ده اسمو كلام؟

وصلتني هذه الرسالة عبر الإيميل تعالوا نقرأها معا ً :

الأستاذ الفاتح جبرا
السلام عليك ورحمة الله تعالى وبركاته
بداية أشكرك على كتاباتك التى تضحكنا وتبكينا في آن واحد وعلى مقالاتك التى تمس صميم معاناة المواطن وعلى ذكر المعاناة دعنى أستاذى العزيز أحكى لك مشكلتي هذه والتى آمل تتناولها في أحدى مقالاتك
أنا طبيبة سودانية تخرجت من جامعة (جوبا) ثم سافرت إلى الولايات المتحدة الأمريكية وبعد عمل شاق ومضني إستطعت أن أجد مكاناً في أحدى المستشفيات هنا ، جلست لعدد من إمتحانات مزاولة المهنة والحمدلله لقد أجتزتها جميعاً والأن أقضى فترة تدريبية وقد طلبوا منى كواحدة من متطلبات هذه الوظيفة (التدريبية) أن أحضر لهم خطاباً من جامعة (جوبا) يفيد بأننى درست فيها وأننى كنت طالبة حسنة السير والسلوك (يعني شهادة حسن سير وسلوك) وهنا أستاذي بدأت المشكلة ..
قمت بالإتصال بأحد زملائي الذين كانوا معي بالجامعة وكانت هذه إجابته بالحرف الواحد (الجامعة ماعندها ختم لأنه الأختام القديمة موقوفة..والتعامل فى جامعة جوبا – فى جوبا- الآن بلإمضاء فقط..الأختام موقوفة حتى تصميم شعار جديد بدل الخرتيت..ثم ختم جديد..بعد ما يتعمل الختم دا فى مكتب الجامعة بجوبا ح يتفتح فى الخرطوم مكتب للجامعة هو البقوم بمسالة الختم وإستخراج الشهادات..ودا طبعا ح يأخد زمن ومرتبط بالوضع السياسي..لكن غالبا ح يتعمل..ويحل مشاكل الناس)
لم أكتف يا أستاذي بحديث زميلي فأرسلت أخى إلى جامعة (بحري) وهى الجامعة التى من المفترض أن تحل محل الجامعات الجنوبية وقد أجابوه عليه بالآتي : (ما عندنا الختم بتاع جامعة جوبا وما عندنا أى سجلات للطلبة الخريجين لأنو أخواننا الجنوبين شالو معاهم كل السجلات بناعت الطلبة ودوها الجنوب )
طيب السؤال البطرح نفسو يا أستاذ هو : منو المسئول من سجلات الطلاب والخريجين ديل؟ ما لازم يكون في زول مسئول من الحكاية دى ؟ يعنى هسه أعمل شنو انا؟ أسافر أمشي مدينة جوبا وأقابل ناس الجامعه هناك وأقول ليهم أنا إتخرجت من الجامعة دى وعاوزه ليا شهادة حسن سير وسلوك ؟ وهل حكومتنا بتسمح بي حاجة زى دى؟ هسه أنا تحت رحمة منو والله ما عارفة؟ وين وزارة التعليم العالي ؟ ووين المسئولين؟ ولماذا تقوم الجامعة بتغيير ختمها وشعارها الذى من المفترض أن يمثل تاريخاً لها والذى يجب ألا يكون عرضة لمثل هذه المكايدات السياسية .
لقد ذهبت قبل قليل للمستشفى التى أعمل بها وقصصت عليهم قصة الإنفصال وأخبرتهم أن جامعتي قد ذهبت إلى الدولة الجديدة لكنهم أبدوا إندهاشهم وقالوا لي : (ليه ناس التعليم العالي عندكم خلو الحاجة دى تحصل؟ مفروض

قبل الإنفصال كان يختوا بيانات الطلاب وسجلاتهم في مكان آمن أو حتي يعملو منها نسخة)
أستاذي العزيز
والله العظيم أنا محبطة وحزينة وما عارفه أعمل أو أقول شنو؟ آخر يوم ليا لتسليم الشهادة دى هو يوم 31 مارس 2012 وأنا غير متفائلة بأننى سوف أستطيع الحصول عليها أمام هذه التعقيدات التى سردتها لك
أرجوك أستاذي ساعدني في فتح حوار عن مستقبل خريجي جامعة جوبا الذين يحتاجون إلى خطاب أو شهادة من الجامعة تحمل توقيع وختم المدير .. هل يحس أحد بمدى معاناة وضياع هؤلاء الخريجين؟
كلي أمل في ذلك ودمت

إبنتك
سلمى

كسرة :
– بالله ده اسمو كلام؟ ؟ رأي المسئولين في التعليم العالي شنو في الشئ الحاصل ده !!

كسرة ثابتة :
أخبار خط هيثرو شنو؟

Advertisements

31 تعليق

  1. سلام يا استاذ
    سلمي اول الضحايا السمعنا صوتهم وياما في الجراب يا حاوي .. يا سلمي بالشي الظاهر دة ما اظن تنحل مشكلتك في الشمال .. شوفي طريقة زول يمشي جوبا .. حسب ما سمعت اليوم من صديق قادم من السودان انه زار جوبا وان المعامله للشمالين هناك قمة في الاحترام والاخوة . وان دفة العمل هناك علي قدم وساق .. غير كدة يا اختي الصبر بس .. والله عالم بالحال .. لكن كان منتظرة حل من مسئولين هنا ووزارة تجهيل عالي .. صبرك حيطول.
    الله يسهل ليك ويوفقك

  2. الله يعينك يا سلمى ..

    إنتي وحظك .. لو الجماعه إتفقوا على مرور نفط الجنوب عبر الشمال يبقى خير .. و لو إختلفوا و العياذ بالله شوفي ليك زول في الأمم المتحده يحلها ليك و كان غلبو يبقى ماعندك حل غير تجميع كل خريجي جامعة جوبا سابقآ و التجمهر امام القصر الجمهوري لرفع مذكره للأخ رئيس الجمهوريه..

    ولا كيف ؟؟؟

  3. السلام عليكم ، البرف و الحسانيه ، الناس فى شنو والاخوان فى شنو !!! كل الحاصل فى البلد دى زى قصة سلمى ، البرف هوسو الخط وانا هوسي سوق المواسير ، سؤال عجيب : يقول لك ناس العدل قزمو البلاغات من 38 الف لى 8 الف وقيل 4 وق المواسير
    وبشأن ملف (سوق المواسير) الذي جرت أحداثه منذ عامين تقريبا بالفاشر أشار وزير العدل الى أن لجنة التحقيق في قضية سوق (المواسير) بالفاشر تمكنت من تقليص البلاغات الى (8) بلاغات من جملة (38) ألف بلاغ دونت في مواجهة المتهمين، وأشارالى أن معظم البلاغات جرى تسويتها مع المتضررين. من جانبه قال الوكيل عصام الدين عبدالقادر إن اللجنة أحدثت اختراقا كبيرا في ملف سوق (المواسير) وأن المتبقي (4) آلاف بلاغ فقط من إجمالي (38) ألف بلاغ، وان غالبية الضحايا من غمار الناس الذين كانت مبالغهم أقل من (10) ألف جنيه، تمت معالجتها كلها مشيراً الى أن الأموال المستردة من المتهمين ستعالج بها بلاغات الأموال الكبيرة، مؤكداً بقاء المتهمين في الحبس. وانتهى الى أن الأزمة جرى امتصاصها بشكل كبير. ومما تقدم نلحظ ثمة تضارب واضح بين إحصائية البلاغات التي دفع بها الوزير وتلك التي قدمها الوكيل ليخرج الجميع دون أن يتوصلوا الى الرقم الحقيقي المتبقي من كارثة سوق (المواسير)!.
    ……………. عجبى

  4. حاج أحمد السلاوى | رد

    يبدو إنو الجامعة دى راحت مع خط هيثرو – الخرطوم ..وعليها العوض..وحِللللللللك لامن يتفقوا الإخوة الصعايدة على موضوع البترول اللى راح شمار فى مرقة وبقينا نكابس فى حق مروره بس عبر أمازونيا العظمى ..
    بالله دا إسمو كلام ؟؟ وربنا يعينك فى مصيبتك يا سلمى..يا بنتى ..
    فى حد عارف آخرتا حتكون شنو ؟؟؟؟؟؟؟؟؟؟

    هبشة سغيرووووونة.. أخونا ودالخلا .. تنصح بنتنا سلمى بشنو عشان تنحل مشكلتها العويصة دى ؟؟؟

  5. هههههههههههههههههههههه,,,سلمى دى شكلها ما مؤمنة يا سلاوى !!

  6. سلاااااااااااااااااااااااااااااااام
    جبرا والسمار الكرام
    تسجيل حضور انيق يليق بمقامكم

  7. الاخ جبرا والزملاء السمار .
    سلام.
    والله ياسلمى ربنا يكون فى عونك .وموضوعك مابستحمل أى هظار أو تريقة لكن حالتك دى أخير منها العرس…

  8. الاخت سلمي ربنا يكون في عونك , وطبعاانا من خريجي جامعة جوبا ولدينا شلة من الزملاء هناك والبعض منهم في الفيس بوك العنوان (جوبا مالك عليا) وساحاول ما استطعت الاتصال بمن اعرفهم ونشوف لو في طريقة. لقد غادرنا الدكتور الفرزدق استاذ الاحصاء الي السعودية قبل اسبوع ولكن هناك دكتور الزين ودكتور والي الدين وكلهم يعملون بالجامعة حتي الان ولو عايزة تلفوناتهم راسليني علي البريد
    cs91_cs_99
    وفي الختام شكرا للاستاذ جبرا
    كسرة:-
    اكتشفت بالصدفة فلل (جنجويدية) بسوبا شرق بقيادة زعيم قبلي كبير زوج بتو لرئيس دولة جارة قبل ايام , ولديه كتيبة بالجبل اولياء لم تتحرك للعمليات حتي الجمعة الفاتت
    تابعونا ما بتندمو انشاء الله
    الشارع الشارع الشارع

  9. يا يمة رسلي لي عفوك ينجيني من جور (الكبار)

    أم مجاهد

  10. إزيكم يا ناس
    يعنى تانى الزول يقول أخبار الخط والختم شنو ؟ ولا شنو؟

  11. ما ممكن يعملوا ختم بالبطاطس ويمشوا الناس ديل
    اخبار البنية دى شنو؟؟

  12. البروف والزوار الكرام ….. ألف تحية وسلام
    أنا منعاطف مع سلمى وأمثالها – و أظنهم كثر- وأسأل الله أن يفرج عليها بطريقة ما وهو على ما يشاء قدير
    لكنني اعتقد أن مثل هذه الحالات تبين لنا الفرق بين السودانين – السودان الذي كان والسودان الآن – أو بالأحرى الفرق بين السودان والسوء- دان.
    كنت في الصف السادس أيام نميري وطلب مننا الأستاذ احضار شهادة الميلاد أو 25 قرش إذا لم تكن لأحد منا واحدة حتى يستخرجوا بها عدم قيد من أجل التسنين ، وبما أنني لم أكن أعتقد أن أهلي قد تكبدوا عناء استخراج شهادة ميلاد لي واكتفوا بأن سجل والدي تاريخ ميلادي في الغلاف الداخلي لمصحفه فقد كنت ممن أحضر ال 25قرش… وكانت المفاجأة أنهم وجدوا لي شهادة ميلاد… أي أن الموظفين كلفوا أنفسهم البحث في سجلات المواليد ووجدوا الشهادة….ثم احتجت اليها مرة أخرى في أيامنا هذه وذهبت لاستخراجها وأنا موقن بوجودها فإذا بهم يعطونني شهادة عدم قيد….. أرأيتم الفرق؟ من سيسألهم إذا ما كانوا قد بحثوا أم لا؟ لن يسألهم أحد ولكن ألن يحاسبهم الله بالعمل الذي يأخذون عليه الأجر؟ … فرق fa-rig

  13. و الله بصراحة امريكا هي اللي معقدة المسالة و طالما هم عارفين انك قرأت بجامعة جوبا و اجتزت كل الاخبتارات التي قرروها عليها طيب ايش الفائدة من شهادة السير و السلوك و مش ممكن ناس المستشفي اللي قبلوا تدريبها مش ممكن يعملوا اختبار لسلوكها المهني و هي عملية في غاية البساطة
    و شئ ثاني يا اخت سلمي و انتي طالما اصلا مسافرة المفروض تجهزي كل الاوراق الممكنة عشان ما يكون في خط رجعة تاني و ضياع مجهود سنين
    و انت طالعة من خرابة فخلاص المفروض تنسي موضوع شهادة السير و السلوك
    لان خط السير اتغير و السلوك بتقول عووووووك
    و ان شاء الله ناس المستشفي سيقدرون الموقف و طالما هم قبولوا تدريبك فاذن هم عارفين حسن سيرك و سلوكك و ربنا يسهل ان شاء الله
    فصدقيني فحتي وزير التعليم العالي نفسه ما بيحلها ليك و ربنا معاك فالامريكا ن عندهم الوعي اللازم لذلك .
    بدون خربشة : اللي ساب الخرابة و الغابة بس خقوا يفكر فقط زيارة ترابها كمهاجر او مغترب و ما يفكر في ختم او رسم . و انا لله و انا اليه راجعون

  14. نفسي اعرف ناس المؤتمر والحركة من 2005م حتي 2011 م كان بتفاوضوا في شنو ؟
    مش كان اسمها انتقالية ؟ كان انتقال شنو ؟ لاحدود رسموها ولا بترول اتقسموهو ولا جامعات امنوها ..
    سلمي يا بنتنا انا شلت همك في شهادة حسن سير وشلت هم اكتر لزمايلك اللسع ما طلعوا شهادة التخرج زااتا .. موضوعكم ما هيّن وما ممكن تحلوهوا فرادا جمعوا كل المتضررين امثالك ووقتها الكترة بتلفت النظر .. لأن حكوماتنا بتخاف ما بتختشيش ….

  15. اخ نسيت
    كسرة : اخبار الخط شنو ؟

  16. سلام ياقبيلة،،،،
    شكرا” أصدقائي حاج أحمد وحنين وسهيل، فأنتم كل الرحيق وبعض البرتقالة جنوبي ومن معه من القادمين لا من بعض القُدامي الذين لا يُحسنون قولا” ولا يجيدون صُنعا!!
    أما قصة هذه الفتاة يا صديقي جبرا ألا ترون أن بها شئ من الغرابة والغموض، وبماذا تفسرون قولها (أن أحضر لهم خطاباً من جامعة (جوبا) يفيد بأننى درست فيها وأننى كنت طالبة حسنة السير والسلوك (يعني شهادة حسن سير وسلوك)!!!!!!!!!!
    ألا تحمل هذه الفتاة شهادة بكالوريوس الطب والجراحة من هذه الجامعة وإلا فكيف سُمح لها بخوض عدد من الإختبارات والإمتحانات، بل كيف سُمح لها إبتداء” بالجلوس لهذه الإختبارات؟؟؟
    ماذا تعني شهادة حُسن السير والسلوك، ومن هو المخول بمنحها لأحد من الناس وعلي أي أساس تُمنح،،،،،
    القصة بصراحة كدا يا جبرا يا خوي ما بتخش الراس،وانت الظاهر عليك إدقست في الحكاية دي لأن شكلها غير مسبوكة وحبكتها ضعيفة، فلا بد للجامعة من المحافظة علي سمعتها محليا” وإقليميا” وعالميا”، وطالما تم الإعتراف بها وتم قبول طالبتها للتدريب فلا أعتقد أنه توجد حاجة لهذه الشهادة التي لا توجد إلا عندنا نحن، وتمنح بواسطة من لا يملكها لمن لا يستحقها!!
    هذه قصة غريبة وتحدث لأول مرة فلم يسبق أن طلبها خريج طب يرغب في التخصص أو العمل بالإستيت!!

  17. أتفق معك هناك إهمال وتقصر مبالغ فيه في السودان وذالك نتيجة للتعامل بالعواطف يعني نحن دولة لا تتعامل بالقانون وحتى لا يزعل علي بشو اقول كنا ويقيني المثل الذي يقول رب ضرة نافعة والعسرة شنو ما عارفة كد كدا الواضيها

  18. وتذكرت موقف المجمعة الذي أعمل به لا تصدقوا لو قلت لكم إذا أردت منهم تصليح مغسلة القسم لأبد أن أكتب ورقة موثقة وموقعة من رئيس القسم وترفع للإدارة ثم المدير العاام ومنه الطبي ثم المالي يحولخها للمهندس وهكذا
    ولو أردت إجازة ورقة وشهود وموال طويل عريض صحصح العملية مملة لكنها تضمن حقوقي وحقوق الشركة
    عندا في السودان تعاملنا شفهي مافي حاجة أسمه أكتب ورقة موثقة أو يحزنون
    الختم خلاص ولا يهمكم لذالك نحن دولة متخلفة ويسري فيينا الفساد

  19. ههههههههههههههههههههههههههههههههههههههههههههههههههههههههههههههههههههههههههه
    من شر البلية ما يضحك والله السودان عبارة عن حظيرة ما دولة والله دي كان شركة خاصة كان عملت records من كل المستندات خلي مجهود خريجين وجامعات

  20. حاج أحمد السلاوى | رد

    أخونا ود الخلا .. كل بلد ولها لوائح وقوانين ماشة بيها فما ممكن يجى زول من خارج البلد ويفرض عليهم شروطه ..ومثال ذلك عندنا فى دولة أمازونيا العظمى ..دولة التوجه الحضارى يعاملون طلبة ال
    الشهادة السودانية وكأنهم خريجى الروضة ويفرضوا عليهم نظام تخفيض درجات ..
    المشكلة اليوم ليست ما طلبته المستشفى فى أمريكا بقدر ما هو مشكلتنا فى بلدنا العزيزاللى ما يحفظ حقوق ابنائه فى اى مرفق كان ..والآن إبنتنا سلمى سوف تعانى ولربما تفقد الفرصة الذهبية السانحة لديها للعمل فى هذا المستشفى بسبب إهمال الدولة السنية فى القيام بابسط ابجديات الحقوق المدنية ..ومن المؤكد أن بقية زملائها من خريجى جامعة جوبا سوف يعانون أيضاً من نفس الإشكالية القائمة لزميلتهم سلمى .لو حاولوا التقدم لدراسات عليا أو ما شابه ذلك وعليهم ان يبدأوا من الان فى إيجاد حل والبحث عن ختم (حتى ولو مصنوع من البطاطس) لكيلا يضيعوا وقتهم وفرصهم فى العمل والتأهيل ..
    أخى بن الفلاة اراك دوماً مدافعاً عن اخطاء دولة التوجه الحضارى فى كل سانحة وملق باللوم على أفراد شعبنا المسكين الفضل .. حسه بنتنا الدكتورة سلمى تسوى شنو غير إنها ترفع يديها لله عز وجل وتدعو على الحكومة السنية بسبب مأساة تعانى منها وليس لها فيها يد ..
    خٍف علينا شوية ..وخلونا النشوف آخرتا شنو فى مشكلة الدكتورة ..وكيفية حلها..

  21. أخونا حاج أحمد، لم نقل بشيئ مما قلته ولكل دولة ما تشاء وماتفعل، ولكن يا صديقي ألا تري أن قصة شهادة حسن سير وسلوك دي واسعة شوية!!

  22. الاخ ودالخلاء .
    سلام .
    بقولو فى العامية السودانية 😦 أولاد الحرام ماخلو لأولاد الحلال حاجة ).
    أصبحت دول العالم أجمع تصنف السودان من الدول معدومة الشفافية يعنى إنت فى أمريكا جاك سودانى شايل شهادة من أى جامعه سودانية بتخت إحتمال 70% إنها مضروبة وبتطالبو بأى مستند تانى بيثبت صحة إدعائك.
    ياحليل سمعه السودان برة …
    الله فى …

  23. حاج أحمد السلاوى | رد

    حنين الحنين وود الفلاة ..ونرجع نقول الله يلعن الكان سبب فى كل الحصل ..وأوعك تقول لى دا من عمايل الناس ..الناس فيها الصالح والطالح زى زمان .. فيها الصايمين والقائمين الليل بيذكروا الله وفيها القائمين الليل فى طلب حاجات تانية ومع ذلك كان الوضع أحسن وما حصلنا المحصول دا ..
    شهادة حسن السير والسلوك كثير من الدول بتطلبها حتى داخل أمازونيا العظمى مطلوبة من ضمن الأوراق والمستندات الرسمية ..و بمناسبة الشهادة دى تذكرنى حادثة حقيقية أبطالها موجودون أحياء يرزقون ( رجعوا السودان منذ فترة ) حدثت فى السعودية .. استاذ جامعى فى احد الجامعات أراد أن يقدم لزوجته (استاذة جامعية ايضاً) للعمل فى إحدى جامعات البنات بالمملكة وكان التقديم يتم عن طريق القسم الرجالى فى الجامعة المنفصلة طبعن .. فذهب الزوج وقدم للمسجل كافة المستندات المطلوبة الذى عاينها وتفحصها وقال للزوج بس فى شهادة واحدة ناقصة مطلوبة ..فسأله الزوج عن الشهادة فقال شهادة حسن سير وسلوك .. هنا غلى الدم فى عروق السودانى ( نحنا معروفين بالعصبية وحرارة الدم ) وقال للمسجل تقصد شنو يعنى أطلقها ؟ فقال له المسجل تطلق مين ؟ قال له هذه الأوراق تخص زوجتى ومعنى كلامك دا إنو لازم أطلقها وإلا كيف انا عايش وساكن معاها .. فاعتذر له المسجل وتغاضى عن الشهادة الملعونة اللى حتضيع مستقبل الدكتورة سلمى ..
    عشان كدا قصة شهادة حسن السير والسلوك ما واسعة .. يا ود الخلا ..

  24. جبرا والسمار :
    بعد غيبة نعود
    اسى عليك الله امريكا المصنفع السودان فى خانة سوء السير والسلوك عاوزه منو لمواطن شهادة حسن سير وسلوك !!! مفروض اى مواطن سودانى بنظر امريكا يكون حسن السير والسلوك على الاقل لانو صابر على الحكومه ولا شنو ؟؟؟؟هههههههههه
    سلمى الله يعينك اضربى ليك اى شهادة وانتهى الموضوع كلها بتكون بى خمسميياية
    هو البكلاريوس بتاعك ذاتو بيتباع بى تلاته ونص خلى الشهاده ..

  25. جبرا : متلومين ومقصرين مشاغل الدنيا .
    السمار ود الخلا السلاوى وسهيل والاحباب مشتاقين برضو

  26. هههههههههههههههههههههههههههههههههه,,ياهو دا الفالحين فيهو ! كلما جاءكم صادق بنبأ قلتم ما سمعنا بهذا فى آبائنا الاولين !
    انت ياودالخلا قريت طب ومشيت قدمت فى امريكا وما طلبوا منك شهادة حسن سير وسلوك؟مالك ياخ !
    دى حاجة معرووووووووفة لكل من اراد الالتحاق ببرنامجهم التدريبى,وخش على النت وابحث عن مطلوبات العمل والدراسة بامريكا..
    ودقى يا مزيكا ..
    ورقصى البامزيكا ولا البامزيرا ما بعرفو هو !

  27. افليقا والله مشتاقون وبرضو مشتاقين،،،
    يا جماعة الخير أستهدوا بالله وختو الكورة واطة، أنتو كووولكم شمباتي وحنين ومن وراءكم عمكم سلولو، كدي ورونا شهادة حسن السير والسلوك دي تطلع من ياتو نقطة، وبتسري لمدة كم يوم!!!!
    يا ناس ما تخليكم منطقيين وتحاكموا بالعقل،،،
    غايتو جنس غايتو!!!

  28. أفليقا.
    وينيا …
    إلا بالق…
    داير لى دكتوراة فى العلوم والتكنلوجيا النووية …
    تكلف كام …
    داير أجيبا ضقلا يكركب…والرهيفة التنقد…

  29. دكتوره سلمي يمكن التواصل علي الايميل h_haboba_19@hotmail.com وانشاء الله ادلك علي جهة يمكن ان تساعدك في حل مشكلتك حتي تلحقي قبل 31 مارس وتقدمي أوراقك

    والله من وراء القصد

  30. السلام عليكم ، ود الخلا الكلام ده عيب عليك ، اذا كان اصدقاؤك هم البرتقاله وبعض القادمين ، فليس معنى هذا ان تتقول على الذين لا يحسنون قولا و لا يجيدون صنعا ، القرد عند امو غزال ، نرجو الايجابيات ، سؤال بره الموضوع : خير الكلام ما قل و دل ………… عجبى

  31. وافضيحتنا بين الدول

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: