من عمايلكم دي !

نتيجة لتدهور الحال الإقتصاديى فقد قل الإقبال على الزواج ، بل وعزف الكثيرين عنه وزادت نسبة العنوسة بين الشباب مما أفرز كثيرا من الظواهر والأمراض الإجتماعية والتى أصبحت (كمحصلة طبيعية) من أهم وأكبر مهددات الأمن الإجتماعي !
لقد شرع الإسلام الزواج وسعى حثيثا لإزالة كل العقبات والعوائق التي من الممكن ان تقف دونه؛ وذلك لما للزواج من أهمية وقد ثبت الحث عليه، والترغيب به، في القرآن والسنة بشتى الأساليب والمعاني الواضحة (والمعلومة) والتى لا حاجة لذكرها في هذا المقام .
طيب .. الحالة الإقتصادية (المهببة وعارفنها) .. شغل مافي وعارفين ..(عرس مافي) وعارفين .. طيب الكلام في الموضوع ده لزومو شنو؟ أقول ليكم :
بالأمس إتصل بى هاتفياً شاب من قرائي يدعونى لمناسبة عقد قرآنه عقب صلاة الجمعة بأحد المساجد المعروفة .. قلت له (ربنا يتمم على خير يا أبنى .. مبروك ألف مبروك وسوف تجدني إن شاء الله من الحضور) .. توقف الشاب برهة عن الكلام ثم قال لي : بس في حاجه كده عاوز أحكيها ليك يا استاذ .. قلت له تفضل .. قال لي في حزن وأسى .. عارف يا أستاذ ناس المسجد ديل قالوا ليا تدفع رسوع عقد كم ؟ .. قلت له : كم؟ .. أجابنى بصوت مخنوق :
– خمسمية جنيه .. يعنى نص مليون بالقديم !!
– معقولة المسجد يشيل نص مليون فى (العقد؟) !
– ده الحصل يا استاذ ..
– طيب ما تمشى ليك مسجد تاانى !
– مشيت لي مسجد تانى بيشيل تلتمية جنيه لكن لقيتو محجوز قمتا رجعتا لأبو خمسمية ده !
– إنتا متأكد من كلامك ده !
– طبعاً يا استاذ .. عليك الله يا أستاذ أكتب لينا في الموضوع ده !
قلت في له في سري قبل أن يغلق الخط (الأستاذ تطير عيشتو هو يكتب في شنو ولا يخلي شنو)
هذه – يا سادتي- هي المساجد التى من المفترض إن يكون لها دور أساسي في تماسك المجتمع وتقوية الروح الاجتماعية فيه والعمل على حل مشاكله ، هذه هي المساجد التى من المفترض أن تدعو الشباب إلى الزواج وتحببهم فيه وتساعدهم على بلوغه للأسف الشديد المحزن أصابت القائمين عليها حمى (الإستثمار) ! وملئ البطون والكروش بالمال السحت الذى يدخره هؤلاء الشباب (جنية .. جنيه) من مرتباتهم الضعيفة من أجل أن يقيموا نصف دينهم !
نعم يا سادتي .. كما أن على العريس القيام بحجز (صالة أفراح) فقد أصبح عليه أن يقوم بحجز (مسجد أفراح) لإقامة (عقد القرآن) فيه .. هنالك مساجد خمسة نجوم .. مساجد أربعة نجوم وإنت وقدرتك وإستطاعتك !
إذا كان هذا هو الحال فالعبدلله لن يندهش بالطبع إذا تم إنشاء مكتب للتعاقد (مع العرسان) في كل مسجد (ده لو ما حصل) .. فيذهب مثل هذا الشاب مستفسرا للحجز :
– والله أنا عاوز أعمل عقدي يوم الجمعة الجاية بعد الصلاة
– (يمسك بالدفتر) : والله الجمعة الجاية محجوزة عندنا فيها خمسطاشر عقد !
– طيب شوف ليا الجمعة البعدها !
– برضو محجوزة .. لكن البعدها فاضية !
– خلاس ممكن !
– عايزين عقد خدمات متكاملة وللا عادي !
– ما فاهم ممكن تشرح ليا
– لو خدمات متكاملة يعنى ح نوفر ليكم البلح والحلاوة والفشار وتصوير الفديو والساوند سيستم وكمان خدمة (حراسة الاحذية) بالإضافة لفريق أمنى للحماية من النشالين !
– وده بي كم ؟
– إربعة ملايين بس
– طيب كان (عقد عادى) ؟
– العادى بي خمسمية .. والماذون منكم !! نحنا بس مننا المسجد والمكرفون العادى ده
(مواصلا) : إنتا أشتريت جلابية العقد ؟
– لا لسه ليه؟
– عندنا كمان جلاليب عرسان حاجه تمام وعمم توتال أصلي وشالات مطرزة ومراكيب جلد نمر ومراكيب اصلة وعصى أبنوس حاجه تمام وكمان ساعات سويسرية !
تصور عزيزى القارئ كيف أن ورقة لا تستغرق كتابتها (عشر دقائق) تكلف (نص مليون) من الجنيهات !! ويمكن (لمولانا) أن يقوم في يوم واحد بعقد عشر زيجات (يعنى خمسة مليون) !! .. لا أعلم كيف يتم توزيع هذه (الغنيمة) ولكن الذى أعلمه تماماً (إنو الناس دى بتبالغ عدييييييل كده) وهى تقوم بلا أدني خجل او وازع بتفريغ الدين من معانيه السامية هذا الدين الذى يدعو إلى مساعدة الشباب والوقوف إلى جانبهم من أجل تكوين الأسرة المسلمة التى يعز الله بها أمة الإسلام .العبد لله شخصياً لا يستبعد فكرة الإستثمار في المرافق (الدينية) هذه فمن كان المال هدفه في هذه الدنيا الزائلة (ممكن يعمل أى حاجة) ..وإذا صمتت الجهات (المفترض تكون مسئولة) عن مثل هذا العبث قريباً سوف نسمع عن طرح عطاءآت لإدارة (حمامات) االمسجد الفلانى .. فتقوم الشركة التى يقع عليها العطاء بحساب الماء الذى يستهلكه كل مصلي فى الوضؤ فيصبح الوضؤ بالتذاكر مما يضطر معه معظم المواطنين أن يتيمموا صعيدا طاهرا !
أو ربما يصبح الدخول إلى المساجد عن طريق (بطاقة ممغنطة) يتم شحنها بعدد الصلوات التى يستطيع (جيبك) أداؤها ..وعندها ربما تضع البطاقة على الفتحة المخصصة بباب المسجد ليأتيك صوتاً ناعماً ينبهك : عزيزى المصلي رصيدك لا يكفي لأداء هذه الصلاة !

كسرة :
ويقولوا ليك الزواج العرفي ده إنتشر كده ليه؟ ما من عمايلكم دى !

Advertisements

22 تعليق

  1. الله لا كسبهم كرهونا البلد وعايزنا يكرهونا الدين لكن الله غالب ويمهل ولا يهمل الناس صابرينا عليهم وهم كل يوم بمفاجأة جديدة وما بيغلبهم التأليف

  2. والله ياجبرا الناس بتاعه مظاهروحركات كلهم عاوزين يعقدو في مجمع النور وسنهوري ,يعني العريس من بحري والعروس من امدرمان والعقد في سنهوري ..بس دي كيف .. مظاهرفارغه خليهم يدفعوا
    وبعدين احنا بلد راسمالي صح كلووو معروض للبيع و الاستثمار.. يعني مثلا 80 في الميه من الجوامع الحيه تدخل تفك زنقتك بي قروش وكذلك90 في الميه من المستشفيات الحكوميه دا غيربيع اللوازم ناس صابونه وليفه بـــــــــــــــــلامؤاخذه

  3. تحياتى للبروف و الضيوف
    غايتو أنا مستغرب ومندهش من قصه الرسوم دى عشان كده أنا بقترح وضع اسعار للعقودات يعنى سعر عقد العزبات أرخص من البكرات وما عارف عرس البايرات لبعول كبار السن يكون مجانى (الكلام ده بفرح ناس كتتتتتار ) أما زواج راجل المره يعنى الداير يدبل الدفع يكون دبل نص على راجل المره الحلو حلاه ( بعد مايدوه كبعتين فى صنقوره) والنص التانى على خطافه رجال النسوان …. ولا أقول ليكم قوله أحسن الواحد ينتظر موسم التخفيضات يعنى تعقد مثلاً بعد صلاه الضهر فى رمضان و غالباً يعقد ليك عمك خفير الجامع و مع العطشه ديك تناوله الفى النصيب … والله عشنا و شفنا …

  4. والله دا الفضل يا الفتح ياخوي

  5. غيتو ناس سهيل إتخارجوا الباقى الدور على ناس شمباتى
    ربنا يهون و راجعين
    بالمناسبه برضو برنجيه ، شنو ما فى منافسين!!!!!!!!!!!!!!!!!!

  6. لا اله الا الله
    حسبنا الله ونعم الوكيل
    والله تبقى كارثه كارثه كارثه
    نرجو من ادارة الاوقاف التدخل لوقف هذا العبث ,,, بس الخوف انهم يكونو خاتين نسبتهم فى الموضوع

  7. بايرين و البورة ديمة
    و جينا شاقين وسط المقابر
    و لاقونا اتنين عساكر
    و الشيخ انا ليهو شااااااااااااااااكر
    طيب ممكن اخونا ودالخلا يفتي في الموضوع دة باعتيار انو ماسي البلد دي من ما كسبت ايدينا طيب دة دابر حلااااااااااااااااال و سترة و لا الزواج بقى برضو من ماكسبت ايدينا من ذنوب لكن نحسن الظن برضو احتمال الشيوخ عارفين مشاكل الزواج و عايزين يجنبو الشباب دة كلو هو نحن بنعرف احسن من جهابزة الدين ديل رضي الله عنهم وارضاهم ولا كيف يا ود الخلا شوية و حنفوت عدييييييييييييييييييييييل .

  8. السلام عليكم ، البرف و الاخوان ، يقول لك الشايقى مارق من الانادى شبعان مريسه ، النسوان ينادوا فيهو : الشايقى يا الشايقى القمره ما خنقت . وماله ما بتخنق ما كلو من عمايلكن تسرفن المريسي مويه !!! سؤال خمير : وديل حتخنق عليهم الارض كلها ……………. عجبى

  9. بروف الفاتح والسمار الكرام
    سلام و تحيه . . .
    و الله يا الفاتح لو لا إنك عملت المقدمه بتاعت المحادثه مع العريس و الدعوه المقدمه ليك منه لحضور العقد ، لقلت دي واحده من مقترحات جبرا لتعويض ميزانية الدوله عن فاقد دخل البترول.
    و الله مبالغات عديل كدا يا ناس الإنقاذ ، بتجيبو الأفكار دي من وين يا ناس؟

    و بعدين يا الفاتح عنوان المقال دا صدفه طلع كدا و اللا من وحي الحاصل بينا دا من عمايلنا؟

  10. بالله هي الشغلة كده ‏‏¡‏؟ طيب المساجد دي مش كهرببتا و المويه مجان ‏؟انا اقول المساجد دي ماخده مواقع استثمارية ليه ‏؟ يعني نظام خطط مستقبليه وكده ‏.

  11. هوي ياجنوبي القال منو مجان مااااافي مجان مش كان جامع !! .. الكهربا مدعومه نوعا ما والله عندنا جامع حنتوش كده في الحله راس مالومكيفين بنشتري ليهو كهربا قريب 300 جنيه …

    اها دا الحرام زاتو جامع ,,بيت الله ,, يدفعو ليهو كهربا ويمكن مويه ..يمكن ماشبعوا ناس الكهربا ديل؟؟

  12. الأحباء الأعزاء سلام .. والله الكلام ده حاصل والمسجد أبوخمسمية هو مسجد سيده سنهورى أما أبو تلتمية فهو مسجد الشهيد

    كسرة:
    حبيبنا سنكل .. تصدق والله صدفة ساااااااااااى !! قلتا ليا من عمايلنا ههههههه !

  13. زمان كان في مواطنين مؤمنين …………. بنوا مساجد وعملوا ليها دكاكين أوقاف…. ووزير الأوقاف والأئمة والمؤذنين كلهم مرتباتهم من الأوقاف دي ….. وهذا حقهم وحلال عليهم ……… ولكن أن تقوم حكومة آدم سميث بتاعنا بتحويل الرسالة الأساسية للمسجد إلى تجارة ويبنوا في المساجد دكاكين وحاجات يكاد المسجد يضيع وسطها كما ضيعوا رسالته فهذا غريب … ولكنه ليس غريبا على الحكومة التي بلينا بها … فهم يعرفون في المكوس والتجارة ما يعجز عن فهمه إبليس نفسه …. وإذا بدأوا بالعقود فلا شك أنهم سيلحقونها بالصلوات…. ولن نستغرب إذا عملوا صلاة الجمعة بالقروش…. وبالطبع سيقوم محدثي النعمة من أثرياء الإنقاذ بالصلاة في أغلى مسجد … ليس للأجر واثواب وإنما للبوبار وشغل شوفوني

  14. ما تستبعد بعد شوية الحكومة تتدخل عشان ذولى الدخل المحدود وكده …وتعمل جوامع تجارية وأخرى شعبية وثالثة إستثمارية .نحيا ونشوف …

  15. ما تستبعد بعد شوية الحكومة تتدخل عشان ذوى الدخل المحدود وكده …وتعمل جوامع تجارية وأخرى شعبية وثالثة إستثمارية .نحيا ونشوف …

  16. جبرا تي في ‏..‏ البعرفوا انا مصاريف المساجد كانت علي الاوقاف نسع ما بعرف ‏..‏ هاشمو ‏٢‏ في مسجد في الدوحة ام درمان خطوا صندوق تبرعات ما نجح واحد من لجنة المسجد اقترح اقترح يعملوا صلاة الجمعة بي جنيه وواحد تاني اقترح يعملوا اشتراكات للمصلين ‏..‏ ‏

  17. معليش يا استاذ ليه الواحد يعقد في جامع كبير اصلا ممكن تعقد في زاويه وممكن تعقد قدام البيت .
    انا ضد هذا الوضع بالفعل . ولكن كان تسال الزول الدقه ليك ده وتقول ليهو حجزت الفنان بي كم وصالة العرس بي كم .بعدين ممكن تحسن الظن بي ادارة المسجد وتكون القروش دي بتمشي لاعمار المسجد وتتكتب لي الزول في ميزان حسناتو . ونسال الله السلامه

  18. انا ما مصدق !!!!!
    معقولة يكون الانحطاط وصل للدرجة دى !؟ لاااااااااااااااااااااااااااااااااااااا

  19. طارق…
    ابرا من جنس دا !
    وبرنجيتك دا بالليل ولا كيف؟؟الكترااااااابا

  20. الاخ الفاتح والإخوان
    تحياتي الجديد شنو مامن زمان الوضو والحمامات بالقروش الجديد شنو ؟؟؟؟
    اما رسوم العقد بالجامع فهي جديدة وغايتو نحنا العندنا بنات ديل نعمل شنو ؟؟؟؟
    وبالمناسبة الرسوم علي العريس ولا علي العروس ؟؟؟؟
    وانتو الماعارفين ديل بس ساكت تخشو تحضرو ولا شنو ؟؟؟
    اما عن سرقة الاحزية فهي عادي اما ان تدفع لها للحراسة (الورنيش) او تسرق ودي عادي الظاهر عليكم ماعارفين اما بتشيلو جزمكم معاكم او جزمكم قديمة ؟؟؟؟؟
    الله يعدل الحال …:
    كسرة بي ملاح انت يالفاتح مش اتفقنا انو السبب ندي القلعة تاني رجعت في كلامك ولاشنو ؟؟؟؟

  21. االاخ الفاتح والإخوان
    تحياتي الجديد شنو مامن زمان الوضو والحمامات بالقروش الجديد شنو ؟؟؟؟
    اما رسوم العقد بالجامع فهي جديدة وغايتو نحنا العندنا بنات ديل نعمل شنو ؟؟؟؟
    وبالمناسبة الرسوم علي العريس ولا علي العروس ؟؟؟؟
    وانتو الماعارفين ديل بس ساكت تخشو تحضرو ولا شنو ؟؟؟
    اما عن سرقة الاحزية فهي عادي اما ان تدفع لها للحراسة (الورنيش) او تسرق ودي عادي الظاهر عليكم ماعارفين اما بتشيلو جزمكم معاكم او جزمكم قديمة ؟؟؟؟؟
    الله يعدل الحال …:
    كسرة بي ملاح انت يالفاتح مش اتفقنا انو السبب ندي القلعة تاني رجعت في كلامك ولاشنو ؟؟؟؟

  22. هذا زمانك يا مهازل فامرحي والله انا بتوقع البشير يقراء الموقع بتاعك دة كل يوم علشان يعرف لو ما عارف بدل ما يقعد يبكي اقول ليك والله تعبنا كل الناس تتقدم واحنا فى تاخر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: