خروف بالتقسيط

ما أن تم إعلان جواز شراء خروف الأضحية (بالأقساط) حتى تكاثرت أعداد شركات بيع الخراف بالتقسيط للمواطنين ، إمتلأت الوسائط الإعلامية بإعلانات من شاكلة :
– يا عوض مالك زهجان وخاتى إيدين فوق راسك تقول القيامة قامت؟
– الخروف يا محمود .. الخروف … الوليه اليوم كلو تنق تنق .. أجيب ليها خروف بي مليون وشويه من وين؟
– كان على كده يا عوض قضيتك محلولة بس تمشى طوااالى على شركة (خرفان بالتقسيط)
– شركة شنوووو؟
– شركة خرفاااان بالتقسيط
– وديل ح يضحوا ليا
– أيوااا ح يضحو (بيك ) وكمان على تلاته أقساط!!
– (صوت جهورى مع صوت خروف كخلفية) : مهما تكون فلسان وعدمان (خرفان بالتقسيط) ح تحليك تضحي إنتا كمان !

أما شركة (خروف ببلاش) فقد قامت بترويج إعلان من نوع آخر :
– الرسول يا نفيسه خروفكم المدوعل السمين ده إشتريتوهو بى كم ؟
– والله كان قلت ليكى يا سعاد ما بتصدقى ؟ ده مجانن !
– خروف قدر ده ومجانن ما بصدق
– لا صدقى يا سعاد .. أصلو عصام أخوى إشترى ليهو خروفين وأدوهو التالت ده ساااكت !
صوت جهورى (غير داك) : إشترى خروفين بالأقساط وأحصل على الثالث مجانن من شركة (خروف ببلاش) .. مع شركة خروف ببلاش مش ح تسدد العليك !
عبدالعال مواطن (مطحون) فهو موظف بسيط لا يقوى مرتبه الضعيف على الإنفاق على إحتياجات أسرته (الضرورية) ناهيك عن خروف العيد (البقى بالشئ الفلاني) ، بعد ضغوط شديده من الأولاد و(أم الأولاد) توجه لشركة (خرفان بالتقسيط) حيث وجد الشركة تزدحم بالمواطنين :
– (مواطن) : هسه الناس ديل ح يدونا الخروف ده بي سعر السوق !
– (آخر) : إنتا يا زول بتحلم؟ سوق شنو ؟ إنتا قايلهم شغالين القصة دى )هواية(؟ ما طبعاً عاوزين يكسبوا؟ ويطلعو ليهم قرش قرشين !
– (المواطن) : لا حول ولا قوة إلا بالله .. بالله ده إسمو كلام كمان فيها زيادات؟
داخل فناء الشركة الذي يعج بالخراف والمواطنين قام (عبدالعال) بإختيار خروف (مدوعل) :
– أها ده بي كم ؟
– عاوزو نظام سنة يا حاج وللا سنتين ؟
– سنه بي كم ؟ وسنتين بي كم !؟
– لو عاوزو سنه يعنى إطناشر قسط ح يكون بي مليون وتمنمية .. ولو سنتين يعنى أربعة وعشرين قسط ح يكون بي إتنين مليون وأربعمية !!
بعد تفكير وموازنات قام عبدالعال بإختيار (إطناشر قسط) ثم قام بتوقيع (عقد شراء خروف بالأقساط) مرفقاً معه إطناشر (كمبيالة) شهرية بعد أن أبرز أوراقه الثبوتية من بطاقة شخصية وشهادة سكن وشهادة مرتب من المصلحة التى يعمل بها !
وهو يضع الخروف على الركشة طلب عبدالعال من السائق أن يمر به علي (الزريبة) حيث قام بشراء كمية من (أبو سبعين) وكم ربطة (برسيم) ليعلف بهما الخروف مدة اليومين اللذين يفصلانه عن العيد ، ما أن توقفت الركشة أمام منزله حتى تجمع الصبية والأطفال وهم يتصايحون فرحين بينما تهللل وجه زوجته (نعيمة) وهى تفتح باب الشارع مستقبلة (الضيف) المنتظر.
فى صباح اليوم التالى إستيقظ عبدالعال على صياح (نعيمة) وهى (تلكز فيهو) :
– عبد العال عبد العال قوم شوف خروفك ده
-( منزعجا) : مالو يا نعيمة !؟
– مشيت أشوف مويتو لقيتو راااقد وقاطع الحركة !

هب عبد العال واقفا وأسرع نحو الخروف المستلقى دون حراك ، ما أن نظر إلى عينيه (الجاحظتين) حتى تأكد له بأن الخروف قد فارق الحياة !
تفاجأ العاملون فى شركة (خرفان بالتقسيط) بشخص يدخل إلى الإستقبال وهو يجر خلفه (خروف ميت) يضعه فى منتصف الصالة ويتجه نحوهم والشرر يتطاير من عينيه :

– تدونى خروف بالليل يموت ليا بالصباح ؟
– وما يموت كان مات دى مسئوليتنا نحنا؟
– (فى غضب) : كيفن يعنى ما مسئوليتكم إنتو؟
– إنتا يا حاج ما قريت الكلام التحت المكتوب في العقد الوقعتو لينا ده؟ أقرأ هنا .. أقرأ هنا .. مش مكتوب (الشركة غير مسئوله عن البضاعه بعد خروجها من المحل) !!

كسرة :

إذا قابلت شخصاً يعتلي أحد (الصواني) الرئيسية رافعاً يديه وهو يصيح بأعلي صوته في تشنج مخاطباً المارة :
– الشركة غير مسئوله عن شنووو؟
– (المارة) : البضااااعة !
– بعد خروجها من وين؟
– (المارة) : من المحل
فأعلم أن البضاعة المشار إليها هى (خروف) وإنو الزول ده (عبدالعال) !

Advertisements

29 تعليق

  1. والله شئ محزن بالجد نحنا بنورد الخرف لمعظم دول الخليج وللحج و الهدي و الخراف بتتربى عندنا ومع ذلك يصل الحال لما هو عليه ، الله يرينى في عمر البشير ومن عاونه وناصره يوما اسودا كيوم عاد وثمود

  2. حاج أحمد السلاوى | رد

    البروف .. يعنى ميتة وخراب ديار ..
    غايتو ..ربنا يجازى الكان سبب إنو سعر الخروف يصل لحد المليون ..

  3. أجي يا ناس الافتاء .. لا يكلف الله نفسا الا وسعها وديتوها وين ؟
    وكت بقيتو تفتوا بالزي ده عليكم الله افتوا للحكومة توسع سجن الهدي عشان يستقبل بقية الشعب الفضل او يعملوا سجن جديد يسموهو سجن الفداء .
    غايتو يحلنا الحل بلة … من الضيق والمذلة …….

  4. يا ريس، بس اتأكد لينا من الخروف ده معاه شهادة ضمان ولا تأمين ولا أي عامل زي ما بقولو الخواجات يتاع force majeure

  5. ماهو نحنا مصاريف البيت العادية شغالين مع بتاع الدكان فيها بالتقسيط .. يعني بقت على خروف الضحية القدر ظروفك دا داير ليهو فتوى ؟ .. يا حبيب طالما أصلو البلا من عدم عملنا الكويس .. الخروف ما ماشي يغير سمعتنا عند إئمة المساجد .. مجلينو السنة دي … يلا أفتو لينا : البجلي الضحية السنة دي عليه هدي !!!!

  6. حاج أحمد السلاوى | رد

    أب احمد .. انا مش مفتى لاكين حسب معلومات الدينية البسيطة جدن … إنو الضحية سنة مؤكدة وليست واجبة إلا على المستطيع ( من الجماعة إياهم ) ومادام حصلت السعر دا ممكن تجليها ..ولا يكلف الله نفساً إلا وسعها ..

  7. حاج أحمد السلاوى | رد

    بعض الأحاديث والأدلة الخاصة بالأضحية .. (منقولة ) .. ويوجد بحوث مستفيضة فى هذا الخصوص يمكن الرجوع إليها ..
    لة الجمهور القائلين بسنية الأضحية ومناقشتها :

    1/ استدلوا بحديث أم سلمة رضي الله عنها قالت 😦 قال رسول الله صلى الله عليه وسلم : إذا دخلت العشر وأراد أحدكم أن يضحي فلا يمس من شعره وبشره شيئاً ) رواه مسلم

    وقد استدل به الجمهور وقالوا هذا دليل على أن التضحية ليست بواجبة ، لقوله صلى الله عليه وسلم ( وأراد ) ، فجعله مفوضاً إلى إرادته ، والواجب لا يعلق على الإرادة .

    أجاب عن ذلك شيخ الإسلام (مجموع الفتاوى 23 / 162)فقال : [ وهذا كلام مجمل ؛ فإن الواجب لا يوكل إلى إرادة العبد فيقال إن شئت فأفعله ، بل قد يعلق الواجب بالشرط لبيان حكم من الأحكام ، كقوله { إذا قمتم إلى الصلاة فاغسلوا} وقد قدروا فيه إذا أردتم القيام ، وقدروا إذا أردت القراءة فاستعذ ، والطهارة واجبة والقراءة في الصلاة واجبة ، وقد قال { إن هو إلا ذكر للعالمين لمن شاء منكم أن يستقيم } ومشيئة الاستقامة واجبة ، وأيضا فليس كل أحد يجب عليه أن يضحي ، وإنما تجب على القادر فهو الذي يريد أن يضحي، كما قال ( من أراد الحج فليتعجل فإنه قد تضل الضالة وتعرض الحاجة) والحج فرض على المستطيع فقوله ” من أراد أن يضحي” كقوله “من أراد الحج فليتعجل” ،ووجوبها حينئذ مشروط بأن يقدر عليها فاضلا عن حوائجه الأصلية كصدقة الفطر] اهـ.

    ويؤيد كلام شيخ الإسلام الرواية الثانية عند مسلم : « إذا دخل العشر وعند أحدكم أضحية فلا يأخذن شعراً ولا يقلمن ظفراً» ولفظه عند أبي داود « من كان له ذبح يذبحه ».

    فهي كالمفسرة لمعنى الإرادة في الرواية الأخرى وأنها على القادر الذي له ذبح يذبحه .

    ويؤيده أيضا أنه قد جاءت هذه اللفظة في حديث آخر في سنن ابن ماجه وصححه الألباني عن عائشة وأبي هريرة رضي الله عنهما:) أن رسول الله صلى الله عليه وسلم كان إذا أراد أن يضحي اشترى كبشين عظيمين سمينين أقرنين أملحين موجوءين فذبح أحدهما عن أمته لمن شهد لله بالتوحيد وشهد له بالبلاغ وذبح الآخر عن محمد وعن آل محمد صلى الله عليه وسلم )

    فدل ذلك على أن الحديث لا يدل على عدم الوجوب ، كما أن التعليق بالإرادة لا ينافي الوجوب.

    قال ابن رشد (بداية المجتهد 1/ 314 ):[ وكل حديث ليس بوارد في الغرض الذي يحتج فيه به فالاحتجاج به ضعيف].

    2. استدلوا بما روي عن ابن عباس t أن رسول الله صلى الله عليه وسلم قال : ( ثلاث هن عليَّ فرائض ولكم تطوع ، النحر والوتر وركعتا الضحى ) رواه أحمد و البيهقي ، وفي رواية أخرى عند البيهقي عن ابن عباس t رفعه قال 😦 كُتِبَ عليَّ النحرُ ولم يكتبْ عليكم )

  8. السلام عليكم ، البرف الاخوان ، هو نحن مصاريف البيت و المدارس و الجامعات و الذى لا بد منه ما قادرين عليها و مجرسانا ، يقومو يلاوزو لينا بى الخروف ، مش اربعه يوم العيد ولا زادوهو ، تزوغ مدنى ولا شندى وكان الله يحب المحسنين ، سؤال خبيث : هل المفسدين بتحبهم القروش ؟ ……………. عجبى

  9. دا انا غلبااااااان | رد

    الديك الكبييييييير بى كم يا جماعه

  10. الأحباء الأعزاء .. العلماء عارفين الشعب ده بيحب دينو .. وبيحاول جهده أن يقوم بأداء شعائره عشان كده أفتوا بجواز التضحية بالدين وبالأقساط كمان عشان الناس الغلبانه دي تمشى تستلف وتضحى لأنو لمن 98% الما قادرين يشتروا الخراف المليونية دى السنة دى ما تضحى ح يكون شكل الحكومة باااايخ !!

  11. تحياتي لكم جميعا
    اولا كل عام وانتم بخير بدري بدري قبال مايفتو بي فتوة المامضحي مايعيد ولا حاجة كدة …
    غايتو أنا لأني ولدي اسمو احمد فمع الاخوان اب احمد وحاج احمد السلاوي …
    الضحية زي الحج للمستطيع والماعندو مايضحي ولا شنو ياجماعة الخير
    ثانيا انحنا حياتنا كلها إقصاد وقدر ظروفك ودكان بالتقصيد علي علي تلاتين يوم ….
    وبالمناسبة مافيش خروف قدر ظروفك وبمناسبة الشراكة في الخروف الراس بعدين البشيلو منو ….؟؟؟
    الاخ جنوبي مظلل لك تحياتي وبالمناسبة انت جنوبي شايقي ولا شنو ( أجي ) دي ؟؟؟؟؟؟
    تحياتي لكم جميعا

  12. ود الباشا ربنا يخلي ليك أحمد ويديك الزيادة …
    عموما بعد فتاوي السلاوي الجابا دي مااااا أظن في زول يضحي في السودان .. وإحتمال نعمل مقاطعة للأضاحي زي ما عملنا مع اللحمة .. تجار البهايم خرفانم إلا يعملوها شاورما … !!!

  13. اقترح مادام الخروف بالتقسيط حقو يكون عليهو تامين شامل ويكون الصيانة على الشركة (البرسيم , وابوسبعين)

    ويكون التامين لحدى يوم الضحية وبعد العيد يعتبر التامين ضد الغير ويلغى التامين الشامل يعنى كان فى واحد

    نطحو الخروف يكون العلاج على الشركة وكده وعشنا وياما حنشوف

    كسرة:
    مافى ضباح يضبح يوم الضحية بالتقسيط لو فى زول عارف واحد بيضبح بالتقسيط يكلمنى

  14. انتو صحي قالوا في زول واحد مشي اشتري خرفان كردفان كلها ودقش بيها الخلا ..!!؟؟
    الزول ده منو ؟ وخلاء كردفان ده كيفنو اللا بتشاف فيهو لاندكروزرات ولا بتشافن فيهو الخرفان ؟!!
    ود الباشا .. تتذكر الجنوبي الكان بغني للنعام ادم داك ؟ يا حليلم والله .. شالوا الخير كلو معاهم وراحوا .
    المحتار … انا بضبحوا ليك مجاني اقلو نجدد الشوفة ….

  15. إنتو في ده ؟ الموت بقى بالتقسيط .. الواحد يمرض .. ما عندو حق الدكتور .. لقى حق الدكتور .. ما لقى حق الدواء . لقى حق الدواء .. ما لقى الدواء ذاتو .. لملم حاجاتو واتجه ناحية أحمد شرفي ولا البكري عشان يحجز ليه قبر هناك..

    بعد الاضحية بالتقسيط كمان قالو الأضحية ممكن بالكيلو ..

    فرجك يا رب ..

  16. منتظرك يالجنوبى عشان تضبح

    السعرو يجنن وشوفتو تحنن

    الهين ولين شغل بالى

  17. جبرا والسمار .
    سلامات .
    طبعا بنك الاسرة عمل دراسه جدوى لتمليك خروف الضحية بالاقساط المريحة جدا.وهذا المقترح كان من الوزير القال جربو العواسة والكسرة . قام داير يخفف معاناه الشعب ويفرح الاطفال .
    شروط تمليك الخروف :
    1/شهادة سكن من المحلية حديثة .
    2/ضامن أو غارم
    3/الرقم الوطنى .

  18. تمليك حكر ولا حيازة ولا وضع يد

    مااظن تمليك حر مادام بالتقسيط

  19. حاج أحمد السلاوى | رد

    نبينا محمد ( صلوات الله وسلامه عليه ) سأل المؤذن بلال .. بم ضحيت يا بلال ؟ فرد بلال ضحيت بديك يا رسول الله .. فضحك النبى صلى الله عليه وسلم وقال لبلال : مؤذن ضحى بمؤذن ..
    ولم يعترض النبى على أضحية بلال هذه ..
    بس ما تاخدوها فتوى وتقولوا عمنا السلاوى أجاز لينا الضحية بالديوك ..

  20. سلام عليكم
    يا جماعة مافي فكرة ظريييييييييييفة نعمل ضحية قدر ظروفك والفكرة كالاتي:
    تتبرع احدى شركات اللحوم باخذ الخرفان المذبوحة من المواطنين بعد ما تتذبح قدام بيوتهم وياخدوا منها البقدروا عليهو(كان ربع كيلو كان نص) وبعد داك تمشي الشركة المصنعة للحوم وترجع في شكل مغلف(فرانكفورتر،سجوك……..) رايكم شنو؟

  21. يا بروف ..
    بالطريقة دي
    الجماعة ديل حا يجننو ليهم (مليون) زول …

    كــــســرة:
    على قولة المثل : خروف (بالدين) .. ولا طلب شية (بالكــاش)

  22. شوية شوية الحير حتضحي !!
    اكتشف خبراء صينيون إمكانية الاستفادة من جلود الحمير في مجالات اقتصادية وطبية أيضا حيث اثبتت الدراسات العلمية انه يمكن استخلاص عقاقير ومنشطات جنسية من جلود الحمير دون أية آثار جانبية. وقد قامت شركة مصرية بالتعاون مع شركة صينية بتقديم عرض مفاده اقامة مجزر خاص مزرعة حمير ومصنع لإنتاج معلبات طعام للحيوانات الاليفة كالقطط والكلام من لحم الحمير. بالإضافة إلى استغلال البان الحمير في إنتاج الادوية نظرا لما فيها من مضادات حيوية نادرة وفقا لما قاله حامد سماحة رئيس هيئة الخدمات البيطرية بمصر ، [3] والحكاية ماشية كويس أهو .. بكرة أو بعده تجينا الفتوى بتاعت ضحية الحمير …….
    3 . ويكيبيديا، الموسوعة الحرة

  23. السلاوي .. سلام .. ايوه كده فرج همنا وورينا سماحة دينا ..
    تعرف الشيخ سيد الفتوي ده داير يورطنا في الديون ويدخلنا السجون ..
    لكن اتلومت مع الديوك ..
    محمد عمر .. سلام .. هو عليك الله في أليف اكتر مننا نحنا الصابرين 22 سنة …
    الشركة المصرية دي مقرها وين ؟ شايف في لحمة نزلت السوق ب 14 الف !!!!
    زمااااان كان عندي ( كتكوته ) زقوني لبن حمير .. هسع ممكن حبوبتي تقاضي الصينيين في الملكية الفكرية ؟؟

  24. البروف وسماره الكرام …. التحية والاحترام
    والله إن ما نحن فيه يجعلنا خرفانين بالتقسيط …. ولكن بأقساط غير مريحة …. ورغم أن الخرفان عادة ما يخرف بالتقسيط إلا أنه يكون تقسيطا حتى نهاية العمر
    أولا جميعنا يعرف أن معظم من يكلف نفسه عناء الضحية لا يفكر كثيرا في وجوبها أو سنيتها وإنما يفكر فيها كمظهر اجتماعي ودليل على القدرة والفشخرة …. وتجدهم لا يقسمونها ثلاثة أثلاث ولا يعرفون الكثير عن احكامها … ورغم أنهم لا يفعلونها تطوعا أو ابتغاء للأجر والثواب فإنهم لن يتركوها حتى ولو حصلوا عليها بطرق … غير شرعية
    ثانيا قيل لي أن أحد المفتين (الفقهاء؟!) افتى بعدم جواز الحج من (الصندوق) حتى ولو كانت الصرفة الأخيرة … هل منكم من استمع إلى تلك الفتوى؟ وإذا كان الأمر صحيحا والحكم صحيحا فما ما الذي يسمح بالخروف من الصرفة الأولى ويمنع الحج من الصرفة الأخيرة؟

  25. ليست فقط (الأضحية) على قدر الاستطاعة، بل كل الفرائض لها في الدين ما يجيز فيها تركها في بعض الحالات، لكن هذا الكلام لا يوافق رجال الدين، ولا رجال المال.. لأن مصالحهم تقف.

    حتى لحم الميتة يحل شرعاً في بعض الحالات….

    قال تعالى : (يريد بكم اليسر لا العسر) فمن أصدق القائلين؟ جل وعلا أم رجال الدين والخراف..

  26. الأخ : hashimo2
    أرأيت لو لم تستطع الجهاد أو الصيام أو النطق بالشهادتين لأي سبب ( مرض أو في كفار منتظرين يقصوك لو عملت كده ) فتحاملت على نفسك فجاهدت أو صمت أو صليت .. كذلك الحج والأضحية ولا يوجد حديث واحد يبطل حج أو أضحية من استدان أو قسط بل على العكس تثاب خيراً لقول النبي صلى الله عليه وسلم فيما يرويه عن ربه ( أحب الغني الكريم وحبي للفقير الكريم أشد ) فالبرغم من حاله الفقر وقله المال والثروة الا انه كريم ويتصدق ويتكرم لوجه الله لذلك الله يحبه اشد من حبه للغنى الكريم ، إلا أن يكون المال مشبوها أو من قبيل القدرة والفشخرة أو أولاده حيموتوا من الجوع مثلاً فهذا أمر آخر وهذا رأيي والعندو ايضاح لهذا الموضوع ينورنا أكتر يكون جزاه عند الله خير ……..

  27. حاج أحمد السلاوى | رد

    hashimo-2 ( ليه ماتكون هاشيمو رقم 1 .. مجرد شمارات ناشفة ..)
    الحاصل يا صاحبى فى عالمنا المعاصر إنو الضحية عندنا فقدت وتجاوزت المقصد الدينى وموضوع الفداء وطاعة ابينا ابو الأنبياء ابراهيم الخليل لربه ..وصارت عادة إجتماعية بحتة ودخلت من باب الفشخرة كما يقولون ومن باب إدخال الفرحة على الأطفال وما شابه ذلك عدا ما يصاحبها من موبقات أقلها الشربوت البارد ..
    وهى سنة مؤكدة للقادرين وليست واجبة ..يعنى زى فريضة الحج …والله أعلم .

  28. الأخوة السلاوي ومحمد عمر وغيرهم ممن تكبد عناء الرد على مداخلتي وقراءتها أصلا أشكركم شكرا جزيلا
    ولكنني ما زلت اتساءل عن فتوى عدم الحج من الصندوق …. فإذا افترضنا في الصرفة الولى او الثانية أنك تكون مديونا ففي الصرفة الأخيرة يكون هذا مالك وقد اجتمع لك وقد أديت كل الأقساط ولم يتبق من يريد منك شيئا… فما المانع؟ … وعلى فكرة رغم توفر فقهاء التلفزيون وفقهاء الانترنت فأنا اجدني أكثر ثقة بفقهاء (القمر دينة) كما تسمونها
    وبالمناسبة فإن هاشموتو وهاشم الهادي شخص واحد ولكن الاسم يكون مكتوب مسبقا حسب حساب وردبرس أو قوقل وأنا لا اغيره … لمن يهمه الأمر

  29. حاج أحمد السلاوى | رد

    أخونا هاشيموتو .. حسب علمى المتواضع أن من ينوى الحج ( لمن إستطاع إليه سبيلا .. طبعن ) عليه أن تكون لديه مؤنة الحج حتى عودته سالماً بإذن الله وأن يكون مؤمناً لقوت عياله وراءه حتى يعود ..فمن حج من عائد صندوق يكون كمن قصر فى حق من يعولهم لأنهم حرمهم من المال الذى كان يدفعه للصندوق ..ومن لم يستطع الحج وهو غير قادر فلا إثم عليه ..ولا يكلف الله نفساً إلا وسعها ..وخلوها بالنية ..
    والله اعلم .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: