يقولون

• يقولون : نعم الإله على العباد كثيرة وأجلهن نجابة الأبناء
• فأقول : بس ما في الزمن الردئ ده .. لأنو عندي صديقى عندو أولاد إتنين خريجين طب وقاعدين عاطلين !
• يقولون الصبر مفتاح الفرج
• فأقول : المسألة في الأخير تعتمد على ماركة (الطبلة)
• يقولون : سافر ففي الأسفار سبع فوائد
• فأقول : نسافر بي شنو تطير عيشتنا نحنا قادرين ناكل عشان تجيب ليها سفر كمان
• يقولون : الدراهم مراهم
• وأقول : وكمان مضادات حيوية
• يقولون : لاَ تُعطِني سَمَكَةٌ بَلْ عَلِّمْني كيف أَصْطَادُها
• وأقول : أها والزيت والفحم كيف؟
• يقولون : اطلبوا العلم ولو في الصين
• وأقول : طيب ناس الصين يطلبوهو وين؟
• يقولون : أعط الخبز لخبازه ولو أكل نصفه
• وأقول : عيشنا أساسا (نص) عشان كده يتم تعديل المثل ليكون (ولو أكل ربعه)
• يقولون : ما طار طير وإرتفع إلا كما طار وقع
• فأقول : كلام صاح 100% بس في حالة (اللساتك ما تنزل عند الهبوط) !
• يقولون : أنا وأخوي على بن عمى وأنا وبن عمي على الغريب
• فأقول : أنا وأخوي وبن عمى (على الحديدة) ! قبل شوية جوني مزنوقين في قرشين لاقونى (أباطي والنجم) !
• يقولون : عرس وجيب ليك ولد يشيل إسمك
• فأقول : طيب مش ممكن يشيل حالك !
• يقولون : من لم يمت بالسيف مات بغيره
• فأقول : أكيد (شارع مدني) !
• يقولون : تعددت الأسباب والموت واحد
• فأقول : بل تعددت المستوصفات
• يقولون : مافيش دخان من غير نار
• فأقول : طيب نار الأسعار دى دخاخينا وين؟
• يقولون : لو كانت الأرزاق تجري على الحجى لهلكن إذن من جهلهن البهائم
• فأقول : وكمان (بعض البشر) !
• يقولون : صاحب بالين كضاب
• فأقول : كان كده عندنا كترة كضابين .. تلقاهو رئيس مجلس إدارة .. وعضو منتدب .. وسكرتير مجلس أمناء وشنو ما عارف !
• يقولون : كان ما متنا شقينا المقابر
• فأقول : كمان شن جاب (العملي) للنظري !
• يقولون : جوع كلبك يتبعك
• فأقول : قبل ما تجوعو إتأكد من قواه العقلية
• يقولون : يقولون العدل أساس الحكم
• فأقول : وبرضو كمان القفة (يا حليل القفة) !
• يقولون : من طلب العلا سهر الليالي
• فأقول : عندنا لازم يسهر الليالي … يقرأ في أرسين لوبين !
• يقولون : السماء لا تمطر ذهباً ولا فضة
• فأقول : ولا موية ذاااتو .. الخريف بقى مطرتين وبس !
• يقولون : لا بد دون الشهد من إبر النحل
• فأقول : هنالك من يتحصلون على الشهد لا إبر ولا نحل ولا بطيخ
• يقولون : من سار على الدرب وصل
• فأقول : هذا صحيح في حالة أن لم تدركه المنية قبل أن يصل !
• يقولون : شَمِّرْ وائتزر والبس جلد النمر
• فأقول : وطوااالي أمشي سجل إسمك في الفنون الشعبية
• يقولون : الصديق وقت الضيق
• فأقول : هسه الواحد يعمل شنو؟ إذا أصحابنا كووولهم متضايقين !
• يقولون : اخوك كان حلقوا ليهو بل راسك
• فأقول : مش ضروري أوى حكاية تبل راسك دى لأنو في حلاقه (على الناشف)
• يقولون : الماشاف البحر تخلعوا الترعة
• وأقول : وكمان أكيد الما شاف الهنتر تخلعوا البرادو
• يقولون : الجاتك في مالك سامحتك
• فأقول : كدي واحد يقول الكلام ده لي زول سرقوا ماهيتو !
• يقولون : سيد الرايحة يفتش خشم البقرة
• واقول : طبعن لو لقاها في خشم البقرة .. (التجاني الماحي) على طول !
• يقولون : لا يضيع حق وراءه مطالب
• وأقول : بس السرعة مطلوبه
• يقولون : الدهر يومان يوم لك و يوم عليك
• وأقول : ما طواااالي .. مرات يوم ليك وستين يوم عليك
• يقولون : التدبير نصف المعيشة
• وأقول : ده لمن يكون في معيشة من أساسو
• يقولون : العين ما بتعلا على الحاجب
• وأقول : والله مع تطور الطب ده ممكن يختوها ليك (بوصة ونص) فوق للحاجب
• يقولون : من راقب الناس مات هماً
• وأقول : والله المراقبة دى كان بتكتل ما يفضل شرطي مرور واحد
• يقولون : عند الإمتحان يكرم المرء أو يهان
• وأقول : ده طبعن لو الإمتحان (ما مكشوف)
• يقولون : الخواف ربى عيالو
• وأقول : على الخوف طبعن
• يقولون : ان كترت عليك الهموم ارقد نوم
• وأقول : لو بنمشي بالمثل ده كان الشعب ده هسه كلو راقد
• يقولون : الشقي يلاقي العضم في الكبدة
• واقول : هسه السعيد يلاقي الكبده ذاااتا !

كسرة :
يقولون : المصائب لا تأتي فرادى .. (بتاع النفايات) ومتحصل (الموية) على الباب !

18 تعليق

  1. السلام عليكم ، البرف والاخوان ، فاصل اعلانى ونرجع بعد قليل …………….. عجبى

  2. اخى جبرا والاخوه الاعزاء
    سلامات……. غبنا منكم بسبب مرض الشفع والبحث عن التشخيص السليم وما لاقين ونسال الله ان يتم الشفاء دون الجوء الى الاطباء
    لقد فاتنى كثير من المداخلات على كل حال اجازتى فى البيت وحضورى للتلفزيون سبب لى كثير من الامراض المزمنه
    بالمناسبه ياخوى جبرا انته السودان دى نال الاستقلال السنه الفاتت دى ولا الحاصل شنو مافى مسرح ولانادى ولافسحه الافيها فنان بهنق الحاصل شنو وتحت رعاية الدوله الرشيده سكسكه ورقيص وهيصه وكلام فارغ ما ليهو علاقه باستقلال السودان
    ولا الكلام وراهو كلام

  3. السلام عليكم ، عينات على الوتيره ، الباب البجيب الريح سده و استريح ،طيب لو اصلا ما فى باب ،ولا جات كتاحه زى العايشين وسطها دى ، ولا عندك شفع اولاد …… ما فاهمين كل مره فاتحين عليك فتحه .
    كان غلبك سدها وسع قدها ، يمكن الوساع يوصلك تندلتى ،
    اظهر وبان عليك الامان ، تبقى غلطان غلطان ثم غلطان ،
    حقك تدى منبطح تكوسلو بالنطح ، و انت من اساسو مطلع حقك ليه ،
    الجابو يتبالابو ، على الط….. كلو جابو البرف ، و قلنا خلونا نمشى جنب الحيط كما قال اخوانا فى الشمال ، سؤال سخيف : كم عدد المليارديرات من الوزراء و اشباه الوزراء ؟ ………………. عجبى

  4. يقولون انقذناكم
    واقول كان تخلونا نغرق احسن
    يقولون عيد الاستقلال ال56
    واقول كان عيد لما السودان كان كامل مامجزء
    يقولون السودان سلة غذاء العالم
    واقول سلة ممكن بس غذاء دى مستحيلة

  5. أخوي المحتار تحياتي
    يقولون: السودان سلة غذاء العالم.
    وأقول: السودان سلّ روح العالم .. !!!
    مش؟

  6. بت وراق .. سلامة الشفع وإن شاء الله ما يشوفو شر … عليكي بالجردقة والمحريب والحرجل والكركدي .. عشان ما فيهم احتمال خطأ تشخيص .. وما تنسيني من البياض ..وكدا

  7. اخوى أب أحمد
    مش ونص وتلات اربع

  8. هم اللي بيقولوا ديل ذاتهم رايحين فالقول قول الله و من بعده قول الرسول الكريم فهو القول الرشيد و فيه
    العظة و الفوائد – اما الامثال و الحكم فكلها راجعة اصولها الي القرآن و السنة و ما عداهما اجتهاد
    و الاجتهاد اما صائب و اما خائب
    و اما بت وراق لك التحية و ساعدينا بزقروتة كده — اقول ليك سمعت بحاجة اسمها فرح اجباري فرح طوالي – زمان كان التلفزيون المصري بيعكس ليك الجميل عبر الفضائية المصرية الواحدة ( لما كانت فضائية واحدة )
    الجميل فقط في مصر عشان السياحة و كده و كان مصر فيها بلاودي و زبالة و تشرد و وسخ الدنيا كله
    و هسع نحنا عاوزين نعكس للعالم ان البلد كلها فن و طرب و بهجة و لا همانا حصار و لا همانا انفصال و لا همانا
    قتال و لا همانا حمار عبد العال و ده اللي بيسموه النفاق عيني عينك النفاق تحت الحزام و الزقاق
    و بمناسبة الافراح دي الشئ لما يكثر بيمسخ و انما اذا كان هو مسيخ اصلا فلازم يطعموا بحضور شخصيات
    مهمة و فاقدة الهمة و شايلين العصي و كلنا عارفين العصا لمن ………..
    و ان شاء الله ربنا يزيد السودان افراحا و افراحا – عيد الاستقلال – عيد العيال – عيد الشهيد – عيد الفقيد
    عيد العميد – عيد الانقاذ – عيد الناس الشايلة عكاز – عيد الام – عيد التم التم – عيد اللحم – عيد الشحم
    عيد النفرة – عيد السفرة – عيد السد – عيد الدك و الهد – عيد العمال – عيد الاشبال – عيد عرض الحال
    عيد باصات الوالي – عيد انا مالي – عيد سيبوه في حالو – عيد النشلو مالو
    تفليسة : ذي ما قال المثل – ان غلبك توحدها وسع تمردها
    و ان غلبك تكبح الجماح اشغل الناس بالافراح
    و بانهيار البنية التحتية اعمل عيد لست الطعمية

    و اللهم انزل الغيث – اللهم انزل الغيث – اللهم انزل الغيث

  9. إنت قلت : هنالك من يتحصلون على الشهد لا إبر ولا نحل ولا بطيخ
    وأنا بقول : ناس بتمشي سنين طويلة وناس بدون ماتمشي توصل .
    إنت قلت : لو كانت الأرزاق تجري على الحجى لهلكن إذن من جهلهن البهائم .
    وأنا اقول : علي بالطلاق العايشين بهائم وليها قروون .مش بقولوا للنافذ منهم [ قرن كبير] ] .
    إنت قلت وبرضو كمان القفة (يا حليل القفة) !.
    وأنا أقول منو قاليك حليل القُفة ..ما الناس كلها شايلاها وكمان [ أم أضنين ] .
    إنت قلت طبعن لو لقاها في خشم البقرة ..
    وأنا أقول : يا أخوي وين البقر البفتح خشمو عشان يفتشوا الرايحة بتلقاها مالين ليها خشمها عشان ما تتكلم !
    إنت قلت : ده طبعن لو الإمتحان (ما مكشوف).
    وأنا أقول : ولو مكشوف لابد تكون عندك مهارات أخرى عشان تقنع التاجر,والخضرجي عشان يديك نص علبة صلصة.

    ((( يا وجعي كيف خيم فوقها البؤس)))

  10. يا عمنا جبرة ويا جدنا كوكو
    نعين ليكم الفه ولا شنو ,, حضور غياب حضور غياب
    يقولون : الحال مايل
    نقول : حالنا ماهو حال وشكلو من المحال يستعدل
    والله الواحد لو ما مقتنع انو الامور بيد ربنا جل جلاله كان قنع وفعلا ناسنا ديل بيقنعو

  11. اب أحمد شكرا على الاهتمام وبدانا العلاج …وبياضك موجود الدعاء لك فى ظهر الغيب ان يجعل لك سعادة الدارين
    اما اخى جبرا يقولون (نسال عنه كان طول )
    نقول : وماهاميه كان غبنا

  12. * يقولون ح يطبقوا الشريعة
    نقول يعني السكسكة دي خم الرماد.
    *يقولون عايزين مارسيدسات
    نقول كنا قايلنكم جايين عشان ترجعوا لينا المارسيدسات .
    * يقولون 2012 هو الاستقلال الحقيقي
    نقول ياخي اختشوا علي دمكم وكفاية فتن واستغلال .
    * يقولون الشيطان ولا الكيزان
    نقول كنا بنسمع لكن هسع سمع وشوف .
    * يقولون خطة خمسية
    نقول تااااااااااني خمسة سنة ياخي خمسة وخميسة علي صبرنا ده .
    * يقولون سير سير
    نقول وقف وقف قطعت نفسنا .

  13. جل جلاله لاله شريك ولا له مثالو..الله…
    يا سايق يارايق,,ألنظرة ماشة وراك وقف وقف وسوقنى معااااك ! ويييييييييييييييين..
    بس خلاص….

  14. يقولون جاهد يا إنتقاذي بغزوة
    يقول: و أي جهاد غيرهن أريد لكل حديث بينهن بشاشة و كل إنقاذي بينهن شهيد

    و اللا كمان غلط نجيب سيرة الجهاد والشهاده هنا ؟ !

  15. أمثالنا ذاتا مع الظروف الحاصلة دي إتغيرت .. فمثلاً جات أمثال من النوع:
    البتابع الجداد بوديهو كنتاكي.

  16. * يقولون يا هو يا بيت أبوي
    الله يجازي محنك يا التلفزيون الما عندك سيد . مرة تعلم اولادنا السرقة بالشاي ومرة تحرض حريمنا للطلاق بالرز ومرة تغرينا شديييييييييييييد بالعدس نقول عليهو شنو ده ؟ ما قلتو لي … ما قلتو لي !!

  17. العزيزة الغالية بت وراق
    إن شاء الله الأولاد يكونوا بقوا كويسين ..! معليش كنتا بس مشغول شوية .. (ما هاميهو كان غبنا) دى .. دخلت عليا دخلة شديدة والله .. !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: