالم كلو كلو للبيع
    الا اوانا الا اوانا الا تراى
    نفتتح المزاد
    وعلينا جاى
    مافى حد راضى يفتتح المزاد ومافى مشترين من اصلو
    ومافى سيولة
    الا اوانا الا اوانا الا تراى
    كسرة:
    المزاد بداء من 22 سنة ولى هسى مافى واحد عايز يشترى

  19. يا الفاتح جبراء ياخي حاجات المعروضة للبيع دي كلها مواسير الا كان توديها سوق الفاشر

  20. طيب بدل البيع دة ما تعملو زي الفلم المصري انا عايز حقي و الفكرتو انو ممكن تبيع القطاع العام كلو اذا كان الشعب ادا نسبة واحد و خمسين في المية كتوكيل شرعي لمن ينوب عنو و البيع يكون بالمزاد العلني و كلو واحد ياخد حقو مش احسن بدل بيع القطاعي دة

  21. والله ياجبرا الكلام دا لو مشيت فيه لى قدام شوية حايوصلنا ليييييي ليبيا ويمكن يرجعنا بالاربعين ويدخلنا سوق حلب .لله درك ياوطنى

  22. أخونا الفاتح
    انت نسيت آمنا الحيكومة والشعب الفضل ولا اتباع زمان وتكونوا قبضتو التمن ……
    اوع تبيع بالطفي اقصد يا الفاتح ولا انت برضو بعت وقبضت التمن ….. وشن التمن ….. و وينو التمن ؟؟؟؟؟؟؟

  23. الاخت بت وراق
    تحياتي كلامك ده زكرني واحد امريكي سال ليه سوداني عن أمنياته فقال ليه كلامك ده
    أمنيتي اسكن كويس وأكل كويس واعلم أولادي واعالجهم واعيش عيشة محترمة .
    قال ليه الامريكي انا ما سالتك عن ( حقوقك ) —–
    أنا اسأل عن امنياتك

  24. برضو للبيع شركه هاتف محمول نحنا نتكلم وهم اشيلو الفلوس واحولوها لي عمله صعبه وبي بره بره امرقوها دي ما ربح فل ليه ما دخلتها يا برف

  25. الأستاذ أبوناجي والزوار الكرام
    انتو ما فكرتو أن إعلاناتكم هذه ستكون إثباتا ومبررا لمن يملكون هذه الأشياء فعلا فيأتون ويحلفون في المحكمة أنهم اشتروا هذه الأشياء من الشعب السوداني بعد أن قرأوا إعلان البيع أو المزاد في جريدة الفاتح جبرا وردبرس وأطلعوا على الماصفات …. بس يا أستاذ ما قلت لينا ماهي المبالغ التي جمعتها ممن تقموا للشراء كعربون …. وهي مبالغ تكمل ولا ترد بحكم القانون….
    وعلى ذكر القانون والمحكمة ما هي المحكمة التي تستطيع أن تحضرهم أمامها ليحلفو أو لايحلفو؟لا أظن أن هناك محكمة تستطيع أن تحضرهم أمامها وقد فشل أوكامبو في ذلك …. فقط تبقت محكمة الديان

  26. السلام عليكم ، البرف و الاخوان ، يا اخوان انا مشترى و بالعمله $ الماها خمج ، بس كل واحد يجيب شهادة بحث للبيع ، جديده و ما تكون على الشيوع ، سؤال خبيث : يا ربى الشيوع دى مع الجيش ؟ …………… عجبى

  27. الحل واحد بس يوزعو السودانيين على الدول كل ناس حسب شبهم اما الارض يعملوها حديقة حيوانات يستفيد منها العالم فى التجارب والترفيه.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: