• يسألونك عن الفول .. قل ٌإنه إذا إستمرت أسعاره بهذا التصاعد فسوف يصاب الشعب الفضل بأنيمياء (عدم) أكل الفول (ودي غير أنيمياء أكل الفول)
• يسألونك عن مؤهلات مساعدى الرئيس .. قل إنها (فصيلة الدم)
• يسألونك عن إقرار الذمة .. قل (هى وينا الذمة البيعملوا ليها إقرار)
• يسألونك عن التقشف .. قل هو تجويع الشعب حتى يتقشف جلده
• يسألونك عن العالم التالت .. قل هو الذى لا يستطيع شعبه ان يقول (تلت التلاته كم)
• يسألونك عن المرحلة الجامعية .. قل أنها المرحلة التى تسبق العطالة
• يسألونك عن الفلوس .. قل الشعب مش محتاج ليها (مش عندو الماستر كارد والفيزاء كارد) !
• يسألونك عن السجين .. قل هو مجرم (بس ما لقى ليهو واسطة تخارجو)
• يسألونك عن قنواتنا التليفزيونية .. قل هلى أداة من أدوات التعذيب
• يسالونك عن تعدد الزيجات .. قل هو عمل يقوم به (الجماعة) من أجل تقليص نسبة العنوسة زى ما بيقولوا (بس قاعدين يعزلوا البنات الصغار وسمحات !)
• يسألونك عن المؤامرة .. قل إنها شماعة نعلق عليها فشلنا وأخطاءنا ( هو الشغال بينا منو عليكم بالله ؟)
• يسألونك عن الشفافية .. قل هى لباس يظهر العورات .. (وطبعن إظهار العورة حرام يا جماعة)
• يسألونك عن البطالة .. قل هي المشكلة التى تسبب للدول (البتحترم نفسها) هاجساً مرعباً
(وعشان كده بتسعى لحلها والقضاء عليها)
• يسألونك عن الفساد .. قل هو آفة تعانى منها معظم الدول ما عدا السودان (عشان الواعظ الديني وكده)
• يسألونك عن الغلاء .. قل هو أن يساوى مرتبك خمسة كيلو لحمة (وهى قيمة الحد الأدنى للأجور)
• يسألونك عن التسول .. قل (كان توسل وهسه بقى قلع عديل) !
• يسألونك عن الحزام الناسف .. قل إنه ربما يكون إسما لأغنية جديدة بعد الأغنيات الحربية مثل (قنبلة) و (أضربنى بى مسدسك وأملانى رصاص) !
• يسألونك عمن قام بتشكيل الحكومة الجديدة .. قل أنها ماكينة تصوير ماركة توشيبا
• يسألونك عن حظر النشر في جرائم وفضائح الفساد .. قل (مال يكتلوها كيف)!
• يسألونك عن إخفاق بعثة الدورة الأولمبية الأخيرة قل (هو شئ متوقع ..هو شنو الشئ الما أخفقنا فيهو؟)
• يسألونك عن تذاكر دخول المستشفيات لزيارة المرضى .. قل أنها لا تتفق بل تتعارض وتوجيه الرسول الكريم الذى يحضنا على زيارة المرضى (ونحنا دولة رسالية وعندنا مشروع حضاري كده)
• يسألونك عن تقرير المراجع العام .. قل (يعنى شنو ما قاعدين نقراهو كل عام) !
• يسالونك عن الصرافات .. قل (ياتا الفى البنوك وللا الفى البيوت؟)
• يسألونك عن الشريعة .. قل (عفواً لا أستطيع رؤيتها دون نظارة مكبرة)
• يسألونك عن الإغتراب .. قل هو مشروع لتسمين الحكومة وإفقار المغترب
• يسألونك عن الأعياد .. قل أصبح (الفلس) لا يجعلنا نتذوقها
• يسالونك عن حملة الدكتوراة في بلادنا … قل (إنهم أصبحو أكثر من الباعة الجائلين على
شارات المرور) !
• يسألونك عن مستقبل البلاد … قل بدون ملامح !
• يسألونك عن المدينة الرياضية .. قل (مش بقت سكنية؟)
• يسألونك عن الدولار .. قل (لو ما جينا كان بقى بعشرين جنيه)
• يسالونك عن صباع أمير .. قل هو المادة التى ترش على كراسي المسئولين حين توليهم الأمر
• يسألونك عن الشريف .. قل أنه كان بين ظهرانينا قبل اسابيع لإختيار اللعيبة !
• يسألونك عن بصات الوالي .. قل أن معظمها أصبح خردة بعد اشهر من نزولها إلى الشارع !
• يسألونك عن هيئة الحج والعمرة.. قل (إنتا من زمن كانت هيئة؟ مش قلبوها بنك وبقت تدى مرابحات) !
• يسألونك عن الميزانية .. قل هى إجراء أكدت التجربة أن العمل به غير ملزم (وبكرة يزيدو ليكم البنزين وبعدين قولوا الفاتح جبرا قال) !
• يسألونك عن خط هثرو – الخرطوم .. قل (هههههه مش الموضوع خلاس مات وكده) !!
كسرة:
• يسألونك عن الموت الأكلينيكى .. قل (دى الحالة الأنحنا فيها دى)
!
الفاتح جبرا 
الاخ الفاتح بعد التحية يبدو ان الاسلوب ييحمل نوع من الاستهزاء بالقران الكريم ارجو ان تنتبه الى ذلك مستقبلا مع خالص تحياتي
عبد الهادي
عزيزي عبدالهادي
تحية طيبة
أولاً مرحباً بك بيننا !
ثانياً : والله الواحد ما عارف يرد عليك يقول شنو؟ طبعن كلامك ده تهمة خطيرة .. إن كنت تعلم فتلك مصيبة وإن لم تكن فالمصيبة أكبر فأنت تتهمنى في صميم عقيدتي .. .أكون لك يا أخي من الشاكرين إن أوضحت لشخصي الضعيف أين الإستهزاء؟ وكيف نمى إلى علمك يا أخى أن (يسالونك عن) هذه قد أخذتها من القرآن؟وهل إذا كان عنوان مقالي (يا أيها الذين) معنى ذلك أنه قد أخذ من القرآن؟ أيترك الناس يا أخى إستخدام أى كلمة أو عبارة صغيرة كهذه وردت في القرآن؟وإلا شملهم إتهامك (غير المبرر) هذا؟
ثم هب انني قد قصدت أن أقتبس هذه العبارة من القرآن فماذا في ذلك ؟هل تعلم أن الرسول صلى الله عليه وسلم والصحابة رضوان الله عليهم كانوا كثيرا ما يعمدون إلى إقتباس آيات كاملة من القرآن الكريم (لعلك لا تعلم) :
ففي رسالة النبي صلى الله عليه وسلم إلى هرقل الروم جاء: بسم الله الرحمن الرحيم من محمد عبد الله ورسوله إلى هرقل عظيم الروم سلام على من اتبع الهدى أما بعد فإني أدعوك بدعاية الإسلام أسلم تسلم يؤتك الله أجرك مرتين وإن توليت فإنما عليك إثم الأريسين ويأهل الكتاب تعالوا إلى كلمة سواء بيننا وبينكم ألا نعبد إلا الله ولا نشرك به شيئا ولا يتخذ بعضنا بعضا أربابا من دون الله فإن تولوا فقولوا أشهدوا بأنا مسلمون وهو اقتباس من قول الله عز وجل ( قُلْ يَا أَهْلَ الكِتَابِ تَعَالَوْا إِلَى كَلِمَةٍ سَوَاءٍ بَيْنَنَا وَبَيْنَكُمْ أَلاَّ نَعْبُدَ إِلاَّ اللَّهَ وَلاَ نُشْرِكَ بِهِ شَيْئاً وَلاَ يَتَّخِذَ بَعْضُنَا بَعْضاً أَرْبَاباً مِّن دُونِ اللَّهِ فَإِن تَوَلَّوْا فَقُولُوا اشْهَدُوا بِأَنَّا مُسْلِمُونَ) (آل عمران:64 )
وفي رسالته صلى الله عليه وسلم إلى كسرى الفرس التى أرسلها مع عبد الله بن حذافة جاء فيها الآتي : بسم الله الرحمن الرحيم من محمد رسول الله إلى كسرى عظيم الفرس سلام على من اتبع الهدى وآمن بالله ورسوله وأدعوك بدعاية الله فإني أنا رسول الله إلى الناس كافة ( لأنذر من كان حيا ويحق القول على الكافرين ) وهو اقتباس من قول الله عز وجل : ( لِيُنذِرَ مَن كَانَ حَياًّ وَيَحِقَّ القَوْلُ عَلَى الكَافِرِينَ) (يس:70)
يا اخى إن الاقتباس هو أمر مباح وفقاً لضوابط أقلها ألا يكون ذلك الأقتباس فى الأحاديث والكتابات الساقطة غير المهذبة ومقالنا هذا أعتقد بانه من غير هذه الفئة !!
كسرة :
أنا وجميع الأعضاء هنا في إنتظار ردكم على السؤال وهو (هل أوضحت لنا أين الإستهزاء؟) ..أم أنك تفتى من غير علم ؟
عذراً فقد تمت كتابة كلمة (نما) هكذا (نمى) وهذا لا يفوت على فطنتكم .. العبارة تكتب (كيف نما إلى علمكم) .. وشكراً ,,,
أعتذر للأخ عبدالهادي إن كنت فظاً وقاسياً بعض الشئ فى ردى عليه ولكن (الإتهام) كان أكثر قسوة !! ولا زلنا في إنتظار الإجابة على السؤال (أين هو الإستهزاء؟)
يسالونك عن الوزراء…صفا ااااانتباه
يسالونك عن عدد الوزراء….وزير لكل مواطن
يسالونك عن المال العام…..هو مااكله الخاصه
سال سائل مسئول عن المسئوليه فرد عليه المسئول بان المسوليه هى كل ما تسول نفس المسول فعله دون رقيب
كسره
انته فهمته حاجه………ولا انا
يسألونك عن البديل..( قل هو وينو المبدل عشان نخاف من البديل .. ما طول عمرنا بنجرب يعني شنو كان جربنا تاني..
يسألونك عن سبب زيارة الغواصة الإسرائيلية لجزيرة ( مقرسم ) شمال بورتسودان قبل أيام و الحكومه ساكته عليها ليه؟
قل جو يباركو للإنقاذ الحكومة العريضه بمشاركة حلالالاتو.
يا ابو السناكل
الطائرة الاسرائلية دخلت عديل وطلعت وما عرفوا يعملو حاجة ؟؟؟؟؟؟؟؟؟؟ تقول لى غواصة جوة البحر
هالك الغواصة دى
سألناك …. بس ما جاوبت…. أين الشعب السوداني الذي كان ينتدب مثقفيه لتعليم الخليج ورياضييه وعساكره لتدريب العالم العربي ولا يتكلم في الأكل والشرب والضيوف لأنها لم تكن تشكل مشكلة لأحد ………. راح فين؟
طبعا لسه في منو في الخليج بس يدربو الهجن فقد صار البشر الخليجيون أرقى من أن يدربهم السودانيون وأخاف أن يأتي يوم يذهب فيه شبابنا إلى الخليج ليتعلم من الهجن ………. أما بقية سلالة السوء دان وكوش بن كنعان فقد فارقوا ديارهم وتشتتوا في أمريكا واليونان وكندا وربما الفاتيكان…ز ودول القاعدين دول ليسوا إلا قرناءهم من الجان أو مستوردين من سجمستان…. بالله عليك تتخيل سودانية تولد هذا النفاق والكذب والفساد؟ وأنت وين قاعد تلقى الراحات دي تكتب كأنك … والحل شنو؟ ما في فرج إلا عيسى؟ طيب عيسى الحلو ما ينفع؟
يا أستاذ……
انت رأيك نحن ح نطلع من الحالة دي متين؟؟؟؟؟؟؟؟؟؟؟؟؟؟؟؟؟؟؟؟؟
لازم يكون في ليها حل….
ههههههههههههههههههههههههه,,والله يا سنكل بالغت فوكها دى ..هههههههههههههه
يسألونك عن إخفاق بعثة الدورة الأولمبية الأخيرة قل (هو شئ متوقع ..هو شنو الشئ الما أخفقنا فيهو؟)
والله ما عارفين العملو فيني الورم الرسلوهم للدورة العربية … ياخ دا أعلى مستوى من الاستهتار ممن نوصل ليهو باسم البلد وشعبها .. كمية بتاعة عواليق ما عارفين روحهم جايين لشنو .. ولا حتى بشبهو الناس الهناك .. من حيث الاستعداد ولا حتى فهم الألعاب .. الله يفضحكم في البلد والبلدين زي ما فضحتونا ودرتو أيامنا … يا جماعة تجينا من منو ولا منو .. خلاص فاض بينا … مافي زول عارف ليهو ميدان ااااارب نتلاقى فيهو …!!!؟
تصحيحات:
ودرتو أيامنا .. كدرتو أيامنا
ميدان ااااارب: ميدان كاااااارب
ولكم العتبى
أب احمد ..ناس البعثة الرياضية ديل كان مفروض يمشو يمثلونا فى الدوحة لاكين الظاهر فهمو الموضوع غلط وقامو مثلوا بينا ..وضحكوا علينا الله وخلقه ..
لو كان عندنا زول مسئول كان مفروض كل البعثة يقبضوا عليهم فى مطار الخرطوم ويقدموهم لمحاكمة عاجلة ناجزة ..
المهم يسألونك ويسألونك ومافيش حد قادر يجاوبك على أى سؤال.. حتى لو كان سؤال سغيروووووونى زى حقنا .
أبو السناكل .. قلت لى كيف ؟ الغواصة دخلت المياه الإقليمية السودانية من وين ؟ عن طريق بورتسودان ..المشكلة شنو ؟ بورتسودان مش ميناء ؟ وحتى لو شافوها فيها شنو ؟ وحيعملوا ليها شنو ؟
لو الاسئله بتفيد كان بدرى فادتنا
ولو وضعوها فى امتحان كان نجحوا سادتنا
و انتوا ليه تسالوا اصلا مش كل شئ اصبح للبيع – السودان دولة الان من العالم الاول لانها بتتعامل بنظام السوق
الحر و نظام الكر و الفر و السوداني الان لازم يكوني وطني و تسبقها كلمة مؤتمر و اذا حسبناها هم جابوها قلع
و سرقة و غش و تدليس و الشاطر يقول لي المسكهم البلد منو مش هم تلبوا بالنهار نهب مسلح و همبتة و انت جاي بس 22 سنة ترجع سنة اولي روضة و تقول يسالونك
بمناسبة الدورة الرياضية العربية نحنا عندنا الذهب بالطن في السودان فقلنا احسن نخليهو لاخوانا العرب المساكين
و عن خط الخرطوم هيثرو نخنا ذاتنا ما بيشرفنا نعمل علاقات مع بريطانيا فعادي كان هدف شريك سودانير اصلا
هذا الخط
و عن الغواصة الاسرائيلية هي جات علي الغواصة فاسرائيل دي ما داخلة بالبيبسي و الكولا و الفيسبوك و غوغل
و تويتر و زين للاتصالات و حتي في جوازي مسجلة رسميا
تخريمة : مستقبل البلد ذيها ماضيها ترجع دويلات و ممالك و عمد و سلاطين و شايف الناس من هسع لبست المرقع يعني نحن وصلنا للانصار و المهدية و بعدها بيرجع الانجليز
كل تمام حاجة تمام بس يا ريت يا أستاز تغير لون الصفحة لأنه نظرنا ضعف أعملها شئ معقول كده .
الاخ عبد الهادى
تحيه اولا وثانيا حقيقه كلامك حيرنى وانا بسال فى نفسى ياربى الاستهزاء كمان بقينا ما بنعرفه ولا شنو
ورجعته قراته المقال كم مره ما لقيت كلامك دى على كل حال ازيدك من الشعر بيت اجمل ما يكتب فى الشعر والنثر
هو ما تمه اقتباسه من القران الكريم ولو كنته متزوق جيد للشعر وقارى جيد للنثر ما كان صدر منك هذا الكلام
ثالثا…. اوعدك بكتابة بعض الاشعار واجملها واغلب ابياتها مقتبس من القران هو فى اروع من ذلك
بالامس كنب في السوق الشعبي امدرمان – في مهمة عمل – سالت واحد عن سعر حاجة ولما رد علي سالتة عن السبب
قال لي بتعرف العصاية بتاعة الخيزران الملفوفة علي شكل نص دايرة قلت لية بعرفها قال لي معوجة من وين قلت لية من فول في راسها – قال لي خلاص اذا الراس معووج تاني فضل شنو – يكون عديل – يعني كلامو كان مقنع وما قدرت اسالة تاني عن حاجة ودعته وكلامو طول الليل في راسي لمن غلبني النوم – والليلة جيت لقيت موضوع يسالونك قلت يا ربي الفاتح دا كان معاي ولا دا توارد خواطر – والله الواحد يستغرب ادا ناسنا المشو الدوحة ديل يرجعو بي برونزية – وانشاء الله يكونو رجعوا مستوريين وما عملو لينا فضيحة اصلنا ما ناقصيين- بعدينن هم المشو (للدوخة) قبالهم رجعوا بي فايدة للشعب السوداني الفضل –
يا اخوانا ديل ناس سجمان السجمان ما قادريين عليهم تقول لي غواصة وطيارة واسرايئل – هسة لمن الكلام يطلع برة يقول ليك نحنا راصدنهم ومنتظرنهم يصلو لحدي امدرمان عشان نقوم نهجم عليهم هجمة رجل واحد ونهزمهم شر هزيمة – لله درهم – عذبونا وبهدلونا وجننونا :
بالبوبار وفك الزرار وتصنيع الطيار ومناكفة الكبار ودق الزار وتولية الصغار وابعاد الكبار ورفد الشطار والسكوت علي العار وغلاء الاسعار ولعب الادوار وزيادة الدولار والكضب في وضح النهار وفقع المرار و
كيف يستقيم الظل والعود اعوج – عجبي – وينك يا كوكو؟
سلام
بت وراق أنا حأبدأ ليك و إنتي ما بتقصري:
قال تعالى في سورة لقمان:
” و لو أنما في الأرض من شجرة أقلام و البحر يمده من بعده سبعة أبحر ما نفذت كلمات الله إن الله عزيز حكيم”.
و كتب شاعر الجمال صالح عبد السيد أبو صلاح:
الشجر أقلام جميع و النيل مداد لو كتب أشواقي ليك ما عددا
و قال تعالى إرم ذات العماد . . . الآيه
و كتب أبو صلاح في نفس القصيدة :
يا المحجب في غرف ذات العماد
لو سهام عينيك صدف راسي الجماد
غير شك دك الحجارة و همدا
و لم يستنكر أي من البشر على شاعرنا الفذ لإقيباسه من القرآن الكريم ، و لم يقدم في زمانه لمحاكم التفتيش.
يا عبد الهادي صلي على النبي يا إبني.
حاج السلاوي و الشمباتي و أبو مازن إزيكم . .
والله الخبر يقول إنو الغواصه جات مارقه من تحت المويه جنب الجزيره دي و سببت هيجان و أمواج عاليه الصيادين قايلنو جاهم شيطان مارق من المويه.
و هدي الحاله الحيكومه الرساليه ساكته لي يوم الليله.
أها خلي نافع يقوي ضراعو ، ديل أعداء الشريعه الجد جد جوكم في خشم بيتكم.
الاستاذ الجليل الفاتح جبرا
حالتو ده فصيلتو شنو . في المرات القادمة دايرن موضوع تاني عن حالتو. لك الحب استاذي العزيز انت قاعد تفش الغبينة المفروض ان يتم تعيينك مساعدا لرئيس الجمهور في شنون فك الغبائن
يا سنكلوني النزلت في جزيرة مقرسم أو (مكور) دي هيلوكوبتراااااااااااااااات كدي راجع نفسك كده وشوف لينا الغواصة دي نازلة وين؟؟؟؟؟؟؟؟؟؟؟
أنتو يا جماعة أسماء الجلالة مش المفروض تسبق بكلمة عبد عندما تطلق على البشر مثل: عبدالهادي وعبد الدائم وعبدالله وعبد الغفار وعبد الإله الى آخر التسعة وتسعين اسم ولا أنا (خلتان)؟؟
لو سالوك عن الفول ……………..كفاية نشرب مويتو
لو سالوك عن مؤهلات مساعدي الريئس ……….. خرجين روضة ماما حنان
لو سالوك عن اقرار الذمة ………..تكتب اقرارك وتاكل ,, البسالك منو
لو سالوك عن التقشف……… تقطعوا ناشف مع الشعب ,, هو القال ليهو يبقي شعب منو
لو سالوك عن العالم التالت………. نحن لسه في العالم الاول التالت ما لحقناهو
لو سالوك عن المرحلة الجامعية ……..تقلب اي مدرسة ثانوية جامعة وتوفر الايسكريم وولدك يخش بقبول خاص ويركب عربية ب200مليون ويكون عندو منظمة مسجلة باسمو
لو سالوك عن الفلوس ………… بالقديم ولا الجديد
لو سالوك عن السجين………هو الشعب السوداني ,, في سجن اكبر من السودان الفضل دا
لو سالوك عن قنواتنا…..لسه ما لاقتني قناة سودانية
لو سالوك عن الزيجات……والله انا الواحدة ما لاقيها وعمري 43 سنة تلاتة واربعين يا جماعة الخير
لو سالوك عن المؤامرة…….. انظر التشكيل الوزاري الجديد اعلاه,,, حلااااااااااااااااتو
لو سالوك عن الشفافية ….. ان تشف و (تسف) الحكومة من الشعب الحاجات السمحة بس
لو سالوك عن البطالة……… البطل ما بموت ولا حاجة
لو سالوك عن الفساد …….. لسه نحن في مرحلة الحصاد
لو سالوك عن الغلاء…… الغالي بغلاتو ما شفتو كدايسنا غالية قدر شنو فيا كدايس العالم اتحدو
لو سالوك عن التسول….. كل البيت يمرق من الصباح عشان يحيبو كيس الطماطم
لو سالوك عن الحزام الناسف……الانقاذ طبعا ,,,, هو الما نسفوهو شنو
لو سالوك عن التشكيل الجديد ….. محول لجارة استاذنا جبرا القاعدة تشرب معاهو قهوة الصباح
لو سالوك عن حظر النشر في الفساد ….. هناك ما هو اجل واعظم الاستهداف الخارجي والخونة والمارقين
لو سالوك عن الاولمبية ……. اسالوا مازدا (3ْ(3x هم احسن منو في شنو
لو سالوك عن تذاكر المستشفي ……المشروع الحضاري دا يبنوهو بشنو
لو سالوك عن المراجع العام …. نفس الورقة مع شوية شمار واصفار
لو سالوك عن الصرافات.. والله قالو _والعهدة علي الراوي_ احد الولاة الخزينة حقت الحكومة في بيتو عديل كدا
لو سالوك عن الشريعة … الكلية بنعرفا الا تاني ما سمعنا بيهو تب
لو سالوك عن الاغتراب….اسالوا مساعد الرئيس اصلوا كان مغترب
لو سالوك عن الاعياد بنعرف عيد البيض ولو داير تشوف بعد كم يوم كدا تعال شارع المطار بالليل تعرف حاجة
لو سالوك عن الدكتوراة …. ما بين كل تلاتة تلقي خمسة عندم دكتوراة .. المشكلة شنو
لو سالوك عن مستقبل البلاد …. خلونا في حلة الملاح
لو سالوك عن المدينة الرياضية … سيدها قاعد في الكلاكلة
لو سالوك عن الدولار…. ما طار من زمن صلاح كرار ,, والله انتو قدام خلاس
لو سالوك عن صباع الامير …. نحن بنعرف اصبع نافـ.. البورور بيهو داك,,, الراجل يمرق الشارع تقول حقو
لو سالوك عن الشريف …. المرة دي قال داير ناس نجوم الغد التيم كلو بي ناس الجلاليب ,,شدو حيلكم
لو سالوك عن بصات الوالي … والي المريخ ولا والي الخرطوم ,, تشابه علينا البصات والولاة
لو سالوك عن الحج والعمرة ….. الناس الحجوا بقروشنا والله بعدين ما بنخليها ليهم
لو سالوك عن الميزانية ….. يوم 1.1.2012 الله لا وراكم ليهو ,,, امرقوا ساااااااااااكت , جاكسون , ابو جنزير , بس حوش الخليفة اختوهو لانو مقفل والله يدقوكم دق العيش
لو سالوك عن خط هيثرو ….. انتو ما بتنسو حاجة,,, كرهتونا ذاتو
لو سالوك عن الموت ….. الموت واحد عشان كدا اخير نمرق فت مرقة يا نموت كلنا او نحيا كلنا
كسسسسسسسسسسسسسسرة : ولا شنو يا استاااااااااااااااااااااذ مطنش مااااااااااااااالك
السلام عليكم
عمنا جبرة وبقيه العقد الفريد بعد الاحترام ارجو قبول كلامى بطيب صدر لانى ارى انه يجب احسان الظن بالجميع و لايجب الدخول فى مهاترات او تراشق بالكلام مهما كان الامر وبالذات اذا تعلق بالدين فهنالك علماء يمكن الرجوع اليهم
فنحن كلنا لانرقى لمقام الفتوى ,,, ومن اخطاء منا يجب تصحيحه بالحسنى
وما اشكل علينا نرجعه لاهلة فهم ادرى منا واعلم
كسرة : بشرى النبى صلى الله عليه وسلم ببيت فى الجنه لمن ترك المراء ولو كان صادقا
مع خالص الاحترام والود للجميـــــــــــــــــــــــــــــــــــــــع
الحبيب أبو آية – أشرف
المسالة ليست ضيق صدر .. المسألة هي إنو مفترض قبل أن يفتى الشخص في أمر معين عليه أن يقرأ وينقب ويطلع ويتدبر ثم بعد ذلك يوجه إتهاماته خاصة إذا كانت هذه الإتهامات من نوع الإستهزاء بالقرآن الكريم !! ثم يا أخي نحنا ذااااتنا علماء دين إن كانت مسالة العالمية هى الإطلاع والقراءة والفهم والبحث والتقصى فقد قضينا عمرا طويلا نقرأ في السيرة والفقة والعبادات والحديث وخلافه ولا نزال ..فلا يمكن أن أن أستوعب ان ياتيك شخصا ليقول لك أنك تستهزأ بالقران الكريم هكذا دون أدلة على ما يحسبه جرماً !! عموماً حصل خير !!
خير منو !!؟
عوافي يا دكتور … خيرالله
نعم خير الله ,,, الله يجزيك خير يابروف
بس كترتها شويه فى موضوع نحن ذاتنا علماء دى لانو الموضوع ما اطلاع وبس
عموما حصل خير برضو
البروف جبرا…
ونعم بالله,,, انت ذااااتك شليق جنس شلاقة ! اها وقعت ليهم فى (الاتو) حقهم ! بحتو منك وبنقعد نتلفت !
ابو آيه..
ويجزيك يا حبيب..لكن انتو ياجماعة مالكم متشنجين كدة !؟؟والله مافى اى شئ يستدعى العجاجة دى كووووولها ..هدوا اللعب وروقوا المنقة….وخليك قريب يا حبيب…
حبيبنا أبو اشرف – ايه
ما إطلاع وبس كيف ؟ عليك الله ورينا العلماء ديل ممكن يكون عندهم شنو ما عندنا .. وده سؤال زى سؤالنا لى اخونا ودالخلا عن الحبة السوداء .. يعنى لازم تقول لازم تقول .. بالعربي كده مافى زوغان !!!!
ناس لا لا ناس لا لا ناس لا لا…
حبيبنا أبوآية .. خليك من حكاية السؤال .. هلا أوضحت لنا مواصفات ما يسمى بـ عالم الدين ؟ يعني متين ممكن نقول الزول ده عالم دين ؟ لمن يكون قرأ شنو؟ إتخرج من وين؟ عندو شهادات عليا في العلوم الدينية؟ ما هئ المؤهلات (الدنيا) لعالم الدين (يعنى التى لو كان لديه أقل منها لإندرج في صفوف العامة مثلنا) ؟هل تستطيع أن تضع مواصفات لذلك؟ وهل سوف تنطبق هذه المواصفات على جميع من يسمون أنفسهم علماء دين؟…….. للإستفادة وبس !
السلام عليكم عمنا جبرة وبقية العقد
الدين وعلم الدين موضوع طويل وشايك ,,, فالعلماء اقوام اجتهدو فى علم الدين ليس بالاطلاع انما زاحمو العلماء بالركب ,, العلم الدينى خصوصا يحتاج لتعلم على يد عالم لانك قد تقراء شئ فتفهمة بطريق ويكون القصد مختلف
العالم الدينى كما ذكر النبى صلى الله عليه وسلم(( قال رسول الله صلى الله عليه وسلم: يحمل هذا العلم من كل خلف عدوله ينفون عنه تحريف الغالين وانتحال المبطلين وتأويل الجاهلين.)) صححه الشيخ الألباني
فا العلماء ورثة الانبياء كفاك رجوعا لسيرة الائمة وسيرة الامام احمد وغيرها من السير
لا يغرنك بعض المدعين بالعلم وهم جهال فهذا ليس يعنى ان العلم امر يمكن اقحام النفس فيه هكذا
ولايغرنك بعض الذين يفتون على اهواءهم او لحكام او لمصلحه خاصه
الاسلام محفوظ وانما هم من قللوا من مكانة انفسهم عند الله وويل للذين يبدلون دين الله من عذاب الله
عمنا جبرة فلنرتقى عن البطالين ونعف انفسنا عن الكلام فى امور نحن اقل واصغر منها
ختاما الينا جميعا : كلام معاذ بن جبل
قال: (تعلموا العلم ـ دققوا في هذا الحديث الطويل ـ تعلموا العلم فإن تعلُّمه لله ـ أي مخلصاً به ـ خشية، وطلبه عبادة، ومدارسته تسبيح، والبحث عنه جهاد، وتعليمه صدقة، وبذله لأهله قربة ـ أثمن هدية ـ وهو الأنيس في الوحدة، والصاحب في الخلوة، والدليل على الدين، والنصير في السرَّاء والضراء، والوزير عند الإخلاء, والقريـب عند القرباء، هو منـار سبيل الجنة، يرفـع الله به أقواماً يجعلهم في الخير قادة وسادة، يُقتدى بهم، يدل على الخير، وتقتفى به آثاره، يجعلك مع الملائكة والمُقَرَّبين، يسبِّح لك كل رَطْبٍ ويابس، تستغفر لك حتى الحيتان في البحر، وهوامُّ السِباع في البَر، به يطاع الله عزَّ وجل ـ بالعلم يطاع الله عز وجل، كيف تطيعه إن لم تعلم ما أمره وما نهيه ؟ ـ وبه يُعْبَد الله عزَّ وجل، وبه يوحَّد الله عزَّ وجل، وبه يُمَجَّد الله عزَّ وجل، وبه يتورَّع الإنسان ـ يكون ورعاً ـ وبه توصل الأرحام، وبه يُعرف الحلال والحرام. هو إمام العمل يلهمه السُعداء ويحرم منه الأشقياء).
مع خالص الاحترام والتقدير والتوقير للجميع خاصة عمنا جبرة
ياسين : دسته المنقه بقت بى كم ,,, مع التحيه
هههههههههههههههههههه,والله ما كستها قريب !
ولك من الود اجزله وخليك قريييييب يا حبيب…
حبيبنا أبو آية مع إنك ما رديت على تساؤلاتي لكن زى ما إنتا قلتا الموضوع شائك وطويل عشان كده نسقف على كده .. لك تحياااتي .. ووكت الحديث عن العلم والعلماء في سؤال سغيروني كده محيرني وهو : ليه الناس بترجع للعلماء الزمان العاشوا فبل مئات السنين في أى أمرديني يشكل على الناس !! يعني مافيش اعلم منهم تااانى وللا شنو؟ مع ملاحظة مسألة تطور الفكر الإنساني ؟؟؟!!!