نحنا فاضين؟

بينما كان المسؤول يقرأ في صحف الصباح فجأة امتقع وجهه وأمسك بسماعة التليفون يخاطب مدير مكتبه طالباً منه الحضور على وجه السرعة.
-قريت الخبر ده؟
-ياتو خبر سعادتك؟
-الخبر بتاع توقف مراكز غسيل الكلى، (مواصلاً)أيه البيحصل ده؟ أتصل فوراً بالمسئولين عن الصحة والمالية والضرائب والزكاة وخليهم يجوني هسه.

في الإجتماع :
-أنا يا جماعة حزين جداً للشيء البحصل ده؟
-تقصد التلاتة الماتوا عشان أكسجين مافي ديل !
-لا .. لا بقصد التوقف بتاع مراكز الكلى .. معقولة الناس دي تموت عشان ما دفعنا للمراكز دي مستحقاتها الكم مليون دي!
-مسئول الصحة: لكن نعمل شنو؟ الناس دي عددها كبير وعاوزين يغسلوا 3 مرات في الأسبوع والمكنات العندنا ما كفاية والمالية ما قاعده توفر لينا قروش!
-مسئول المالية (مقاطعاً) : لكن بس معقول 3 غسلات في الأسبوع؟ نجيب ليهم قروش من وين؟
-(في حزم) : والحل شنو؟ الناس ديل ربنا بيسألنا منهم.
-مسئول الضرائب: والله أنا بفتكر إنو الحل واضح نعمل (ضريبة غسيل) على (المغتربين) أصلو دى الضريبة الوحيده الما ختيناها ليهم ! وكووولها يوم يومين ولو عاوزين بعد داك العيانين ديل تغسلوا ليهم بالبخار ذاتو ممكن .
-أنا أفتكر ده ما حل؟ المغتربين ديل خلاس خليناهم أباطهم والنجم ! (ملتفتاً نحو مسؤول الزكاة) ما عندك لينا حل يا مولانا؟
-بسم الله الرحمن الرحيم وبه نستعين أما بعد .. الحل قادم بإذن الله إذ أننا نعمل على إستعادة الخمسين الف دولار التي سبق أن تبرع بها الديوان لأحدي القنوات الفضائية (الوهمية) قبل خمس سنوات وأعدكم يا إخواني أن نضعها تحت تصرفكم حال إستلامنا لها .
-أها وبعدين يعني نخلي الناس دي تموت قدامنا كده ونقعد نعاين ليهم؟
-والله يا سعادتك فعلاً الكلام ده ما بجي وحقو نشوف لينا طريقه نوفر بيها علاج للمواطنين ديل!
-مسئول المالية: لو كان في قروش مالو لكن نجيب ليهم قروش من وين؟ القروش الفي دي ما بتكفي المرتبات والمخصصات والبدلات والسفريات و(علاج أولاد الوزراء) نحنا (طبل ساااكت) عاوزين لينا الشئ الفلانى كل سنة ، والله مافي حل إلا نشوف لينا زول يسلفنا!
-طيب ما نشوف لينا صندوق!
-(في حزم) : هي حصلت كمان عاوزين الحكومة تخش ليها في ختة؟
-لا ما بقصد سعادتك .. أنا بقصد يعني نشوف لينا صندوق تمويل دولي يدينا قرض وكده!
-مسئول المالية: قرض شنو؟ نحنا هسه ديوننا العلينا قادرين ندفعا؟
-(في دهشة) : والديون دي جات من وين؟
-كيفن سعادتك جات من وين؟ مال الكباري والسدود دي عملناها من (الصادر) يعني؟
-المهم هسه أنا عاوزكم تفكروا لينا في طريقه نجيب بيها كم مليون كده عشان ندي المراكز دي مستحقاتها وموضوع توقف المراكز ده ما يتطور .. كل زول فيكم يفكر ليهو في حل ونجتمع بكره في نفس المواعيد دي!

الاجتماع :
بدأ المستشارون والمسئولون التوافد إلى قاعة الاجتماعات الوثيرة وهم يرتدون الجلابيب البيضاء الناصعة والملافح والعصي الما خمج وقد وضعت أمامهم على طاولة الاجتماعات قوارير المياه الغازية المثلجة وثرامس الشاي وصحانة التمر والفول المدمس ..
-أها يا جماعة إن شاء الله تكونوا لقيتوا لينا حل للحكاية دي!
-والله في كم اقتراح كده سعادتك وعاوزين نشوف رأيك فيهم
– (إقتراح 1) : زيادة تعريفة تذكرة الدخول للمستشفيات !
– (إقتراح 2) : زيادة ألف جنيه في كل فاتورة كهرباء !
– (إقتراح 3) : زيادة كم قرش كده في شركات الإتصالات !
بعد تم طرح هذه الإقتراحات من قبل المشاركين في الإجتماع أعطي المسئول الذي يدير الاجتماع الفرصة لمستشار (شئون التنظير) والذي بعد أن قام بتصليح الشال وتثبيت النضارة وضع أمامه الورقة التي عليها الاقتراح، ثم خاطب الجمع :
-أنا أقترح يا جماعة تكوين لجنة تسمى اللجنة القومية العليا لدفع استحقاقات مراكز الكلى تنبثق عنها لجان أخرى هي :
-اللجنة الفرعية للجنة القومية لدفع استحقاقات مراكز الكلى للتحصيل، ومهمتها تحصيل أي رسوم أو ضرائب أو تبرعات تصل باسم اللجنة .
-اللجنة الفرعية للجنة القومية العليا لدفع استحقاقات مراكز الكلى للاستثمار، ومهمتها استثمار المبالغ والأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل، وهذه اللجنة تنبثق عنها لجنتان هما اللجنة الفرعية للجنة الفرعية للجنة القومية لدفع استحقاقات مراكز الكلى للاستثمار الصناعي، ومهمتها استثمار الأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل في القطاع الصناعي واللجنة الفرعية للجنة الفرعية للجنة القومية لدفع استحقاقات مراكز الكلي للاستثمار الزراعي ومهمتها استثمار الأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل في القطاع الزراعي وتنبثق عن هذه الأخيرة لجنتان هما اللجنة القومية لدفع استحقاقات مراكز الكلى للاستثمار الزراعي المروي واللجنة القومية لدفع استحقاقات مراكز الكلى للاستثمار الزراعي الآلي!!
على أن يشتمل الهيكل الإداري للجنة القومية العليا لدفع استحقاقات مراكز الكلى وما ينبثق عنها من لجان على المناصب التالية :
مدير عام الهيئة ،نائب للمدير العام،مجلس إدارة،عضو منتدب،مدير إداري، مدير مالي، مدير للتخطيط والمتابعة ،مدير التحصيل ،مدير الاستثمار،مدير الاستثمار الصناعي،مدير الاستثمار الزراعي،مدير الاستثمار الزراعي المروي،مدير الاستثمار الزراعي الآلي،عدد من المحاسبين.
عدد من الموظفين، عدد من السائقين.
-طيب ح تسألوني القروش نجيبا من وين؟ بسيطة .. إنتو من قبيل قاعدين تقترحوا.. القال ندفع العيانين البمشوا المستشفيات يتعالجوا تذكرة بي ألفين؟ والقال إنو نكلم شركات الاتصالات تزيد التعريفة بتاعتا حاجة شوية كده نشيلا نديها لي ناس غسيل الكلى والاقترح إنو نتفق مع ناس الكهرباء وأي مواطن يمشى يشتري كهرباء نخت ليهو ألف جنيه في الفاتورة وده كلام يا جماعة كلو مقدد ساااكت وما بجيب نتيجة والعائد بتاعو شوية و..
-(الجميع يقاطعونه) : طيب والكلام الما مقدد وبجيب قروش كتيره شنو؟
-أيواا .. الكلام المظبوط إنو نفرض على أي نادي يسجل ليهو لاعب محترف من بتاعين الكم مليون دولار ديل رسوم 10%!!

كسرة :
ما لازم مراكز غسيل الكلى تتوقف نحنا فاضين من تصنيع الطائرات !!

Advertisements

29 تعليق

  1. الخلق دى ياجبرا غلبها غسيل الهدوم ذاتو ناهيك عن غسيل الكلى!! وبالمناسبة نحنا مصارينا وكلانا انفقعت زمان وماشيين دفع ذاتى ساكت…ربنا يهون القواسى ، لكين حكايات الطيارات دى حكاية! هم قادرين يمشوا خليك من الطيران! تحياتى يامبدع

    1. يأسناذ عاوزينك تثقفنا عن فقه السترة الماسكنو الجماعة ديل اليومين ديل

  2. مبدع الأمازون و سماره الكرام سلام . . .
    قرن شطه إزيك . .
    قدرت أمسك نفسي من الضحك و أنا بقرأ في الموضوع ، لكن لمان اللجنه بتاعت الاستثمار الزراعي إنيثقت منها لجنتين ، ما قدرت بعد داك.
    الكويس في الموضوع إنو ناس ديوان الزكاه أهو جابو ليك سيرة الموضوع بتاع القناه الفضائيه ودايرين يرجعو الخمسين ألف دولار . فضل ليك موضوع خط هيثرو.

  3. اخي جبرا والاخوه الاعزاء
    انا اقترح تكوين لجنه لمتابعة اللجان

  4. قرر وزارى :
    1- قررت رئاسه الجمهوريه اجبار كل وزير بالتبرع باحدى كليتيه لصالح مريض بالفشل الكلوى
    2- قررت رئاسه الجمهوريه خصم 50 % من فوائد الشركات بتاعت الجماعه لصالح مراكز الكلى
    3- قررت رئاسه الجمهوريه اجبار كل تمساح بالتبرع الشهرى بالدم لصالح مراكز الدم وخاصه لصالح مراكز الكلى
    4- قررت رئاسه الجمهوريه استرجاع جميع المال العام المنهوب وتخصيصه لصالح العلاج
    5- قررت رئاسه الجمهوريه اجبار جميع الجهات التى رفضت الخضوع للمراجعه بدفع غرامة وتخصيصها لميزانيه الدوله خصوصا العلاج والتعليم
    6- حل واعادة صياغة جميع المؤسسات التى لها علاقه بالزكاة او بالمراجعه او من اين لك هذا
    7- عدم سفر اى وزير او قريب وزير او ود اهلو وزير للعلاج على حساب الدوله

    1. ههههههههههههههه يا ابو اية دي ياتو رائسة جمهورية حاتسوي كدة ؟؟

    2. حاج أحمد السلاوى | رد

      أبو إيه أشرف ..
      الظاهر عليك تقلت وزودت العيار فى العشاء ..وبقيت تهضرب ..
      كدى خليهم يرجعوا أموال البنوك المنهوبة أول حاجة ..

  5. الحكومه دي لو جاده كانت تهتم بالطب الوقائي ومن ثم الطب العلاجي لأننا في الأونه الاخيره نلاحظ ذياده كثيره في مراكز غسيل الاموال اقصد غسيل الكلي و ما هم استثماراتهم ذاتوا ربنا يعين مصابي هذا المرض واسرهم

  6. حاج أحمد السلاوى | رد

    ابو ناجى .. المغتربين ديل تطير عيشتهم حاشرنهم فى أى ضريبة حتى لو ما كانت شرعية ..زى ضريبة زكاة الراتب الفروضة عليهم ..
    الجمعة الفاتت كنت متابع برنامج الرياضة السودانى الساعة تلاتة بعد الظهر ( غصباً عنى .. مش حباً فى فريقنا القومى ) وكان الموضوع عن كيفية دعم الفريق القومى ( لعب عشرين مباراة .. لم يكسب أو يتعادل ولو مرة واحدة ) وإذا بالصحفى المخضرم عبد المجيد عبدالرازق ( ما متأكد غايتو من إسمه ) يقول ندعم الفريق القومى عن طريق المغتربين بدفع مبلغ عند أإجراء أى معاملة فى السفارات أ فى دول المهجر مجمع تشليح المغتربين فى الخرطوم .. يعنى ما زول يقدر يسافر لو ما ساهم فى دعم فريقنا القومى الدولى اللى حيشارك فى كاس العالم سنة 2100 إن شاء الله …ولك أن تتخيل ندفع عشان يمشو يتغلبو بالتلاتات ..
    نرجع لموضوع الغسيل واالمكوى .. اللجان دى مش كتيرة ؟ حقو ينقصوها شوية عشان تكون مبلوعة وما يسووووها ظاااااهرة كدا ..
    سؤال سغيروووووونى كدا .. الناس ديل بقوا ما يخافوا من أكل المال الحرام؟؟؟ ويأكلوه لوليداتهم كمان ..

  7. في بادرة تعتبر الاولي من نوعها وتقديرا منهم لمعاناة الشعب الباقي من الشعب الفضل واحياء لشعيرة من كان له فضل ظهر وايمانا بقول رسول الله صلي الله عليه وسلم لا يؤمن احدكم حتي يحب لاخيه ما يحب لنفسه ورجوعا للآية الكريمة وفي اموالهم حق معلوم واتعاظا بعلي صالح وبشار وزين ومبارك والقذافي اجتمع وزراء حكومة السودان الفضل وقرروا التبرع شهريا ب 10% من الراتب الاساسي لصالح مرضي غسيل الكلي وبذلك يصبح المبلغ المؤمن شهريا هو 11165 مليون ×10÷100 × 66 وزير ( اساسي برضو ) = 73689 مليون شهريا . هذا وقد اقترح احد الوزراء ممن تبقي في وجهه حبة دم بالتنازل عن بدل السكن لان كل الوزراء يسكنون في ملكهم إلا ان الاقتراح لم يجد التثنية وقد تم تأجيل المناقشة لاجتماع آآآآآآآآآآخر .
    مُشق :
    مذكرة المية ليه بدون أسامي مع إنو مذكرة العشرة فيها أسامي ( ياربي صحي فيهم ناس حسوا بينا ولآ بيدقسونا )
    عموما ناس دارفور قالوا ( كلاب كان داوسو … بخت أرنب )

  8. جبرا والسمار .
    سلامات .
    والله حكاية اللجنة الفرعية لتحصيل الاموال من اللجنة الفرعية للجنة القومية لغسيل الكلى تلف الراس وتجيب أبو الشهيق…
    أنا أقول ماعندنا ثقافة الاستقالات ليه . أتارى عندكم الزول البقدم إستقالتو بتعتبروة غلتان وبتعملوا ليهو مجلس تحقيق ومتمرمطوة

  9. أبو ناجي وشلة تبلدية (عفواً) قمردينة العتالى ..
    المسئول الفتح الموضوع دا الظاهر عليهو طابور خامس .. وبالتأكيد بعد الإجتماع التالت حيعملو ليهو حفلة وداع لأنو ما بتماشى مع أهداف المشروع الحضاري الرامي لتركيع الشعب الفضل …
    وعليه نقترح على المسئولين … إعادة الشباب القاعدين في مصر (ناس صابر وصحبه) للسودان وأخذ كلية من كل واحد فيهم مقابل حل مشاكلهم التي أدت إلى بيعهم لها .. وبكدا نكون عملنا بالمثل (من بطنو (أقصد دقنو) وأفتلو) .. ويا دار ما دخلك شر …

    يا جماعة الخير .. ما طال إنتظارنا للربيع الخاص بنا … والله فقدنا الثقة في أنفسنا بين الشعوب … يااااااارب تحلنا من المذلة الساوينها فينا الناس الما بشبهونا ديل .. آمين

    1. نحنا فى مناخنا مافى موسم الربيع عشان كدة لوك الصبر

  10. اخى جنوبى
    هههههههههههههه والله الحته الاخيره دى سمحه خلاص
    لكن ياريت يكون دواس جد جد ما يكون شرك للارنب

    1. اختنا بت وراق
      يا ريت .. وما يبقي فيهم ولا يذر..
      كل ما قلّ المسروق زاد التنافس علي سرقة القليل ..ده المطمنا شوية ..
      ياربي لا تدينا بترول تاني ولا تدينا قروش ندفع الضرائب ولا النفايات ولا الجبايات..ياربي ترجع مغتربينا كووووولهم رجوع نهائي يا ربي تخلي الحكومة زي الحرامي الدخل بيت عزابة وما لقي حاجة وقام نط الحيطه وطلع .. ياربي تلحقنا وتنجدنا ..ياربي تعدمنا القروش عشان يعدمو العشم فينا .. وبعد يعدموا العشم ويمشوا ياربي ترجع بتروووولنا وضرااااايبنا وجباياتنا وترجع مغتربينا رجوع اختياري ..

  11. اولا : هو بصراحة الناس ذاتها القال ليها اشربي موية ملوثة شنو عشان توسخ كلاها ؟؟؟؟
    ثانيا : و بعدين هي البلد تجيب اكسجين و تخزنه و تتطلع البترول لازم نركز في واحدة فيهن الاثنين ما بيجن ما بعض
    ثالثا : الدولة ما فاضية اللي الحاجات الصغيرة دي لديها مهام اكبر و جثام
    رابعا : مافي رابعا يلا قوموا فروا و ورونا عرض وطول اكتافكم
    شمارية ناشفة كده : هو الوزير بيغسل كلاهو وين و لا هو ريبوت شغال من غير كلي

  12. الاخ جبرا
    ممكن تشرح موضوع اللجان دي تاني علشان والله ما فهمتها ولو في حاجة زي دي حقيقة يعني منو العوض و عليهو العوض

  13. السلام عليكم ، البرف و الاخوان ، كله ماعندنا مانع منو لجان ، لجان منبثقه ، لجان نص كم ، لجان كم طويل ، لجان لمراقبة اللجان ، لجان تنعل سنسفيل ابو اللجان ، بس الحيكومه تعمل ليها مشروع تاكل منو و تعفينا من الضرائب و الجبايات ، و الا ، سعال ديكى : ما مناسبة اللجان التى تتدخل فى عمل اللجان الملجنه ؟ ……………….. عجبى

  14. يا ناس السلام عليكم والله مشتاقين طولنا منكم كتير ومعليش يا اخوانا كنا مشغولين شوية في تكوين اللجنة الاعلامية , لينا 4 ايام نحنس في اخو الوزير يتنازل عن لجنة الصور لخالة حبوبة بت عم جيران الرئيس (رئيس اللجنة طبعن ) في البلد لانها مولعة جدا بالصور والتصوير , وكتر خيرو اخونا جبرا ما قصر تم لينا باقي اللجان بس نسي اهم لجنة وهي الدراما (كوميدي وتراجيدي) عشان يعكسوا للناس معاناة الناس البغلسوا.لاستقطاب الدعم الاجنبي والقروض الربوية
    كسرة
    انت نمرة كم؟؟؟؟
    هل حاولت ترخص نفسك اقصد ترقم نفسك هي ما لا ابت, طيب توطن نفسك خلاس المهم هل حصلت علي الرقم الوطني……والله ياما تشوف لو حاولت …..يا استاذ جبرا (جربا و ورينا ) والمجموعة كدا اقرو الاستمارة كويس…… انا بساسك من يوم السبت وحتي اليوم ما رخصتا

  15. كم هو صعب ومعذب ومؤلم وجارح حينما تحس بأنك غير مرغوب فيه والردود التي تسمعها ليست إلا أحرف جافة محطم الشعور بالنبذة والوحدة خصوصاً من أقرب الأشخاص لديك حتى الشمس التي تأويك تجد أن الموج يضربها من ناحية طرفيك حيث يذوب لون الحياة ويتحول الأخضر إلي أحمر !!!!!!!!!!!!!
    نسأل الله العلي القدير أن يشفي جميع المرضى وأن ينصرهم ويقويهم
    خارج النص:
    1. مقابلة الطبيب بكم؟
    2. العلاج بي كم؟
    3. وين التأمين الصحي

  16. اللجان وما ادراك ما اللجان انا ابوي يغسل مرتين فيالاسبوع في مركز امدرمان المركز حللتو بالبلاء والمكن تعبات جدا بعد ما اتهدا حيلوا في الكويت تبرعوا بيهو للسودان المسكين قبل ايام امكن تعطل والناس بتغسل دخلوا كلهم في الانعاش من غيبوبه تامه الي تشنجات والمسؤلين ما جايبن خبر اين الله في قلوبهم

  17. أخى جبرا
    نحن عملنا ختة وما عندنا مانع ندخل الحكومة معنا فى الختة…. بس بنديها … الصرفة الأخيرة… وما بنقبل شيكات …ولا سندات ودائع بنكية.!!!

  18. والله يختوا ضريبة على المغتربين الا اجى اعضيكم كلكم !
    والله ياهو !
    سجمنا والبروف هجمنا …

  19. حاج أحمد السلاوى | رد

    شنباتى .. هوووووووووووى.. القال ليك منو حسه ما فى ضريبة ؟ الضريبة اقروها من عام 2009 .. ودفعتها فى رمضان الفات 2011 ..يا حليلك النايم على حيلك … وتعضى منو ..وتخلى منو ؟؟
    هبشة سغيروووووونة .. إنت عرس ما عاوز تعرس .. كمان ما عاوز تدفع الضريبة ..؟
    دا شنو دا ؟ غايتو لاكين جنس غايتو .. !!

  20. هييييي يا سلاوى,,,الضريبة العادية عارفها لكن ضريبة الغسيل دى ! اممممممم..
    بعدين عليك الله ركز مع الغسيل سيبك من المواضيع الانصرافية بتاعت العرس والحاجات دى ! وى

  21. والله راسي لفه من كتر اللجان
    واذا كده مشكلة البطالة اتحلت يعني الشباب كلهم في اللجان

  22. كسره:
    موضوع ناس الاقطان حصل فيهو شنو .

  23. والله ياخال
    توقيف مراكز غسيل الكلى ملعوب من التاجر مامون حميدة
    الان المراكز والعيادات والمستشفيات الخاصة
    بتغسل من 500 جنية لى 150 جنية
    يعنى زول مسكين داير 3*150 = 450 *4 =1800*12=21600
    يعنى امشى شوف ليك كليه ازرعها
    طرد بالبارد

    ــــــــــــــــ
    والله يكون فى عون الشعب المسكين

  24. وبعدين ناس الزكاة لو عايزين يدو زول مسكين 100 جنية
    بعملو اجتماعات تكلفتها اكثر من الف جنية عشان كيفية تسليمه ال 100 جنية

    بلد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: