بنك الفساد الإستثماري

بعد أن إتضح بما لا يدع مجالاً للشك أن الفساد الذى عم البر والبحر و(الجو) كمان ، عصى علي الإصلاح وأن (أمنا الحكومة) تتعامل معه (ببرود إنجليزى) فالعبدلله يقترح حلاً يرضي جميع الأطراف الثلاثة (الحكومة والشعب والمفسدين) .. بس طولو بالكم عليا شوية !
الفكرة ببساطة شديدة إنو طالما (قروشنا دى) بقت في خبر كان والحكومة ما قاادرة تعمل حاجة عشان ترجعا لينا وفي نفس الوكت خايفة من ردة فعل المواطن إزاء هذا الطناش (المريب) و الناس اللهطو أموال الشعب خايفين من (النهاية) وفي نفس الوكت الشعب (عاوز قروشو) .. أها في ظل المعادلة الصعبة دى العبدلله عندو حل ممكن (يخارج) كل الأطراف .
الفكرة يا سادتي هي أن نقوم بإنشاء بنك يسمى (بنك الفساد الإستثماري) وهو بنك (البنك الواااحد ده) تطرح أسهمه (للمفسدين فقط) يكون رأس ماله من القروش (الملهوطة) وكل يعطى أسهماُ حسب (لهطه) ، علي أن تمنح نسبة 95% من الأرباح (للشعب الفضل) أما الخمسة في المية فتوزع (للاهطين) تقديراً لإعادتهم (للقروش اللهطوها) !
البداية هي تقديم أقرارات (ذمة فاسدة) تقدم ليسجل عليها كل من طالت يده المال العام قيمة ما قام (بلهطه) موضحاً إجمالي نوع العملة وكميتها
ومكانها (في البنوك وللا في البيوت) كما يوضح على ذات الإقرار الأصول الثابتة (التى شيدت من مال اللهط) والتى قام بتسجيلها بإسمه أو إسم (أم الأولاد) أو الأولاد ذاااتم ويشكل ذلك الفلل والشقق والعمارات التي توجد داخل السودان أو خارجه (ماليزيا ، مدينة النخيل إلخ) !
تجمع كل إقرارات (الذمم الفاسدة) ويطلب من أصحابها الحضور لأداء القسم (تاااااني) والذى نصة : أقسم بالله العظيم وكتابه الكريم أن أعيد لهذا الشعب الفضل كل الأموال التى أخذتها بغير وجه حق والله علي ما أقول شهيد .
يتم إعطاء من قاموا بأداء القسم مهلة شهر لإعادة ما أخذوه من أموال وتنشأ من اجل ذلك مفوضية تسمى (مفوضية التحلل من الفساد).
تقوم المفوضية بالإعلان عبر الصحف اليومية عن عطاء بيع (الأصول الملهوطة) من فلل وعمارات وخلافه ويضاف ثمنها إلى (الكاش) لتصبح الحصيلة هى رأسمال البنك وكعادة البنوك فإن مجلس إدارة البنك سوف يتكون من أكبر المساهمين (الهبارين) بحسبان أنهم اكثر الأشخاص الذين لديهم أسهم (فاسدة) أما الجمعية العمومية فإنها تتكون من بقية الذين (أدوا القسم تاااني) .
هذه الفكرة لو تم تطبيقها فسوف تكون غير مسبوقة على الإطلاق .. فمن ناحية فسوف يطمئن لاهطو أموال الشعب (الفضل) بانهم قد تحللو من هذه الأموال الحرام بعد أن يصبح رأس مال (بنك الفساد الإستثماري) ملكاً للشعب (الفضل) ومن ثم يزول عنهم الخوف من أى محاسبات مستقبلية (ما القروش ورجعوها) وفي نفس الوكت كمان عندهم (5%) من الأرباح (حلال بلال) أقصد (فساد بلال) نتيجة إعادتهم للأموال التى (لهطوها) ! وفي نفس الوكت فإن هذه الفكرة تعفي الحكومة (السادة دى بي طينة ودي بي عجينة) من مسألة تقديم هؤلاء (الذين فوق القانون) إلى منصات القضاء كما أن الشعب الفضل في ذات الوكت سوف تعود إليه ما نهبت منه من أموال فيستطيع بعد ذلك أن يقوم بتشغيل مراكز غسيل الكلي (الواقفة عشان كم مليون) .. وتقديم وجبات الفطور للتلاميذ الذين (لا يجدونها) وزيادة معاش المعاشيين الذى لا يساوى أكتر من خمسة كيلو لحمة و(حاجات كتيرة) تااانى !
ويبدأ (بنك الفساد الإستثماري) في مباشرة اعماله بالفرع الرئيس وكل فروعه في السودان (الفضل) مستعيناً في جذب الجمهور بعدة أعلانات إذاعية وتلفزيونية :
إعلان (1) :
– عزيزي المواطن عزيزتي المواطنة .. بنك الفساد الإستثماري يقدم لكم أرقي الخدمات البنكية التى تستمد روحها من الشريعة والدين .. (صوت جهوري) .. أموالك في أيدٍ متوضئة أمينة !
إعلان (2)
– يا نفيسة إنتى لسه بتختى قروشك في الدولاب؟
– ومال يا عواطف عاوزاني أوديها وين؟
– أجي إنتي ما سمعتي بي بنك الفساد الإستثماري ؟
– والله الفساد سمعتا بيهو لكن التانين ديل ما سمعتا بيهم !
– بنك الفساد الإستثماري ده بنك جديد .. والله قالوا ليكي قبل ما تختي قروشك يدوكي الأرباح !
– (صوت جهورى) : مع بنك الفساد الإستثماري أموالك في حرز لعين أقصد أمين !
بعد إنقضاء عام على إنشاء البنك ورد في تقرير المراجع العام أن (بنك الفساد الإستثماري) قد جاء ضمن المؤسسات والبنوك التى رفضت مراجعة حساباتها ، وطبعن الحكومة تااااااااااني (سدت دى بي طينة ودى بي عجينة) !!
كسرة :
(بالمناسبة) .. أخبار الخط شنو؟؟؟

18 تعليق

  1. هههههههههههههههههههه,,الخط ما اتلهط !!؟
    دا ممكن نعتبرو الرمية السديدة بايدى رشيدة ..
    نهارك سعيد يا بروف..

  2. والله امس القريبة دي الرئيس زاتو حلف وأتيمن إنه ما في فساد وما في كبير على القانون والبينة على من إدعى بس ما قال اليمين على من أنكر.
    والخط ده والله أكيد باعوهوا لي زنقة وله بادلوهوا بي باخرة دقيق لهطها الشعب طويل اللسان ده. قال فساد قال. الناس دي لا لدنيا قد عملت بل هم للدين فداء قدموا الشهيد تلو الشهيد حتى فصلوا الجنوب وحققوا الإنجاز الأكبر بدمائهم وقالوا إتفكينا من الترلة المنفسة ينفسوهم إنشاء الله بالحبل.

  3. سؤال جهوري : و ده منو ده اللي بيرجع فلوس و يختها في بنك الفساد و بالذات اذا كان بياخذ 5 % ؟؟؟
    ده ما معناه لعب علي المكشوف و اللعب علي المكشوف انتهي الان بانفصال
    الجنوب و تبقي لنا حلة حمد و حنتوب و ما حنتوب
    و يا بروف شوف ليك خطة تانية و تكون ما بتنقع اقصد بتخر مويه
    و اليكم الحل الجذري من عبد فقير الي الله
    و هو يستمر الحال الي ما هو عليه لحد ما نرجع نلبس المرقع و تبقي البلد دويلات صغيرة صغيرة ذي زمان قبل المهدية و الاستعمار التركي و ما بني علي حرام فهو هالك لا محالة
    و يبقي بس ما هو نفسو قوي و عفيف و سبحان الله الذي يمد لهم حتي يدخلوا النار من اوسع
    الابواب و انما هي قطعة من نار من اراد مدغها فليفعل و من اراد لفظها فقد سلم
    و بصراحة مافي حل غيره لان اللي ماشي في الحرام لا يشبع ابدا ابدا سيفني بالمرض
    ويبلي بالذرية الفاسدة المنحرفة و بالاخير سيلفظه المجتمع كليا
    وسؤال برئ جدا : اذكر اسم شئ او شئ لم يطاله الفساد او الخراب او الدمار بدولة اسمها
    السودان ؟؟ و اذا اكان اجابتك مياه النيل فبرضو غلط فالموية ذاتها
    تلوثت و فسدت فشوف غيرو و بالتوفيق للجميع
    و جائزة السؤال سوف تكون عصاية للتتكئ عليها و تهش بها علي
    الباعوض

    شلوت علي الطائر : لا تفكر اي دولة الان في استعمارنا من جديد بعدما ميلنا حالنا الي اسؤا
    حال الا دولة مصر التي مازالت تطمع في الاراضي الزراعية و الموية
    و بذلك ترجع الملكية تاني و نظام العمد و الباشوات

  4. ملك السعودية كان عمل حساب بنكي اسمه ( إبراء ذمة ) وطلب من المختلسين انو يودعوا المبالغ المختلسة في الحساب ده وبدون ما يسألوهم او يحاسبوهم او اظهار هوياتهم في اول سنة كانت حصيلة المبالغ المودعة 147 مليون ريال وعدد الناس الاودعت 500 شخص تقريبا ….!!!!
    اريت يجيبو الوزراء والمسئولين بتاعننا ديل يوم في كل اسبوع يعملوا ليهم دروس ويجيبوا ليهم ( أعتي المشايخ ) من داخل وخارج السودان ويوعظوهم ويذكروهم فان الذكري تنفع المؤمنين ويدوهم من العيار التقيل لحدي ما يبكوا ومخاخيطم تجري … وكان بكوا يقوموا يعملوا ليهم زي حساب ابراء الذمة ده ومانا دايرين الارباح عشان ما ندخل في شبهة الربا بس اليرجعوا لينا رأس المال …..
    واريت مكان الدروس يكون (داخل الكعبة المشرفة ) لضمان التأثير .وتكاليف الرحلات الاسبوعية تكون خصما من حساب الصندوق ولو كمان حصل عجز ما مشكلة نتحملوا نحنا ما ترانا متحملين يعني بقت علي دي .
    الدعاية للحساب البنكي تكون :
    ان الله لا يغفر ان يشرك به ويغفر ما دون ذلك
    خير الخطاؤون التوابون
    يعلم ما بين ايديهم وما خلفهم
    ان كنت لا تراه فهو يراك
    اطب مطعمك وملبسك تجاب دعوتك
    كل لحم نما من حرام فالنار اولي به
    وفي الخلفية يجيبوا صور لمرضي الفشل الكلوي وضحايا نقص الاوكسجين وللشحادين ونازحين دارفور ونحنا كلنا ..حتي تكتمل الصورة ..

    خط منو ؟ هيثرو ولآ الاستواء ..!!!!

  5. حاج أحمد السلاوى | رد

    جنوبى .. الملك عبدالله بن عبدالعزيز رجل شديد وحقانى جد…عمل لجنة لمكافحة الفساد ..واللجنة شغال تش .. والمحاكمات جارية على قدم وساق .. ما فى لعب ..
    سؤال سغيرووووونى كدا .. ونحنا متين .. يا مولاى ؟؟؟؟؟؟؟؟؟؟.

  6. احنا !!؟ بعد عرسى على طوووووول !!

  7. وبعدين بالطريقة ممكن يكسبوا ثواب ومالهم اتحول من الحرام تدريجيا للحلال بحجة انهم افادوا واستفادوا وغسلوا الاموال بالشامبو والصابون وحلال عليهم

  8. مبارك عمر - الدوحة | رد

    المرة دي السيجارة قوية ” الرد الانيق ذو ربطة العنق … والجلابية ذات الجيوب التسعتاشر من جانب الحكومة الرشيدة في قعجه صفاء

  9. شمباتي !!!!!! اوع يكون علي حفيدة حاج السلاوي الفي بيت ناس ابكرون ديك !؟
    حاج السلاوي : عليكم النبي تعفوا الزول ده وتنجدونا ….
    يا بروف : البنك ده ح تلقي ليه راس مال من وين كل الشغلة طلعت كم وتلاتين حالة بس وكم واحد شردوا وكم واحد شطبوا بلاغاتهم وكم كده بس الدفوعهم … والمراجع العام الابواب مفتوحة ليه .. نحنا ساااكت مكبرين الموضوع :
    اول مرة اشوف لي حوار من سؤال وجواب ويمشوا للسؤال البعده .. غايتو يا طاهر ( ضد ) كوم حركتك جبانة …

    1. حتى ال كم وتلاتين قضية دى أتمنى تكون حقيقية مش مجرد كباش فداء أو مادة للإستهلاك الإعلامى وبس ، الله المستعان.

  10. جنوبى…
    اممممممممممممممممممممممممممممم,,,كدة الفار ابتدا يلعب فى عبى !!!

  11. السلام عليكم ، البرف و الاخوان ، مبروك عليك مرتين ما زوجتين ( ما بتقدر عليهم و ما عندك خبره ) اقصد البرنجيه و الاولى ، يا برف الاسماء ، الاسماء بقينا نفتش ليها بى المغناطيس ، و بعدين مع موضوع الكلى ده ، بقى القنبله الهدروجينيه ، ما يرسلوا ليهم كم تمرجى و مساعد حكيم الصين ولا باكستان ، الهند ولا ماليزيا و راجعين بى تكنلوجيا الغسيل ، اما المحلول فقدامكم الابيض و الازرق و كمان معاه الاحمر ، و شركات الدواء بى الهبل ، ما واحد تبادر ان شاء الله تسوطو بى تايد سؤال معروف : وليه بنك جديد ، ما كلهم ، و الحمد لله ، مستثمرين فى السفاد !!! ………… عجبى

  12. كوكو..سلام وشوق والله…
    شنو يعنى الرفسى دا !!!؟؟
    ما بسالك لكن…

  13. حاجه سغيرونية كده والله عاوزين نطمئن على أخواننا .. دكتور سنكل .. أبكرون .. بشار .. أفلايقا .. ودالخلا .. إسترايكر ..ودالزبير .. ودالمدني .. قرن شطة .. البشاوى .. ودالمهدى ..نورا .. عبدوش

    ديل فى اى منتخب يا بروف؟

  14. الاخ الفاتح والأخوة الاعزا
    تحياتنا ….
    انت بالفاتح اخوي
    الجماعة إياهم ديل كيف بعرفو اللهط ده من وين يعني أنا هسع لو عاوز الهط امسك الجناح من وين ؟؟؟؟؟
    قلت ليا الخط ياتو الفارسي ولا الكوفي ولا السوداني …
    لسع السؤال عن أهي فعلا برنجية ….

  15. ايو عفراء : ديل ناس ماجد وجكسا وبشري وهبه وبشارة وبرعي وابو الجاز وشوقي وكمال عبد الوهاب وقاقرين والدحيش والصبابي وزغبير وحامد بريمة بتاعين منتخب القمردينة .
    يا ولدي ديل ما ياااااااااااهم جدادة البيت ……

  16. ما شافو ناس هئية مياه ولاية الخرطوم لابعين كيف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: