كلو منك يا ندى

لا يختلف إثنان بأن البلد تشهد موجة غلاء غير مسبوقه تتفاقم وتيرتها كل يوم لدرجة (يعني ما ننوم) ، هذا الغلاء من وجهة نظر معظم الخبراء الإقتصاديين لم يأت (فجأتن) لكنه محصلة متوقعة للعديد من التوجهات الإقتصادية والسياسية الخاطئة , ونتيجه حتمية لإنفصال (ربع) الوطن وفقد (الشمال) لـ 50% من دخل البترول و80% من الميزانية !
هذه وجهة نظر الخبراء الإقتصاديين فماذا قال بعض (خبراء الدين) من الشيوخ والأئمة ياترى؟ في خطبتة في أحدى الجمع الماضيات خاطب أحد الشيوخ المعروفين جمهور المصلين وهو يؤمهم في صلاة الجمعة قائلاً : ” إنَّ البلاء والغلاء والوباء والكوارث التي نعيشها من ذنوينا ومعاصينا وأعمالنا السيئة” ! .. ما أن إستمعت إلى ما قاله هذا الشيخ حتى خاطبت نفسي فى إستغراب : (بالله نحنا بالسوء ده كلو وما عارفين؟) !! .. معقوله نحنا فتنا الإسرائلين والأمريكان والروس والألمان والفرنسيين والشنو ما عارف من (الكفار) ديل؟ معقوله ذنوبنا أكبر من ذنوبهم ؟ معقولة نحنا فتناهم فى فى إرتكاب المعاصى وتعاطى الموبقات !! (ده حتى الموبقات عاوزة ليها قروش ونحنا شعب غلبان) !
إندهشت والله لهذه (الحقيقة) التى أوردها مولانا الشيخ لكن إندهاشى زاد عندما أخبرني أحد أصدقائي بان ذات الشيخ قد خطب فى المصلين في جمعة فائتة قائلاً : (ما نزل على البلاد من بلاءٍ وغلاءٍ يدعونا إلى التقرُّب لله كي يُبعد عنا هذا البلاء والكرب).
وهنا أيقنت بأنهذا الشيخ العالم (زول واصل شديد) وعارف الأسباب التى أدت إلى هذه الحال من إرتفاع في سعر الدولار وغلاء اللحمة والخدار وإنهيار التعليم وإنحطاط العلاج والصحة وفشل المواسم الزراعية وقيام سوق المواسير !
وهو أن المواطنين إبتعدوا عن التقرب إلى الله .. وكلام مولانا منطقي جداً فقد تقلصت أوقات العبادة إذ كيف يجد المواطنين وقتا للتقرب إلى الله (وهم جارين اليوم كلو في طلب الرزق الذى تتقاسمه معهم المحليات ) ! والإيفاء بإحتياجات أسرهم التى أصبح دونها خرط العتاد ، بالطبع ما قاله هذا الشيخ الجليل (ميه المية) فمن واجب العبد التقرُّب إلى خالقه ولكن كان أجدي بمولانا قبل الذهاب إلي (السماء) أن يمحص ما في (لأرض) قليلا فيبحث عن البرامج والسياسات التي أدَّت إلى ما نحن عليه من شظف في العيش وتقهقر إلى الوراء وهى سياسات بالطبع من صنع الحاكم وليس المحكوم الذى يطالبه مولانا بالتقرب إلي الله !
وكلو كوم وإمام مسجد أحدى حارات بأمبدة (كوم تاني خاااالس) فقد خطب هذا الإمام في جمهور المصلين قائلاً بان من الأسباب الرئيسة التي أدت الي الغلاء في الأسعار هو ما تتغني به الفنانة ندي القلعة (بالإسم ) يعني ما نجاة غرزة ولا (حنان مس كول) ذاكراً بأن مظهر الفنانات وغنائهن الهابط هو السبب الريئس الذي قاد الي كل هذا الغلاء و العيش الضنك الذي يشهده الشعب السوداني اليوم !
بالله هسه الزول يقول لي مولانا الإمام ده شنو؟ بالمناسبه ألعبدلله قصة مولانا و(رجل دين) و(عالم) و(إمام دي) ما عارف مواصفاتا كيف؟ يعني عشان تكون رجل دين مطلوب تكون قريت شنو؟ وإجتزت شنو؟ وعشان يسمحوا ليك تطلع في المنابر وتحدث العامة مفروض يكون عندك خبرة كم سنة؟ يعني هسه زى زولنا ده (الإختزل) كل بلاوى السودان فى (ندي القلعة) نقول عليهو شنو؟ (إمام تحت التمرين)؟ Finalist في كلية (الدعوة) ولسه ما إتخرج؟ وللا (إمام واعد) من نجوم أأئمة الغد !!
العبد لله يدعو أفراد الشعب السوداني الفضل للتوقف فوراً عن إرتكاب المعاصى والموبقات والأعمال السيئة فهى السبب الرئيس فى (إرتفاع الدولار) وكل البلاء والغلاء والوباء والكوارث التي نعيشها !! فإنتو السبب (كما صرح موانا الشيخ) ومن هذا المنبر يدعو الشعب السوداني الفضل (المطربة ندي القلعة) بالإمتناع والتوقف فوراً عن الغناء حتي يتوفر له العلاج والدواء والسكن والكساء والأمن والتعليم وتتوقف الحروب ونقوم بتسديد ديوننا الخارجية ويرتفع الجنية امام الدولار وتصبح أسعار السلع الضرورية فى متناول الجميع .. (كما قال خطيب مسجد أمبده) .. ويلا يا (ندي) ما تخذلينا بالله !!

كسرة :
قال مسئول كبير مؤخراً عبر قناة الجزيزة الفضائية أن السودان يمر بأحسن حالاته .. خلاس طيب قرضوا علي كده !

Advertisements

37 تعليق

  1. الاول ………………

  2. السلام عليكم البروف وزواره الكرام
    لا شك أن لأعمالنا أثرا في أحوالنا ولا نستطيع أن ننكر ذلك فقد كرره الله سبحانه وتعالى في أكثر من مكان … وطبعا أعمالنا شر من أعمال الكفار ويكفي أن تنظر إلى نشرة واحدة من نشرات تلفزيوننا لتقتنع فنحن نكذب ونهلل ونكبر على أكاذيبنا ونسمي ما نحن فيه (حكم الله ) أي شرعه …. فهل سمعت في السويد أو النرويج أو حتى في الفاتيكان من يزعم أن حكمه حكم الله؟ نحن أسأنا للإسلام على نطاق العالم … فكل من يتكلم عن الشريعة والعدل الآن يمكن أن يردوا عليه بالقول (أنظر إلى السودان فهم يحكمون هناك بشرع الله!!) وبالطبع من ينظر إلى شريعة السودان باعتبارها شريعة الله فلا شك أنه سيعيد النظر في إحترامه للشريعة….. أنظر إلى الشركات … والبنوك (أسياد شباب المصارف) والباصات السفرية (بما فيها توحيد مكة وتفتيت وحدة السودان ) والبوتيكات و…. تراها كلها قد اتخذت أسماء إسلامية حتى يخيل إليك أن السودان يتنفسون شرع الله …. وأنظر إلى مباني الزكاة والجمارك وقارنها بعدد الفقراء والمشردين في الشوارع….. يا أخي الكفار كفروا … وليس بعد الكفر ذنب… ولكننا ندعي أننا لا نذنب وأننا نخاف الله … ثم نتناول كأس الخمر بعد ذكر اسم الله عليه أليس نفاقنا موجبا لأن يحكمنا أمثال هؤلاء أو ربما شر منهم إن ووجد؟ (الواو التانية بدل الضمة) …. وا وطناه …. وا إسلاماه

  3. البروف..سلام..
    ياجماعة الكفار ديل جنتهم فى الدنيا ,,وانتو جنتكم فى الآخرة !
    لو عايزنها هنا قولوا ! عشان بعدين ما تطالبوا ساى …وى

  4. ركز معاي ياجبرا :
    القصة شوية من ده وشوية من ده تبقى محصلة الحكاية كلها الحاصل ده !!!!!! .. واحد سيسأل .. ده شنو ده ؟ وسوف نفتيه بالآتي طالما أن الناس كلها قاعدة تفتي .. نفتي نحنا كمان ، نظراً لأن القصة ماشة بايظة ، وخربانة من كبارها وأي شى تهبشه تلقاه راقد سلطة فما الذي يمنع من أن يرقد رجال الدين في هذا الزمان رقاد السلطة فركز معاي حبتين ياجبرا !!
    نستعين بالله ونفسر ليكم قول الحق سبحانه وتعالى ( إن الله لا يغير ما بقوم حتى يغيروا ما بأنفسهم ) كلاتي الآية بدأت بـ(إن) التأكيدية والجملة إسمية حيث بدأت بلفظ الجلالة ( الله ) سبحانه ، وبما أن القاعدة النحوية تقضي بأن التوكيد اللفظي إذا وقع ابتداءً في جملة اسمية أفاد ذلك الثبات والاستمرار ( إن الله لا يغير ) يعني سيظل حال القوم على ما هو عليه مستمراً سواء كان بأساً أو كان رخاءً ونعمة ( ما بقوم ) فـ(ما) النافية نكرة يطلق عليها علماء النحو هذه العبارة الشهيرة ( النكرة في سياق النفي ) ، والنكرة في سياق النفي قاعدة نحوية مشهورة جداً ، وتفيد العموم الظرفي (أييييييييوه ) يعني ظرف المكان والزمان ، والعموم في هذه الآية يشمل جميع الأقوام ويستغرق جميع الأزمنة والأمكنة .
    فضلاً عن أن التغيير تغييرين الأول مسندٌ إلى ( القوم ) وهي لفظة تدل على كمٍ كبير من الناس ، و الثاني إلى ( أنفسكم ) أنتم فرداً فرداً ، فالتغيير محجوب عنهم بقدرة الله تعالى ما لم يحققوا شرط الله تعالى ، وشرط الله تعالى لن يتحقق ما لم يتولد الإحساس بالتغير من نفسٍ إلى نفس إلى نفس فيتغلغل داخل تلك الأنفس ما يسمى بالعزيمة والشجاعة والمواجهة فيتكون الإجماع المقصود .
    وهذه الآية ليست منسوخة ، بمعنى أنها قد تغير أحوال أقوام من ناحية معيشتهم فيزداد الدخل ويتوسع المال وإلى آخره ، ، ولا يفهم هذه الأمور إلا من خبر المسائل النصية وتولدت عنده التقوى والعمل و البصيرة والفراسة ، كما حصل مع شيوخ الإسلام رحمهم الله تعالى لما حشدوا الناس للقتال فترة ، ومنعوهم عنه في فترةٍ أخرى منعهم أبو حنيفة عندما أرادوا الخروج على بني أمية ، وحرض عليه العز ابن عبد السلام عندما قام بثورة (سيف الدين قطز) والتي بدأت من الشام فانتهت بقلب نظام حكم المماليك في مصر ، وعندما تولى سيف الدين قطز الحكم كان الوضع السياسي الداخلي متأزماً للغاية , كما كان هناك الكثير من المماليك الطامعين في الحكم , ويقومون بالتنازع عليه كما كان هناك أزمة اقتصادية طاحنة تمر بالبلاد من جراء الحملات الصليبية المتكررة، ومن جراء الحروب التي دارت بين مصر وجيرانها من الشام ، ومن جراء الفتن والصراعات على المستوى الداخلي فعمل قطز على إصلاح الوضع في مصر خلال أعداده للقاء التتار، وما حدث في مصر الآن من ثورة 25 يناير لما قام الشباب بعدما أحس بالوعي التام والنضوج المنتشر بين عامتهم فالمقصود بالتغير هو الرغبة الجماعية والتوافق الفكري للمجتمع ككل وهذ التوافق المنشود نجده في صفحات التاريخ عندما هيأ النبي ( صلى الله عليه وسلم ) الناس بالوحي وبهداية الله كان ذلك تغييراً ضد التقاليد الخرافية السائدة وقتذاك ، وعندما قامت الثورات العربية كالسنوسي في ليبيا وعرابي في مصر وما سيحدث في باقي الدول الظالم حكامها .. هذا هو التغيير المقصود في الآية والله تعالى أعلم…………

  5. المراجع :
    1/ ( قطز ). من ويكيبيديا، الموسوعة الحرة .
    2/ تفسير الآية راجع النكرة في سياق النفي ، وإن التوكيدية داخل الجملة الإسمية وحاول تطبيقها .. عشان تفهم المقصود الشرعي للآية وفي النهاية أرجع للتفاسير المأثورة لكن أحسن تفهم اللغة عشان الصحابة والأعراب الآمنوا قريحتم اللغوية كانت قوية .
    .

  6. مكتبة الأخبار
    أخبار إقليمية
    تظاهرات الخـرطـوم في اختبار الإشارات الضوئية..المعارضة اعتبرتها (فزاعة) وخبراء عدوها (روتيناً)
    حالة استنفار غير معلنة تلبست كل الاجهزة الحكومية سواء كانت سياسية او امنية او اقتصادية، في محاولات مضنية لمحاصرة استياء السودانيين من الغلاء الذي استفحل وملأ جنبات حياتهم، ولم تبدِ قيادات «الانقاذ» في السابق اي اكتراث لتهديدات المعارضة بالنزول الى الشارع لكن يبدو انها تهاب عوام الناس المغلوبة على امرها جراء غول الاسعار.
    واثار تحديد السلطات لثلاث اشارات ضوئية افتراضية «خضراء وصفراء وحمراء» للتعامل مع التظاهرات كثيراً من التساؤلات حول مدى تعامل الحكومة مع الامر بجدية، حتى تجعل كل اجهزتها الامنية «الشرطة والأمن والجيش» على اهبة الاستعداد، وفق كل اشارة ضوئية على حدة.
    وكانت سلسلة مظاهرات ولاية الخرطوم في مناطق مختلفة «الخرطوم والخرطوم بحري وام درمان» تندد بارتفاع الاسعار وجميعها مظاهرات عشوائية وتتم في ساعات متفرقة من اليوم نهارا وليلا، وحتى الآن لم تعلن جهة محددة الوقوف خلف تلك المظاهرات برغم اتهامات مساعد رئيس الجمهورية نافع علي نافع للحزب الشيوعي بتدبير وإدارة التظاهرات التي خرجت في حي بري العريق شرقي الخرطوم بغية التنديد بالغلاء وارتفاع الاسعار.
    وانعقد الاسبوع الماضي اجتماع مشترك برئاسة الشرطة ضم والي الخرطوم عبدالرحمن الخضر ووزير الداخلية المهندس إبراهيم محمود حامد ووزير التخطيط العمراني الى جانب مدير عام قوات الشرطة الفريق أول هاشم عثمان الحسين، وبحث الاجتماع كيفية تأمين العاصمة والاطمئنان إلى وضع القوة وإمكاناتها ومشروع النجدة وفقًا للرؤية الفنية العلمية والوصول لطالبها خلال 4 دقائق إلى جانب توفير كل المعينات اللازمة لبسط الأمن والاستقرار بالولاية.
    وبربط الاجتماع الذي يبدو انه ناقش تفاصيل لم تخرج الى فضاء الاعلام مع التصريحات التي نشرتها صحيفة «الانتباهة» ونسبتها الى مصدر شرطي، يتكشف ان السلطة التنفيذية عبر سياسييها وعسكرها ترصد «ثيرمومتر» الشارع بكثير من الدقة والاهتمام، فعدة انظمة من التي لا تهاب شعوبها ولا تحسب لها اي حساب راحت ضحية غفلتها وعدم قراءة الواقع ببصيرة. المصدر الشرطي كان كشف للصحيفة عن خطة وضعت من ثلاث مراحل للتعامل مع المظاهرات حددت بالالوان حيث اللون الاخضر ويرمز لتدخل قوات الشرطة لفض التظاهرة والأصفر لتدخل قوات جهاز الأمن والمخابرا?، واخيرا الأحمر لتدخل الجيش، قبل ان يؤكد المصدر ان الشرطة لديها ثلاثون مجموعة لمكافحة الشغب بالخرطوم.
    وبالعودة ايضا لتصريح آخر لمدير دائرة الجنايات بشرطة ولاية الخرطوم اللواء شرطة أحمد علي الذي قال فيه إن خروج عدد من المواطنين في التظاهرات ببعض المناطق بالولاية في الأيام الماضية لم يكن فيه أي تأثير على الوضع الأمني بالخرطوم نجد ان الحكومة تخشى من ان تتطور المظاهرات من خانة الاحتجاج على الغلاء الى احلام الاطاحة بالنظام برغم ان بعض تلك التظاهرات بدا عفويا، لكن من يدري فربما تتلغف المعارضة القفاز وتمضي مع تحرك الشارع الى غايات انتظرتها لاكثر من عقدين من الزمان.
    ويبدو ان ذلك ما دفع نافع لأن يقر بشكل مبطن بحق المواطنين في الضغط على الحكومة بشأن الضائقة المعيشية المرتبطة بارتفاع الاسعار ويتضح ذلك من المطالبة الواضحة للمواطنين بالتعرف على أدوات الانتقاد والضغط على الحكومة «دون أن يكونوا أدوات في يد الغير ـ على حد تعبير نافع ـ الذي اضاف ايضا «لن نستغفل في قوتنا ولكن لابد من معرفة الخطوط الفاصلة»، ووجه نافع مطالبة رسمية للقطاع النسوي بحزبه والذي كان يخاطبه بالخروج من الفنادق والصالات المكيفة إلى أقاصي البلاد لتمليك المواطنين التحديات السياسية التي تواجه البلاد بصورة ?كثر تفصيلاً.
    الخبير العسكري الامين العباس يقول لـ»الصحافة» ان الخطة الممرحلة ذات الالوان الثلاث التي وضعت تعد اجراءا عاديا، لكن الجديد في الامر افتراض الالوان الثلاثة لاسيما ان الطبيعي اشتراك الامن والشرطة معا لمواجهة اعمال الشغب، وزاد «هي اصلا كانت موجودة» واكد انها خطة تدريب مهمه ليعرف كل طرف مهامه الامنية في اطار القانون والدستور ورفض تماما ربطها بالتخوفات من مد الربيع العربي الذي انتظم البلدان العربية. واكد ان اللون الاحمر والخاص بدخول القوات المسلحة لا يتم الا اذا اخذت التظاهرات الشكل العنيف بضرب المنشآت الرئيسية ?فشلت الشرطة في حسمها مضيفا «ان تتدخل القوات المسلحة فهذا يعني استخدام القوة».
    اما الخبير الامني حسن بيومي فيقول ان الخرطوم كعاصمة هي العمود الفقري للامن القومي ودائما ما تسقط الانظمة من العواصم قائلا ان من حق الحكومة ان تؤمن العاصمة لاسيما وان اخطر ما يواجه الانظمة الخروج للشوارع. واعتبر بيومي الخطط الموضوعة عبارة عن اجراءات تحوطية موضحا ان الخطط عادة تضعها اللجنة الفنية للامن وهي من توزع الادوار للقوات النظامية «الشرطة والامن والجيش» واضاف لـ»الصحافة» «عادة ما تكون الخطط التأمينية للعاصمة معدة مسبقا ولكن تتطور بحسب المستجدات» واكد ان استخدام الجيش في فض التظاهرات دائما ما يكون الخ?ار الاخير لانه ينزل بالاسلحة، وقطع بان استخدام القوة المطلقة لا يتم دستوريا الا بامر القاضي لفض التظاهرة واتفق بيومي مع العباس قائلا ان من وضع الخطة لم يأتِ بجديد وكل ما اضيف هي الالوان والتي تعد تحصيل حاصل.
    لكن الامين السياسي لحزب المؤتمر الشعبي كمال عمر عبدالسلام يؤكد ان الخطة المرحلية لمواجهة المظاهرات تعبر عن خوف الحكومة من التظاهرات السلمية التي تخرج مندده بارتفاع الاسعار واعتبر الخطة بمثابة خطوط حمراء وتهديداً تبعث به الحكومة للمعارضة، وتحدى الدولة لادخال القوات المسلحة لفض المظاهرات مؤكدا ان ذلك سيمثل نهاية النظام واضاف «على الحكومة ان تبدأ باللون الاحمر». وقال عبدالسلام ان الحيثيات الموجودة للخروج للشارع مباحة ولاتخيفهم كمعارضة تلك الاشارات الضوئية سواء كانت حمراء او غيرها واكد ان المعارضة طرحت استرات?جية لاسقاط النظام. واعتبر القيادي في المؤتمر الشعبي الاشارات الضوئية الثلاث مؤشراً على عدم قدرة الحكومة على ايجاد علاج للاسباب التي دفعت الناس للتظاهر والمتمثلة في الازمة الاقتصادية الخانقة.
    ووفقا لما يلقيه مسؤولو الحكومة يبدو ان الحكومة دقت ناقوس الخطر بشأن الازمة الاقتصادية المتفاقمة والمراقب لا تخفى عليه التحركات المحمومة، والتي بدا عليها شيئ من العجلة، داخل اروقة الدولة على اعلى مستوياتها للتقليل من حجم ازمة ارتفاع الاسعار وامتصاص غضب الشارع عبر اتخاذ اجراءات صارمة وسريعة. فمن الواضح ان الخطة التي وضعت لفض التظاهرات ـ بحسب قراءة مراقبين ـ مؤشر لان الدولة تتوقع اسوأ الفروض وربما يعكس عجزها في ايجاد معالجات حال لم تتمكن سياسات الطاقم الاقتصادي في الحكومة من ايجاد حلول سريعة وجذرية لمسألة ارت?اع الاسعار !.

    الصحافة

  7. تقرير: علوية مختار:

  8. ( استخدام القوة المطلقة لا يتم دستوريا الا بامر القاضي لفض التظاهرة ) شفتوا الحنك ده قوى كيف عشان لما يسقط النظام والجماعة يطيروا على برة ما يتحاكموا وحجتم تكون المحكمة هي الحكمت بقتل المتظاهرين ما نحن أمشو حاكموا القاضي ويطلعوا لينا لسانم بعدين….

  9. حاج أحمد السلاوى | رد

    الأخ محمد عمر .. الحكاية شنو ؟

  10. عوافي يا ناس
    انا غايتو في الدين ما بعرف كتير لكن منطق الشيخ ده ضعيف لأني حضرت زمن بار علي كيفك وسبعة بيوت والعيشة كانت هنية ورخية والرغيفة كانت بي تعريفة وأمي كانو بدوها مصاريف البيت طرادة وانا بدوني مصاريف المدرسة فريني وبعد افطر واشتري داندرمة بغشي زريبة العباسية اشتري نبق وقنقليز ولالوب لاخواني الصغار.
    الشغلة دي ما دايرة تنظير شيوخ دايرة اقتصاديين وفصل الوزارة عن التجارة وفصل الهناي عن الهناي .
    الحمد لله جوامع امبدة ما فيها بروجكترات .
    وسلامتك يا ندي العنبر سلامتك من حسد او شر .

    1. كفيت ووفيت وبالمختصر المفيد

  11. امام مسجد الحارات يعتبر سميع جيد لاغاني البنات وهذا في حد ذاته يعتبر سبب من اسباب غلاء المعيشة ، اذا سلمنا جدلاً بخطبته وخطبة يوسف عبدالحي وامام مسجد الحارات شكلوا قابض حق الكسرة . أأمة المساجد وحكامنا فينا ومننا اخرتها عايزين اعلقوا اخطائهم الاقتصادية والسياسية على اخلاقيات الشعب السوداني السمح الكريم المضياف الطيب الى المامثلوا مثيل في العالم .

  12. اليومين ديل انا ما عندي اي موضوع فاستحملوني شوية

  13. محمد عمر زى ما قال حاج السلاوى احتكرتا الموضوع الله يعطيك العافيه
    عمنا جبره والاخ جنوبى صاح الحكزمة غلبت الناس وبقينا مضغوطين لاخر حد
    وبرضو بنقول تسلط الحكومه علينا من ذنوبنا … مخدرات … شباب تاية … حفلات ماجنة .. زنا
    اطفال لقطاء … رشاوى …. نصب واحتيال …
    وكلنا ذلك الرجل ومن قال هلك الناس هو اهلكهم
    عشان كدا مفروض نراجع انفسنا , دا ما بيعنى خلاص الحكومه ماعندها عيب لكن لازم نصلح بالاتجاهين

  14. يا جدو .. أنت في الحكايه شنو ولا في جنوبي الطلع اكبر منك !!! عمك دا طلع بعرف الطراده و الفريني و” الملين” .. وهلمجرا ..
    جنوبي .. قلتا لي العيشه كانت رخيه و الدنيا بيخيرها رغم البارات و الأنادي و الميني جوب و الآفرو و الشارلستون و ال….. ياسلااااااااام ..
    اها .. كان فرضنا إنو كلام إمام مسجد امبده صاح … يكون الشريف بتاع نيجيريا شنو ؟؟؟ ابولهب ؟؟؟؟؟؟

  15. حاج أحمد السلاوى | رد

    ولدنا سهيل .. لالالالا لا أخونا جنوبى اكبر ولا شيتين ..بس أكيد يكون دفعة وكدا ..ونتشرف إنو يكون دفعة عشان نكبر كومنا ..وتانى نقول ليكم يا ولد أمشى ألعب بعيد …
    أنا بس عندى سؤال سغيرووووونى زى كل مرة .. الأئمة ديل ليه ما ينصحوا الحكام أن يرجعوا إلى الله زى مواطنيهم ولا الحكام رُفع عنهم القلم ؟ لأن الحاكم البيخاف من الله مش ممكن يعذب رعيته بالصورة دى ..

  16. ياعمك .. دا الشعب هو المفروض يعدم علشان نحن بنضايق الساده الحكام و بنقلق راحتهم .. هم فاضين ؟؟؟

  17. الأخ محمد عمر سلام . .
    أرجو أن نلتزم بالتعليق بما قل و دل ، كي لا يفقد هذا الموقع فائدته و القه و خفة دمه.
    لك الود
    الفاتح جبرا و السمار الكرام . . .
    أقترح تكوين لجنة من جياع البلد لمقابلة ندى القلعه و إقناعها بالتوقف عن الغناء.
    ما فيش حل غير كدا أبدا.

  18. ههههههههههههههههههه,,محمد عمر دا مغبووووون,خلوهو اليفش غبينتو يا ناس…

  19. ابو ايه .. سلام .. ياخوي ما يانا نحنا زاتنا الشعب الكان حاكموا ازهري وعبود ونميري وباقي الحكومات مالنا
    ماحصل لينا زي ده ؟ زمان صحي كان في بيوت الهناي والانادي لكن اللقطاء والنصب والاحتيال والربا والجشع والهلع ما شفناهم الا مع الحكومة دي .
    سهيل .. ازيك .. انا ما قلت الملين ما تقولني ساكت لكن بالجد شفتها الا كانت فقدت قيمتا .
    حاج احمد يا دفعة نتشرف والله … زمان ( عبده تي ) قلبا قلب اللحم ده والشحم ده واصلوا
    الكيلو ما وصل 40 الف . قلت لي 1/1/ سنة كم والله لو طلعت عندك ميلاد اصلية تكون لومتني مع سهيل .

  20. ياسين شمباتي .. سلام …. الاول دي حلوة وقوية …….

  21. جنوبى..وعليكم السلام ورحمة الله..
    تحلى ليك العافية..
    لكن قلت لى انت من زمن (عبده تى) !!؟؟ ما بسالك لكن ! و(عبدو تش) الشنبو شنو كدة ما عارف ! ول ول ول …

  22. يا خوانا أعذروني اليومين ديل أنا عاطل وما عندي شغلة والحال واقف وجاية علي سماية وانتم كلكم معزومين السبت الجاي الصحافة شرق م/38 رقم 210 جوار مسجد خالد بن الوليد توجد مظلة شرق الزلط الرئيسي مكتوب عليها مظلة المرحوم حسن منير ……

  23. غايتو مولانا بتاع الخطبه ده جاب لنفسه اللوم وزاد كوم المعارضه بالشريف المبسوط…… هسعه مولانا ده عينو فى الفيل و يطعن في ندي المسكينه دي ؟ ولا أحتمال كلامه صاح لأنو أنا يومداك كنت ماشي أشتري بطيخه….. أه قمت ركبت لي أمجاد السواق بتاعا مشغل شريط ندي يلا و قت وصلت لبتاع البطيخ قال لي الليله البطيخ بقي غالي قلت ليه أرخص واحده بكم ؟ قال لي بتمنتاشر ألف(بالقديم) و أتنين ألف للفحص… أها نطيت ليه في حلقه و قلت ليه ياخي أنا ما عندي ملاريا…. يا زول صاحبك قال لي الفحص بتاع نشوفا بيضا و لا حمرا.. أها قمت فكرت و قلت في نفسي يا ولد خليك حريف وفر التمنتاشر و أصرف أتنين بس قلت ليه خلاس أفحصا لي وما داير أشتريها و فعلاً فحصا و الحمد لله ما طلعت بيضا ….. أها وقت رجعت بالركشه لقيت ليك السواق برضو مشغل ندي القلعه….الله يجازيك يا ندي غليتي علينا الحاجات و المظاهرات الجايه شعارها
    ( ياندي القلعه حرمتينا من اللحمه و الضلعه)

  24. أخونا محمد عمر ……….. مبروك و نتمني لكم السعاده مع المولود أو المولوده وربنا يجعل لكم كل الخير والبركه.
    ملحوظه و رجاء : أذا كانت مولوده ما تسميها ندي لأنو البلد ما بتستحمل المزيد من الغلاء.

  25. أنور .. وبمناسبة البطيخ فانا أسوأ من يشترى بطيخ على وجه الأرض .. وحتى لو طلعت حمراء تكون مسيخة وما عندها طعم ..مرة مريت بجنب بائع بطيخ .. عزلت بطيخة وعارفه حتكون قرعة .. سألته بكم البطيخة قال ب عشرين ألف( بالقديم.. حيرتونا معاكم مرة قديم مرة جديد ) قلت ليهو القسط الأول كم ؟ الراجل حدر لى جنس حدرة وزمجر وانتفض وقلت حسه الزول تشيلزا الهاشمية ويطعنى بالسكين الفى يده وقال لى أمشى أمشى يا زول إنت زااااتك ما شبه البطيخ دا .

  26. الأحباء الأعزاء …سلام
    إنابة عنكم جميعاً أرحب الأخ جنوبي وأتمنى أن يطيب له المقام … كما ـأرسل تهنئتي للعزيز محمد عمر بمناسبة المولود … ويتربى فى عزكم إن شاء الله

  27. أحكمت الفاتح والإخوان
    لكم التحايا جميعا
    ربنا لاناخزنا بما فعل السفها منا وربنا لاتحملنا ما لا طاقة لنا به واعف عنا وارفع هنا البلا والربا والغلا
    أخونا محمد
    مبروك المولودة جعلها الله من المستورات الحافظات لكتابه العاملات به …
    قلت ليا عاطل وسماية يعني لمن نجي نجيب معانا شنو ؟؟؟؟
    تحياتي  

  28. الاخ جنوبي
    قلت ليا جنوبي جنوي ولا عرب النيل الابيض مابقو برضو جنوبيين ….
    يعني ياباني ولا تايواني ….

  29. الاخ الفاتح جبرا .. شكرا علي الترحيب .. حيثما تكون وسمارك يطيب لي المقام .
    Muhalabasha شفت المحن .؟!! الساعة بالقديم والجديد والقروش بالقديم والجديد حتي انا جنوبي بقيت بالقديم والجديد…. بمناسبة اهل العوض والله انا خايف سوق الناقة يبقي في الحدود الغربية لدولة ( جهوية ) السودان .
    اخوك مندكرو شكل نوبة .

  30. السلاوى…
    جننتنا جن بى قصة بطيخك دى !
    انا كان لقيت السكين دى ببعجك بيها ! دا شنو دا !؟؟

  31. كيف أحبك يا بلد ؟؟
    على نسق رائعة أحمد نجم : (إزاي احبك يا بلد )
    ************************************************

    كيف أحبك يا بلد وانت ِ ما حباني

    وكيف أحبك يا بلد ودايما عليك رافضاني

    أسمك عزيز ومزروع في دماي وكياني

    وبهتف بيك دوام واللاهي يا ســوداني

    مرّتْ 30 سنة مافكرتَ يوم تطراني

    وإن جيتك إجارة بالصرف الكتير تأذاني

    وان إتغرّبتَ منك كل الهموم تملاني

    ولولا( جنسيتي الميلاد) كان من السجل تمحاني

    همك كبيير يا وطن.. الله يجازي السبب والجاني

    موواليك طويلة وبشتى الهموم كاسياني

    مويتك ( محومرة )وكتاحتك تقول دخان ِ

    وكهربتك ظريفة وتقطع بدون إعلان ِ

    وكيلو الطماطم عندك فات حدود إمكاني

    فاتورة العلاج غلبتْ تجار الضّاني

    ورسوم الدراسة محتاجة ( بحث ميداني )

    ناسك عُزاز .. بس (سـُكاتهم ) حزّ في وِجداني

    كيف الرجوع ليك يا بلد ؟ أنا همي زاد من تاني

    والمعادلة صعبة .. ومحتاجة حل ربّاني

    وهم الكفيل زوّد علي أشجاني

    وقراية العيال..دا براهو موضوع تاني

    بس يارب العباد تصلح امور سوداني

    ولو بقى في العمر سنتين أعيشها في أوطاني

    يا ( ريس بشير) ما عندك قرار إنساني ؟؟

    يزول الغلا ويبقى العلاج مجّاني

    وتنضـف بلدنا من كل تور وأناني

    وتتفتح دروب العودة لكل زول سوداني

    ويبقى الإغتراب ذكرى ويصبح خيارنا التاني

    وإن ( كِمل ) العُمرْ وكل مخلوق فاني

    (نموت) جوه البلد ..

    و ( نُدفن ) في تراب سوداني ..

    لكني في الشايفاهو دا .. !!

    حتى العودة ليك .. صارت خيارنا التاني ..

    ——————————————–
    أم مجاهد

  32. محمد عمر : ربنا يجعلها من الصالحين ..

    يس : هو شنو ده .. ميته و خراب ديار ؟؟ جدو سلولو دا يلقاها منك ولا من بتاع (البتيخ) ؟
    إنت كمان ياجدو صعبتها شويه .. بطيخه ولا قطعة ارض ؟؟

  33. أخونا السلاوي حمد الله علي سلامتكم من بتاع البطيخ .. أنت عارف علي حسب الموقف بتاعك ده معاه المفروض من أضعف الأيمان يفقشها فوق راسك لكن ربنا ستر…عندي أقتراح …. رايك شنو نمشي للسمايه بتاعه أحمد عمر و نشتري ليه هديه عباره عن بطيخه لازم ( تكون حمرا) بدل خروف ما كلو أحمر (دم أحمر و لون أحمر)
    ملحوظه:
    نرحب بالاخ جنوبي بس يا ريت نعرف الراجل ده جاء مع سلفاكير ولا شنو؟؟؟

  34. قلتي ليّ سموك ندى!؟!

    وده منو السمّاك ندى؟

    ده أكيد أبوك

    إنعل كِدة!

    فيك شنو يسمّك ندى!؟

    في صوتك أتخن مننا

    إضنين كُبار زي دِشّنا

    وتقولي ليّ سمّاك ندى!

    خشمك ده ريحتو معفّنة

    ايدين كبار حقات بُنى

    وتقولي لي سمّاك ندى!؟

    المشية كتّاحة وعلال

    كرشك تقول شايل جَنى

    وتقولي لي سمّاك ندى!؟

    قالت لي “ها هدى في البطاقة إسمي ندى”

    شوف يا أخ..

    مافيش علاقة بينك وبين ندى

    خلّيها ندى ..

    خالت قريبة جارت صديقة ناس ندى

    ما فيش علاقة

    ندى في العيون أكحل مجعّد مسوّدة

    انتي العيون فوقن قضى

    ندى في الحواجب زي هلال

    قصة نصوم دي مؤكدة!

    انتي الحواجب دلجة بس

    قلم الحواجب هاردها

    وتقولي لي سمّاك ندى!؟

    ندى تبتسم آلالاف مؤلفة تسعدها

    وانتي الخشم شارّة التلاليش

    بس طبق ومغطّي صينية الغدا

    ندى في الوشيش نظرك بشيش..

    ما يعقّدها

    وانتي الوشيش وش الجحيش

    نخرين كُبار كُرعين ردا

    وتقولي سمّاك ندى!

    قاتلي “آي أنا إسمي ندى”

    شوفي أوعك تقولي اسمك ندى

    ندى ما بس الاسم

    ندى الجمال زايد الأدب زايد العلم زايد الفهم

    ندى في الجمال ما شُفنا أجمل من كِده

    ندى في الدلال خصّاها بيو رب العباد حين أوجدها

    ندى في الأدب ..

    ربّوها بيو رجال ياكلو النار مولّعة موقدة

    ندى في الكلام

    طبيعي صوتا بيجيب صدى

    ندى في “البزاغ” ..

    شربتي “سفن أب” ياهو ده !

    وتقولي لي سمّاك ندى!

  35. سهيل..
    لكن هو ما بجيبها كبيرة شديد !!

  36. إنا لله وإنا إليه راجعون…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: