وريتنا جديد

العبد لله لا يحب قراءة الشعر الجاهلي نظراً لعدد الكلمات (العاوزة ليها شرح) إذ لا يحتمل أن تكون عيني على القصيدة أتابعها وعيني على الأرقام التي بجانب الكلمات وعينى (برضو) على نفس الرقم أسفل الصفحة حتى أعرف المعنى ولكن على الرغم من ذلك فإننى أحفظ بعض الأبيات التى يبدو أنها نالت إعجابي ومن تلك الأبيات بيت الشاعر الجاهلي طرفة بن العبد الذى يقول فيه (ستبدي لك الأيام ماكنت جاهلا …. ويأتيك بالأخبار من لم تزود) !
أتذكر قول طرفة هذا كلما قمت بفتح بريدي الأليكترونى ووجدت أخباراً (عجيبة وغريبة) ومنها خبران تداولتهما الأسافير والمنتديات العنكبوتية مؤخراً ، الخبر الاول هو عبارة عن صورة من خطاب رسمي بعثت به (دكتورة) تعمل وكيلاً لإحدى الوزارات الإتحادية وهو معنون ِ الي السيد مدير الشؤن المالية والادارة بوزارتها تقول فيه :
الي السيد مدير الشئون المالية والادارة
الموضوع تمليك سيارات.
بالاشارة الي الموضوع اعلاه ، والي برنامج تمليك السيارات ، نرجو ادراج اسم الدكتورة / ) تكتب إسمها) ، للكشف السابق وارجو من سيادتكم تمليك عربة بوكس دبل كابينه ، من العربيات المخصصة للوزارة من بنك التنمية الاسلامي بجدة.
وللاهمية نرجو الحيطه في ذلك حيث انها من كوادر المؤتمر الوطني الفاعلة ولها الاولوية في ذلك.

وجزاكم الله خيرا.
د. (فلانه الفلانية)
وكيل الوزارة (الفلتكانية)
.
إنتهى الخطاب الرسمي للدكتورة وكيل الوزارة وبالطبع إن أكثر ما يلفت الإنتباه فى خطابها هذا والمعنون إلى السيد مدير الشئون المالية والإدارية (وهي تخاطبه) الحتة بتاعت (نرجو الحيطة) يعني بالعربي كده (خليك حذر) .. وهنا قد يتساءل أحدهم : طيب ليه بتحذرو؟ فتأتي الإجابة في متن الخطاب : (حيث انها) والضمير عائد لكاتبة الرسالة (من كوادر المؤتمر الوطني الفاعلة) ، وقد يتساءل نفس السائل )الغبيان( زينا كده : ويعنى شنو؟ فتجيبه تلك الفقرة التى تقول لأن (لها الأولوية في ذلك)! .
الدكتورة وكيل الوزارة ترى بان المعيار الذى تعطى به الأولوية للإستحقاق هو كون أن يكون الشخص (من كوادر المؤتمر الوطني الفاعلة) وليس أى سبباً آخرا يتعلق بالأداء أو سنوات الخدمة أو الدرجة الوظيفية وهى مؤمنة تمام الإيمان ومقتنعة تمام الإقتناع بأن هذا المعيار كفيل بان يضعها في اوائل المستحقين بل ولسان حالها يقول محذرة مدير الشئون المالية : هوووووووى أنا زولة قوية ومنظمة مية المية .. لو ما طلعتا ليا العربية .. ح أركبك التونسية !
عزيزي القارئ لا يفوتنى هنا أن أنقل لك تعليق من قام بإرسال هذه الرسالة لي على هذه (المسخرة) إذ يقول :
(لا فض فوك يا بنية ، هي لم تعد لله بل للتطاول في البنيان وتطويل الإزار ومشي الخيلاء في الأرض مرحا ، فاحرصي على ألا تكن راحلتك أقل شأنا وزمليها فلا تقبلي بكابينة واحدة ، وأسرجي خيولك نحو المعالي وتدافعي معهم بالأقدام وزاحميهم بالأكتاف ، لا ترضي بالدنية في دنياك ولا تقنعي من عرض الوظيفة بغنيمة الراتب والمخصصات ، فانت كادر فاعل وناشطة لا تفتر همتها ، أجزلي لنفسك العطاء وقري عينا فطالما جعلوا ابي قناية مراقبا للفساد فلن تقع عينه على بوكس دبل كابينة !!!، فلا تخافي هضما، فعين المراقب العام الجديد القديم مليئة بما لا عين غيره رأت ولا أذن سمعت ولا خطر على قلبك الفتي في هذا المجال) !
إنتهى التعليق .. أما الخبر الثاني والذى تداولته الأسافير ايضاً ووجدته مرسلا لي على بريدى الأليكتروني فهو وثيقة تخص أحدى الشركات المشرفة على صالات كبار الزوار بمطار الخرطوم وبها إذن دخول لشخص وقد كتب في مكان الوظيفة (أخ وزير) !
فور قراءتي للرسالة قمت بالإتصال بمسئول رفيع بهيئة الطيران المدني والذى أخبرني بأن دخول هذه الصالات متاح للجميع بعد أن يقوموا بدفع الرسوم المقررة وهنا زال عنى الإلتباس إذ كنت أظن وليس كل الظن إثماً بان المسألة فيها (إن) ولكن العبدلله لا زال مندهشاً ومتعجباً كون أن (اخ وزير) أصبحت وظيفة (عديل كده!) .. عزيزي القترئ ما أن إنتهيت من قراءة الخبرين حتى رددت قول ذلك الشاعر في زمان غابر : وريتنا جديد ما كان على بال .. ( يقصد مايو طبعن) !

كسرة :
قالت الضيفة لأحدى قريبات العريس متسائلة :
– والعريس شغال وين؟
– أخوهو مغترب في أمريكا !

22 تعليق

  1. عربة بوكس دبل كابينه ، من العربيات المخصصة للوزارة من بنك التنمية الاسلامي بجدة.

    يعنى المره دى عايزه تتملك عربيه دبل جايه فى شكل منحه و مجانن كمان
    الوليه دى ما عندها راجل يشكما
    شنباتى
    الأمر متروك لكم إما تبلغ بنك جده و لا تخلى الطب ذاتو بعد دخلوهو جنس الأشكال دى
    قالت إنها (فاعله )
    طيب وين المفعول به

  2. نعيب زماننا و العيب فينا

    و ما لزماننا عيب سوانا

    و نهجو ذا الزمان بغير ذنب

    و لو نطق الزمان لنا هجانا

    فدنيانا التصنع و الترائي

    و نحن به نخادع من يرانا

    و ليس الذئب يأكل لحم ذئب

    و يأكل بعضنا بعضاً عيانا

  3. راجل يشكمها شنو يا عمنا … الراجل ذاتو تلقاهو فاتح خشمو!!!!

  4. وشهد شاهد من اهلها 😦 عايشت الحكومات دي كلها وما رأيت حكومة غرقت في الفساد وعدم مواجهة الحقيقة والعدل لكل من تعدي علي المال العام والحق العام مثل ما يحدث الان ) ده كلام الشيخ / صادق عبد الله عبد الماجد
    طارقق اب احمد شكم في دبل قبين ؟ هي يا يابا اشترن القصور ما سألوهن !!

  5. خلاص خط هيثرو قنعتو من خيراً في رجعتو ؟؟؟
    قبلتو علي التميسيحه دي

    وبعدين هي طلبت شنو؟؟؟ حتة بوكس دبل كابينة، بس ما أكتر

    نحنا لينا الله وعيشة العدس والدكوة

    بين قوسين بخصوص عجبي!!!
    نعتذر يا صاحب الكلمة (كوكو ولا منو ما عارف)

  6. و الله بصراحة انا ما عارف الجديد شنو في الموضوعين او الخطابيت

    هذا شئ عادي و عادي جدا الا اذا كان الغرض هو النميمة و الشمارات و بس
    و بالذات لما ورد كلمة ( احذر ) و المقصود منها (اصابة العين او الحسد) و هذا اقرب تفسير
    فرجاء ا اتركوا الناس في حالها
    الحكومة دي لمين ؟؟ لناس الحكومة و ناس الحكومة ديل منو ؟ ديل ما ناس المؤتمر الوطني
    و هدف الحكومة ايه ؟؟ هو خدمة ناس المؤتمر الوطني – و الكادر من خط الخطاب ينتسب الي
    المؤتمر – و خلصت الحكاية —
    و السؤال فهل ناس الحكومة ديل حراميه بالمعني الفصيح يعني ما نزيهين مثلا؟؟؟
    فهذا السؤال : تمت الاجابة عليه منذ 30 يونيو 1989
    و طيب و سرقوا شنو – ؟؟؟؟ سرقوا و اغتصبوا سلطة شرعية و نهبوا بلد شبر شبر

    فا اذا ارتاحوا يا العزال و شوفوا غيرها و بصراحة نحنا ما عاوزين ادلة زيادة فكلوا نصب في نصب ليل و نهار سري و علني
    فهل تم انقاذ البلد ؟؟؟ فالاجابة لا – عندما جاء الانقاذ 1989 لانقاذ البلد من قبضة الصادق المهدي
    فما زال الصادق المهدي موجود يعني هل كان هدف تاني

    نعم الانقاذ من الانقسام و التمرد و طيب و الان ؟؟ الان تم الانقسام

    و زاد التمرد ليشمل الغرب بعد الجنوب ليشمل الغرب و الشرق و الجنوب
    الشرق
    طيب و هل تمت عملية التنمية المقصودة ؟؟؟ بالفعل زاد عدد العطالة
    و عدد الحرامية و عدد مرضي الضغط و السكر و الفشل الكلوي و الفشل
    الوظيفي و انتشر وباء الطائفية و باء الاناء و زيادة الخير خيرين
    و الحمدلله الان بعد مرور 22 سنة علي نفرة الانقاذ تم انقاذ المواطن من الضياع
    بالذات في مادة الجغرافية و التاريخ فالخريطة حجمها بقي صغير و التاريخ اصبح
    يسير و الجمدلله
    و توفرت كل خطوط الطيران و بالاخص التونسية

    انقاذية للتايهين : البوكس دبل كابينة بيكون إجاره للوزارة نفسها بسعر اعلي من البوكس العادي
    و يا حبذا اذا كان السائق اتعين في الوزارة و هو قريبك او
    نسيبك ( يعني البوكس من الوزارة و الي الوزارة – طلع
    مجانا و لكن بيعمل دخل شهري او سنوي و حسب عقد
    الايجار و ها يا حمار )

  7. السلام عليكم ، البرف و الاخوان ، زمان قلنا عكازى و عكازك نقعد لاى مشتبه خليك من حرامى جد ، نقعد ليهم فى السكه ، يا يخلوا الشغله دى ، الحرامى بتاع التكسى التعاونى ( ضاربنى سته الف ، زمن كانت سته الف ) المهم ظهر تانى فى الواجهه ، و المره دى شغال بى الدولار ، اهلا بالحراميه ، سؤال : مش زكى عبد الكريم كان بيغنى حلاة بلدى ، اظنو حسه بيغنى (راقداً) حليل بلدى !!!…………. عجبى

  8. البرووووف والسمار ,
    سلامات .
    الخطابين مافيهم ولازرة فساد بس حسادة منكم وبس.
    فيها شنو لوطلبت عربية للترحيل وفيها شنو لوكانت دبل كاب وفيها شنو لو ملكوها ليها والفرق شنو لو بالتقسيط المريح أوبدون تقسيط ياجماعه ماتخلو الخلق لى خالقا وأن تغيروا مابأنفسكم من حسد .
    إنتو ياجماعه دايرين أخوالوزير يقيف فى صف الكاونتر مع ناس الجمارك والتفتيش . بالله ماشينة فى حق الوزير .
    أبوها بلد ..

  9. سلامات يا رايقين …

    هي ذاااااتها مسترجله … البكاسي شنو للحريم ؟؟؟ ماتشوف ليها كامري ولا برادو .. هن ذاااتن مستواهن واطي و ماعندهن زوق ..
    بس .. ماتزعلو شدييييد كده ..

  10. سلامات للبرف وللمحاربين القدامي والجدد ….
    زي ما قال مبارك سلمان الجديد شنو لفت نظر مثلا
    نظرنا ولا نظر الحكومة الفاسدة..
    لك البرف جبرا ولكل المعلقين واصحاب الضمائر التي لم تمت بعد …
    نحن قرفنننننننننننننننننننننننننننننننننننننننننننننننا….
    قرفننننننننننننننننننننننننننننننننننننننننننننننننننننا…
    قرفننننننننننننننننننننننننننننننننننننننننننننننننننننا…
    علي الكل ترديدها بدون خوف في كل مكان وزمان لان العلة ليست في مكان واحد في السودان دي نقطة بس في بحر فساد البشير نقولها لانه المسئول الاول بنظامه الفاسد المفسد…
    الحل هو اسقاط واعدام البشير…
    علي عثمان …
    نافع ..
    عبد الرحيم ….
    وغيره وغيره من اعضاء عصابة المافيا التي احتلتنا وسرقتنا وقتلتنا من 89 ,,,,,
    الشعب يريد اسقاط واعدام كل كوز ومؤتمرجي فاسد
    الشعب يريد اسقاط واعدام كل كوز ومؤتمرجي فاسد
    الشعب يريد اسقاط واعدام كل كوز ومؤتمرجي فاسد
    كفاية دس للرؤوس في الرمال …
    البلد بتنهار …

  11. الاحباء السلام عليكم ورحمة الله
    هسع الحيصة دي كووووولها عشان بوكس دبل كابينه يا ما تختشو ,,, في ناس شالو بكاسي مستفة قروش

  12. بالله عليكم لو كل وزير عنده عربية والوكيل برضو ومدير مكتب الوزير ويمكن السكرتير.. يا ربى والله البلد دى تعبانة خالص يا بروف وبعدين لعلمك البنزين طبعا مجان والتنك فل,,,لانو بعرف واحد صديق لوزير كلما ما يجى من الخليج بدوهو سيارة مدام الوزير والتنك على الاخر…………اللهى ما ينفعهم

  13. مش أي وزير بكون عندو عربية لذيذونة ونسائية لمرتو؟ وعليه ،،، (الكادر الفاعلة) دي دايرة البوكس دبل كاب دا لراجلا .. ومافي حد أحسن من حد … والمساواة مبدأ إسلامي والدولة دولة رسالية يقول مسئولوها إنهم يتشبهون بالصحابة رضوان الله عليهم …

    يا رب أنت ترى ما يفعله هؤلاء المنافقون بنا … أرنا فيهم دلائل قدرتك يارب .. وهي دعوة مظلوم في جوف ليل بهيم أدخلنا فيه هؤلاء المأفونون لأكثر من عقدين من الظلم المنظم .. لا تغادر منهم أحداً .. لا تغادر منهم أحداً ..

  14. الأحباء الأعزاء .. شنو يا جماعةاللون الما قمرديني ده ما عجبكم؟ الناس مشت وين؟

  15. الخطاب واضح وضوح الشمس .. يا تكون مؤتمر وطنى ..أو تكون مؤتمر وطنى ..والمخاطب مدير الشئون المالية وبتقول ليهو إنها عضو فاعل فى المؤتمر الوطنى يعنى أى شنكبة او عنكبة حنضرب فى المليان ونلحقك أمات طه ( بالمناسبة أمات طه ديل حصل ليهن شنو ..أنا غايتو ما عارف ) والولية عاوزة تتبختر بالدبل كابينة فى شوارع الخرتوم وتمشى بيها الأعراس الما خمج ..وما فيش حد أحسن من حد ..
    إنت يا الفاتح لسه عايش بالأفكار الرجعية بتاعتك زمن المعايير القديمة بتاعة الكفاءة والدرجة الوظيفية وسنوات الخدمة ؟ يا لأ ..الناس تجاوزت الحاجات دى من زمااااااااااااااااااااان ..من كمين وعشرين سنة خلت ..
    بس كل أول ليهو آخر ..وكل ليل بيعقبه صباح ..حتى لو طال الزمن ..

    هبشة سغيرووووونة ..اب احمد .. هؤلاء المأفونين ….والمعنى فى بطن الشاعر .. أو كما قال .

  16. لا يا جبرا و الله اللون الجديد عاجبنا و ساري بالنا. علا الما عاجبنا جنس الهمبته العينك عينك دي ، عربيه بوكس عديييييييل كدا على حساب محمد أحمد للمؤتمر الوطني و نسوانو.

    زماااان لمان كنا في الوسطى المدرس قال لينا كل واحد يجيب خمسه و عشرين قرش عشان عايزين نعمل ليكم رحله.
    و بدينا في تسديد القروش شويه شويه لمان الفصل كولو دفع ، ما عدا واحد إسمو حسن الفكي.
    كل يوم المدرس يسألو ” جبت القروش يا حسن ؟ ” لا يا فندي.
    يوم المدرس زهج منو قال ليهو إنت يا حسن كلمت أبوك؟
    نعم يا فندي
    قلت ليهو شنو يا حسن؟
    فندي قلت ليهو المدرس قال لينا جيبو خمس و عشرين قرش عشان عايزين نعمل ليكم رحله.
    و قال ليك شنو يا حسن؟
    قال لي و الله فن.
    حسي جنس البوكس دا بس نقول:
    و الله فن.

  17. الاخ جبرا والاخوه الاعزاء
    سلاماااااات
    ياحاج احمد انت ما عارف امات طه حصل ليهم شنو اقول ليك انا (كان يامكان فى قديم الزمان وسالف العصر والاوان سبعه نسوه غير متزوجات وفات فيهم الفوات ولمن الشعر الابيض بالبياض الا واحده تمه لها المراد وتزوجت قبل فوات الزمان وانجبة طه الهمام واصبحن الخلات يحيطوه باهتمام فات حد الخيال
    واصبحه ابنهم جميعا فجاءت ثورة الانقاذ وحطمت اماله وكسرت مقاديفه وحرمته من الاحلام والامال ففكر فى ترك البلد والسفر لديار الخوجات لعله يجد من العدل والانصاف ما لم يجده فى الانقاذ وترك البلاد غير ماسوف عليها مما جعله اماته اى (امات طه) ينوحن طول اليل واطراف النهار لفقدان ابنهم الوحيد طه الفريد
    كسره
    انا ما عارفه طه دا ليه ما بقى موتمر وطنى ويكتب مزكره تصحيحيه بدل الاغتراب والدردره

  18. أههههههههههههههههه تستنكروا الدبل كابين في النسوان !!
    شوفوا شدة البرنجية دي ….

  19. احىىىىىىىىىىىىىىىىىىىى انا

  20. اهلين وسهلين نورا مصطفى ، هليتى علينا زى هلال ربيع ، ربع او اربع الله ايامك ، اقصد جعلها ربيع ، حتى لو ما عندنا منه ، البرف : ماشايفين الاسماء ، كبرو لينا الاسماء دى كتير عشان كل واحد ياخد حقوا ، سعال ساقط : حاج السلاوى المصاروه لحقوا امات طه ………………..عجبى

  21. سهرنا الليل وكملنا فى ظلال عينيك النعسانة !!

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: