المستحيلات 50 (أرشيف)

1- شرطي مرور يقول ليك (سامحتك المرة دى)
2- مستوصف خاص يدخل المريض بدون (أمنية)
3- مدرسة حكومية مكتملة الكتب والمدرسين والمقاعد
4- معاملة حكومية مجانية دون دمغات ولا يحزنون
5- مسئول يستقيل براهو كده
6- رئيس حزب يتنازل
7- إعلان لا توجد به فتاة
8- مذيعة لا تخطئ فى النطق
9- مسئول توجد فى حوزته أقل من سيارتين
10- مرتب موظف يكفي لآخر الشهر
11- مواطن يكسب قضية ضد الحكومة
12- شركة تقوم بردم الشارع بعد ما تحفرو
13- مسئول يعترف بالخطأ
14- مسئول يعاني من الفلس
15- مطرب لا يردد أغاني الغير
16- تواجد موظفى إستعلامات المطار فى أماكنهم
17- توقف عربة النفايات في الحى
18- إعطاء تصديق من السلطات لقيام تظاهرة سلمية
19- إكتمال الإستعدادات للخريف
20- توظيف أكثر من 1% من الخريجين
21- إختفاء المتسولين من الشوارع
22- مجانية التعليم أو العلاج
23- مغادرة الطائرة السودانية في موعدها
24- عدم تعيين المدير لأحد أقربائه
25- وصول الزكاة لمن يستحقها
26- عدم تغيير أثاث مكتب المدير الجديد
27- إنهاء معاملة حكومية دون دفع (المعلوم)
28- التوصل إلى السارق دون إنفاق ما يوازى نصف قيمة المسروق
29- حضور الفنان إلى الحفل في موعده المحدد
30- أن يحرر شرطي مرور مخالفة (لزميل)
31- إحتراف لاعب سوداني فى ناد أوروبي
32- الفوز بأى عطاء دون لولوة
33- دعوة شريف نيجيريا للفنانة (حوة الطقطاقة)
34- إنخفاض سعر سلعة بعد إرتفاعه
35- خطيب جمعة يتحدث عن (المعاناة) في (الدنيا) وليس فى (الآخرة)
36- فتوى تعارض وجهه نظر الحكومة
37- مسئول بابه مفتوح للجمهور
38- منظمة خيرية لم تستفد من الإعفاءآت الجمركية
39- دكتاتور يتنازل عن الحكم دون سفك دماء
40- طبيب أخصائي تقل قيمة كشفه عن 50 جنيهاً
41- أن يقضى (الميرغنى) شهرين متتاليين بالسودان
42- أن يصمت (الصادق) شهرين متتاليين عن (الكلام)
43- إنسياب الكهرباء في الصيف دون قطوعات
44- أن يتعالج مسئول داخل السودان
45- العثور علي شركات الدولة (الرايحة)
46- ملء المسئولين لإقرارات الذمة المالية
47- أخذ التار من (الصهاينة) فى حادثة بورتسودان
48- التنازل عن الشريعة (بس هى وينا؟)
49- التفريط فى وحدة السودان (الفضل)
50- أن يكون المدير (ما فى) إجتماع

كسرة :
من سابع المستحيلات إعادة المحالين إلى الصالح العام إلى وظائفهم … لأن معظمهم قضى نحبه أو يكاد (ما القصة طولت) وكده

20 تعليق

  1. انته بديته بى شرطى المرور عشان سرقوا كلمة مرورق وماقالوا ليك سامحناك المره دى

  2. كلمة مرورك وليس كلمة مرورق خطا غير مقصود

  3. المستحيل انك تقول فى بلدك كل الحقائق واضحه وما تتهم بالمؤامره
    والمستحيل انك تكون سودانى الصفات فى هذا الزمان
    والمستحيل تدين زول قروش ويرجعه ليك
    والمستحيل الكبير يرجعوا ليك يا جبرا خط هيثرو الخرطوم

    1. ومن ٥١المستحيلات ان تقود سيارتك وما (تقع ليك في حفرة)

  4. الفاتح و سماره الكرام سلام . .
    مستحيل تحتفل براس السنه و ما تلقى ليك مفتي يطلعك كافر.
    بوكوهراااااام فرع مسجد الثوره.

  5. السلام عليكم
    خايفين نقول مستحيل السودان ينعدل حالو
    خايفين نقول مستحيل السودان يبقى سله غذاء العالم
    مستحيل الجماعه يتنازلو عن الحكم
    مستحيل تلقى حكومه ما يكون فيها او داير يشارك فيها الساده الصادق والترابى والميرغنى ( كنكشه شديده )
    كسرة :
    اخونا سنكل الاحتفال براس السنه حرام شرعا باجماع العلماء
    ولا يجوز لاحد ان يكفر مسلم ابدا ابدا ابدا الا بشروط يمكن الرجوع لفتاوى الشيخ ابن باز او العثيمين او الالبانى عليهم رحمه الله
    قال رسول الله صلى الله عليه وسلم: “إذا قال الرجل لأخيه يا كافر فقد باء بها أحدهما”، وقال: “تكفير المسلم كقتله”، وقال: “إن قال الرجل لأخيه كافر فإن كان كما قال وإلا رجعت عليه”.

    يرجى الدخول على الموقع الاتى
    http://ar.islamway.net/fatwa/11945?ref=search
    مع الاحترام للجميع والتحايا الخاصه لعمنا سنكل

  6. الاستاذ العزيز جبرا
    المستحيل يا جبرا يصدر قرار جمهوري بتعيينك مستشارا لرئيس الجمهورية لشئون الاسر الفقيرة و المحتاجه

  7. السلام عليكم ، البرف و الاخوان ، المستحيل : حاج السلاوى لسه بيفطر ، وعلى سنكل بيحتفل بى راس السنه ، وبت وراق عايزه كل الحقائق ، والبرف عايز مساعد للرئيس ، المستحيل يا ساده يا كرام نقوم قومة راجل واحد نزرع الواطه دى ونرعى بهايمنا المخلناها لادنى فئه فى المجتمع من الناحيه التكنلوجيه اقصد ، معليش المستحيل زى ما قال اسماعين حسن دى الاراده و ارادتنا مابنجيب ليها بديل ، سؤال بديل : المستحيل الحيكومه تسوى شئ لى حالنا المايل ده ………………. عجبى

  8. بمناسبة الإحتفال بي رأس السنة والكفار .. قررت لي أول مرة أطلع السنة دي رأس السنة مع أخواتي (نظام أفسحهم وكدا ..) وفي خطبة الجمعة القبل يوم راس السنة الخطيب في المسجد بدأ بالكفار وإنتهي بي دار المايقوما وبيناتم كلام كتييييييييييييييييييير خلاني مافاهم حاجة وإتخيلت حاجات ما معقولة وفي النهاية أنا والبنات إتعشينا ونمنا من الساعة تسعة !!!!!!!!!

  9. يا أستاذ هى دى بس المستحيلات ؟؟ ياخى ممكن الواحد يكتب جريدة يومية ويمللأ صفحاتها كلها بالمستحيلات ..قول يا لطيف !

  10. البروف والاخوة الكرام …..السلام..من المستحيل ان يحقق ما قاله فى البيان الأول ….من المستحيل انتهاء التحقيق في قضية سوق المواسير …….الخ

  11. Ͼђὄἶ ṩἶωὄᾗ'ṩ ʛἷʀł | رد

    ههههههه اضحكتني بجد .,
    معحبه بسخريتك من الامارات ^^..

  12. الكان قرب يبقى مستحيل انى ارجع ادون تانى!
    إزيكم ياناس؟

  13. الأحباء الأعزاء .. مرحب بيكم .. الموقع بتاع الفيس بوك إتهكر .. وموبايلنا وكل الأرقام ضاعت .. عمكم الأيام دى طاشي شبكة .. الدعاء .. الدعاء .. ان يرفع الله عنه كل هذه البلاوى !!!

  14. الهكّر فيس بوكك يهيم علي فيسو والسرق موبايلك ان شاء الله باقي عمرو مو بايل .
    تعرف يا مان انا خايف الجماعة يجوا يقولوا زمن الصحابة كان في واحد بيهجو في الصحابة وصحي يوم لقي حية لدغت كل البهائم بتاعتو ولقي اللصوص سرقوا بعيروا واصبح هائم في الصحراء . اصلهم متعودين علي النجر زي حقت الشجر كان بتكلم والقرود كان بتمشي قدامن تفجر الالغام ..
    الفيس بوك ده عقدة الخواجة والشاف حلاقة اخوه ما بخلي زول يبل ليه راسو .

  15. يا جبرا اعمل لينا بكان للايكات عشان نديك لايك وكمان جنوبي ال فوقي ده عاوز اديهو لايك

    1. أحد الأخوان كتب عبارة الآيكات في تعليق بس من باب العلم الزول بقصد cat eye ولا بقصد حاجة تانية

  16. يا خونا جنوبي بارك الله فيك…
    ياخي انا بضحك لما وقعت في الأرض!!

  17. عمنا الفاتح انت تكتب و نحن نقراء و نتأمل في هذا العالم في حين اننا نعرف اين الحق و اين الباااطل ولكن و مدونااتك تجعلنا تعلق لك هنا ولكن لا نتحرك و لا نفعل و اتسال لماذا لا نتحرك و نعمل لنفير تلك المستحيلات ؟؟ ردمونا بالتراب و نحن احياء في عز شبابنا و مروتنا ما عارف عشان ياتو فهم اها حايواصلو كدة لحدي ما يجي يوم و يجي عسكري يدق ليك باب بيتك و يقول ليك ما تشرب الشاي و انت تقول حاضر

  18. و برضو من المستحيلات ما تلقا ورقة حاااايمة في الشارع ماشاالله التقول كوشة الصين اي ورقة طايرة مكتوب عليها صنع في الصين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: