عندما

• عندما يشرق صبح نترك النوم ونصحو (عشان نشوف اليوم ح نقضيهو كيف؟)
• عندما يتم إختيار مذيعة تبدأ التدريب (على نقش الحنة طبعن)!
• عندما يتم إختيار دستوري فأول ما يطلبه عربة رئاسية مظللة (عشان ما يشوف خلقة أبو أهلنا)
• عندما تخرج بعثاتنا الرياضية إلى الخارج فإنها تقوم بالتمثيل بنا خير تمثيل
• عندما تتم سرقة منزل مسئول فتأكد أن الغنيمة سمينة (ده الفي البيت بس وكدة)
• عندما تقوم بملء أورنيك الرقم الوطنى تأكد أنك قد قمت بملء خانة (قبيلتك شنو) بس ما تكون (قبطى) عندها ح تحتار !!
• عندما تستمع إلى تصريح مسئول بان المستقبل الزاهر ينتظرك لا تنسى أن تجيب عليه بما قاله (عادل إمام في مدرسة المشاغبين) : بعد تلاته وعشرين سنة ثانوية عامة بتقولى أيه هو المنطق !!
• عندما تحجز لإبنك العريس في أحدى صالات الأفراح فلا تنسى أن تضع إحتمال زيادة المدعويين بنسبة 10% (طيارات وكده) !
• عندما تدخل إلى السوق المركزى لشراء خضروات أو فاكهة لأطفالك لا تنسئ وضع الكمامة على أنفك وفمك إتقاء غاز النشادر النفاذ !
• عندما تستمع إلى جارك وهو يكثر ترديد كلمة (وبعدين) فأعلم أن الشهر قد إنتصف !
• عندما تري شابة في عمر الشباب وهى تمسك بمسبحة وهي تسير في الشارع العام فأعلم أنها غير متزوجة (كمين وكده) !
• عندما يقبض عليك شرطي المرور فتأكد إنك يا ح تدفع يا ح تدفع (تدفع الأولى ما زى تدفع التانية) !
• عندما يقوم الطبيب بتحديد (صيدلية) لك لشراء الدواء فأعلم أنه سمسار ضل طريقه إلى الطب !
• عندما تجلس أمام مكتب الموظفين الذين ذهبوا لتناول (الفطور) فتأكد إنو قعدتك ح تطول عشان بعد الفطور الشاى وبعد الشاى الصلاة وبعد الصلاة (يلملموا حاجاتهم) …. والبيت !
• عندما يصرح أحد المسئولين بأن (العارف ليهو فساد موثق يجيبو) نقول ليهو (كدي جيب لينا خط الخرطوم هيثرو ده أولاً بالتبادى ) !
• عندما تذهب إلى المستشفى الحكومى فتأكد أنك تحمل كسباً للوكت (وفد المقدمة) .. لفة قطن .. شاش .. حقن فاضية .. مطهر !
• عندما يصرح مسئول أمني بان 40% من الجرائم يرتكبها أجانب نقول ليهو (طيب دي مسئولية منو؟)
• عندما تدخل غرفة العمليات لاستئصال كليتك المريضة لا تنسي أن تعلم عليها بالحبر الشينى (عشان مرة وفي حادثة مشهورة قام الدكتور الجراح بمسك صورة الأشعة بالمقلوب وإستئصل السليمة) !
• عندما نشاهد الدراما السودانية نتأكد تماما بأن الممثل السوداني (قاعد يمثل) !
• عندما يطالب مساعدو الرئيس (الخمسة) بعربتين مرسيدس آخر موديل لكل واحد منهم واحده (للصباح) وواحده (لليل) فمعنى ذلك أنهم ح يورونا نجوم (الظهر) !
• عندما تكون أقصى امنيات المواطن أن يأكل .. يجب عليه أن يموت (مش بتشبه كلام المفكرين الكبار بالله؟)
• عندما يخرج أطفالك إلى المدارس في الشتاء والدنيا (ضلمة) تذكر أن الحكومة تشجع البكور وتنبذ الكسل والخمول (بالمناسبة أيه أخبار أسعار الفول؟)
• عندما تقرأ إستغاثات المواطنين المعدمين علي صفحات الجرائد .. أرملة عاوزين يطلعوها من البيت عشان الإيجار.. طالب يتيم عاوز أقساط الجامعة .. مقعد عاوز كرسي معاقين .. (وحاجات زى دى) طوااالي ح تسأل نفسك (طيب وين ديوان الزكاة؟) ! ودى فرصة نسال (الأمين العام الجديد) رجعتو لينا الخمسين الف دولار بتاعت قناة الضحى الإتبرع بيها (الأمين العام القديم) وللا لسه !
• عندما يصرح مسئول بأننا سوف نكون في عداد الدول المتقدمة بعد سنوات قليلة يجب أن يحال إلى الفحص الطبي (أكيد بيركب الفيل) !
• عندما تصبح الترضيات هي المؤهل للوظائف الدستورية فتأكد أن عربة الوطن تسير إلى الخلف !
• عندما تستمع إلي معظم أأئمة المساجد فى خطب الجمعة تبصم بالعشرة بانهم يعيشون في كوكب آخر (ما عندهم أي علاقة بقضايا المجتمع) .. يركزون كثيراً على إخوة يوسف .. والمسيح الدجال و … (هو في دجل أكتر من الحاصل ده) ؟
• عندما تصرح وزارة الرعاية الإجتماعية في تقريرحديث قدمته لمجلس الوزراء فى اكتوبر نهاية العام الماضي بأن نسبة الفقر في السودان (4.3%) فهذا يعنى أن الوزارة تستخدم آلات حاسبة (صينية ) !

كسرة :
• عندما يصرح أحد مساعدي الرئيس قائلاً : لا أمثل والدي في موقعى الحالي نقول ليهو (يعنى بتمثلنا نحنا)؟

Advertisements

10 تعليقات

  1. حبيبنا الفاتح والله كلامك كله صح و100% وبس زيد
    عندما يقع لاعبيبنا فى كل خطوة وكل دقيقة فتاكد ان التبولة والمشويات قد اثرت على حركتهم وركبهم

  2. تسجيل حضور وبنرجع ليكم بعد حصة الفطور ..

  3. السلام عليكم ، البرف و الاخوان ، اللخو السلاوى انتو لسه بتفطروا ؟؟؟ اشتقنا للزمل و الزبده و المرملاد ، البرف الكلام البسوى الانفطارات الداخليه ما احسن نختاه ، سؤال عجيب : قروش المشاريع الباعوها ويني ……….. عجبى

  4. بمناسبة الرقم الوطني فانا قبيلتي طي حا اثبتها كيف ؟؟؟

    و قصة الرقم الوطني ده عنصرية في عصر العولمة و ربط السيستم كلو مع بعض دي خرافة فشلت حتي امريكا و بريطانيا
    و انا واحد من اولادي عمره سنة و نص قعد معانا منتظر الصف من 9 صباحا الي الساعة السابعة مساء
    عشان يبصموه و يصورهو و الحمدلله الولد رجع بحمي و اسهال و قلت ليهو ابشر يا وليد ناس الحكومة ديل بيبنوا للاجيال الجاية و مثلما قال المرحوم الزبير في ديسمبر 1989 نحن بنبني للاجيال الجاية
    و تخيلوا نحن زاحين في الصف يجي واحد و اولاده شغال ……… توش يدخل — و تاني يجي واحد موظف …….. يزرقوا ليهو رقم في النص و نحن اسمنا يجي بعده و الولد الكبير بيقول لي ده معناها شنو يا ابوي . قلت ليهو – ده غلابة و مش غلابة – طرة و كتابة – لانو اذا قلت العملية واسطة و رشاوي و بلاوي
    عاوز شهر عشان افهمو

    تخريمة : المفروض يكون الموافقة عليه بالاستفتاء

  5. البروف والاحباب..سلام…
    عندما تسمع (المدفع الرزام) تأكد تماما انو الجماعة ناوين ليهم على عملة !
    عندما تسمع ( احبو وحاب نوناتو) تعرف انو (هناى) قعد يهز !
    عندما تسمع( المشروع الحضارى) تعرف انو طيارتك قامت !
    بس..

  6. عندما لا نستطيع وضع دستور دائم طيلة ال 56 سنة معناها نحنا أي كلام ولن يسطر التاريخ مولد شعبنا .
    عندما نكتشف بعد 56 سنة انو الجنوبيين ما بشبهونا وبيختلفوا عننا في العرق والدين والثقافة معناها بعد 57 سنة ح نكتشف ناس تانيين وبعد 58 سنة ح نكتشف ناس تانييين غير الاولانيين .
    عندما يحاول خليل ابراهيم دخول جوبا عن طريق شمال كردفان معاناها نحنا قرينا الجغرافيا غلط أو خليل عارف انو أمننا أي كلام .
    عندما تسقط طائرة هيلوكوبتر ويظل المسئولين يحلفوا في الاعلام لمدة 3 يوم انها وقعت بسبب عطل فني معناها في ( إنّ )في الكلام .
    عندما تسمح ادارة الجامعة بدخول العسكر الي حرم الجامعة لضرب الطلاب وبعدها تصدر قرار بقفل الجامعة معاناها القصة ما قصة مناصير .
    عندما اكون انا وابني وحفيدي في بلاد الاغتراب معناها حكوماتنا كلها أيييييييييييييييييي كلام .
    كسرة :
    في الكسرة حقتك دي الزول ده ما احترم عقولنا ابدا !! لكن رِكِيب سرجين وِقِييع ومساك درين ضِهِيب .

  7. السلام عليكم اخوي عساك ع القوة (=
    كان عندي سؤال يوم شفت مدونتك
    عجبتني كثير صراحة
    وحبيت الاضافات اللي مسويها الى جانب روعة حروفك (=
    معي مدونة ع الوورد برس
    بس تعبت وانا احاول اضع عداد للزوار وعداد للمتواجدين
    او احدث التعليقات او التدوينات )=
    وسألت كثير بس مافي فايدة )=
    اتمنى ألقى إجابة شافية لاستفساراتي بالرد هنا واعتذر عن اضاعة وقتك الثمين
    مع الشكر لشخصك الكريم

  8. نسيت اعلق على تدوينة عندما .. كل حرف يحكي واقع (=
    كتبت فأبدعت

  9. عندما نقول في بداية كل عام (إن شاء الله السنة الجايةالاستقلال يجينا ونحن أحسن)معناها نحنا كل سنة راجعين لورا عدة خطوات !
    عندما يتم اعتقال المهندس محمد حسن عالم عينك عينك قدام كل الشافو الفيديو بتاعو الفضح فيهو نافع .. معناها شعبنا وصل إلى مرحلة الغيبوبة التانية !!
    عندما أكتب في مثل هذا اليوم معناها .. أريد أن أقول لكل شعبنا السوداني الفضل .. كل عام وأنتم بخير وربنا يرفع مننا البلاء ..

  10. اب احمد….سلام…
    لطختنا لطيخ جد !
    ربنا يرفع من قدرنا ويشفى تجاهلنا دا..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: