على بريدى الأليكترونى جاءتنى رسالة تحمل العنوان (يا أستاذ أعمل شنو؟) .. قمت بفتحها .. بعد قراءتها إنزلقت من عينى دمعة ثخينة .. هذه الرسالة أهديها للمسؤولين عن (الشباب) وتشغيلهم وإيجاد فرص العمل الشريف لهم حتى لا يجدوا أنفسهم في موقف كما صاحب هذه الرسالة التى أقوم بنقلها لكم (وللمسؤولين) كما وردت بدون اي تعـديل .
الأستاذ الفاتح جبرا المحترم
على الرغم من مشغولياتك الكتيرة أرجو أن تمنحنى فرصة وتقرأ رسالتى هذه فأنا يا أستاذى محتاج لرأئكم في هذا الموقف الذى أنا فيه ، أنا إبنك (صابر) شاب سودانى خريج أحدى الكليات الجامعية النظرية ، تخرجت في العام 2002 وجلست عاطلاً عن العمل لفترة خمسة سنوات رغم الجهد الشديد الذى بذلته من أجل إيجاد وظيفه (في أى حته) ،عملت خلال تلك الخمس سنوات في شتى المهن الهامشية حتى أقوم بتوفير ضروريات الحياة لي ولأسرتي إذ أننى أكبر أبنائها عملت كعامل (طلبة) ، بائع سجائر وعدة أشغال هامشية أخرى إلى أن أخبرني ذات مرة – وقتها- أحد أصدقائي أن (الدرداقات بتجيب قروش كويسة) فقمت بتوفير بعض القريشات أشتريت بيها (درداقة) أحمل عليها الأغراض التى يشتريها المواطنين من السوق وقد كان العائد منها (مش بطال) يكفي بالكاد لسد رمق الأسرة وقضاء حاجاتها الضرورية إلى أن قررت المحلية أن تسحب مننا الدرداقات وتؤجرها لنا لقاء مبلغ زهيد ! وهنا قررت أن أهاجر .. أطلع من البلد بأى صورة فبلد لا تجد للخريج وظيفة ثم تحاربه إن أراد (لقيط رزقو) في عمل شريف غير جديرة بالبقاء فيها !
وسافرت إلى مصر .. ودى قصة طويلة .. المهم لقيت شباب كتار زيي كده طلعوا طافشين من البلد .. ساعدونى وسكنت مع بعضهم .. مرات مرات ألاقي شغل في عمارة .. عتالي في السوق حاجات كده ! المهم في الموضوع الشباب المعاي ديل كووولهم بيحلموا بالهجرة إلى كندا أو أستراليا لأنو قالوا ناس البلاد دى عاوزين أجانب بشرط إنو يكونوا شباب وصحتهم عال العال .. أها مسألة السفر والهجرة دى عاوزه ليها قروش .. معظم الشباب ديل يا استاذ عشان يوفرو ليهم قروش يهاجروا بيها قامو باعوا الكلي بتاعتهم .. وهنا بالمناسبة يا أستاذ (سوق الكلى) شغال شغل شديد والسماسرة السودانيين بتاعين الكلي أكتر من سماسرة العربات والعقارات في الخرطوم تلقاهم قاعدين قدام المستشفيات بتاعت نقل الكلي عشان يصطادوا الناس العاوزه تبيع وكمان في (قهوة) معروفه كل المرتادين ليها هم يا سمسارة كلي يا ناس عاوزة تبيع .. بالمناسبة الناس العاوزة تشتري اغلبهم برضو سودانيين يا جايين مباشرة من السودان يا جايين من دول الخليـج ومعاهم قرايبهم المرضانين وعاوزين ليهم كلي (كويسة) !
أنا بكتب ليك يا أستاذ في الرسالة دى عشان أنا قررتا أبيع كليتى .. واحد من السماسرة لقي ليا زبون وعملنا الفحوصات اللازمة لكن والله يا استاذ أنا بينى وبينك (ملاوز) شديد ..ونفسياتي كعبة شديد .. من جهة المبلغ كبير وممكن لو قبضتا القروش وما لقيت طريقة هاجرتا أجى راجع السودان وأشتري بيهو (ركشة) أو (أمجاد) أو أي حاجة نعيش منها خاصة وأن أسرتي اصبحت حالتها صعبة ومن جهة تانية مرات بتحصل مقالب والزول ما يدوهو قروشو وكليتو تروح (شمار في مرقة) .. بالله يا استاذ ورينى أعمل شنو؟
الرد :
الأبن (صابر) .. قضيت يومى كله حزينا من أجلك .. ومن أجل أخوانك الذين أوصلهم أعمامكم (الساسة) إلى هذا الوضع (القمئ) بفضل تنازعهم على كراسي السلطة على حساب تهيئة وضع افضل لكم .. عد إلى بلدك يا بنى ولا تبع جزءاً منك عاش معك سنوات حياتك .. عد وسوف نشتري لك (درداقة) لتعمل بها في ذات السوق وسوف نكتب عليها بالبوهية الحمراء .. أتركوني أعيش !
كسرة :
لا حول ولا قوة إلا بالله !!
الفاتح جبرا 
حسبنا الله ونعم الوكيل…الصابرين كتاااار بس ما لاقين حق اليوصلهم مصر!!!!
الغريب فى الامر مثل الرسائل وغيرها تدعنا نقطر دماً لا دمعاً ولكنها عندولى الامر الذين نصبوا انفسهم اوليا علينا بالدبابات لا تحرك عندهم ساكنا وقد تكون مضحكة عندهم لدرجة البكاء او عمل مخالف للقانون يعرضك للسجن او حتى قلة ادب
هذه الرسالة لن تحرك ساكنا عند اى مسؤل
نسأل الله السلامة والعافية من التحول وتغول هؤلاء..
واسال الله ان يرينا فيهم يوما اسودا كايام من سبقوهم..
معك يا استاذ ومع صابر..
رهن اشارتك…
لا حول ولا قوة إلا بالله
معكم يا بروف وشمباتي في أمر صابر ورهن اشارتكم حتي نجد من يكون في عون امثال صابر
قبل عدة سنوات كان لي صديق يدرس في القاهرة حكي لنا عن قهوة فيها يرتادها السودانيين بمثابة دلالة للكلي بائعين ومشترين وسماسرة اتهمناه وقتها بزيادة العيار لكن للاسف اتضح انها الحقيقة المرة .
من لنا بمن ينصح ساستنا بأن الله سائلهم عن هذا يوم الحساب !!!ومن لنا بمن يذكرهم بقول الفاروق عمر رضي الله عنه عن خوفه من تعثر بقرة لعدم تمهيده الطريق لها .
حسبنا الله ونعم الوكيل
الأخ البروف الفاتح .. والله العظيم لم أشتطع أن أمنع الدمعة أن تنزل من عينى وتخيلت أـحد ابنائى وقد كتب هذه الرسالة الحزينة ..
وحسناً فعلت .. نصيحتك كانت فى محلها تماماً وأتمنى ألا يكون قد استعجل وباع كليته ..أتمنى أن يعود إلى بلده وكلنا على إستعداد للمساهمة فى شراء درداقة ليتكسب منها ( والله لاكسب من كان السبب فى وصولنا لهذا المنحدر ).
ولا حول ولا قوة إلا بالله العلى العظيم ..فى من جاءوا لإنقاذ البلد ولم ينقذوا إلا انفسهم وأهليهم فقط ..ولكن عليهم أن يعلموا أن الله يمهل ..ولا يهمل ..وإن غداً لناظره قريب .
سبحان الله ولا حول ولا قوة بالله
تعب كلها الحياة فما أعجب = إلا من راغب في ازدياد
غَيْرُ مُجدِ في مِلّتي وإعتقادي = نوح باك ولا ترنم شاد
وشبيه صوت النعي إذا قيس = بصوت البشير في كل ناد
أبكت تلكم الحمامة أم غنت =على فرع غصنها المياد
و الله الدنيا دي كلها هم وغم و عذاب, اللهم اذهب عنا الحزن اللهم اذهب عنا الحزن
يا الله افتح بصيرة صابر يا الله افتح بصيرة صابر يا الله افتح بصيرة صابر
السلام عليكم يا شباب
اللهم يفرج هم كل المسلمين
لكن سؤال كيف نحل المشكله من اصلها
حالات صابر كتيرة جدا جدا الله يعينا ويعين كل المسلمين
احسن نفكر فى طريقه لحل مشاكل الشباب
كسرة : ساعدونا بالافكار ياجماعة الخير
لاتعطنى سمك بل علمنى كيف اصطاد
السلام عليكم ، البرف و الاخوان ، البرف مش كاتب ساخر ، ناشر لينا الالم ده ليه ، على الط …. مسعول يقراه مافى ، انا برضه مع الجماعه ، ما رايكم فى منظمه طوعيه تكون مموله لمشاريع صغيره تدر دخل حقيقى ، سؤال معروف : الناس دى البدخلها جامعه نظريه شنو و هم من الاول عارفين انو شغل للمهندسين ما فى ……………… عجبى
لك الله يا صابر ………… هم ساستنا ديل فاضين من البترول الطلع رهاب ده
اقول ليك يا صابر كليتك ما تبيعه بس شتت كندا باي طريقة .
يا صابر..يا أخي في الإنسانية..حملت هذا الاسم فكن معناه فيما تبقى..
عد إلى السودان دع الرغي والسنابل والورود والدموع..إحمل قلبك وروحك في كف والشهادة في كف..
وتأبّط كل رفاقك الشباب السودانيين..
وأعلنوا أن الربيع العربي له على أرضكم مكان..
ملايين الصابرين من(صابر) في بلدك ..
لا تكن أنانياً..علمك ووعيك وما غفا من عطائك تحت رماد السلطان وأزلامه لن يدوم إلى الأبد..
لن يدوم الطغاة مهما ضحينا في أوطاننا ينهشون لحوم أبنائنا قبل أن تولد..
كن ابن السودان البار الذي لا يزيد أباه ظلماً..
———————————————–
سوريا المحتلة-حمص عاصمة الثرة السورية-14-1-2012 \ 9:36pm
وردت بعض الأخطاء الحرفية وتصويبها:
الرغي=الرغيف
الثرة=الثورة
لذا اقتضى التنويه..
وسلامي لك أستاذي ولكم جميعا..
السلام عليكم
الاخت وئام بدرخان حبابك عشرة
لكنى اود ان اوضح لحضرتك امور :
صحيح ان السودان متعب (بضم الميم وفتح العين) وان اهل السودان ضاق بهم الامر
واصبح لبعض الناس باطن الارض خير من ظاهرها ان جاز التعبير
صحيح الضنك والكد وراء لقمة العيش صار هم الناس الشاغل
صحيح ان كل الاسرة صارت تعمل حتى تدرك ايقاع الغلاء
صحيح ان الموت صار عندنا اقرب من العلاج واسرع لدى الكثير من الغلابه
صحيح ان كثير من الاسر صارت تتناول وجبه غذاء واحدة وللمعلوميه انها وجبه كفاف لا وجبه تخمة
صحيح ان كثرة الترضيات انهكت المواطنين قبل ان تنهك اقتصاد البلاد
صحيح ان الاحزاب عندنا صار همها ان تأكل وتغنى وتسكت
صحيح ان اموال الزكاة عندنا لانعلم كيف يتم صرفها لان المساكين والمحتاجين لا يجدون غير الفتات ان وجدوة
صحيح ان الوزراء عندنا صارو يعملون كتجار ونسوا مسئوليه الوزارة
والقائمة طويله جدا جدا جدا
لكن اختى الفاضله سوداننا لا يستحمل ربيعا عربيا خصوصا فى هذا الوقت
بصراحة المعادلة صعبه صعبه لايمكن وصفها فى كلمات واهل مكه ادرى بشعابها
وشكرا لتضامنك مع اهلك فى السودان
كسرة :
سأصبر حتى يعجز الصبر عن صبرى ** ويعلم الصبر انى صابر على شئ امر من الصبر
ياربى الشاعر يكون قاصد حالنا دا
وئام بدر خان .. سلام واهلا بك وسط اهلك
نسأل الله ان ينصر الشعب السوري علي كل من طغي وتكبر ونسأل الله لكم الامن والامان داخل بلدكم الذي كان ملاذ لكل العرب دون تأشيرات دخول مسبقة.
الحال من بعضه وكلنا يحكمنا سفهائنا نتمني الخلاص لكم ولنا .لا تعتمدوا علي ( قامعة ) الدول العربية .
أسدٌ عليّ وفي الجولان نعامة
الأخ إلفاتح جبرا/ تعاطفت بالأمس مع رسالتكم التي نشرتموها كما وردت إليكم من الشاب ناصر الذي بات قاب قوسين او أدنى من بيع كليته ، ورغم تأثري البالغ لحظة قراءتي لرسالته أجد أننا مطالبون لوقفة جادة حقيقية لإيجاد مخرج وحل لمشاكل وقضايا الشباب ودراسة المشكلة من كل جوانبها دون ان نرمي اللوم او الاتهامات لأي جهة دون غيرها فالحكومة مسؤولة بالدرجة الأولى عن قضاياهم الأساسية من تعليم وإيجاد فرص العمل لهم والشباب مسؤولون أيضاً عن تحمل مسؤولياتهم تجاه انفسهم وأسرهم ومجتمعهم ووطنهم فالمشكلة والمسؤولية مشتركة ، فرسالة صابر قد وجدت طريقها للنشر وهناك اكثر من الف صابر
بعد ده ممكن نوصل وين الناس باعة اعضائها عشان تعيش
حسبى الله ونعم الوكيل
حسبى الله ونعم الوكيل
حسبى الله ونعم الوكيل
لا تظلمن إذا ما كنت مقتدراً …..فالظلم ترجع عقباه إلى الندم
تنام عينك والمظلوم منتبه …..يدعو عليك وعين الله لم تنم
جزاك الله خير استاذنا الفاضـل جبرا على كل ما تطرحه من قضايا وامور موضوعية وأضم صوتى للأخوة الأكارم ونحن رهن اشارتك يا أستاذ فى أى مساعدة للأخ صابر .
آ آ آ آآه يا بو ايه بعد كل الصحيح القلتو دى وتقول البلد ما مستحمله ربيع عربي ورينا بتين يعنى
انته لسه احلامك ورديه
حكومة المؤتمر الوطني هي المسئولة عن ما يحدث لنا وهي السبب في ما يحدث …
قبل عام 89 كنا نذهب للقاهرة سائحين والان نذهب لاجئين او ضائعين .
قبل 89 معظم السودانيين كانو يذهبوا للسعودية حج او عمرة والقليل منهم للعمل اما الان القليل منهم حج او عمرة وحتي من تجاوز عمره الاربعين يأمل في الحصول علي تأشيرة عمل .
قيادات المؤتمر الوطني تكدس ملايين العملات الحرة من يورو ودولار وريال داخل منازلها وبنك السودان ارصدته مكشوفة ولا يملك عملة حرة والسوق عامة لا يملك رأس مال لتشغيل الحركة فيه ..
من شدة انانية اهل المؤتمر يبخلوا علي الوطن الذي نهبوه ببناء مصنع يوفر لقمة العيش لألف أسرة او شركة تجارية توفر فرص عمل للشباب او استثمار مكدساتهم في الزراعة حتي يساهموا في تخفيف ارتفاع العيش والقمح .
من الذي جعل سعر قطعة الارض في الخرطوم اغلي من لندن وواشنطن ؟ ومن هم تجار الاراضي الذين يملكون نصف اراضي الخرطوم ؟ وما رأي الدين في هذا النوع من الاحتكار .
بناء الابراج والتفاخر بها ماذا يستفيد البلد منها ( عريان ولابس سديري )
باصات الوالي كم باص هي ؟ وكم ايراد الباص الواحد في اليوم ؟وملك من هي ؟ واين يذهب الايراد ؟ .
شوارع الاسفلت التي تعتبر من انجازات الحكومة لماذا لا يتجاوز عمرها الافتراضي سنة واحدة .
الحكومة لماذا تعتقل من يقاوم بالكلام وترميه في السجون وتكافئ من يقاوم بالسلاح وتسكنه القصر الجمهوري .؟
البروف واحباء القمردينية
انا بسال الزكاة دي بتمشي وين لانو بشولوها من ست الشاي ومن المعاشين و ناس الاكشاك ومن………..الخ
وبعدين انا بقول لي صابر
اذا بعتا كلوتك ما حتل اي مشكلة من مشكلك
احسن تجي سليم هنا الي بلدك ونصل كلنا لحل واحد
الربيع ات ات ان شاء الكريم
لك الله يا سودان (كان مليون ميل مربع)
بسم الله والصلاة والسلام على أشرف خلق الله أجمعين سيدنا محمد وعلى آله وأهله وصحبه وسلم ..
أبونا الفاتح :
والله لقد هجرت مدونتك هذه منذ زمن طويل فقد تشبعت بال(مغصة) وتعبت من كثرة الكلام عن حالنا ومآسينا ..
ولكن ما أرجعني اليوم هو خطاب هذا الأخ الذي هو نموذج واحد للملاين، وقد عثرت على مقالك هذا بالصدفة على موقع الراكوبة، وليتني مررت به مرور الكرام (والله تجيني ذبحة بي سببك يا جبرا) ..
ولكن ما أندهش له، إندهاشكم من أن يبيع أحدهم جزءاً منه كي يعيش؟ فنحن نغتدي (بأسيادنا) الذين باعوا جزءاً من السودان ليعيشوا هم (أطال الله بقاءهم)، كما السقيم يبتر طرفه حتى لا يستشري المرض .. ولكن في النموذج السوداني صرنا نبتر الجزء الصحيح حتى لا ينشر عدواه إلا بقية السودان المريض ..
وصدقوني سادتي، من إستطاع بيع كليته اليوم فليسارع، فغداً يكفي أنك سوداني حتى ترفض أعضائك فالمرض والفساد قد إرتفعت رائحتهما ..
عـــــرض :
عندي كلية للبيع ممتازة إلتهاب بول ساي ما عرفته ولا شافت حصاوي ..
للمعلومية: الكلية الشمال أغلى من اليمين لأنها أكبر ..
عرض لفترة محدودة: أدفع بالفيزا أو الماستر كارد وأحصل على فص كبد ممتاز ونخاع عظمي هدية .
الـــــوسطــــاء لا يمتنعون.
والله قصة صابر تدمي القلوب .. وكذلك حال البلد .. ورغرودة بنت بدرخان سليلة الثورة الباسلة لم تصادف فينا (معتصماه) لا نريده ربيعاً بل حريقاً بقضي من أذلنا بين الأمم وجعل دمنا هو الأرخص في مزادات الطغاة .. لا يريد منا صابر درداقة .. فقد كانت له واحدة ولم يتركوه في حاله .. لا يحتاج منا لجمعية خيرية فالجمعيات الخيرية صارت تأكل أموال متبرعيها .. صابر يريدنا أن نسحل ظالميه في شوارع هذا الوطن .. ونأخذ له حقه وحق غيره من هؤلاء الشذاذ .. مهما كانت العواقب فهي أقل مما آلت إليه أحوالنا … هل هنالك أبعد من بيع كلانا ..؟ إذن لا حل سوى أن نقوم قومة من يجد في موته حياة .. لنرسم طريقاً أخضراً لصابر والصابرين الكثر .. لمنع ما آل إليه حال صابر أن يحدث لإبن العزيز السلاوي .. وكل أبناء الشرفاء الذين قتلتهم سطوة الفجرة الملتحين بالزيف والفجور … لا يوجد وقت أنسب من هذه اللحظة التاريخية الحرجة للخروج في وجوههم بصدور مكشوفة .. طالما تساوى الموت في كل الأحوال … إذا لم يكن من الموت بد … فمن العار أن أموت جبانا … ولا نامت للجبناء عين ….
أخي الفاتح جبرا/ الحاقا لتعليقي صباح اليوم بخصوص موضوع الشاب صابر وغيره من الشباب السابقون واللاحقون ودعوة مني لكل (سوداني)أصيل يحب وطنه وأهله وترابه ولكل حادب على مصلحة الوطن في المقام الأول بغض النظر عن ألواننا وأطيافنا السياسية وبغض النظر عن اتفاقنا أو اختلافنا ايدولوجيا أو سياسيا أوفكريا أو عقائديا مع النظام أقترح تكوين لجنة أهلية من أهل الرأي والأختصاص برئاستكم وبلادنا ثرة وغنية بالكفاءآت العلمية والتربوية والقيادية والأخلاقية (يقشعر بدني من كلمة لجنة ) تتكون هده اللجنة لدراسة قضايا الشباب من الجنسين بطريقة علمية مهنية والتحديات التي تواجههم والحلول الممكنة التي قد تساعدهم على ايجاد فرص العمل والعيش الكريم ،،، يمكننا حل مشكلة صابر ببساطة وهو بين أهله في الخرطوم ولكن كم ألف صابر في انتظار حل لمشاكلهم ؟ سؤال ينبغي الوقوف عنده ، الحلول الفردية المبنية على العواطف لا تساعد على حل مشكلة اجتماعية كبيرة بهدا الحجم المخيف،،، في تعليقي السابق قلت أن المشكلة وحلها بيد الحكومة في المقام الأول نعم هنالك سياسات وبرامج استحدثتها الدولة في محاولات منها لحل بعض مشاكل الشباب لكنها برأيي سياسات عرجاء بل كسيحة ان جاز لنا تسميتها ولدلك لا نلمس أي بوادر آنية ولا أعتقد مستقبلية منظورة في ظل أزمة اقتصادية حقيقية لايجاد حلول لهده الشريحة (الهامة جدا) في مسيرة بناء الوطن ،،، والأوطان تبنى بسواعد بنيها ، يحز في نفسي جدا ويؤلمني منظر شاب خريج يتسكع في الطرقات بحثا عن أي (شئ) وشئ هده لها ألف معنى وتفسير،،، المسؤولون رسميا عن حل قضايا الشباب هم أبعد الناس عن هموم الشباب وتطلعاتهم والدليل السياسات الخرقاء الغير مدروسة في البرامج والخطط حتى في المجال الرياضي الدي هو أدنى درجة من الأهمية بالنسبة للقمة العيش والعلاج والضروريات اليومية للشباب نجد هؤلاء المسؤولين يبدعون في التنظير ويكثرون من (حقيقة وبفتكر انو ) في لقاءآتهم التلفزيونية والصحفية والاداعية (عندي مشكلة في الحرف ده يا جماعة ختوا النقطة من عندكم ) لدلك أرى أن يتبنى نفر كريم من اخواننا المختصين أهل الراي والمشورة تكوين لجنة ( خارج أي وعاء حكومي ) نسميها ( لجنة الفزع ) أو لجنة ( النفير ) في محاولة منهم لايجاد مخرج لهؤلاء الشباب المطحونين في بوابات جحيم البطالة والعوز والحاجة وحتى لا نرمي بكل اللوم على الحكومة فعلى الشباب ايضا تحمل مسؤولياتهم والعمل في أي مجال وان كان لا يمت الى تخصصاتهم بصلة فالعمل واجب مقدس على أي كائن بشري وليس بالضرورة أن يكون هدا العمل في الخرطوم فما أوسع السودان ( الفضل ) وعلى الدولة أيضا السعي حثيثا وبجدية وأعني المخلصين منهم على استيعاب الشباب في مشاريع انتاجية ولو بصورة جماعية وبهده المناسبة وان كنت لا أعلم كثيرا عن مشروع التمويل الأصغر الا أنني أعتقد أنها خطوة في الاتجاه الصحيح وتلامس أشواق وآمال وتطلعات شريحة واسعة من المجتمع أعود وأؤكد بعيدا عن العواطف والحلول الفردية لصابر وأمثال صابر أجدد اقتراحي بتكوين لجنة أهلية ليس لها أي صفة رسمية ولا حكومية من الحادبين على مصلحة الوطن ممثلا في شبابه العاطل عن العمل والهائمون على وجوههم في طرقات المدن لتشخص هده اللجنة أصل الداء وما هو الدواء وعلى الدولة ممثلة في الرئيس عمر البشير التفاعل مع اللجنة وأعتقد أن السيد الرئيس لديه حرصا شخصيا برفع هده المعاناة من أبنائه الشباب من الجنسين خصوصا والمواطنين عموما ( لكن للأسف في جماعة منظراتية ما بساعدوه ) كما أتمنى شخصيا من الشيخ علي عثمان طه وان كنت لا أعرفه شخصيا ولا يعرفني ولكني أستشعر وألتمس فيه حرصا وصدقا بائنا على رفع بعض المعاناة من ابنائه الشباب والأسر أن يضاعف مساعيه في أنتشال الشباب من حالة الحياة واللاحياة التي يعيشونها حتى لا تستعر نارا من مستصغر الشرر وحتى لا يكون الشاب صابر ودرداقته مشروع ( بوعزيزي مكتمل العناصر ) وألا يصبح السوق العربي أو المركزي أو سوق السمك ( سيدي بوزيد ) فوالله لسنا بحاجة لنتمزق أكثر ولسنا بحاجة لاحتراب جديد ولسنا بحاجة لنار تتقد فينا وتتركنا صعيدا جرزا / أخي الأستاد الفاتح ادا لاقى هدا الاقتراح بعض القبول منكم فأدرسه ولنبدأ ببسم الله وسوف نشارك معكم بما ترونه لانجاح مقترح اللجنة ،، عشتم وعاش شبابنا للدين واللوطن
يا صابر يا بني بعض شر أهون من بعض وعد الى وطنك معززاً مكرماً ألم تسمع بعصابات عرب سينا الذين يغوون الشباب السودانيين بتحقيق حلم الهجرة ويستولون على أموالهم وممتلكانهم ثم يخدرونهم وىستولون على أعضائهم والمتاجرة بها كقطع غيار وإذا كان من الموت بدٌ فعد ومت وسط أهلك وبإذن الله لن تموت جوعاً.
أنا أمازيغي مغربي
المشاكل في دولنا تتشابه كثيراً…ففي بلادي إد دكرت نسبة الأموات في البحر قد تستغربون…عدد الموتى المغاربة المهاجرين سريين من بداية عمليات الهجرة السرية بالملايين…شباب صغار يموتون في عرضي البحر هرباً من جحيم المعانات …نسأل الله لنا ولكم ولجميع مسلمين الفرج…أقول للأخ الدي يرغب ببيع كليته…يا رجل عد إلى بلدك وأعمل عمل شريفف أو هاجر إلى أي مكان لكن لا تبيع جسدك أو مبادئك..ف الدي خلقك هو يرزقك…
السلام عليكم
ليست احلاما ورديه يابت وراق
وليست سباحه ضد التيار يا اب احمد وجنوبى وبقيه العقد
بعد التحيه والاحترام اود القول نحن امة يجب ان تعمل بعقلها قبل عاطفتها
فلننظر الان الى مصر وما آل اله الحال من فوضى ونهب وسرقه
فلننظر الى تونس التى لم تستقر الى الان
فلننظر الى ليبيا التى نخشى ان تخرج عن السيطرة بقتال الذين كانو يوما فى خندق واحد
ولننظر الى سوريا اصبح حالها يرثى له
ولننظر الى اليمن استغل الشيعه الامر وانقلبو يقتلون اهل دماج حفظة القران وعلماء الحديث وفى عهد على لم يستطيعو ذلك
كل ذلك لانها كانت ثورات عاطفيه لم تعتمد على التنظيم والدقه وتفتقر الى الخبرات
صحيح انا شعب ثار من قبل وخرج على حكامة وغير انظمه لكن من يضمن ان يكون الاستقرار هو مصير بلادنا
لذلك اقول واكرر القول لانريد خروج على الحاكم
فاهل مصر اصبحو يقولون (( 30 عاما تحت حكم حاكم ظالم خير من ليلة بدون حاكم ))
وقبلهم قال الإمام مالك – رحمه الله – :” حاكم ظلوم غشوم ولا فتنة تدوم ” ، ،
وقال شيخ الإسلام ابن تيمية – رحمه الله – :” ستون سنة مع إمام جائر خير من يوم وليلة بلا إمام “.
والامام احمد لم يخرج على المعتصم بالرغم من الفتنه التى اثيرت حينها بخلق القران
لماذا لا نغير من دواخلنا اولا ثم نسعى لتغيير الامور مثل ان نبداء بتغيير ثقافات الرشوة واكل اموال الناس والغش والنفاق و ………………………………………
كلكم راعى وكلكم مسئول عن رعيته
كسرة : بنت سوريا وجدت اكثر من معتصم لكنه العقل اولا
مع التحيه والتقدير للجميع
سلام ياقبيلة،،،
والله شغلتكم الحكاية، وكيف ستكون بكرة النهاية لو كل حكاية تقعدوا تلتوا وتعجنو فيها زي ده؟؟؟؟
مالكم تشغلون أنفسكم بالفروع وتنسون أساس المشكلة ولب القضية، فهذا الأنسان قد ضاقت به سبل الحياة وأستحكمت عليه فجاجها العريضة فلم يري بصيص النور وبزغة الأمل ألا من خلال بيعه لبعضه, فهل تردون عليه عقله الذي غاب عنه ردا”جميلا” أم تلطمون الخدود وتشقون الجيوب وتنهمر الدموع من أعينكم وتعينون الغلابة من أمثاله بالعويل والنواح!!
أيها الناس ثوبوا لرشدكم وأعملوا عقولكم وأبحثوا عن مكامن الأذي وشر البلاء وأنظروا من أين تأتيكم هذه البلايا والرزايا، فما وقع بلاء ألا بمعصية ولن يرفع ألا بتوبة، فتوبوا لبارئكم وعودوا لربكم وأسألوه التخفيف أنه قريب مجيب.
ود الخلا يجزيك الله خير
عمنا جبرة نحن رهن الاشارة للوقوف مع اخونا وحبيبنا صابر
عزيزي أبو آية .. وبالمرة ود الخلا
ما تطلبونه هو كأن تطلب من الجريح أن لا يورم … وكمن تسقطه في الماء وتطلب منه عدم البلل .. لكن حسبنا الله ونعم والوكيل … اللهم إن كان فيما نحن فيه رضاك فلا ترفعه عنا … وإن كان غير ذلك فنسألك أن ترينا فيمن ظلمنا دلائل قدرتك اليوم قبل الغد … لا تغادر منهم أحداً .. من شارك ومن بارك … آمين.
حسبنا الله وحـــــــــــــــــــــــــــــده عليه توكلنا تِعم المولي ومِعم المصير
آه يا لتاتين يا عجانين !!!
ابو آية…سلام..
كلام شيخ الاسلام ابن تيمية دا اذا صح وانو قالو فهو كلام لا يخلو من اغراض ونوايا غير سليمة,فهو يؤصل ويثبت الظلم والجور,,وانحنا نقعد راجين الله يقبض روحو او هو يحن علينا !
لا يا صديق,ربنا ما امر بالسكوت عن الظلم او الظالمين,واقلاها (الم تكن ارضى واسعة فتهاجروا فيها….الآية) مش نقهد ستين عاما فى حكم جائر !
سلام ياقبيلة,,
أبو آية وجزاك أنشاءالله
وبالمرة أخي وصديقي أب أحمد برضو يجزيك الله خيرا”، ونسأل الله جلا وعلا رحمته وعفوه ورضاه ونعوذ به من سخطه وغضبه وشر عقابه،،،
لكن يا أب أحمد ضنك المعيشة وضيق الأمل وكذلك الحشر يوم القيامة عميانا” هو جزاء من يُعرض عن ذكر ربه، وفي ذلك يقول الحق تبارك وتعالي في الآية (124) من سورة طه (وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى)، كذلك يقابله من الناحية الأخري برغد الحياة وسهولة العيش وأغداق النعم من رب العباد هو بسبب التقوي والتمسك بالأيمان وفي ذلك يقول ربنا سبحانه وتعالي في الآية (96) من سورة الأعراف ( وَلَوْ أَنَّ أَهْلَ الْقُرَى آمَنُواْ وَاتَّقَوْا لَفَتَحْنَا عَلَيْهِم بَرَكَاتٍ مِّنَ السَّمَاء وَالأَرْضِ وَلَكِن كَذَّبُواْ فَأَخَذْنَاهُم بِمَا كَانُواْ يَكْسِبُونَ)
ولو أنت بعد كل هذا جاي تقول لي مسكوه مكتوفا” وألقوه باليم ومبلولا” بالماء وما عارف شنو, فليس لدي ما أقوله وأحسن أسكت أخليكم تعجنوا وتلتو زي ما عايزين, وأن شاء الله زولك المبلول دا يغتسوه ليك في الطين!!!!
تحية للجميع بدون فرز
كلنا بنقول السبب الحكومة وهي العملت والتركت والفعلت, موافقيييييييييييين لكن خلونا نكون عملين شوية كدة وبدل ما كل واحد عامل فيها هو المظلوم و الضحية. خلونا نساعد بعض بالبنقدر عليهو.. انا من راي الاخوان كوكو و ابو اية اشرف نعمل صندوق او ديوان زكاة مدني وتختار المسئول منو ونخلي حكاية النواية دي للخالق ونساعد قدر ما بنقدر من اهلنا حا تقولو لي نساعد منو ولا منو ده ما المعهم .. قدر شنو برضو ما مهم .. المعهم نعلم الناس انو بالبسيطة ممكن نساعد بعض وعشان اكون واوضح هسة كل واحد فينا بياكل في اخوه بنفس الحجة وانا اعمل شنو؟العامل و ست الشاي والتاجرالبضاعة غالية عشان الدولار زايد والمادايرة دولار عشان تغطي معاي والمواصلات زايد عشان والوقود و .. و .. و
القصد انو خلونا نتحرك في الاتجاه الصاح ولو مرة بدون ما نقول الحكومة سوت وتركت وفعلت ..
خلونا نتحرك ولو زحف ساي.. والله كريم
يعني ناس فنلندا وسويسرا المرطبين ديل من شدة تقواهم وتمسكهم بالإيمان .. ؟!
ربنا يفعل ما يشاء ولا يحتاج لمن يبرر أعماله للعباد، ما خلا ما بعث بسسبه الأنبياء ..
وزولي المبلول أكتر من كدا دايرين تغتسوا وين ؟ يبيع حبوبتو يعني !!
كسرة:
إنت إتعقدت من حكايةوبالمرة (ودالخلا) دي ولا شنو ؟ … إن كان ذلك فأنا جد آسف وقد كان قصدي طيباً .. أرجو القبول
تعديل:
بسسبه .. تقرأ بسببه
فمعذرة
ان السبب لما تعانيه ويعانيه غيرك مثلك “اهو انتم ” حيث انه عندما يهاجر الواحد ويبقى في اوروبا او دول الخليج اكثر من 20 سنه ويصبح غنيا ولديه المال الكثير والعلم الوفير لا يفكر ان يرجع لموطنه لكي يساعد الضعيف وينمي الاقتصاد بل وان اراد ان يذهب لموطنه يذهب للزياره فقط ويغادرها في وقت قصير .
وكما قال القائل “ألوم الناس والعيب فينا “
don’t do this dear brother Saber (every person have sth. for his name) you know what I mean!? your name is Saber be trust about your GOD and every things it will be good to you please return back to our big home (SUDAN) and live with Your family here and don’t thinking about this.
ههههههههههههههههههههه,,هى حبوبتو دحين بتجيب شئ يا اب احمد آخوى!!؟
الطين ان شاءالله بالتقع فوقو فلانة وعلانة والشايلين ليهن الجركانة !
والله يا ود الخلا بالغت لكن !
عفيت منك وانت شايت على (كدة) !!!
أحيى أخونا ود الخلا على طرحه الموضوعى المؤصل وأضم صوتى إلى صوت العقل الذى اسمعنا إياه ، وياريت نبدأ بأنفسنا فالفساد الذى أرقنا ليس على مستوى الحكومة فقط بل على مستوى الأفراد.ولنعمل على مكافحة الفساد بالمقاطعة والإمتناع عن الإنزلاق فى الرشى وغيرها من أوجه الفساد. ولنا شرف المحاولة والأجر إنشاءالله.
كلــــــــــــــــــــنا صابر …
وإحنا معاك يا أستاذي
أرجع يا صابر وبإذن الله الدرداقة حاتكون رقشة أو أمجاد
سلام ياقبيلة،،،
وأحييك يا أم أيمن علي نصرة الحق والدين، ولنبدأ بأنفسنا حقا” أن كنا جادين في التغيير، وأدعو الجميع لضربة البداية وقيادة طلائع التغيير!!!
فهل الآخرين معنا؟؟؟
أخونا ود الخلا .. أولن حمدن لله على السلامة.. إفتقدناك خلال الأيام الماضية .. إن شاء الله ما فى عوجة ..
(مالكم تشغلون أنفسكم بالفروع وتنسون أساس المشكلة ولب القضية، )…….
أساس المشكلة معروف يا صديقى العزيز وظاهر زى الشمس ..لاكين صابر ليس هو الوحيد اللى يكابد شظف العيش فى العهد الميمون ..ألم تسمع أحد وجهائهم يبشرنا قبل أسابيع قليلة أن نستعين بالصبر لأن اثلاث سنوات الفادمة ستكون سنوات شدة ؟ بعد ثلاث وعشرين سنة لسه ( خدمة فى ثانوى .. كما قال عادل إمام ) لا تزال هناك ثلاث أخريا قادمات ولا تزال الجمهورية الثانية التى قد تمتد لثلاث وعشرين سنة أخرى فى بدايتها كما وعد السيد الرئيس ورفاقه الأبرار ..
والآن تطلب منا يا أخى وصديقى بن الخلا أن نبحث عن اساس المشكلة ..؟ فإن كنت بعد كل هذا لا تدرى أن هناك مشكلة وتريد البحث عنها الآن .. فهذه مشكلة أخرى فى حد ذاتها …
سؤال آخر سغيروووونى كدا ( زى كل مرة ) .. ماهو نوع التوبة التى تريد أن يتوب إليها الشعب السودانى الفضل ؟ يتوب من ماذا ؟ وما هو الذنب الذى إقترفه الإنسان السودانى البسيط .. ؟وهو يعلم مصدر البلايا والرزايا ..
هوووى يا حاج السلاوى بطل ملاوعة وتوب ساى ! تفجروا وتفسقوا ودايرين الرزق ينزل عليكم كدة !؟ فالحين لكن !
يلا نضرب ضربة البداية وتغير (نياتنا) الوسخانة دى ….
ود الخلا…
طلائع الجهاد دى ما زماااان وقفوها !! تانى شنو !؟؟ كع كرع رع..
(وأحييك يا أم أيمن علي نصرة الحق والدين، ولنبدأ بأنفسنا حقا” أن كنا جادين في التغيير، وأدعو الجميع لضربة البداية وقيادة طلائع التغيير!!!
فهل الآخرين معنا؟؟؟ )
أخونا ود الخلا .. هل الشعب السودانى كوووولو سىء وما فيهو زول واحد كويس ..؟ ما لنا ندس رؤوسنا فى الرمال ؟ وما ذا تعنى لك مذكرة أعضاء المؤتمر الوطنى الأخيرة .. ؟ هل جاءت من فراغ أم ان هناك أناساً احسوا بالذنب وما إفترفه رفاقهم فى حق هذا الشعب.. وارادوا أن يستغفروا ربهم الذى طالما دعوتنا للرجوع إليه ( ونسأل الله أن يردنا إليه رداً جميلاً)..
وكما قال أخونا اب احمد ..واضيف إليه هل كانت شعوب سويسرا والمانيا وغالبية الدول الأوروبية تقيم الليل وتصوم النهار حتى وصلوا إلى ما هم فيه الآن من طمأنينة وإستقرار دون معاناة ؟ والإجابة الأكيدة كلا ثم كلا ..ولكن السبب هو أن ولاة أمورهم إن جاز لنا أن نطلق عليهم هذا اللقب يحترمونو يطبقون قانونهم الوضعى الذى كتبوه بأيديهم ..ولكن ولاة أمورنا ( وكل دول العالم الثالث ) لا يطبقون القانون الإلهى ( المقروض علينا جميعاً ) الذى يحرم الظلم بأى صورة من الصور .. هذا هو الفرق بيننا وبينهم يا عزيزى الفاضل ..وإنت عينك للفيل وتطعن فى ضلو كما يقول المثل ..وسؤال أخييييييييير أوجهه للسادة ودالخلا ..وابو أيه أشرف ..وأم ايمن .. هل كنا بهذا الوضع قبل ثلاث وعشرين عاما ؟؟ ولا تزال هناك ثلاث عجاف قادمات كما بشرونا .. الله يبشرهم بالخير ..
سلام قبيلة،،،
حاج أحمد وأب أحمد وود أحمد وكل الأخوة الحمداب اللي معانا واللي معهاهم واللي مع التانين، كلامكم البتقولوا فيهو ده عن تلك البلاد الأباحية الفاسقة الماجنة أنتو عارفين ما عنده أي علاقة بما ذكرناه ههنا، وعن الناس السيئة والنفوس الشريرة فأنتم أدري بما حاق بالشعب الفضيل،وكلام الأستاذة أم أيمن ما تدوه الواطة، وهي ما جابت حاجة من عندها وأنا ما جبت حاجة من عندي أنما هي بضاعتكم ورُدت أليكم فمن وجد خيرا” فليحمد الله ومن وجد غير ذلك فلا يلمن ألا نفسه،،،
كسرة أخيرة
ذكر الدكتور شمباتي شيئا” عن طلائع الجهاد ودي زي ما بيقول عمكم سلولو يطرشني ما سمعت بيها وما بنعرفها لكن بنعرف طلائع مايو يا دوك ونحن من ضمد هاتيك الجراح!!!
من كلامات دكتور كمال عبدالقادر عن المظاهرات:
خرجت مظاهرة ضد الحكومة وحمل المتظاهرون قائد المظاهرة وهو يهتف بقوة والمتظاهرون يتبادلون حمله. وعندما تفرق معظم المتظاهرين قال القائد لمن يحملونه بعد كدة نزلوني لانو بقينا شوية وناس الأمن ممكن يجونا يقبضونا. وهنا قال من يحملون الرجل نحن ذاتنا ناس الأمن فتعال اركب معانا.
هههههههههههههههههههههههههههااااى,,لكن انا لسه ما قلت نزلونو يا ود الخلا !
وتبرا من الطرش,,لكن طلائع الجهاد جابوها ناسكم ديل,كانوا بيدربوا الولاد فى المتوسط !!!! مرحلة ما قبل الكديت وكدة,بعدين لغوا الكديت وواصلوا فى طلائعهم دى !
الله لا كسبهم عافية..
وعائد عائد يا نميرى…!! كع
سلام ياقبيلة،،،
صديقي دوك شمباتي يعني أنت حالف ما تنزل ألا جو المييس (ما الميز يادكتور) ده براهو وده براهو!!
وناسنا منن ديل الجابوها؟؟ نحن ناسنا لسه ما جو يا حبيب،،،
كسرة تانية
صاحبك يادوك شمباتي دكتور كمال عبد القادر ده عندو كلامات ظريفة شديد،،،
قال ليك جلس رجل وزوجته في أحد الاماكن العامة بينما الأطفال يلعبون. وبعد لحظة صمت الرجل وقال لزوجته “بتفكري في شنو؟” فقالت له “بفكر في نفس البتفكر فيه انت”. هنا انتفض الرجل وقال لها “طلقانة يا خاينة!”
يا دكتور مش بتشبه العلاقة البينكم وبين الحكومة!!!
البروف جبرا واعضاء القمردينة .. سلام
صابر ما زال امامه عرض واحد حتي الان !!! هل من عرض آخر ؟
ركشة.. امجاد ..هايس.. وظيفة داخل الوطن .. عقد عمل ..
صابر : عمك جنوبي مجرّب خليها بيع دم سااكت لحدي ما نتفق لكن بيع أصول ثابتة لا . .
( المشتري غير مسئول عن المحل بعد استلام البضاعة ) فاهمني يا ولدي ؟
( وناسنا منن ديل الجابوها؟؟ نحن ناسنا لسه ما جو يا حبيب،،،)
ودالخلا .. ناسكم لسه ما جو .؟. عاد كان كدى سجمنا والترابة كالت خشمنا ..
أما البلاد الإباحية والفاسقة والماجنة نحنا ما قلنا نبقا زيها فاسقين .. قصدنا نطبق القانون وتكون عندنا شفافية وصدق زى ما أمرنا ديننا الحنيف وشريعتنا السمحة ..وما فى مانع ناخد منهم الكوي ونخلى ليهم الكعب ..والله العظيم هذه الجملة قالها لنا رجل مسئول ألمانى كافر وفاسق وأظنو ملحد كان أبان وجودنا فى ديارهم ( الفاسقة ..والماجنة ) قال لنا بالحرف الواحد : ” يا جماعة إنتو جايين من بلاد مختلفة عننا عشان تتعلموا عندنا لاكين ما كل العندنا كويس .. خدوا الكويس وينفع معاكم ومع بلادكم وخلوا لينا الكعب هنا “.. حسه يا ود الخلا فى شفافية أكتر من كدا ..؟؟
ونحنا قلنا على الحكومة وولاة الأمر فينا يطبقوا القانون الإلهى ( وليس القانون الوضعى ) ويطبقوهو على أنفسهم واهليهم أولاً قبل الآخرين عشان يكونوا قدوة للآخرين كما فعل السلف الصالح ..
وكلمة أخيرة يا بن الخلا .. هل تعتقد أن الشعب السودانى كووولو فاسد وفاسق ؟ لا أعتقد ذلك فهناك من يقومون الليل ويصومون النهار ..ولا يكذبون ولا يغشون الناس .. نحنا عاوزين ولاة أمورنا يكونوا كدة ..
وما تقطع الجوابات …
آآآآآآآى وحاتك أت، ناسنا لسه ماجو،،، وأنت واهم لو منتظر ليك تطبيق قانون زي ما أنت بتعشم، في بلد زي ما أنت بتأمل وتتخيل وبتفتكر أنها لم تزل كما هي زمان،،،،
يا صديقي أراك في كل مرة تدور وتكرر نفس المقولة عن فساد الشعب وفسوقه!! وكأني بك متشكك وتريد من يأتيك بالخبر اليقين، وأهو بقولها ليك تاني وزي ما قلت ليك من قبل، أنا ماجبت حاجة من عندي، بل أنا لا أعتقد كما زعمت بل أكاد أجزم أن معظم الناس في هذه الأرض تغييروا وأصابتهم جائحة الأنانية والجشع والطمع بصورة لم يسبقهم عليها أحد ولا يوجد لها مثيل وأصبحوا أسوأ مما تتصور، ألا مارحم ربي،،،
أنت يا صديقي داير ليك حكام من الصحابة علشان يحكمونا مش، أها ديل يجيبوهم ليكم من وين اذا كانت البلاد زي ماشيفين، وبقول ليك فلنبحث عن نبي له معجزات ليعيد صياغة البشر ويرد الناس ردا” جميلا” لجادة الحق والطريق القويم، ولكن وبكل أسف فقد ولي زمن الأنبياء، ولم يعد هنالك أمل ألا في التغيير الذاتي، وعلينا أن نُغير ما بأنفسنا أولا” شئنا أم أبينا أو فلنتظر الطوفان!!!!!
ههههههههههههههههههه,,الميس الميس,كلو بلم !
والله د.كمال دا كنا مستبشرين فيهو خير لكن طلع زيهم واحد !
الله لا كسبو عافية..
وخسمتك ان ما قلت لى ناسكم ديل ما تجوا !
انحنا بنحيهم براااانا ! هههههههههههههههههههههه
تحيه للجميع حاج احمد وابو احمد وشمباتى وود الخلا والكل الكل
يا جماعة الخير ليه الكيمان اتقسمت نحن كلنا حريصين على مصلحة البلد صاح ممكن تختلف وجهات النظر لكن الهدف واحد وطالما الموضوع مواجعنا كلنا اكيد بنتفق ونكون كلنا يد واحدة … صاح متفقين انو الحكومه فيها فساد والوزراء عاملنها شركات وكلووووو صاح ولازم تتغير الحاجات دى …. وبرضو نحن داير احسن من كدا يعنى برضو نغير من انفسنا شويه لعل الله يوفقنا للخير ويسهل لينا امورنا
يعنى الطريقين صاح ولازم يمشو مع بعض
كدا متفقين صاح
عليكم الله كترو الدعاء ممكن يكون فيكم صالح ربنا يتقبل دعاه والدعاء داير ليه شويه اجتهاد كمان فى العمل
الود والتحيه والاحترام للجمييييييييييييييييييييييع
كسرة : ما حلينا مشكلة اخونا صابر وعمنا جبرة ما ادانا راى للان
الى ((ان سكت قهر وان تكلمت زادت دموعي نزول ))
الغريبه انك على طول دخلت اخوونا صابر فى الموضوع واللوم
نحن ما عارفين النوايا والراجل لو ما مضطر ما وصل للمرحله دى
بعدين انا بعرف ناس مغتربين وبيساعدو الناس فى السودان وفى ناس كل فترة بترسل قروش تطلب انو يتصدقو ليهم بيها يعنى القاعدة ما عامة
يا حبيبنا صابر لاتفكر فى انت مقدم عليه الامر هين ان شاء الله وبتتفرج ان شاء الله
الاخوان فى القمردينه بقيادة عمك جبرة ما بيقصرو معاك وكمان ممكن وزير ولا مسئول يقراء المقال يحن عليك وعلى كل الشباب وتتحل مشكله ما بعيده على ربنا
ونحن اخوانك ان شاء الله
كسرة : ناس سويسرا ولندن وغيرهم من الكفار من عدل الله عز وجل أن نعم الله الدنيوية يستوفيها الكافر في الدنيا، وليس له في الآخرة نصيب. ويشهد لهذا قول النبي لعمر رضي الله عنه لما قال: “ادع يا رسول الله أن يوسع على أمتك فقد وسع على فارس والروم وهم لا يعبدون الله”، فاستوى جالسا ثم قال: «أفي شك أنت يا ابن الخطاب، أولئك قوم عجلت لهم طيباتهم في الحياة الدنيا»، فقلت: “استغفر لي يا رسول الله” [رواه أحمد].
وقال المناوي في (شرح الجامع الصغير): “الدنيا سجن المؤمن بالنسبة لما أعد له في الآخرة من النعيم المقيم، وجنة الكافر بالنسبة لما أمامه من عذاب الجحيم” اهـ .
مصيبة صابر بقت اكبر لأننا نظرنا وما ساعدناهو بي حاجه الله المستعان
سؤاااااااااااال : ماذا فعلنا لصابر ؟؟؟؟؟؟؟؟؟؟؟؟
ياصبر تعاااااااااااااااااااااال وبيع باقي البلد لو الكيزان فضلو فيها باقي- انتي عندك مليون ميل الا تلت
ليه تبيع كليييييييييييييييييييييييييتك؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وادي كل زول حقو وخلينا نررررررررررررررررررطب
انا لله وانا اليه لراجعون
اللهم اصلح البلاد والعباد واهلك الطغاة المفسدين
الاخ صابر
قال احدهم ذات مرة انه مهما اسئت الظن بالكيزان فسوف تجدهم اسواء من سؤ الظن
فارجو ان لا تبيع كليتك…لسبب بسيط جدا …انو قايل انو مهما كان المبلغ المعروض ليك دا
حاتقدر تشتغل بيهو مع الحرامية والفاسدين ديل..والله ناس المرور ممكن يبيعوك الامجاد ولا الركشة القلتها دي..ديل ناس لا بخافو من الله..ولا من حساب
انا لله وانا اليه راجعون
لا قوة الا بالله
من تقصيرنا…ده كله
لقد المتني وابكتني المقالة معقول وصلت بينا كده!
لو رجع واتصل بيك رسل لي ميل عشان نجمع ليه شير من اهل الخير امكن نلم ليهو حق الركشه ولو كمان الله فتحها امكن تبقا امجاد وبرضو يكتب فيها “اتركوني أعيش ” بس لو سامعني او بالأصح قاري رسالتي ياصبر ويالزي صابر اتصبرو وإن شااااااء الله حتفرج.