لمستقر لها

أمام منزل الحاج (عبدالفضيل) وقف شاب (يعلق) على كتفه شنطه جلدية سوداء ويمسك بدفتر وقلم .. يفتح (حاج عبد الفضيل) الباب
– اهلاً مرحب يا بنى
– أهلاً يا حاج ..
– إنت بتاع شنو؟ نحنا أمبارح القريبه دى دفعنا النفايات والعوائد والمويه و …
– لكن يا حاج ما اظنك دفعت رسوم (تدفئة وضؤ) عشان دى رسوم جديده
– (فى إستغراب) : رسوم شنوووو؟
– مالك يا حاج مستغرب كده ؟ دى رسوم (تدفئة وضؤ) ! ما سمعت بيها ؟
– طبعن يا إبنى ما سمعت بيها هو نحنا نسمع بى شنو وإلا شنو ما خلاص ما قادرين نلاحق الرسوم والجبايات دى !
– (يخرج من جيبه القلم ويمسك بالدفتر) : قلت ليا يا حاج بيتكم ده مساحتو كم؟
– مالك ومالو كمان؟ عاوز بى مساحتو شنو؟ عاوز تطلع ليهو كروكى !
– كيف يا حاج عاوز بى مساحتو شنو؟ ما عشان نضرب ليك الرسوم بتاعتك بتاعت (تدفئة وضؤ) دى !
– (فى إندهاش) : والله محن ! أها وبتضربوها كيف دى ؟
– ما حسب مساحة السطح المتلقى لأشعة ضؤ الشمس يا حاج وكده وفى الحاله دى السطح هو طبعن بيتك !
– يا إبنى إنت عاوز تجننى؟ أشعة أيه؟ وسطح مين؟ ومساحة شنو؟
– يا حاج أهدأ شويه عشان افهمك الموضوع لو ما عارفو
– طبعن ما عارفو ؟ هو نحنا بقينا نعرف حاجه ما كل دقيقة ناطى لينا زول شايل ليهو دفتر إيصالات وعاوز قروش … هى الحكومة دى قايلانا (وارثين) ؟!
– شوف يا حاج الرسوم دى إسمها رسوم (تدفئة وضؤ) يعنى المواطن عشان يتدفا بالشمش دى وكمان يشوف بالضؤ بتاعا لازم يدفع رسوم ! يعنى إنت يا حاج عاوز تدفأ وتشوف ملح ساااكت !
– ملح فى عينك يا ود يا قليل الادب ! هى الشمش دى بتاعت زووول ؟
– يا حاج ما تهيج فينى ساااكت أنا زول عبدالمأمور ساااكت ونحنا شركتنا دى إسمها (تتحصلون) يعنى بتاعت تحصيل يعنى ما عندنا أى دخل فى مسألة فرض الرسوم دى !
– ومال الشركة العاملة (الفلم) دى إسمها شنو ؟
– إسمها يا حاج (لمستقر لها) !
– (فى دهشة) : قلت ليا إسمها شنو؟
– لمستقررررن لها !
– لا حولة ولا قوة إلا بالله هى حصلت كمان ! أها و (مستقرها) وين؟ أقصد مبانيها وين؟
– شفتا الجامع الكبير العاوزين يعملو ليهو صيانه ده .. بس العمارة الصفراء المقابلاهو !
دلف (حاج عبدالفضيل) الى المكتب الفاخر لمدير عام (لمستقر لها) ذو الوجه اللامع الذي تبدو عليه أثار النعمة و(الراحات) و(التكييف طويل المدى)
– السلام عليكم
– وعليكم السلام ورحمة الله تعالى وبركاته إتفضل- مشيراً الى أحد كراسى الجلوس الوثيرة ، جلس (حاج عبدالفضيل) ثم قال مخاطبا السيد المدير :
– السلام عليكم
– وعليكم السلاااام
– (مبتسماً) إتفضل
– الحقيقة بس يعنى جانى فى البيت ولد كده وقال ليا الشمش وما الشمش والضؤ وما الضؤ وتدفع رسوم وشنو ما بعرف داااك والمساحه فى الإرتفاع فى السطح وما عارف شنو فقلت اجى أستفسر منكم وكده !
– أول حاجه يا حاج مرحب بيك .. وإن شاء الله الجية بتاعتك دى تكون فى ميزان حسناتك .. !!
– يابنى ميزان حسناتى ميزان (لساتكى) أنا عاوز أعرف رسوم (التدفئة والضؤ) دى شنو؟ إنتو أصلكم ما بتشبعوا!
– يا حاج ما تزعل ساااكت .. كدى جاوبنى براااحه يا حاج وبدون إنفعال … الشمس دى بتاعت منو ؟
– بتاعت ربنا !
– طيب ما نحنا بتوع ربنا … تبقى الشمش دى بتاعت منو مش بتاعتنا ! وقع ليك يا حاج وألا أعيدو ليك ! بعدين يا حاج حقو رسوم (التدفئة والضؤ) دى ما تستكترا علينا لأنو الشركة بتاعت (لمستقر لها) دى هى شركة بر وإحسان وشركه خيرية لرعاية المسنين ولكفالة الايتام!
– (وهو يتجه نحو الباب) : أيتام …. أيتام أكتر مننا ؟

إنتشر فى الشوارع أشخاص يرتدون زيأً أصفر فاقع اللون رسم على صدره شعار شركة (لمستقر لها) وهو شمس حمراء ذات خيوط شعاعية ، مهمتهم تحصيل رسوم (تدفئة وضؤ) من المارة وأصحاب المحلات والمنازل :
– (وهو يخرج الدفتر ويمسك بالقلم) : بالله يا خينا لو سمحت
– فى شنو؟
– فى شنو كيف ؟ الشمس الضاربه فى (صنقورك) دى ما شايفا؟
– وما تضرب إنت سيدا؟
– أنا ما سيدا لكن ستها إسمها (لمستقرن لها) ! وبالله ما تلاوينا ساااكت أدفع خلينا نشوف غيرك !
– أدفع ليكم كم كده يعنى؟
– (ينظر إلى رأسه متمعناً ) : كدى أقعد فى الواطه دى ورينا راسك ده خلينا نضرب ليك رسومك !
– (يستخرج متر من جيبه ويبدأ القياس ) : طيب المحيط فى نصف القطر على باى نق تربيع .. طيب إذن المساحه تساوى مية وخمسين سنتى متر مربع والسنتى بى عشرة قروش نكون عاوزين منك كده جنيه ونص

بعد حوالى شهر وبينما كان حاج عبدالفضيل يستلقى على العنقريب فى مساء ذلك اليوم مطفئاً لمبة (الحوش) مستمتعا بضؤ القمر الفضى وهو يضع الراديو الترانزيستور على صدرة يستمع إلى ألأخبار إذا بخبطات على الباب :
– قوم يا حاج شوف الجاييينا نص الليل ده منو؟
يتجه حاج عبدالفضيل نحو الباب ، يفتحه يفاجأ بشاب تدلى من كتفه شنطة سوداء ويمسك بقلم :
– ده بيت الحاج عبدالفضيل عمر
– أيوه فى شنو ؟
– معاك شركة (قدرناه منازل) !

كسرة :
يقبع المواطن عبدالفضيل نزيلاً بالتجاني الماحي بينما يرقد المتحصل فى الغرفة 7 عنبر العظام !

Advertisements

20 تعليق

  1. استاذنا جبرا
    تحت تحت سمعت بي انو بيعملو في شركة اسمها يتنفسون ودي حتحصل رسوم النفس والتنفس وحتي المره النفسا
    و يارب تعدمهم النفس

  2. والله بروف بتبالغ هي جات علي التدفئه والشمس ما المواطن بدفع اي حاجه ابتدائا من التعليم والصحه لحدود المويه والنفايات وانا سمعتا جاي جاي قالو داير يركبو عداد بتاع مشي وتاني يحسبو ليك خطوات من باب ما نعمل حركات ونقعد ساكنين واهو الحكومه تطلع ليها بي قرش قرشين حلوين ويريحونا من الحوامه شفتا الحكومه دي ما مقصره معانا كيف

  3. hahahahahahahhhhhhhhaahhahaha, y a japra khaf fina alllh masarina itgat3t

  4. سؤال سغيرووووونى كدا ( زى كل مرة ) الجماعة البيخترعوا الجبايات قاعين يدفعوا زيهم وزى الشعب الفضل ..ولا معفيين من الجبايات دى .. مجرد شمارات .. بس لأنو الحكاية بقت كتيرة ومسيخة ..( زمان كانوا ناس عبد المنتقم.. حسه الجداد ديل اسمهم شنو ؟ )
    ما لاحظتو معاى يا جماعة إنو كلام وتصريحات السادة المسئولين بقت غير مفهومة .. خصوصاً الجماعة البيتكلموا عن المشاريع التنموية والإستثمارات الخارجية والداخلية .. وإستقرار الجبهة الداخلية ومحاربة الفساد و ……… و……… أمس سمعت واحد منهم بيتكلم وقعدت اسمعه لحد ما خلص كلامه لاكين ما طلعت بأى حاجة من كلامه ولا عرفت هو قال شنو وما عرفت هو كان بيتكلم عن شنو ..يمكن نكون دخلنا مرحلة الشيخوخة … المبكرة … يا شنباتى ؟؟؟؟؟؟؟

  5. صباح الخير أبونا الفاتح والسمّار الكرام
    طبعاً بالتبادي نجد أنّ سمّار وليس ثمار مأخوذة من السمرة وديل الناس الضربتهم الشمس كتير وقس على ذلك الزرق زرق زي حلاتنا كده ضرب متوسط العمر زائد معامل البنية الجسمانية الوسطى (مع إنو الشعب الفضل بِنيَتو ببح) تكون كده الحكومة عايزة مننا ديون متلتلة .. بالتالي إستناداً على ما ذكر يبقى البتعمل فيه أمنا الحكومة ده شي عااااااااااااادي ومن حقها عشان تخلص ديونها،، يبقى الحكومة عادلة وهو المطلوب إثباته.
    في صدور هذا البوست بنسخته القديمة إتهمني زويّ بالجنون.. فكنت أضحك وأقرقر وأسكلب .. حتى صرت (كالعرجون القديم).
    كسرة: قلبك كل ما باب الشارع دق يدق
    ايدك ترجف في السقاطة ووشك شاحب
    ربنا يستر يمكن هم ..
    وتفرحي فرحاً قدر الدنيا إذا ما كان الطارق صاحب
    حالاً نارك بالهبابة لهيبها يبق

  6. وباقي لينا .. شركة والنجم إذا هوى .. عشان تجي تحصل الرسوم من كل من يغني أغنية فيها نجوم .. أو كواكب .. زي نجمة نجمة الليل نعدوا أما أغنية شفت النجوم عز الضحى دي فيها رسوم نجوم وكمان لمستقرن لها …! نستاااااااهل ….!!!

  7. سلام ..
    قبل كم سنة اشتريت جزء من بيت اخوي مشيت اسجل المبايعة في الاراضي قالوا لي تدفع رسوم فك رهن ورسوم فرق تحسين واورنيك ودمغات وباقي (شُفّع) رسوم كتيرة كدة .. سألت اخوي انت بيتك ده مرهون ؟ قال لي علي الطلاق مافي راجل في الدنيا دي داير مني قروش .. قلت لناس الاراضي كلام اخوي ده قالوا لي ده ما رهن ديون ده رهن حكومة .. طيّب فرق التحسين ده شنو قالوا اخوك اشتري القطعة دي سنة 58 والوكت داك كانت حتتكم دي خلا وهسع بقت في قلبا .. قلت ليهم طيب ده ما حظ اخوي .. قالوا والحكومة ما شريكت اخوك في الحظ ده .. قلت ليهم انا من ولدوني ما شفت الحكومة سوت حاجة وكل التحسين ده اتعمل بالعون الزاتي من ناس الحي … الموظف قال لي : عليك الله ما تقفلا معانا من الصباح داير تدفع ادفع ما داير امشي .
    حكومة تسد النفس ضلفتين
    تغشك وتنهبك .. عاااااااادي ولا بتأذنك
    هذي الحكومة قد بغت ونحنا زاتنا كالورق
    كيف ننجو من هذا الغرق ؟؟؟
    في نهر احزان الزمن نقعد نلوح باليدين
    طير طير يا نميري

  8. رسوم الهواء متين حتتعمل ؟؟!!

  9. الاستاذ جبرا
    تحية طيبة و للاعضاء الكرام لكن يا استاذي العزيز تتخيل لينا في جبايات زي دي يوم تلقاها حقيقة واحد من الجماعة ياخد الفكرة على محمل الجد و يقول ليه لا وهاك يا ناس جبايات و الكان انس خيال يبقى حقيقة امر من العلقم .

  10. با بروف سلامات

    باقى الهواء ياناس / نشوف نعبيه فى قزايز؟؟؟؟؟؟؟؟؟؟؟

  11. والله يا بروف دل صعبوها عديل كدة الفاضل ليهم بس رسوم لعلعة وسمع ما تنسي بالله وصي بها عبد المنتقم

  12. العزيز الجنوبي
    والله الشافك دقست مع عمك جمال حسن سعيد ما كضب، الراجل ده كل يوم ح ينط ليك عايز بدل تحرفون وبدل تزورون وبدل تنشرون وبدل تجهجهون.
    كمان أسرة المرحوم النميري ح تبشع بيك في الجرائد تقول ليك عينك في الضل تطعن في فيلو؟
    أما بالنسبة بخصوص بيت أخوك الفوق ده، يعني انت كنت عايز تمشي يدوك الورقة مختومة وممضية ويقولوا ليك مبروك؟؟؟!!!! يا عزيزي ناس المصالح الحكومية ديل بارك الله فوقهم بذكرونا كل يوم بإنو نحنا بننتمي لهذا الوطن الفضل ( واعذرني يا بروف على تحريف التعبير فالآن الوطن أخذ يتضآءل وهذا ما فضل منه ) أها يا أخوي خايفك يوم تمش تلقى الأمور زابطة وسااااااهلة وما معقدة والموظف لا مشى الفطور لا الصلاة لا مكشر ليك لا بشرب في الشاي لا عندك ورقة ناقصة لا أمشي وتعال لا في زول بي واسطة شال حقك.. أها تمشي تلقى الأمور كده تقوم تعتقد إنك في الجنة، تتلفت للحور العين والغلمان الأمثال اللؤلؤ المكنون والطير البجيك طاير يقع مشوي بين رغيفين والرغيف ذااااااتو يطمن،، تقوم لما ما تلقى شي من ديل تقوم تكفر ساي،،
    المهم الخلاصة حفاظاً على دينك، أو الفضل منو شعار المصالح الحكومية: نحن نخدمك بكل عنجهية، إذهب وتعال بكرة غير مأسوفاً عليك.
             بس كده!!!!!
                 شفت كيف؟؟!!!

  13. السلام عليكم ، البرف و الاخوان ، المشكله انو ناس لمستقرن لها و قدرناه منازل ما بعرفوا الرسلهم منو ؟ بس عندو عشره فى الميه ، تفتكر زى ده بيخلى زول ما يخلس منو ؟ سؤال خبيث : اذا كان المستشار القانونى بتاع الكحليه هو ظاتو القاضى بتاع الجبايات ، ولا حتى بسمع كلامك ، جباياتك اربعين ، يقول ليك ميه ؟………….. عجبى

  14. جبرا وسمار القمردينه .
    سلامات .
    عندنا فى محليتنا بيشيلو رسوم نفايات وهم ماعندهم أصلا عربية نفايات وبيشيلو ضريبة عتب والبيوت رواكيب وقطاطى . الناس دى جنت الجن الواحد دة .

  15. منصور نبيل .. يا عزيز
    جمال ده زول في قعدة جبنة بتحل مشاكلك معاه وتمشي .. وبعد ده يمكن يضمك ويقلدك .لكن النظام ده نحل مشاكلنا كيف معاه .. لا داير يفوت ولا نحنا دايرين نموت .. نحنا الاتنين لواييق .
    انقر انا ما كنت قايل ناس الاراضي حيقولوا لينا رسوم شنو يا جماعة ما زيتكم في بيتكم ؟
    امسك لي في الفضل منو ده !! لكن صدقني ما باقي منو كتير ..والناس ديل كان طوّلوا اكتر من كده بضيعونا دنيا وآخرة .
    حنين .. عتب علي القطاطي والرواكيب ؟ .. بكرة يدفعوكم العتب علي النظر..
    يا جماعة بسأل عن صاحبي محمد عمر .. واريتك تبقي طيّب انت وانا البي كلو هيّن .
    تعرف زمااااااااااان كان شيخ الحارة بجي بالحمار بتاعو يشيل العتب وكان دائما بديني تمرتين ويسألني ابوك قاعد جوه ؟ كنت بستغرب ابوي ما بريد جيت الزول ده ليه !! شفت خباثة شيخ الحارة ده !! وانا كنت قايلو طيّب .

  16. سلاوى..
    خرفك بتعرفو براااااااااااااااااااااااك!!!!

  17. موضوع فى الصميم بس الخوف يابروف يطاللبوكم برسوم كتابة

    ( ن والقلم وما يسطرون )

  18. والله حيرونا عدييييييييييييييييييييييييييل كدة

  19. سلام للبروف وقراءه الكرام
    دي واحدة من المدونات السبع …. بس أول كان اسمها لمستقرن لها ….. دا الحين فين راحت النون وفين راحت مداخلاتنا الكتبناها لمان كانت الحكاية جديدة؟ طبعا النون نقصتها لأنو الجباية بعدد الحروف … والتهليقات بتاعتنا؟ والله كانت مناسبة بس ما مذكرينها …. أعملوا قناع الأوكسجين بعد قدرناهو منازل عشان نعلق ليكم …. موش ترجعوا تجتروا

  20. يا اخوانا انا عندى سعال بس داير واحد بعرف يرد عليه
    انا موظف فى شركة بدرجة مدير متزوج وماجر بيت وقعادين معاى طلبة فى البيت بياكلو وبشربو ومرتى عيانه بشترى ليها انسولين كل 40 يوم ب 230 جنيه ومعاهو حبوب
    وابوى فى المعاش وعيان عندو سكرى وازمة واختى راجلا مطقها وعندها طفلين واختى التانية راجلا ما شغال وعندها اربعه اطفال واخوى عاطل
    الدين ما فيه حرج صاح
    عليكم الله فى داعى ناس الحكومة ديل يشيلوا منى زكاة شهرية مع انو مرتبى ما بحول عليه اليوم خليك من الحول
    وبعدين انتو فى زكاة شهرية يعنى من طيبة ناس الحكومة ديل عمولها بالاقساط شوفوا الرافة بالرعية
    ملحوظة
    كان ذلك بالنظام الاسلامى اما بالنظام النصرانى بيشلوا من ضرائب يضربم الضريب
    بالله انا ما داير زكاة لانى واقع تحت بند المعسرين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: