نجر ساااكت

عزيزي القارئ .. إلتقى مايكرفون (ساخر سبيل) بعدد من المواطنين وقد كان موضوع الحلقة هو سؤال يطرح على المواطنين : ماذا لو تم تعيينك مستشاراً في تشكيلة الحكومة (الجديدة)؟ .. أتركك والإجابات
• عوض كلتشات (ميكانيكي) : أول حاجه أعملا ح أشوف حكاية بصات الوالي المما جابوها ما إشتغلت ليها يومين بركت دى .. ح أفتح المكنة وأشوف البايظ شنو؟ وأشوف السلندرات مخروطة على كم أصلو حكاية إنها جديدة دى ما بتمشى علينا يا (فردة) .. المهم كان بتقبل عمرة نعمرا وأكان كمان ما بتقبل نقوم نركب ليها مكنة جديدة أصلو الحكاية كووولها مكنات في مكنات !
• حسن سلوكة (مزارع) : شوفو أنا أولن بالتبادى ح أمشي للزول الإسمو المطيرى وللا شنو ما عارف ده .. العاوز يعمل لينا أطول برج في العالم وأكبر مدينة بتاعت شنو ما عارف وأقول ليهو .. شوف يا زول الجداشر مليار دولار بتاعتك دى أنحنا محتاجنك تستثمرا فى مشروع الجزيرة ده .. وده الكلام البيخلينا من الدول المتقدمة .. ما تسمع ليا الكلام القالوا ليك مستشار الرئيس بإنو برجك ده ح يخلينا دولة متقدمة عشان الزول ده والله بقى يتكلم سااااكت وأنا المزارع (الزول الله ده) قاعد أضحك بقيت من تصريحاتو !
• علي بليه (عجلاتي) : شوفو مع إنو حكاية إنى أبقى مستشار دى واسعة شوية (والجنزير) بتاعا عاوز يتشدا حبه لكن بقول ليكم على بالطلاق أول يوم أمسك فيهو أركب ليكم البلد دى كوووولها عجلات .. وأول ناس أركبهم ليك المسؤولين ..قال أيه عاوزين مرسيدس سوداء بالنهار وبيضاء بالليل .. والله أخليهم ليك أي زول فيهم ماشي ليهو إجتماع ما يقوم (سداري) ما يصل !
• محمد برمة (بتاع اللبن) : لو ده حصل بعد كده الواحد (يزيد الموية) للبن بى إضمئنان .. مش أى مسئول أول ما يعينوهو أول قرار ليهو بيعملو عشان صالح لبنو .. بسم الله أقصد (ورقو) ؟ أنا أول قرار ح أتخذوا هو (عدم فحص الألبان المغشوشة) !!
• حسين بنبار (جزار) : يا سلام والله دى ح تكون حاجة جميلة أقل حاجة الواحد يعمل ليهو (سنكيت) زى الجماعة .. لكن بس المشكلة الواحد يشتغل فى الحكومة العاملة زى (الكمونية) دى كيف؟
• آدم سلسيون (بتاع أورنيش) : شوف يا معلم .. أهم حاجه في الموضوع إنو الواحد من صباح الرحمن ح يطلع مصاريفو .. أمسك ليك المسؤولين المعاي ديل وأدى ليك كل واحد (وش) أورنيش لماع مصلح .. بعدين أنا زول تفتيحة ما ح يقدر واحد فيهم يقول ليا إنتا زول دستوري ومسؤول بتشتغل شغل خاص ليه؟ ما هم كوووولهم العندو شركة والعندو مزارع والعندو شنو ما بعرف داك يعنى جات على (الأورنيش)؟
• أحمد عراوى (ترزي) : أنا والله من زمان عارف إنو الجماعة ديل ح يستعينو بيا عشان قصة التفصيل دي عاوزه ليها ترزى فنااان وكده .. أول حاجة الجلاليب دى ح نعمل ليها جيب رابع نسميهو (جيب الكومشن) وجيب خامس (حق المخصصات) والزول الح يكون باع (خط هثرو) ده ح نعمل ليهو جيب مخصوص نسميهو (باااالغتا لكن) !
• على الله (معاشي) : شوف يا بنى .. أول حاجه أنا ما بستغرب إنى أتعين بعد عمرى بقى كم وستين ونزلتا المعاش لأنو ناس الحكومة ديل تلات أرباعهم أكبر منى ولسه شغالين .. الحاجة التانية انا لو إتعينت ح أقوم أول حاجه أجيب كل المعاشيين وأسالهم واحد واحد وأقول لكل واحد نفسك في شنو؟ الح يقول ليك (حبوب الضغط) الح يقول ليك رسوم (عملية بروستاتا) الح يقول ليك (متأخرات الإيجار) الح يقول ليك (شية جمر) !! أنأ ح أرفع المعاش الشهري لكل معاشى عشان يكفيهو للعيش في حياة كريمة .. معقولة يا إبنى الزول يدفع للبلد دى أغلى سنوات عمرو وشبابو بعدين معاشو ما يجيب ليهو خمسه كيلو لحمة ؟
• عبدو نازل وين (كمساري) : شوف أنا ما تشوفنى كده .. عندى بكالريوس هندسة كهربائية يعنى العملوهم مستشارين ديل ما أحسن منى .. بس الظروف ما خدمتنا ولجنة الإختيار كل ما أمشى معاينة يقولوا ليا سمع لينا سورة الكافرون وأنا بينى وبينك مما كنتا في الإبتدائي حفظت السور كووولها لكنى بس معقد من السورة دى وما قادر أحفظا ثم ياخي هم عاوزين يشغلونى مهندس وللا (داعية؟) غايتو أنا أول ما أمسك ح أعين كل الكماسرة الشغالين معاي ديل في عربات المسؤولين .. يعنى كل عربية مسئول يكون فيها كمساري راكب معاهو … العربية البيتحرك بيها في الشغل … كمساري .. البوكس البجيب الخدار ويودى الأولاد المدارس … كمساري .. العربية البتودى المدام بيت الحنانة ومحل الطلح … كمساري .. كل مشوار بي حقو .. وآخر اليوم الكماسرة ديل كووولهم يوردوا ليا القروش وأوع زول فيكم يقول ليا ح تورد القروش دى للمالية؟ أوردا للماليه ليه؟ إنتو ما قريتو تقرير المراجع العام البيقول ليك المسؤولين ديل كل واحد عامل ليهو حساب (جانبي) ؟ هو الجانبي ده أنا ما بعرفو ؟
• حنان مسكول (حنانة) : والله أنا ما عارفة يعنى ح يستفيدوا منى في شنو … لكن على المستوى المهنى الشخصي بفتكلر إنو المسألة دي لو حصلت ح تكون (طاقة القدر) إتفتحت ليا .. لأنو إضافة لمتطلبات العمل والوظيفة الما عارفاها شنو ولا عارفه مهامها شنو لكن دى فرصة إنو الواحده تدخل منازل زملائها المسؤولين وتتعرف على زوجاتهم وتوسع السوق بتاعا شوية وطبعن الحنة بتاعت زوجات المسؤولين دى سعرها براااهو وبعدين إضافة لكده يعنى ما بخلوها (تبهت) !!

• كسرة :
جارنا عباس النجار قال ليا ما سألتنى أنا ليه يا أستاذ ؟ والله أنا أكتر زول مؤهل يكون مستشار ما الحكاية كوووولها بقت (نجر) سااااكت !!

Advertisements

23 تعليق

  1. انا طبعاً يا عمك لو بقيت مستشار اول حاجة ح اعملها اوقفك انت من الكتابة
    ما تستغرب اى ح اوقفك من الكتابة خالص
    اسألنى ليه ؟؟؟؟؟؟؟؟
    لانك طبعاً ح تفضحنى وحتكون متابعنى فى الصغيرة والكبيرة ليه ؟؟؟؟؟؟؟
    لانو طبعاً حاكون زى الجماعة لو لقيت فرصة فى المرسيدسات حاركبها . ولو لقيت فرصة فى خط هيثرو حابيعوا وابيع ناظرو زاتو . وانت ما حتريحنى بالكتابة .
    لكن ما بنسالك حقك حيجيك لغاية عندك
    مع تحيات مستشار الرئيس

  2. وليه يعنى ياسيد جبرا ما سالتوا واحد من الناس المحظورة تعيش فى بلدها ومحرومة من العمل وكسب الرزق ومضايقة فى نفسها الا تبقى من جماعة المؤتمر الهندى!

  3. حاج أحمد السلاوى | رد

    الفاتح .. أنا غايتو لو عينونى مستشار للسيد الرئيس إنت تانى ما حتاكل معانا عيش .. تعرف ليه ؟ لأنى ح أخلى الناس تمشى على العجين ما تلخبطه وبالتالى إنت ما حتلقا ليك تانى موضوع تكتب عنه .. ما دام كلو شى ماشى صاح ..
    كلامى دا فى محلو ..ولا أنا غلتان ؟؟
    هبشة سغيرووووونة ..باقى ليك بعد دا فى زول بيقدر يصلح الخراب الحصل فى دولة أمازونيا العظمى دى ؟؟والله لو عينوا مليون مستشار مش حينعدل ..
    وخلونا النشوف آخرتا شنو ..!!

  4. مأمون حميدة ما محتاج سؤال لأنو أول قرار ليهو رخص للأخصائيين و (مجاناً كمان) يفتحو ليهم صيدليات ( والله صحي ) يعني لحق الصيادلة (أمات طه) عشان مصلحة (أم الجابو أبو أهلو الشخصية) وبعد شوية تلقى الصيدلي من ديل شايليهو بندول واسبرو ووا قف بيهو في الإستوبات مع ناس المناديل والزينة والمويه .. ومش كده وباااااااااااااس ده كمان قدم رشوة للصحفيين يتعالجوا في يستبشرون مجاناً كل إسبوع ( والله صحي ) عشان يعملوا نايمين .. الناس ديل قايلين الشعب السوداني ده شنو ؟ قلت أنحنا معقول نستاهل كده ؟ واحد قالي أنحنا نستاهل أبو كده زاتو……………….
    بالمناسبة يا جبرا عليك الله دخلني يستبشرون وقوليهم عالجولينا المجنون ده قاعد يقرا لكل الصحف السودانية لامن حصل ليهو كدة

  5. البرووف الرائع والسمار الكرام .
    سلامات .ومشتاقين .
    ياجماعه مالاحظتو معاى من يوم ماعينو الحكومة الجديدة الناسا كتار دى وكل نشرة مافيها غير (إلتقى نائب رئيس الجمهورية بمساعد رئيس الجمهورية .إلتقى بقصر الضيافة مستشار رئيس الجمهورية بوزير الدولة لوزارة الخارجية .إلتقى وزيرالكهرباء والسدود بوزير الدولة بوزارة الرى …..) والمسألة لمن نحسبا بحسابات التباديل بتاعه الرياضيات القديمة بنلقى أن هنالك 2835 لقاء رسمى على مستوى رئاسة الجمهورية والوزارات الاتحادية تحتاج الى 567 يوم بمعدل خمسة لقائات فى اليوم أى سنتين إلا شوية عشان الحكومة تكون مندمجة مع بعض وتتعرف على نفسها.
    الله فى…

  6. اخي جبرا ةالاخوه الاعزا
    انت مالك نسيت تسال حماده من روضة دار الحنان انته قايله صغير الزيه كتار وزراء ومستشارين

  7. وانا لوبقيت وزير اوقف الشعب دى كل صباح واديهو 100 صوط عشان شايف الحاصل دى وساااااااااكت

  8. انا غايتو لو عيونني مستشارة للسيد رئيس الجمهورية هع هع الله قال بقولك ياوزير الصحة مع انوالبلد مافيها صحة لكن اول شي مش حااعزلك بس من منصبك لكن حاعمل ليك محاكمة مش عشان انت الي جانب مهامك كوزير شغال برضو في القطاع الخاص كتار عاملين كده لكن عشان انت ووزارة السجم دي ناس همجيين وعشوائيين قلتا مابتعيين اي طبيب الا بامتحان وقلنا ما مشكلة بنمتحن وننجح مع انو امتحان ماعندو اي اسم ياخي ناس ممتحنين امتحان المجلس الطبي وماخدين شهادة طبيب عمومي تاني امتحان لشنو ؟؟ وبعدين تقول الا الاقل من خمسة سنة من تاريخ التخرج حتي يجلسو للامتحان طيب الفاتو خمسة سنة ديل فاتوها بمزاجهم ما من عمايل ال…. القبليك وبعدين ماتخاف الله ياخي يجلسو ليك الف واربعة طبيب وتشيل 135 بس وبعد ما تشيلهم تختهم في لستة الانتظار …

  9. والله عفيت منك يا بت وراق ده يكون اصح قرار من يوم استقلال جمهورية الخرتيت والبقت ما عارف ششنو داك

  10. بس ياناس عايز أعرف الفرق بين المستشار و المساعد حتى أختار التمسحة الكبيرة ولا شنو

  11. كلكم راعي و كلكم مسئول عن رعيته و ما كل واحد بيبقي مستشار الا اذا كان زول حمار و يحب العدار و الشمار
    و ساعي للهلاك و الودار و الله يرحم صبري عبد الستار

  12. احيييييييي عليهم ديل اكان عزبونا وغلبونا
    والله يا جبرا كتر خيرك بتفرق لينا الجوانا لا ربيع نحن جايبين خبروا لا شتا
    متنا من حروا

  13. لو بقيت مستشار انا حاريح ليك الجكومة دي راحة شديدة اول حاجة نطلع لينا فتوي بجواز الخمر (طبعا نحن ما اسلاميين وكده) وبعد ده اعمل ليك معالجة لمياه النيل لتصبح ( مريسة ) بعد داك مافي زول حايكون واعي وبعد داك كل المسؤليين والمستشارين (يعوسو عوسهم)

  14. السلام عليكم ، البرف و الاخوان ، كضابين كلنا ، اى واحد حيعملو مستشار حيبدا فى اللغف و اللهط و يشوف العندو شويه عايز يحصل ، بت وراق دى يا جعليه يا ساديه 100 سوط ، طيب خليهم 10 ، ميه حته واحده كتير ، محمد عمر بسيطه ياخى كمان يدو الصيادله حق فتح عيادات صعبه دى ، سؤال خطير : يا برف مافى واحد من ناس المحليات عملوهو سمسار عفوا اقصد مستشار …………….. عجبى

  15. ضبة عبدالجبار (حرامي): انا اول حاجة حاعملا انو اوقف مواد السرقة و انزل مواد جديدة بتدين اي واحد يتكلم في سرقة او اختلاسات او اي مخالفات من طبيعة اخذ الشيئ بالقوة و حاعمل نقابة لي اخوانا الحرامية ايوة على عينك يا تاجر و العضوية اولا لي صغار الحرامية ناس البسرق ملاية و عدة و ما عارف شنو و نديهم كورسات علشان يصلو مرحلة الدولية و مستغربين ليه ما البلد دب بتتسرق ليها اكتر كمن 56 سنة و ما عندها وجيع و في ال 22 الاخيرة دي بقت حمرة عين و الراجل يفتح خشمو يعني النظام ما احسن.

  16. الاخ الفاتح
    والله انا كنت متوقعك تكتب لينا شوية عن بصات الوالى دى اظنك ماقاعد تركبا عشان كده ما عندك عليها ملاحظات
    هى المواصلات الوحيدة الما عندها كمسنجى بكورك ولا كمسارى بقول تس تس انت وشطارتك تفتش للبص العايز تركبو يا تصنقع تشوف اليافطة لو شغالة محظوظ ولو ما شغالة تبارى البصات وتسأل الركاب ونامن تجى تنزل تتس براك شفت الحكمة دى وفوق دا كلو يوصلك نامن روحك تنسلا والعجب لوكان مكانك بعيد والاعجب انها اغلى من الحافلات ليه ماعارف

  17. انجتيزى
    حاتعين الفا فى القصر واكتب المهرجلين لان الفصل مليان شديد

  18. الاخوة الاعزاء بصراحه وللاسف الشديد التربيه عندنا اتعدمت والوازع الدينى بقى مافى
    للاسف للاسف للاسف اغلب الناس بقت لو لقت فرصه فى الحكومه همها تلغف وتريح اهلها وبس
    ونسينا كل لحم نبت من سحت فالنار اولى به
    الحديث القدسى ( ياعبادى انى حرمت الظلم على نفسى وجعلته بينكم محرما …. )
    وقال عليه السلام (أيما راع غش رعيته فهو في النار) وقال( من استرعاه الله رعية ثم لم يحطها بنصحه إلا حرم الله عليه الجنة ) أخرجه البخاري وفي لفظ يموت يوم يموت وهو غاش لرعيته إلا حرم الله عليه الجنة وقال( ما من حاكم يحكم بين الناس إلا حبس يوم القيامة وملك آخذ بقفاه فإن قال ألقه ألقاه فهوى في جهنم أربعين خريفا ) رواه الإمام أحمد
    اللهم اصلح حكامنا واصلح بطانتهم واصلح حالنا يارب العالمين

  19. قالوا ( بيت الشوري ما خِرِبْ ) لكن بي كترتم دي بيتنا ح يتخرب …
    انتو الحاصل شنو الحيكومة دي قلبت الدنيا غناء ورقيص وكمان جونا مستثمرين عرب يعملوا لينا ابراج والجاي يزرع جاي يزرع لينا زيتون يعني دخن لا .. فتريتة اوعك .. قمح ورحمة امي ياخد بالشبشب …وكمان امريكا رجعت تتكلم عن التطبيع ورفع العقوبات !!! الجماعة شكلهم انبرشوا ولحسوا الكوع…. بس عليكم الله دارفور لا .

  20. شكرا استاذ الفاتح ربنا يخدر ضراعك ويسنن قلمك فوق رقاب كل مستهتر وغير مسؤول ..

    بعد اذنك تم نقل العمود لصفحة (نكورك ليكم ما تجو نجيكم تكوركو )بالفيس بوك وتم ذكر المصدر

    شكرا

  21. الأخ الأستاذ الظريف الفاتح جبرا..كتر الله من أمثالك الذين يرسمون البسمة على شفاة نسيت الابتسامة منذ 22 عاما بالتمام والكمال..ومش كدى وبس وكمان بيحاولوا عن طريق النقد الساخر حل مشكلات السودان المعقدة.. أنا لن أعلق على الحكومات الخربانة ولكن سأعلق على تصميم الموقع لأن هنالك صعوبة فى قراءة مقالات مكتوبة بالأسود على خلفية برتقالى وكثيرين من أحبائك ناقشوا معى صعوبة القراءة من الموقع وأجمعوا كلهم على أنه من الأفضل أن يكون الموقع باللون الأبيض والكتابة سوداء أو بألوان أخرى وياريت يدخل اللون السماوى لون النيل واللون الأخضر لون خضرة الوادى الخصيب بدلا من لون التصحر الذى نشاهده كلما فتحنا الموقع..تقبل تحيات كثيرين من أحبائك.د.محمد عطا البحرين

  22. يا حنين اللقائأت دي صلة رحم انت قايلة شنو ما كلهم اهل حوش بانقة

  23. عمنا الفاتح انا ما داير ابقا مسشار ولا حاجة انا داير حااجة وااااحدة بس القا حقوقي المفروض القااها من ما ولدتني امي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: