الفساد يرد !

عزيزي الأستاذ الفاتح جبرا .. المحترم
تحية طيبة وبعد:
أسمح لي سيدي أن أرد على رسالتكم لي بهذه الزاوية والتى تم نشرها قبل عدة أيام ، بداية أرجو ألا أكون قد تسببت لك وأنت تستلبم ردى هذا في (شلل رباعي) أو ما شابه من أثر المفاجأة (وإنتا زول قلب وكده) والمفاجأة هى أنك و(معشر المواطنين) تعتقدون بأنني (شخصية معنوية) لكن الشئ الذى تجهلونه تماما هو أنني كائن حي مثلي مثل كل الكائنات الحية ، أمشى في الأسواق (وأخربها) وأدخل إلى الوزارات (وألغفا) واجلس فى البنوك (وألهطا) وأدلف إلي المؤسسات (فأنشفا) ! وأتربع في المحليات (وأشفطا) .
نعم أنا كائن حي أتنقل وأسافر وأقيم في كل الدول والأقطار ، أمكث فى بعضها إن طاب لى المقام وتهيأت لى الأجواء عشرات السنين (لحدت ما الشعوب تقول الرووووب) ، وإن لم يطب لى المقام ووجدت أن دولة ما (مقفلة اللعب) في وجهى فإننى أكون في تلك الحالة مضطراً لرفع الراية البيضاء ومغادرة تلك الدولة والبحث عن (مأوى مناسب آخر) !
عزيزي جبرا :
لعلك تود أن تسألنى متى (أرفع الراية البيضاء) وأغادر دولة لا تتهيأ لي ظروف العمل فيها ؟ ومتى يطيب لي المقام ويحلو لي البقاء في دولة ما؟ والإجابه علي هذا السؤال يا عزيزى جبرا واضحة كما أعتقد (وما عاوزه ليها درس عصر) ، إذ أن فرصتى للعمل تكون شبه معدومة وأتعب غاية التعب وأعاني الإضطهاد و(العطالة وقلة الشغلة) في المجتمعات التي تنتهج أنظمتها السياسية أساليب الديمقراطية وتوسيع المشاركة، لأنو فى الدول دى القوانين كفيلة بردعى وردع كل من يتعاون معي .. كما إنو (دغمسة وغتغيت مافي ) .. وأى عمل (عام) قاعد يتم في العلن والناس كوووولها شايفاهو ومتابعاهو ولو الزول عمل ليهو (شوية فساد سغيروووني) الله قال بى قولوا .. وعلى القانون (طواالي) بدون فقه سترة و(أجاويد) وقصة المال (تلتو وللا كتلتو)!
أما عن مسألة (طيب المقام) ومزاولتى لعملي بحرية وبدون أي شوشرة من أحد فأود أن أخبرك عزيزي جبرا بأن الإمور تكون آخر حلاوة عند مكوثى بالدول التى يكون فيها الحكم (شمولي) ومتحكمة فيهو جماعة واحدة لا تمثل عموم أفراد المجتمع الشئ اليخليها غير خاضعة للمساءلة و(تبرطع زى ما عاوزه) وما فيش زول يقدر يقول ليها (تلت التلاته كم؟) ، وبينى يا وبينك يا أستاذ لمن ألاقى ليا (مناخ) زى ده .. أنا بسوى (البدع) وأظنو براااك شايف (الخط الفي سماهو إتسرق !!) ومنظمة (أصحاب الميمنة) الوهمية بتاعت (المدينة الرياضية) اللذين ذكرتهما كأمثلة في خطابك المذكور لي وغيرهم !
عزيزي جبرا :
لن تجدى محاربتك لي وكتاباتك عني شيئاً .. (إنتا شنو ياخ ؟ أنا الوازع الديني ما قدر يعمل ليا حاجه) .. عشان كده أسمح ليا أنصحك .. يااخ إنتا زول كبير في السن وكمان عيان .. وعندك عيال بتربي فيهم .. يااخ أعمل حسابك وما تقوم نفسك ساااى .. والله تقعد تباري فيني كده يوم يطق فيك عرق يلحقك أمات طه ..!!

كسرة :
نصيحة السيد الفساد دى ما ح أهملا لأنو أثبتت البحوث الطبيةمؤخراً أن النفخ فى (قربه مقدودة) سبب رئيس فى إنفجار الشريان الأورطي !!

38 تعليق

  1. ده اسمو الرد الشافى الكافى

  2. تحية ليك ولى المعاك فى البلد قاعدين وتحيو للفى الغربة قاعدين
    انته ليك حق يجيك قلب
    انته مالك ومال الفساد خلى يبرطع زى ماداير نحنا حنرجى حقنا فى يوم القيامة

  3. عمنا بروف بس الفساد ده فى السودان ماخد اقامة دايمة ولا شنو

    لكن الفساد كفا ووفى فى الرد

    لكسرة:
    بلدنا بقة ارض خصبة لكل انواع الفساد والزرعو زاتم ماظن يقدرو هسى يقلعو

    وااااااااااااااااااااااااااخ يابلد

    وطن عز الشدايد

  4. والله قلبي وجعني .. لي 31 سنة برة السودان .. يعني مافي أمل نرجع السودان !! ..أمنا الحكومة بي جاي .. وأبونا الفساد بي جاي ..و أبو العيال الله يرحمو رحل .. والأغتراب بقى كرت حرقان .. طيب يا أهلنا الحنان نمشي وين ..؟؟

  5. سلامات ..

    إنت يالفساد عميان ولا شنو ؟؟ مالك ومال البهدله و الحر و الغبار .. قوم شوف ليك حته تانيه جوها بااارد و شجرها كتير و خزينة الدوله عندها مابتقفل من كترة الضحاكات .. ياعمك خليك مفتح و امشي محل ساقطه ومحل الناس الحلوين و مرطبين .. ماتخليني اشك في ذكاءك .. زول قدامو نمره (2) يمشي برااااهو يسكن زقلونا ؟؟؟ هسي عليك الله هيفاء وهبي ولا عشه كركار ؟؟

    كسره : انا يادووووب فهمتا قصة الوحده الجاذبه … تراها بيننا و بين الفساد

  6. يا بروف .. زولنا دا ما تخليهو يبقى صاحبك .. الليلة يرد عليك .. بكرة يجندك .. بعد بكرة نلقاك سايق لاندكروزر .. !! ياكا الباقي لينا في وطن أخونا الفساد دا .. فما تفرط .. والبقظة مهمة في التعامل مع هذا النوع من البشر .. ياما ناس كانوا وكانو .. لاقاهم صاحبك دا .. أقنعهم إنها (هي لله) .. فنصيحتي أعمل حسابك .. وما تخاف زولك دا بنلحقو ليك القذافي قريييييب إن شاء الله !!!

  7. و و الله يا استاذ الفاتح ربنا يديك الصحة و العافية و يبعد عنك الشر و الشرور

    و انحن الحمدلله عائشين في نعيم و فضل سنة و سنتين و نعمل المكوك الفضائي بتاعنا ( السودان -1 )

    عشان نعمل جولات في القمر و كده
    و الناس الواطة ديل خلاص شبعوا انقاذ لحد ما ريقهم كمل .

  8. بسم الله الرحمن الرحيم ( ظهر الفساد في البر و البحر بما كسبت ايدي الناس)

  9. تتعقيبا للاخت فتحية الفكي انتي قلت 31 سنة و انا اقول نحنا يا دوووب لينا 22 سنة مغترين داخل البلد
    و لسع ما سمعنا و لا شفنا حاجة و بصراحة و لا عاوزين نشوف و لا نسمع

    و اتمني ان غربتك ما تطول

  10. تاااااااااااااااااااااااااااني ياسهيل, البروف يقد يقنع ود الخلا تتطلع ليهو انت, والله هولاء العملوا في خلق الله يمحن ابليس ذاااتو

  11. اهلي ازيكم تاني, والله قريت لي بوست, وحبيت تشاركوني قرايتو

    مدخل نتشة :

    طالعنا بالصحف الصادرة بتاريخ امس خبر مفاده ان اكثر من 50 % من شركات الادوية احجمت عن الاستيراد وذلك بسبب ارتفاع سعر الدولار , وعدم ثباته , ولجوء الكثير من الشركات الى السوق الاسود لشراء العملة واستيراد الادوية , فيما عرضت اكثر من 300 صيدلية للبيع بسبب المنصرفات العالية وعدم تغطية الفوائد لها , وهذا يعني ان البلاد بعد ان انعطفت اقتصاديا منعطفات خطيرة عدة , ها هي تسعى سعيا حثيثا الى الــ ( توج ) , لتردي من لم يمت بالجوع مرضا وعياءا !

    نتشة اولى :
    وبعد ان يقل عدد المستوردين , بالاضافة الى عدد الصيدليات , تحدث الكارثة الصحية ! ارتفاع الاسعار بنسبة قد تفوق الـ 100 % كما يقول الخبراء , ليموت من بقى من الشعب تحت مسمى ( شغب ) وفوضى الاسعار ! وبالطبع صحة المواطن ليست ضمن الاولويات , لذلك ستطول الازمة , ويطول العذاب , وستظهر ادوية ( بئر السلّم ) كما يقال في مصر , وهي ادوية ( مضروبة ) تكون تقليدا للأصل ! يعني عادي تشتري بندول شراب ويكون محلو بزيانوس !
    * تعال يا اخينا انتا بتشتري شنو ؟
    * بنبدل فتايل الادوية الفاضية !
    * اتو زمان كنتو بتبدلو قززات الريحة , بقيتو في الادوية كمان ! خلاص انا عندي كم فتيل كده بتاع اموكلان !
    * اموكلان كم جررام ؟
    * بتفرق في السعر يعني ؟
    * طبعن اكيد , كل ما زادت جراماتو زادت سعراتو , اقصد سعرو !!

    نتشة تانية :

    ولأن محتكري الدواء من ذوي السلطة والمال سيقوموا بمحاربة الدواء المضروب , والغير اصلي , والذي يأتي بطريقة غير شرعية ( تهريب وكده ) , وذلك بتشجيع حملات مكافحة السلع الفاسدة , وتشديد الرقابة على ( بير السلّم ) …

    * والله الصداع ده حيشلّني عديييييل كده !

    * هاك كباية الشاي دي .
    * شاي شنو , والله اكان لقيت لي حبتين بندول كده ..
    بندول شنو , اسكت اسكت هسسسسسس , انتا داير تودينا في داهية ؟*
    * ليه في شنو ؟
    * انتا ما عارف انو البندول بقى ممنوع ؟ وبتباع تحت تحت !
    * تحت تحت كيف يعني ؟
    * يازول قالوا ليك الادوية بقت غالية نار , هسي الحكومة بقت محتكراها , وبقولوا ما بدوها الا لناسهم ! هسي ( اب تفّة ) بقى ببيع ادوية بدل البنقو , والموضوع راشح معاهو ! بس الايامات دي مكافحة الادوية مقاصدنو شوية كده !
    * شاهيك ده قتا لي بي هبهان ولا نعناع ؟

    نتشة تالتة :

    وقد تنشط اسواق العلاجات البلدية , و وتزداد نسبة مبيعاتها ( لمهدودي ) الدخل , فتسطع اسماء بعض الزيوت المنتقاة من اندر الاعشاب الطبية والغير طبية , وأهو أكان ما نفعك ما بضرك !
    اعلانات :
    زيت خابور لعلاج الرطوبة والقاود والملاريا والازما وينصح به الخبراء في علاج البشرة الحساسه , واذا اتصلت الان تحصل مجانا على زيت نخاع عضم النملة , والذي اثبتت التجارب فعاليته في القضاء على حب الشباب والخرف المبكر !

    نتشة اخيرة :
    مقاطعة
    يا ناس حمماية المستهلك , بعد نجاح حملة مقاطعة اللحوم , رايكم شنو نقاطع الادوية كمان ؟

  12. لقد ألجمت أخي / سهيل من يتمطون على قارعة البروف..وجميهم يبكون وما عارفين الميت منو ..وكانت آية القرآن الحكيم في ختامها درس للكل,حتى أنا إن إتكأت وفردت أجنحة يدي مثل هذا البروف الذي يبيع لنا حروف الموية في حارة سقاية الملايين ,يقول علماء النفس,أنهم يعرفون أن مريضهم قد تعافى من خلال ردة فعله على مراحل علاجه..لهذا لو كانت حروف البروف تؤتي أكلها ,أو كانت تقض مضاجع من تتوسدهم حروفه,لإستند على حائط السجن الذي نردد مع ورديانه إنكسر,فبنوه من كسروه قادة الاحزاب الذين يتشدقون بمعارضتهم وهم خارج الحكومة, وماذا فعلوا هم حينها.الصادق المهدي بعد ثورة ابريل كان أول قرار يتخذه ان إستلم مبلغ برره أنها تعويض آل المهدي للتعديات من سلطة نميري على حقوق أهله.ويجيء البروف في أخرة المطاف يدق أيضاً على النعش الذي أصبح شاورمة بعد [لواكة] أبو كلام و[مساسقة] في دخول الحكومة القادمة او من عدمه..وبالعربي البسيط أخي سهيل حريقة في الكُل.لأنهم جميعاً مصادر فساد سوى المعارضة,أو الحكومة..عيد سعيد اخي سهيل.زوإن شاء الله الخرفان رخصت عندكم وتشتري لأولادك خروف يهز ويرّز…مع تحياتي .وإنت يا بروف ما تزيد وجعنا فيك زي ما إتنفخنا من وجع الحكومة والمعارضة وصحبتهم الطويلة لمحاورك السيد[ الفساد]. ولعلك تلعق من سنامه وما كان حديث أحد أصدقائي عندما تحدثت عن إحدى مقالاتك [ كتاتباته تشابه برنامج الكرسي الساخن لاحمد البلال الطيب] أيام نميري وكانت رؤية منصور خالد لنميري بقيام هذا البرنامج لسحب البساط من الشارع السوداني وتنفيسه] .وكل عام وأنت بخير.

  13. الأخ الحبوب مجاهد : يازول انا ما جبت حاجه من عندي .. دا كلام الله .. “وذكر فإن الذكرى تنفع المؤمنين “..

    الاخ حمد النيل : شكرآ على التعقيب .. وكنت اتمنى ان تدلي برأيك دون المساس بأحد .. فالكل هنا يكتب و يداخل ولكن بإحترام .. نحن هنا ضيوف البروف في داره القمردينه ولا يصح ان نسمع صاحب الدار مثل هذا الكلام ونحن نتكيء على اريكة داره و ننهل من كرمه .. يكفي انه سمح لنا بالتداخل دون ان يشطب حرفآ مما كتبت و لم يكن حديثك عنه بالخير .. الرجاء إلتزام الموضوعيه و احترام المدونين و النأي عن التجريح و إحترام صاحب الدار ..

  14. صدق الله العظيم, عزيزي سهيل اظن مافي اتنين بختلفوا انوا العملوه مدعي الاسلام اصحاب المشروع الحضاري في الدنيا دي من نهب وخلافو أكبر تصديق للآية بالحاصل علي السودان هسه دي من ضيق الحال والغلاء والحروب وكده, وعشان مانبقي سلبيين نحن ما ننسي انه سبحانه وتعالي برضو قال : بسم الله الرحمن الرحيم ( إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ), وياريت التغيير دا يبدأ من فووووووق, او اذا تغييير دي حاره شوية خليها بس تبقي اصلاح او انصلاح, والسلام

  15. اهااااا .. وتيب !!
    التغيير ذاتو يامجاهد خشم بيوت .. تغير رايك .. تغير هدومك .. تغير عربيتك .. تغير حكومتك وذلك اضعف الإيمان

    يا مجاهد .. نبدأ التغيير من فوق من القاعده مافارقه .. بس يحصل تغيير و ياحبذا تغيير (شامل) .. اهلنا زمان قالو ( المحرش مابكاتل) يعني عشان ما نبقى ” محرشين” اخير تجي مننا و نبدا من انفسنا .. واالله اعلم

    كسره : إتوضيتو ؟؟؟

  16. حاج أحمد السلاوى | رد

    الأخ حمدالنيل .أولاً مرحباً بك معلقاً ومتداخلاً لكن الملاحظ إنو لا عاجبك العجب ..ولا الصيام فى رجب ..
    وفى هذه العجالة ..لا أدافع عن البروف الفاتح فهو اقدر منى فى الدفاع نفسه والرد عليك ولكنى اقول ليك كل يعمل حسب إستطاعته فالبروف يحمل قلمه الساخر ( منذ سنوات طويلة ) فى النقد البناء وفى أشياء تهم المواطن السودانى البسيط ..وقد إستجاب بعضاً من المسئولين لما يكتب ..وعلى المرء أن يسعى وليس عليه إدراك النجاح ..
    فماذا فعلت أنت تجاه السلبيات التى تراها وتعيشها وأنت تلعن فى الحكومة والمعارضة ؟وبكلمات أخرى ما ذا تريد أصلاً ؟؟
    ثانياً ..لا أرى أدنى علاقة بما يكتبه ويقوم به البروف فى المنتديات الإسفيرية والصحف اليومية والسبوعية وبرنامج الكرسى الساخن للأستاذ ألصحفى أحمد البلال الطيب ..
    مرة أخرى مرحباً بك نيابة عن الإخوة فى منتدى ساخر سبيل متنمين لك طيب الإقامة والتواصل .

  17. الاخوة الكرام و البروف

    كلنا بنادي بالتغيير و دة كلو كلام ساكت هسي اي واحد يطلع الشارع و يلعلع زي ما عايز مافي زوووول يقول ليك عينك في راسك الحكومة اطمأنت انو الكلام لا بودي و لا يجيب و كمان بخلونا ننفس عن نفسنا بدلالة موقع البروف الما مخلي ليهم جنبة ينومو عليها و ها دا ليهو حر طليق اذا الكلام ولو بعد 100 سنة ما حايجيب و ربنا قال(انك لا تسمع الصم) صدق الله العظيم لكن لو عايزين تغيير لازم يكون بالحراك و التحرك و العزيمة و التضحية والا الراي شنو؟

  18. بشار أحمد بشار(إبن برد) | رد

    وله يا سلولو يسعل منك الخير. العودة الطوعية الجابتني راجع في المغيرب أسبابها الوحدة (الجازبه).
    يا بروف ياخي الفساد ده ما عصرت عليهو شديد خلاس إت ماك عارف أهلو مدلعنو كيفن وما برضو فيهوهبة النسيم العليل؟؟؟؟

  19. الفساد ده الظاهر قانص ومطلع لسانو بره زى كلب الحر و منتظر نتائج إتفاقيات التنقيب عن الذهب عشان يركض عليها بعد لحس أموال البترول كلها ………

  20. القطعني منكم اليومين دويل كت قاطع إرسال بستقبل فقط لكين جات سليمة وما ركبت الزلط !!!!!!!!!!!!
    وجدت عمدة مدينة استكهولم السويدية، وهي سياسية مرموقة ورئيسة حزب وعضو برلمان أيضا، نفسها وسط عاصفة انتقادات وغضب شعبي بسبب اتهامها بالفساد الإداري والمالي.. أما الفعل ” المشين” الذي سلمها لهذا المصير فهو أنها تجرأت، وتجاسرت وملأت خزان وقود سيارتها بكوبونات حكومية..!! بالطبع انتفضت الصحافة الحرة لتسأل: إن كان عمدة المدينة تملأ سيارتها ” الخاصة” بمال عام.. فما شيمة باقي موظفيها إن كانت هي ” بالكوبونات العامة ” ضاربةً ومتلاعبة !! قالت لهم مستعطفةً ” اكتشفت أني نسيت محفظتي، يرضيكم أروح بيتي سرياً على الأقدام ؟” ولكن حجتها لم تقنعهم بل زادتهم سخطاً مؤكدين بأنه كان لزاماً عليها أن تركن سيارتها وتستخدم ” النقل العام” في موقف كهذا عوضاً عن أن تخون الأمانة وتهتك القانون وهي إحدى حماته .. ولم يتوقف الأمر عند التقريع والفضيحة.. بل أجبرت على الاستقالة من موقعها كعمدة، وأقصيت عن موقعها الحزبي.. ورجمت من قبل برامج النميمة على مدار شهر كما ما ما تسبب في إعدام حياتها السياسية للأبد !! بالطبع صاحبتنا ليست أولى ضحايا سياط ملاحقة الفساد والفسّدة ، فقبل عام ونصف العام أضطر وزير الصحة الفنلندي أن يقدم استقالته إثر فضيحة مدوية بعد أن أُميط اللثام عن أنه كالم حبيبته 3 مكالمات دولية ” مره وحده” على نفقة الدولة أثناء رحلة عمل..!! بالطبع جزئية أنها حبيبته أو جدته لم تثرهم بل استشاط الرأي العام غضباً لأنه استغل منصبة الوزاري لإجراء مكالمة من جيوب دافعي الضرائب، وانتهى مستقبل هذا ” الحرامي الفاسد ” بعيد تلك الواقعة وكان سيقدم للقضاء أيضا لولا أنه.. دفع قيمة المكالمات بالطبع لو كنت أعرف رقم محمول العمدة ” المخلوعة” أو الوزير “المصلوب” لكنت هاتفتهما ودعوتهما للعمل في عندنا .. حيث يعتبر الهاتف جزءاً من امتيازات المهنة، ولهم أن يستخدموه لمهاتفه أسمرة ( وانتو عارفين ليه أسمرة أخير ده حبيبته يعني فيها عرس وكدة ) أو السعودية أو ماليزيا ( وبرو ماليزا دي تحتا نقطين ) ، وبإمكانهم استخدام بطاقات الوقود لملأ سياراتهم، بل وسيارات العائلة والجيران أيضاً.. وليست موارد الإدارة هي كل ما يستطيعون الاستفادة منه بل بإمكانهم استخدام الموظفين أيضاً لقضاء حوائجهم الخاصة : توصيل الأولاد .. شراء السمك والخرفان .. شراء تذاكر الطيران.. الخ ولن تثار حولهم الزوابع بل ولن يستهجن أحد تصرفاتهم أو يسعى لتحجيمها..!
    ولهم أيضاً ، في ظل منظومة الفساد الفاشلة ، أن يدخلوا المناقصات بأسماء عوائلهم وبسعر عال ويظفروا بها.. ولهم أن يبيع لأنفسهم مقتنيات الإدارة من أجهزة ومعدات بسعر رمزي ولو وجدت فضيلة العمدة الاسكتلندية أو سعادة الوزير الفنلندي الوضع مؤتيا وشجعهم المناخ العام على نهل الملايين فعليهم أن لا يخشوا ويلاً ولا ثبورا.. فأقصى ما قد يحصل لهم بعد كشفهم هو مطالبتهم بتولي وزارة أخرى يعني لو اتهموهو فيى سقوط عمارة كاملة يطلع علينا في التلفاز ويقول : والله الأخ الرأيس قالي : ( يازول ما تهمك الأقاويل المغرضة المهم إني عارفك كويس ) ولن تحرك ضدهم قضية ولن يُسمح لوسائل الإعلام أن ترفع عقيرتها للتشهير بهم ، بل.. ولن يطالبوا بإرجاع ما ” لهفوه” من منطلق ” عفا الله عن ما سلف” و” المسامح كريم “..فقلعة الفساد لدينا متينة ورابضة على قلوب الشعب بإصرار وعناد.. ولو حركنا ساكناً يقولو ليك : الزارعنا غير الله اليجي يقلعنا أو لحسة كوعك أو أنحنا رجال مهيرة وووووووو

  21. حاج أحمد السلاوى | رد

    الأخ محمد عمر وبقية صفوة الأخيار الكرام ..
    نرجع ونقول إنو الفساد المستشرى عندنا مرده إلى عدم تفعيل القانون كما هو الحال عند الغربيين ودول العالم المتحضر ( يبدو إنهم طيقوا المشروع الحضارى بدرى شوية قبل 89) فعندنا تدخل الأجاويد والواسطات وإستراحة المحارب وسياسة عفا الله عما سلف وتغير مجرى القضية وإن كانت واضحة مية المية ..والمقولة الشهيرة ماثلة امامنا : من أمن العقوبة أساء الأدب ( وبرطع زى ما عاوز .. ودى من عندياتى أنا ) فيجب علينا تطبيق القانون على الكبير قبل الصغير ونبدأ فى أمازونيا العظمى بقانون من اين لك هذا ؟؟؟ أما غير ذلك فعلى السودان السلام ..

  22. محمد عمر
    اسف اذا قلت ليك انت بتحلم ,,, ما براك كل القمردينه
    كسرة : عارفين ليه لان لايغير الله ما بقوم حتى يغيروا ما بانفسهم
    ونحن يانا نحن مبطلين الصلاه فى الجامع ونايمين عن صلاه الصبح وماكلين الرشوة او دافعنها وشاربين الخمرة او بايعنها والبنقو وما ادراك والحفالت خليها ساكت
    كلنا كلنا كلنا ,,, من قال هلك الناس فهو اهلكهم
    والله الناس فيها خير ياريت نرجع لى ربنا ونتوب ونغير انفسنا واهلنا
    ان شاء الله كل شئ بيتغيـــــــــــــــــــــــــــــــــر

  23. شرقاوي أحمد عثمان | رد

    (النفخ في قربة مقدودة سبب رئيسي في إنفجار الشريان الأورطي) والله دي إتقطعت فيها عديل يا استاذ.. ربنا يحفظك لينا ويحفظ شريانك الاورطي لزمن جاي ومناخ ديمقراطي تقول فيهو:( أوف) ساي تطير الفساد لبلاد الواق واق.

  24. حاج أحمد السلاوى و ابو ايه -اشرف
    هل هنالك مأوى للمصلحين أو فرصة ؟
    اثنان وعشرن عاما و الحديث يطول عن فساد الرأس فماذا عن باقي الجسم و الذيل ؟ هل كان صحيحا معافى ، و لا تقل لي نظرية اذا فسدت الرأس فسد الذيل ( من باب المسئولية الذاتية ) ليسأل كل منا نفسة الم اكن ايضا فاسدا المدرس الذى لا يخلص في تربية الطلبة اليس فاسدا الموظف الذى لا يقضى حاجة لمواطن الا بالرشوة اليس فاسدا الشرطي الذى يبتز السائق و السائق يرفع الاجرة ولا يراعي ربه في تقدير زمن الراكب والمستشفى الذى لا يقبل مصابا الا بعد الدفع حتى لو مات اليس فاسدا الذى يغلق شارع و يحول مسار السير فيه لأنه يطهر ابنة او يسمي لابنته او لخطوبة او زواج او حتى وفاة اليس فاسدا الشباب المتسكع في الشوارع و على النواصي للقيام بكل الموبقات و لا يرغب بالعمل لأنه يعيش حياة سهلة اليس فاسدا الرموز المفروضة علينا كقدوة حسنة كالمطرب و الراقصة و لاعب الكرة اليسوا فاسدين و نحن عندما كنا نتبعهم و نعلى من شأنهم الم نكن اكثر فسادا و عندما وضعت في ايدينا التكنولوجيا الحديثة من اجهزة محمول زكية و انترنت الم يكن اغلب استخدامنا لها فاسدا ثم ان العبرة أن فساد المحكوم أكثر خطورة وضرراً من فساد الحاكم فهو الاكثر عددا و في هذه الحالة التي لا توجد بها ضوابط اصبح مدمرا ان ما حدث من تجاوزات في البنوك والدواوين الحكومية و التعدي على الأراضي و الممتلكات الخاصة و العامة و الاعراض و السرقات و الترويع و الارهاب و السهولة التي تراق بها الدماء في غرب البلاد وغيرها مخيف و المشكلة الاكبر ان الامور تركت في يد هؤلاء الحكام الفاسدين .. لأنهم شجعوه وجعلوا منه وحشاً كما تفضل الأخ جبرا جزاه الله خيراً .. ويبقى سؤال هل هنالك مأوى للمصلحين أو فرصة ؟

  25. أنا مش منافق ولا أحب النفاق ولكن هذا رأيي فيك ياجبرا !!!!!!!!!!!!!!!!
    أنت تكتب لكي تعبّر عن رأيك ، ولا أعتقد أنك جلست يوماً وأنت تفكر قائلاً : هيا لكي أُضحك الناس ؛ فهم يفتقدون البسمة .. بغرض الكوميديا والإمتاع أو الإبهاج . الهدف هنا محدد ؛ ولا أظن أيضا أنك تتعمّد ذلك أو تصطنعه .. ولكن أظن أنك تكتب كي ما تعبّر عن رأيك فقط أما ما أعتقده – حقيقةً – فيك يا جبرا أنك رائد الأدب الساخر في السودان بل الأوحد وهذا ما أخرجك من سلسلة الأدباء العظام في العالم كالطيب صالح أو نجيب محفوظ أو توفيق الحكيم ، فأنت ياجبرا رجل شجاع وقدوة حقيقية ، ولا أشك لحظةً واحدة في انطفاء النيران المشتعلة حرقةً بداخلك على وطنك وغيرتك على شعبك فأنت تكتب لهم وتكتب وتكتب ونحن نقرأ ونشتعل مثلك فأنت سبب من أسباب الإصلاح القادم لا محالة وجزاك عندالله خير يا بروف كما يحلو للسمار نعتك أنعتك …………………

  26. نفسى افهم كلام (محمد عمر ) دا !!!
    دا تاكيد حاجة بما يشبه حاجة غايتو !!

  27. دا تاكيد حاجة بما يشبه حاجة غايتو ده اكيد انت بتشرب حاجة !! يا يس …….
    طيب أفسر ليك .. حينما قلت الأدب الساخر يخرج من دايرة ناس نجيب محفوظ فده يعني إنو لو أخدا من قصيرها وإتجه إلى الأدب الروائي ليزاحم ملوك الرواية الأدبية في عرش الأدب العالمي – علماً بأن – الأدب الساخر ليس منصفاً لكاتبه بعكس الأدب التقليدي الذي يثرى بصاحبه ، إلا أن له خطره العظيم على الحكومات وتغيير مسارها السياسي .. وكان بالإمكان أن يتجه أخونا الفاتح إلى تلك الطرق السهلة في شق طريقه الروائي والأدبي ليصنع له اسما رناناً وقوياً لكن هل يستطيع أن يؤثر في محمد عمر أو شمباتي أو ودالخلا كما يفعل من منبرة الساخر هذا .. الم يحيي فيك روح الشجاعة ولفت الإنتباه إلى المسئولية والغيرة الوطنية وهذا ما لم نلمسه من طه حسين أو يشعرنا به شكسبير.. نمرة اتنين .. أنه ظل يكتب نقداً ساخراً ضد الظلم والفساد فحورب من الظالمين والمفسدين ونحن عارفين كويس يا يس شمباتي الناس ديل لامن يختو الزول في راسم بيسوليه شنو لكن دي كلها أسباب مقدرها المولى والله من وراء القصد يا عزيزي………………..

  28. حاج أحمد السلاوى | رد

    الأخ محمد عمر ..
    اثنان وعشرن عاما و الحديث يطول عن فساد الرأس فماذا عن باقي الجسم و الذيل ؟ هل كان صحيحا معافى ، و لا تقل لي نظرية اذا فسدت الرأس فسد الذيل ( من باب المسئولية الذاتية ) ليسأل كل منا نفسة الم اكن ايضا فاسدا المدرس الذى لا يخلص في تربية الطلبة اليس فاسدا …..) إلى آخر القائمة التى أوردتها فى مداخلتكم اعلاه .. اقول لك وبالفم المليان لقد عشنا خلال السنوات الأربعين الماضية فى ظل عدة حكومات متعاقبة منها ما كان جيداً ومنها مان سيئاً ( لا أعرف كم هو عمرك المديد .. إن شاء الله ) ولكننا لم نعايش ولم نشاهد ما نراه اليوم من فساد فى كل شىء .. الفساد المقنن.. وأسوأه على الإطلاق الفساد الأخلاقى الذى عم البلاد بطولها وعرضها .. والأسوا من ذلك ان يحدث هذا الفساد فى ظل حكومة ونظام يقول أنه يطبق شرع الله..وأدعوك أن تسأل من هو أكبر منك سناً فى محيط أسرتك أو جيرانك أو معارفك عن حيواتهم قبل أربعين أو ثلاثين عاما كيف كانت وكيف عاشوها ..ولا اقول لك أنه لم يكن هناك فساد ولكنه كان محدوداً جداً لا نكاد نعرفه او نسمع به ..
    (و المشكلة الاكبر ان الامور تركت في يد هؤلاء الحكام الفاسدين .. لأنهم شجعوه وجعلوا منه وحشاً) وها أنت قد قلتها بعضمة لسانك كما يقولون … فلو طبق الحاكم ( السابقون والحاليين ) القانون على الكبار ( المسئولين الكبار من وزراء ومدراء وغيرهم ) لما تجرا الصغار ( المحكومين ) على مجاراتهم وللزم كل فرد مكانه وادى واجبه ….
    نعم هنالك ماوى وفرص للمصلحين وذلك عن طريق تفعيل سلطة القانون على الجميع دون محاباة ويكون الجميع سواسية امام القانون وأن ندع العاطفة وسياسة عفا الله عما سلف جانباً ونحكم العقل لكى نلحق بالركب الذى فاتنا ..
    وتكمن مسئولية الحاكم فى القضاء على فساد الرعية وردعها متى ما رأى أن هنالك فساد والضرب بيد من حديد على المفسدين والفاسدين وبعد ذلك عليه ان يكون هو القدوة الحسنة أولاً.. فكلكم راع ومسئول عن رعيته. أمام الله يوم لا ينفع مال ولا بنون … ولا اريد أن أذكرك بيت الشعر الذى نحفظه جميعاً:
    إن كان رب البين بالدف ضارباً *** فشيمة أهل البيت كلهم الرقص ..

  29. حاج أحمد السلاوى : سكتني !!
    بس انا ما تكلمت عن حكومات سابقه أبداً ولم أشر إلى حكامنا عبر التاريخ الله يغفر ليهم ويرحمهم .. بس أبوي رحمه الله لامن كان عمره 26 كان عندو بيت ومتزوج وجايب ليه قرطة عيال وبيصرف على أخواته واخوانه فيى السبيعينيات وكده !!!!!!!!!!!!!!!!!!!!!!!

  30. سلاوى..
    طيب اذا كان رب البيت راقص!؟؟ اممممممممممممممممممممممممممم..

    محمدعمر..
    تحليلك منطقى …وخليك قريب….

  31. __________________________________________________________________________

    الاخ حمد النيل : شكرآ على التعقيب .. وكنت اتمنى ان تدلي برأيك دون المساس بأحد .. فالكل هنا يكتب و يداخل ولكن بإحترام .. نحن هنا ضيوف البروف في داره القمردينه ولا يصح ان نسمع صاحب الدار مثل هذا الكلام ونحن نتكيء على اريكة داره و ننهل من كرمه .. يكفي انه سمح لنا بالتداخل دون ان يشطب حرفآ مما كتبت و لم يكن حديثك عنه بالخير .. الرجاء إلتزام الموضوعيه و احترام المدونين و النأي عن التجريح و إحترام صاحب الدار ..
    __________________________________________________________________________

    أكتفي بتعقيب إبننا سهيل أعلاه ..أعتقد أن الأخ حمدالنيل يلزمه إعتذار إذا رغب في التواجد في هذا الموقع الذى يلتزم بالموضوعية وآداب التخاطب والحوار !

  32. حاج أحمد السلاوى | رد

    السؤال : طيب اذا كان رب البيت راقص!؟؟ اممممممممممممممممممممممممممم..
    الإجابة : يبقبا أهل البيت هم المطبلاتية ..وما فرقت كتير … أهو كلو مزيكة فى مزيكة ورقص فى رقص ..
    وبعدين يا شنباتى ( أقصد شمباتى ) الرقص دا فن من الفنون التعبيرية والتطبيقية ونجده فى الحفلات الغنائية ..والحملات الدعائية وعلى المسارح وحتى فى حفلات الزار وحلقات الذكر الفى قناة ساهور حيث يرقص الإناث والذكور ..وهو أداة للترويح عن النفس وإنقباضها من ضغط الحياة اليومية .. فمثلاً لو رجعت إنت من العمل بعد يوم شاق وشغلت أى أغنية من أغانى شباب اليومين دول ..وترقص معاها لحد ما روحك تقرب تطلع أو حسب ما يقول المغنى وما تنسى تكون حركاتك متوازنة وظريفة وما جبانة …ولازم تحمد ربك إنك غير متزوج (وغير حلو ) حتى لا يتعلقن بيك العوانس .
    شنباتى .. الله يجازيك ويجازى محنك .. خليتنا سرحنا فى دنيا تانية مع الرقص والراقصين ..ونسيتنا موضوع الفساد وأنا فى رأيى الفساد هو اللى هيأ الجو عشان نسمع زى الغنا دا .
    وخلونا النشوف آخرتا شنو .. !!!

  33. اخي جبرا والاخوه الاعزاء
    الزول نامن يجي متاخر ما يقدر يتابع كل الاخوان وخصوصا العيد على الابواب ومافي زمن للكتابه
    لكن عندي رد بسيط للاخ الجديد حمد النيل (انته عرفته الميت منو سمح عليك الله ادفنو)

  34. السلام عليكم
    ياجماعة الخير لية نحن قنعانين للدرجة دى ,,, ليه ما نسعى للتغير وان شاء الله الحال بينصلح
    رايكم شنو ياعمنا جبرة وباقى السمار نطرح افكار للتغير ونبداء نطبقها
    يعنى مثلا
    1- نتفق لو واحد مننا مشى اى دائرة حكوميه ما يدفع رشوة وما يدفع اكثر من المطلوب
    لانو مرات تمش يقولو ليك الدمغه بى سعر وتلقاها على الورق سعر اقل يعنى على عينك يا تاجر
    2- نلتزم بالقوانين فى الطريق ولو غلطنا ندفع الايصال كامل عشان ما ندى بتاع المرور جزء ويتشجع يختها فى جيبو ,,,, ندفعها كاملة ونستلم الايصال ,, منها نكون اكثر حرص على الانضباط بالقانون ومنها اخوانا فى المرور جزاهم الله خير قروشهم تجيهم على قدر المليم وضعيف النفس بيستعدل
    الافكار ما مشكله ساهلة بس التطبيق وربنا يعين

  35. عزيزي : ابو ايه -اشرف
    انت ما سمعت اللمبي قال شنو للمسجونين ؟ : ترتزم باللوايح والقوانين تبقى صحبي وحبيبي وكفائة ، مترتزمش باللوايح والقوانين حعصرك أطلع منك أطفال أحداث ……………………………

  36. سلاوى..
    اللول اللول سووا ليهو اللول..

  37. يعلن المؤتمر الوطني الحاكم في هذه الأيام عن توجهاته لمحاربة الفساد :
    فليبدأ بقصور آل البشير في كافوري و كوبر ، وملايين وزير الخارجية علي كرتي والشائعات حول امتلاكه لفندق قصر الصداقة بـ(85) مليون دولار ، وشركات المتعافي التي تبدأ بموقف ميدان جاكسون وشركة النفايات وقيل النقل أيضاً. والثروة الحيوانية المتبعثرة في النيل الأبيض وتميد النافعاب بنهر النيل لنافع علي نافع وشركات وأموال السيدة وداد البشير ، وما الذي أوصل الفساد المالي والإداري في عهد الإنقاذ إستشرائه كالمرض السرطاني مما جعل السودان في مقدمة ومصاف الدول التي ينتشر فيها الفساد حسب التقارير العالمية وتقرير منظمة الشفافية الدولية الذي نشر عام 2006م، وقد جاء في المرتية ( 147) من (150) دولة حول العالم ، وقد صرح شيخ المفسدين الأكبر حسن عبد الله الترابي في لقاء جماهيري بشندى: أن الفساد في عهد الإنقاذ فاق معدلات كل الأنظمة السابقة ، مشيراً إلى امتلاك أسرة مسئول (180) بناية متشابهة الألوان ، وامتلاك مسئول آخر لخمس بنايات ( 25 ) قطعة أرض سكنية بأحد الأحياء الراقية بالخرطوم ، ونريد أن نسأل القائمون على حملة محاربة الفساد هذه من رئيس القضاء والمراجع العام والقضاة والمستشارون والقانونيين بوزارة العدل والموظفون بديوان المراجع العام ، وضباط قوات الشعب المسلحة والشرطة والأمن .. الا يوجد قانون لكبار المسئولين ينصص على إقرار الذمة المالية قبل تولى المنصب والتحري عن امواله بعد توليه المنصب ( من أين لك هذا ) ؟ وطبعاً إجابة السؤال اعلاه ستتلخص في ثلاث نقاط :
    1. نحن اكتشفنا حوالي ( … ) مختلس من صغار الموظفين طبعاً في المؤسسات ( ….. ) .
    2. هذا القانون لم يتم العمل به في السودان وسنعالج مشاكل تطبيقه .
    3. قانون الحماية الدستورية يشكل عائقاً أساسياً .
    في الوقت الذي يمثُل فيه رئيس وزراء إسرائيل السابق أمام الشرطة لتحقق معه في قضية رشوة..
    وسلفه شارون جُرجر ابنه من قبل إلى ساحات المحاكم بسبب صفقات مشبوهة..

  38. الاخ محمد عمر اللمبى ما بنفعنا ولو باريناهو ياهو الضيعنا
    نحن دايرين ضميرنا واحساسنا بالمسئوليه ,,, امشى المستشفيات شوف نظرة الناس التعبانه
    امشى ديوان الزكاة شوف المحتاجين وكم الديوان بيديهم ,,, امشى تحت المجارى شوف الامه العايشه تحت تبع منو ومسئوليه منو وليه هم عايشين فى المجارى ,,, امشى دار المايقوما شوف نظرة الاطفال البتقطع القلب ديل جو من وين
    امشى وامشى وامشى وامشى لمن قلبك يقيف ,,,,,
    اخد نفسك وفكر معانا ليييييييييييييييييه ما نغير ولو استمرينا كدا بعد عشرة سنين حا يحصل شنو بس فى الحاجات القلتها ليك فكر فكر فكر ,,, الموضوع ما كتابه وتعليق ياعمنا جبرة ادونا افكاركم ممكن نعمل شنو كمواطنين عشان نصلح بلدنا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: