– متى يعتزل السياسي ؟
– عندما يفتكرو ربنا طبعاً .. شفتو ليكم زول دخل السياسة دى عندنا مرق منها قبل ما روحو تمرق ؟ عندنا سياسيين عمرهم فات التمانين والشئ العجيب وغريب إنهم مما دخلوا السياسة مافي زول فيهم إشتغل ليهو شغلانه .. أنا شخصياً ما عارف فى جوازات سفرهم كاتبين ليهم فى حته المهنة شنو؟ …!!
– متى يعتزل المسئول؟
– عندما يستورد تقاوى فاسدة؟ كضباً كاضب … عندما تنهار العمارات التى أشرف علي بنائها (قريبو) .. طبعن كضباً كاضب .. عندما يفتكر نفسو (بنك) ويقوم يدى ليهو شركة أجنبية (مرابحة) بي كم مليون ريال (سعودى)؟ .. طبعن كضبا كاضب .. عندما يباع خط الطيران المسئول منو وما يتعرف الباعو منو .. طبعا كضباً كاضب .. عندما يقوم ببيع فيز الحجاج في سوق الله أكبر .. (الراس) بي 3 مليون ؟ برضو كضباً كاضب ..عندما يقوم بمنح منظمة وهمية 42000 ألف متر من أراضى مدينة رياضية ؟ أكيد كضباً كاضب .. طيب متين المسئول يعتزل أو يستقيل ؟ (الإجابة) : ما قلنا ليكم لما ربنا يفتكرو !!
– متى يعتزل لاعب الكرة (عندنا طبعن)؟
– عندما يضيع ليهو 1123 هدف منفرد بالمرمى (هو والقون يعنى) .. عندما تدخل مرماهو 123 هدف (لم يحرزها الخصم) .. عندما يقوم بتركيب (طقم) أسنان .. عندما (يهندز) البلينتى … عندما لا تساعده (صلعتو) فى التهديف بالراس … عندما لا يسمع كلام المدرب (عشان أضانو تقلت وكده) ! .. عندما تكثر تمريراته للخصم (عاوز ليهو نضارات) .. عندما يخاطبه الحكم بـ(يا عمو الكبتن) !!
– متى يعتزل المطرب (عندنا طبعن) ؟
– عندما تصبح حباله الصوتية غير صالحة حتى لنشر الغسيل؟ عندما يزوغ من (الطلوع في الحتت العااالية وكده) … عندما يصبح جد لموظف في الدرجة (الرابعة) !!
– متى يعتزل الوالي؟
– عندما يخرج كل سكان ولايته هاتفين وهم يقولون (لله يا محسنين ) .. عندما يجلس كل تلاميذ ولايته فى كراسى (جايبنها من بيوتم) .. عندما يشترك كل تلاميذ ولايته (في كتاب واااحد) .. عندما يترك كا مواطني ولايته العلاج في المستشفيات ويتجهون للعلاج (بالقرأن) .. !
– متى يعتزل المؤتمر الوطني؟
– لمن السودان يبقى (أوضة وبرنده) ؟ … لمن تستلف على المرتب عشان تشتري كيلو لحمة ؟ لمن السودان كلو يكون (عطالي وما لاقين شغل) … لمن السودان كلو يكون (عوانس) وما لاقين (عريس) ! … لمن الدولار يحصل (عشرين جنيه) !!
– متى يعتزل حكم الكرة؟
– عندما يحتسب 3234 هدف غير صحيح .. عندما يقوم بتكسير أكثر من عشرين إستاد (مش هو الجمهور طبعن) .. عندما تؤهله لياقته لإدارة المباراة لمده (ربع ساعة فقط) .. والباقي يديرو من دائرة (السنتر) وكده !
– متى يعتزل رئيس النادى؟
– عندما يقوم بشراء لاعب بملايين الدولارات ويطلع (حنفية) .. عندما لا يحوز ناديه على أي بطولة خارجيه لمده عشرين سنة … عندما يقوم بضرب الحكم (لكمة خطافية) ما يقوم منها إلا بعد ما يرشوهو بالموية ! (طبعن ولا دي ذاااتا ) كما أثبتت التجارب !
– متى يعتزل الوزير ؟
– بعدما يلف الوزارات كوووولها .. بعد ما يزور كل (دول العالم) .. بعد ما يحج ‘الى بيت الله 55 حجة .. بعد ان يشطب العمارة التانية .. بعدما يعرس (عشرة مرات) .. بعد أن ياخد 3 دكتوراة .. بعد أن يكون لديه 32 حشاب بنكى كل حساب (عملتو) براااها .. (الإجابه : راجع متى يعتزل المسئول) !
كسرة :
بصراحة كده لو منتظرين ليكم واحد من الناس الفوق ديل يعتزل (الترابة كالت خشمكم) !!
الفاتح جبرا 
ولد السيد رئيس الجمهورية في 1944م يعني عمره الآن 63 عام والسن المعاشي 60 سنة :
طب واللهِ فكرة نشوفلينا 60 محامي عاطل وما ليقوليهم شغل ليهم 30 – 40 سنة كده يقوم الشعب يوكلم يرفعوا قضية عليهو بأنه لازم ينزل معاش بدل قصة الثورة وكده يعني وكمان باقي الوزرة …………
يا محمد عمر يا أخوي مالك داير تجيب للمحامين ديل الهوا .. دا قال ما بسلما إلا للمسيح .. تقول لي معاش .. لكن ليهو يوم زي يوم الجرز الأكبر .. ربنا يجيبو بالعافية والسلامة.
جبرا العزيز والسمار كل سنة وإنتو طيبين .
الجماعه الفوق ديل يومن دة ننتظروا مكتوفى الايدى ولا عندنا مساهمة فيهو بى تقريبو أو إبعادو .
يعنى أنا أسى مغبون لى من وزير بس أقعد أعاين فيهو كدى نامن الله ياخدو ولا أعمل زى ماقال أخونا ود الخلا وأغير من طباعى وأحب الوزير دة وبى كدة أكون موافق على الكنت بكرهو أم بارح ؟…
نحنا قرينا مقالك بس المكنكشين ديل الله يديهم عيون يشوفوا بيها والله يهديهم من ضرب الطناش الذي اصبح ديدنهم وديدن كل من يمسك له قرن او ضرع ………….ويتناوبون علي القرن والضرع حتي يرضع كل واحد رضعة كاملة ليكونو اخوة في الرضاعة ::::::::
ياخ إنتو حتجيبو للمسعولين ديل جلطه … ليه يعتزلو هم ؟؟ ما نعتزل نحنا ..
لكن يا ابو محمد في الشريعه و الدين قالو خمسه رضعات مشبعات … ما قالو خرطميه
باللهِ قال ما بسلم إلا للمسيح ( دى جديدة دى ) يا أب أحمد
هو السياسي او الوالي او الوزير في زول جابو ما فرض نفسو و ممد كرعيه و شبح ايديه
و الاعتزال او الاستقالة ديل ما درسونا ليهم و لا في الحتانة النموذجية
اللي بيلقي رماد يكيل نفسه و يرسل لينا حبة
السياسى والوزير والوالى ديل كووووووووولهم على قولك ( فئة واحدة ) وفى زول براهو ( فئة ) لكن شايفك ما جبتا سيرتو …ده لو إستقال الباقين ديل بكونوا صعاليك ساى …
بسم الله الرحمن الرحيم
مكتب المحامي السوداني
ت: 001235468 بتاريخ : 10 / 12 / 89-2011م
لدى محكمة العليا . .
مواطن سوداني ( الشاكي )
/ ضد /
عمر حسن احمد البشير
الموضوع / المادة (18ـ ح) سن المعاش قانون الخدمة المدنية
السيد / القاضى الموقر
السلام عليكم ورحمة الله تعالى وبركاته .
نيابةً عن الشاكي ألتمس من سيادتكم قيد عريضة فى مواجهة المشكو أعلاه ، وذلك للآتى :
وصلت سن المشكو اعلاه النصاب المعاشي والمنصوص عليه في الموضوع أعلاه .
وأسباب أخرى نتلوها عليكم فيما يلي :
لم يوفر فرص العمل اللازمة فأنا عاطل بتقدير ممتاز .
مارس علي سياسة الضغط والتجويع منذ طفولتي .
ألقى بي في أدغال الجنوب مابين القتل والأسر وانا ابن 16عام .
أهمل التعليم ورفع الرسوم .
أهمل الصحة فلا علاج إلا بعد دفع الرسوم أو الموت .
لا سكن ولا مأوى ولا عمل .
أهانني وأهان أبي وعمي وجاري أستاذي وأخي باستفزاز عسكرة وجنوده المنحطين .
فرق بيني وبين صديقي بعد أن ذرع بيننا أحقاد العنصرية .
ظلمني حين أعطا حقي لكبار الموظفين في دولته من امتيازات ، ومرابحات مليارية ربوية وقال عليها اسلامية ، ومشاريع زائفة ، لم نرى فيها إلا الفساد والخراب .
أفسد علي مجتمعى بالرشوى والمحسوبية ، والنفاق ، وألجئهم إلى الظلم فيما بينهم و الفساد .
سيدي القاضي كن منصفاً …………..
محمد عمر …دى حسبتها كيف ؟؟؟؟؟
(ولد السيد رئيس الجمهورية في 1944م يعني عمره الآن 63 عام )…
ياخ حسبتك دى غلط ..السيد الرئيس ( ربنا يطول عمره ويديهو الصحة والعافية ) حيكون عمره بعد شهر و18 يوم( فى 1/1/2012) 68 سنة ..يعنى لحد التمانين سنة لسه قدامو 12 سنة ..وإنت طيب ..
أبيت اصلحها عشان عارف في واحد حيصلحني فيها …………..
سلام ياقبيلة،،،
ومالو العلاج بالقرآن ياجبرا؟؟؟؟
ده لو أنتو كوووولكم سبتو أي حاجة في أيدينكم وأتجهتوا نحو ربكم بقلوب صافية ولجأتو فعلا” للعلاج بالقرآن بصدق النية وسلامة التوجه وأخلاص في العمل لتم علاجكم وشفاءكم مما ألم بكم من كل أمراض العصر الحسية والمعنوية، ولأنعتقتم من ذل الحكام ومخازي الساسة والسياسين…
طالع ياجبرا ما يكتب عن الأعجاز العلمي والطبي للقرآن الكريم وشوف الأعجاز الذي فيه عن العلاج الذي تم لأكثر امراض العصر العصية والتي لم تُعرف أسبابها حتي الآن كيف تمت معالجتها عن طريق القرآن!!!!
القرآن شفاء لما في الصدور وتطبيب لنفوس الناس لو أنهم آمنوا وأتقوا، فلا تسخر يا صديقي من آيات الله البينات فأنها تهد الجبال الراسيات،،،،،،
يقول الحق جلا وعلا في محكم التنزيل في الآية (82) من سورة الأسراء (وَنُنَزِّلُ مِنَ الْقُرْآنِ مَا هُوَ شِفَاء وَرَحْمَةٌ لِّلْمُؤْمِنِينَ وَلاَ يَزِيدُ الظَّالِمِينَ إِلاَّ خَسَارًا)
ويقول جل من قائل في الآية 140 من سورة النساء (وَقَدْ نَزَّلَ عَلَيْكُمْ فِي الْكِتَابِ أَنْ إِذَا سَمِعْتُمْ آيَاتِ اللَّهِ يُكْفَرُ بِهَا وَيُسْتَهْزَأُ بِهَا فَلاَ تَقْعُدُواْ مَعَهُمْ حَتَّى يَخُوضُواْ فِي حَدِيثٍ غَيْرِهِ إِنَّكُمْ إِذًا مِّثْلُهُمْ إِنَّ اللَّهَ جَامِعُ الْمُنَافِقِينَ وَالْكَافِرِينَ فِي جَهَنَّمَ جَمِيعًا)
(ربنا لا تؤاخذنا ان نسينا او اخطانا ربنا ولا تحمل علينا اصرا كما حملته على الذين من قبلنا ربنا ولا تحملنا ما لا طاقة لنا به واعف عنا واغفر لنا وارحمنا انت مولانا فانصرنا على القوم الكافرين)
السلام عليكم الاخ ود الخلا
يبدو انك حملت الامور على غير محملها من الاستهزاء بالقران بدليل الايات التى استشهدت بها
لايحق لكائن من كان الاستهزاء ولو بالتعريض وجبرا وبقيه الاخوة من ذلك براء ,, فلو انك قرات المقال بتمعن لفهمت المقصود وانه لاتهتم الدوله بعلاج مواطنيها وهو حق يكفله لها الشرع نفسه ,,, ثم احيانا تذهب الى بعض المشايخ فيدلونك على الطب لان مرضك ليس من اختصاصهم ,,,
فمن حق المواطنين التعليم والعلاج والامن والغذاء وهم مقومات الحياة الكريمه للانسان بدليل حديث الرسول صلى الله عليه وسلم ( من أَصبح منكم معافى في جسده، آمنا في سربه، عنده قُوت يومه فكأنما حيزت له الدنيا).
ثم الشرع يتطلب من ان نحسن الظن بالناس ,,, مع خالص التحايا والتقدير لكتابات وتعليقات اخونا ود الخلا
العزيز جبرا وبقية العقد الفريد
كل سنة وانتو طيبين
اخى ود الخلا
اتفق معك تماما فيما ذكرت ولكن سؤالى ومع احترامى لك هل العلاج بالقرآن يعفى الدولة من مسؤليتها تجاه علاج مواطنيها (والله لو عثرت بغلة فى العراق …………………….)
نتمنى لو كنا بغالاً او حميراً فى زمن الصحابة رضوان الله عليهم
اتمني يتم تحديد صلاحية المسئولين بعمر الستين او اربعة سنوات في المنصب ايهما يأتي اولا
الأخ جنوبى ..قلت شنو ؟
الاخ حاج السلاوي.. قلت نخلص من الاصنام ومن كترة الطلةالبتمسخ خلق الله
ود الخلا تحياتي .. نعم القرآن شفاء ولا شك في ذلك .. معنى ذلك أن نقفل جميع المستشفيات في أمازونيا .. ونفتح مكانها عيادات للعلاج بالقرآن .. ونشوف النتائج .. ما اصلو البلد بقت حقل للتجارب .. لكن يا ريت العلاج ساعتها يكون (مجاني) لأن المستشفيات كانت (إستثمارا) يدر ملايين الجنيهات لخزينة حكومتنا الرشيدة خاصة بعد فراقنا للبترول فراق الطريفي لجملو.
ود الخلا سلم لي على ضل الفيل .. !!
السلام عليكم ، البرف و الاخوان ، الاخ محمد عمر ده هترش ، يفلق ويداوى ، يقترح و ينفذ ، و لا ده ما منو ، قال ليك الرئيس حيستكمل التنميه الاصلها ما بدت ، عشان كده اعملوا حسابكم على 50 سنه جايه ، وكل مده يقول ليك دى اول واحده ، سؤال خبيث خبيث : الريس يا حاج السلاوى لسه نونو دواء السقط ، زول ما عندو شيب لسه عايزو يستقيل بدواعى الكبر ، ما حيعمل شهادة تسنين ، ما قلت ليك نونو …………………عجبى
الأحباء الأعزاء .. كل عام وأنتم بخير
أخونا وحبيبنا ود الخلا .. أنا بقصد إنو ما مكلف وكده ده لو ما جماعات الدجل والشعوذه رفعوا قيمة الجلسه والكشف وفاتو الدكاترة … ودى تكون مصيبة (للمواطن طبعن) !
كسرة :
عطفاً على كلامك ده يا باشمهندس كدى ورينا طيب الطب ده لزومو شنو .. أكان قلتا لينا ما عندو لزوم يكون كلامك في محلو وكمان أكان قلتا شيتن تااانى يكون العبدلله ما قال حاجة غلط .. وللا شنو يا جماعة الخير !!
إنت نسيت ناس الصحافة ليه ؟
كتى يعتزل الصحفي ؟
عندما يبقى وجهه زي ورقة الفلسكاب لانو بقطع كل يوم صفحة من صفخاته.مرة مع السلطة ويوم مع الشعب..ويوم مع مشاكل الشعب ,ويوم مع تبرير للحال المايل ,وينتقد سلوك المواطنين ..يكتب ليهو عمود أسبوعياً وبعد سنة يكون عندو صحيفة, ويقعد زي الاخرس في المؤتمرات ,وتجي اليوم التاني تلقى جريدته من اول صفحة لحدي أخر صفحة عن المؤتمر الذي عقد امسس ..ونص الجريدة صور عن المؤتمر,والنص التاني إعلانات ..
كوكو جزاك الله خير ذكرتني :
أنا نسيت أكتب إنو الهترشة اللى أنا فيها دي سببا النظام بعدين هأكتبا في الإستئناف إن شاء الله
الاخ جبرا و السمار
كل عام و الجميع بالف خير و يعود علينا بالخير و البركة
و القابلة السودان منطقة خالية من الكلزار و الكيزان
انا شخصيا يأيد اقتراح سهيل بأنو نعتزل نحنا و دة الاسهل و الاضمن و حاليا الشعب السوداني كلو في حالة اعتزال و من ابسط الحاجات حتى لو كان حلم بسيط بانك تعيش انسان
عدم الاعتزال هذا دعا الشباب الذين صاروا كهولاً ( تخيل عمرك في 1989م كان ثلاثين سنه ) وانت قيادي في الحزب الحاكم اليوم عمرك ( خمسة وخمسة سنة ) ولي حسع القدامك ما داير يتزحزح من مكانو طيب راجي شنو؟؟؟؟؟
هو الجابو منو عشان يبقى مسئول من حاجة؟ ما قام الصباح بدرررررررري واتشطف وركب ليهو دبابة وجا صنقر في الكرسي… كل العملو كدة قبلو اعتزلو في حالة واحدة ….. لمن الناس طلعت الشارع … الله يورينا اليوم دة
اخى جبرا والاخوه الاعزاء
متى يعتزل تلفزيون السودان والقنوات الفضائيه والارضيه الاغانى
مره علينا العيد ومافى اى جديد غنيه بعده غنيه بعده غنيه وبعده فاصل للاغانى ياخى مرضونا مرض
كسره
بقت البلد دى بلد المليون مغنى (اصلو دايرين نحافظ على المليون )
قال يعتزلو قالو ديل الويكة اخفه منهم
ديل لواااايييييق
ديل كل مانقول شبعو يقولو هل من مزيد
ديل سرطان واصاب الشعب السودانى والكيميائى ماظنية ينفع
ممكن الشعب يعتزل ويمشى يشوف ليهو حتى تانية يعيش فيها
القصة ما اعتزال أو فساد وبس :
الحكاية فيها ضياع قروش ( عال فاضي ) وتوريط ناس محتاجين ومساكين بديون متلتلة .. المرابحات الشهرية المصدقة بمنشور 2011م من بنك السودان والصادرة عن بنكي الخرطوم و الأسرة حوالي 620 مشروع في المتوسط فئة ( المشاريع الصغيرة ) 10,000 جنيه لولاية الخرطوم فقط ليكون حصيلة التمويل الإجمالي 65,000,000 جنيه شهرياً بالجديد طبعاً الصادرة من وزارة المالية وديوان الزكاة فإذا إفترضنا نجاح نسبة 50% من العملاء وهذا مستحيل طبعاً في ظل هذا الغلاء وتلك الديون المعروفة لدا أي مواطن سوداني ( ما عندو عربية ) ، ومجاملات التكافل الإجتماعي السوداني والمسئولية الأسرية هذا ولم نحتسب طيبة المواطن إذا ما وقع تحت أضراس وأنياب تماسيح فقه الماسورة .
طيب هذا وإذا أضفنا إليه باقي الولايات فإن العجز المالي لهذه البنوك سيرتفع على مدار الشهر الواحد إلى 50% من المبلغ أعلاه ما يجعلنا نجزم بأنها راحت هباءً منثورا، ويتحمل وزر ذلك التخطيط الإقتصادي الرديء هذا المواطن المطحون الذي يدفع عوائد ومحلية ومخالفات مرورية وأخرى قضائية وزكاة وعتب وخلافه ، وحلك على ما تُحرك تلك البنوك دعويها القضائية ضد العميل المسكين الذي صرف أموال المرابحة مجاملات وديون ومصاريف للبيت ..
وإذا سألت عن مصادر الدخل الاستثماري يعني مصادر الدولة من غير الضرائب وباقي الرسوم سأسمعك أعجب المهاذل على وجه الأرض وبالمستندات الرسمية كمان .
بعتزلوا وقت كيلو الويكه يصل200دولار
تحياتي لكم جميعا
ماقلنا ليكم ياجماعة الخير الموضوع ده كلو من ندي وما لنا من علاقات طيبة مع ندي زي وزي الشعب السوداني كوووولو ( الموضوع مايجيب ليه مشكلة مع المدام وكدة ) اطالب ندي القلعة بالعدول عن ماهية سائرة عليه …..
البعتزل منو يا حبيبنا الناس دي ضميرهم ما بسمح ليهم يخلو الكراسي لناس ما كفاءات علشان كدة عطلو مسيرة التعليم علشان يكونو هم بس المتعلمين
وعلطو الوعي علشان يكونو هم بس الواعين
وعطلو مصدر الدخل علشان يكونو هم بس مصدر الدخل
فعلا حكومة اسلامية الا يكون اسلام تاني
صدقوني ما كنت ناوي حتى اكتب سطر الا بعد ما اقرا كتابات الفاتح كلها … بس في تعليق فوق زي ما بنقول ” حرقني ” ا وشديد كمان … تتكلموا عن العلاج بالقران وترك الطب … انا عندي فكرة اجمل انو نقفل كلية الطب الخرطوم ونفتح لينا مجمع خلاوي وانا علي البرووووش وما تقروها القروووش لاني شاب مغترب في التلتينات ولي اكتر من 20 سنه ما عارف الم لي شيله من كترت رسل لي فلان وجامل علان هسي شكلها كده ح تقلب ونبدا في رسيل محايات مستورده وديك احمر عندو شامه …. اما موضوع الاعتزال ده يالفاتح اظنو يا خال بعيد بعد نضمي وقريب قرب نجمي “مع اعتذراي” واشوف العالم الفوقاني هيلا هوب وقع تاني وتاني وتاني وجووونا الخواجات طالبين لجوء علاجي عندنا لانو علاجنا اثبت روحانيتو
السلام عليكم الاخ ود الخلا
يبدو انك حملت الامور على غير محملها من الاستهزاء بالقران بدليل الايات التى استشهدت بها
لايحق لكائن من كان الاستهزاء ولو بالتعريض وجبرا وبقيه الاخوة من ذلك براء ,, فلو انك قرات المقال بتمعن لفهمت المقصود وانه لاتهتم الدوله بعلاج مواطنيها وهو حق يكفله لها الشرع نفسه ,,, ثم احيانا تذهب الى بعض المشايخ فيدلونك على الطب لان مرضك ليس من اختصاصهم ,,,
فمن حق المواطنين التعليم والعلاج والامن والغذاء وهم مقومات الحياة الكريمه للانسان بدليل حديث الرسول صلى الله عليه وسلم ( من أَصبح منكم معافى في جسده، آمنا في سربه، عنده قُوت يومه فكأنما حيزت له الدنيا).
ثم الشرع يتطلب من ان نحسن الظن بالناس ,,, مع خالص التحايا والتقدير لكتابات وتعليقات اخونا ود الخلا
صديقي أشرف أبو آية تحياتي،،
كلامك طيّب ومقبول منك ، وطبعا” ومن غير شك أو جدال المطلوب منا أن نُحسن الظن بالآخرين ما دام أنهم يحسنون الظن قولا” أو فعلا”، ولكن ما ظنك بمن يقول (…..عندما يترك كل مواطني ولايته العلاج في المستشفيات ويتجهون للعلاج (بالقرأن) .. !)
والسؤال هو لماذا (القرآن) تحديدا” برغم أمكانياته الهائلة والمعلومة للقاصي والداني بالشفاء والعلاج من كل الأدواء والمصائب والفقر وتغيير الحكام حتي، أليس هو الأصل لعلاج كل ادواء وأمراض البشرية جمعاء ولو لجأت أليه الأُمة صادقة من غير من أو رياء لكان خيرا” لها ولتم لها مُرادها ولما حفيت جموع الشعب الفضل!!!!!!!!!
الا يتعالج بعض الناس بالشعوذة والدجل يا صديقي، الأ يستعين بعضهم بالسحرة والمنجمين والعرافين لمعرفة أمراضهم وتطبيبها؟؟؟ لماذا لا يكون هؤلاء هم المقصودين بذلك؟؟؟؟
ومن تعليق الأخ جبرا اللاحق فهمت أنه يقصد فئات الدجل والمشعوذين وهؤلاء القرآن منهم بُراء برغم أنهم يدعون استخدامه، ولوكان المقصود هؤلاء فلا حرج فالحكومة نفسها قد تتعامل في مثل هكذا أشياء كما سمعنا، ولكن أن يُقحم القرآن أقحاما” في موقع كهذا لاثارة سخرية الناس أو اضحاكهم فهذا ما لا نقبله لأنفسنا ولا حتي لأخينا جبرا، والحديث (أنصر أخيك ظالما” أو مظلوما” ، ومظلوما” معلومة وظالما” بمنعه من الوقوع في الظلم- سواء لنفسه أو ظلمه للآخرين-)..
شكرا” أبو آية-أشرف لك خالص التحايا والتقدير..