ده وكتو؟

إنتشرت في الآونة الأخيرة ظاهرة تكنولوجية أستخدمت إستخداماً جميلا من أجل تذكير (العباد) بذكر خالقهم فما أن تدلف بدخول بعض المحلات فاتحاً الباب حتى يأتيك صوتاُ جميلاً خاشعاً قائلاً (أحفظ الله يحفظك) وما أن تقوم بسماع هذا (الوصية النبوية) التى ترشد المؤمن بمراعاة حقوق الله تعالى ، والإلتزام بأوامره ، حتى تمتلئ نفسك بالخشوع و(تتذكر ربك) في زحمة هذه الحياة الفانية ومشاغلها التي لا تنتهي .
العبدلله يقترح تعميم هذه الظاهرة وذلك بتزويد كل أبواب مكاتب السادة الوزراء والمسؤولين بهذه التكنولوجيا بحيث كل ما قام السيد الوزير بفتح باب مكتبه جاءته عبارة تقول (ده وكتو؟) ! حتى يقوم (سيادتو) بمراجعة ما ينوى من تصريحات أو أعمال وهل (ده وكتها وللا ما وكتها)؟ ففي إعتقادى الجازم أن معظم (إن لم يكن كل) تصريحات المسئولين تفتقر إلى قراءة الواقع وتغرد خارج سرب (الشئ العايشنو) والأمثله على ذلك كثيرة (و ما ليها حد) بداية بذلك المسؤول الذي أراد لنا أن ندخل إلى عالم صناعة الطيران منافسين للبويينغ واللوكهيد وعاصمتنا بعد لم تدخل عالم (الصرف الصحى) ونهاية بتصريح السيد وزير التعليم العالي البروفيسور خميس كجو كندة الذى تناقلته الصحف أخيراً والذي دعا فيه الجامعات السودانية لحظر الإختلاط بين الطلاب ملتمساً أن يشمل الحظر أماكن الدراسة وكافة سوح مؤسسات التعليم العالي !
السيد الوزير (يا جماعة) يري ان مشكلة التعليم (الآنية) تكمن في (الإختلاط) وفرز البنات من الأولاد والسؤال الذي نطرحه على السيد الوزير (البروف) هو : وينو التعليم ذاااتو؟ مش أول يكون في تعليم وبعدين نجي نشوف حكاية (الفرز) والإختلاط دي؟
يا عزيزي البروف إن التعليم بجميع مستوياته وخاصة (العالي) منه في وضع كارثي مخجل (ما عاوز ليهو دليل) فبعد أن كانت سمعة البلاد الأكاديمية (ليها شنة ورنه) وصيتها العلمي المتميز تسير بذكره الركبان أصبحنا (ملطشة لليسوى واللى ما يسواش) وأصبحت (شهاداتنا) بجميع مستوياتها مدعاة للتهكم والسخرية حتى من بعض الشعوب التى كان لنا الفضل في تأسيس جامعاتها بل نظمها التعليمية وذلك بعد أن أصبحت جامعاتنا تفتقد إلى أدنى مقومات (الجامعات) بل (المدارس الثانوية) !
وكيف لا يكون ذلك وقد إمتلأت البلاد بالمؤسسات العلمية التى قامت دون دراسات منهجية وطرق علمية سليمة بل أن بعضها لا يتملك أدنى المقومات كالأستاذ المؤهل وكالمكتبات العادية (خليك من الأليكترونية) و المعامل و الكتب الجامعية مما أدى إلى هذه الصورة البشعة التى نشهدها الآن من تزايد أعداد الخرييجين (العطالى) الذين ينقصهم العلم والتأهيل .
في ظل كل هذه الفوضى والواقع المرير الذى يعاني منه التعليم العالي والمعوقات والاشكالات التى يشهدها والتدني الذى لا يختلف حوله إثنان يخرج علينا السيد الوزير بدعوته لحظر الإختلاط وفرز (البنات من الأولاد) .. طيب نقول إنو (دي المشكلة) يبقى السؤال الذى يفرض نفسو (من أين لنا بالأموال والميزانيات الضخام من أجل تنفيذ هذا الهدف النبيل)؟ والبلاد كما طمأننا بعض قادتها سوف تمر بثلاث سنين عجاف ؟
وكيف (يا ربي) سوف يقوم السيد الوزير بعمل هذا (الفرز) وإنشاء كليات ومدرجات ومعامل ومشرحات ومكتبات ومعلمات (للبنات) و(أساااسن) الحاجات دى هسه و(قبل الفرز) معظمها غير موجود أو غير مستوف للشروط والمواصفات التى يجب أن يكون عليها ؟ مش أول تكون في (مشرحة 100%) وبعدين نعمل واحده للبنات؟ ومش في الأول تكون في (مكتبه 100%) وبعدين نعمل واحده للبنات ومش مفروض تكون في (معامل 100%) وبعدين نعمل واحدات للبنات ؟ يا بروف والله حيرتنا .. هي (الحاجة ذااااتا مافي) نقوم نعمل زيها كيف ؟
يقول إخوتنا في شمال الوادي عندما يمرون بنفس ما أمر به وأنا أكتب هذا المقال .. يقولون (آه يا دماغي) والعبدلله يقول (أه يا مرارتي) ويا سعادة البروف كدي أول حاجة (يكون في تعليم) بعدين قصة (فرز الذكور من الإناث) دى ملحوقة !

كسرة :
طالما القصة قصة فشل وتعليم .. جارنا أستاذ (جلال) معلم أساس بالمعاش وزول (بخيل جلده) .. وطارق (ود الحلة) عمل في عده مهن ولم يوفق وأخيراً عمل ليهو تربيزه يبيع فيها العشاء .. جاءة أستاذ جلال .. أعطاه الصحن وطلب منه فول بألف جنيه :
– ده فول شنو؟ الشويه ده يا طارق ؟ حالتى أستاذك ودرستك في المدرسة؟
فرد عليه طارق بطريقته الساخرة :
– صاااح ما أنا هسه سفير !

Advertisements

27 تعليق

  1. لزوم البرنجية وكدا … يا حاج السلاوي كل مرة ناطي قبالنا …

  2. الغايظني يا بروف … إنو هم من بدأ بالتدمير المنهجي للتعليم .. وجايين يتبجحوا به كإنجازات .. الكم قبل الكيف .. ودا المهم بعد دا التخرب سوبا ..!!
    والغايظني أكتر .. مجتمعنا الذي كان يشبه المدينة الفاضلة يوماً من الأيام .. تراحم وتسامح .. وطيبة ونخوة وأمانة .. لما جوهو عاثوا وعاسوا فيه فسادا … وعملوا هيئة سموها (هيئة تزكية المجتمع) يا وهم زكةا أنفسكم أول بعدين تعالوا شوفو المجتمع .. ما محتاجين لأمثالكم لتزكيتنا .. ففقاد الشيء لا يعطيه ..

    كسرة:
    معليش يا بروف لو طلعت من الموضوع

  3. مواطن درجة تالتة | رد

    يعنى بلد خططا الاقتصادية المحتاجة لخبراء اقتصاديين تحال لى امام جامع عشان يجيزا وزير تعليما يكون تفكيروا كيف

  4. الوزير ده كلامو صاح مية مية لانو اثناء المحاضرة الاولاد بكونوا مقهيين في البنات وما بنتبهو للمحاضرة وهم معزورين لأنو ما بلقوا فرصة تجمعهم ببعض الا داخل قاعة المحاضرة !!!! عشان كده مستواهم التعليمي قلّ .
    ذكرني نكتة الفلاتي العايز ياكل مع الهدندوي وقال ليه ( بارك الله في طعام كثرت فيهو الايادي ) رد الهدندوي : الحديث ده دعييييييييييف .
    ليته راجع مؤهلات مدراء الجامعات وعمداء الكليات وامكانات الجامعات قبل النظر في امر الاختلاط .
    السعودية مطبقة لشرع الله وبها جامعة مختلطة وده معناه حديث الوزير ده ضعيف وهو زاتو ضعيف واحسن يقول انا ما قادر . بدل ما يقعد يشككنا في بناتنا واولادنا ….
    أجي يا المُلا خميس كجو !!!

  5. حاج أحمد السلاوى | رد

    أب احمد .. نبارك ليكم البرنجية .. يا أخا العرب ..وإن شاء الله تضوى ليك ..
    البروف الفاتح … يعنى إنت قايل المسئولين ديل هم زااااتهم ما عارفين إنو تصريحاتهم دى للإستهلاك المحلى بس ..وأذكر هنا ليكم واقعة حصلت جد جد من أحد المسعولين ( مقصودة) الكباااااار وشغل عدة مناصب رئيسه و ما يزال فى السلطة .. كان يخطب فى إحدى المدن لجمع من الناس وكانت تصريحاته كوووولها نارية وفى الهوا ساكت..وكان من بين الحضور أحد أصدقاء الدراسة ويعرف المسئول جيداً فرفع يده لكى يعلق على تصريح زميله السيد المسئول الذى بادر على الفور وقال ليهو : اقعد أقعد يا فلان ( وسماهو بإسمه ) الكلام دا ما ليك إنت ..
    أخونا الجنوبى ..الجامعة السعودية المختلطة دى وين .. فى أى مدينة ؟ .. يطرشنى ما سمعت بيها ..

  6. حاج احمد اقعد اقعد
    معقول جامعه الملك عبد الله ما سمعت بيها ,,, يا جنوبى اديهو الباقى خليه ينزل
    عندى عمى راجل كبير فى السن ما قارى جامعه ومستعد يشرح ليك الانجليزى grammar
    اسى جيب ليك خريج جامعى من زمنا دا اسمو بالعربى ممكن يكتبو غلط وفعلا طلبه الثانوى ما بيعرفوا الاملاء
    ياحليل التعليم
    اتذكرت المقال مكتوب عليه مشو الجماعه الطيبين لى ولايه فى كردفان والطلبه استقبلوهم بى نشيد منقو
    لا عاش من يفصلنا
    شكلهم المساكين حتى مقررات التنظير دى ما وصلتهم

  7. حاج أحمد السلاوى | رد

    الإخوة الكرام الجنوبى ..وأبو إيه أشرف .. يبدو إنو الشيخوخة والزهايمر إشتغلوا خلاس وما عاجد فى طريقة تانى للزوغان ..ولكم أن تتخيلوا إنو أنا شخصياً إشتغلت فى تسعير ودراسة مشروع الجامعة دى وشركتنا إشتغلت أعمال ميكانيكية وكهربائية فى نفس الجامعة شغل بحوالى 100 مليون ريال …وبعد دا كوووووولو نسيت إنها جامعة مختلطة ( دراسات عليا ..وللأجانب حسب معلوماتى البسيطة ).. مش بقول ليكم الزهايمر شايف شغلو كويس ؟
    وعليه نعتذر عن سؤالنا للأخ الجنوبى ونسحبه ..ولكم العتبى حتى الرضا ..ويلا يا الجنوبى أدينا الباقى زى ما قال ليك أبو أشرف.. عشان ننزل..
    أما موضوع التعليم فى زمن الجهل الحالى ما عاوزين نتكلم فيهو لأنو بيسوى للزول مغسة شدييييدة ..وخلوها على الله عسى الله يفرجها بعد العسر دا ..وينصلح الحال ..

  8. حاج احمد السلاوي .. سلام .. ليست الشيخوخة ولكن هي مِحَن الحكومة الله يجازيها …وما تنزل لأنو كرسيك ملك حٌر .
    هي علي شاطئ البحر الاحمر شمال مدينة جدة .
    يدرسوا فيها ابناء السعوديين من الجنسين .
    عقلاء السعوديين قالوا طالما بناتنا واولادنا بمشوا يدرسوا بره ( واكيد بناتهم ما قاعدات يجن الاحفاد ) يبقي اخير الاختلاط يكون جوه بلدهم وتحت رقابتهم .
    السلاوي : اول ما عملوا الجامعة دي واحد من شيوخهم انتقد الجامعة وقال الاختلاط حرام وحاتك ساقوه يوم واحد بس تاني يوم الشيوخ كلهم قالوا الاختلاط ما حرام .
    هسع وزيرنا الجايبنو من طالبان ده حيقيف علي الجامعة والا ح يطالب بسوق للحريم وسوق للرجال حافلة للحريم وحافلة للرجال ومستشفي للحريم ومستشفي للرجال وطيب لو انا ساكن الهاشماب انزل في الدايات ولا لازم اركب الاربعين عشان انزل في عابدين واجي مشاقق بي جوه ؟ وبيوت العذابة يدخلوا ليهم موية ولا يمنعوهم لانو الموية مؤنث .

  9. ديل بقو هاويين إنفصال…….منهم لله

  10. السلام عليكم ، البرف والاخوان ، بتنبذوا فى الجامعات وفالقننا دى ما عندها مستوى وما فى تعليم ، طيب ما اهو ده ذاتو المخلى ناس دعونى اعيش عاوزين يفكوا مكنه ، و لا عاوزنه يشتغل دكتور زى مصطفى ، العقل سمح ، و كلهم يمشو الدهب و يريحونا ، عباره جارحه : الكمسنجى بتاع مشاوير الدهب ، الصباح يكورك : عاوز تغنى يلا معانا ، وفى المساء يكورك : اهلك قبل ما تهلك ، …………………. عجبى

  11. يا بروف و يا الاخوة الافاضل اللي بيفتكر ان الحكومة عبيطة و ان الوزير غشيم و الوزراء بتاعين تصريحات و كده
    يكون زول هو ذاتو غشيم و دماغو زي صفق النيم – فالوزراء اذكي مما نتصور و هم يعنون كل ما يقولون و يكون القرار منسق و جاهز و يبتدؤا القرار بشكل تصريح ليشوفوا مدي ردة فعل فئران التجارب و تقبلها له و كلنا عارفين
    مين هؤلاء الفئران – نحنا و الفار كالعادة في الاول بيقول الروب و بعدين بيتدئ يغوص في الروب و اللايوق لحد
    ما يغرق او يطفح دائخ و يقول امنت و سلمت و الراية البيضاء ملازمانا – فنحن العبطاء و البلهاء و الغشماء
    و عالفي البرسيم بدون نسيم و شاربي الروب من قبل ما يدوب و من غير ما نقول ووب – يا سيادة البروف اشرب
    و اجقم و امسح شنباتك و خلي غيرك يشرب و اللي ما عندو شنب يمسح في طرفو او يمسح بطاقيتو –
    و اما بخصوص التعليم يا جماعة فقدت شهدت بنفسي دفن جثمانه في عام 1992 في شهر فبرائر – و استشهد بالضربة القاضية فهل الشهيد رجعت ليهو الروح تاني و انا ما عارف و بقي بعاتي –
    فالحديث عن الاموات لا يجوز فادعوا له بالمغفرة و انا لله و انا اليه راجعون
    فلقة في نص الرأس : الاختلاط بعدين بيجيب اولاد الحرام و نحنا ما ناقصين اولاد حرام فلذلك وجب الانفصال فورا
    و بدون استفتاء و كل زول يعمل سلامو الجمهوري براهو

  12. والله أبصم بالعشرة ده شغل طابور خامس فى القرن العشرين لابس ثوب الدين …ياخى كفاية علينا المقلب بتاع قوانين سبتمبر عاوز تطبظها تانى شوف لينا المشاكل المهمة وسيب الفارغة والمقدودة نحنا نصدق منو فيكم ؟؟ عصام احمد البشير يطلع يكلمنا عن الوسطية وإنه المراة كانت وكانت بجنب الرجل أيام الرسول ( ص ) داخل المسجد وخارجه وفى الحروب …بعدين إنتا وزير تعليم عالى وألا وزير شئون دينية ؟؟؟؟؟؟؟؟؟؟؟؟؟؟

  13. سلام للملك..عاش الملك فاروق..
    هو الوزير دا تابع لى ياتو جهة !؟ اولا اول مرة اسمع بيهو,بعداك اسمو ما مستساغ ! ايييييييع عليهو

  14. جنوبى..سلام…
    عافى منك وراضى عنك..

    حاج السلاوى..سلام..
    انت !! دايما محرجنا مع الناس ! ركز ياخى..

    لكن انتو يا علمانيين يا فجرة ما عايزين تنفصلوا ماالكم !؟؟ باكر بيجوا يغتسوكم فى (الطين) !! وانا برررررا

  15. يا احوانا السلام عليكم ورحمة الله بالمناسبة امبارح كنت في المسرح القومي لحضور فعاليات مهرجان ايام الخرظوم المسرحية وبالفعل كان العرض المقدم في غاية الروعة _لكن_ واه من لكن هذه كان خطاب السيد وزير الدولة بالثقافة مصطفي محمد احمد تيراب كان ركيكا لدرجة ان الذي كان بجواري د. شمس الدين سالني الزول دا ما قرا لغة عربية ولا شنو والاخطاء التي وقع فيها _ملاحظة الخطاب مكتوب _ برقم ويقصد برغم _ بور التوتر ويقصد بؤر التوتر_ تهديدا ويقصد تحديدا _ لكثافة المبدعون زيقصد لكثافة المبدعين الخ انتهي
    الشئ التاني الصورة التي في اللوحة الاعلانية للمهرجان كالاتي
    وزارة الثقافة
    الثقافة تقود الحياة
    المسرح القومي السوداني
    مهرجان ايام الخرطوم المسرحية
    الدورة الرابعة
    برعاية السيد نائب رئيس الجمهورية
    الحاج ادم يوسف
    صــــــــــــــــــــــــــــــــــــــورة زول
    شخصية المهرجان لهذا العام
    الفنان عثمان اجمد محمد حمد (ابو دليبة)
    سالني احد الشباب الصورة دي صورة منو نايب الرئيس ولا صورة الممثل
    بعد اتخيلوا بالطريقة دي دايرين نمشي قدام قال
    والله الوزراء اول حاجة يودوهم الازهر الشريف يتعلموا اللغة العربية بعد داك نشوف حكاية الاختلاط دي , هي خلاس وقفت عليها. قال وزير قال

  16. اها يا محمد اسحق هسع زي مصطفي تيراب ده بدل يحاول يرتقي لمستوي الثقافة بكرة ح يصدر قرار يخلي الثقافة تنزل لي مستواه هو .
    شمباتي .. وعليك السلام
    شفت الفتن الحاج ادم ما خطوا صورتو هسع بكرة نسمع بي حركة جديدة اسمها ( الصورة والمُكاواة )

  17. عزيزي الفاتح
    مش لمن حكومتنا الرشيد جأت السلطة يوميها مش قالت لو ما مسكنا الحكم كان الدولار بقي كم ماعارف داك
    يظهر هي مسكت الحكم ونحن مسكنا الماسورة

  18. اخى جبرا والاخوه الاعزاء
    والله والله الناس ديل جننونا عديل كده عدم اختلاط شنو الفى الجامعات …دى شعر ماعندهم ليهو رقبه
    عدم الاختلاط دى يعملوه فى برامج التلفزيون الكله حفلات خاصه رقيص وسكسكه وحاجات تقوم شعر جلدك بارننا بيها
    وعدم الاختلاط يعملوه فى برنامج نجوم الغد الكل يوم مفرخ لينا مليون حمار يهنق فينا وكل برامج الغنى والرقيص
    التلفزبون فى الزمن الما اسلامى كما يقولون لم يكن به الكم الهائل من الاختلاط والغنى والرقيص
    كسره
    خليهم يعملوا ديوان للرجال اقصد للطلبه عشان الانفصال وكده

  19. …الفيلم مصرى و المنظر سريالى هى وهو جالسين على شاطى البحر ..هى طويلة الارجل وتصل أقدامها لطرف الموية ، وهو قصير جداً ولاتصل…تسأله ببراءة: لماذا لاتنزل اقدامك “للميه” فيرد بقرف: أنا ماداير إتكلم فى الموضوع ده!
    ضحكت شديد من المقال والحال واتخيل لى يوم بتطق فيك عرق ياجبرا…اما أنا فماداير اتكلم فى الموضوع ده…تحياتى يابديع ويامبدع ومتابع…

  20. ههههههههههههه,,والله يا قرنوف اتلومت !!
    انا بأه عايز اتكلم فى الموضوع دا ومتكاد اوى !
    ربنا ياخدهم

  21. دكتور ياسين ماعندك لينا وصفه طبيه نتعالج بيها من مرض الحكومه دى
    واوع تقول لى الربيع العربي

  22. حاج أحمد السلاوى | رد

    بت وراق .. خليك من وصفة دكتور شنباتى ..وخليهو هو يعالج رقبتو فى الأول..
    وأنا ما عرف ليه سمو الثورات الحاصلة فى المنطقة العربية بالربيع العربى مع إنو المسالة كوووولها موت ودمار وحرق ..؟ الظاهر الربيع زااااتو إتغير ..وبقا خريف ..

  23. بت وراق…سلام…
    والربيع اه وفات وانتى ما جييتى,عمرت الساحات وانتى ما جيتى,,لإيها ايه لو يوم مرة طليتى,,ي الانسيتينا وقلتى ما نسيتى ) ! دا سودانى بيخاطب ثورة الربيع العربى !
    لكن اديك وصفة سحرييييية,كل ما تلاقى ليك كوز او عميل اديهو من المنقى خيار ! واتفشى,,بس…

    سلاوى…سلام..
    انا مالى يا دا !؟ جنيت ولا كاكيت ؟؟هييييييييييييييييي

  24. صباح الخير يا ناس
    وين ناس الفساد مننا نحنا ولا يغير الله ما بقومٍ حتى يغيروا ما بأنفسهم ونراجع نفسنا وهلمجرا (على قول الراجل المخرف التاني الإسمو الصادق المهدي كمان ده)
    الناس ديل عايزين يغيروا الحاجات البطالة الفي نفوسكم دي ويقوموكم عشان بالليل الواحد يمشي يرقد (على جنبو اليمين) ويرفع يدو ويقول يالله دمرهم، يصحى الصباح يلقى ربنا قرضهم جت عليهم ……… ولا شنو؟
    اتذكرت لي حاجة سمحة خلاص، سنة 2000 كنت في جامعة السودان كلية علوم الأشعة الطبية، الدكتور لقاني قاعد في سايد البنات (أصلو كنا مقسومين سايد للبنات وواحد للأولاد) كتبني مخالف وأداني (نص غياب) ولو كررتها أبقى غياب كامل ….. وكان المحاضرة لامن تخلص يقول ليك: أها المرة الفاتت الطلع أول منو؟ الأولاد ولا البنات ؟؟
    ويخلوكم قاعدين لحدي ما مثلاً البنات يطلعوا بعداك يطلعو الأولاد أنهم ما محترمين وجايين من الشوارع وح يحتكوا بالبنات وعلى قول الشيخ البرعي (الإحتكاك بعمل حريق) …!!!!
    قلت لي الوزير ده اسمو منو يمكن يكون دفعتي أصلو الموضوع ده ما جديد …..
    أها يا ناس التغيير جانا حرامي في البيت .. أكون يا ربي ما صليت العشاء؟
    وماف داعي نبلغ البوليس كلمت أختي تبطل المسلسل التركي والحرامي ح يجيبو ملك سايقو من أضانو ويرجع ليها دهبها (الصيني) …. ما تقولوا كمان عندنا دهب ونطلع من رموز الفساد …

  25. يعني دي هسي المشكلة بالله ونحن ما عارفين ..!!!
    وبالحل ده .. حيتحل التعليم .. قصدي حتتحل مشاكل التعليم كللللللللها !!!!!!!

    ربنا يوفق معاليك … ويزيدك من علمو كمان وكمان ..
    بلد ما عندك وجيع … واااخ يا بلد

  26. يا جنوبي هي بقت علي البنات و الاولاد ؟؟؟ كدي في الاول يجينا محااضر يدرس و يشرح و يفهم

  27. ما هو بصراحة انت غلطان يا أستاذ .. يعني في بني آدم طبيعي في البلد دي بيسمع تصريحات المسؤولين دي ؟!! ..
    و بعدين انت متوقع تسمع شنو بعد كلامهم عن اننا ح نقود العالم ، و ح نوقف تصدير الصمغ العربي عشان “نركَع ” الدول العظمى كما قال ( القيادي ) بالحزب الحاكم

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: