تمثيل بالجثة

قبل حوالى شهر من الآن وتحديداً في يوم 16 يناير قمت بكتابة مقال بعنوان (ده ما وكتو) وقد ناقش المقال تصريح السيد وزير التعليم العالي (البروفيسور) خميس كنده الذى تناقلته الصحف وقتها والذي دعا فيه الجامعات السودانية لحظر الإختلاط بين الطلاب ملتمساً أن يشمل الحظر أماكن الدراسة وكافة سوح مؤسسات التعليم العالي !
تحذير:
إذا كنت تشكو من أمراض القلب أو تصلب الشرايين أو إنسداد الأوردة أو إلتهابات المرارة ننصحك بعدم متابعة المقال !

لم تمض أسابيع على هذا التصريح (المهبب) من سعادة البروف الوزير حتى طالعنا بتصريح آخر أكثر (هباباً) صرح به في أحد البرامج الإذاعية إذ قال لا فض فوه (نحن نرفض التوسع في دراسة اللغة الانجليزية بالمراحل الاولية والثانوية ) ثم أضاف رداً على سؤال لمقدم البرنامج (ان اللغة العربية هي لغة العلم والاصل ولايمكن ان تستبدل) وزاد أطال الله بقاءه (من اراد تعلم اللغات الاجنبية عليه التوجه للمعاهد والبعثات التي تعمل في هذا المجال فيمكنها ان تقدم المزيد ) !!
طيب خلونا نمسك التلات نقاط التى وردت في حديث السيد الوزير نقطة .. نقطة :
– (النقطة الأولي) تقول : (نحن نرفض التوسع في دراسة اللغة الانجليزية بالمراحل الاولية والثانوية ) .. كان على السيد الوزير أن يواصل قائلاً (لتكتمل (المهزلة) : ( ولا نمانع من التوسع فيها في المرحلة الجامعية بعد إعطاء كل طالب يلتحق بالجامعة حقنة – لغة إنجليزية – في العضل ) !!..
ما عاوزين نقول ليك يا سعادة الوزير (هو التعليم ذااااتو وينو؟) لكن حكاية (نرفض التوسع دى) توحى بأن ما يقدم الآن بالمراحل الأولية والثانوية من مناهج لغة إنجليزية شئ مقبول (وما محتاج ليهو توسع) وإنو جرعة مناسبة يستطيع من يلتحق بالتعليم الجامعي أن يواكب بها المنهج الجامعي ، والواقع يقول عكس ذلك تماماً إذ أن الطالب وهو يلتحق بالجامعة لا تكون في إستطاعته كتابة (جملة مفيدة) والكل يعلم بان مستوى اللغة الإنجليزية قد بات مضحكاً جداً حتى على مستوى الخريجين في كافة الكليات ! وهنا لا نود أن نشير إلى أن (إجادة اللغة الإنجليزية باتت من أهم متطلبات معظم الوظائف) !
– (النقطة التانية) : تقول (ان اللغة العربية هي لغة العلم والاصل ولايمكن ان تستبدل) .. يبدو أن السيد الوزير يعيش في العصر الرابع عشر الميلادى حيث العصر الذهبي للعرب ؟ إن حديث السيد الوزير بان اللغة العربية الآن هي لغة العلم لهو حديث يفترض الا يصدر من (بروف) يفترض انه يطلع على كثير مما تنتجه العقول الآن في كافة مجالات المعرفة وكيف أن إسهامات العرب فيها لا تساوى (شروى نقير) !
ثم من قال لك يا سعادة الوزير ان تدريس لغة أجنبية يعنى إستبدالها باللغة الأم ؟ (غايتو دى ما سبقك عليها زول) .. كل المنظومات التعليمية في كل العالم تقوم بتدريس اللغات الحية بمدارسها فهل ضاعت لغاتهم الأصلية أم اكتسبوا مهارات في الإطلاع علي ما تنتجه الأمم من علوم إنعكست على تقدم وتطور بلدانهم وشعوبهم في كافة المجالات .
– النقطة الثالثة : تقول (من اراد تعلم اللغات الاجنبية عليه التوجه للمعاهد والبعثات التي تعمل في هذا المجال فيمكنها ان تقدم المزيد ) !
يعني السيد الوزير بيقول ليكم بصريح العبارة (العاوز يعلم أولادو إنجليزي يمشى يشوف الحاجة دى بي طريقتو) ! وطريقتو دى أيها السادة القراء هي بلا شك (المدارس الخاصة) ذات الرسوم المليونية التى يستطيع أبناء المسئولين الإلتحاق بها (وضمان مستقبل أبنائهم الوظيفي) ليكتفي أبنا الشعب الفضل بدراسة لغة (قريش) !

كسرة :
أمبارح .. نفرز البنات من الأولاد .. والليلة نرفض التوسع في تعليم الإنجليزية .. يوم بي تصريحاتك دى يا (كندة) بتكتل ليكا زول !!

كسرة تانية :
غايتو العبدلله مقتنع غاية الإقتناع بأن التعليم في السودان مات من زماااان وإنو زى تصريحات الوزير دى تمثيل بالجثة ساااكت!!

كسرة ثابتة :
أخبار خط هيثرو شنو؟

48 تعليق

  1. عليك الله يا جبرا الكلام دا سمعتو باضانك دي ؟؟؟!!!! ما ممكن اصدقك عشان صحتي بس

  2. سلام ياقبيلة،،،
    والله يا بروف كلامك صاح وما فيهو أي غلط، ولكن سيادة الوزير غلتان فكان عليه أن يطلب التوسع والتجويد والتحسين من اللغة العربية أولا” في مدارس الأساس والثانوي والجامعات،وبعدها يشوف قصة اللغات الأخري دي، وكلنا نعلم أن أبناءنا لا يجيدون العربية ولا الهيروغليفية وتري الخريج الجامعي وهو لا يحسن كتابة طلب التعيين لوظيفته ناهيك عن رداءة الخط وركاكة الأسلوب وضعف المعاني والكلمات،،،،
    وفعلا” يا صديقي جبرافإن اللغة العربية هي اللغة الأصل وأم اللغات التي في العالم كلها، وهذه حقيقة لا ينكرها إلا مكابر ولا تحتاج لشرح ولا تفسير، وتدهور الأمة وضياع هويتها ولغتها يعود بالدرجة الأولي لفكهم الدرب وسلوكهم وراء التغريب وهم من ملك ناصية العلوم وأوصولها، ولكنهم حين أختلفوا وفارقوا طريق الحق القويم وأبتغوا العزة عند الآخرين أذلهم الله، ومن يبتغي العزة في غير طريق الله أذله الله وهذه هي الشواهد والدلائل الواضحة وإلا بماذا تُفسر سيادة المسلمين يوما ما للعالم أجمع علما” وقيادة وحكما” راشدا” وعدالة وحرية وعلوم دنيوية وآخروية عندما كانت أوربا ترزح تحت نير الظلم والبطش ومحاكم التفتيش وقتل المفكرين والعلماء في تلك العصور المسماة بالوسطي؟؟؟؟

  3. الحقيقة البووف كان نيته (حسنه) لآبعد الحدود – وكان يريد أن يعيد للغة العربية أمجادها – وكلامو عميق ومربوط (بمنع الاختلاط) – يعني مثلا (اختلاط + أنجليزي) = مصطلحات مثل (أنتيم – جكس – قيرل فريند) في حين (عدم اختلاط + عربي) = (هالة صدقي – أبو القاسم – شريفة فاضل) – وهي فلسفة عميييييقة جدا – من البروف . وهكذا يمكن بناء أجيال (تثري اللغة العربية) باستخدام التراكيب والمسنات اللفظية – بدلا من اعادة استخدام كلمات المستعمر – وهي أشبه بالمقولة المشهورة لمجلس وزراء الانقاذ في التسعينات عندما قالوها (نلبس من ما نصنع ) ولبسوا (دبلان سماوي اللون) سرعان ما تبخر وأختفي………. ( هو يعني كلام البروف ما فرحة استوزار ساااااااكت) .

  4. وزاد أطال الله بقاءه !!!!!!!!!!!??????

  5. أحلى ما قرأت
    عايزة ليها مكنيكي
    د.كمال عبد القادر
    اشترى صديقي عربة وهو يعلم أن مكنتها منتهية وأخذها إلى المكنيكي لعمل عمرة للمكنة. المكنيكي نصحه بأن من الأرخص أن يشتري مكنة من مكان تشليح العربات، وعندما تم تركيب المكنة قال المكنيكي:

    والله المكنة دي قوية والبودي بتاع العربية دي ما بستحملها

    فرجعنا إلى حوش التشليح واشترينا بودي وعدنا به إلى المكنيكي الذي حول فيه المكنة وقبل أن نحتفل بالمسألة وجدت صديقي يقول طيب لما غيرنا المكنة والبودي يعني أنا زمان اشتريت شنو؟.

    قلبت الإنقاذ حكومة السيدين ويبدو أن جسم السودان لم يحتمل مكنة حكومة الإنقاذ فخرجت منه “قرمة” كبيرة هي الجنوب. وبعد أن تغير شكل بودي السودان ها هي تغير مكنة الحكومة بعودة أولاد السيدين.
    طيب لو نحن غيرنا مكنة السودان والبودي بتاعو تكون الإنقاذ دي زمان قلبت شنو؟
    دي بلد عايزة ليها مكنيكي

  6. كسراتك كترت يا جبرة.. خلي بالك بعد شوية مقالك كلو حيكون كُسر…

  7. انا قلبي بدق.. قلبي.. تعربني ليه يابروف ما ليك حق.. والله ما ليك حق..

  8. مقال د. كمال عبدالقادر الاحد 19/12/2012 - صحيفة السوداني | رد

    مهاجم في نادي كروي اسمه “عوض” له كل مؤهلات المهاجم الناجح “جراي وحاوار وشوات”. مشكلته انه كلما واجه المرمى “عفص الكورة ووقع”. احد المشجعين تخصص في الاساءة لعوض وكان يشتري تسالي وموية ويقعد جمب الخط وكلما وقع عوض هتف المشجع “امرقوا عوض — دا مرضنا مرض”.
    في احدى المباريات احرز عوض ثلاثة اهداف من ثلاث طلعات فأدهش الجميع وفي الطلعة الرابعة عفص الكورة ووقع فوقف المشجع وصاح بأعلى صوته “ايوة كدة ياهو دة عوض البنعرفو” ثم صاح “امرقوا عوض — دة مرضنا مرض”…
    منتقدو الصادق المهدي يعترفون بإمكاناته لكن يخلصون الى أنه زول متردد ومتناقض يقول الشيء وعكسه. لكن الصادق ادهش المراقبين في ثلاثة تصريحات متتالية وهو يتحدث باتزان عن المعارضة السلمية المسئولة ولكنه في الرابع قال بأن الحركات المسلحة يجب أن تحتفظ بسلاحها. المراقبون هتفوا “ايوة كدة ياهو الصادق البنعرفوا ثم اكملوا”.. “امرقو عوض — دا مرضنا مرض”.

  9. يقول الأستاذ جبرا(يبدو أن السيد الوزير يعيش في العصر الرابع عشر الميلادى حيث العصر الذهبي للعرب…) من قال لك أن العصر الرابع عشر هو العصر الذهبي للعرب، ومتي كان للعرب عصر ذهبي أو برونزي؟؟؟ وما ذنب اللغة العربية في تدني العرب وإنحطاط مستواهم العلمي أو المهني، الم يكن علماء المسلمين الأوائل هم سادة العلوم وجهابذتها في كل مناحي الحياة عندما كان الآخرين يغطون في النوم العميق كما يفعل العرب الآن؟؟؟
    يا أخي الكريم لم تسطع للعرب شمس طوال تاريخهم ولن تسطع لهم شمس يا صديقي ما داموا يذكرون أنفسهم بأنهم (عرب)وليسوا مسلمين، والعصر الذهبي الذي تقصده هو الذي سادت فيه حضارة الإسلام وسطعت فيه شمس الهداية علي مكامن الشرك والضلال والغي الذي كانت تعيشه البشرية، ببزوغ شمس الحرية والعدالة وتكريم الإنسان علي ما عداه، وهجره الأوثان والأصنام والتخلف والجهل الذي كان ولا زال يريده أعداء البشرية ليسود الظلام وإستعباد الجنس البشري وإستغلاله كما كان يتم في تلك العصور الغابرة وما كانت تتم ممارسته في تلك الحضارات البائدة في روما وفارس..
    اللغة العربية يا صديقي العزيز هي أم لغات العالم وأصلها وأساسها، وكل لغات العالم تعود في أساسياتها للغة العربية ويكفي اللغة العربية فخرا” وعزة أنها لغة القرآن الكريم، وهذا يدل علي عظمة شأن اللغة العربية التي إختارها رب العزة والجلال خطابا” وكلاما” وحياة للناس أجمعين..
    يقول الحق جلا وعلا في الاية (103) من سورة النحل (وَلَقَدْ نَعْلَمُ أَنَّهُمْ يَقُولُونَ إِنَّمَا يُعَلِّمُهُ بَشَرٌ لِّسَانُ الَّذِي يُلْحِدُونَ إِلَيْهِ أَعْجَمِيٌّ وَهَذَا لِسَانٌ عَرَبِيٌّ مُّبِينٌ) صدق الله العظيم…

    1. أولاً التحية للأخ ود الخلا صاحب المشاركات الجادة المفيدة، يشهد الله أننا نفيد منها، أما بالنسبة لتصريح السيد الوزير فيكفى أنه يخاطب بالماضى ( الأولية) هذه الأولية سيدى الوزير دمجت مع (الوسطى) وصار إسمها (الأساس).

  10. الاخ ود الخلا
    تعجبنى كتاباتك
    ولكن ارى بانك خرجت خارج المضمون هذه المرة
    جبرا يتكلم عن حديث (البروف) ولم يقل بان اللغة العربية عصرها انتهى والرسول (ص) قال تعلموا العلم ولو فى الصين
    وفى وقتها هل كانت الصين تتحدث اللغة العربية …….. ام العلم الفائدة منه تعلم مهارات وعلوم تفيد بلادهم……….
    لك منى خالص التحية

    1. أخي أبو مازن لك التحية ..

      “أطلبوا العلم ولو في الصين” اتفق علماء الحديث على أنه حديث موضوع .

      شكرا ..

  11. خميس كجو كنده (الزول ده مفروض يبدأ التعريب من اسمه )
    والله يا خميس صحي صفقه ورقيص!
    معظم جامعاتنا غير معترف بها عالميا ولا عربيا ده البكلاريوس اما الدراسات العليا ما عندنا جامعه معترف بيها الا الخرطوم !!
    خميس ده قبل كده قال لن يتضرر أي طالب في حاله انفصال الجنوب (ياهن ديل طلاب جامعه جوبا ما قادرين يطلعوا شهادة حسن سير ) وقال الوزارة آلت التجويد ومواكبة العالم وانو الجامعات الجديدة ذات تخصص تكنولجي لحوجة سوق العمل للتقانه ( تكنولوجيا بدون معرفة لغتا دي كيف يا خميس)
    اللغة العربيه لغة القرآن أيوه بس كمان القرآن هو دين العلم والتعلم ويأمرنا بالسعي وراء العلم . اللغة عمرها ما صنعت حضارة لكن الحضاره هي التي تجبر الاخرين لتعلم لغة المتحضر للاستفاده من حضارته .
    الزيل ده من اسمو مفروض يكون مكوجي

  12. هو فعلاً يجتهد في موضوع اللغة العربية ..وهنا يا بروف أذكر في شهور قليلة مضت طلبت من مهندس أن يعمل مرور على الوحدات المشرفين عليها ..ثم يكتب تقرير فني عن زيارته..وهاك قوله ..تسلمت التقرير وبدأت اقلبفيه ظننت أن مشكلة نظري قد تفاقمت..فطلبت من الباشكاتب أن يقرأه..وتالله لو كنت معلم من أساتذتنا المبجلين ..مش زي معلمين الزمن دا .. لأعطيته دبل أعد مرفوعة للأس 1000. هذا اللمهندس قال متخرج من جامعة السودان بكالوريوس إلكترونيات هؤلاء من الذين كانت دراستهم باللغة العربية على ضوء منهج التأصيل ..وقد تكون يابروف .وزير التربية كانت عنده عقده من اللغة الأنجليزية زمان ..أم انه يريد( أن يغطي خجلتو على مستوى اللغة الأنجليزية المتدني كل يوم)..
    ويا ود الخلا لما كانت العرب تسود بالعلم كانت تحمل العدل,والعقل..العدل يفتح العقل نحو الطريق الصحيح ..والعقل يؤدي إلى مجالات العلم النافع..أما وزيرك الذي يخطرف استغفر الله من حقه فليذهب ليرى مستوى التعليم في ( الجيلي ) القريبة التي تم هدمها عشان يبنوها من جديد ..كسروها ولحدي الان طلابنا في مدارس الاساس يواصلون دراستهم في الأندية لمدة تجاوزت الثلاثة أعوام دراسية ..ويا دوب لما إتفق اهل الجيلي على الخروج بمسيرة رأينا صباحاً الآليات والاسمنت والسيخ أمام هذه المدارس..عالم ما تختشيش ؟ وبدون خجله حضر المعتمد والوزير بولاية الخرطوم ..داير يتحدث المعتمد بإنهم مع ثورة التعليم وسيعملون على(؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟() لم يكتمل لأن اهل الجيلي لم ينتظروه ..كل ذهب في أشغاله ..وجاء مطبليهم من المؤتمر الوطني .. ليقولوا ويعاتبوا اهلنا بمنطق (هذه صورة غير حضارية .زولاهي شيمة الجيلي ) أي انه حديث ماسخ ..لازال هؤلاء السياسيين يعتقدون أننا جهلاء ولانخمل عقلاً نزن به ..ونقيّم الامور ..مع تخياتي

  13. جبرا والسمار .
    سلامات.
    الطلبة فى المراحل المختلفة بقوا ضامنين الدخول للجامعات يعنى لو مادخلو جامعات حكومية حايدخلو جامعات أهلية وكلو بتمنو عشان كدة الواحد مايشد حيلو شديد ولا يتعب للمزاكرة والكلام الفاضى دة لكن يزاكر ويتعب ويتمرن على الغناء لأنو برنامج نجوم الغد فيهو منافسة شديدة وفى النهاية دايرين فايزواحد للكاس زى فهيمة تقول لى طب الخرطوم والبوكسم.مالك ياخ…

  14. هى فكرة خبيثة من السيد الوزير فطبعا ابناء الوزراء والوكلاء ومدراء مكاتب الوزراء كتروا خلاص فعشان ما فى واحد من حارج حدود اولاد المسؤولين يجى يتجرأ وينافسهم فقال احسن يوقفهم عند حدهم ولا حد يقدر يقرا الانجليزى فى الخاص ولا حد يقدر يقدم فى الوظائف فى المستقبل… بس اولادهم وبس…اللهم شتت شمل الظالمين.. اللهم فرق جمعهم يا رب

    طيب اخبار البنية ديك شنو؟؟

  15. هههههههههههههههههههههههههههههههههه,,ياربى يكون عايز يعمل مجموعة معاهد خاصة لتعليم اللغات الاجنبية !!!؟ يمكن والله !!
    بعدين الراجل دا قارى شنو عشان ما نسوط ساى؟؟؟
    لو فى حد عارف يا اخوان يفيدنا..

  16. الطاهر…سلام…
    مبسوط منك انا…

    ود اخلا…سلام..
    هوى بييي هوى ييييي,,وزيرنا العريس يا الله تتمو ليه !!

  17. الإنقاذ مصرة مع سبق الإصرار والترصد على تكملة تدمير التعليم فى السودان .. مؤتمر التعليم الذى بدأ بالأمس وخلا من أهل التعليم وحضره سياسيو الإنقاذ ..وأعجب كيف يتطور التعليم وينصلح حاله ودل الأساتذة المعنيين بالقضية التعليمية لم تتم دعوتهم لإبداء الرأى والمشورة ؟؟؟
    أما الطامة الكبرى فهى إختلاف وزراء الإنقاذ ومن شايعهم من الأحزاب فى تسيير وإصلاح القضية التعليمية فهاهو السيد الوزير فى مقابلة إذاعية مع وزيرة التعليم العالى يرفض التوسع فى تدريس اللغة الإنجليزية بينما تنادى الأستاذة السيدة سعاد عبدالرازق وزيرة التعليم العالى بالتوسع فى تدريس اللغة افنجليزية بل ونادت بإلغاء مرحلة الأساس وأن يدرس التلميذ 11 سنة متواصلة ينتقل بعدها إلى المرحلة الجامعية ..هل فكرت السيدة الوزيرة التى قد لا تطول إقامتها داخل الوزارة عن إمكانية هذا الإقتراح أم هو كلام والسلام .. متى نكف عن العبث وإجراء التجارب على أبناءنا التلاميذ والزمن والعالم يتطور من حولنا ونحن لا زلنا نجرب اى الطرق التعليمية أفضل لنا ..أما آن لهؤلاء القوم أن يترجلوا ويعترفوا بالفشل ..؟
    أخونا ود الخلا .. نحن معك فى إتقان اللغة العربية وهى لغة القرآن الكريم ومن المنادين بتحسين طرق تدريسها لطكى يسهل فهمها ولكن اللغات الأخرى هى الطريق إلى الإنفتاح على حضارات وعلوم لا نستطيع الحصول عليها باللغة العربية وحدها … و حتى إذا قمت بترجمتها إلى اللغة العربية فمعنى ذلك أنك محتاج إلى شخص درس اللغات الأجنبية لكى يترجم تلك العلوم غلى لغتنا الأم ..التلميذ فى سنين عمره الأولى يستطيع أن يستوعب أكثر من لغة ..فلنعلمهم اللغة الأم واللغات الأخرى ونحن فى عصر التقنية الحديثة ونحتاج لهذه اللغات الجنبية ..
    ألا رحم الله أساتذتنا العظام ونسأل الله أن يمد فى ايام من بقى منهم على ظهر البسيطة..
    وخلونا النشوف آخرتا شنو مع الوزير ..والوزيرة ..

  18. بعدين اللغة العربية ذااااتها ظهرت متين !؟ وهل هى اول اللغات نزولا او تحدثا !؟؟
    مالكم ياخ !!؟؟
    وهل هى الاكثر انتشارا الآن؟؟
    وماذا قدم العرب الحاليين من معارف وتقانة !؟
    مالكم ياخ !!؟

  19. وقت ما عاوزين انجليزي الفلسفه شنو كل الوظائف يختو الاعلان ب الانجليزي والله الوزير ده عاوز لو ؟؟؟؟؟؟؟؟؟؟؟؟؟ههههههههههههههههههههههههههههههههههه

  20. علاءالدين ودمدني | رد

    سلامات انت متاكد انه بروف وتذا كان بروف بالله عليك الله ورينا بروف في شنو اكون هو بتاع دكتوراة العناقريب وبعد دة راجين من التعليم شي اعتقد انه نحاول نشجع بعضنا ونعمل للاخرة دة ل لو خلونا نعمل ليها .

  21. يا خوانا خليكم موضوعيين .. الداير يطلع برة الموضوع يطلع متل طلوعي ده كده :
    أولاً : نحن بنتكلم عن تدهور التعليم ما عن تدهور اللغة .. ثانياً : السبب وراء التدهور يكمن في هذا النظام الحكومي الفاسد والذي أقنع جيلا كاملاً من بعد جيل ( بلسان الحال طبعاً ) بأن الهدف من التعليم هو الحصول على المال وأن لا قيمة للقيم ولا قيمة للعلم أو الأدب فصارت المادة هي الإله دونما منازع ، ومن ثم تعامل الحكومة مع شريحة المعلمين كأنهم المتسولون الجياع مما ينعكس الأمر على تعامل المدرسين مع الطلاب ، أما الوالدان فمنهم من لا هم له إلا جلب المال بأي طريقة كانت فيشتري لولده ( ركشة ) والولد بدوره يجمد الجامعة ومن ثم يفكر في قصة العرس ويعرس فعلا ( كسر رقبة ) ويخلف ليهو ولدين تلاتة وما يقدر على مسئوليتهم لأنه فاكر أن القضية حتكون كلها لذيذة ما قايل القصة بتجيبلها بمبرز ولبن وخدار .. يقوم حماهو يسخن معاهو ويقوليهوأنا ذاتي غلطان المدي بتي لسواق رقشة .. فيقوم الزوج والذي كان من المفترض أن يصبر شوية لامن يتخرج يقوم يطلق .. أما الزوجة لآنها متعلمة وقد تكون خريجة قانون ترفع عليهو دعوة نفقة لامن واحد من أولادا يكبر تقوم تاخد ليهوا رقشة تاني .. المهم ياخوانا إنو المستفيد الوحيد من قصة تدهور التعليم دى وبلا شك هو مدير هيئة المرور ، وطبعاً إنتوا عارفين قصة الحوافز مما ينعكس سلباً على جيب الشعب الذي أثبتت الإستبيانات المرأية بالعين المجردة ( علم عين يعني ) أن ربع السكان شغالين رقشات ساااااكت أما نسبة الطلاق في وسط الخدرجية والباعة المتجولين وباقي الموظفين فحدث ولا حرج مما ينعكس سلباً على عجلة التعليم بزيادة نسب سائقي الرقشة وقلة عدد الطلاب المنحصرة في أبناء الوزراء وكبارات العجلة الإنتاجية في البلاد …… كسرة ما هي قصة الموت العمال شغال في ناس الدهب ؟ٍ
    إمضاء
    أحد المجانين الحايمين

    1. الأخ عمر …أحد المجانين الحايمين..والله إنت اعقل زول فينا ..
      بس الظاهر عليك ما لقيت ليك صينية فاضية لحد حسه ..
      واعتقد والله أعلم وبما أنك اعقل واحد فى المجموعة الشمسية دى إنو عمك جبرا حيلقا منك إفادة بخصوص خط هيثرو .. شكلك كدا عارف الخط الباعو منو ولمنو ..
      وخلينا النشوف آخرتا شنو ..

  22. السلام عليكم واحد واحد ونأسف على الغياب وعدم المشاركة وشايف تعليقات جديدة ورائعة ونتمنى لكم الإستمرار لدوام الفائدة …………………………

  23. يا جماعة خميس ده الدكتوراة بتاعتو دي في شنو ؟
    وهل هي زي ما قال البوشي قبل الانقاذ ولا بعد ؟…… ما عشان حاجة عشان نعرف بس .
    قدر ما فتشت عنه بعد الاستعانة بالصديق قوقل لم اجد عنه معلومة سوي انه في فترة كان وزير زراعة في واحدة من ولايات كردفان .وطالما جات سيرة كردفان نهدي لخميس اغنية ( أميرة الكبابة .. اميرة البستلة سودانية هييي )
    خميس كجو يعلن انشقاقه عن طالبان وينضم الي بوكو حرام ….
    اهلنا قالوا القلم ما بزيل بلم وما كل قاري متعلم
    أجي يالانقاذ تعلي الخزانات وتوطّي التعليم
    القطارُ سريعٌ : القطار مبتدأ وسريع خبر مبتدأ مرفوع بالضمة الظاهرة علي آخره علي الطلاق الكلام ده انا حافظو لي قريب خمسين سنة ولي يوم الليلة ما لاقاني في حياتي ولا استفدت منو في شئ .

  24. اخي جنوبي تحياتي،،
    ما عهدتك تلقي الكلام جزافا” هكذا، فأنت شخص كما يبدو مجبول علي عفة اللسان وطيّب الكلم وحب الناس وإحترام الآخر أيا” كان،،،
    وهذا الرجل د.خميس كجو كندة وهذا إسمه ولا غضاضة في ذلك إن لم يكن عربيا” أو غير ذلك فالرجل مسلم والمسلم أخو المسلم لا يحقره ولا يظلمه،وهو أستاذ جامعي وإحترام العلماء والكبار واجب ومبدأ ديني علينا إتباعه، وما علينا ضلال الآخرين إذا إهتدينا وإقتدينا بقدوتنا ونبينا عليه من الله افضل الصلاة وأتم التسليم..
    نحن ننادي بالتغيير من الداخل فالأحري بنا بيان ذلك بالعمل لا قولا”، وجزاك الله خيرا”

  25. هذا زمانك يامهازل فامرحى

  26. جنوبى..سلام ..
    والله كلامك عجبنى بالحييييل واسمح لى اقتبسو فى مكان ما !!
    وكنت عايز اشيد بيهو لكن كلام اخونا ود الخلا حبسنى !
    حابس كابس..
    هههههههههههههههههههههه

  27. يا جبرا يا خوي
    الله يجبر بخاطرك
    كفانا مغص

  28. يا بروف – تكسرها بهنا تكسرها بهناك فنحن مقبلين علي مشروع انقذي حضاري اكبر مني و منك
    و نحن ما قدرو و خليك بعيد و اذا غلبك تتطلع سلمنا التعليمي ده فشوف ليك اصانصير
    افضل ليك – و بصراحة انت عاوز ليك 23 سنة عشان تفهم نحن بنعمل في شنو ؟؟؟
    و السؤال كم هي نسبة نجاح طلبة الشهادة السودانية في مادة اللغة العربية ؟؟؟

    فشلنا في العربية و الجنوب انفصل مننا و اقر الانجليزية كلغة رسمية له فسوف نتركها له
    فالحقك نفسك برطانة هوسة او نوبة او زغاوة او محس قبل تتضيع فنحن في زمن الخوصصة
    و كلام الوزير واضح و صريح ذي الفسيخ اللي عاوز يتعلم الانجليزية فليلتحق بالجنوب و ما يعمل لينا
    ضيق –

  29. ود الخلا : أخي في الدين وفي القمردينة .. أرادب سلام ومحبة
    اولا : شكرا لحرصك علي ان ابدو كما تحب واتمني ان اكون ونكون كما ذكرت .واعتذر لك إن اذيت مسامعك بما كتبت في حق هذا الرجل .
    صديقي ود الخلا : صبرنا علي تدمير هذه الحكومة لحاضرنا لكن ان يطال التدمير المستقبل فهنا تكمن المشكلة ..والمثل بقول ( الجاتك في مالك سامحتك ) ونحنا المال مسامحين او متسامحين فيهو لكن ياخوي البتجي في العافية دي مشكلة ونحنا عافيتنا في اولادنا الطلاب ولو تخلّفوا تخلفنا معهم وتخلف الوطن .
    خميس كجو كنده أين العربية في هذا الاسم حتي يتشدق بها هذا الرجل ؟ ولترضية من ؟
    وكيف يريد ان يحرم ابنائنا من تعلم لغة العصر ويحرمهم من تعلم كل ما يتعلق بها من تقانة وتكنولوجيا وهو الرجل الذي من المفترض ان يكون مؤتمن عليهم ويسعي لبلوغهم درجات التعليم العالي ؟
    وهل هذا الخميس كجو ابنائه يدرسون في المدارس والجامعات السودانية مثل ابنائنا ؟
    وزارة التعليم العالي يفترض بها ان تعلي العلم وتواكب كل ما هو جديد في العلم وبشتي اللغات حتي تستحق هذا الاسم .
    هو متحسس مالو ما عادي لو شايف نفسو ما بقدر يزيد شئ يعتذر ما بروفيسور ابراهيم اعتذر في زول كتلو ؟
    ود الخلا : اعتذر مرة اخري عن الاسلوب لكن المضمون ماني معتذر عنه . وادامك الله اخا تصلح العترة .
    ياسين شمباتي .. سلام … وحات الله انت بتاع مشاكل ….ههههههههه

  30. حاج أحمد السلاوى | رد

    جنوبى .. سلام كراتين ..
    إنت يادووووووووبك جايى تعرف إنو دكتور شنباتى دا بتاع مشاكل ..؟
    ياخ دا معذبنا عذاب خلف الله بتاع الإنتخابات داااااااك .. فاكرو ؟ بس صابرين عليهو لأنو لسه صغير ..ويتيم ..
    هى لاكين جنيس حبسه وجنس كبسه .. يا شنباتى ..بقيت تخاف ؟ ما عهدناك بهذا الجبن يا رجل ..
    نرجع لموضوع التعليم تااااااانى .. العبرة بالنهايات زى ما قالوا والنهاية ياهودى ظاهرة قدام عيونكم .. الوليدات بقو لا يعرفو عربى ..ولا إنقليزى ..عاد نصبر لمتين يا ود الخلا والمسعلة دى ( مقصودة ) خارج ارادة الشعب السودان الفضل وبقت فى يد الحيكومة السنية وما قادرين يقولوا إنو الشغلة غلبتم ويمشوا يخلوا القادرين عليها يشوفوا حال البلد الوقف ..وعلى الطربوش ما فى سودانى واحد بقا يصدق كلام أى مسئول ..لأنو كلو بقا كلام فى الهوا وما فى شى على أرض الواقع ..
    هى التصريحات بفلوس ..؟؟؟؟؟؟؟؟؟؟؟؟؟..
    وخلونا النشوف آخرتا شنو مع الدكتور خميسود كجو ود كندة ..يا غرق .. يا جيت حازمة ..

  31. أخي وصديقي جنوبي كلامك قبلناهو وعذرك إعتبرناه وصحي المستقبل لا مساومة فيه ولا نقاش، لأننا لا نملكه وإنما هو ملك للأجيال القادمة وواجبنا هو تهيئتهم له ووضعهم في الطريق الصحيح من البداية وعلينا أن لا نتركهم يتخبطون ولكن كيف السبيل لهذا المسلك الرشيد دون أن نشعرهم بأننا سلكنا طريقا” آخر كنا نمنعهم منه ونكون نحن أول من فعله فتصور كيف يكون حال إبنك وتنازعه الداخلي حين تناه عن فعل وتأتيه دون ان تشعر أنك قد منعته عنه قبلا”!!
    اما أنت يا صديقي شنباتي فقد أرحتني وسهلت لي الطريق، حيث أنك قد جئتني بها من الآخر، فقد كنت أود أن أقول لجنوبي (الكلام كلام شنباتي، لكن الإسم جنوبي )ولو لم أجد أسمك في المداخلة لقلت له أنت شمباتي، فإذا بك تأكد ظني بأنك وجنوبي حاجة واحدة، وده الكلام الكنا بنقوله زمان عن رواد وسمار القمردينة بأنهم وبرغم إختلافهم الفكري والسياسي ومناكفاتهم وتناوشهم إلا أنهم في النهاية من طينة واحدة (طيّبة عفيفة ونظيفة)، وهكذا أنتم ولا أود أن أكون كما يقولون دلاكتا شنو كدا ولا شكارتها!!

  32. جنوبى….
    هههههههههههههههههههههههههههه,,احنا اهل افرحة جينا ياخى,,والمشاكل غادى غادى…

    حاج السلاوى..
    احييي انا منك انت !! اعمل فيك شنو بس !؟؟؟ كان ما (الخلطة) السحرية كنت وريتك الما بتعرفو !!

    ود الخلا…
    تسلم يا صديق,,,لكن بينى وبينك اخونا جنوبى دا مااا غريب على ! لكن هو لابد ولابد !

  33. ود الخلا , حاج احمد السلاوي , شمباتي , وسيد الدكان الفاتح جبرا وبقية العقد الفريد من سمار القمردينة والله الواحد يفخر بمعرفة امثالكم و اتمني لو كنت اعرفكم كشخصيات .
    شمباتي ما غريب الا الشيطان والكيزان …
    ما البد كيف واخر مرة ادونا كفين وفكونا وحلفوا لينا لو تاني مسكونا يـ …….ونحنا بنخاف من النقط دي .
    حاج السلاوي سامع لي خبر حايم في النت انه الامن قبض علي واحد فاسد في المطار وهو يحاول الهروب خارج الوطن لو الخبر ده صحيح كسرة صاحبك جبرا قرّبت تتحرق لأنو ح نعرف الخط مشي وين .والخاليني متفائل انهم طالما لحقوه في المطار معناه ( وفديناه بكبش ) .
    كسرة:
    خميس كجو شفتو الليلة في التلفزيون زول عمرو فوق الستين وده زمن كان طالب طه القرشي لسع ما كان دخل المستشفي ولا ولدوه زاتو !!

  34. خليكم من هيثرو أقرو الخبر ده
    منال سعد الدين
    احتج أكثر من عشرين مواطناً داخل صالة الوصول بمطار الخرطوم أمس بسبب تعطل وصول أمتعتهم من القاهرة لأكثر من أسبوع، وعطلوا سير العفش لرحلة قادمة من الإمارات قبل أن يتدخل أمن المطار ويسيطر على الأحداث قبل أن تتفاقم. وأكد عدد من المحتجين أنهم خدعوا من قبل الخطوط الجوية السودانية التي نقلتهم من القاهرة قبل أسبوع تاركة خلفها أمتعتهم الشخصية مؤكدين أن إهمال الشركة وصل حداً سافر فيه الأسبوع الماضي أكثر من عشرين مواطنا من القاهرة إلى الخرطوم وقوفاً داخل الطائرة منذ تحليقها وإلى هبوطها في مطار الخرطوم في رحلة استمرت ثلاث ساعات.ء
    وقالوا إنهم ظلوا مرابطين بالمطار منذ وصولهم قبل أكثر من أسبوع في انتظار أمتعتهم إلا أنّ الشركة لم تعرهم أي اهتمام، وطالبوا بمقابلة أي مسئول عن الشركة إلا أنّهم لم يجدوا أحداً الأمر الذي اضطرهم إلى التظاهر داخل الصالة. وقالوا إن مدير الصالة أكد لهم أن سودانير لديها العديد من المشكلات التي تمر بها. وأكّد المحتجون أنّ الشركة اتبعت معهم أسلوباً غريباً بعد أن أخذت منهم ثمن التذكرة كاملاً لطائرة كبيرة إلا أنّها تستأجر طائرة صغيرة للاستفادة من فرق التذكرة، مشيرين إلى أنّ سبب تخلف أمتعتهم المباشر كان تغير نوع الطائرة، مؤكدين أنّ استئجار طائرة صغيرة جعل 21 مسافراً أمس الأول يدخلون إليها دون أن تكون هناك مقاعد لهم مما اضطرهم إلى الوقوف طوال زمن الرحلة من القاهرة إلى الخرطوم (شماعة) وكان ضمنهم بعض النساء.ء

    لمصدر: صحيفة التيار

  35. سلام ياقبيلة،،،
    عليك الله يا شمباتي كلام جنوبي دا (سيد الدكان الفاتح جبرا) ما بيذكرك كلام أخونا الأمير ود ملوك القبيلة مُخيّر، ولا أنا غلتان، وبمناسبة أهلنا وأحبابنا الزمان ناس ودالزبير وعزت بقاريتش وسديقي اللدود سنكلوني وسابنتود وبروسسردوم وعبدوش وبيشاوي وودمدني وأسد الخلا الورور أبكرونا، وحرائر القبيلة وسيداتها ناس سماسم والغبشة والزهراء ونونو وسمسمة وناس منو وناس منو… أين هم بالله واين تلك الأيام الخوالي التي لم نذق الوحشة فيها وإنما كنا كما كان الناس في كتاب سُبل كسب العيش في السودان…
    بل اين طارق أب أحمد وسهيل والزوووووول وأفليقاالهسي كانو معانا…
    غايتو يا جبرا يا خوي يا تشوف طريقة ترجع لينا ناسنا القدام ديل يا ترجع لينا قروشنا!!!!
    ولا شنو ياجماعة نحن نسعد بكم جميعا” قادمين وقدامي جداد وادي وجداد بيت ولا مش كدا يا جنوبي؟؟؟؟

  36. ود الخلا قال ليك اتنين مطيرنها شكله عجاجا قالع جاء واحد يحجز بيناتم وقال للغلطانين عليه ياخي البتجي من السماء تحملا الواطه : صاحبنا خلي داك ومسك في الحجاز : يعني انا واااطه يعني انا واااطه.
    هسع يعني انا جداد وادي انا جداد وادي

  37. السلام عليكم البروف والأخوة الكرام
    يؤسفني أنني لم أقرأهذا المقال في وقته لأعلق عليه في وقته …. خاصة وأنه في موضوع سبب لي الضغط والسكري والمصران … وربما شلل الأطفال….
    سادتي: أين هي اللغة العربية من أهل الإنقاذ حتى يتشدق هذا مدعيا حب العربية والدفاع عنها؟ (ولست هنا أعلق على إسمه إذ من الممكن أن يكون إسمه أعجميا كسيبويه ويبدع في العربية) هل سمعتم من خطبائهم ووزرائهم ورؤسائهم من يتكلم بالعربية دون أن يلحن أو يخلطها بما قبح من تعابير الدارجة مثل (ألحس كوعك؟) … سادتي .. نحن جيل تعلمنا باللغة الإنجليزية والكثيرين من جيلنا لم يدرسوا شيئا بالعربية بعد المرحلة الثانوية ولكنهم أشد حبا للعربية من جيل الإنقاذ وأفصح لسانا فيها وأبلغ تعبيرا بها – منذ استقلال السودان وحتى أواسط عهد النميري ما كان السياسيون يتحدثون أحاديث عامة ويخطبون في الجمهور إلا باللغة العربية ولم يكن أحدهم يلحن – قيل أن أول من لحن هو الصادق المهدي في الستينيات والله أعلم – والآن يأتي إلينا واحد من بروفات الانقاذ ليتبنى اللغة العربية؟ خسئتم …ما أغنى الإسلام واللغة العربية عنكم – لقد كان الإسلام في هذه البلاد أفضل من دونكم -إذ لم يشوبه الرياء والنفاق – وكانت العربية مقدسة لا يجرؤ أحد على التحدث بها إلا وهو موقن بصحة ما قال نحويا وبلاغيا – وكان طلاب المعاهد العلمية – لا خريجو الجامعات أفصح وأبلغ من دكاترة هذا الزمان – والآن …. خطب الرؤساء والوزراء…. التقارير… النشرات … الكتب المدرسية … بل وحتى اللافتات الحكومية… تقضح ضعفهم في العربية … وحسبك أن واحدا من طلاب جامعاتهم كتب لصاحبه :الأخ مخطار… السلامو عليكم!! إذا كان لخميسنا هذا مشكلة مع اللغة الإنجليزية فلا غرابة … ولكن أبلغوه أنها صارت لغة لا غنى عنها أكثر من أي وقت مضى وأن من لا يعرفها لا يملك أهم أسلحة الدفاع عن الإسلام أو العروبة – أما قوله (من أراد … الخ) فلا يعنينا في شيء .. لأنه حاصل …. كل من يريد تعليما في االإنجليزية أو العربية أو غيرها … لايطلبه في مدارس هذا الوزير لأنّ ( التعليم ذانو وينو؟) كما كتب البروف … نعم سنعلم أبناءنا الإنجليزية والعربية والإسلام وكل ما نستطيع بعيدا عن مدارسهذا الوزير ، خاصها وعامها-
    هناك في شمبات بنت عمي خريجة جامعية مما قبل الإنقاذ… وربة منزل … قالت لي أنها تعلم أطفالها في البيت … وأنها تدعهم يذهبون إلى المدرسة فقط لتحظى بقسط من الراحة أثناء غيابهم ، وما أن يعودوا حتى تبدأ تدريسهم وتكون بدايته تصحيح المعلومات الخاطئة التي عادوا بها من المدرسة

  38. سلام يا كرام
    استميحكم أن أعيد نشر تعليقي على تدوينة (شن طعمكم) فقد لاحظت أنه أجدر بأن يكون هنا دون تغيير
    يا سادة يا كرام ………… كانت لدينا مدارس ثانوية يتخرج منها شباب متعلمون تعليما أساسيا متينا يخرجهم من زمرة غير المتعلمين ويجعلهم ممن ينشرون العلم في المجتمع ، والذين لا يتخرجون يواصلون دراستهم في جامعتين (أو ثلاث؟) كانت تعدهم بخير ما تعد به الجامعات طلابها وتجعلهم قادرين على الظهور بمظهر المثقف في أرقى المجتمعات…. وجاء نميري … ومحي الدين صابر … ويشهد الله أنهم لم يغيروا من مستوى وهيكلية التعليم الكثير – وإن كانا قد غيرا بعض الشكليات – وجاء هؤلاء…. حولوا كل مدرسة متوسطة إلى ثانوية … وكل ثانوية إلى جامعة ، وجمعوا تلاميذ الإبتدائية والمتوسطة في حظائر يصل فيها الطفل إلى الصف الثامن وهو لا يعرف كيف وصل (قالوا ليهو نجحت … هو يعرف أحسن منهم عشان يقول أنا نجحت كيف؟)، وإذا وجد بعض المساعدة في الصف الثامن إنتقل إلى الثانوية (متوسطة زمان)… ثم وجد نفسه في الجامعة (يا ليتها كانت مثل ثانوية زمان) … في كلية الطب … المعجم بيد وال text book بيد، والصابونة والبشكير بيد، والسماعة بيد.. وفتيل الريحة بيد ( هو عندو كم يد؟) فهل لديه وقت ليتدرب حتى كما كان يتدرب المساعدون الطبيون زمان؟ …انتهى عندنا التعليم كما انتهت الخدمة المدنية … وكل الخريجين عندنا غير مؤهلين إطلاقا لأننا دمرنا أساس التعليم … ولكن مشكلة خريجي الطب هي أنهم يجرون تجاربهم علينا مباشرة .. لديهم الشجاعة لبقر البطون وجدع الأنوف متسلحين بشهادة ورقية لا بتدريب أو تعليم – أما غيرهم من الخريجين فيجرون تجاربهم على مواد (مثلا المهندسين الذين نرى نتائج تجاربهم في العمارات المنهارة والطرق التي تنتهي حين تبدأ) دمرنا التعليم فتدمرت الصحة والشخصية والأخلاق وكل شيء ….. تزداد الجامعات عددا … ويزداد الجهل والفقر والمرض تفشيا …. ويبدو أن أهل الانقاذ ولّوا أمر التعليم لجاهلٍ اقسم أن يحوّل السودان كله إلى أشباه له … وقد نجح

  39. جنوبى….سلام..
    يا جداد الوادى يلا يا منقة ! والله انحنا فى شوق اشد لرؤويتك كفاحا,وباذن الله نتقابل لو حيين,,وايميلى شيلو من (سيد الدكان )! مرحب بيك كتيير..
    حاشية: الشيطان ذاااااتو بقى ماو غريب !

    ودالخلا…سلام..
    لا لا لا,,الامير ما بسوى كدى ! لكن قطع شك دا زولا مننا وفينا |! آيييييييي,وباكر بجيك الخبر !

  40. كدى خلونا من اللغه و الكلام و التعبير و البديع ، الناس ما قادره تضرب 15X12 لازم يطلعوا ليها الموبايل ، سؤال سؤ : نرجو عمل موبايلات للترجمه من و الى و بالعكس!!! ………………عجبى

  41. السلام عليكم
    الفكرة بسيطه جداا
    الموأمره دي ما في السودان بس في كتير من دول العالم الثالث ، انو ١٪ يكون متعلم و مجهز على مستوى عالي و ٩٩٪ يخدموهم ( عمال تحتهم )
    فعشان كده ماتستغربوا ابتدأً من منع المدارس العمل يوم السبت ( لو ما عارفين اعرفوا انو يوم السبت ممنوع عمل المدارس ) تدريجياً لحدي ما يمنعوا المدارس خالص

    ولكم جزيل الشكر

    شرفتونا

  42. بسم الله الرحمن الرحيم
    اللهم صلي علي سيدنا محمد وعلي آله وصحبه اجمعين
    الله يرحم معاهد التربية الاب والقائد العظيم والاستاذ الذي لا يشق لها غبار ( معهد بخت الرضا )
    اين هم اهل بخت الرضا ؟
    اين هم الاساتذة الذين اساسوا بخت الرضا ؟
    اين اجيال بخت الرضا ؟

  43. يا حلللللييييييييييل التعليم .. والله داير ليه مدربين كورة عديل بعد دة عشان يقدروا يضعوا ليهم خطة .. بدل 6.3.3 عملوا 8.3 وعايزين يعملوا 11.3 والله اعلم ما خفي كان اعظم .. بالله الناس ديل الواحد لما تهف ليه افكار زي دي بيكون قاعد في كوشة ولا زريبة (مع احترامي لجميع القراء) اولآ : السيد الو(زير) ما عايز الاختلاط ليه ؟ ده سؤال مهم .. يمكن حيعمل اختلاط في الانساب (يجوز)تانيآ : يمكن ما عايز الدراسة تتوسع باللغة الانجليزية لانه خايف ما يفهم اي شئ من كلام الشباب ولو انه بعض من عدم الفهم حاصل حاليآ

  44. انا يا جماعة الخير معلم لغة انجليزية ثانوي درست في خورطقت الفيحاء ثم جامعة الخرطوم والله والله والله وتاني والله الحكومة دي لو رجعتنا سنه 1989 محل لقتنا انا ارجع الثانوي تاني طالب واتبرع لكنده هذا بقلب وكليه ونخاع شوكي

  45. الحبيب

    وحات الله العربى فى تلاتله خلى يتوسوعو فيه احسن من التوسع فى شى تانى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: