إلا نحنا

• في كل بلاد العالم تستخدم كلمات مثل .. لو سمحت .. شكراً .. متأسف .. إلا نحنا (ليه ما تعرف)؟
• في كل بلاد العالم توجد على الطرق الرئيسة خطوط عبور مشاة .. إلا نحنا (تقطع الشارع وإنتا وحظك بقى)
• في كل بلاد العالم يوجد ناطق رسمي واحد للحكومة إلا نحنا (أى مسئول يمكنه النطق )
• في كل بلاد العالم يوجهك شرطي المرور إلى أن هذا الطريق إتجاه واحد إلا نحنا (يخليك لمن تدخل) !
• في كل بلاد العالم تستخدم الركشات لنقل الأغراض إلا نحنا (عندنا تستخدم لنقل البشر والخمور كمان) !
• في كل بلاد العالم لا تتعطل دواوين الحكومة عند مجئ ساعة الإفطار إلا نحنا (الفطور وبعدين الشاي فالصلاة ثم .. تعال بكرة)
• في كل بلاد العالم لا يمكن أن يزورك شخص في منزلك فجأتن إلا نحنا ويقول ليك (كدى أفتح لينا التلفزيون نشوف الكورة) !
• في كل بلاد العالم إذا قبض عليك تقود سيارتك دون رخصة قيادة تم إياقفك إلا نحنا .. تدفع الغرامة وتمشى (ما الغرامة أهم من السلامة وكده)
• في كل بلاد العالم يتم إستخراج الأوراف الثبوتية للمواطنين مجاناً أو برسوم رمزية إلا نحنا تطلعا بالشئ الفلانى وتجددها بالشئ الفلتكاني
• في كل بلاد العالم يوجد هناك أكثر من نادي قوي يتنافسون سنويا على بطولة الدوري … ويمكن أحيانا لأندية متوسطة الحصول على اللقب … إلا نحنا .. يا الهلال يا المريخ (البقدر علي ملايين الدولارات دى منو؟)
• في كل بلاد العالم رقم الإسعاف معروف إلا نحنا (تفتش ليهو فتيش ولمن تلقاهو يكون المريض موضوعو إنتهى)
• في كل بلاد العالم يتم تخصيص حصص للموسيقي في المدارس إلا نحنا (ومع ده عندنا عشرين مليون فنان)
• في كل بلاد العالم توجد لافتات توريك إلى اين تفضي بك الشوارع التى تسير فييها إلا نحنا (لو عاوز تمشي حته فعليك الإستعانة بصديق) !
• في كل بلاد العالم هنالك سلال لوضع النفايات على الشوارع إلا نحنا (ويقولوا ليك هيئة ترقية السلوك الحضري) !
• في كل بلاد العالم لا يمكنك صرف دواء من غير روشته (من الدكتور) إلا نحنا لأنو مقابلة الدكتور (حكاية) !
• في كل بلاد العالم عندما يستوقفك الشرطي فإنه يبتسم لك ألا نحنا فإنك تبتسم له (من الخوف طبعن) !
• في كل بلاد العالم توجد بالمدن أماكن لقضاء الحاجة (مجانا) إلا نحنا فإنك لا تستطيع أن تقضيها (كان ما معاك حاجة)
• في كل بلاد العالم لا ينصب شخص في وظيفة دستورية إلا بعد أن يمر مترقياً بعدد من الوظائف إلا نحنا فيمكن ان تكون (دى أول وظيفة ليهو) !
• في كل بلاد العالم تكافئ الحكومات المغتربين لدعمهم الإقتصاد ألا نحنا فالحكومة (تطلع عين ابو اهل الخلفوهم)
• في كل بلاد العالم يعتزل السياسيون في سن مبكرة إلا نحنا (كم وتمانين) ولسه عاوز فرصة يحكم !
• في كل بلاد العالم لا توجد شركات حكومية تدخل سوق الله أكبر وتنافس الناس إلا نحنا أكتر من (500 شركة) ده غير (الرايحات)
• في كل بلاد العالم يتم فتح ملفات الفساد والتحقيق فيها إلا نحن (نفتح ليها حفرة) وندفنها
• في كل بلاد العالم لا يسمح للوافد (بدون أوراق) العمل إلا نحنا .. شغالات .. سواقين ركشات .. عمال كافتيريات والمسؤولين عاملين نايمين !
• في كل بلاد العالم يستخدم أفراد شركات الأمن لحراسة الشركات والمؤسسات إلا نحنا إذ تجدهم شغالين في الإستقبال (مع إنو ده ما شغلهم ولا مؤهلين ليهو)
• في كل بلاد العالم تعمل السفارات على حل مشاكل مواطنيها إلا نحنا فسفاراتنا تعمل على (شربكتها) !

• في كل بلاد العالم يستغرق إنشاء جامعة عشرة سنوات إلا نحنا (ممكن نعمل عشرة جامعات في سنة واااحدة)
• في كل بلاد العالم الحرامي بعاين في الواطة إلا نحنا (الحرامي يعاين ليكا جوه عيونك)
• في كل بلاد العالم لا يمارس عملية التطبيب إلا من حصل على إجازة علمية وتم تسجيله من الجهات المسؤوله إلا نحنا (ناس الأعشاب والشنو ما بعرف فاتحين ليهم عيادات عديل كده) وكمان بيعلنوا في الصحف والقنوات !
• في كل بلاد العالم يعتبر أغتصاب القاصرين جريمة توقع عليها أقسى العقوبات إلا نحنا .. شهر شهرين سجن وكم سوط كده !
• في كل بلاد العالم لن تجد في الصحف إعلانات لمرضي يطلبون من ذوى القلوب الرحيمة التبرع لعلاجهم إلا نحنا (العندنا ديوان زكاة) !
• في كل بلاد العالم توجد بين الأحياء مساحات يمارس فيها الأطفال والشباب الرياضة والالعاب إلا نحنا (عملوها كووولها عمارات) عشان كده مش ح نتحصل على مداليات ولو من صفيح !
• في كل بلاد العالم توجد بالأسواق أماكن لإيقاف العربات إلا نحنا (لأنو المحلية قاعدة تأجرها لبتاعين الطبالي وكده)

كسرة :

• في كل بلاد العالم يمكنك معرفة مخصصات المسؤولين بسهولة إلا نحنا ما تعرفها إلا لمن المسؤول (يتسرق) !

27 تعليق

  1. هو نحنه من بلاد العالم لا والف لا

  2. حاج أحمد السلاوى | رد

    لله يجازيك ويجازى محنك يا ابو ناجى ..
    حسن كابوس عدّ عليك أمبارح ..ولا شنو ؟
    وفى كل بلاد العالم لامن ماسورة تتكسر يصلحوها ويدفنوا الحفرة ويرجعوا الشارع زى ما كان .. إلا نحنا يخلوها مصيدة للمشاة والعربات ( مستعجلين عشان شنو ؟ )

  3. * لو سمحت مابقولا إلا زول داير يشحدك .
    * عبور مشاة شنو ياخي مفروض يعملوا خطوط عبور للعربات مع الناس البتمشي في نص الشارع دي . والغريبة ما بقطعوا الشارع إلا والاشارة خضره .
    * متأسف دي مابقولا إلا زول داير يشاكلك يقول ليك والله انا اسف البتكلم مع الزيك ده .
    * اما الاسعاف ده حكايته حكاية مرة اتصلنا علي الاسعاف لحالة مرضية وقعدوا يسألو فينا محلكم وين ؟ يعني ببعد عننا كذا كيلو , طبعا نحنا بحسب الكيلو بي كده والفاضي مليان ( يعني من يتحرك يجينا ) والمشوار ( إتخيل بيسموه مشوار !!) الجوه الخرطوم بي كده والبره سعره براهو.
    * في كل بلاد العالم يشيلو منك النفايات وما يشيلوا قروش إلا نحنا يشيلوا مننا قروش وما يشيلوا النفايات .

  4. حاج أحمد السلاوى | رد

    * فى كل بلاد العالم يدفعوك ضرائب ويدوك مقابله خدمات إلا نحنا دفع فى إتجاه واحد بس ( يقولوا ليك ضريبة الوطن ).
    * فى كل البلاد الإسلامية يدفعوك زكاة على النصاب القانونى .. إلا نحنا يدفعوا المغتربين زكاة على الراتب ..( مش كل بدعة ضلالة وكل ضلالة فى النار ؟ .. أها اليخمو ويصروا ).
    * فى كل بلاد العالم المتحضرة الحكومة تخدم الشعب .. إلا عندنا الشعب هو اللى يخدم الحكومة ومسئوليها .( مش بيتعبوا عشانكم فى الشغل وبيسافروا يحضروا إجتماعات وبيعملوا إتفاقيات ؟) .

    هبشة سغيروووونة .. والله إنت يا ابو ناجى بتنفخ فى قربة مقدودة ..من كل الجوانب .

  5. ود محمود جاء من المانيا بعد 15 سنة دراسة واخد الجنسية الالمانية , اول شئ لاقاهو في المطار البص من الطيارة الي الصالة كان واقف شماعة , دي خلوها اتعشا معانا فته وبعداك كرستالات البارد واحنا ماشين قال لينا نرجع الفاضي ضحكنا فيهو قال هناك ترجع الفاضي بتاع الدكان بديك قروش , والاخيرة عزمناهو يوم عشا فراخ قال لينا اي حاجة ولا الفراخ لانو هناك بدهو للطلبة زول دايرو مافي, (الا نحنا) دي ماركة مسجلة يا جماعة.
    تقول لي نفايات وضرائب وخدمات وطلبة

  6. في جميع انحاء العالم الشرطه في خدمه المواطن الا نحنا المواطن في خدمه الشرطه.

  7. السلام عليكم عليكم
    بصراحه اكتر حاجه ماغصانى البلد السايبه دى اى زول بيدخل وبيشتغل من غير اجراءات رسميه
    والكارثه ما هنا الكارثه هناك عماله بتشتغل فى البيوت وللاسف لافحص طبى لايحزنون يعنى ممكن بعد فترة
    ينقلو كميه من الامراض … دا غير الشغالين فى المطاعم خليهم ساكت وحتى السودانين وحتى على مستوى المطاعم الراقيه عدم نظافه وعدم اهتمام لانو مافى حد بيسأل
    زائد الجماعة المكنكشين فى الكراسى ديل والعجايز الطمعانين لسه يحكمو
    وبالنسبه للطب بصراحه مشيت مرة مستشفى بحرى للحوادث فعلا دكاترة ملائكه الله يديهم العافيه
    اما المستوصفات الخاصه لازم تدفع امنيه ولو مريضك مات تخلص الرسوم وبعدين تستلم الجثمان يعنى ميته وخراب ديار
    وبالجد البيزعل اننا ممكن نعرس بناتنا لاى زول من غير نعرف اصلو من فصلو وقصه البنغالى ليست ببعيد
    بلد ما ليها وجيع

  8. سلام ياقبيلة،،،،،
    ما قلنا ليك يا حاج السلاوي من زمان ما صدقتني وقعدت تلاوي فيني وتقولي شنو ونحن مالنا، أها رأيك شنو، العالم كولو كوم ألا نحن كوم براهو، وعلشان الحكاية تلفق وتظبط تمام ونكون زي الناس لا بد من دكها وأعادة توزيعها من جديد، وطبعا” دي ما بتم بالناس الحاليين ديل دي دلرة الناس الجايين ديلاك، عرفتهم ولا أقولهم ليك؟؟؟

  9. انته الفاتح جبرا حتى تسجيل الحضور خلاهو

  10. ود الخلا…
    بعد تدكوها عليكم الله ادونى اوزعها ليكم !
    عشان اشكها شك صاح !

  11. آآآ ويييييييين تاني ياشمباتي، أنت قايل فيها توزيع من تاني؟؟
    أنت ما شفته ناس الحريق لمن يدكوها البيحصل شنو؟؟
    حليلك يا النايم علي حيلك!!

  12. ههههههههههههههههههههه,,يعنى خرخرة منكم بس؟؟

  13. خرخرة من ناس التربيزة كوووولهم، مش كووولهم بتاعين (ملووص)، ولو ماعارف ملوص دي أسأل منها أعمامك ، أصلو زمان كان بيتفرجوا عليها في ميدان الأمم المتحدة!!

  14. بمناسبة الخرخرة والحريق يا شمباتي قال ليك واحد نزل ضيف علي جماعة وهم يلعبون الحريق، وفيهم واحد شفت وتفتيحة خرطهم ليك وخلاهم ليك يبكوا، وقعدو يشحدوا فيهو حق المواصلات، وفي اليوم التالي ذهب صاحبنا الضيف ليصلي الجمعة، فوجد الأمام الذي خطب في المصلين خطبة مؤثرة جعلتهم يبكون، هو هو نفس الشخص الخرييط الذي خرط الجماعة ليلة الأمس في تربيزة الحريق، فأحتار حيرة شديدة وتشكك في شخصية الامام، فذهب ليتأكد منه، فعرف الامام حيرته، فأخبره وأزال عنه شكوكه بأنه هو يا هو زاتو، هنا يبّكي وكذلك هناك بّيبكي!!
    ما دفعني لهذه الكسرة كما يقول البوني، هو صاحبكم جبرا، كتب بالامس عن صابر وخلاكم تذرفون الدموع، واليوم كتب ليكم عن حالكم وخلاكم تبكو!!
    أها السؤال يأ ستاذنا الفاضل جبرا الحل شنو؟؟؟
    ما تقول الناس دي تحل عنا وترحل لأنهم ما حا يمشوا بأخوي وأخوك، فلازم تشوف لينا حل آخر، لأنو نحن برضو منتظرين شمباتي يطلع في مظاهرة ناس الأمن علشان التغيير وكدا!!

  15. ههههههههههههههههههاااى,,الملوص اريت ملوص فلانة !
    بعدين انا طلعت قبل وح اطلع بعد باذن الله,,لكن المرة دى مافى عفو عام !
    فى بكاء عام !
    والمشى القذافى وعلى صالح بمشيهم,وان كانوا هم اهون واضعف واحقر..
    اللهم نصرك العزيز..

  16. حقيقة حقيقة هل فى امل بانه الحال الماشة عليه البلد دة يتعدل ؟ اظنه المشكلة ماحكومة بس ولا سياسين كمان كتير بحس انه السودان عبارة عن بيت عزابة كبير بالامكان السكن فيه لمن يشاء والخروج منه وكت ترغب المهم ماعندو وجيع اراعى انه حتى ماسورة الحوش ليها تلاتة يوم فاتحة ( والبلاعة) ليها شهر ماف زول شطفها والكهربا ناس الادارة شالو العداد وماف زول لاقاهم وسيد البيت راجل عميان وكبير فى السن وكسيح ماعنده اولاد ولادتو بنات ساى ومابقدرن على العزابة طبعا وفوق دة كلو العزابة حرامية يسرقو من بعض وناس الحلة اشتكو لناس الهناى انه البيت فى حركات مشبوهة لكن ناس الهناى ذاتهم ماعملوا حاجة لانو فى زملاء مع الجماعة الا انه الاغرب الاغرب انه العزابة قبل الحركات المشبوهة دى بصلو العشاء جماعة وفى الشارع ( برش) عدييييييل واحيانا بشيلو فاتحة انه ربنا يهدى اهل الحلة – حاول اقترح على ناس الحلة اتعاملو مع العزابة كيف ويجوهم من ياتو مدخل؟ – ثم اقترح على العزابة نفسهم كيف يوجدو نظام جديد للتعامل فيما بينهم اذا نجحت تكون قربت تحل مشكلة البلد دى بالنسبة لى طبعا .

  17. حاج أحمد السلاوى | رد

    (ما قلنا ليك يا حاج السلاوي من زمان ما صدقتني وقعدت تلاوي فيني وتقولي شنو ونحن مالنا، أها رأيك شنو)>>
    أخونا ودالخلا ..قلت لينا شنو من زمان ؟ كدى عيدوا لينا تانى لو سمحت .. اصلو الزهايمر بدا معانا من تلاتة وعشرين سنة ..
    إن شاء الله تكون إنت إقتنعت خلاس إنو المسألة بقت صعبة وصعب علاجه ..ووصلت مرحلة آخر العلاج الكى..

  18. سيدي البروف، لك التحية من الأعماق على ما تقوم به من عمل جليل من تبصير وتنبيه بطريقة لطيفة تدمي القلب أحيانا على واقعنا المر الذي نكتشف يوما بعد يوم (بعد قراءة مقالاتك التبصيرية) أنه أسوأ من سوء الظن العريض كما يقول الجمهوريون…. قالوا قديما (كما تكونوا يولى عليكم) أنا شخصيا أظن أن الله ابتلانا بهذه العصابة الحاكمة وسلطها على رقابنا لخلل فينا… نحن السودانيين…. ما هو رأيكم دام فضلكم؟ والله أنا لست من أهل السياسة ولا أوالى زيدا أو عبيدا لكني عندما أنظر إلى الحال (حكومة ومعارضة) يدب اليأس في قلبي وأّذكر حديث الفتن الذي أخبر عنه نبينا عندما يمر الرجل بقبر أخيه فيقول (ليتني كنت مكانه)…. إنا لله وإنا إليه راجعون ولا حول ولا قوة إلا بالله….

  19. السلام عليكم ، البرف و الاخوان ، فى كل البلاد الناس يزرعوا ويحشوا الاهنا ناس حشاش بى دقينتو
    فى كل البلاد الناس ترعى و تسمن وتبيع الا هنا ناس بيرعوا بى غنم ابليس
    فى كل البلاد الناس يمشوا الدهب ( حتى الكاوبويات ) و يرجعوا مقرشين الا هنا ناس اهلك قبل ما تهلك
    فى كل البلاد الناس تبى بيوتها وتسكن الا هنا مستنين الوادى الاخضر و حلة الصحفيين
    فى كل البلاد الناس تاكل مما تزرع لكن ناس قريعتى راحت الا ياكلو رغيف تشرنوبيل
    فى كل البلاد الناس يلبسوا القطن ، اقلو الملابس التحتيه ، هنا ناس فسفسه ابو الدموريه ولبسوا الزيت الراجع
    سؤال بايخ : ماذا فعلنا نحنو للسودان ؟ ………………. عجبى

  20. سلام ياقبيلة،،،
    صديقي كوكو سؤال أبيخ من سؤالك: ماذا فعلنا نحنو بالسودان؟؟
    كسرة
    سأل الأخ أخوه عن كيف مات أبوهم حيث لم يحضر تلك الوفاة، فاجابه أخوه بأنه ذهب معه للبحر ليستحم فأخذه الموج وهم بقرب القيف فلم يسمع لندائي له حتي غرق..
    فسأله أخوه كيف كنت تناديه؟؟
    فأجابه بانني صحت له يا بوي جيب أيدك، يا أبوي جيب أيدك فلم يفعل..
    فرد عليه أخوه بأنك أنت من قتلت أبوك!!
    فدُهش الأخ وأحتار كيف يكون قد قتل أبوه وهو قد ناده بأن يجيب يده لينتشله ولكن أبوه لم يفعل، فكيف يكون قد قتله أذن؟؟
    فاجابه اخوه وشرح له كيف أنه كان السبب في موت أبيه، حيث انه لو قال لأبيهم عند الغرق يا أبوي هاك أيدي بدلا” عن جيب أيدك لكان أبوهم قد نجا من الهلاك، حيث أن جيب ، جيب هي التي أهلكته!!!
    ويجيك عمك سلولو ويقول ليك آخر العلاج الكي، لا بالله دخلوه الفرن أحسن…

  21. حاج أحمد السلاوى | رد

    ود الخلا .. سلام يا قبيلة ..
    يعنى نحنا المفروض نساعد الحيكومة ؟ لاكين ما بااااااااااااااالغتا يا باش مهندس ..

  22. سلام يا قبيلة وجمعتكم مباركة أن شاء الله
    ما قلت كدا يا حاج أحمد، لكن كدي غتسوها في الطين وخلونا لا فين زي التسونامي العربي!!!
    قال ربيع عربي قال!!
    يا خ ده طوفان زي طوفان نوح قضي علي الأخضر وماشي علي اليابس…
    أنا عارف في ناس دايرين الحكاية تخرب ناس عليَّ وعلي أعدائي، وديل ياهم زاتم البوم البيعجبه الخراب!
    وبرضو أنا اللي بالغت ياسلولو ياهندسة ياشيخ المهندسين؟؟

  23. السلام عليكم ، البرف و الاخوان ، ود الخلا نحنو اشر ناس فى الواطه دى ، الله ادانا احسن واجمل و اغنى موقع فيها ، لكن نحنو زى القرد الاعمش و النظاره ، كان ما عارفينها اسالو منها العميد حاج السلاوى ، ود الخلا انا ماشايف اننا قريب ده حنعمل حاجه ، سؤال منتهى البياخه : ياربى منو القال نحنو حنسلم ارض السودان يوم القيامه عذراء زى ما ادونا ليها ، ……………………… عجبى

  24. البروف والسمار
    تحية طيبة وبعد
    اولا : قال رسول الله صلي الله عليه وسلم:
    (وما لم تحكم ائمتهم بما انزل الله وتخيرو من كتاب الله الا جعل الله بأسهم بينهم شديد ) وانه كلام الله سيتقاتلون في ما بينهم وبدا القتال فعلا بينهم في السلطة.
    وقال ايضا رسول الله عليه افضل الصلاه والسلام:
    (وما نغض قوم عهد الله وميثاقه الاسلط الله عليهم عدوا من غيرهم يأخذ بعض ما في ايديهم).
    والحريق ات من بينهم لكن غضب الله يعم اللهم اجرنا من غضبك يوم غضبك عليهم.
    ثانيا : من فكركم احسن لي البلد دي حقار ولاالمر ولا ياسر سكران ولا منوالمجنون الترابة في خشم اهلنا ولا الوراث الخايفين علي الجنينة والحدائق الغناءولا مساطيل لندن وامريكا
    البجي دا اجي لي شنو هو الدولار حصل 5 الف(بالقديم) وعشان يمسك ليهو بلد منخورة من تحت والماسكها قشة اخير نصبر نشوفهم بحترقوا بي غضب الله عليهم

  25. في كل بلاد العالم هنالك منظومه من السلطات الا نحن فلدينا سلطات -بفتح السين واللام- ^_^

  26. هاكم يدى ,,هاكم يدى ,,هاكم يدى !!!!!

  27. في كل بلاد العالم يا جبرا الناس بتشكر بلدا إلا نحنا السنة كلها نعلن فيها

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: