شفط رصيد

كنت جالساً مساء يوم أمام جهاز الحاسوب أكتب مقالاً عندما إستدعاني إبنى ذو العشر سنوات قائلاً :
– تعال يا بابا شوف التاس دى كوووولها ما قادرة تجاوب على السؤال ده !
– سؤال شنو؟
– حيوان بيقول باع وبيضبحوهو فى عيد الضحية !
نظرت إلى شاشة التلفاز فوجدت حساء تتمايل (ليه ما تعرف) وهى تردد فى ذات السؤال بلهجة شامية غنجة بينما يظهر السؤال نفسه مكتوبا على شريط اسفل الشاشة يتبعه عدد من أرقام الهواتف للإتصال بالبرنامج (وكده) بينما هنالك ملصق خلف المذيعة الحسناء كتب بخط عريض يوضح قيمة الجائزة وهى خمسة آلاف دولار !
– آلو ناخد إتصال ..مين معانا
– معاكى أبوعبدالله من السعودية
– ويش الإجابه يا أبوعبدالله
– البقرة .. البقرة .. طال عمرك !
– شكراً ابوعبدالله .. آلو كمان ناخد إتصال آخر
– مين معانا بدو يشترك
– معاك مصلح
– من فين عم تتصل يا مصلح
– من اليمن
– طيب ويش الإجابه يا مصلح؟
– التور .. التور !
وتمضى الإتصالات الخاطئة وفي كل مرة كان إبنى يلتفت ناحيتى ضاحكاً من سذاجة المتصلين الذين لم يستطيعوا إجابه هذا السؤال (إن كان يصلح أن يسمى كذلك) !! وما عرف إبنى أن هذا البرنامج هو في واقع الأمر هدفه الأساس هو أكل أموال الناس بالباطل إذ ليس هنالك جائزة ولا يحزنون !
فالمشاهد عندما يري سهولة السؤال وأن جميع المتصلين لم يستطيعوا الإجابه علية ومن ثم الإستحواذ على مبلغ الخمسة آلاف دولار الذى يسيل له اللعاب سوف يقوم بالطبع بمحاولة الإتصال بأحد الأرقام الموجوده علي الشاشة ليأتيه الرد (وهو فرحان لعدم إنشغال الخطوط) :
– قناة (أكسب واربح) ترحب بكم وتتمنى لكم حظاً سعيداً .. للتحدث باللغة العربية أضغط الرقم واحد وللتحدث باللغة الإنجليزية أضغط الرقم إثنين !
– (يضغط الرقم واحد) !
– (تااااني) قناة (أكسب واربح) ترحب بكم وتتمنى لكم حظاً سعيداً .. معذرة أمامك أربعة أشخاص بعدها سوف نقوم بإدخالك إلى الأستديو على الهواء مباشرة !
– موسيقي
– (بعد ثلاث دقائق ) .. عزيزى المتصل ..أمامك ثلاثة أشخاص فقط !
– الموسيقى مرة أخرى
– (بعد دقيقتين) .. المتصل ..أمامك شخصين فقط !
وأنت تتابع البرنامج :
– آلو مين معانا
– معاك عويس من مصر
– أيه الإجابه يا عويس
– الجاموسة .. الجاموسة
– شكراً يا عويس
تعود للتركيز في محادثتك :
– (بعد خمس دقائق ) .. عزيزى المتصل ..أمامك شخص واحد فقط !
هنا تقوم بمتابعة البرنامج متمنياً ألا يقوم هذا الشخص بالإجابة الصحيحة .. وبالفعل تكون إجابته خاطئة (السمكة) .. تنتظر أن يقوم أصحاب القناة بتحويلك إلى الأستديو لكنك تستمع إلى تلك النغمة التى تعرفها جيداً والتى تستمع لها دائماً عند إنقطاع المحادثة (تيت تيت تيت )!!
كل القصة .. مذيعة جميلة .. جائزة دولارية يسيل لها اللعاب .. سؤال ساااهل .. متصلين (كمبارس) مهمتهم الإجابة الخطأ .. تأجير خط إتصالات … ومتصل غبى (تفوت عليهو الحاجات دى كوولها) تخصم من رصيده 15 دقيقة دوليه هى قيمة المكالمة !
ما جعل (العبد لله) يتذكر ما تقوم به هذه القناة من إحتيال على المشاهدين هو ما تقوم به (الشركة القومية للكهرباء لدينا) من (أكل لأموال الناس بالباطل) فقبل يومين (قطعت الكهرباء) بالحى الذى أسكنه .. إرتديت ملابسى للذهاب إلى مكتب البلاغات كالعادة لتبليغهم بذلك إلا أن زوجتى وهى تعطينى (هاتفها) أخبرتنى بأن (المسألة) بقت (ساااهلة) وما عليا إلا الإتصال بالرقم 4848 لأقوم بإخبارهم بمسالة الإنقطاع ، قمت بالإتصال ليأتينى صوت أنثوى (مسجل) :
– السلام عليكم .. الشركة السودانية لتوزيع الكهرباء المحدودة ترحب بكم في مركز خدمات الزبائن الموحد وتسعد بخدمتكم .. (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجه وما استحمل الحر والسخانة؟)
– للتحدث باللغة العربية أضغط واحد .. للتحدث باللغة الإنجليزية أضغط إتنين (تتبعها الترجمة الإنجليزية .. مش ممكن المتصل القطعت ليهو الكهرباء ده يكون خواجه وما إستحمل الضلمة؟)
– (ضغطنا واحد) !
– (الصوت الأنثوى) : نرجو أن نلفت إنتباهكم أن هذه المكالمة مسجلة لأغراض الجودة !
– الموظفون مشغولون الآن الرجاء الإنتظار
– (موسيقى)
– الموظفون مشغولون الآن الرجاء الإنتظار
– (موسيقي)
– الموظفون مشغولون الآن الرجاء الإنتظار
– (موسيقى)
– الموظفون مشغولون الآن الرجاء الإنتظار
– (موسيقى)

(فجأتن) إنقطعت (الموسيقى) أعلاه قبل أن أستطع التحدث مع (أحد الموظفين) .. إلتفت إلى زوجتى وانا أمد لها هاتفها باحثاً عن هاتفى قائلاً :
– موبايلك ده قلنا ليكى تعبان غيريهو … أهو هسه قطع قبال ما نتكلم مع الناس ديل
– (بعد أن إستعلمت عن رصيدها) : ووووب عليا سجمى .. الناس ديل شفطوا رصيدي كووووولو
بالفعل القصة إتضح إنها (شفط رصيد) وليس خللاً فى جهاز (المدام) كما تخيلت ! عليكم الله فى أكل لأموال الناس بالباطل أكتر من كده ؟ بالله (جهة واااحدة) تحن علي أفراد الشعب السوداني الفضل ده مافي ؟ إى زول عاوز (يشفط)؟ هو فضلت فيها حاجة تتشفط ما خلاس بقينا علي الحديدة و(الضحية ذاااتا بقت بالأقساط) .. فى أى مكان في العالم خدمات الشركات دى بتكون (مجانن) وبيقولوا ليك (إتصل علي الرقم المجانى الكذا) الشفط ده لزومو شنو؟
وكت الكلام جاب الكلام عاوزين إفتاء من (هيئة علماء السودان) فى قصة العداد القاعدين نشتريهو بقروشنا وبيقوموا يأجروهو لينا (هو ذاااتو ده) ومش لزمن محدد ..سنة .. سنتين .. تلاته .. لا .. إيجار مدى الحياة .. ما مشروعية هذا الأمر ؟ هل يعد أكلا لأموال الناس بالباطل أم هو حلال بلال أيها العلماء الأجلاء دام فضلكم !
كسرة :
تقطعوا في الكهرباء علي كيفكم وقروشنا (مقدما عندكم) ما قلنا حاجة .. أها لمن يحصل عطب وعاوزين نوريكم ليهو بدل ما تشكرونا … كمان جابت ليها (شفط رصيد)ا !!

49 تعليق

  1. سلام ياقبيلة،،
    بروف جبرا، الناس البتعمل كده دي طالعة من وين؟؟ وجاية من وين ؟؟ مش من صُلب هذا الشعب ؟؟
    طيّب يا صديقي أحكي ليك حكاية لو بتتذكر زمان ونحن سُغار كان في لعبة أسمها (ملوص)، وأخري بالكوتشينة أسمها التلات ورقات، لمن كُنا بنلعبها وأهلنا يكتشفونا يقوموا يجلدونا جلدة الناقة الأبت المركب، أها يا صديقي هذا الجيل وجيلي أنا وجيل عمك همن الذين يديرون الشأن الآن، ومن شبّ علي شئ شاب عليه….
    ألم أقل لكم بان الكارثة فينا نحن جموع الشعب فكيفما تكونوا يولي عليكم،،

    1. اخونا بن الفلاة المقدام الهمام الماسك الزمام واللجام .. اريت حالك زين ..( لا أريبا ولا سودانى .. زين ..وبس ).
      ياخ إنت الشعب دا عذبتو عذاب خلف الله ..وأؤكد لك أنه ليس ابناء جيلى ومن سبقونى هم الذين يديرون الشأن هذه الأيام لأنهم لو كانوا كذلك كانوا سوف يراعون أشياء كثيرة ..وما قولك فى نوام الشعب ( أقصد تواب الشعب ) الكرام الذين صفقوا للزيادات يوماً ما داخل اروقة المجلس المحترم ؟ لماذا لايعارضون مثل هذه القرارات الجائرة وهم حزء من هذا الشعب ويمثلون السلطة ؟.

  2. اكيد ما حيردوا عليك ولو ردوا عليك ما في زول حيجيك – ما هم منتظرين حضورك سعادتك شخصيا ومعاك حق الفطور وكده

  3. يا جبرا هو اصلا لمن عملوا حكاية الرصيد دي كان الغرض منها الشفط. ودي قصتي مع شركة مين للاتصالات هم اكبرشفاطين للرصيد قبل شهر تقريبا نشطت الانترنت اليومي التلقائي الحقيقة اول يوم شالوا جنيه بس لكن بعد 24 ساعة بالله الرصيد تقول ركبوا ليهو ماكنة هوندا في ثواني اتشفط ولي قريب الاسبوع اتصل بيهم يقولوا لي الموظفين مشغولين الان مع منو انا ماعارف، ومشيت المكتب قالوا عملنا ليك مذكرة بتصلوا بيك ولليلة …. الظاهر ما عندهم رصيد!!!!

  4. صباح سعيد
    تنبيه بسيط بمناسبة هذه القناة
    لا توجد إتصالات خاطئة ولا يحذنون،، ولا كومبارس
    أوريك الشغلة ..
    قامت خالتي من قبل بالإتصال بهذه المحطة وكانت إجابة (كالمعتاد) ساذجة، فلنقل أنها الخروف كما أوردت، طبعاً أنا ما بتهمك،، المهم بعد الجرجرة الكتيرة ديك خشت على المذيعة ونحنا بنسمع فيها بالتلفزيون ، والساعة الهي بي فرح بتقول للبنية السمهرية الخروف الخروف ……….. نلقى ليك صوتها يطلع في التلفزيون التيس التيس !!!!! شكراً على مشاركتك الأريل بت المنى بت مساعد من كاب الجداد.
    يا جماعة الولية والله قدامنا قالت خروف.. عرفتو الوهمة؟؟
    في المملكة السعودية وليس المتحدة تسدد خدماتك وأنت في مكانك وتغير الحد الإئتماني لهاتفك النقال وتدفع رسوم رخصة القيادة وتجديد الإقامة من شاشة جهازك الشخصي دون صفوف ولا خدمات ولا شاي بالياسمين ..
    قبل يومين قدمت على معاملة في إحدى الشركات عن طريق النت فإذا بهم يتصلون علي، وبما إني كنت مشغول فقد أرسلوا لي إيميل يخبروني بأني لم أرد الرجاء تحديد الوقت الأمثل للإتصال.
    بعد إذن كوكو ………… عجبي

  5. تعليق: يحزنون مقصودة بال(ذ) … ناس الحافلات أحسن مننا؟ بكتبوا: تح(ز)ير وقوف متكرر

  6. ودالخلا ؟؟؟؟؟؟؟؟؟؟؟
    ( مثلما تكونوا يولى عليكم ) ضعيف وقد ذكر الحديث العلامة الألباني في الضعيفة (320) ، وضعيف الجامع (4275) ، والمشكاة (3717) ، وقال : ضعيف . بس للأمانة يا ودالخلا خد دى … قوله تعالى : ” وَكَذَلِكَ نُوَلِّي بَعْضَ الظَّالِمِينَ بَعْضًا ” [ الأنعام : 129 ] الآن الحاكم ظالم مسلط و نحن نختلف بيننا في كيفية البدء بالإصلاح السؤال : هل الإصلاح يكون من الحاكم أولا !!؟ أو من المحكوم !!؟

  7. الأخ الفاتح ..أنا أبصم بالعشرة إنو ما فى شى مغتس حجر البلد دا ( امازونيا العظمى ) سوى أكل أموال الناس بالباطل فى كل شى ..مع العلم إنو ناس الحكومة قالوا جايين ينقذوا الشعب وبإسم الدين كمان .. ينقذوهو من شنو ما عارف؟
    غايتو الدين البنعرفو نحنا ( الناس البسطاء .. يادوووووبك بنفك الخط ) يمنع أكل أموال حقوق الناس ويحرمها ويتوعدهم بالعذاب والويل والثبور ..
    إنت سألت وطلبت فتوى علماءنا عن موضوع العداد بتاع الكهرباْ ودا بيهمنا كووووولنا ..ومن جانبى أطلب برضو وعاوزين رأى علماءنا الأجلاءكمان فى موضوع تانى بيهم شريحة المغتربين ألا وهو زكاة الراتب المفروضة على هؤلاء المغتربين ..ولابد من الدليل من الكتاب والسنة ..
    وخلونا النشوف آخرتا شنو ..

  8. أخي محمد عمر كتر خيرك كتيير علي التوضيح وكتر من أمثالك، ولا أختلاف بيننا يا صديقي مادمنا متفقين علي علي الأصول وهو( الأصلاح) للمفسدين والفاسدين بأيهما نبدأ؟؟
    يلا همتك معانا ياصديق….

  9. أنت يا حاج احمد متأكد وباصم بالعشرة كمان أنو المغتس حجرنا الحكومة براها مانحن برضو جزء من المنظومة، يا أخي الكريم الحكومة دي جاتكم من برات البلد دي، وله همن من صميم أبناءكم، يا صديقي العزيز الحال من بعضه!!!!
    كسرة/
    أحدهم تشاجر مع أبنه مشاجرة عنيفة، وخرج الأبن غاضبا” ومتوعدا” لوالده بأنه سيقتله، وحذرت الأم زوجها من أن أبنه هذا سيقتله لا محالة ، وأنه سينفذ وعيده فعليه أن يأخذ حذره، فرد عليها زوجها مستخفا” بكلامها أن كان أبنك هذا من صلبي (يعني أبن حلال) فلن يفعل، وأن كان غير ذلك فليفعل، فردت عليه زوجته بانه سيفعل!!!!

  10. الدين بقول من شروط صحة البيع القدرة علي تسليم المبيع ونحن بندفع مقدم والكهرباء قعد تقطع يعني شركة الكهرباء
    ما قاعدة تسلمنا المبيع يعني البيع بطل واكلوا قروشنا بالباطل حسب فهمي .
    يا جماعة صحي عداد الكهرباء ده قاعدين نشتريهوا … كيف يحسبوا علينا ايجار ؟!!!
    الزول لمن يتضايق بفتش أي خشم بقرة يلقي فيها ضالتو حتي لو كانت البقرة دي قناة فضائية يطلع منها بقرشين
    يعدل بيها حالوا ومسكين يقع ضحية للبقرة برضو .. يا جبرا البقر تشابه علينا …

  11. أخونا الباشمعندس ودالخلا … سلام
    في ردك على أخونا السلاوى (وطوااالي كده) قاعد تبرر الشئ النحنا فيهو ده كشئ مشترك يعنى الشعب 50% والحاكم 50% وده طبعاً مع إحترامي تبرير فطير جداً ولا يستقيم مطلقاً فالحاكم (خاصة فى الدول الشمولية) هو الآمر الناهى وهو الذي يدير البلاد دون أخذ رأى للعباد .. يفتح الإستيراد .. يقفل الإستيراد .. يعادي أمريكا .. يصالح أمريكا .. يقسم البلد إتنين يقسما أربعة يقسما ستة .. يبيع مشروع الجزيرة .. يكش الببيع الشاى .. يخفض ميزانية التعليم والصحة .. يرفع ميزانية الأمن والدفاع .. يبرئ المختلس والفاسد ويشنق (الزول في قروشو) ! أها ورينى المواطن عمل شنو عشان نحنا نوصل للوصلنا ليهو ده ؟؟؟ ياخى كلام ناس شيخ عبدالحي ده خليهو .. والإستعانة بالآيات والأحاديث ولوى أعناقها حتي تفيد بأنو المسألة من (معاصي وفساد) هذا الشعب الصابر دى حاجه ما بتخش في الراس .. والحكام مسئولين عن كل صغيرة وكبيرة وإذا كان قاض في الجنة وقاضيان في النار فكيف بالحاكم الذى يقوم بتعيين القاضي يا ودالخلا … (مالكم كيف تحكمون) !

  12. لكن يا اخونا جبرا ده ما ياهو الحاصل بالضبط كدا وأنا ما جبت حاجة من عندي!! كما انه شيخ عبد الحي دا ما جاب حاجة من عندياتو، ده كلام بتاع ربنا وهو القال كدا، وهو أعلم بما نفوس عباده وسرائرهم، وحكاية معاصي الشعب وفساده و(أفساده) كمان هي السبب في النحن فيهو ده ما بيتغالط فيها أثنان ألا شخص مكابر عايز يدفن راسو في الرمال، وتفسير هذه الآيات والآحاديث واضح في ذلك وياها دي مرجعيتنا وما عندنا غيرها
    ثم ثانيا” نحن الآيات والأحاديث دي ما شين منها بعيد لييييه، ماهي الأوصفت الفيهو نحن ده بالتمام والكمال، وكونها تخش في الرأس أو ماتخش دي حاجة بتخص كل أنسان وفهمه لها لوحده بعيدا” عن فهم الاخرين، برغم وضوح البيان وكمال التبيين!!

  13. ود الخلا تحياتي ..
    والله كلامك دار فرسني ياخ .. !! ما عارف حتقبل شعوري دا ولا لا .. لكني حاسي إني لازم أقول ليك الكلام دا .. !! كلامك دا زي الزول الأدى التاني كف .. وقال الزول دا براهو ضرب وشو بيدي … !! يعني ممكن يكون مبرر لكل ظالم إنو يظلم بمنطق إن المظلوم لولا فساده لما سخر الله له هذا الظالم .. !!!

    طيب رايك شنو تكون أول خطوة نصلح بيها عملنا هو إنو نغير الظلم الواقع علينا بإقتلاع هذا الحكم من جذوره عسى أن يرضى الله عنا … مش نخليهو بمشي براهو (بعد) ما نصلح عملنا ..

    ود الخلا أنا ما عندي معاك أي مشكلة .. لكن لو ما قلت ليك الكلام دا كان جاني سكري … !

  14. البروووف من جانب . ودالخلاء من جانب .وباقى السمار .
    لكم التحية .
    الموقع وعلى حسب إسمة (ساخر سبيل ) يتناول مواضيع تهم المواطن بشئ من السخرية توضح مواطن الخلل فى إتخاز القرارات وأثار تلك القرارات الخاطئة على المواطن الغلبان . ومن حق أى منا أن يدلى برأية فى الموضوع موافقا أومعارضا بهدؤ ونفس بارد (العديل راى والاعوج راى ) ولا نريد لأختلاف الآراء أن يسهم فى فرتقة المجموعه .
    أوافق جبرا الرأى فى موضوع أكل أموال الناس بالباطل من شركة الكهرباء بالتعاون مع ناس الاتصالات .
    أوافق ودالخلاء الرأى فى موضوع لا يغير الله مابقوم حتى يغيروا مابأنفسهم .

  15. أب أحمد تحياتي..
    أقبل شعورك طبعا” وأقول ليك أختلاف الرأي لا يُفسد للود قضية، وأوافقك وبشدة كمان علي تغيير الظلم الواقع علينا بأقتلاع الحكم من جذوره، عسي ولعل الله يرضي عنا، ولكن أختلف معك في الطريق والأسلوب للاقتلاع، فعلينا أن نُصلح من حالنا أولا” وبعده سيُذهب الله عنا الأذي..
    طيب أجيك لييه أنا مُصر علي أن النظام الفاسدالحاكم هو نتاج لفساد المحكوم، وخليك من الدين ونتكلم كلام دُنيا ساكت برغم أن الدين لا يختلف (لاحظ لا يختلف وليس لا ينفصل) عن الدنيا الا في ترتيب الحروف، فأين ياصديقي تحيا وتعيش الجراثيم والأمراض؟؟ أليست في الجو الفاسد المريض، وهكذا حال المجتمع، طالما كان الوضع فاسدا” كان الجزاء من جنس العمل، وأرجع للأية التي أستشهد بها الأخ محمد عمر(وَكَذَلِكَ نُوَلِّي بَعْضَ الظَّالِمِينَ بَعْضًا)، وانظر كذلك حولك لأساليب التغيير التي تجري من حولنا وما هي نتائجها الآنية وآثارها علي حياة الناس، وهل لو فعلنا نحن مثل ما يفعلون هل سيكون حالنا أفضل منهم أم أسوأ مع الوضع في الأعتبار هشاشة الوضع الأجتماعي بالبلاد وتربص الآخرين بنا، هذا لا يبرر استمرار الظلم والركون له، ولكن يا سيدي أدوات التغيير كثيرة وهي بأيدينا ومن الممكن اجراء التغيير نحو الأفضل بأيسر وأسهل مما يفعل الآخرون، وهو ما ننشده أن يتم بأقل التكاليف، وهي يا صديقي الدعوة لأصلاح العباد أولا” فينصلح حال الراعي تبعا” لذلك لأن صلاح الحاكم من صلاح الرعية والعكس صحيح….
    بس يا أب أحمد المحيرني الناس دي عاوز التغيير ورفع الظلم ولكنها لم تفعل موجبات ذلك، يعني الناس دايرة تنوم وتقوم تلقي النظام أصبح في خبر كان، وهذا بالطريقة دي لا يصير،،،
    و أخيرا” ياصديقي أنا برضو ما عندي معاك مشكلة لكن كان ما قلت ليكم توبوا لربكم عسي الله أن يُغير ما بنا ما برتاح!!

  16. الموضوع تاريهو اكبر من شفط رصيد الناس ممكونة من حاجات كتيرة واتللمت عليها الهموم
    كسرة: لو فى شعب دخل موسوعة جينس فى الصبر حيكون الشعب السودانى

  17. ( كيفما تكونوا يولي عليكم ) الحديث ده فتشت عنه ولقيت انو الحافظ العسقلاني والشيخ الالباني قالوا حديث ضعيف واستدلوا بأنو في حكام عادلين جو بعد حكام فاسدين والشعب هو نفسه مثل عمر بن عبد العزيز الذي ملأ حكمه عدلا .
    الحكومة دي لمن جات في الانتخابات عرضت برنامج الدولة الاسلامية والناس ادتا اصواتا علي الاساس ده وفوزوها يعني ناس بتطيع الله ودايرة حكم الله يعني ما عاصين ولا فاسدين لحدي يوم الانتخابات الاخيرة.. طيب وينا الدولة الاسلامية ؟؟؟؟ نبقي نحنا الفاسدين ولا الفاسدين هم الغشونا باسم الدين ؟

  18. بدون تعليق ، اين د/ الشمباتى ، …………… عجبى

  19. أخونا الحبيب ود الخلا .. سلام … ياخى إنتا ما جاوبت علي تساؤلاتي .. ياخى سؤال واحد بس .. الشعب ده المعاصى والموبقات البيعملا بتعملا كل الشعوب العربية والإسلامية وكمان أظرط .. ليه ما وصلت للوصلنا ليهو ده من شظف العيش والإبتلاءآت ؟؟ وبعدين يعنى بالمنطق ده أى حاكم فاسد أو ظالم معناتو الشعب بتاعو بتاع معاصى ولازم يتوب إلى الله ؟ يعنى مافي حاكم ظالم أو فاسد برااااااهو كده !! ياخى ده منطق وين؟؟ لو ما قدرتا تمنطق ليا الحته دى وح تقول ليا القرآن قال كده ح أقول ليك القرآن عمرو ما فيهو شئ بيخالف المنطق !!

  20. بسم الله الرحيم
    الأخ / الفاتح جبرا
    هذه مشاركتي الأولى, وأود ان ابدائها بالشكر الخاص للمجهود الذي تقوم به, بارك الله فيك ووفقك…..
    انا بصراحة ما كنتا داير اشارك لاكين وانا بأقرا التعليقات, خاصة من الأخ العزيز (ود الخلا)… جاني هبوط في الدم, وإرتفاع في معدل السكر, وحرقان في الرجل, ووجع بطن, ورجفة في اصابع اليد, وعيني بدت تغمض برااااااااههها, وحاسي اني لو ما رديت احتمال الاعراض تزيد والوضع يبقى أخطر… ياخي نقول سعر اللحمة بقى غالي يقول (الشعب يراجع دينه), نقول الواحد مالاقي وظيفة يقول (الشعب يراجع دينه), نقول الواحد مظلوم في كل جوانب الحياه, يقول (الشعب يراجع دينه) .. يا اخي العزيز يعني انحنا لمن نمشي كولنا نعتكف في المسجد, الاسعار بتنزل وحال البلد بتتصلح, ولا لمن المسئول يشتغل بي ضمير ويخاف ربه؟؟؟؟؟؟؟؟

  21. شفط رصيد دا زى شفط الدم الانحنا فيه الله فى

  22. جبرا وود الخلا :
    مشكلتنا في كيفية الإصلاح فالحاكم فاسد حيث ترعرع في ظل حكمه جيل وان تربى جيداً فلسوف يفسد عند البلوغ وعند التعيين فلو تخلصنا من فساد الحاكم بعد ثورة قوية ومنظمة كثورة مصر أنّا لنا الخلاص من فساد المحكوم هذا الفساد الذى يظهر فى صورة رجل يبنى بيت ويدفع رشوة ليسمح له بالتعلية المخالفة او رجل يقود سيارة دون ترخيص ويعطى عسكري المرور جنيه أو اتنين أو موظف كبير يبعثر أموال الزكاة أو الضرائب فيما لا ينفعنا وهذا النوع من الفساد ان ترك تكون خطورته هو تحضير النوع الاخر من الفساد وهو فساد الحاكم .
    كما ان هناك نوع اخر من الفساد قام به بعض من يدعى العلم بالدين هدا النوع يتثمل فى فتوى حقيرة تقول ان الرشوة ان كانت لا تسلب بها حق لشخص اخر وان كانت لا سبيل لقضاء حاجتك إلا بهده الرشوة فلا بئس بها وينسى هدا الشيخ عقيدة اصلية عند المسلمين اسمها عقيدة البلاء تقول ان الانسان ادا ابتلى في امر ما فعليه الصبر وليس دفع الرشوة .
    هذان النوعان من الفساد كانا يدعمان الفساد الاكبر ويجب الخلاص منهما معاً

  23. حاج أحمد السلاوى
    قال – صلي الله عليه وسلم (تؤخذ من أغنيائهم، وتُردُ على فقرائهم) ؛ أخرجه البخاري كما في الفتح [9، جـ3، ص261] بحديث : (على كل مسلم صدقة). قالوا: يا نبي الله ، فمَنْ لم يجد ؟ قال:( يعمل بيده؛ فينفع نفسه ويتصدَّق …)، الحديث. أخرجه البخاري كما في الفتح، في كتاب الزكاة، باب : على كل مسلم صدقة ، حديث رقم (1495) ، [9، جـ3، ص307]. وهذا ما يدلل على وجوبها ، أما النصاب : يقاس على زكاة الذهب والفضة أو بما قيمته 85 جراماً من الذهب ، وزكاة كسب العمل شُرعت بالقياس ؛ فهي ليست أصلية ، مع أننا نقرأ في القرآن قوله تعالى : { يَا أَيُّهَا الَّذِينَ آمَنُواْ أَنفِقُواْ مِن طَيِّبَاتِ مَا كَسَبْتُمْ وَمِمَّا أَخْرَجْنَا لَكُم مِّنَ الأَرْضِ } [البقرة :267 ] . أما بالنسبة لاشتراط الحول فقد روي عن ابن مسعود ، وابن عباس ، ومعاوية من الصحابة ، والأوزاعي من التابعين : ( عدم اشتراط الحول فيه قياساً على الهبات والكنوز وما استخرج من باطن الأرض ) مجلة جامعة الملك سعود، [7، جـ4، ص75] . أما ما يخص مقدار الزكاة الواجبة السداد 2.5% قياساً على نصاب النقود ، باعتبار أن الجميع يتقاضون – أو يقبضون – أجورهم بالنقود وهذا اختصاراً وعليك الرجوع لكتاب الفقه الإسلامي وأدلته لتتوسع في أدلة القائلين بوجب زكاتها من عدمه …

  24. عزيزى الأخ محمد عمر .. لا إعتراض لدينا على موضوع الزكاة ووجوبها ولم يرد ذلك فى سؤالنا لعلمائنا الأجلاء الوارد أعلاه وكلنا درسنا فى المدرسة باب الزكاة ونصايها وموعد وجوبها وأوجه صرفها الثمانية إلخ .. إلخ واتفق معك فى كل ما ذكرته ولكن سؤالى كان محدداً فى امر الزكاة على الراتب المفروضة علينا من امنا الرؤوم حكومة الإنقاذ ..فالزكاة تجب أن يبلغ النصاب الذى حال عليه الحول كاملاً ..فغذا كان الرتب الذى يتقاضاه معظم المغتربين ( واقول الغالبية العظمى حتى نخرج من دائرة التعميم ) لا يكفى أسرته ومن يعولهم داخل وخارج السودان فكيف يدفع زكاة من هذا الراتب.. .. وغالب ظنى أن هذا المغترب يحتاج إلى إعانة ( ولا اقول زكاة ) لإعالة من بطرفه .
    يعنى السؤال كيف تدفع زكاة من مال لم يبلغ النصاب ولم يحل عليه الحول كما جاء فى النصوص التشريعية ؟
    ونحن نقوم بدفع هذه الزكاة المفروضة قسراً ( زكاة الراتب كما يسمونها ) وكل الأتاوات والجبايات الأخرى دون نقاش منّا .. ولكن أرجو وآمل أن يغيروا مسماها إلى أىمسمى آخر حتى لا تختلط الأمور على العامة من الناس الذين ليس لديهم إلمام كبير باصول الفقه ..وقد فُرضت الضرائب على المغتربين تحت أسماء كثيرة .. اولها ضريبة المغتربين .. المساهمة الإلزامية ( تخيل .. مساهمة ..وإلزامية ..دى كيف ؟)وتم إلغاءها ولكنها عادت مرة أخرى فى عام 2009 ..
    أخيراً إن كان هناك دليل على وجوب زكاة الراتب( دون إجتهاد ) هذه ارجو إعلامنا بها ونحن لك من الشاكرين .

  25. سلام ياقبيلة،،
    أخي جبرا سأجيب علي تساؤلاتك ونص وخمسة، لكن الأمور لا تؤخذ هكذا كما تقول أن الشعب الفلاني كذا وحصل له كذا فما نراه نحن لا نعلم من الحكمة التي من وراءه من شيئ فقد يقدر الله امرا” غير الذي نتمني ويكون فيه خير” كثير، بل وأكثر مما كنا نتمناه، وكلامي كده لأن مرجعيتي هي القرآن والقرآن كلام الله الذي لا يأتيه الباطل من بين يديه ولا من خلفه،، والأهم من ده كلو يا صديق أن المنطق هو الذي لا ولم ولن يخالف القرآن لأن القرآن هو الأصل والأساس وليس العكس كما ذكرت في مداخلتك (ح أقول ليك القرآن عمرو ما فيهو شئ بيخالف المنطق !!)
    ويقول الله في ذلك في الآية (212) من سورة البقرة (كُتِبَ عَلَيْكُمُ الْقِتَالُ وَهُوَ كُرْهٌ لَّكُمْ وَعَسَى أَن تَكْرَهُواْ شَيْئًا وَهُوَ خَيْرٌ لَّكُمْ وَعَسَى أَن تُحِبُّواْ شَيْئًا وَهُوَ شَرٌّ لَّكُمْ وَاللَّهُ يَعْلَمُ وَأَنتُمْ لاَ تَعْلَمُونَ)، والأنت شايفوا ده من شظف العيش والأبتلاءات أنها أكثر من طاقة هذا الشعب وأن هذا الشعب لم يفعل شيئ يؤاخذ عليه بمثل ما تقول ، فما ادراك يا صديقي بأننا افضل من الآخرين ومن أخبرك بتقربنا وخوفنا من الجليل وأننا نعمل بما جاء في التنزيل..
    أنظر لكل الشعوب عبر العالم (العراق، والصومال، ليبيا، زمصر القريبة دي، وحتي امريكا الشيطان الرجيم كيف كانت وأين هي الآن؟؟) كيف كانت تعيش هذه الشعوب في بحبوحة العيش ورغده كيف هي الآن وقد فارقت الأمن والآمان والسلام والسلام وسيطر الخوف والجوع والفقر علي مجتمعهم وقارن حالنا الآن وما نعيش فيه وحالهم وكيف هم من حال الآمن والجوع والنعم التي نحن فيها والحمدالله!!!

  26. السادة اعضاء المنتدى و السيد ود الخلا
    لو كان الجوع و الفقر معمم يعني على الحاكم و المحكوم كان نقول ابتلى جماعي و الدليل في زمن الرسول عليه افضل الصلاة والسلام طلع و هو رابط حجرين على بطنو من الجوع و الصحابة حجر واحد و مات و درعو مرهونة عند يهودي و في بيتو بضع دراهم و بعدو الخلفاء الراشدين يجوعو قبل الرعية و يكونو في الصفوف الامامية و ين دة من ناس الانقاذ كروش ممتلئة و بطون متخمة و قروش ما عارفين يودوها وين و حسابات جوة البلد وبراها و يتطاولون في البنيان و فتاوي من من علما ما تخش عقل طفل صغير يلوى بيها عنق الدين ذي امام في قناة الجزيرة في سورة مؤيدة للاسد في سوريا بقول للاسد طبعا (ان الله يحبك و الملائكة تحبك و الرسول يحبك) هل اطلع هذا الامام في اسباب السموات ام علم غيب الله و قس على ذلك أامتنا الافاضل و افتائاتهم فالفساد الذي لحق بالرعية هو في اصله فساد الحاكم فالسؤال هل الشعب السوداني كله فجار و فساق و مذنبين كبائر و صغائر حتى يكون هذا حالهم ومالهم و كل اعضاء الحكومة الموقرة و من والاهم هم من المسبحين الذاكرين الركع السجود فذلك حالهم؟

  27. (وكيف هم من حال الآمن والجوع والنعم التي نحن فيها والحمدالله!!!) ….. والله جنس نعم يا ودالخلا .. ربنا يديمها ويحفظها من الزوال !!!

  28. حبيبنا ودالخلا :
    الأستاذ ربيع عبدالعاطي صرح مؤخراً في مداخلة في قناة الجزيرة أم السودان الآن في أحسن حالاتو .. وإنت بتقول نحنا في نعمة … والله شككتونا في روحنا دى !!

  29. يسمع منك ربنا وقولوا معاي ايها الناس أجمعين آمين يارب العالمين…

  30. في تفسي بن كثير .. الاية ( وكذلك نولي بعض الظالمين بعضا بما كانوا يكسبون )
    قال سعيد, عن قتادة في تفسيرها : انما يولي الله الناس بأعمالهم , فالمؤمن ولي المؤمن اين كان وحيث كان , والكافر ولي الكافر اينما كان وحيثما كان , ليس الايمان بالتمني ولا بالتحلي .
    وقال معمر , عن قتادة في تفسيرها ( نولي بعض الظالمين بعضا ) في النار , يتبع بعضهم بعضا .
    معناها الاية تحتمل اكثر من تفسير لكن ( شيوخ السلطان ) هم من حملوا هذه الاية التفسير الذي يصرفنا عن تحميل السلطان مسئولية فساده ورد امر الفساد الينا نحن .يعني نخلي الحكومة ونقعد نقول كلو مننا نحنا الله ياذانا نحنا .

    السكوت عن فساد الحاكم خلي فرعون يقول انا ربكم الاعلي .

  31. جنوبي هسي أنت ما كنت شغال كويس وأستشهدت بالتفاسير من أمهات الكتب، الخلاك تمشي تاني في الدروب البعيدة ديك شنو؟؟؟؟
    مافي زول قال بتحميل المعاني في غير معانيها، نعم السلطان فاسد وغرقان في الفساد حتي الثمالة، لكن الكلام هو من أين جاء هذا السلطان الفاسد؟؟؟ من كوكب خارج الأرض أم من دولة مجاورة أو عدو؟؟؟؟
    الناس ديل من هنا من صلب البلد دي كان حلوين وله فاسدين ياهم أبناءكم ومنكم وفيكم، (بغض النظر عن كيفية مجيئهم، ده موضوع تاني براه) وطالما همن كذلك فالأفضل أن نراجع أنفسنا لماذا تسلط علينا أمثال هؤلاء ما دام من بينكم من هو أفضل منهم!!!!
    حاسبوا انفسكم قبل ان تُحاسبوا وتوبوا لربكم قبل فوات الآوان ولات ساعة مندم…
    أنت يا جنوبي داير أسألك سؤال الناس دي مالها رافضة التوبة والأوبة وراكبة رأسها لييييه؟؟؟؟

  32. ود الخلا .. سلام
    مافي زول رافض التوبة .. لكن انت صعبتها بي انو نخلي تغيير الحكومة ونغير نفسنا اول ..
    انت يا ود الخلا معاي في انو الفساد بعد الحكومة دي مسكت الحكم اكتر من الفساد الكان قبل 89م؟
    الناس ديل بنهبونا ليل نهار وكان استنينا لحدي ما نغير نفسنا بنلقي الدنيا خلا .

    قالوا في شافع صغير قاعد في الاكل مع اخوانو بقي يبكي امه قالت ليه مالك ؟ قال الاكل حار . قالت ليه طيب ماتخليهو يبرد ؟ قال ليها لكن هم ما بخلوهو .!!

    متفق معاك في حاجات كتيرة لكن في حتة نبدأ التغيير من وين دي لا .

  33. جنوبي سلام ،،
    خلاس ياصديقي لا ..لا.. نشوفك عايز تبدأ التغيير من وين ونحن معاك بس أعمل حسابك ما تضيع وتضيعنا معاك، وما تخلينا نبقي زي الناس الحولينا البيقوا يكوس فيهو ويقولوا ليه رحت فين مننا يا ريس ده أنت سمعت كلام شوية عيال صُغيرين وسدأتهم، أهو شوفهم همن ودونا علي فين ومش عارفين حا نرسي علي ياتو بر!!!! أو مثل أولئك الذين أشعلوها نار لا تبقي ولا تذر وقضت علي الاخضر واليابس ولم يسفر فجر حتي اليوم، أو أو أو….. فالقائمة طويلة ولن تنتهي، فياسديقي العزيز أتفق معك بضرورة التغيير بل وأقول بحتميته وجدواه، ولكن يجب أن يبدأ صاح لينتهي علي الوجه الأصح..
    ولنكن واضحين مع أنفسنا وصادقين مع ذواتنا، هل هؤلاء الين تراهم مؤهلين لصناعة دولة راشدة وقويمة،،، أخاطب فيكم عقولكم وضمائركم أنتم أيها الراشدون يا من تنادون بالتغيير كيفما يكون وحيثما يتفق وبعد ذلك نشوف نعمل شنو، لا يا أصدقاء ما هكذا تورد الابل ولا هكذا تؤدي الامانات لأهلها، ولتنظر أخي لتدني الاخلاق والأنانية وحب الذات التي أنشرت وأستشرت بين الناس، الكل ياصديقي لا ينظر الا الي نفسه فقط ومن بعده الطوفان لايهم…
    تدني في كافة المرافق والخدمات والمعاملات، فلا صدق ولا أمانة ولا عفة ولا خلق قويم يردع الناس ولا رجل رشيد يهديهم سواء السبيل الا ما رحم ربي..
    عندما نقول لنبدأ التغيير بأنفسنا نعي ونقصد ما نقول ولنا في رسول الله صلي الله عليه وسلم الأسوة الحسنة ففي خلال (23)عاما” ساد البدويين البدائيين رعاة الشاة وقطاع الطرق العالم بأسره في ذلك الزمان وملكوا زمام الامر وأستولوا علي أكبر أمبراطوريات التاريخ في وقتها، فكيف تم ذلك وبأي طريقة، أنها طريقة التغيير التي ننشدها بالبدء بالنفس أولا” ومن حولك ثانيا” فمجتمعك ثالثا” وصدقني أن وجدت حاكما” فاسدا” بعد ذلك لأنه لن يجد من يصفق للذل والهوان وسيرحل من تلقاء نفسه حسيرا”حين يجد الناس وقد أنفضت من حوله وأنها قد عرفت فلزمت!!!!!

  34. ود الخلا … والله حيرتنا جنس حيره .. الله يكون في العون بس ويجيب العواقب سليمة !! .. بالمناسبة أنا مشيت لي ندى القلعة وقالت ما عندها مانع لو وقوفا من الغناء ح يصلح الحال ح تقيف .. برضو موقف وطنى مش كدا ؟؟

  35. عمر ابن الخطاب :
    يا ود الخلا الحكومة فاسدة والشعب من الطبيعي حالس أن يكون فيه الصالح وفيه الطالح بس الحكاية احنا دايرنك تعالج معنا هذا الفساد من غير ما تقعد تقولينا ( بلسان حالك طبعاً ) انتو أصلا اس الفساد كدي انتهوا من فسادكم الأول وبعدين قبلوا عل الحيكومة و رسالتك دي واضحة ووصلت ما تكتر فيها كدي عشان الناس ما تفهمك غلت (كوز وكده) وما تنسا قول ابوبكر الصديق للناس ( ان أسأت فانصحون ) مع انو بُعد الليل من النهار طبعاً وهاكم النكتة دي ناس القصر الجمهورى لقو ليهم واحد شايليه سيجارة خضرة ومتسلطن عالآخر فأول ما شافم ما شين عليه وضع في فمه لبان عشان يغير الريحة .. العساكر : يا زول انت بتعمل هنا شو ، وواقف في الساعة دي بالذات ليه واستجوابات كتيرة لامن ما لقو عليه أي تهمة قالو يورطوه بأي حجة والسلام قالو ليه احسن عمر البشير وللا أحسن ازهري ؟ قاليهم أحسن البشير لأنو مابخاف من بريطانيا وأمريكا .. طيب أحسن البشير وللا النميرى ( رحمه الله ) قال احسن البشير لأنو ما بخاف من روسيا وامريكا . طيب احسن البشير وللا الصادق ؟ احسن البشير .. وماشي بالطريقة دي كرهن ليك في النهايا قالو ليه : أحسن البشير وللا ( عمر ابن الخطاب ) قاليهم احسن البشير طبعاً الجماعة هنا فتحوا عيونم وحيرم ليك في أم حنانن وما كانو أصلو متوقعين يجيبة كبيرة كدة .. لييييييييييه ؟ والله ياخواني عمر ابن الخطاب ده كان بيخاف والبشير ده أصلو ماقاعد يخاف كلو كلو .. العساكر بردو كيييييييييييف؟ عمر ابن الخطاب بخاف كيف يازول انت كفرت واللا شنو ؟ المسطول : وهو خوفو من الله ده ما خوف يعني ابن الخطاب بخاف من الله شديد كمان ………………………..

  36. عاد يا محمد عمر ما سويتها شترا مرة واحدة دا كلام شنو دا؟؟
    بعدين الناس دي من ناحية فاهمني غلط، همن فاهمني غلط بس صاح، والصاح والغلت متباريات زي الفضيحة والسترة، ما نظام (كوز وكده)، وبعدين منو القال ليك الكيزان دي كوووولها صفيح ومطفجة ولا طلس مطرقعة، مافي نظام كيزان راقية وكده زجاج البيراكسي او ألمونيوم مصقول أو استينلس أستيل يحيرك وفي كوز جديد لنج نزل السوق ده لسه ما شفتوه حا يحيركم، وأسأل منه دوك شمباتي وبالمناسبة أين هو؟؟
    أسدقائي الأعزاء محمد عمر وجنوبي و(سعادتو) جبرا ما نظام (قريق وكده) كدي تعالوا الي كلمة سواء بيننا فنحن كوووولنا في مركب واحدة تتقاذفها الامواج وعرضة للأنكفاء بما فيها وعلي من فيها وحينها لن تجدي الندامة، فلنخت الكورة واطة ونشوف حانعمل شنو من غير أقصاء للآخر أيا” كان هذا الآخر فله الحق مثل ما لكم (له ماض وحاضر وغد)!!!

  37. ودالخلا ياخوى .. امواج شنو القاعدة تتقاذفنا ؟ هسه ما قلنا الله أديمها نعمة وأحفظها من الزوال ؟ وعبدالعاطى قال السودان في أحسن حالاتو.. تانى أمواج شنو وتقاذف شنو؟ ياخى الأمور آخر ألسطا وآخر حلاوة بس قرضوا علي كده !!

  38. أخونا بن الفلاة .. انا عاوزك تضع لينا خارطة طريق سودانية غسلامية عشان نتبعها فى إصلاح ذاتنا وذات الشعب الخربانة اللى إنت بتنادى بيها ومُصر عليها .. ورينا الشعب دا مفروض يعمل شنو وما عملو قبال دا وأؤكد ليك إنى حأكون أول من يطبق الخارطة دى .. انا ما عاوز اشكِّر ليك نفسى ( زى إبليس ) واقول ليك إنى مسلم ملتزم بصلى وبصوم وبحج وبدفع الزكاة ( بكل انواعها .. الواجبة والمفروضة قسراً من ولى المر ) و………. و……… غلى آخر الواجبات المفروضة علينا كمسلمين والبلد مليانة مسلمين ملتزمين وعلى رأسهم ولاة امورنا وحكامنا من 22 سنة والمساجد مليانة بالمصلين ومع ذلك الوضع ماشى من سىء إلى أسوأ .. نسوى شنو اكتر من كدا ؟ وما تقول لى النفوس ما طيبة لنك ما بتقدر تدخل جوة النفوس وتعرف الفيها شنو ..
    هل أفعالنا وعمايلنا اسوأ مما يحصل فى كثير من الدول الغربية مثلاً؟ نعم هناك عندهم مسائل أخلاقية تتنافى مع عقيدتنا الإسلامية ولا نقبل بيها ابداً ومع ذلك هى الآن موجودة عندنا ( فى هذا العهد الزاهر ) وبلادهم ما فيها من المشاكل ما نعانى منه يبقا السبب شنو فى رايك ؟ السبب هو ولاة أمورنا لم يرعوا الله فى رعيتهم يكذبون على الشعب دون أن ترمش لهم عين ..
    على أى حال أنا فى إنتظار الروشتة عشان نبدا العلاج وارجو الا يكون آخر العلاج الكى ..

  39. من الأشياء التى تعجبت منها أيضاّ عند ذهابى للسودان فى إجازتى الأخيرة هو ضرورة سداد مبلغ سنوى من أجل ما يسمى تجديد بطاقة السحب الآلى للبنك الذى أتعامل معه …..علماً بأننى أحتفظ ولمدة عشر سنوات متصلة حتى الآن ببطاقة السحب الآلى للبنك الذى أتعامل معه خارج السودان وهى ما زالت صالحة ، دون سداد قرش واحد فى أى وقت من الأوقات لما يسمى تجديدها !

  40. ههههههههههههههههه,والله ما عجبنا الشفط دا كولو كولو..
    لكن شحدت الله يشفطهم الشفاط ويلهطهم اللهاط !

  41. الغريبه انو االامام الجنبنا والكلام دا في كسلا برضو مصر انو الغلاء دا عشان نحنا ما قاعدين نصلي ؟؟؟ و الحكومه ما عندها زنب في الموضوع دا؟؟؟و يشيل و يكفر في ناس الاحزاب المعارضه . غايتو صدق و قال ان من شر البليه ما يضحك ههههههههههه و الظريف في الموضوع انو الامام كوز مشهور طبعا بتجرس من الغلاء يعني يحفر حفره و يجي يقع فيها و يقول دا كلو مننا نحنا لأنو ما قاعدين نصلي ؟؟؟؟؟؟؟؟!!!!!!!

  42. ود الخلا . سلام
    لم اشك لحظة في انك من الجماعة بل احسبك مسلم ملتزم وعلي فكرة الكيزان الماهم صفيح مخفج زماااان خارجوا نفسهم من الناس ديل وفضلوا لينا الخموم والرموم وتجار الدين .
    هو نقاش يا صاحبي للم الشمل والتفاكر في المخارجة وليس للتنافر .
    بمناسبة رحت فين مننا يا ريس ان قالها قلة فلا تنسي الملايين التي رجعت لميدان التحرير للضغط علي المجلس العسكري لتقديم مبارك للمحاكمة .
    يا صديقي انا ما اتوقعت ابدا انو في زول سوداني يتحسر علي مبارك والقذافي ياخي الاتنين ديل العملوهوا فينا نحنا السودانيين براه يغطس حجرهم .خلي العملوهوا في شعوبهم !!!
    الشيخ يوسف القرضاوي بارك هذه الثورات وارجعها الي اصل الدين واكد انها لا تتعارض مع الدين ولم يفتي للمصريين او التوانسة والليبيين بان يصلحوا انفسهم اولا بل اكد انه بصلاح الحاكم تنصلح الرعية .
    ساد رعاة الشاة العالم بصدق اسلامهم وبقول الرسول صلي الله عليه وسلم : ( لو سرقت فاطمة بنت محمد لقطع محمد يدها ). وبقول ابو بكر الصديق رضي الله عنه : ( وليت امركم ولست باخيركم ) وقول عمر الفاروق رضي الله عنه : ( ايها الناس إن رأيتم فيني اعوجاجا فقوموني ) ولم يقل الفاروق ان رايتم فيني اعوجاجا فلأنكم معوجون.
    يا صاحبي الحكومة القويمة تقوّم الشعب والحكومة الفاسدة تفسد الشعب وفساد المحكوم يرد الي فساد الحاكم وليس العكس . واذا كان رب البيت للدف ضارب …..
    نبارك لاخواننا ثوراتهم ونتمني ان يجنوا ثمارها لكن مرجعيتنا ليست ثوراتهم فلنا ما يكفي من مرجعيات ثورة المهدية واللواء الابيض في السلف وفينا اكتوبر وابريل .
    محمود بلال .. سلام من قمنا لقينا في عرف اهلنا انهم بيدوا المسافر حق الطريق وكل واحد بيغمت ليك حسب استطاعتوا لكن مسافر يدفعوهو حق الطريق دي يسموها شنو قال رسوم مغادرة قال .!!!

  43. يا جنوبي لقيتك زول صعب بالحيل .. ياأخى .. أعز الإسلام بك .. بعد أن أصبح الإسلام لا بواك له !!

  44. اها فى النهااااية الشافط حصل ليهو شنوووووووو!!؟؟

  45. أخي السلاوى :
    هناك أقوال شرعية في موضوع حولان الحول والنصاب فيما يخص زكاة الراتب ولم يشترطوا له حولا أما النصاب يحسب بحسب حجم الراتب واخراج الحوائج الأصلية وووو .. بس الحكومة بتاخدا منكم كيف الله أعلم .. بس أكيد طالما انو أي شي بايظ كمان زكاتم حتكون بايظة……..يا خوانا كت متوقع واحد فيكم يجيني الفطور بتاع السماية ويقولي أنا من المنتدى .. بس مفيش حد منكم جا……

  46. إنتو جاريين لشفط الرصيد بتاع القنوات ليه ..عليكم الله شوفوا الناس البتتكلم طول الوقت ,بموضوع وبدون موضوع دا بمنطق ألا يعد ذلك لغواً ..لانه في الفارغة والمقدودة..والناس بتتحدث عن امور الظلم ,والحكومةووناس الحكومة كدي نقعد في الواطةوونتوهط فيها ..ونشوف كلام العقل.. كدي إذا اي واحد شايف واجبه, تفتكر حايخلي حقه ؟! الكثير منا لايعطي البلد هذه حقها,وطوالي الواحد فيهم يلعن في البلد ..عليكم الله فيكم الطلع برا في البلاد الاخرى شوفتوا ليكم شعب بيلعن ابو بلدوا غير الشعب السوداني؟ كان إتاخر هو نائم للضحى ,وجاء لقى البص فاتو وإضطر يقيف في الشارع نص ساعة ..يقوم طوالي يسيل سوط العنسيت ,وهاك يا ضرب في البلد(ملعون ابوك دي بلد- عالم حرامية – سواقين شغاليين على كيفهم ) رغم إنو لو كان صحا بدري كان لقى البص بإرتياح, عليكم الله ريحونا .وبالعقل نشوف الكلام الجازم في الحل المثالي لمشاكلنا في قوله الكريم ( لا يغير الله ما بقوم حتى يغيروا ما بإنفسهم ) صدق الله العظيم ..بعد دا تستطيعوا تشيلوا أي واحد دايرين تشيلوه .والتغييرفي النفس هو الصدق ..مش نحكي حكاوي ونقعد نردح فيها. ونكون نحنا عملنا الموكول لينا ما أنجزناه ..وبرضو تقول لي منعول ابوك دي بلد ..مسكين السودان بين ضجيج الشعب, وصم الحكومة التي لم تستطع ان تسمع كلمة واحدة من هذا الضجيج .

  47. سلام ياقبيلة،،
    صديقي محمد عمر كنت ناوي أجيك فجأتن، لكن تقول شنو، اوعدك أنشاء الله ووعد الحر دين عليه أن امر عليك يوما” وأنت ما داري!!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: