ما عندنا ليهو رقبة !

ما كنت والله أعتقد بأننا مع ضعفنا وهزالنا و(حالنا المايل) قد دخلنا إلى عالم صناعة الطيران (وما أدراك ما صناعة الطيران) وصرنا ننتج الطائرات (الوااحده دى) بل ونشارك بها في أرقي المحافل الدولية ويكون لنا (جناحا) جنباً إلى جنب أجنحة شركات الطيران العالمية كشركة دي هافيلاند الكندية، والبوينج واللوكهيد الأمريكية و سود أفياسيون الفرنسية !
إلى أن قرأت خبراً يفيد بمشاركتنا بعرض إنتاجنا من (الطائرات) في أحد معارض الطيران العالمية وهو (معرض دبى للطيران) والذى افتتحه الشيخ محمد بن راشد رئيس مجلس وزراء الإمارات حاكم دبي صباح يوم 13 نوفمبر الماضى والذى شاركت فيه 960 شركة من مختلف دول العالم قدمت أحدث ما أنتجته في مجال الصناعات الجوية !
بينى وبينكم فى بداية الأمر لم أصدق الخبر وظننت أنه (نكتة) وطرفة .. فهل لبلد يستورد النـــبـــق الفارسي من ايران والثوم من الصين والبيض من الهند والفول من اثيوبيا والطماطم من الأردن رغم مساحاته الشاسعة وأراضيه الخصبة أن يتجه لصناعة الطائرات ويقوم بعرضها في المحافل الدولية ؟
غير أننى قد توثقت من صحة (الحدث)، فقد شارك السودان كما يقول الخبر بطائرة تدريب (صغيرة) تدعى SAFAT-03 مصنعة كلياً بالسودان واخرى عمودية خفيفة تستخدم لاغراض التدريب تدعى SAFAT-02 تم (تجميعها) في السودان كلتاهما من إنتاج شركة صافات السودانية للطيران !
يبدو يا سادتي الأفاضل أن مسئولينا بعد أن إنتهوا بنجاح من حل مشكلات برامجنا (الأرضية) قد إتجهوا على (الجوية) لذلك فالعبدلله بالطبع لن يفاجأ بإشتراكنا بالمركبة (مبروكة) فى معرض (ناسا) لمركبات الفضاء جنباً إلى جنب مع (ديسكفري) و(لونا) وأبوللو ، فطالما أن مسيرتنا القاصدة قد قصدت (السماء) وواسع (الفضاء) فهى لن تقف أبداً بحول الله وقوته وقريباً إذا إستمر الحال كما هو (ماشى) فلن نفاجأ بمشروع قرار لإنشاء الوكالة القومية للفضاء وأهو برضو فرصة لخلق وظائف دستورية وشبه دستورية جديده يمكنها المساعدة في عملية (ترضية) أحزاب (الفكة) وتمومة الجرتق ، والمساعدة على ترهل (الجسم الحكومى) إذ لابد حينها من إستحداث منصب لمدير الوكالة القومية للفضاء ووزير الفضاء وأيضاً وزير (دولة) للفضاء وأمين ديوان الفضاء ورئيس اللجنة العليا لأبحاث الفضاء وعدد سبعة مستشارين فضاء (مستشار لكل كوكب) ورئيس هيئة مستشارين الفضاء و رئيس اللجنة القومية العليا للفضاء ومدير عام مشروعات الفضاء ومقرر اللجنة العليا للإستراتيجية الفضائية الكونية الشاملة ورئيس المجلس العلمى لجامعة علوم الكون والفضاء و(مفتى فضائي) لتحديد إتجاه القبلة في الفضاء وإثبات هلال رمضان !
ولكم سادتي أن تعلموا بأن المسئول الرفيع الذى رافق الطائرتين (التحفة) قد أعرب (كما يقول الخبر) عن الاعتزاز والفخر بهذه المشاركة السودانية في المعرض، منوها بأنه لولا معرض دبي للطيران ما تمكن السودان من عرض إنتاجه الوطني السوداني كما عبر عن امتنانه للقائمين على تنظيم معرض دبي للطيران الذين سهلوا مهمة مشاركة السوادن في المعرض وعرض تلك الطائرات، حتى يتعرف الاف الزائرين على القدرات التكنولوجية السودانية.
إنتهي الخبر .. ولم تنته حيرة العبدلله ودهشته ! وطفقت أسائل نفسى : ما هى القدرات التكنولوجية (الطيرانية) التى نود أن يتعرف عليها ألاف الزائرين لهذا المعرض العالمى؟ وهاتان الطائرتان يمكن أن تكونا مشروع تخرج لأى طالب هندسة طيران في اى جامعة ، بل يمكن لأى (خواجة) هاوى طيران أن يقوم بتصنيعهما داخل (قراش بيتو) بسهولة ويسر (للتحقق من صدق ما أقول ما عليكم إلا البحث في موقع اليوتيوب على الإنترنت لتجدوا مئات الأشخاص الذين قاموا بتصنيع مثل هذه الطائرات الصغيرة والتحليق بها) !
سألت نفسي فى غباء : ماذا نستفيد من الإشتراك بهكذا طائرات (تدريبية صغيرة) عادية الكفاءة في معرض مخصص لإستعراض آخر ما توصلت إليه تكنولوجيا صناعة الطيران؟ وأين التكنولوجيا فى (تجميع) طائرة (عمودية) صغيرة ؟ يمكن لأى (ميكانيكى طيارات) لو أدوهو (الكاتلوج) وزردية ومفتاح إنجليزي ومفك (نجمة)أن يقوم بتركيب أجزائها؟ بالطبع مثل هذا الحديث الذى أفاد به المسئول (ممكن يقولو لينا نحنا ديل) ولكنه لا يصلح أن يقال فى معرض يضم شركات تقوم بتصنيع طائرات تخترق حاجز الصوت !
إذا سلمنا جدلاً بأننا نود أن نبدأ عصر صناعة الطائرات وهى صناعة مكلفة للحد البعيد وتحتاج إلى مكونات ليس لنا بها قبل ، فهل هذه هى الأولوية في ظل إقتصادنا المتهالك ومناداة وزيرنا للمالية برفع الدعم عن الوقود (وفك الشعب عكس الهواء) ! أوليس الأجدى أن نتجه بل نوجه كل طاقاتنا نحو إعادة تأهيل مشاريعنا الزراعية (البنعرف ليها) بدلا عن إهدار مواردنا (الشحيحة) في مثل هذا التخبط الغريب ومثل هذا الشعر (الما عندنا ليهو رقبة) !
العبدلله بالطبع يغبطه أن تنتج بلاده (طيارات) وأن تكون بلاده لديها مصانع صواريخ بل ومركبات فضائية ،على الأقل نشغل فيها أولادنا الخريجين (الطايرين) ديل .. لكن يحزنه تماماً أن تدار مؤسساته بمثل هذه (الهاشمية) دون التبصر أو التأمل أو الدراسة !
كسرة :
يا جماعة طيارات شنو؟ سراويلنا .. سراااااااويلنا (الواااحده دى) .. بتتصنع في الصين .. يا مثبت العقل والدين … يااااااا رب !

30 تعليق

  1. يا بروف ببســـــــــــــــــــــــــــــــــــــــــــــــطه
    الفكره ((((( ســــــــــافــــــــــــــــــــــات )))))

  2. صباحك خير يابروف نقول حسبنا الله ونعم الوكيل من اثنين وعشرين سنة جات الحكومة بى شعار ناكل من ما نزرع وتلبس من ما نصنع لاشبعنا اكل ولا سترونا حتى بالدمورية وزى ماقلته البركة فى الصين . نحنا ممكن يغشونا بى صافات وسابحات ومباركات لكن كيف يغشوا شركات الطيران العالمية طبعا الجماعة اكيد رجعو لى دولهم وهم بضحكو علينا 0(ياجماعة) اقعدوا فى الواطة دى وحلو مشكلة الزراعة ……….والله يابروف الواحدا حتار يقول الكلام دا لى منو خليهم اول شى ينظفو ريحة التقاوى الفاسدة فى الوزارة وبعدين نتكلم في الحلول والتطور فى الزراعة بالمناسبة فى اختراع جديد فى العالم اسمو (استقالة وزيراخطاء بدون قصد مافاسد ) لوبحسو وعندهم دم ماكان فضل واحد فى حكومتنا وبى صراحة يابروف وكلام بينى وبينك انا كنت داير الحكومة تزيد البترول طبعا فهمت قصدى/ المؤمن لايلدغ من جحر مرتين لالالالا دى مامناسبة نقول ليهم الضاق قرصة الدبيب بخاف من جر الحبل

  3. بيني بينكم انا فرحت بالطيارة السودانية لكن لمن عرفت انو تكلفتا كان ممكن تعمل مشروع صرف صحي لعاصمة الدولة الما فيها صرف صحي او نزرع بيها مشروع الجزيرة و سندس وناكل من ما نزرع لقيتني زول طيارة ساااااكت..سمح ما كان يصنعوا اسبيرات لسودا طير الكل شويه داقة الدلجة دي ‏…غايتو جنس بوبار صناعة طيارة في بلد ما عندها مطار ‏.أجي يا هناي ‏…‏ جبرا ونستبرا

  4. Hi , congratulations , I think next time we will be exbiting on the moon , but our president and his crew , easy question : where is the Sudani cotton ? ………. good God

  5. حاج أحمد السلاوى | رد

    دا كووووولو عرفناهو .. بس عندى سؤال سغيروووووونى كدا ( زى كل مرة ) والشمار كاتلنى بالحيل .. أنا عاوز الطيارتين ديل وصلن دبى كيف ؟؟ طارن ووصلن أرض المعرض ..ولا وصلن شحن ؟
    مجرد سؤال .. محيرنى .

  6. يا جماعة الخير البركة في الإنقاذ الوصلتكم للعالمية .. قبل الطيارات عندنا المركز العالمي لأبحاث الإيمان .. والمنظمة العالمية للمرأة المسلمة .. وجامعة أفريقيا العالمية .. وقيام أخر دولة في العالم (دولة جنوب السودان) وبلد أغلى عقارات في العالم .. وهلم جرا .. يعني الناس ديل ناوين يرفعوكم لمصاف العالمية لكن إنتو ما فيكم فايدة .. هذا زمانك يا مهازل فأمرحي .. صبراً آل أمازونيا فإن موعدكم ميدان جاكسون

  7. يا أهل الله الناس ديل في كل شيء مشاترين، في كل تصرفاتهم وسياساتهم وفي كلامهم وفي أخلاقهم وحتى في الدين دينهم مشاتر ولم ينزل الله به من سلطان والإسلام منهم برأ، لخبطوا كيان الأمة السودانية ومزقوا وحدتها بإنتهاج سياسة فرق تسد، وسفوا وسرقوا قوت كل المواطنين ولم يشبعوا بعد، وبدلاً من إنقاص الإنفاق الحكومي المفرط والإسراف في أمور فارقة ، يريدون زيادة أسعار المحروقات وزيادة الضرائب والمصاب على شعب ماشي على الحديدة، والحديث عن المهازل يطول طول السنين والأيام والدقائق التي قضوها على سدة الحكم، اللهم مالك الملك ولي أمورنا خيارنا ولا تولي أمورنا أدربارنا ، الله كل من أراد بأمتنا شراً فأجعل كيده في نحره، اللهم أرفع عن امة السودان هذا البلاء وأصرفهم بغير رجعة، اللهم أرفع عن امة السودان هذا البلاء وأصرفهم بغير رجعة، اللهم أرفع عن امة السودان هذا البلاء وأصرفهم بغير رجعة أنك سميع عليم، وسلام على المرسلين والحمد لله رب العالمين.

  8. الأحباء الأعزاء .. طرف حبيبنا السلاوى
    عشان تعرف إنهم طاروا لحدت دبي وللا إتشحنوا هاك المواصفات وإنتا براك ح تعرف :

    تعمل طائرة التدريب صافات 03 بمحرك قوته 180 حصانا، وبخزان وقود سعته 150 لترا يمكنها من التحليق لمدى740 كيلومترا، حيث تستطيع التحليق على ارتفاع 510 مترا، وبدرجة تسلق تبلغ 6.2 مترا بالثانية، كما وتستطيع الاقلاع بوزن 1080 كيلوغراما، فيما تبلغ حمولتها القصوى 2000 كيلوغرما، وبعرض جناحين يصلا إلى 9.8 مترا.

    كسرة :
    عليكم الله هسه لو عملو لينا بالقروش دى مصنع أدوية للناس المرضانه دى ما كان أحسن !! لكن نقول شنو !!؟؟

  9. إقتراح مصنع الأدوية مرفوض ، لأنه الدواء بيتاخد بعد الأكل وهو أكل مافي طيب نشرب دواء كيييييييييييف؟
    دي ما طيارات دي تيارات والتيارات عادة تجي متقلبه ومتقلبه زي ماهي بتتقلب في الهواء الجانا باااااااااااااارد ده

  10. حاج أحمد السلاوى | رد

    البروف الفاتح .. شكرن للمعلومات القيمة ..
    يعنى معنى كلامك دا الركشة أحسن منها ..

  11. حسبنا الله ونعم الوكيل

  12. هوووووووووووووووووى يا مرتزقة يا عملاااااااء!
    عايزين ترجعونا لى ورا صاح؟؟
    لى عهد صفوف العيش والبنزين !
    آه يا مندسين ! قبضتتتتتتكم !

  13. الفاتح و سماره الأكارم . . .
    تحية و سلام . .
    ليه مستغربين مش قبل كدا قرية شنو كدا ما بتذكرا يا الفاتح مش كانت أنذرت أمريكا للمرة الأخيره.
    ما دي الطيارات العايزين نضرب بيها أمريكا و روسيا اللتان قد دنا عذابهما.
    دا إسمو البوبار و ركيب الفيريون في بيت الإيجار.

  14. اخى جبرا والاخوه الاعزاء
    تحيه وسلاماااااااااااااااااااااااات
    انته خط هيثرو اتلقى ولا شنو
    نحنه تطير عيشتنا عشان كده عملوا لينا نموزج لطيران العيشه

  15. ما شاء الله اتطورنا وعشنا وياما حا نشوف
    فوق فوق سودانا فوق
    الله يزيدنا ويرفع اسم بلدنا فووووووق
    ياربى الدواء بى كم ,,, رطل السكر بى كم ,,, جالون البنزين بى كم
    مدارس الاولاد بى كم ,,,, الفوووووووووووووووول بى كم ???????

  16. و الله العظيم انا لمن اسمع الحاجات دي بتجيني لواية في بطني و بكون منطط عيوني و ما مصدق انو في ناس بتفكر بي البساطة دي….. ياخي الفشخرة فوق كم . و دي زي القصة بتاعة كاميرات المراقبة المرورية في الشوارع ام حفر دي
    و زي ما بيقول المثل ( الفلهمة العورة…. شيل البطارية في القمرة)

  17. لكن انا مع السؤال المشروع للأخ حاج احمد السلاوى ..صحى الطيارتين ديل طارن لحدى دبى بدون توقف كده عديل !!! وياربى المسعول الصرح ده سافر بيهن وألا مشى بطيران الخليخ وركب فيهم طيارين من الدفاع الشعبى ؟؟

  18. الأحباء الأعزاء .. شركة مواصلات العاصمة صرحت اليوم بأنها لا تستطيع حل أزمة المواصلات .. أنا أفتكر يدمجوا صافات وشركة المواصلات دى وينتجوا لينا دفار في شكل طيارة !!

  19. والصافات واحد دى وقعة فى السكة البركة فى الصافات2 والصافات3 الوصلو سالمات

    تقوم بينا الطيارة تودينا لادبى تودينا للمعرض

  20. المشكلة عندنا هنا يا جماعة مشكلة بتاعة إداااااااااااااااااااااارة
    ما عندنا تخطيط ممتاز
    ما عندنا رؤية متميزة
    الناس القاعدين فوق ديل كلهم من وزراء ومدراء هيئات ومؤسسات بس رؤيتهم إعملوا الحاجة البترفع اسمهم
    و حريقة في البلد

  21. نحمد الله عندنا الشعر و الرقبة ‏…‏ الله يدينا المشاطة البتقدر تمشطو لينا ونرتاح من المشاطة البدت المشاط من ورا وخلت القدام منكوش

  22. تحية واحترام لكم جميعا
    أنا يا اخوي الفاتح امبارح مشيت اطلع الرقم الوطني علي الامين روحي طلعت قبل ما الرقم يطلع عارف لقيت الناس من الخامسة صباحا ليه ؟ عشان توزيع الارانيك . طبعا اخوك راجل واسطة وكدة والله بالواسطة من الساعة الثامنة صباحا وحتي الثالثة ظهراً وفي النهاية الاستلام بكرة. ؟؟؟!!!!!!!!! تقول ليا صافات …..
    يظهر يا الفاتح اخوي انت ماطلعت روحك ( بشد الام ) اقد ماطلعت رقمك ….
    بالمناسبة جنوبي اخوي انت دحين بطلعو ليك رقم ؟؟؟؟؟
    تحياتي لكم جميعا

    1. ود الباشا للأسف انو اصعب خطوه في استخراج الرقم الوطني هو انو الزول يصحي بدري ويستلم الاورنيك اما بعد كده كلو أي كلام تجيب الجنسية و أي شاهد من الشارع وانا كنت مفتكر حيقولوا أي زول يمشي يطلع الرقم في محل ميلاده او من ناظر قبيلته عشان الشغلة تكون مظبوطه ‏..‏ لكن بالطريقة الحاصلة دي يمين سلفاكير ذاتو كان داير الرقم يطلعوا..‏¡‏‏¡‏

  23. دا انا غلبااااااان | رد

    عشان تعرفوا انو طيارتكم قامت

  24. السلام عليكم يا البروف وشلته الكريمة
    ألا يكفيك يا سيدي ما نراه في الشارع من استهزاء بنا وحسرة على الوطن تكاد تقتلنا كلما قطعنا خطوة حتى تأتينا بما يفيد بانهم لم يألوا جهدا في الاستهزاء بنا وبأنفسهم حتى في (المحافل الدولية)؟ وااااااااااااااااااااااا حررررررررررررر فلباااااااااااااااااااااااااه يا ناس طلاب المدرسة الصناعية عندنا ( وعددهم 500 من اصول نيجيرية و 5 من أصول كوش بن كنعان) يدرسون نظري و لا تتوفر لديهم حتى المفكات النجمة …. وبعدين يقولوا نصنع طائرات؟ لمدرسة الصناعية كان عندها عربية واحدة (لوري) موش عارف هدية من منظمة وللا شنو يمكن كانوا يتعلموا فيها فك الفلتر ، ودي ذاتا لمان عايزين يبيعوها ما لقو ورقها
    االتعليم الصناعي 60% من التعليم العام في ألمانيا والألمان تعبوا معانا في عمل المدارس والمعاهد الصناعية وكانت النتيجة ميكانيكية جربندية لأنهم قروا كل حاجة نظري الناس ديل همهم الاعلام والدعاية والظهور ولو بالكذب
    السودان لم يصنع الطائرات عندما كان رائدا في مجال التعليم الأكاديمي والتقني والحرفي …. فهل سيصنعها عندما صارت لديه عشرات ( ربما مئات) الجامعات التي ليس لها سوى الاسم؟ والعديد من المدارس الصناعية التي لا يعرف طلابها تركيب مروحة السقف؟ …. المشكلة الناس ديل ح يروحوا وتظهر الحقيقة التي نغلفها بأكاذيبنا فماذا سنفعل حينئذ؟
    وانتا يا بروف أقول قلبك محروق زيي لمان تكتب كدة وتفضحهم … ولكن عندما تكتب عن الخدامة الشايفة شغلها يخيل إليّ إنك من عالم آخر … تبع النواب اليصفقوا لزيادة الأسعار وكدة

  25. Sudan’s Safat
    runs on car fuel
    Here are two photos of the Safat-01 aircraft, a two-seater propeller plane produced at Sudan’s state Safat Aviation Complex. It is Sudan’s first home-manufactured aircraft — a $15,000 training plane that runs on car fuel.
    Sudan’s Safat-01 plane, the country’s first home-manufactured aircraft, taxis down a runway at a launching ceremony in Khartoum, July 05, 2009. President Omar Hassan Al Bashir said on Sunday sanctions could not block development in his country. Picture taken July 5, 2009. Reuters/Mohamed Nureldin. Full story: Reuters, July 5, 2009

  26. مش ممكن تكون الطيارة دى ما بتظهر فى رادرات لاهاى

  27. بروف جبرا والاخوة الكرام….الغرض من المشاركة فى معرض الطائرات هو لعرض الأجندة الخفية في ..كيفية التخلص من المعارضين وبثمن بخس ..دون شوشرة و ضجيج..و الباقى معروف.

  28. بالرموووت الطيارة دي ولا بسووقة طيار ؟؟؟ ياخ كدي اليصنعو لنا لساتك عربية في الاول

  29. الحبيب

    اهلنا ناس الشرق عندهم مثل بتاعى الزول الكايس الصديرى دى ما ياها زاتا اسى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: