من أساسو

رغم توافر الظروف المواتية للخروج من التيارات المنعكسة على منعطفات واقعنا المظلم إلا أن هنالك فرصة للتاقلم على المؤثرات غير المرئية التى تشكل هذا الواقع طالما أن هنالك إختلاف على عدم الإتفاق في كل القضايا ذات الجدوى الحقيقية والتى يمكن بواسطتها التوصل إلى حلول تمنع الإنهيار وتصنع نوعا من المصداقية بين كافة الأطراف ليظل السؤال قائماً كيف يمكننا أن نجعل أمريكا تلم جدادها وأن نعلن رسمياً دنو عذاب روسيا !
وللإجابه علي هذا السؤال ينبغي علينا أن نستصحب معنا كل التجارب التى أدت لزيادة منسوب الفقر الذى لو كان رجلاً لقتل وذلك بالطبع يلزمنا ان نستقرأ التاريخ بحيادية تامة ودون الوقوع في شباك الدغمسة وصولاً إلى الأسباب الحقيقة والفعلية التى أدت لأن نكون مما نحن فيه الآن مستلهمين في ذلك إرادتنا القوية من أجل إصلاح الوضع دون التأثير على مسار المؤامرات الدولية التى تحاك ضدنا بداية بإختفاء الأدوية المنقذه للحياة من ارفف الصيدليات مروراً بفقه السترة ونهاية بتزايد حالات الطلاق لعدم الإنفاق .
بداية يجب أن نبحث عن قوى الطرد المركزي التى تخلفها فلول المرتزقة والعملاء والتى تؤثر على معيارية الأداء الكلي للدولة مقارنة مع أسباب الشد العكسي الداخلي اللا معياري الناتج من ترهل الأوعية السياسية حتى نؤسس لفهم مرحلي يقودنا إلى معرفة حجم القوى المتزامنة التى تجعلنا في هذا الوضع المزري الذى يقضى بأن يستمر الوضع كما هو عليه دون لجؤ المواطن إلى القضاء بعد ان يقوم منتشياً بلحس كوعه .
العبد لله – يحسب- أن المسألة في غاية السهولة فطالما أن هناك تقارب غير متزن لكنه متوافق إلي ابعد حد مع كافة القوى الوطنية فإن إمكانية عودة الأدوية المنقذة للحياة إلى ارفف الصيدليات تحتاج فقط إلى توفر النية الصافية من غير سؤ وكذلك إلى تكاتف جميع التيارات الموجوده في الساحة الخالية إلا من المنصة (وكم كرسي كده) وذلك من أجل فرض هيمنتها من أجل الضغط على بقية العناصر الأخرى التى غادرت الساحة إلى غير رجعة وهى تهتف وتغنى : حبيبى سافر والمنام أبى ليا والعجب حبيبي !
أما عن إشكالية تزايد حالات الطلاق لعدم المقدرة عاى الإنفاق فمعظم العلماء أن الطلاق سبب رئيسى للإصابة بسرطان الأمم الليمفاوية لذلك فالعبدلله يقترح على المسئولين التفرغ من أجل البحث عن حل لهذه المعضلة وترك أعمالهم وشركاتهم الخاصة في ماليزيا ودبي وكوالالامبور فقط عليهم مراعاة فروق الوقت وشعور الآخرين !
أعزائى القراء الكرام : اكاد اسمع تعليقاتكم وانتم تقرأون .. البعض يقول (جبرا ده طلعت ليهو الملاريا تااانى فى راسو وقعد يهضرب) أما البعض الآخر فيعتقد مخطئا (كالعادة) بان هذا من بركات (حسن كابوس) فيقول (والله بتاعت الليله دى شديده جنس شده) .. أما الغالبية فأسمعها تقول الهضربه دى شنو والكلام الما مفهوم ده؟ وهؤلاء أجيبهم بكل بساطه (بس مقالي ده الما مفهوم؟) هسه المفهوم شنو؟ .. أي زول يمسك ليهو أى حاجه في البلد دى ويقول ليا فاهم شنو؟ لو في زول فاهم فيكم حاجه يورينا .. ! أمسك تقرير المراجع العام وورينا فاهم شنو؟ الفساد زاد وللا قل ؟ وما دام الناس متدينة وبتعرف ربنا طيب يزيد ليه؟ الوازع الدينر راح فين؟ في الحالة دى نحنا نفهم أيه؟ بيقولوا ليك في تجاوزات فى واحدة من مستشفيات وزير الصحة .. طيب التحقيق في المسألة ده ح يتم كيف ؟ الوزير ح يقعد في كرسى القاضي شوية .. وفي كرسى المتهم شوية وللا أيه؟ نحنا نفهم ايه؟ يقولو ليك الميرغنى يوافق على المشاركة في الحكومة ! ويعني ايه؟ شارك أو ما شارك .. حد يفهمنا الفرق ايه ؟ قول كل الأحزاب شاركت في الحكومة يعنى ايه ؟ مش كده قول الأحزاب ذاااتا بقت هي الحكومة حد يفهمنا يعنى ح يحصل ايه ؟ قول الحكومة أبت تدخل معاها زول الحكومة برضو يعنى ايه؟

كسرة :
.. ده مش نحنا فقدنا البوصلة .. ده مافيش بوصله من أساسو !!

23 تعليق

  1. العزيز جبرا
    كويس تبقى علينا انت والحكومة
    ما حرام عليك يا راجل
    ولا ما كدا يا شنباتى

  2. اخي جبرا والاخوه الاعزاء
    انا ياجبرا اليلله عنده حاله من ( الاحباط -والدبرسه -والاستياء ء-والقرف- والزهج-والاكتاب)ومااااااااعندى امل نهائى انو البلد دى ينصلح حاله قول لى كيف

  3. تنفع رئيس لواحد من اللجان الفرعية المنبثقة عن إجتماع لجنة المؤتمر الوطنى لبحث قضية المشاركة فى الكفتة آسف المدام نادتنى للغداء …

  4. يا بروف .. والله راجي بتين إنتهي من القراية عشان أقول ليك دا شنو الطربقة البتسوي فيها دي .. لكن قفلتني .. !!
    الغايظني هم بيقولوا في كلامهم دا ودايرين يقنعونا إنو البلد ماشة لقدام .. ومافي أحسن منهم .. لكن دا كان زمان … خلاص هسة دورهم إنكشف .. وطربقتهم دي إلا يقنعو بيها الديك !!

  5. ابو مازن ثرو العزيز جبرا….سلام..
    والله علمتوها ظاااهرة !
    دا احنا غلبانييييييين ومابنقدر على الزى دا..
    لكن يا ابومازن البروف الليلة بقت عليهو قصة : المغيوظ بهمز الحكومة ! كع كرع رع..

  6. السلام عليكم ، البرف و الاخوان ، اصلو الموضوع كان فى مشكله مع الراجل و نص النا س مستعدين لكن البوليص بدا و عمل المهم الناس المستعجلين على الغنى و كلهم كانوا ماشين فى نفس الاتجاه وعند التقاطع انقطع الخيط ، سؤال بخيس : ده من راسو و لا من كراسو ؟ …………. عجبى

  7. كتمت فلما استفحلت حلقاتها كتمت اكتر من الاول
    و العتبة على حال البلد ما الشاعر

  8. اخي شرقاوى …سلام
    هى كتمت بس ( دى ضلمت عدييييل )
    اى شئ فى البلد ماشى مرتفع الا الانسان قيمته فى انخفاض مستمر
    ومن اساسو ما عنده قيمه

  9. سلام ياقبيلة،،،،
    شنو يا أهلنا مقفلنا علي روحكم كدة ومضلمنها زي ده شديد كدة وما عايزين تتفاءلوا بالخير أبدا” أبدا”، دي مصيبة شنو دي الوقعت عليكم دي!!
    كدي أستهدوا بالله وشوفوا نص الكوب الفضل ده فاضي ولا مليان؟؟؟
    قال الشاعر أيليا أبوما ضي يوما” في وصف حال زي حالكم ده : والذي نفسه بغير جمال لا يري في الوجود شيئا” جميلا”
    فتفاءلوا خيرا” تجدوه ، فلا تظلموا أنفسكم وتقنطوا من رحمة الله ، فالحاصل ده من عند أنفسكم فحاسبوا أنفسكم قبل أن تُحاسبوا وبطلوا الشكية الكتيرة دي فالشكية لغير الله مذلة، وما يجيني واحد ويقول ليّا نحن ما لنا وعملنا شنو؟؟؟
    أي واحد فينا يراجع نفسه ويشوف البيهو من العليهو وهل نحن واقفين غلط ولا ماشيين صاح؟؟ وما تقولوا لي عقولنا نصاح!!
    يقول الحق جلا وعلا في كتابه العزيز في سورة الشوري الآية (30) (( وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ ))

  10. اخى ود الخلاء سلامات تحيه واحترام
    اولا-روحنا كانت جميله جمال يوسف
    ثانيا-وكنا متفائلين اخر تفاول
    ثالثا- من شدة سماحتنا وتفاءولنا نطينا من الفرح وكسرنا الكوب
    رابعا-نحن ماقاعدين نشكى نحن بنفضفض عشان مانطرشق
    خامسا- فعلا المصيبه من عند انفسنا لاننا نقول ولا نعمل (طبعا دى واضحه)
    سادسا-نحن واقفين صاح وماشين غلط
    سابعا -لو حكيت ليك الحاصل خايفاك تغير مواقفك (ودفاعك عن فكرك هو العاجبنى فيك )
    واخيرا –ورينا حل

  11. حاج أحمد السلاوى | رد

    البروف الفاتح ..
    سؤال سغيروووووونى كدا ( زى كل مرة ) … هى بوصلة زااااتها يعنى شنو ؟

  12. اخي حاج احمد سلامات
    انته تقول قريت افكارى انا سالت فوق وكنته ناويه اقول كلامك دى
    عندما نعرف البوصله من السهل تحديد الاتجاهات

  13. اختنا الفُضلي بت الشيخ وراق تحيات أكثروأحترام أكبر،،،
    أولا” يوسف عليه السلام كان فيه آيات للسائلين فهو كان محسودا” وأُلقي به في غيابت الجُب وأتباع بثمن بخس وسُجن ظلما” وعدوانا” ولكنه صبر وكان من المحسنين فكافأه رب العزة بالسيادة والريادة فهلا أنتم تصبرون وستجزون بالحسني أن شاء الله
    ثانيا” أن تفاءلتم خيرا” ستجدوه بأذنه تعالي كما ورد عن أبي هريرة رضي الله عنه قال: كان النبي صلى الله عليه وسلم يعجبه الفأل الحسن ويكره الطيرة. وفي رواية: يحب الفال الحسن، لأن التشاؤم سوء ظن بالله تعالى بغير سبب محقق، والتفاؤل حسن ظن به، والمؤمن مأمور بحسن الظن بالله على كل حال.
    رابعا” أيّهذا الشّاكي وما بك داء كيف تغدو اذا غدوت عليلا؟
    خامسا” دي معاك فيها تب وما عندي كلام!!!!
    سادسا” لوكانت الأولي صحيحة كما تقولين فالثانية مترتبة عليها تماما” كدا ولا كدا!!
    سابعا” لا تحكي فالحكاية مدهشة من البداية، وكيف تتوقعون النهاية أذا كنتم واكبين رأسكم بالحالة دي!!
    أما ثالثا” فلم أنساها فهي ما حصلت يوما” أصلا”
    أب أحمد خليك بعيد وأوعك تقول حاجة عارفك شايت علي وين…

  14. أب أحمد أوحاج أحمد ما فرقت معاكم ولا معانا كلكم في الهوي سوي والبيقولوا واحد يا هو رأي التاني ألستم خير من ركب المطايا وأندي العالمين بطون راح!!
    تحياتي للحاضرين والغائبين معا” وبالمناسبة أين أنت يا صديقي طارق أب أحمد؟؟

  15. التمبلللللللللللوووو…

  16. أكتر من كده دايرنا نعمل شنو يا ودالخلا ( نتفائل خير ) :
    هو صحي تفائلوا خيراً تجدوه .. بس أكان كل حاجة بقت بالعكس .. نغير باليد وطبعاً مافي طريقة .. باللسان وهو أخونا جبرا ما مقصر لسانو ماشاء الله زي الـ ( ماف داعي ) .. وبالقلب برضو ما مقصرين ……………………

  17. نحن نتحدث ونسمع بكلام عن التفائل والسعادة , ونسمع ونقرأ ونتحدث بأجمل الكلمات عن الحب , ولكن عندما تملآ الأحزان كل خلايانا، وعندما نتنفسها، ونشربها، ونأكلها وننام عليها ، نتغطى بها نسبةً لغلو الدواء والذي يصلح تلك الخلايا ونسبة للأنفاس الحارة الغاضبة عندما نتذكر عدم قدرتنا على التغيير ، وعندما تشعر بالفقير واليتيم والضعيف الجائع ، وعندما ترى نظرات باهتة لأب يغرق ما بين الخطا والخطر في بيته ولا يستطيع أن يحرك ساكناً لضيق يده عندها ستقف غيوما سوداء حائلاً بيننا وبين كل المبادئ والقيم التي تميز بيننا وبين الدواب ، لا نملك أن نكتب عن شيء آخر لأننا لا نعرف سوى الأحزان ، أنكتب عن السعادة ، الفرح، التفاؤل كلها تصبح ألفاظاً غريبة بالنسبة لنا مفردات من لغة نجهلها ربما تذكرنا أننا كنا نعرفها يوماً
    السعادة يا أحبابي في هذه الأيام أمست شيء هوائي ، أثيري يصعب علينا الامساك بها لكن يسهل أن نتحدث بها كما يسهل انزلاقها من بين أصابعنا ……………………..
    نقضي جميع لحظاتها ممسكين بتلابيبها لئلا تذهب وتتركنا وهذا ما نعيش لأجله ، وهذا ما يشبه التفائل ألا وهو الأمل

  18. يعني يا محمد عمر، يا تشاؤم يا أحباط!!!!!

  19. حاج أحمد السلاوى | رد

    صديقى بن الفلاة .ز
    إنت برااااك شايف الحالة كيف .. يعنى الناس دى كوووووولها ماشة غلط ..وما بتعمل حاجة صاح كلو كلو ؟

  20. من اساسو كل القضايا ذات الجدوي الحقيقية دي انا ما فهمتها ……
    و انا اللي عارفو نحنا ما عندنا قضايا ابدا و كل الامور تمام التمام
    و اذا حدثت قضية او مشكلة فالحل فوري انفصال انفصل – تمرد اتمرد تضرب تنضرب
    تسرق نسرق تفسد نفسد تتزوج نطلق فالعين بالعين و الاضان بالاضان و الشلوت بالبوت
    و انما هناك قضية واحدة استعصي حلها و هي في جهاز المغتربين و ذلك لما يغترب البلد كلو
    البدير شئون الجهاز منو ؟ فانني اقترح استيراد عمالة من بنغلاديش لانها ارخص
    تخريمة : انتو لما الثعلب فات الجاء بعده منو ؟؟ و هل كان في ديلو 6 لفات و نص ام 7 لفات

  21. قال الشاعر أيليا أبوما ضي يوما” في وصف حال زي حالكم ده : والذي نفسه بغير جمال لا يري في الوجود شيئا” جميلا”
    اخي الفاضل ود الخلا
    داك ايليا ابو ماضي و هسع نحنا مع الياء و النون الحاضر
    و نحنا دوما متفائيلين لاننا متمسكين بكلام ربنا الجليل الحليم و سنته رسوله الكريم
    اما ايليا ده ماضي خلاص
    و انت هسع بس لف في شوارع الخرطوم شوف حا تلقي ليك واحد متشائم او مكشر او زعلان
    او ضارب طناش فالناس كلها همة و نشاط و سعي في طلب الرزق و الانتاج و البلد في ايدي ماما امينة

  22. سديقي سلولو
    أنا ماشفت حاجة ولا قلت حاجة، والناس دي كووووولها ياصديقي ماشة صاح لمن غلط زاتو!!!!!!!!!
    نقول ليكم دي طيرة تقولوا لينا غنماية وأن طارت!!!

  23. ود الخلا .. دخلت إسمي بالغلط أظنك لكن جات سليمة ..
    دعوتك الجميلة لينا بالصبر فوق الإبر الواقفين فيها دي دعوة قبلناها .. لكن قول للجماعة البتدافع عنهم إنتو برضو أصبروا … !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: