خرمجة !

تمتلئ العامية السودانية بنعوت كثيرة تشير إلى حالة أشخاص مختلفين بعض هذه النعوت والصفات قد يكون لأصولها نصيب في اللغة العربية الفصحى وبعضها الآخر يبدو أنه صناعة سودانية مية المية أدعوك عزيزى القارئ لتكسير بعض الوقت ونحن ننتظر التشكيلة الحكومية الجديدة بالتعرف إلى بعض هذه الحالات :

مكشكر : وهو الشخص الذى يدعوك إلي الشئ وفي دواخله ألا تفعل ككشكرة الحكومة للأحزاب بالمشاركة (مع إنها مش كشكرة آوى) !
مدستر : وهو الشخص الذى يقوم بأعمال يقال انها بأمر الجن (يعنى مش الدستور)
مهترش : وهو ذلك الشخص الذى يتحدث طوال الوقت في أكثر من موضوع دون أن تفهم منه شيئا وقد كثرت الهترشة مؤخراً على النطاق الرسمى (ما تعرف ليه؟)
مدردح : وهو الشخص الشفت والذى عرك الدنيا وعركته وإجتاز كل دورات وإختبارات (من أين تؤكل الكتف؟)
ملحلح : والشخص الملحلح يختلف عن المدردح في انه يستخدم (دردحتو) في الوصول إلى مبتغاه بأعجل ما تيسر (كم عمارة مع إنو لسه موظف صغير) !
مقرم : يجمع بين مواهب المدردح والملحلح (وده نوع خطير) !
مشاتر : الشخص المشاتر هو صاحب الرأي الأخرق الذى يخالف الجميع (يعنى الناس كووولها تقول يمين هو يقول شمال … شرقي كمان )!
متشوبر : وهو الذى يحاول أن يفعل شيئا لا يستطيع القيام به لأن مؤهلاته دون ذلك بكثير كذلك المعلق الرياضى (عندنا طبعن) الذى قال معلقاً في إحدى المباريات لو أن مدرب البرازيل فعل كذا لكان الفوز من نصيبه !!
مزالف : تقال للشئ غير المطبوق طباقاً واحدا كضلفة الباب المزالفة أى (المفتولة) والباب المزالف غير الباب الموارب إذ أن الأخير مفتوح على إستحياء كالباب الذى دخل منه الميرغني
مدنكل : تقال للشئ المظبط (شكلاً أو موضوعاً) .. عشاء مدنكل .. عرس مدنكل .. سرقة مدنكلة كتلك السرقة ذات العملات الأجنبية التسع
مدنقس : وهى تقال للشخص (الما جايب خبر) أى الداقس !
مقودس : تقال للشخص صاحب الرأس المستطيل تشبيهاً له بالقادوس وهو جزء من أجزاء الساقية
مرخم : تقال للشخص قليل الحركة كثير السكون الذى يعانى من حالة أقرب إلى النعاس والتخدير كحالة بعض الشعوب العربية
مزعمط : تقال للشئ المأكول منه عشوائياً .. ديك مزعمط أى منتف الريش .. راس مزعمط أى ذو حلاقه شينه ، مدينة رياضية مزعمطة ، خريطة مزعمطة أى صارت كما (الشورت)
مكوجن : تقال للشئ الذى تم عمله بصورة تفتقر إلى النظام (ردم ساااكت) بس
ملغوس : الشئ غير الواضح (الما ماشي عديل) والشخص الملغوس هو الذى من غير مبادئ ثابتة كما الأكل الملغوس هو الذى لا يحتوى على قيمة غذائية (لغاويس يعنى) !
مخرمج : أي غير منظم أو منتظم وتم عمله دون تدبر أو ترتيب وإذا أردت أن تعرف الخرمجة على أصولها فأنظر حال عاصمتنا القومية أو أقول ليك حاجة .. أنظر في أى حته محل ما يعجبك
مجوبك : أنظر مخرمج والمعنى واضح .
مكركب : أي قديم وغير متماسك وعربة مكركبة أى قديمة وطائرة مكركبة أى تنزل عجلاتها عند الهبوط يا الله يا الله وإنتا وحظك !
مشلهت : الشخص المشلهت هو شخص ملخبط الأفكار، لديه كثير من الإشكالات (خاصة المادية) التى لا يسعفه الوقت على حلها (يشترك فيها كل أفراد الشعب الفضل) ..
مشتح : هو الشخص الجالس متباعد الأرجل (أنظر جلسة الفنانين في برنامج أغاني وأغاني)
مفشق : انظر مشتح
مكنكش : أى مساك فى الحاجة مسكة قوية (ما عاوز يفرط) ، زى بشار وصالح وكده !
مكرمش : تقال للجلد غير مستوى السطح (هسه بقوا يشدوهو) مما أدى إلى عدم ظهور الكرمشة على أوجه واعناق كثير من المطربين والمطربات والمسئولين والمسئولات في الوطن العربي !
مشيقح : تقال للشئ الذى يتم وضعه بصورة (مزالفة) وغير دوغرية نحو سرير مشيقح ، دولاب مشيقح والمعنى واضح
مكرفس : أى مضغوط الأجزاء في غير تناسق نحو كرفسة قميص راكب إحدى الحافلات (وما يتكرفس ليه مع كرسي النص البدعة ده)

مهلهل : غير مترابط لمزيد من تدبر المعنى يمكنك رؤية دفاعات فرقنا الكروية
محكر : أي جالس محتكر للمجلس (ما بيدي زول فرصة) !
مسنوح : هو الشخص عديم الفائده الذى لا يرجى منه خيرا بل على العكس من ذلك فهو دائما يجلب المصائب
مسخوط : أنظر مسنوح
مدغلب : تقال للخروف القصير السمين (الماكل صاح) أو الشخص القصير السمين (برضو الماكل صاح) !
مبغبغ : أنظر مدغلب
مطرطش : تقال للشخص ذو الأفعال الطايشة غير المتزنة والمنزل المطرطش هو المطلي بطبقة من الأسمنت الخشن (المطابق للمواصفات)
مجهجه : تقال للشئ غير القاطع .. عشاء مجهجه .. خطوبة مجهجهة ، تشكيل حكومى مجهجه .. مشاركة احزاب مجهجهه !

كسرة :
بعد أن قرأ صديقى هذا المقال بعد أن أنتهيت من كتابته رفع رأسه يخاطبني قائلاً :
– وكده …. يا جبان !!

34 تعليق

  1. و كده يا جبان
    بس اعتقد انك نسيت او تناسيت
    بعض المصطلحات السودانية الافرنجية اللاتينية الهندية
    مثل : مدردك و بالنفي ما مدردك
    : متانقذ : و المعني واضح
    : متعكلد و جاية من عكليد

    تخريمة : شجر نيم الخرطوم ايضا تنطبق عليه هذه الصفات

  2. لكن (المقرم) دا خطر علي المجتمع!! خصوصا لو بقا مسؤل مقرم!!
    لأنو لو اصدمتا بيو بقرمك طوالي!!

  3. سلامات يا احلى ناس ..

    مطوفش – يعني طاشي شبكه .. زي ناس كده
    مكعكع – يعني اكل عليه الدهر و شرب – و هو الشخص السجمان .. اقرب للخرده
    مفلس – تقال لمن لا يملك المال ..
    مقشط – انظر مفلس – مع زياده إنو لايحتوي جيبه حتى على ” ابو النوم ”
    مكنب – أي قاعد كنب .. أنظر مقشط و مفلس
    مجنتر – الذي فقد صوابه و اصبح في امس الحاجه لإعادة البرمجه
    مهود : انظر مكنب
    مجقلب – اي الذي تورط و يريد الرجوع في كلامه
    مبطبط – انظر مجقلب
    مخستك – بمعني غير جيد او غير اصلي .. صيني و كده .. مع جواز استخدام المعنى في حالة ” الحفل” او البرنامج ..
    مثلآ ان تقول .. الفنان امبارح كان مخستك .. يعني اخير منو سهر العقارب
    مسلطن – اي صاحب مزاج

  4. سلام ياقبيلة،،،،
    ملبوع : المضروب علي ظهره
    ملهوط: المأكول جانبه وتبقي منه القليل
    ملغوف: المأكول أبتلاعا” دون أن تلوكه أسنان
    كانت تستخدم هذه المترادافات في الماضي كما هو مبين قرين كل منه، ولكنها أصبحت الآن
    من الأفصاحات (Disclosures) المستخدمة في تقرير المراجع العام لبيان حال المال العام في البلد الماعندو وجيع!!!

  5. حاج أحمد السلاوى | رد

    ملقوف .. لمن يتدخل فيما لا يعنيه ويحشر أنفه فى كل شى بدون داعى .
    مطنش.. ودى ما عاوزة شرح ..
    مدستر .. نازلين فيهو أولاد ماما ..
    محمبك .. زعلان عالآخر وقرب يطرشق .

  6. تحياتي يا فرد بقيادة البروف
    نساهم معاكم بالتالي:
    مبوجن: تقال للعمل أو الشيء الذي إبتدأه أحدهم ولم يتمكن من أكماله أو إعادته لوضعه القديم، كحال السودان حين جاءت ثورة الإنقاذ لتنقذه مما كان فيه.
    معولق: الرجل الذي يعتقد إن كل الناس أغبياء ويبدأ في معاملتهم على هذا الأساس .. كوزير البترول مثلاً وشرحه لمصير أسهم شركة سودابت.
    مبستف: الرجل المغلوب في رهان كا يدعي بأنه سينتصر فيه ويشمت فيه الأعداء .. كحال جماعتنا ديل بعد ثورة الجياع القادمة بإذن الله.
    ملكلك: الذي الذي لا يرعوي عن عمل الخطأ أو يمشي عدل بعد العثرة .. كحال شيخ نافع بعد محاضرته الشهيرة في لندن.
    مشرتم: الشيء الذي قطع بغير نظام .. كمثل حال خارطة السودان.
    مفتح: الرجل الذي لا يخفى عليه العاطل من القول أو الفعل .. زي البروف حقنا دا مثلاً … !!

    كسرة بي ملاح:
    مرخرخ: الرجل الذي تنعكس الدعة والترطيب على حركته، فيبدأ في المياعة في الحديث وتقليب الأطراف … كمستجدي النعمة من غير المغضوب عليهم من أنصار النظام.

  7. اخى جبرا والاخوه الاعزاء
    لو ملاحظين كل المصطلحات تبدا بحرف الميم ودا ياهو ذاته الخالينا ( مدبرسين- الماعندهم امل فى الحكومه ولا فى الاحزاب اجمعين

  8. السلام عليكم ، البرف و الاخوان ، كل الاوصاف دى تقع على اللى ما يتسموش ، خصوصا الجداد ( بضم الجيم ) فواحد مدغلب ، التانى مدغمس ، و التالت الحس كوعك ، و الرابع انا ما عنديش يمه ارحمينى ، والخامس جاته لمدة يوم كامل مملحه اباها ، سؤال لابد منه : ياربى كان يوم وصلت لى حسن خليفه الاتبراوى حيكنكش ، ما تقوم علينا بت وراق ………………عجبى

  9. البروف والاحباب..سلام…
    انا طبعا عجبتنى جدا حتة مدستر دى ! لانو البلد دى قايم بيها دستور وريح احمر لمن محمّر ذاتو ! ويا اولاد ماااااااما….
    واضافة لى مرخرخ بتاعت اب احمد دى اضيف:
    ممخمخ: يعنى البسوى الحاجة بيها فهم ومهلة..
    متختخ: انظر مدغلب ومبغبغ..
    ملخلخ: يعنى الما ثابت كويس,,ودا بشبه كرسى الحكام الديكتاتورييين..
    مسخسخ: ودا حال الزول البكون حيلو مييت وعاااجبو الشئ ,,زى المهدى والميرغمنى ! وسى يا بدوى سي…
    مجوعل : ودى جديدة لنج !

  10. مِسقرط : دى ذات خصوصية تقال للشخص الذى طال به الشوق وبقى ما عندو قشة مُرة …
    مِديك: تقال للشخص عديم الشغلة الذى يبحلق فى الفضاء طويلاً بصمت كانه ينتظر ضؤ الشمس ليصيح مثل الديك .
    مفلهم : تقال للشخص الذى يدعى الفهم وخصوصاً فى إمور النحضر والرقى …
    مدوعل : تقال للشخص الشبعان الذى يشبه الدعول وهو ذكر الضأن الصغير ..

  11. الأحباء الأعزاء سلام

    ووالله عاوز أتداخل من الصباح لكن مشاغل الدنيا ما بتخلينا .. أجمل حاجة إنو المقال بيكون فيهو 30 كلمة وإنتو بتجيبو 90 كلمة .. والله انا بستمتع بالتعليقات بصورة ما تتخيلوها … يا جماعة وين الناس التانين ما قاعدين يتداخلوا؟ أين عكرمة أين حنظلة أين كعب بل أين بن أبى الدرداء !

  12. العزيز جبرا
    الاخوة الاعزاء
    دعاااااااااااااااااااااااااء
    اللهم لا تجعلنا من المدسترين ولا المهترشين ولا المشاترين ولا المدسترين ولا الملغوسين ولا المفشقييييين ولا المسقرطين (يا محمود بلال) اللهم اجعلنا من المفتحين ومن المدردحين المقرمين ومن المدغلبين المدوعلين انك سميع عليم
    آآآآآآآآآآآآآآآآآآآآآآآآآآآمين

  13. اخى كوكو سلامااااااااااااااااااااااااات
    انته زقته من كلامى اليوم داك وابيت تصرح او تلمح ولا نفيت ولا اثبته الحكايه شنو

  14. في احد المواقع وجته تعليق لاحد المشاركين وهو يعلق على مشاركة الحزبين الفاشلين ورايت فيها قمة الخرمجه واعجبنى التعليق فاحببت ان تشاركونى

    فاصل من مسرحية وطن يحتضر )

    الممثلين حسب الظهور :-
    1 عقيد ما ضرب طلقة ( عندو مسدس موية )
    2 بطة قرا في دار الحنان ( حليل زمن الحنان يابا )
    3 بعض العامة والدهماء

    صحو الغلمان النواعم من النوم تحت الاسيبلت يونت وبعد السيريلاك ( الغني بالقمح والسكر ) وتغير البامبرز ( طبعا قبلو بدرة اطفال عشان الحرارة ) وبعد ما ملو من البلي استيشن 3 و مشاهدة اسيبس تون قالوا ( بصوت لا يخلو من غنج طفولي حريري ) يابابا داير ابقي وزير ( لو سمحتا ) فرد الاب بعد تفكير عميييق حاضر يا حبيب بابا بس علي شرط تكمل كباية النيدو وانا اكلم ليك الضابط الكان بيشتمنا في 30 يونيو 1989 لما كنتو انتو في لندن في الاجازة ديك

    وفي مشهد موازي ( كأنك بتتفرج في تلفزيون LG البظهر قناتين في نفس الشاشة ) في رسبشن بتاع مستشفي حكومي ( بنكهه المطهرات الممزوجة برحية الحمامات الضرابة ) كان محمد سر الختم الموظف في السكة حديد لمدة ستاشر سنة في مكانِ ما في الشمالية في انتظار خروج الطبيب ( طبيب عمومي ورديتو خلصت قبل تمنية ساعات والمناوب ما جا وليهو شهرين ونص ما صرف ) وخلف محمد زوجتة اسيا والتي ما فتأت تردد ياسيدي الحسن تلحقنا وتنجدنا ذلك ان فلذة كبدها علي ( تيمنا بالسيد الكبير ) قد اصيب بحمى لم يعرف كنهها البعض قال ملاريا والاخر قال تايفويد فادوهو الحقن الزيتية وبعدين الفنسدار فعمل ليو زي فشل كلوي.
    خرج الطبيب وبكل روتينة ممزوجة بلا مبالة ( مردها للفلس والارهاق وعزوبية من شارف علي الاربعين ) البركة فيكم الدوام لله …… عض محمد علي عمتة حتي لا يصرخ ودموعة تنهمر بغزارة و اسيا من خلفة بذهول ليه ياسيدي الحسن …… ليه ياسيدي الحسن فقد كانت قد اودعت صندوق النذور بتاع الختمية غويشة الدهب الوحيدة التي تملكها ( عشان علي ينصح )

    ستار ( دمورية مهترئ )

  15. السلام عليكم ، البرف الاخوان ، بت وراق حبابك عشره ما كشره ، الموضوع انا لا زغته و لا حاجه ، لكن الفلم داك كان قرب للنهايه ، عشان كده المنافسه فى البرنجيه ، يقولك خمسه شوايقه راحوا البحر يتبردو ، قامو قالو نغطس البطلع اول عليه الغدا ، لحد حسه ما ظهر الاول ، سؤال خمير : ياربى ليه عملوها ستاره ما كان احسن البت بتاعت الملاكمه …………. عجبى

  16. الكلمات جميله والتعليقات اجمل بس للاسف تدل على الحاله الصعبه الوصلت ليها البلد
    منبطح : هو الشخص المستلم لاخر حد كاستسلام امنا الحكومه للفساد
    خارم بارم : كلام ليس له معنى كتصريحات بعض الوزراء
    مشوكش : هو الخارج من قصه حب بالفشل الذريع وهذا حال معظم طلابنا للاسف الشديد
    مطوطح : هو الذى ليس الى هؤلا ولا الى هؤلا كحال بعض الاحزاب
    داقس : وااااااااضحه ذى دقسه الحكومه فى نيفاشا

  17. عمنا جبرة نحن بنعرف ود الخلا والشمباتى وبت وراق وكوكو ومازن وحمد عمر وبقيه العقد اللذيذ
    مين حنظله وعكرمه وكعب وأبى الدرداء !
    الليله ياجبرة شكلك تقلت شويه ,,,,, انا قاصد الغدا ما تفهمونا غلط
    تحياتنا للجميع

  18. سلام ياقبيلة،،،
    صديقي أبو آية أشرف، فاهمنك صااااااااح يا صديقي وما تكب الزوووغة ساكت،،،،
    كسرة/
    في صدر الأسلام وقبل تحريم الخمر نهائيا” فقد كان الناس يتعاطونها في غير اوقات الصلاة وذلك بعد أن جاءهم النهي بعدم الأقتراب من الصلاة وهم سُكاري ولهذا النهي قصة طريفة منفصلة ، اما قصتنا هذه فقد قيل ان أحد الصحابة عليهم رضوان الله أجمعين عندما لعبت الخمر برأسه (يعني تقل شوية)، أخذ في النياح والبكاء علي قتلي المشركين في بدر، أين فلان وأين فلان بن علان بل وأين علان الفرتكاني!!!
    فنزلت الآيات البينّات 90- 91 من سورة المائدة ( يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (90) إِنَّمَا يُرِيدُ الشَّيْطَانُ أَن يُوقِعَ بَيْنَكُمُ الْعَدَاوَةَ وَالْبَغْضَاء فِي الْخَمْرِ وَالْمَيْسِرِ وَيَصُدَّكُمْ عَن ذِكْرِ اللَّهِ وَعَنِ الصَّلاةِ فَهَلْ أَنتُم مُّنتَهُونَ (91) )
    فرد الصحابة عليم الرضوان أنتهينا!!!!!!
    والله تعالي أعلم.

  19. السلام عليكم ، البرف الاخوان ، حبابك ابو آيه – اشرف منبطح ذكرتنى بجمله ظريفه على احد الهاى اسات وهى : حقك تديه منبطح تكوسلو بالنطح ، سؤال خبير : حقنا نكوس ليه بكل ما نملك من وسائل ، وينو ؟ …………… عجبى

  20. بشار أحمد بشار(إبن برد) | رد

    لله درك يا بت وراق الليلة برهنت لينا إنك شديدة ولضيضة وكاتبة سيناريوهات من الدرجة الأولي. لك التهنئة والتحية.

  21. pحبيبنا أبو آية .. المقصود أين سنكل اين أبكرون واين د.عزت و أين بشار وباقى العقد الفريد؟ بالمناسبة أين اخونا ودالخلا نحنا منتظرنو بي هناك يجاوب لينا على السؤال !!!

  22. سلام ياقبيلة،،،
    حبيبنا جبرا هل قلت بانك مستنتظرني ياجبرا خلف ذلك البوست الذي بيغادي في ذلك الوادي!! ثكلتك قمردينتك يا أخ العرب، فما لهذا قد جادلتك عن حبة البركة، فلعمرك قد امتشقت حسامي الصمصامة وأمتطيت صهوة فرسي الجكامة وجادلتك بما عندي من معرفة بخصوص هذا الموضوع، فهل اخبروك ناس القمردينة (ديل) وشاية كذبا” عني فصدقتهم أم أنك أفتكرتني بأنني نطاسي بارع أو عطّار لا يشق له غبار يا صديقي، ام انكم تريدون لي ان اتجكن في موضوع لا ناقة لي فيه ولا جمل وله علاقة بالصيدلانيات مباشرة، ومعرفتي بالعلوم الصيدلانية كمعرفتي بالهيروغليفية!!
    لا يا صديقي فسؤالك عن الشيزوفرانيا واخواتها تحتاج لفارس جحجاح بعلوم التطبيب عليم، وانا غير ذلك، فلن اعطي فرصة لناس شمباتي وكوكو وصحبهم ليشمتوا فيّا او لبنت وراق وأخواتها ليزغرّدن، فهذا شعر ليست لدينا له رقبة!!!

  23. جبرا والحبان سلامات ومشتاقين.
    مموسر : وهو المركبنو ماسورة . زى الماسورة الركبوها للسيدين .
    مجلفق. وهو المجهجه .
    ملبوج وهو الدايش.
    مجاوط . وهو الشخص بين شخصين كل يريد أن يقنعه برأيه ..
    وهناك لكثير لا يتسع لشرحها المكان . منها دون شرح .
    مخوزق
    مملس.
    ملحوس .
    مكدود ( لا تكد المكدود ولا تخلى المكدود يكدك )

  24. ههههههههههه
    شكلك تقلت انت يا ود الخلا ,,,, طبعا انا قاصد العشاء قلنا ما تفهموووونا غلط ياناس
    اها ياجبرة ذى الكلام دا بترد عليهو كيف الليله شكلك دقست يا جبرة واتلحست ( دى تخريمه بمناسبه المصطلحات وكدة ) ,,,,
    حبيبنا كوكو حقنا شكلو الا تحصل معجزة ونلم فيهو

  25. ههههههههههاي باللاي يا أبو آية-أشرف دي تلقاها عند الغافل، قلنا ليك فهمناك غلط وطلع كلامك صاح!!!
    يا اخونا الزول دة وبعضمة لسانه قال طبعا” هو قاصد العشا، طيب العشا البتقلو فيهوده لمن يخلي الزول يتكلم برة الشبكة دة يا ناس بيكون (رغيف بي لبن)؟؟؟؟
    كسرة بي سخينة/
    كنا يا أبو آية في شرخ الشباب وميعة الصبا نعمل في مصنع سكر، ونسكن في ميز (مميز) في ذلك الزمان الذهبي (مش بعيد أوي يا حاج أحمد يا سلولو)، وكانت مجموعة المهندسين كلهم تقريبا” في سن متقاربة (دفعات متتابعة من الجامعات)، علي خلق رفيع ودين قويم بفضل الله، من موقع العمل للمسجد ثم للنادي ثم العشاء بالميز (رغيف بي لبن)، ولما كان معظم المهندسين يتأخرون بالنادي في لعب الكوتسينة والضمنة لا يجدون لبن للعشاء، فأتفق جميعهم علي أن يتم أكل اللبن أو شربه في الغداء لأن الغداء يحضره الجميع وبالتالي تكون هنالك عدالة في توزيع اللبن، وتصادف أن تم نقل أحد المهندسين القدامي من مكان آخر وأنضم للعمل بالمصنع وسكن معنا بالميز، فلم يعجبه الحال، واذكر أنه قام بالأتصال بزملائه بموقعه القديم بالتلفون وهو يحادثهم بحسرة عن حاله بين ظهرانينا وهو يقول لمحدثه متحسرا” تصّور ديل بيتغدوا رغيف بي لبن!!!!
    أها يكون مستمعه فهم شنو من هذه المحادثة، واوعاك تقول لي انت زاتك ما فهمت حاجة؟؟
    تقول لي قاصد شنو وما تقل في شنو؟؟؟

  26. ههههههههههههههههههه,,تسلم رقبتك يا باشمهندس..
    طيب من الاول مااااالك !؟

  27. ود البغا (البان جديد) | رد

    كلكم نسيتو “مركلس”: من relax
    يا استاذ جبرا عرفته الجرعة بتاعت ال Schizophrenia عشان انا حرمى عندها الحالة دى وكده.

    بالمناسبة، امات طه بتعنى شنو؟؟؟

  28. ود البغا (البان جديد) | رد

    نسيت اقول ليكم هى من برج الجوزاء (عشان ما تتهمونى ساكت).

    1. ود البغا (البان جديد) | رد

      مادام خرمجة،……كلنا نخرمج!!!

  29. قلتا ليا يا باشمهندس ما عندك في الصيدلة؟ يعنى نحنا عندنا هههههه … يا حيبينا السؤال ما كان عن الصيدلة .. بطل زوغان .. السؤال كان : لو عندك زول عيان بتعالجو بى حبة البركة وللا بتوديهو الدكتور .. خلاص وكت الزوغان كتر بلاش تجاوب .. عفيناك .. بس على ألا تعود لمثلها يا صديق !!

  30. تحياتي
    انت يا الفاتح اخوي بقيت مخستك ولا شنو ؟؟؟؟؟
    نسيت الماسورة المسكونا لينا الجماعة المكنكشين ديل ….

  31. مكوفر – متجوغر – مريوق – متعنطز – متبوبر – مغندل – متورت – مهضرب – مجقلب – مهيص – متيس – مفرنب –
    والباقي تحت العين حيث الرماد أحجار

  32. مالك الحزن… وفي الظلام تغيب الألوان

  33. المكنكشين كتار يابروف ما بشار وصالح براهم الغريبه كراسي الأيام ماليزيه وطوالي بتكسر .

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: