حجاج تحت التمرين

جاء في الأخبار أن وزارة التوجيه والأوقاف والهيئة العامة للحج والعمرة بولاية الخرطوم قد أقامتا مجسماً لبيت الله الحرام، على الجزء الشرقي من الساحة الخضراء، وذلك بغرض تدريب الحجاج على كيفية أداء مناسك الحج، وأكد مدير هيئة الحج والعمرة بولاية الخرطوم أن الهيئة أقامت المجسم بتكلفة 100 ألف جنيه (يعني مية مليون بالقديم) !
يقينى أنها البداية لإنشاء (المعهد العالي لتدريب الحجاج) فقد إكتشف المسئولون(فجأتن) كما يبدو أن الحاج (السوداني) ضعيف في أداء هذه الشعيرة مما إستدعي تدخل الدولة لعلاج هذا الضعف بجعل التدريب إلزامياً لكل من يود أداء هذه الشعيرة ، فالحج كما نعلم مؤتمر إسلامى يضم كل شعوب العالم لذلك لابد من وجود معهد كهذا حتى لا يذهب لهذا المؤتمر من لا يعرف أداء شعائر الحج ويقوم (يجلط) و(يشرط عينا) !

بالطبع لابد لكل زول (ناوى الحج) أن يقوم بملء أورنيك (تدريب) بالشئ الفلانى ترفق معه (كم صورة) يتم أخذهما بالأستديو الذى إنشئ خصيصاً لذلك ثم يقوم مقدم الطلب بتحديد (عدد اللفات) التى سوف يقوم بهما حول المجسم حتى يستطيع التدرب ومن ثم النجاح فى الإمتحان النهائي للحصول على رخصة (حاج متدرب) !
– أها يا حاج عاوز تلف كم لفة !
– سبعة لفات بس
– يا حاج هسه 7 لفات ديل بتكفيك عشان تتعلم الطواف ؟
– خلاس خليهم عشرة لفات !
– ما بنفع يا حاج .. لازم مضاعفات السبعة يعنى يا 14 يا 21 يا 28 !!
– واللفه بي كم ؟
– بي ملابس أحرام وللا بدون ملابس إحرام
– ليه؟
– لو بدون ملابس أحرام اللفة بي خمسة ألف ولو بي ملابس إحرام اللفة بى ألف واحد بس !
– خلاس دى 14 ألف أدينى 14 لفة بي ملابس إحرام (مواصلاً) وملابس الإحرام دى بي كم؟
– 200 ألف بس يا حاج !

ولأن شعيرة الحج (ما طواف وبس) وحتى يكون التدريب مكتمل الأركان فسوف تقوم إدارة المعهد العالي لتدريب الحجاج باقامة مجسمات لبقية واجبات الحج (لتكتمل المقررات) حيث يتم إنشاء مجسم (لمكة) وآخر لعرفات وثالث لمزدلفة ورابع لمنى حيث (يتمرن) فيه الحاج على كيفية رمي (جمرة العقبة) وأيضاً مجسمين للصفاء والمروة حيث (يتمرن) الحاج علي السعى بينهما ثم التدرب على (رمى الجمرات) !
وإذا علمنا أن (مجسم) الكعبة الشريفة – موضوع هذا المقال- قد تم بتكلفة 100 مليون جنيه فلابد للمجسمات المكملة (للمشروع) أن تتجاوز المليارات .. وكلو يهون في سبيل أن يصبح حاج (المشروع الحضارى) حاج (متدرب) وحائز على شهادة (الأوزو) فى أداء المناسك !
وحتي يصبح الزول (الناوى الحج) لائقاً لممارسة هذه الشعيرة فلابد له الجلوس للأمتحانات العملية التى يجريها المعهد العالي لتدريب الحجاج والنجاح في كل المواد :
– يا جماعة أنا إسمى ما مكتوب مع الناس الناجحين ديل ليه؟
– يا حاج إنتا عندك ملحق في مادة : رمى الجمرات !
– خلاس نمتحنا تااانى
– تمتحنا تانى سااااكت كده ؟
– كيف يعنى؟
– ما لازم تدفع حق (الحصحاص) الح تجدعو ده تاني !

بعد أن تصبح (رخصة حاج متدرب) التى يصدرها (المعهد العالي لتدريب الحجاج) وثيقة هامة وشرطاً من شروط السفر لأداء الحج تثار كثيرا من التساؤلات من بينها سؤال جوهري هو صلاحية سريان هذه الرخصة وهل يمكن أن يحج الحاج بواستطها الشخص أكثر من موسم حج؟

– (موظف الجوازات) : يا حاج رخصتك دى (مفوته) .. أقرأ هنا تاريخ الصلاحية .. بيقول هذه الرخصة صالحة لثلاث مواسم حج فقط .. وإنتا دى الحجة الرابعه ليك
– يا ولدى أنا إتدربتا .. وحجيت تلاته مرات بعد الرخصة .. يعنى عملتا القصة دى (عملي) تلاته مرات .. معقول أغلط فيها !
– لازم تمشى تتدرب تانى .. يا حاج كل شئ وارد .. مش ممكن يكون جاك (زهايمر) ونسيت القصة دى وكده !

نسبة لأن المسئولين حريصين غاية الحرص على أداء المواطنين لهذه الشعيرة خاصة أولئك الذين لا تسمح لهم ظروفهم (التدريب العملي) فقد تم عمل شهادات (إعفاء من أداء التدريب) يتم إستخراجها من مكاتب المعهد العالي لتدريب الحجاج ! (وكل شئ بي تمنو) !

كسرة :
بعد النجاح المنقطع النظير الذى سوف يجده المعهد العالي لتدريب الحجاج (في تجفيف جيوب الحجاج طبعن) … يفاجأ المواطنون بإعلان عن قيام المعهد العالي (الإلزامي) للتدريب علي النطق بالشهادتين !

كسرة تااااني :
والله نحنا ما عارفين جدوي مشروع زى ده شنو؟ بينما 240 الف تلميذ فى ولاية الخرطوم ما قاعدين يفطروا .. الناس دى ما نصيحة وللا شنو؟

Advertisements

44 تعليق

  1. هههههههههههههههههههههههههههههههاااى,والله بالطريقة دى الناس ح تسيب الشهادتين عمدا كدة !
    الناس ديل يابروف قطع شك ما بعرفو شئ اسمو توحيد الوهية او ربوبية او دين من اساسو!
    لانو لو فى ضمير او وازع دينى كان المية مليون حدثوا بيها بنك الدم..
    اسه المجسم دا ما كان ممكن يظبطوا ليهم واحد بى مليون واحد بس عبارة عن صفيح او طوب ويغطوهو بى كساء اسود وخلاص!
    ولا يكون عايزين يبنوا كعبة صحى صحى تحسبا لما يمكن ان يحدث من قطع للعلاقت مع السعودية بسبب الزيارة النجادية اياها ! وى…
    ويا بلال عليييييا انا يا بلال عليا..

  2. يا بروف انت غلطان
    دى بداية مشروع ( توطين الحج بالداخل )

    عزالدين

  3. ههههههههههههههههههههههه و الله يا استاذ كمان الجماعة ديل كان عملو ليهم معهد تعليم الصيام من اللحم و الفول و الطماطم وكدا عشان الاسعار الايام دي بكون الربح بتاعهك اكتر من معهد تعليم الحج .
    لانو كل الشعب السوداني ال 29999 مليون سوداني كلهم صائمين طبعا الباقي ديل الجماعة ما في الحسبة

  4. سلام ياقبيلة،،،
    والله ياجبرا مرات كدا يجيني أحساس بانك بتفتري علي الناس دي من بنات أفكارك مثل هذه الحكايات (المجنونة)، ولكن حينما اجد أن كلامك ده ياهو زاتو عين (الحقيقة)، وان الحقيقة الماثلة هي عين (الجنون)، أسترجع واقول انا لله وأنا أليه راجعون ولا حول ولا قوة ألا بالله العلي العظيم، حسبنا الله ونعم الوكيل..
    بالله هل هنالك من بين الناس من يتعامل بمثل هذه الطريقة وهذا نوع من السفه الذي ليس بعده سفه وتبديد لاموال الناس بالباطل ،وقد قال الحق تبارك وتعالي في ذلك (ولا تؤتوا السفهاء اموالكم التي جعل الله لكم قياما)

  5. لو افتوا انو الواحد ممكن يحج فى السودان فى المجسم دا والله بكون ارخص طيعا للجميع

  6. اخي الكريم أبو عفراء،،،،
    الحج شعيرة من شعائر الأسلام مثله ومثل الصلاة والصيام والزكاة يؤديه من استطاع اليه سبيلا، والأستطاعة هذه ممكنة لو تخلت الدولة عن المكوس والضرائب والجبايات والرسوم المفروضة علي الحجاج، يعني لوتركت الدولة الحاج ليشتري تذكرة السفر من غير أي تدخل من جانبها ولم تفرض رسوم علي التذكرة أو التأشيرة او المعاملات الأخري التي يتطلبها الموضوع لتمكن الناس جميعهم من أداء هذه الشعيرة بتيسير من الله وتوفيقه لذلك، ما يُضير الدولة لو تكفلت بنفقات الهيئة العامة للحج ولم تجبي رسوم تسيير هذه الهيئة من الحجاج والتي اتضحت أنها تملك أموالا” وأوقافا” بالبلد الحرام تكفي لتسيير أمورها بسهولة ويسر من غير رسوم ولاغيره….
    ربنا لا تجعل مصيبتنا في ديننا ولا تجعل الدنيا أكبر همنا ولا مبلغ علمنا….

  7. سيد جبرى تحياتي
    والله بالطريقة دي ربما نشهد يوما ما يطلب من احدنا ان يثبت ما ان كان مسلما ام لا .
    ودي طبعا بيطلب وجود اثبات الاسلاموية من معهد يتوافق مع متطلبات المشروع التدميري.
    وعنها فقط اعتقد ان لا بد لنا ان نرفع الصوت عاليا بان لا بد ان يثبت اصحاب المشروع التدميري ما ان كان هذا اسلاما ام تجارة وسوق الله اكبر.
    تخريمة
    كعبة بالساحة الخضراء لسد عجز الميزانية وسد ما احدثه الاختلاسات وذهاب البترول مع الحبيبة الجنوب.

  8. [سلام يا ناس
    جبرة ياخوي من ناحية يدربوا الحجاج عملي دي حاجة كويسة لانو معظم الحجاج بينفقوا كل ما يملكوا لدفع رسوم وجبايات الحج المفروضة عليهم من قبل الحكومة وبعد كده ممكن حجهم يكون غلط ويبقي مجرد قدلة يا مولاي حافي حالق ..
    كونوا يدفعوا الحجاج رسوم تدريب دي زيادة من الامعان في دناوة الحكومة !!!!
    الحجاج السودانيين هم الوحيدين التلقاهم راسهم مقطوع في الحج لا دليل ولا امير وكل واحد جافل براهو .
    مرة في الحج لقينا واحد من البعثة في رمي الجمرات لابس حاجة مكتوب عليها ( امير فوج ) وماشي براه ولا زول معاه وقفناه وسألناه عن الفوج بتاعو وينو وعينا للاخوان الاسيويين كل امير فوج معاه مجموعة من الحجاج والله الامير ده ما كلف نفسو يرد علينا واحد فينا مسكو داير يخنقوا لو ما ذكرنا صاحبنا انو كده حجو حيبوظ !!
    انا حضرت الحلقة بتاعت التدريب في التلفزيون والبروف الجايبينو يشرح اول حاجة ما بعرف يلبس الاحرام وكل شوية في واحد معاهو بصلح ليهو الاحرام. ولمن اتحرك بالناس للطواف حول الكعبة بقي يلبي لبيك اللهم لبيك والتلبية دي لمن الزول يكون جاي علي الكعبة وبيقطع التلبية بمجرد وصوله للحرم وكمان قال الصفا والمروة من مقام سيدنا ابراهيم والبنعرفوا انو الصفا والمروة ده المكان الكانت بتجري فيهو امنا هاجر لتبحث عن الماء .
    مرة برضو كان واحد صاحبنا جاي حج ومشينا نسلم عليهو في مقر البعثة في مني جانا قدام البوابة واتونسنا لحدي 12 بالليل ودعناه لكن قال لينا يا جماعة استنو يمكن امشي القي مكاني نام فيهو زول وما طال انتظارنا الا وصاحبنا جانا راجع وقال ما لقيت حتة انوم فيها اخدناه معانا معسكرنا بتاع حجاج الداخل ورجعناه الصباح .
    انتو يا جماعة رسوم الحج الباهظة دي ما بتدخل في ( الذين يصدون عن سبيل الله ) ؟
    زمان بنات الفلاته يبيعن الفول والتسالي عشان يطلعن مصاريف الحج ويحجن وكانت الحكومة وقتها شبه شيوعية !!!!!!

  9. البروف والسمار
    عجايب الدنيا بقن تمانية .. زي ما قال البشرى .. وبعد شوية حتظهر دروس عصر ودروس خصوصية .. وكعبات مكيفة .. لمن إستطاع إليه سبيلا .. وأكيد دي خاصة بالعاملين عليها فقط من خلفاء الله في أرضه أعضاء المؤتمر الما وطني .. لكن نستاهل برضو يعملونا فيران تجارب طالما الربيع العربي لم يزورنا ..

  10. بروف
    مدير هيئة الحج و الاوقاف السابق اكلها عديل و فات و مافى زول حتى الان حاسبوا / و طبعا فرق بين تاكل عديل و تاكل( مجسم )/ يا لذكاء مسئولينا هؤلاء ؟؟؟؟؟؟؟؟؟؟؟؟؟؟ والله اخر الزمن وتكثر فيه البدع / يعنى حتى افكارنا و اجتهاداتنا فى خلق مجال (اللقف ) بدائية و غبية و مكشوفة . و يا التجانى الحقنا

  11. سبحان الله …

  12. البروف ك واحد ضرب لبرنامج الافتاء وسال المفتى :
    الواحد : يا مولانا الواحد لو الجمعه بدت وهو اتاخر مش ممكن يصلى مع التلفزيون وهو فى البيت ؟؟
    المفتى : ايوه ممكن وكمان اقول ليك شيئ عندكم تلاجه فى البيت ؟؟
    الواحد : ايوه يا مولانا
    المفتى : خلاس جيب ليك عباية سوداء لفها بيها وحج بالمره فى الثلاجه مش داير تصلى بالتلفزيون ؟؟
    افليقا : ولو عندكم خلاطه كمان ممكن تجيب اى كافر تعذبو وتخلطو فيها وتكون استخدمت كل الادوات المنزلية فى تحقيق الشعائر الدينيه !!!
    ده سخف شديد جدا اها السنه دى عشان حاجين ولا شنو ؟؟

  13. والله كلامك دة لو فعلا حيكون حقيقة تكون حكومتنا دي بالغت ولومن شطحاتك تكون انت بالغت عديييييييييييييييييييييل كدة

  14. جنوبى..سلام..
    حليييل زمن الحكومة الشيوعية والعيشة الرخية ..احييييييييييييييييييي انا

  15. دوك شمباتي سلام، وقول لصحبك الجنوبي ده، الحكومة زمان ما كانت شبه شيوعية بس، دي كانت ياصديقي شيوعية عدييييييل كدة وسكراااانة طينة كمان، أها رأيك شنو؟؟؟؟؟؟؟؟

  16. ياسين شمباتي سلامين وحته.. صحي يا حليلم دوام نطراهم .
    ود الخلا يا خوي مشيها شبه وخلي كل جركانه في مكانا …انت صحي العلاقة شنو بين الكاس وعفة اليد ؟ وبين الكوز وخفة اليد ؟ مع انو مفروض الكوز تقيل ويتقل اليد !!!

  17. حاج أحمد السلاوى | رد

    أتاريك يا الفاتح غايب ليك كام يوم مشيت تتدرب على الحج ولا شنو ؟
    لاكين بصراحة حسن كابوس كان مية مية الأسبوع دا لآنى قعدت اضحك لامن الجماعة المعاى فى المكتب قالوا الزول السودانى دا جنَ ولا شنو .. بقا يضحك براهو..
    غابتو عليك جنس مِحن ..

  18. حاج أحمد السلاوى | رد

    وطبعن لازم يعمموا المشروع على بقية الولايات ويعملوا مجسمات فى كل ولاية عشان الحجاج البعيدين ما يتكلفوا المشقة .. واهو برضو قرشين حلوين ينفعوا لليوم الأسود..
    سؤال سغيرووووونى كدا .. الجماعة المسئولين الكبااااااااااار مش مفروض برضو يحضروا الدورات دى ..؟
    أكيد حيكون فى حاجة اسمها بدل دورة حج زيادة فى مخصصات الوزراء والوكلاء وعِلية القوم.

  19. أخونا الفاتح والأخوة الكرام
    لكم التحية والاحترام
    انت متأكد انو الموظفين حريصين كل الحرص علي تدريب الحجاج مش الموضوع موضوع إيصالات وبي. ….
    بعدين انت نسيت الجز الغربي للساحة الخضرا امكن يكون مخصص للمدينة المنورة والمزارات وكدة …
    والجز الشمالي لباب شريف معقول الحاج يكون حاجي من غير مايمشي باب السيد شريف ؛ آمال يكون حج من غير هدايا. ….

    كسرة
    ———–
    لازلنا مصرين علي نوع السجارة ولا شنو ياجماعة ….

  20. البروف

    عندي سؤال واحد… ياربي سيدنا ابراهيم عليه السلام الكعبة الأصلية دي ذاااااتا يكون بناها بي كم ؟؟؟؟

  21. دا انا غلبااااااان | رد

    جاتنى فكره اعمل لى مدرسه خاصه لتعليم الحج ( كعبة مجسمه تحلف تقول حقيقيه – مدربون اكفاء – ملابس احرام فاخره )
    ملحوظه :
    توجد دورات تدريبيه قصيره ( لزوم العمره وكدا )

  22. ياربي حيكون في قطع ايصالات للبيحجو من برة لما يرجعوا السودان ؟

  23. ود الخلا…سلام..
    ما اختلفنا فى شيوعيتها وحمرة عينها ,لكن تعال ما نختلف فى طهارة يد منسوبيها والتزامهم بقراراتهم وعفة لسانهم !

    جنوبى..وعليكم السلام..
    شبه ولا هناى,,المهم احسن من ناس هناى ! آييييييي

  24. الواحد حقوا الحق ليه واطه ناصيه كده بسرعة فى سوبا عشان يجمع رسوم بدايه الاحرام…والاستثما في انشاء المعهد العالي لتدريب المطوفيين..

  25. ‏ انا كان ما حفروا زمزم ما بتمرن

  26. (وأكد مدير هيئة الحج والعمرة بولاية الخرطوم أن الهيئة أقامت المجسم بتكلفة 100 ألف جنيه (يعني مية مليون بالقديم) !)

    بلد عز الشدايد 95% من الشعب تحت خط الفقر وناس الحج والعمرة يبعملو مجسم بى 100 مليون

    سكتنى فى البحر الوجع واجعنى فى البحر السكات

    حسبى الله ونعم الوكيل

  27. كلو بي حسابو
    اهو يفيدوا ويستفيدوا ولا ما كدة
    وشر البلية ما يضحك

  28. البروف أبوناجي والزوار الكرام … سلام
    والله العظيم دي ما فكر فيها أبرهة ذاتو … لولا أن ما فينا يخلينا نضحك (لأن شر البلية ما يضحك) كنت مت من الضحك
    أنا كنت خارج السودان قبل كم سنة وشفتهم يجيبو التراويح في التلفزيون من الخرطوم وكل القنوات التانية تجيبها من مكة … افتكرت الجماعة ديل عملو ليهم كعبة وقالوا ما فيش حد أحسن من حد
    بالمناسبة الحجاج بتاعونهم يحجوا عشرين مرة ويسقطوا في الامتحان لأنهم لا يذهبون لأداء مناسك الحج وإنما لأغراض أخرى الله أعلم بها …. ممكن بعد شوية يعملوا مركز أفريقيا لتدريب الحجاج باللغات المحلية ويكون دخلنا (آسف دخلهم هم فلا شيء يدخل علينا نحن) من الحج أكبر من دخل السعودية وبرضو نضحك

  29. معليش يا جماعة … الحديث ذو شجون بعدما كتبت الكلام الفارغ ده اتذكرت إنو في واحد كان معاهم زمان عمل بحث في أن موسى وفرعون كانا هنا ….. ليه ما يكون إبراهيم كمان كان هنا والناس غلطانة آلاف السنين وتطوف في كعبة غير المقصودة؟ يمكن الكعبة كانت هنا وبالطريقة دي نضع كل شيء في موضعه

  30. السلام عليكم ، البرف و الاخوان ، الحلفاوى عينوه امام فى جامع ، المصلين اكلوا راسه خفف يامولانا خفف يا مولانا ، بقى يقرا ليهم الكوثر و العصر مع الاخلاص فى الركعه التانيه ، الجماعه مبسوطين و صاروا يظبطوا مولانا كل جمعه بما تيسر ، فى جمعه طلع المنبر و بعد الحمد و الصلاه على الرسول ، صلى الله عليه و سلم ، قال : فى هد غريب هنا ؟ الجماعه اتلفتوا و اجابوا كلهم بالنفى ، قال ليهم : هلاس اعتبروا نفسكم صليتوا ، كمان الحجاج البلوم يعتبروا نفسهم حجوا بعد الطواف و السعى و انصح الاوقاف بعمل جبل صغير يمثل عرفه ، و حبذا لو جابو ليهم حجر من الجبل ، ما أظن يغلبهم ، انشاء الله من المرخيات ، سؤال خبيث : يا ربى الحجاج المحليين ديل حيعملوا ليهم تخفيض فى الرسوم و لا حتكون كامله ؟ ………. عجبى

  31. سلامات …

    الفكره في حد ذاتها ما بطاله .. من النهم انو الحاج لمل يمشي هناك يكون عارف و متخيل الراجيهو .. لكن قصة الميه مليون و التدريب الإجباري للحجاج دي بالغو فيها .

    شابكننا البشريه إتطورت و البشريه ماشه لقدام و العصر الحديث .. قومو لفو كده ولا كده .. زمان كان الإعرابي امي لا يعرف شيئآ .. و برضو ماكان محتاج لمجسم عشان يحج ..

    هااااااك التطور دا

  32. اها وكل زول بدرب بعملوا ليه امتحان وعنده رقم جلوس والناجحين بدوهم شهادات ولا بزوعوهم في الرادي ياناس بلاش كلام فارغ انتو ناس كبار واعملو ليك شئ يفيد المجتمع واكيد صاحب الفكره عنده من وراها فائده بقينا شعب كل واحد ينظر ويحلل ويحرم علي كيفه ولمصلحته اتقوا الله وهذا حرام عمل مجسم للكعبه المشرفه والناس تطوف حولها يعني عملتو بيت الله في السودان كمان حسبي الله ونعم الوكيل الله يتوب علينا منكم

  33. الصفا والمروة حيكون شارع الانقاذ

  34. عندما لا يحب الرجل زوجته أقصد ( حكومته ) فكله محصل بعضه !

    يشعر بالغربة في وطنه ….. ويعيش حالة بحث وهمية عن وهمه المفقود !

    يحيى في دوامة ملل حلزونية ولا نهائية … وتتوقف الدقائق عن السير كما يتوقف عقله عن العمل

    يكبر أسرع من سنواته …. وفي داخله إحساس مُخيف.. بان السنوات تسرقه .. ولم يتأهل بعد !

    يُعدد مسؤلياته الغير حقيقية فلا يعتمد عليه أحد سوى نفسه ويُبالغ بانغماسه فيها كوسيلة فرار من عالمه الحقيقي

    تصاحبه حالة من الغضب الدائم ….أو الصمت المؤلم .. ويبكي في داخله ..!!

    يقارن بألم بين حياته التي يعيشها…وحياة أقرانه التي كان يجب أن يعيشها كما يعيشون ، وينسى أن كثيرين مثله محطمين !

    يتألم للفرق الشاسع…بين تعاسة حياته الأبدية السرمدية في ظل حكومته … ودفء حياة الشعوب الأخرى !

    لا ينسى بسهولة .. فكل صباح تطالعه حكومة منحطة .. تفاجئه بالغيظ والغباء والعذاب والفقر والقهر والاستهزاء والسخرية العبيطة !

    يُخفف هَم نفسه بمبررات بعيدة أساسها الوهم .. ويُخادع نفسه بارتداء ثوب التضحية من أجل الأسرة !

    فأحيانا كثيرة من فرط حنقه لا يعتني بمظهره … وأحياناً أخرى يبالغ فيه !

    لا يكترث للمناسبات… وتمر مناسباته حزينة مرور الكرام !

    لايُحب …ولا يقترب من الورد … فلا تتعدى هذه الأشياء عنده سوى تفاهة مراهقين !

    يتخبط كثيرا في محاولات فاشلة للتعبير عن غضبه تجاه حكومته !

    يضطر في أغلب الأوقات أن يمثل على المجتمع فيلعب دور العاقل المتزن وهو يكافح الجنون !

    يفر بنفسه إلى عالم التسلية… كلما اختنقت روحه من واقعه المرفوض !

    يتمنى عودة الزمان إلى الماضي دائماً

    أحقا ؟ حين لا يحب الرجل حكومته يمسي إلى هذا الحد من التعاسة والهرم !!
    يا اخوانا باركولي جابو لي بنية وسميتا آلاء

  35. بالله يا جبرا شوف لينا المدربين الحيدربو الحجاج ديل حيجيبوهم من السعوديه و اللا راح يسيبو التدريب لي ناس أخونا مدرب فريق سندس؟
    اللهم لا نسألك رد القضاء و لكن نسألك اللطف فيه.

  36. حاج أحمد السلاوى | رد

    سنكل . انا متبرع للتدريب مجااااااااااااااااااااااااااااااانن ..بما اكتسبنا من خبرة فى مجال الحج والعمرة ..
    قالوا الراجل الكان بيشرح عمل أخطاء أثناء الشرح .. انا غايتو ما شفت الحلقة دى .. لاكين ربنا يستر ما يدوا الناس شهادات تدريب مضروبة..

  37. كده االواحد لقي ليه شغله ،،، يمشي يجيب ليه كم برميل مويه ويبعها في الساحة الخضراء

    مويه زمزم وكده

  38. أخونا حاج احمد السلاوي تحية طيبة
    أنا يادوب عرفت سموك حاج احمد ليه
    ديل يا اخوي امكن يجيبوا مدربين خواجات وكدة عشان الحكاية تكون تدريب كويس مش اي كلام …
    تحية لكم جميعا

  39. غايتو احسن يعملو معاهد للموت الفجائي (اموات تحت التمرين ) ويدربونا لمنكر ونكير
    وممكن التدريب يبدا من حفر القبر اصلنا شطاااااااااااااااااااااااااااار في حفر قبورنا بيدينا )

  40. الخوف كلو يجي واحد من السعوديين يبول لينا في الهناية حقتنا دي ……والجماعة ديل يقوموا يتهوروا .
    محمد عمر ..سلام .. آآآآآآي احقا .. لكن افعال الحكومة هي الوصلتنا للحد ده .
    آلاء مبروكة وتتربي في عزكم .

  41. تعيش يابو الجنوب لكن قصة جنوبي دي شنو

  42. وبالمره اخوانا ناس جنوب القاره ديل يجونا طاشين يحجو عندنا واهو يكون دخل للبلد وكده

    1. ياجماعة الخير نحن نصبر لحدما الحجاج يرجعوا بالسلامه ونعمل معاهم لقاءات ونشوف التمارين دي كانت كيف هل استفادو منها ولا محتاجين تمارين اكثر او معسكرات خارجيه كمان بس علي حسب ظني طالما الموضوع بقي فيه تدريب وتمارين حجنا حايكون زي كورتنا والله يستر ما نطلع من التصفيات الحجاجيه في موسم الحج القادم وكل عام وانتم بخير

  43. طيب يوجد عندنا حج عادي ( قرعة

    و حج مؤسسات و حج سياحي
    و حج علي النفقة الخاصة

    و الله بصراحة ابليس ذاتو احتار فينا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: