ده يكون من شنو؟

ما أن تقوم بقراءة أخبار الحوادث في أى صحيفة حتى تقرأ عناوين من شاكلة (القبض على عصابة تقوم بتزوير العملة) ! علي الرغم من أن (خبراء تصميم العملات) لدينا ما أن يقوموا بتصميم عملة جديدة إلا ويصرحوا بان تلك العملة لن ياتيها التزوير لا من أمامها ولا من خلفها وأنها تتمتع (بكذا نوع) من أنواع الحماية ضد التزوير بداية بالعلامة المائية التى تري عند تعرض العملة إلى الضوء (تكون شايل ليك بطارية طوااالي) وإنتهاء (بالخط المعدنى) والذى يمكن عمل (شبيه له) بأي من برامج الرسوم الكمبيوترية !
بالطبع كلام (خبراء تصميم العملات) لدينا عن إستحالة تزويرها (كلام ساكت) وغير علمي بدليل هذه الظاهرة المتنامية للتزوير وكل نفر نفرين عندهم طابعة وماسحة ضوئية وكمبيوتر شخصى (قنبوا) يطبعوا ويوزعوا !!
العبد لله ما (خبير تصميم عملات) ولكن يعلم جيداً أن كثيراً من الدول العندها خبراء عملات وحتي لا تقف موقفنا هذا قد قامت بتصنيع نقودها الورقية من مادة البوليمر (الصديقة للبيئة) والتى تعد أكثر أمانا ضد خطر التزييف وتتضمن العديد من الخصائص الامنية التى ليست متاحة للورقة البنكنوت ، مما يجعل عمليات التزييف اكثر صعوبة !
(ومش كده وبس) فإن النقود المصنوعة من مادة البوليمر لها ميزات أخرى كمقاومتها للماء والسوائل والأوساخ مما يحد من التلوث الناتج عن استخدام النقود الورقية العادية كما أنها أيضاً أثبتت الدراسات بأنها تعادل في عمرها أربعة أضعاف عمر العملات الورقية علاوة علي أنها تتميز بسهولة الاستعمال في ماكينات الصراف الآلي عكس العملات الورقية ، بالمناسبة أول دولة إستخدمت البوليمر فى صناعة العملات هي أستراليا (في العام 1988م) ثم تبعتها ماليزيا وهونج كونج وبنجلاديش وأندونيسيا وتايلاند وغيرها من الدول .
بالطبع ح يجيك (خبير تصميم عملات) ناطى ويقول ليك تكلفة صناعة العملة من البوليمر (غالية) ولكن الخبراء (الجد جد) يؤكدون بانها أقل تكلفة خاصة إذا ما وضعنا حكاية (التزوير) وعمرها أربعة مرات قدر العملات الورقية (في الإعتبار) !
ما دعاني لكتابة هذا المقال ليست هذه (الجلطة) بل (جلطة تانية) مما ممكن يعملا (طالب قي أولى فنون) هذه (الجلطة) تكررت للأسف مرتين متتاليتين فعند تصميم العملة الورقية قبل الأخيرة تم إستخدام نفس اللون (البمبي) في الورقة فئة العشرين جنيه (وكمان) في الورقة فئة الخمس جنيه (يعني خلاااس ما لاقين ليهم لون) مما جعل المواطنين يعانون كثيراً مشقة التركيز في التفريق بين الفئتين وفي كثير من الأحايين يقوم أحدهم بتقديم العشرين بأنها (خمسة) ولا يكتشف ذلك إلا بعد فوات الأوان !
كان من الممكن أن نقول أن لكل خبير (دقسة) وأن المسالة ليست عدم خبرة بل (سهوة ساااكت)
لكن ما حدث فى صناعة وتصميم العملة التى صدرت مؤخراً يؤكد بما لا يدع مجالاً للشك بأن (عبدو الميكانيكى) هو من يقوم بتصميم عملاتنا فها هي الورقة فئة (الخمسين) تحمل ذات لون الورقة فئة (الخمس جنيهات) ! .. طيب يا (عبدو يااخ) وكت ما لقيت ليك لون تااانى خاااالس والألوان إنعدمت طيب خلي (العشرة) تشبه (الخمسة) عشان الفرق (عند الدقسة) يكون (خمسة جنيه) بدل ما يكون (خمسة وأربعين جنيه) عشان يا عبدو القصة ما بتتحمل وجيوبنا ما ناقصة وكده !
عزيزى القارئ .. بينما خبراء تصميم العملات (الجد جد) يركزون عند تصميم وصناعة العملات البنكنوت على شيئين هامين .. أولها عدم قابلية العملة للتزوير ..وثانيها إختلاف الألوان (الوااااضح) بين الفئات وإختلاف مقاساتها منعاً للإلتباس نجد أن (خبرائنا) يركزون على (الرسومات) التى تحتويها (العملة) وهل يقومون بوضع (أفيال) أم (زراف) أم مصفاة البترول (الما شفنا ليهو حاجة) !

كسرة :
يكون ده من شنو يا جماعة ؟؟ والله قدر ما شغلنا راسنا (الفاضى ده) ما لقينا لينا سبب !!

Advertisements

34 تعليق

  1. سلامات ..

    يا عمك كدي وريني طريقه اكتل بيها ضميري المتخلف دا .. انا نفسي اشتري بيت سمح و عربيه آخر موديل و اسافر كل يوم بلد جديد و الف العالم دا كلو … لكن بدون طابعه و اسكانر شادي حيلو مافي طريقه .. بعد كدا ما فضل إلا ننط الحيط .. والله ياهو .

    كسره : يابروف إنت زعلان في شنو ؟؟ ال45 جنيه دي فارقه معاك كتير ؟؟؟ ياراجل دي يادوبك كيلو ونص ضان جلافيط … خليك من الزيت و الفحم والشطه و ال…..

  2. عزيزى وأستاذي
    بمناسبة الألوان والعملات ( أصلو ده شهر ما عندنا فيه نفقة عشان كده ما بنعد أيامو) خلينا في لون صفحتك الأصفر ده الواحد لما يقراها ويمشي أي صفحة ويب تانية بحس كأنه كان بعاين للشمش كدي أبدى لينا التغييرإنت بتاع الألوان وغير لينا من اللون الأصفر ( عشان ما تظهر) سويت لينا الطشاش

  3. الأخ العزيز الفاتح
    نرحب بك في مدونة الأستاذ جبرا . .
    اللون دا قبل كدا الأستاذ الفاتح جبرا غبرو ، لكن قابل معارضه مسلحه من أعضاء المدونه الذين اعتادوا على لون القمردين هذا ، و بالمناسبه هذه المدونه معروفه بين قراء و معجبي كتابات جبرا بالقمردينه.
    تعال هنا كتير و تعود مثلنا على القمردينه.
    و لك الود والترحاب

  4. ياخ إزيكم
    إنتو البزوروا ديل بقبضوهم كيف؟ والله ماف زول بعاين للقروش دي نصيحة ولا يتأمل فيها عشان يعرفها مزورة ولا لأ ..هي أساساً بتقعد قدر شنو لامن نعاين ليها؟
    الفاتح أعمل ليك كود أنا كنت فاكرك البروف ذاتو .. بعداك وينو اللون الأصفر ده؟ بالجد إنت ضارباك (شمش) .. كدي شوف إعلان MTN ده.
    بمناسبة الشمس شيلو من الراجل ده ضريبة تتطششون

  5. يالفاتح ( ماجبرا) .. حبابك 10 في القمردينه .. عمك سنكل كفى ووفى .. كع

  6. والله دي أسوأ عملة نشوفها
    كبيرة وشينة وناااشفة تتكسر وتتشرط من غير سبب
    أما موضوع الألوان ده خلانا عاملين زي الأجانب ، الواحد يقعد ساعة كاملة يهبش وينكت في محفظتو عشان يحاسب
    الخمسين ياتا ؟ الخمسة ياتا ؟؟

    هسه المبني الكبييير بتاع طباعة العملة دة بس فيهو إسكانر وبرنتر وكمبيوتر شخصي ؟
    عملتنا الشايفنا دي حقو يطبعوها في كشك متر في متر والمبني الكبير ده يبيعوهو لمستثمر كويتي يعملو مزرعة دجاج

  7. يابروف الحكومة دى شغالة بحكاية الالوان اكتر من الحجم والتأمين بسبب الغمتة ( الرشوة ) عشان المسؤول المغموت له يعرف بخفة وبسرعة كم دخل جيبه مقابل الخدمة التى سوف يؤديها للغامت وهل تكفى ولا يطنش من الغامت —–
    والحكاية محتاجة لسرعة فى ردة الفعل وهذه السرعة تتوفر فى الالوان اكتر — واشارة المرور مثالا—

  8. الحبايب صباحكم خير
    والله حكاية القروش أنا لو علي يعملوها كلها باللون الأسود .. حداداً على ما آلت إليه من ضعف .. حتى بعد أن تم حذف 3 أصفار منها قيمتها .. ويكتبوا فيها بس الرقم للتسهيل ورفع المعاناة عن كاهل الجماهير .. عشان الجماعة ما بتعاملوا بيها ما أساسو .. بدليل إنو شيخنا – قدس الله سره – لما جاهو الحرامي لقى كل العملات المعاهو برانية .. يعني دي فكة ساي بالنسبة ليهم .. فسهلوا تزويرها يسهل الله عليكم .. ودي تعنبر واحدة من إنجازات الثورة القاصدة … (تودينا التوج) .. سيكتب في ميزان حسناتها. الله لا كسبهم خير بركة من صلى وقال يا الله ..

  9. ده كلو من عبده المكنيكي القايل نفسه علي كل شئ قدير ده ..هسع إن قال ما بقدر دار يكتلوهو ..؟
    هسع بعد يكمّل فهمو كلو فينا حيقول لينا : هو جدودكم كان بعرفوا العملة ..؟ ما ترجعوا للمقايضة زي جدودكم !!
    جبرا .. انت قاعد جمبهم وبتدقُس فيها .. بالله نحنا كل اجازة الواحد يجيب معاه عينة من كل فئة نذاكر فيها سنة كاملة ولما نرجع نلقي المنهج غيروهو وتااااااااااااااني ندقس ودقسة المغترب بي عشرة .
    هسع جنيهنا ده بغطي تكلفتو ؟؟؟؟؟
    غايتو السماها ( سك ) العملة ده اصلو ما كضب …

  10. العزيز جبرا
    انا زعلان منك جداً
    عبدو الميكانيكى ذنبوا شنوا فى الموضوع ده عشان تؤكد انه من قام بتصميم العملة .
    والله والله لو قاموا بتكليف عبدو الميكانيكى بتصميم العملة لما كانت بالشكل التى عليه الآن
    انا بعرف عبدو ده ممكن يركب مكنة دفار فى ركشة وما تجيها اى شى تقول تصميم عملات
    كسرة:
    ارجو نشر اعتزار لعبدو الميكانيكى فى نفس المكان تحقيقاً للامانة الصحفية

  11. اخي الفاتح جبرا والاخوه الاعزاء
    اتخيل لنى امبارح جاي من الدكتور قال لي عندك تايفد ودمك 60 ضربة لى حقنة تايفد عبر الوريد خلى لى الدنيا لونه كوبي
    ركبة لي رقشه عشان اصل البيت وانا في حلة طشاش وطماط من العلى والحكومه وصلت البيت وبدل ما اديه خمسه اديته خمسين ونامن عيوني فتحو شويه وعرفته الكارثه هسع بدل تايفويد بقى عندي وجع في المصران وسخونه في الجيب ورعشه فى الحلقوم وجفاف في البلعوم
    وبعد ده بتسال يكون دى شنو ياجماعه انا اقول ليك يعني الحكومه لو ماجننت الناس بالطريقه دي تكون الحكومه كييييف

  12. معليش كلامى كله مكتوب غلط من الطشاش العلى

  13. بت وراق سلامات .. والجاتك في خمسينك سامحتك .. البركة في سلامة الروح .. إن شاء الله بتاع الركشة يكون محتاج ليها أكتر منك .. وتقع ليهو في جرح وبكدا تكوني أخدتي حسنات .. ودي برضها من إنجازات الثورة القاصدة .. (تعولقنا) ..

  14. بروف لك التحية
    يا اخي انت في عبدو الميكانيكي اللي بجلط في العملة ولا اللي يشوف الشمس نهارا جهارا ويحلف طلاق انه الدنيا ليل !!عزيزي ليس على المؤتمرجية من حرج وليس لهم كلمة يعتد بها اليوم يتحدثون عن جودتها وغدا لو غيروها يقولوا ليك والله العملة القديمة دي كانت أسوأ طبعة وهي من صنع ايديهم.
    دي ولا كمان شطحات الود المروح ده. اللي ما بعرف من الخارجية الا تصريحاته مجلطة دي والناس ما تفرق بين خارجية السودان والصومال الا لما الود مروح ده يصرح , لان الود بتاع الصومال فيه شويتين من الخجل على روحوه.
    بالمناسبة اليوم الود الصوارمي بينفي تقارير دولية تتحدث عن زيادة نشاط حزب الله وجماعات اخرى في تهريب السلاح من ليبيا الى دارفور , ويقوم الود ناطي دي تقارير تنقصها المعلومات !! بالله عليك ما دي زاتها تصريحاتك انك قافل الحدود والدكتور خليل ده الا يجي فوق السماء او تحت الارض لكن الحدود دي مقفولة تب وبكرة الرجل دخل عيانا بيانا
    والبروف يسأل ده من شنو ؟؟
    ده من كثرة الرقص والحلفان بالكذب واليمين الغموس .

  15. البروف جبرا..
    سلام..
    طبعا الكلام بتاع التزوير دا مقصوووووود,,امال التضخم دا بجى من وين !؟؟؟
    انا بى اضانى اللى راح ياكلها الدود دى سمعت /بدرالدين حمدى بتكلم عن كلفتتهم فى تغيير العملة لاول مرة واستخدامهم لاسوا واردأ انواع الورق!
    ياخ ديل ناس مقرفين جدا جدا..

  16. سلام ياقبيلة،،
    سألت يابروف سؤال عويص والأجابة عليه عصيّة بس أنا حا أجاوبك من غير زعل ولا عكننة ولا تحوير للمعاني والكلمات، تعرفوا ده بيكون من شنو؟؟ من (البينا) ومن (العلينا)، وطبعا” ده كلو مننا، وأصلو العلينا ده ما مرّ يوم بخيال بشر!!!
    كسرة/
    زمان زمن الناس كانت بتجيب ضو النجوم منضوم عقود وأمشاط حرير، قالو ست الأنداية قالت لروادها الحياري قالوا الليلة القمرا (خنقت) ده يا ربي بيكون من شنو؟؟ فأجابها أحد الرواد المسالمين ما كلو منكن أنتن ديل، ستتات الأنادي بقيتن تسون المريسي مغشوشة…
    ويا أب أحمد لن أحيد.. لا .. لا.. لن أحيد!!!

  17. السلام عليكم ، البرف و الاخوان ، ماتشوفو لينا كل متنفذ يلهف ليهو قرشين حلوين ، يقول انا اصلى تاجر و فهلوى و مقرم و مكحل بالشطه ، طيب من زمان ما طلعو فوق الكفر ليييييييييييييه ؟ و كل مرة ~~~~~ عملت ليها بزنس و لا منظمه و هاك يا غنى بضم الغين ، سوؤال خبيث : الخطوط سودان طير قالوا رجعوها بى 125 مليون دولار ، هم اول كانو باعوها بى كم ؟ ……………….. عجبى

  18. السلام عليكم انت يا استاذ معقول فياته عليك الناس ديل مما جو خلو عمله تقعد ليها اربع سنه لمن تقول لي اوراق شنو وبتاع كيف وتلوث وبيئه هي العمله كل سنتين بتتغير والله انا لي اتناشر سنه من السودان هسع عايز انزل السودان وعايز لي كورس في العملات عشان ما ادقسونا وشايل معاي اله حاسبه وبعدين تغير العمله دي ما عايز لجنه واجتماعات وسفريات ما تخلو الناس تترزق والله جنس حسد

  19. يا ود الخلا يعجبني إلتزامك للفكرة .. وربنا يهدينا ويهدي ستات الأنادي .. حتى لا يخنق قمرنا أكتر مماهو مخنق .. لكن هذا لا ينفي كون الله يمهل ولا يهمل .. يورينا الله فيهم يوم زي يوم القذافي بركة رب العزة.

  20. اميييييييييييييييييييييييييييييييييييييييييين اميييييييييييييييييييييييييييييييييين ياابو احمد

  21. يا انس …واضح إنت منقنق ..وينا القروش البتقعد في الجيب لحدي ما تتكرفس …والله ماهيتنا ما بندخلها الجيب من الصراف وعلى تربيزتنا .. وتكالات كثيرة ..عشان قسمة الديون وأصحابها الكتار.. يعني رحلة للا عودة لها ..وإن نظرتها وفي بعض الاحيان .. زي طفلك الجابوهو ليك ويموت بعد خروجه من بطن امه …يعني من بطن امه للمقابر طوالي …قال…. تتكرفس … قال.. والله دي نكته .

  22. يا ودالخلا عزبتنا كل ما نقول ناس الحكومه ديل بقوا ما خايفين فينا الله( تقول دى مننا )الشعب دى عيشته تطير ياكافي البلا لا فيهم الصائمين الراكعين الساجدين الحامدين الشاكرين بسببن يرفع عننا البلا
    كسره
    انت قلت برااااااااااك ست الاندايه هى التى بدات الغش وليس السكارا والحيارا من شعب الاندايه المسكين البدفع للعرقى كامل التكلفه وهو مغشوش يعنى الكلام دى معناهو انو ست الاندايه اقصد امنا الحكومه هى التى تغش وما خايفه من الله —–

  23. غايتو يابروف سمعنا تحت تحت كدة انوالحكومة ذاتة بتطبع وتوزع والحكاية جايطة وقول ليهم اعملوها حديد احسن

  24. اذا استخدمنا البولمر فى صناعة النقود فمن اين ياتى الفساد .مع ننى مهندس كيميائى اعرف انه يوجد انواع من البولمرات صديقة للبيئة وباسعار زهيدة وسهل الحصول عليها خاصة انه يمكن ان تبيع وتشترى وانت جالس على شاشة الانترنت فلماذا كل هذا.

  25. يأخي ويا صديقي العزيز أب أحمد ويابت وراق يا أختي الفاضلة ما قلنا غير كلامكم ده، ولكن السؤال هو الخلا أمنا الحكومة وباقي الناس تتسلط علينا وما تخاف فينا الله شنو؟؟ ده السؤال الكايسين ليهو للأجابة وأنتو طبعا” كووولكم عارفينها لكنكم تتحاشوها ، لييييه أنا ما عارف!!
    وقالوا المؤمن من أتعظ بغيره، فهل لنا في الذي حدث ويحدث من حولنا من واعظ؟؟؟؟
    يعني ببساطة كده هل ترغب أمنا الحكومة في ان يحدث لها ما حدث لأشباهها في دول الجوار؟؟؟
    أم هل نرغب نحن الشعوب الكادحون العائدون مع الظلام من المصانع والحقول في ان يحدث لنا كما يحدث للشعوب في دول الجوار أيضا”؟؟
    يا جماعة الخير لا نرغب نحن في الفوضي والدمار الحاصل للناس التانين ليحصلوا علي التغيير بمثل هذه الكُلفة، ولا ترغب الحكومة ذات نفسها في حدوث التغيير بمثل هذه التكلفة العالية أيضا”!!!
    طيب الحل شنو؟؟؟؟؟؟؟؟؟؟؟؟؟؟
    شوفوا معارضتنا الجميلة كيف تتمنع وتتصنع الرفض مع الحكومة وهي في الخُفية ترغب، والشعب من الناحية التانية يناجيها أي المعارضة فتستمع ويناديها فتمتنع!! الي متي هذا الدلال والدلع من ديل ومن ديل….
    الحل البسيط هو في تشكيل معارضة صادقة وشفيفة همها (الأول والأخير الشعب) شوفوا هما الأول والأخير دي وخطوا تحتها مائة خط وليس مصالحها الذاتية والآنية كما نراه الآن، ويجب ان يحدث ذلك أولا”ويصدقها الشعب ويثق في ان هؤلاء القادة همهم الأول والأخير الأصلاح العام للناس كوولها وليس أصلاح حالهم كما يتبادر للأذهان من أول وهلة، وحتي نجد اناس أنقياء أتقياء أطهار يخافون الله ولا يخشون فيه لومة لا ئم أترككم في رعايته وحفظه انه وليٌّ ذلك والقادر عليه…

  26. وهذا هو التغيير الذي ننشده ليكون في نفوسنا أولا” حتي يُغير الله ما بنا من غير (تلتلة ولا مشاكل)، ولو تم التغيير الداخلي لنفوسنا كلها بتغيير ما فيها من (الأنانية وحب الذات والاحقاد الدفينة والحسد والغل وكراهية الآخر، وتححابنا وتصافينا وأتجهنا بقلوب صافية ونفوس طاهرة نقية لرب العباد ودعوناه أن يغيير الذي بنا فسيستجيب لنا لأنه وعدنا بذلك وهو لا يخُلف الميعاد، وهذا هو الأسلام الحقيقي والأيمان الفعلي ان نقرن العبادة بالعمل وهو المطلوب لتحقيق الغايات الدنيوية للوصول بها للآخرة..
    فقد قال جل من قائل في كتابه العزيز (وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ)

  27. يااخوى يا ود الخلا معنى كلامك دا انو كل الشعب يكون من الصالحين والصفوه الاخيار (المدينه الفاضله) هذا لايحدث ولن يحدث من يوم ما خلق ادم وحتى تقوم الساعه
    وعليييييييييييك الله تانى ماتقول لي الحكومه ما عندها دخل في الحاصل دى
    كسره
    (من غير زعل ) انته قاعد معانا ولا في الخلا

  28. البروف والسمار .
    سلامات .
    والله الواحد لمن يجى متأخر مايعرف يرد على الموضوع الرئيسى ولا على باقى التعليقات الجميلة .
    لكن الله فى …

  29. الذى يزور لا يحتاج لأجادة 100 % حيث كثير من الناس يمكن أن يلفت إنتباههم ملمس الورقة المزورة ويجعلهم يدققون النظر لأن المزور مهما إستطاع من براعة لا يمكنه إحضار نفس الورق الذى يطبع عليه البنكنوت الحقيقى والظاهر خبرائنا يعتمدون على ورق رخيص يماثل ورق الكتابة العادى ويصبون جم تفكيرهم على العلامة المائية والشريط السلكى ولذلك لا يحتاج المزور لأجادة هذه الجوانب ويكفيه فقط تزوير العملة فى مثل هذا الورق الرخيص حتى تحدث الدفسة التى يريدها وتشترى أنت وأنا بعملته ونقبلها بمجرد اللمس لأن أصابعنا لم تجد شىء غير عادى..

  30. ود الخلا تحياتي وإحترام بكميات تجارية
    لكن يا أخوي كلامك دا لو قلنا دايرين نصل ليهو بهذه المثاليةإحتمال يحصل التغيير لما حفيد نافع (اللسة ما إتولد) يكون بقى نائب رئيس المؤتمر الوطني … فاااا معليش بس نحنا دايرين قبل ما نتوسد الباردة نلحق نشوف لينا فيهم يوم زي يوم القذافي … أو بالقليل زي علي عبد الله صالح .. فمعذرة يعني التخدير القلتو دا ما بنفع معانا عشانا جاتنا حساسية منو من كترة ما حقنونا بيهو .. عليك الله كلامك دا إنت مقتنع بيهو ؟ فوضة شنو الحصلت والتونسيين الليلة بنتخبوا أول حكومة وطنية ليهم .. قيس على أفضل النتائج .. ما تقيس على أسوأها .. وطالما فرعون إتغير جماعتك ديل بتغيرو زي الورد .. لما إنت ذاتك تحتار .. !!

  31. ود الخلا … سلام
    والله بي صراحة انا بعد شفت العملوهوا ثوار ليبيا في القذافي بقيت افكر في كلامك ده .( ما بقصد انو القذافي ما يستاهل ..لكن كان ممكن يتحاكم ويلقي نفس المصير ده مهما كان نوع القانون شرعي او وضعي ) ولقيت انو نحنا وحكامنا شاكلة واحدة بس منتظرين الفرصة البتمكنا من بعض .
    لكن يا ود الخلا ما برضو في حديث عن الرسول صلي الله عليه وسلم بقول 😦 من رأي منكم منكراً فليغيره بيده فإن لم يستطع فبلسانه فإن لم يستطع فبقلبه وذلك أضعف الايمان ) انا لو فهمي صاح للحتة دي زي الانت اختر لينا أضعف الايمان . وبرضو نحنا كم وعشرين مليون هل الاسهل تغيير كم وعشرين مليون ولآ كم وعشرين نفر صالحين يمسكوا الحكم ويساعدونا في اننا نصلح نفسنا .؟ وهل الزول الفاقد الامن والامان والطمأنينة وكل تفكيره في كيف يأكل اولاده ويعالجهم يقدر يجاهد شيطان الجن الجاييهو من مليون ثغرة في حياته ؟.
    معليش قاعد اجيك ناطي لكن صدقني انا معاك بنسبة 75% .

  32. يا ناس القمردين والمشمش … السلام عليكم
    والله لولا أنني قد مررت بتجربة ما وخدعوني بخمسين ألف مزورة لما صدقت أن هناك من يكلف نفسه عناء تزوير عملت(نا) آسف عملة السوءدان المستقطع ….. ما هو المبلغ المطلوب تزويره من هذه العملة ليكون التزوير مجديا؟ اعتقد أن تزوير خمسين جنيه سوداني ربما يكلف ثلاثة دولارات مثلا … فكم هامش الربح وهل يستحق المخاطرة بالسجن وربما الإعدام؟ النظام المالي العالمي كله سينهار في لحظة إذا لم يعد العالم لاتباع نظام غطاء الذهب والفضة كما يقول الخبراء … أما بتاعنا فعملتنا لايغطيها شيء……………. لست أدري كيف أرفق صورة مع مداخلتي وإلا لكنت متعتكم بصورة عملة سودانية تستحق التزوير حتى وهي غير صالحة للتداول

  33. والله يا جنوبي كلامك القلتو ده (انو نحنا وحكامنا شاكلة واحدة بس منتظرين الفرصة البتمكنا من بعض) ده عين الحقيقة المرة الأليمة الغافلين عنها الناس، وهي عين ما نخشاه أن يحدث، وصدقني لو حدث ذلك لا قدر الله فلن تجد هنالك بعد ذلك اليوم من يقول كانت هنا أمة ووطن وشعب من أميز الشعوب التي كانت بين الوري، وتعرف أنا بقول كده لييه لأن أعداءنا أكثر من أصدقاءنا وأولئك الذين يتلمظون ويتظرون وقوع التور لينهشوا من لحمه لهم كُثر وديل طبعا” خارج الدائرة دي، وربنا يستر، والحكاية دي ما دايرة ليه شرح فانظر لما حدث لنا عبر السنوات، نعم قد يقول قائل بأن نظام الأنقاذ له القدح المعلا في الذي يحدث لنا ، ولكن ماذا تقول فيما يحدث حتي بعد أن أنبطح النظام وأسلم خطامه لأعداءه ولم تزيد الحالة الا ضيقا” وأستحكاما” لا يعجب الا أولئك الذين يقولون عليّ وعلي أعدائي وهذا مالا نريده يا أصدقائي…
    اللهم ربنا أحفظنا وأحفظ أبناءنا وأوطاننا ولا تؤاخذنا بما فعل السفهاء منا، ان هي ألا فتنتك تضل بها من تشاء وتهدي من تشاء أنت ولينا فأغفر لنا وأرحمنا وأنت أرحم الراحمين..

  34. قروشى شى شى هسع ناو

    القروش الكل يوم بغيروها

    قروش بالجديد ولا بالقديم

    الزمن بالجديد ولا بالقديم

    السودان زانتو بالجديد ولا بالقديم

    كلو شئ فى السودان بقى بالجديد ولا بالقديم زى الناس دى

    فقدة الذاكرة ورجعة ليهم تانى

    وبالنسبة للالوان بتاعة العملة الناس دى لو خلوها ابيض واسود

    وعندها قيمة احسن من ماتكون ملونة زى حلاوة المولد من غير قيمة

    قروشى شى شى هسع ناو

    وقالو الفلس راجل كلس

    كسره :

    غيروها , طبعوها , اتدولوها , زورها , اعدموها ,غيروها , طبعوها , اتدولوها , زورها , اعدموها ,
    غيروها , طبعوها , اتدولوها , زورها , اعدموها ,غيروها , طبعوها , اتدولوها , زورها , اعدموها
    واساقية لسة مدورها

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: