نصح الأطباء حاج (سليمان) بالسفر إلى الخارج لإجراء بعض الفحوصات ذات العلاقة بتقدم العمر ، وبما أن حاج (سليمان) كان من شباب الحركة الوطنيه فى خمسينات القرن الماضي فقد إختار (الناقل الوطنى) إذ أعتبر أن إختياره لأى (خطوط طيران ) أخرى يعد عملاً يفتقر إلى ادنى مستويات (الوطنيه) ، لم ينس حاج سليمان عند مغادرته منزله ووداعه لأبنائه أن يقوم بتسليم زوجته (قروش المعيشه) خلال فترة غيابه وأن يدس فى يدها بعض (القريشات) لزوم الإستعانه بهم عند إقامة (ليالى المأتم) ، توجه سليمان إلى مبانى الخطوط وقف أما موظف الحجز الذى قام بتزيين مكتبه بصدر الحكمة التى تقول (ما طار طير وإرتفع) :
– والله يا إبنى عاوز ليا حجز (الليله) ماشى الأردن إتعالج
– والله يا حاج عندنا الليله سفريه وااحده (عمان)
– مطار أربعه .. إقلاع سته .. (دفن) أقصد وصول تسعه !!
– طيب خلاص أقطع ليا ماشى وجاى !!
(شخص خلفه) : يا حاج ما تضيع قروشك ساااى أحسن تقطع ذيى كده بس (ماشى) عشان (الورثه) يستفيدو من تذكرة (الجاى دى ) !
– (وهو غير مكترث لما سمعه) : الأعمار بيد الله .. أقطع ليا يا إبنى ماشى وجاى !
– طيب يا حاج إنت عاوز مقعد إستواء ولا نص (إستواء)
– مش فاهم !
– لا يعنى أنا بقصد إنت عاوز مقعدك قريب من أبواب النجاة ولا بعيد منها
– أكيد عاوزو قريب منها.. ولو عندكم حاجه أحسن كمان ما بطال
– والله إلا نحجز ليك (مقعد الكابتن)
بعد أن قام موظف الحجز بتسليم حاج (سليمان) التذاكر اشار عليه بالذهاب إلى (كاونتر) أخر مكتوب عليه(السلامة الشخصيه) ، بعد أن قام الموظف بإستلام التذكرة قام بقراءة محتوياتها ثم ثم نظر إلى حاج (سليمان) مخاطباً :
– شوف يا حاج كل مسافر على خطوطنا دى أنحنا لازم نتأكد من سلامتو
– والله دى الخطوط وإلا بلاش
– عشان كده لازم كل راكب يشيل (أنبوب الرغوة) بتاعتو معاهو
– ومالو يابنى نشيل
– تشيل ساااكت … إنتا عارف الأنبوبه بتاعت الرغوة دى بى كم؟
– يعنى هي ما مع التذكرة ؟
– أكيد بي قروش وما مع التذكرة .. يا حاج هو نحنا (سفرك) ما مسئولين منو .. ح نكون مسئولين من سلامتك؟
– كيف يعنى؟
– أفهمك يا حاج .. الطيارة دى مش ممكن تقع فى البحر؟
– ممكن
– أها يعنى نصرف لى كل راكب (قارب نجاة)؟
– طبعن لا
– أها والطيارة دى مش ممكن تتعرض لى عمليه (قرصنة) أو إرهاب أو عصابه تختفا؟
– ممكن
– أها يعنى نصرف لى كل راكب مسدس وسكين
– طبعن لا
– والطيارة دى مش ممكن تنزل أضطرارى فى الإسكيمو؟
– ممكن
– يعنى نصرف لى كل راكب بالطو وبطانيه؟
– طبعن لا
– والطيارة دى مش ممكن تتعرض فى الجو لى ضغط عالى والشباك بتاعا ينشق
– ممكن
– أها يعنى نصرف لى كل راكب (مكنة لحام)؟
– طبعن لا
– الحاجات دى يا حاج مش كلها ممكن تحصل ؟
– أها يا إبنى بإختصار كده عشان سلامتى أنا هسه أشترى منكم شنو ؟ إنبوبة رغوة ولا قارب نجاة ولا بالطو وبطانيه ولا مكنت لحام ولا مسدس وسكين ؟
– والله يا حاج لو عاوز تضمن وصولك سالما غانما تشترى (الباقه) دى كلها وح نعمل ليك عليها تخفيض و نديك ليها بى سعر معقول
– أقول ليك حاجه يا بنى ؟ ما عندكم (باراشوتات) ؟
– الباراشوتات فى يا حاج لكن المشكلة طياراتنا دى ما بتديك فرصة
أقتنع الحاج بكلام موظف مبيعات أدوات السلامة الشخصيه حيث عدل عن (الباراشوت) وقام بإقتناء أنبوبة (رغوة ضد الحريق ) ، وبعد أن قام الحاج بحمل الأنبوبه أشار عليه الموظف بالمرور على كاونتر (وصايا المسافرين) حيث قابله الموظف مبتسما وهو يسأله :
– يا حاج وصيتك دى عاوز ناس البيت يستلموها بالسريع ولا عادى ولا بالنت ؟
– والفرق بيناتم شنو؟
– بالسريع يعنى ح يستلموها قبل ما تبقى (فحمة) يعنى قبل ناس المطافئ ما يطفو النار (بالمويه) .. وعادى يعنى عادى بعد ما تمشى المشرحة ويتم التعرف عليك والشغلانيه تطول
– طيب ده كلو عرفناهو قصة (بالنت) دى شنو؟
– أيوااا بالنت دى يعنى إنت بس تدينا الوصيه والإيميل بتاع ناس البيت ومع (الوقعه) طوااالى نرسلا ليهم بالإيميل
– والله يا ولدى (تكنولوجيا الكوارث) ما عندكم !
– وبعدين يا حاج فى حاجه مهمة لازم توضحا فى الوصيه بتاعتك دى؟
– اللى هيا أيه يا إبنى
– اللى هيا يا حاج إنك لازم توضح فى الوصية بتاعتك منو الح (يستلم) التعويض من (أحفاد أحفادك) !
كسرة :
تنبيه : هذا المقال يتم نشره بعد كل كارثة طيران يتعرض لها ناقلنا (الكان) وطني .. حتى الآن تم نشره (تسعة) مرات !!
الفاتح جبرا 
يا برف والله حيرتنا انت شقال معاهم بتدي فيهم في الافكار ولا ايه ديل بعملو بيها
والحل شنو يا أستاذ جبرا؟؟؟
ما تقول لي الناس دي تغوور في ستين داهية، لأنهم لو غاروا حا تشوفوا الويل وسهر الليل، ودونك ما تراه وتسمعه عبر الفضائيات في دول تتسمي بالربيع العربي والذي أصبح عليهم عوارض تمطرهم الندامة!!!
الله عليييييييييييييييك يا جبور والله،
ونحنا زاتنا في الواطا دي ما بنعرف نمشي زي الناس، كمان دايرين نطير !!!!!!!!! (قادر الله) !!!!!!
الزول لما يبقى دمو تقيييييييل وبااااااااااااااارد وسادى أضان بطينة والتانية بعجينة نسوى شنو نحنا فى الحالة دى؟ تسمع إذا ناديت حياً ولكن لا حياة لمن تنادى.
تحياتنا وكل الاحترام
أخونا الفاتح دائرين نعمل معهد السلامة الجوية الاجباري لكل مسافر تحب تشارك ؟؟؟؟
وطبعا كلو بتمنو ولا شنو ياجماعة نحجز من هسع .
تحياتي ولكم منا التقدير
انني و من هذا المنبر أضم صوتي للأخ Muhalabasha و ذلك لتدريب الساده المنتحرين (أقصد المسافرين) علي التعامل مع الكوارث الجويه وذلك بأنشاء معهد التدريب جوار الأراضي المقدسه بالساحه الخضراء يعني يتم عمل طيران بطيارات رش أو بالطائرات المصنعه في السودان علي شرط ان تكون معطله من ناحيه خروج اللساتك وفي بعض الأحيان بدون طيار وهذه تعتبر فرصه يعني الواحد يمشي الحج التدريبي و ينال الشهاده التدريبيه كمان…. أها رايكم شنو؟؟؟
الكلام دا نحنا بعيدين منو
سفرنا لسه باللورى ……… الطيارات دى بركبوها هم
الحبيب جبرا…سلام…
حسبى الله عليهم,ولا نملك الآن الا الدعاء عليهم صبح مساء,,اللهم وهد اركانهم وشتت شملهم وبدد ملكهم واشغلهم بانفسهم وارنا فيهم عجائب قدرتك فانهم لا يعجزونك…
تسعة مرات ؟!!! تعرف الناس ديل بكونو قاعدين ليهم فوق رأي يمكن بخططو يدخلو موسوعة غينيس !
الكابتن يستاهل التكريم بس كمان ما يلهونا بالتكريم ويسيبو المتسبب .
ود الخلا سلام .. يغوروا عشان يجينا منو ؟ والله عبد الله زكريا مرقم كووولهم من النفس .احسن حاجة نجيب ساسة من بره واهو كلو احتراف في احتراف .
عمرو الربيع ما نابنا منو الا فسيخ النقادة والبيض يمكن المرة دي يعز النبي ويجامل ويجي .
دا انا غلبااان سلام …والله زكرتنا محمد حسنين ويا سايق البوباي .
ياسين شمباتي .. ازيك .. حسبي الله عليهم كلهم القاعدين في الكرسي والقاعدين يشدو منهم الكرسي .
والله أنا مُستغرب فى الناس اللسه مُصرة تركب ناقلنا الوطنى ده ! 99.9 % من المغتربين قاطعوا الناقل الوطنى منذ
عشرات السنين وأنا احدهم …كيف أحجز فى خط طيران يقول المسؤلون عنه صراحةً إن الدولة التى تصنع طائراته
قاطعتنا وما تبيع لينا قطع غيار ؟؟ يعنى حا يجيبوا القطع من وين إذا كان هذه القطع تعمل بالساعة بمعنى أن لكل قطعة
ساعات عمل معروفة لو 30 او 60 أو 50 ساعة طيران حسب علمى وبعدها لازم تتغير حتى لو كانت شغالة ( تش ) وهذا ما سمعته من جهابذة فى الطيران فهل تفعل دولة محاصرة ذلك ؟؟؟؟؟
الأحباء الأعزاء سلام ..
ودالخلا يا هندسة .. والله نحنا إتختينا فى حته صعبة خلاس ..!!
السلام عليكم ، زمان قلنا ما يجونا المداحين و بتاعين الفته وناس الكتاب اللخدر و اللحمر والذى منه مره تانيه ،عشان كده انا مع جنوبى فى عمل عطاءات لحكام نضاف يحكمون البلد ، سؤال خبيث : ياربى النضاف ديل حيقولوا برضو لقينا فى الخزينه العامه 10000 $ ؟ …………….. عجبى
جنوبى..سلام..
هم لكن مادين حد فرصة يشد منهم شئ!؟؟ ديل مكنكشين ولازقين لزقة عدوك ! ربى يجيب ليهم قرح كوووولهم فى محل التلصق دا !
سلام للاخوة السمار وبالمناسبة الناقل الوطنى ليهو فوائد لا تحصى ولا تعد
اولاً : مواعيدو مواعيد يظبط عليها السودانى بس ساعتو
ثانياً : الوزن ممكن تشحن فيهو مالاعين راءت ولا اذن سمعت
ثالثاً : كل شخص يائس من الحياة ممكن يختصر بيهو مشور رحلة حياتو
رابعاً : زمان كان الناس بتقول ركبوك التونسية بس ركبوك السودانية طلعة اقوى منها
كسرة :
وبعدين مافى ناس كتيرين سفروهم وسفرهوم وركبوهم الطيارة
سلامات ..
تعرفو يا احباب .. الطيارة دي يمكن كان مسافر فيها وزير ولا مسؤول كبير كانو عاوزين يلحقوهو امات طه زي مالحقو ناس قرنق و الزبير و غيرهم .. بس ربنا ستر .. كدي واحد يشوف الباسنجر لست و يتأكد … مابعيد
جنوبي : باااااااالغتا في قصة موسوعة غينيس دي .. ذكرتني قصة واحد صاحب فرن بلدي .. مره الزبون لقا في العيشه ضنب فار .. مشى إشتكاه في البلديه ..ناس البلديه جو يحققو معاهو .. صاحبك طلع شفت لمن بهناك .. رد عليهم و قال .. انا عامل مسابقه .. البيجمع فار بياخد الجائزه .
الخطوط الجوية السودانية ( زمان )
الخطوط الجوية السودانية من إحدى الشركات العريقه في العالم العربي وأفريقيا؛ بدات سفرياتها بإسطول يتكون من أربعة طائرات من الطراز دي هافلاند وهى طائرات بريطانية صغيرة الحجم تسع ثمانيه مقاعد وإضافة طائرات من نفس الطراز في عام 1925موفى السنه الأولى بلغ مانقله اسطولها الصغير 736 راكبا و543 كيلو غرام من البضائع المشحونه؛ وفى عام 1925م الحقت الخطوط الجويه السودانيه اسطولها بتسع طائرات من طراز دوجلاس دي سي – 3 ببسعة ثمانيه وعشرين مقعدا ثم بدأت رحلاتها إلى العالمية.كانت طائرات دي هافلاند كوميت سي 4 أول طائرة نفاثة انضمت لتخدم عملاء الشركة على الخطوط الدولية مثل خط لندن والقاهرة وبيروت. وبعد توقف طائرات الكوميت عالميا عن الخدمة تم استبدالها في السبعينيات باسطول حديث من طائرات بوينغ الأمريكية من طرازي بوينغ 707 وبوينغ 737 – 200. وطائرات فوكرز 28 للرحلات الداخلية.ازداد عدد المحطات الدولية بين قارت العام حيث شملت محطات في أفريقيا (اديس ابابا – كانو – نيروبي – لاغوس – اسمرة)واسيا والشرق الأوسط (بيروت – بغداد – دمشق – القاهرة – صنعاء – جدة – الرياض – أبوظبي – مسقط – الكويت) وأوروبا (لندن – باريس – فرانكفورت – روما – اثينا).
الخطوط الجوية السودانية ( هسي)
لدى شركة عارف الكويتية بالشراكة مع الحكومة السودانية والتي نصيبها من الأرباح ( 12 % ) فقط ثلاثة طائرات من إيرباص إيه 300 وطائرتان من طراز إيرباص إيه 310 وطائرة من طراز إيرباص إيه 320 انضمت مؤخرا للخدمة، وخمسة طائرات من طرراز فوكرز 50. كما تمتلك طائرة من طراز بوينغ 707 مجهزة لاغرض الشحن الجوي وهذه كلها طائرات تتبع للشركة الكويتية وعلى سودانير العوض ……………….
منظومة كلها كانت فاشلة
ظل الإنقاذ منذ الرصاصة الأولى والتي أطلقها عمر حسن احمد منتهجاً سياسة ( الهاشمية ) والتي يكون المرء حيالها هائشا مندفعاً دونما أدنى تروى أو روية ، وكما يشاء الوصافون أن يصفوا بقولهم كـ ( كالعايرة وادوها صوط ) اعتنق فكرة التيار الإسلامي ومن خلالها راح يعيث بأفكاره يميناً ويساراً فبدأ تطبيق سياسته تلك على العلات الدبلوماسية فبدأ بالشقيقة ( مصر ) وكأنها رجل سوف يطالعه في الخلاء كما إعتاد سياسيوا الإنقاذ الوطني شجارهم في قراهم أيام الفتونة ولم يسأل نفسه ما الذي تقدر عليه مصر فاقتلعت حلايب من بين أنامله وساءت العلاقة مع الشقيقة السعودية ثم سورية ثم من بعدها الكويت وباقي دول الجوار ثم اقتلعت من بين أيدينا محلية الفشقة بشرق السودان ، وبدأ مسلسل العداء المرير بدل التعاون والمسايسة ضد أميركا ومعظم الدول الأوروبية وحوصر السودان بعدما وضع على رأس قائمة دول الإرهاب في العالم ، وأصبح رأس الدولة فيه مطلوباً دولياً ولكن حفظ الله ورعايته بالمستضعفين والأطفال الرضع والغلابة من السودانيين ، استشاط العالم العربي بثوراتٍ عجيبة فانشغل الغرب عما كان يحيكه من مبررات ليحتل به السودان رغم أننا كنا في غناً تام عن هذه المشاكل الدولية ولكننا تحت رعاية منظومة كلها كانت فاشلة.
وتخيل النظام من بعد هذه الحرب التي فتحها على نفسه قصة المؤامرة الدولية ضد السودان ، وهي في الحقيقة ضد البشير وضد سياسة الترابي والذي يعتقد البسطاء(1) منّا والسزج وغير المتمدنين أنه من عباقرة القرن العشرين ، فلو اعتلى ذلك الكرسي قوم عقلاء لكان السودان أميركةُ الشرق أو يابانها لكن بتنا نسمع عن فشل زريع في التعليم يتبعه فشل آخر في الصحة وإضمحلال وفشل مشروع الجزيرة بولاية الجزيرة ودمار مشروعي العلياب والزيداب بولاية نهر النيل ، وعندما أحب هذا النظام أن ينافس الأنظمة الأخرى بحيث يبتدع مشروعاً زراعياً على غرار الجزيرة أو مشروع الزيداب الزراعي كان مشروع سنابل والذي كان يديره الداعية الإسلامي والمهندس والرأسمالي المعروف الدكتور الصافي جعفر ، ولا أفشل الرجل لكن المنظومة كلها كانت فاشلة .
ومن بعد الفشل السياسي دولياً ومن بعدة الفشل الإقتصادي بدأ مسلسل الحروب العنصرية بغرب السودان ثم فصل الجنوب السوداني عن شماله بدلاً من تنميته وعمرانه وتمليك أهله سدة حكمه وحدهم كما يرغبون وتعليمهم ، وأخيراً نجد أنفسنا كما يحلو للوصافين أن يصفوا كـ ( الراكوبة في الخريف ) ، فكيف تتوقع يا جبرا أن تسمع ما يسرك عن سودانير أو الحج والعمرة أو التأمين الصحي أو الأسعار في ظل منظومة كلها كانت فاشلة.
(1) المقصود بكلمة البسطاء : سطحيو التفكير فهم بسطاء عقل لا بسطاء حال خيبت الله تعمهم وتقلل من أمثالهم .
معليش اسم المشروع الفاشل سنس وليس سنابل
البروف والسمار جميعا سلام عليكم
استوقفتني الفذلكة التاريخية التي أتحفنا بها الأخ محمد عمر عن مسيرة الخطوط الجوية التي بات يديرها الرخم والنعام. أرجو ألا يغيب عنّا فهو من قناديل ساخر سبيل ومصابيحها.
هذا من بعض ما عندكم يا (بشار أحمد بشار(إبن برد)
الفضل كل الفضل للأخ البروف وأستاذنا الفاتح والذي ما إن يصبح صباح وأركب فيه المواصلات من الصحافة إلى حلة كوكو يومياً فأرى ما يرفع الضغط ، ويجيب السكر ابتداء بالحافلة التي تقف براس كل دقيقة ومافي راكب داير يركب بس دغالة من السواق ونهايتاً بالأسعار المشتعلة من دقيق وزيت وسكر يعني أنا من الآخر كده عبارة عن وصف أكثر من دقيق جداً لما يطلق علية بعض الكركتاريون بالـ( مواطن المطحون ) وأول ما أصل البيت أهرع على النت ليتم تنفيسي بواسطة المعالج النفسي الأخ الفاتح جبرا من ركوب الزلط وجميع أنواع الشيزوفرينيا العصبية والنخاعية والنخامية كمان وبرده الإنفلونزا وجزاه عندالله خير أهو مانع عني بلاوي كتيره .. وعلى فكرة أنت بالغت في قتديل ومصابيح يا خي أنا كبيري شمعة سايحة مع السخانة اللى نحن فيها دى ……
قال شاعر واصفًا طائرة مصرية:
أركب الليث ولا أركبها
شاعرنا دا لو ركب الطائرة السودانية كان قال شنو؟
أستاذنا جبرا، حياك الله ياقامة في الذوق والناس قذم …
هؤلاء القوم أوسعناهم سبًا ولكنهم ساروا بالإبل
طائرات ما بسافروا بيها، مستشفيات ما بتعالجوا فيها، مواصلات ما بركبوها …
يا اخوانا انتو تتكلموا في شنو؟ هو وينوا الناقل الوطني؟