براااهو كده !

كتب الأستاذ (الفاتح جبرا) قبل فترة موضوعا تساءل فيه عن (الخط بتاع هيثرو- الخرطوم) الاتسرق من ناس الخطوط الجوية السودانية وصار ملكا لأحدى الشركات البريطانية على خلفية (الهوجة) التي أقامها السيد وزير النقل والمواصلات وأثارته للموضوع في البرلمان السوداني مطالبا بمعاقبة من تسببوا في عملية البيع (دا طبعا ان تعرف عليهم)…

وكعادته في تناول الموضوع واقتراح الحلول أشار الى الى السادة القائمين بالتحقيق في (الخط الاتسرق) أن يفتحوا بلاغ في (القسم الجنوبي البريطاني) ويختو (الخط معروضات)…

ما أجملها من حكاية وفعلا (شر البلية ما يضحك) هذا ان عرفت عزيزي القارئ أن هذا الخط اثير موضوعه قبل ثلاث سنوات عندما توقفت الخطوط السودانية من السفر الى (هيثرو) أو الى اي حتة مماثلة في أوروبا وذلك بعد أقعدتها الحالة المايلة التي لازمتها وعمليات البيع (الماشة ديك) ومحاولة انقاذ (الناقل الوطني) والخروج به الى أفاق أرحب عبر بيع الخطوط الجوية ذاتا لشركة كويتية (بتراب القروش) كما تردد وبيع بيت السودان في لندن ومقر الخطوط في لندن والتنازل من حاجات كتيرة لصالح تلك الشركة والتي لم ندري الى الآن (لسواد عيون منو فيهم) تمت تلك الصفقة المشبوهة والتي يتردد الآن أن الحكومة (تعبانة جنس تعب) في محاولتها لارجاع الناقل الوطني الى حظيرة الوطن بعد (خراب سوبا) وبعد أن يدفعوا دم قلبهم (أقصد قلبنا) فهل تساءل أحدكم ولم كل هذا التعب….؟؟

أما الحكاية المحيرة أكثر فهو تكوين وزارة النقل للجنة تحقيق وتحري في الموضوع بتاع الخط مع انو الموضوع كما أشاروا في غاية البساطة في ظل (هو فى كم زول) فى السودان ممكن يبيعوا ليهم (خط طيران)؟ وكم زول ممكن يكون عندو أوراق ومستندات (تقنع المشترى) بإنو هو الشخص المخول ليهو (ببيع الخط)؟ كما تساءل (الأستاذ جبرا) وبعدين المشكلة وين؟ فالحكومة (إتنشلت) ووجدت الحاجه النشلوها منها (قاشر بيها زول تانى) ما خلاس فلتخاطب الزول التانى ده بصورة رسمية وقانونية وتطلب منو إنو يوريها (الخط المسروق) ده جابو ليهو ياتو حرامى…!!

قد تبدو المشكلة كبيرة ولكن حلها في غاية البساطة الذي سوف يفضي الى التعرف على الجناة وتقديمهم الى المحاكمة ولكن هيهات…. فلقد صرح السيد وزير النقل بأنه سوف يكلف متحري (انجليزي) عديل كدا للتحري في الموضوع وسيتكلف مهما تكلف لكشف ملابسات القضية من لجان وسفر ونثريات ….

فتخيلت الموضوع الشائك الذي سوف يدخل فيهو ذلك المسئول في ظل السلحفائية في الاجراءات وتعقيداتها…..

أولا حيمشي المسئول يفتح بلاغ وسيتعب تعبا شديدا الى أن يعرف (وين) يفتح البلاغ اذ أن من المعروف أن تفتح البلاغ في أقرب قسم لمحيط (السرقة)… وهنا المسروق (خط) سيضحك (الشاويش النبطشي) لأن الموضوع جديد عليه اذ أن الخط يبدأ من الخرطوم ويستمر الى هيثرو فكيف سيحدد (القسم المعني بالموضوع) وفرضنا أزعن وبدأ في تقييد اجراءات البلاغ فسيطلب (ورق فلسكاب) و(سيارة) لمعاينة الخط وهنا بيت القصيد…

بعد ذلك سيطلب أوراق المبايعة للتأكد من اسماء البائع والمشتري وختم المحامي الذي وثق المبايعة وكيف تم (قبض) المبلغ هل بشيك أم (كاش) ومن الذي قبض وهل استلم المشتري (الخط) بحالته الراهنة…

في هذا الأثناء سيقوم المسئول بتكوين لجنة وسيكون أحد أعضائها (بريطاني) كما أشار المسئول لكي يتابع الموضوع في لندن وفي الغالب سيكتب (اسم البريطاني) غلط في قرار تكوين اللجنة وحيتعب البريطاني (جنس تعب) مع سفارتنا في لندن عشان ياخد التأشيرة للسودان اذ أن عدم تطابق الدعوة مع الاسم في الباسبورت قد يدفع (البريطاني) الى الذهاب للجنة الشعبية بتاعتم في (مانشستر) ليؤكد بأن الاسمين المكتوب في الباسبورت وفي الدعوة هما اسمان لشخص واحد… ولمن يقربوا يدوهوا التأشيرة سيتفاجأ بأنه لازم يرجع للجنة الشعبية عشان يختم الخطاب…. وغيرها من التعقيدات التي سوف يجدها عندما يبحث عن البائع الذي قبض الثمن بتاع الخط والذي في الغالب سوف يكون (مجرد) اسم لا سند قانوني له وبالطبع لا يمكن تتبع القروش الإستلما ثمنا لهذا الخط لأنو بيكون قبضا (كاش)…

وحتوسع القضية وتتشعب وتأخذ من حر مال الشعب الغلبان الكثير وستكون هناك سفريات وبدل سفريات وأوامر قبض لأشخاص وهميين وجرجرة وحاجات زى دي لمن الخواجة (يامن) ، كتلك الحكاية التى تروى عن شخص قبطي مر بموقف مشابه عندما قام أحدهم بجرجرته جرجرة شديدة قبض في نهايتها السراب في وجود مشاوير وتعب شديدين كان في آخرها أن القبطي عند مواجهته لأحد المواقف العصيبة أن صاح قائلاً : (أشهد أن لا الله الا الله) ….

وأرى ان ما تنبأ به (الأستاذ الفاتح جبرا) سوف يكون حقيقيا عندما يكتبوا في آخر التقرير….

الجاتك فى خطك سامحتك…!!

كسرة :
هذا المقال كتبه الأخ الدكتور عزت ميرغني طه .. تعقيبا على مقال نشر لنا قبل فترة بعنوان (الخط إتسرق يا رجاله) ننشره اليوم لأنو نتيجة لجان التحقيق فى الموضوع ده (طولت شويه وكده) ولم يتم التوصل للجاني الشئ الذى يؤكد بأن الخط ده (باع روحو) براااهو كده !! ..

19 تعليق

  1. هو لجان التحقيق دي حاتحقق في اية ولا ايه اصلو المواضيع الدايرة تحقيق كتيرة

    والله المستعان

  2. يا بروف !!!!!
    الخط دا ذاتو فى الهوا ساى يعنى ماحياثر كتيرفى مجريات الاحداث على الارض/ و السفر لى لندن بقى عن طريق قناة المانش /يعنى تقوم من الصحافة /راكب برنسا توصلك لندن عن طريق تركيا /النمسا / فرنسا/ لندن. والخط الثابت بتباع/خط الجوال يتباع والخط العربى يتباع و خط الحلفايا شندى بتباع و خط الاستواء يتباع / و لو نحنا شطار نبيع خط غرينتش ( الانجليزى ) و اهو خط بى خط و البادى اظلم .

  3. سلام يا بروف جبرا
    انا سمعت في خط اسمو خط الفقر ..شايفاكم ذكرتو كل الخطوط وما ذكرتوهو .. مع انو نحن اول مالكي هذا الخط ..ليه ما نبيع ليهم هذا الخط ..بمالكيه .. ونرتاح من هذا العذاب وطول الإغتراب ..

    أم مجاهد
    جامعة الأمير محمد بن فهد
    الخبر / السعودية

  4. يعني يا استاذ خليتو الاتباع في البلد دة كولووووووووووووووووو و بقيتو بس على خط هيثرو, طيب الباعو دة احتمال مزنوق في قروش و قال يبيع حاجة في الهوا و اكيد ما حاتأثر على مجريات الامور في الارض و دة اخف الضررين و بعدين الخط خطنا و الحكومة حقتنا و العندو حاجة عند الجماعة يمشي يسأل.

  5. دا انا غلباااااااان | رد

    احلها ليكم واوريكم الباعو منو
    .
    .
    .
    باعو رجل الخط

  6. البروف وعزت والسمار .
    سلامات .
    أمبارح ناس سودانير طيارتم الله ستر عليها كانت حاتتحرك لولا لطف الله وبراعه طاقمها .
    ربنا يجيب العواقب سليمة .

  7. همن عندهم خط زى باقى الناس كمان؟؟ما قالوا بمشوا على كيفهم ويقوموا على كيفهم وينزلوا على كيفهم

  8. الخط ده انباع والتمن انقبض اعملو حسابكم الدور جاى على خط ستة

    وده كان باعو الناس دى بتضرب لراسه فى العراضة

  9. البروف ود.عزت الاحباب…سلام..
    والله والله بشار يتنحى اللية قبل بكرة لو الخط دا اتعرف سارقو منو ! انتو بتهزروا ولا شنو!؟؟

  10. البروف والزوار الكرام…. سلام
    حقيقة بيع الخط ده ما مزعجني كتير لأنو العدد القليل من السودانيين الذين ربما كانوا يستفيدون منه …بالتأكيد سيرتاحون ويستفيدون أكثر عندما يكون مالكه غير جماعتنا…. أنا شايف الجماعة باعو حاجات كتيرة …. الحقيقة موش عارف شنو الما باعوهو …. ولكن من العادة عندما تبيع شيئا أن تسلمه للمالك الجديد وتغور…. بس الجماعة باعو الوطن ولسه قاعدين فيهو ليه؟ ما يمشو تشاد … وللا دي كمان باعوها؟
    بالمناسبة موضوع حجاج تحت التمرين ما قادر يفارق راسي …. ليه الجماعة ديل ما يعملوا قصر باكنجهام ويدربوا الجماعة الماشين لندن على زيارتها؟ وللا يعملوا قرين كارد ويدربوا الناس على الهجرة لأمريكا؟ وأأأأأأأأأأأأي انا من مشروعاتنا الحضارية …. مما نصنع

  11. مَتْحَبّكْهَاشْ يا جبرا :
    في 2002م بالقاهرة سرقت رافعة ضخمة من وسط ميدان رمسيس ، وكانت تزن (9) طن ، وكانت الرافعة تتبع لمحلية عابدين ، وعندما نشرت الوسائل الإخبارية ذلك الخبر تسائل الصحافيون عن كيفية السرقة ، ويا تُرى من هذا السارق ؟ وأين فُتح البلاغ ؟ حينها .. جاوب بعضهم بسخرية شديدة قائلاً : لابد للسارق من أن يكون خبيراً في الشئون الهندسية بل لابد أن يكون ساحراً لمهارته في إخفاء تلك الرافعة ، بل لابد أن يكون قد تلقى مساعدة من منظمة دولية لها مصلحة من ذلك ، وقد تكون المساعدة قد تمت باحتلال الميدان أولاً ، بل لابد أن يكون السارق من ذوي اللياقة أو من أعيان البلد وليس بعيداً أن يكون الأمر برمته قد تم بتخطيطٍ من إحدى الدول الأجنبية برعاية الريس تحت تنفيذ السيدة حرم الريس .. فلعل الخط المسروق من الخطوط الجوية من ضمن المسروقات المحتسبة لله ( فهي لله هي لله ) ( شى كده ) من هذا القبيل ، و مَتْحَبّكْهَاشْ بئا ( كما يقول المصريون ) يا جبرا …………

  12. الأحباء الأعزاء … سلام
    والله كل البيحصل والحصل في البلد دلى كوم وحكاية بيع الخط دى كوم تاني .. والمدهش في الموضوع كل يزم يجيك مسئول كبير ناطى يقول ليك : لو في زول عندو مستندات تؤكد الفساد يجيبا !! هسه في مستند أكبر من ده … خط وإتباع … !!

  13. لكم تحياتنا جميعا
    كل شي اتباع اشمعن خط هثرو بأناس دي حاجة عادية المشكلة شنو. ؟ ولا عشان ماقبضتوا …
    اعملوا حسابكم من لغاليغو اوع تلقو لغاليكم اتباعت .
    تحية لقايد طائرة الخطوط الجوية السودانية له التقدير والاحترام.

  14. نبنيك اكيد محمد الحسن سالم حميد
    ما طال في بحرك في مي
    وتمرك مفرع بالجريد
    شدرك امد حد السمى
    طينك معتق بالطمي
    نبيتك اكيد نبيتك هوى
    نبيتك ايوة سوا ..سوا من جديد .. نبيتك جديد
    ايد ابوي على ايد اخوي على ايد انا
    على ايد و ايد تجدع بعيد في اللجة في من راس ميضنة
    حيكومة الفقر الدمار
    الكضبن والصهينة
    اللي ناقص ايامنا كاس
    اليالطيف سوس البحر نردم قفاهو حجر .. حجر
    من ها الرصيف
    الما قدر قدام سريحة الموج يقيف
    الما انستر الرزقية وناس وايه
    نسقيها كاس اسقينا
    نوريها كيف عشق الحياة
    سنانا فوق حجر القصاص
    سوانا ناس ضرب البحر
    جوانا احد من الرصاص
    يا ضو حبيبين القسا
    طول ما انت غرقان في الاسى
    تبت يدين ما ترمي ساس
    ما تبني مجدك من جديد
    تفتح شبابيك الخلاص
    تدخل نسيمات النشيد
    بيت القصيد يستقبله
    مستقبله والحاضر الماضي التليد
    يا بلدي يا فردة جناحي التاني
    وكت الناس تطيرلي عالمة
    وا فجعة الزول البيجيك
    ما يلقى فيك غير الهجير ناسا تواي مسالمة
    كل البشاشات القبيل تلقاها ميتة مسممة
    والجاته جاتة من الارض ما جاته من السما
    ما اعتى غبنك يا ولد
    واعدل قضيتك واعظمة
    لا ترجع السيف الجفير
    والدنيا فايرة مصادمة
    من غير تجيب تار البلد
    ريح العوارض تهزمة
    تطرد مع ابليس الاخير دعة الضلال
    من جنتك ادمة
    تأكل من الشجر الحلال
    يغشاك نعاس في ضل رمى
    تختال هضاريب الصعب
    كربة ليالي المظلمة
    يا نيل قبل خاطرك يطيب
    ارضك تفزع باللهيب
    تكشح تواريب الغضب صعب المراس
    نوبة و زنوج وبجة وحلب
    رطانة عربان مواشو
    ومولدين تلقانا او نلقاك ضو
    ظلمة لياليك العجاف
    رعشة نهاراتنا النشاف
    امنا بيك وموحدين
    في ايدينا فاس وقلم رصاص
    شتلة وكمنجة ومسطرين
    وطبنجة في خط التماس

  15. نبنيك أكيد …. مصطفي سيداحمد
    ما طال في بحرك في مي
    وتمرك مفرع بالجريد
    شدرك امد حد السمى
    طينك معتق بالطمي
    نبيتك اكيد نبيتك هوى
    نبيتك ايوة سوا ..سوا من جديد .. نبيتك جديد
    ايد ابوي على ايد اخوي على ايد انا
    على ايد و ايد تجدع بعيد في اللجة في من راس ميضنة
    حيكومة الفقر الدمار
    الكضبن والصهينة
    اللي ناقص ايامنا كاس
    اليالطيف سوس البحر نردم قفاهو حجر .. حجر
    من ها الرصيف
    الما قدر قدام سريحة الموج يقيف
    الما انستر الرزقية وناس وايه
    نسقيها كاس اسقينا
    نوريها كيف عشق الحياة
    سنانا فوق حجر القصاص
    سوانا ناس ضرب البحر
    جوانا احد من الرصاص
    يا ضو حبيبين القسا
    طول ما انت غرقان في الاسى
    تبت يدين ما ترمي ساس
    ما تبني مجدك من جديد
    تفتح شبابيك الخلاص
    تدخل نسيمات النشيد
    بيت القصيد يستقبله
    مستقبله والحاضر الماضي التليد
    يا بلدي يا فردة جناحي التاني
    وكت الناس تطيرلي عالمة
    وا فجعة الزول البيجيك
    ما يلقى فيك غير الهجير ناسا تواي مسالمة
    كل البشاشات القبيل تلقاها ميتة مسممة
    والجاته جاتة من الارض ما جاته من السما
    ما اعتى غبنك يا ولد
    واعدل قضيتك واعظمة
    لا ترجع السيف الجفير
    والدنيا فايرة مصادمة
    من غير تجيب تار البلد
    ريح العوارض تهزمة
    تطرد مع ابليس الاخير دعة الضلال
    من جنتك ادمة
    تأكل من الشجر الحلال
    يغشاك نعاس في ضل رمى
    تختال هضاريب الصعب
    كربة ليالي المظلمة
    يا نيل قبل خاطرك يطيب
    ارضك تفزع باللهيب
    تكشح تواريب الغضب صعب المراس
    نوبة و زنوج وبجة وحلب
    رطانة عربان مواشو
    ومولدين تلقانا او نلقاك ضو
    ظلمة لياليك العجاف
    رعشة نهاراتنا النشاف
    امنا بيك وموحدين
    في ايدينا فاس وقلم رصاص
    شتلة وكمنجة ومسطرين
    وطبنجة في خط التماس

  16. السلام عليكم ، البرف د/ شمباتى الخط دايرين بيهو شنو ؟ على الط….. غير موظفين الحيكومه التخان زول بيركب السودانيه مجانا مافى ، لانو خدماتهم وتاخيرهم زى الطين ، سؤال مجرد : و دايرين يرجعوا سودان طير ليه ؟ ………..عجبى

  17. الحبيب كوكو…سلام..
    اسه لو بيعهم دا كان (شرعى) ومش كان ممكن تكون مرجوعة فى مسماها !؟؟ واهو برضو نقول سيادة جوية وكدة ! وى

  18. يا أخوانا الخط الفي الهوا خلووووووووووهووووووووووو
    انا داير أعرف الخط القاسم مايو النصصصصصصصصصصصصص دا ليه ما سفلتوهو لحدي هسي
    والله يا أخوانا شارع التراب بتاع مايو دا مهم جدا جداً لناس الكلاكله،
    خط هيثرو في السما
    ظبطو لينا دا بس

  19. خطوط قااااااااااااااااااااااااااااااااااااااااااااااااااااااااااااااااااااااااااااااااااااااااااااااااااال
    قيتو الله يكون فى العون

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: