توقعات

يسألنى كثير من القراء عن توقعاتي للعام الجديد .. هاكم بعضها :
• أن يتم العثور على خط (هيثرو – الخرطوم) ويوضع كمعروضات في القضية لحين إكتمال التحري (الما ح ينتهي)
• أن يتم إرتفاع سعر النفط الذى نستورده وينخفض سعر النفط الذي نصدره
• أن يتم إستعادة مبلغ الـ 50 ألف دولار الذي سبق أن تبرع به ديوان الزكاة لقناة فضائية وهمية قبل أربعة سنوات (من صاحب القناة المزعومة) ويعود إلى خزائن بيت مال (المسلمين) مع إعتذار (سغيروني كده) من ناس الديوان !
• أن تختفي من تقرير المراجع العام كل حالات التعدي على المال العام وذلك بسبب (الواعظ الدينى وكده) !
• أن تشهد الدوحة مفاوضات سلام مع كل من (نسور الجو) و(أسود الصحراء) و(تماسيح النيل) !
• أن تزداد عضوية الحزب الحاكم من 90% إلى 120%
• أن تزاداد نسبة البطالة في البلاد بحيث يصل متوسطها إلى 3 (أبطال) لكل أسرة !
• أن تتم زيادة المرتبات بنسبة تصل إلى 0،002%
• أن يتم ارتفاع معدل صادراتنا من طائرات (سافات 2) وسافات 3 وذلك يعد إشتداد الطلب (عالمياً) عليها .
• أن تقوم الدولة بتوفير 24 فرصة عمل للخريجين !
• أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده) !
• أن تنخفض أسعار السلع الغذائية .. (طبعن عشان مافي زول قادر يشتريها)
• أن تنخفض حالات الإنتحار بعد أن يتم إصدار قرار بمنع إستيراد (الصبغة) !
• أن يفوز المواطن السوداني (عبدو تفتيحة) ببطولة العالم للقفز بالزانة (من بتاع بوفيه إلى نائب مدير عام) !
• أن يحدث تحسناً في مياه الشرب حيث يتم القضاء على البكتريا و(تفضل الطحالب) بس !
• أن تتفاقم حمى الأغنيات (الحربية) وتحطم أغنية (قطعنى بي سكينك وبيعني للجزار) الأرقام القياسية في المبيعات .
• أن يتم إحتراف اللاعب الاسطورة (عوض كورنر) بنادى (برشتونا) .
• أن ننال جائزة السعفة الذهبية في مهرجان (كان) عن فيلم أبي فوق الشجرة ( شانق نفسو طبعن) !
• أن ندخل موسوعة جنيس للأرقام القياسية بإنتاجنا لأصغر عيشة في العالم (لا تري بالعين المجردة) !
• أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ !
• أن يكثر (الطيارون) في بيوت الأفراح حتى يلجأ اصحاب الفرح لدعوة المعازيم عن طريق (البصمة) !
• أن تتمكن المحطات الفضائية السودانية وإذاعات الأف أم من تطبيق شعار (مذيع لكل مستمع) !
• أن تتم سرقة (البنك الدولي) من داخل أحد منازل المسؤولين
• أن يتم شراء لعيبة محترفين بما يعادل عدد 5000 ماكينة غسيل كلي
• أن يتم إنشطار حزب الأمة إلى عدة أجنحة .. جناح التأصيل وجناح التفصيل وجناح التبرير وجناح أم جكو
• أن تنحسر ظاهرة نسيان الأطباء للشاش داخل بطون المرضى بفعل تنامي ظاهرة نسيان الموبايلات !
• أن تنحسر ظاهرة أطفال الشوارع بفضل حل الدولة لهذه الظاهرة نوووهائياً وذلك بتوسيع دار المايقوما ليستوعب ألاف الأطفال
• أن تتحول البلاد إلى دولة متقدمة بفضل قيام برج المطيري أو كما قال سعادة المستشار !
• أن تصبح الفراخ الوجبة الشعبية للشعب السوداني الفضل مما يقوى من بنياته الأساسية ويجعله (يتعافى) من كل الأمراض !
• أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية !
• أن تتوقف الغارات الإسرائلية على شرق البلاد خوفاً من (حق الرد) !
• أن تنخفض أسعار اللحوم بشكل ملحوظ بسبب منافسة بعض اللحوم (الأخري) لها !
• أن يرتاح معظم المعاشيين بفضل رحمة الله وتبديله لهم بدار أحسن من دارهم ومعاش (أحسن من معاش الحكومة) !
• أن تتناقص حالات جرائم الإغتصاب نسبة لتفهم الحكومة بأن (العطالة) وراء هذه الظاهرة (مش قامت بتوظيف الـ 24 الفوق ديلك) !
• أن يتم إنشاء مفوضية (عليا) للفساد وذلك لمراقبة أداء المفوضية (العامة) للفساد والتى بدورها سوف تقوم بمراقبة المفوضية (القالوا ح يعملوها دى) !

كسرة :
أكبر توقعاتي لهذا العام الجديد أن تزداد نسبة المتسولين بحيث يكون هنالك شحاد مقابل كل مواطن (شحاد) !

18 تعليق

  1. بدون سخرية و امتعاص – نحن نريد و هم يريدون و انت تريد و الله يفعل ما يريد
    سؤال بالخط العريض و الخط الدائري ؟ انت خط هيثروا ده ما ادوك نصيبك و لا شنو اتفلقنا بيهوا – اذا كان كده
    اطلب تعويض بدل منه ( أرض سكنية من اراضي المدنية الرياضية )
    وبتوقعاتك دي طلعت لينا النظام كلو و اعوانه -(( حرامية – مدلسين – غشاشين – مرتشين – كذابين – باختصار ( منافقين )
    و المواطنين -(( مساكين – جعانين – عيانين – ما لاقين – سلكتين – صانين – للنفس كاتمين ))
    و اقول للجميع و انت سيد العارفين اننا دخلنا السوق الحر من زمان و مددنا رجلينا الاثنين و ايدينا و لسانا كمان
    و بالسوق الحر هما طبقتان – = غني للطيش و عندو كل شئ و فقير معدوم و حائم من غير هدوم
    و اللي ما عاجبوا هو حر او عر

    و بالنسبة لي توقعاتي هي : تغيير اسم و لون و قيمة العملة السودانية .
    : تغيير اسم و علم الدولة السودانية من جمهورية الي مملكة و العلم يحمل
    سيفا و سكينا و بندقية و نخلة و نيمة و بدل اللون الاسود اللي تحت يكون اسود في
    في الوسط و في الاعلي ( يعني بالموزمبيقي كده كلو اسود مع دائرة في الوسط
    سوداء ايضا بخط ابيض و الكتابة و الرسوم علية منحوتة بالفضي )

    : و اتوقع ان يفني شجر النيم بالسودان كليا و يصبح تراث و تنزل صوره في الاعلام
    و العلم كتراث ( و عارفين سبب الفناء طبعا )
    : واحد من رموز الدولة يعمل عملية زراعة شعر ( ما اكثر المعيز بالسودان )

    : هجرة الثورة الحيوانية الاليفة للخارج هجرة اجبارية و تلحق بالحيوانية المتوحشة
    التي هاجرت قبلها بسبب الحروب و الاليفة طبعا بسبب الحبوب مع بقاء فقط
    بعض فصائل الضب و التماسيح و ابو العفين و حتي الصقور و بالاخص صقور
    الجديان تهاجر احتجاجا لتغيير الشعار
    : اتوقع بناء النموذج الثاني من غوانتنامو الاول بامريكا و التاني بالسودان مع تغيير
    بعض الممثلين و بقاء نفس المخرج و المنتج

    : الاقبال بشراهة علي شاشات البلازما الثلاثية الابعاد لمشاهدة الوهم حقا و حقيقة
    : استخراج اللؤلؤ من النيل و الماس من جبال كرري و جبل ام علي
    و الياقوت من الكلاكة صنقعت
    و المرجان من حلة حسن و حلة عمر و حلة علي و حلة ود طه و قرية دقوني

    : القضاء علي الامية و الجهل و يصبح المولود اليوم عارف و متعلم و واعي
    : اتوقع ان يحزر منتخب السودان لكورة القدم المركز الرابع في مجموعته و المركز
    السادس عشر في عموم البطولة

    : كثرة اأمئة المساجد و المؤذنين و بان يصبح مسجد بكل اوضة او كورنا و مسجد لكل مواطن

    تلطيمة :
    و اتوقع فرض السودان حصار شاملا علي كنده و فرنسا و مثلما نجح الحصار

    اللي كان المفروض علي امريكا و استراليا و الاقتصادي علي بريطانيا

  2. عذرا للاخطاء الاملائية – ما مني من …………………..

  3. كسرة يا ابو ناجي ..
    لكن هل تتوقع انو في عام جديد اساسا ولآ كلو محصل بعضه .

  4. هههههههههههههههههه,,فجو البكان لى مبارك سلمان !
    انزل انزل يا حبيب وجر خيتك…هههههههههههههههههههههههههه

  5. أستاذنا كيفنك
    بالنسبة لتوقعاتي توقع واحد فقط لاغير
    عااااااازة حا تبقى عاوزة ده إن ما بقت خلاص … وفي طريقا لي عااجزة (عن الشكر طبعاً)..

  6. دا انا غلبااااااان | رد

    توقعاتك دى ياجبرا وقعت لى انو وقعتنا سوداء

  7. السلام عليكم ، البرف و الاخوان ، بمناسبة استخراج المرجان من حلة حسن و حلة عمر وحلة طه و هلمجرا ، يقول لك واحد مغترب من الجزيره جاء اجازه فى الخريف و راح طوالى مستاجر تاكسى لحلتهم فى الجزيره شرق مدنى ، وفى الطريق نزل المطر ، و زاد المطر لما وصلوا الحله ، بتاع التاكسى عاوز يرجع لكن الجماعه حلفوا عليه ( يازول ما بتمشى فى المطر . على الطلاق اكان تاكل الكرامه . يا زول على الطلاق اكان توحل قبال ما تصل الظلط ، كدى اديها ساعه ساعتين يمكن المطر يقيف ، ) و المطر مصر على الاستمرار ، و اكلوا الكرامه و حلو بالشاى ، ثم دخلوا فى ونسات ، اها يا خوانا حلتكم دى اسمها شنو ؟ والله دى حلة عبدالله ، اها والجنبكم ديك ؟ ديك حلة حمدناالله ، اها و التانيه ديك ؟ ديك التانيه حلة خير الله ، اها و القصادكم دى ؟ دى ما حلة فرج الله ، بعد يومين اشرقت الشمس و صار الطريق جافا ، ودع سواق التاكسى الجماعة اها يا اخوانا ودعتكم الله و على الطلاق تانى حلال الله ديل لا اشوفهم ولا يشوفونى ، سؤال خريف : حبة العيش الفتريته بقت اصغر من حبة الدخن ده برضه تضحم ؟ ……………. عجبى

  8. اتوقع ان زولنا دة بعتزل الرقيص عشان الروماتيزم…..ز

  9. سلاماااااات
    اتوقع ان يزورنا النبى الخضر ونقع فى ليلة القدر
    ويحلنا الحله يله من القيد والمزله

  10. الاخ جبرا و السمار
    قبل ايام قليلة كنت اشارك الجميع نفس المنظور القاتم و لكن خلال زيارتي لمدينة بورتسودان تغير ذلك المنظور تماما و ابصرت بصيص امل خلال كل تلك العتمة فلأول مرة في حياتي اعجب بمدينة سودانية نعم مدينة سودانية, الاسفلت في كل مكان و الكربستون ممتد حتى مداخل البيوت و النظام في كل مكان و قدحصلت حادثة امام صديق لي حيث رمى احدهم قارورة بارد من النافذة على الطريق فما كان من احد الجالسين الا ان قال هؤلاء من الخرطوم مما يدل على تغير ثقافة اهالي المدينة و الصورة تعكس ان بالمجهود الحقيقي و المتابعة يمكننا انجاز الكثير و من هذا المنبر اود طرح فكرة ترشيح السيد ايلا ليكون رئيس الجمهورية المقبل فالرجل اهل لذلك فلو كان لنا مثله من زمن طويل لتغير حال هذا البلد الفضل و من يساوره شك في طرحي فاليذهب الى بورتسودان و يتحقق بنفسه مما اقول و سوف ادعم هذا الطرح عبر الفيس بوك و كل الوسائل الممكنة و ارجو من الاستاذ حبرا مساعدتنا في هذا.

  11. ساعدوهو الراجل دا بالله عليكم !!!

  12. بورتسودان فعلا بقت حلوة ونظيفة وليتها ترجع سيرتها الاولي زمن ناس الخرطوم بمشوا يروسوا فيها .
    بس اعمار بورتسودان ما اظن الحكومة ليها فضل فيهو لأنو تم من صندوق اعمار شرق السودان برعاية كويتية ومجموعة مؤسسات دولية وعربية وبرنامج الامم المتحدة الانمائي .
    ظهرت بشاير الصندوق لانو الشغلة ما متروكة للحكومة ساكت وفي لجنة من اعضاء الصندوق بتتابع القروش المصروفة مشت وين وعملوا بيها شنو .. يعني ما معتمدين علي ديوان المراجع العام بتاعنا ….
    الفرقة الوحيدة اللقوها ناسنا لللغف هي شركات المقاولات حقت والي البحر الاحمر طبعا ليها نصيب الاسد في العطاءات وقالوا مصنع ( الكربستون ) حق ولد محمد طاهر ايلا .وطبعا عشان يزيدوا مبيعات المصنع لو في طريقة كان عملوهو جوه البيوت كمان .
    شمباتي : في شمبات هناك مجلسنا .. الهوي والعفاف حارسنا ..لكن انا عندي تحفظ علي العفاف دي .!

  13. البروف والسمار الاعزاء
    انت يا الفاتح فاتح نفسك شديد كدا لية وعندك نفس لسه توقع بها عليك الله اشرب لي دواء حموضة وشوف ليك نومة نوما ولا ما كدا يا شمباتي وجنوبي

  14. سلامات الجميع ممكن اتفشفش معاكم اصلو الزمن دا حتي الفشفشا بقت بالشي الفلاني ذي قدر ظروفك ولحمة مسكول وشمت عظم

  15. ههههههههههههههههه,ًصباحاتك بيضا اخوى جنوبى…
    ياخوى بلا تتحفظ انحنا العفاف بتاعهم دا ما دايرنو ! النصيحة دى نقلوها بس…
    دحين سنجة مالها !!!؟

  16. توقعات زى حالة الطقس

    الجو ضبابى وملبد بالسحب الترابية ودرجات الحرارة مرتفعة والطقس متقلب وهناك رياح غربية ضبابية

    ورياح جنوبية ترابية ورياح شمالية جافة ورياح شرقية باردة والطقس غير مطمئن لذلك نرجو من الجميع

    عدم الخروج فى 2012 حتى النشرة الجوية القادمة فى 2013 وشكراً لحسن متابعتكم

  17. السلام عليكم
    استاذنا نرجو تغير لون الحائط من اللون الاصفر لانه متعب جدا نرجو ان يلقى طلبا الاجابة من طرفكم
    تحياتي

  18. ردا على أخونا جنوبي…
    في نكتة بتقول: كان في مسؤول امريكي بتونس مع مسؤول سوداني، قال ليه انتو بتسرقو كيف؟ الأمريكي قال للسوداني: شايف المشروع داك؟ قال ليه اي، قال ليه إحنا قلنا بكلف ٨ مليون، وهو اصلا بكلف ٥ مليون، طيب انتو بتسرقو كيف؟ السوداني قال ليه شايف المشروع داك؟ قال ليه ماشايف حاحة. قال ليه: اها دة مكلف ١٠ مليار…
    الموعظة اننا نحمد ربنا لو شفنا حاجة اصلا 

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: