صندوق دعم القسطرة

يوماً بعد يوم تزداد قناعتي بحاجتي و(حاجتكم) إلى فهامة من الحجم العائلي (لهضم) وفهم بعض المواقف التي نعايشها ونتعايش معها والأمثلة لذلك (كتيره ومسيخة جداً) ولعل آخرها خبر توقف جهاز (قسطرة القلب) بمستشفى الشعب عن العمل نتيجة للضغط الواقع عليه إذ انه (هنا أنصحك أيها القارئ الكريم بتركيب الفهامة) إذ أنه الجهاز الوحيد بمستشفيات العاصمة (العامة) !! نعم كل مشافي أم درمان والخرطوم وبحري (العامة) تخلو من هذا الجهاز إلا (جهاز) مستشفى الشعب الذى يبدو أنه قد (قال الروووب) وفضل الإنتحار عن العمل نتيجة لكثافة الضغط الواقع عليه !
هنا يبرز سؤال : مع أهمية وجود هذا الجهاز بكل المستشفيات العامة لحاجة البسطاء من المواطنين إليه طيب الحكومة ما عاوزة تشتري أجهزة كفاية ليه؟ أيه يعني 700 مليون جنيه (ثمن الجهاز) ؟ في دولة يحتفظ فيها المسئولون في دواليبهم بتسعة أنواع من العملات العالمية ؟ ويمتطى فيها مسئولوها فاره العربات التى يتجاوز ثمنها ثمن هذا الجهاز الذى تتوقف حياة المواطنين على وجوده؟
بالإستعانة (بالفهامة) يمكننا أيجاد إجابه لهذا السؤال (البايخ) والإجابه هي يا سادتي الأفاضل وببساطة شديدة إنو وجود أو عدم وجود هذا الجهاز بالمستشفيات العامة لا يعنى (أمنا الحكومة) في شئ ، فولاة أمرنا (وأسرهم الكريمة) لا يتعالجون في هذه المستشفيات (الكشا مشا) ودونكم ذلك الخطاب الصادر من مكتب أحد المسئولين والذى تداولته (الأسافير) قبل عدة أيام وهو يطلب من إدارة أحدى المستشفيات (خمسة نجوم) التى تم إفتتاحها مؤخراً أن تضيفه وأفراد عائلته إلى زمرة مشتركيها (والحساب عند وزارة الماليه) !
لعمركم هل رأيتم مسئولاً واحداً أو أحد أقاربه يستشفى في مستشفيات (العامة) ؟ بالطبع لا فهذه المستشفيات التى تفتقر إلى أبسط المكونات الصحية (معمولة) لعامة البسطاء من أفراد (الرعية) أما الرعاة أطال الله أعمارهم وأبقاهم فأى (عنكبة صحية) والمطار على طول !! لذلك فإن حديث عن عدم توفر الأجهزة الطبية كهذا الجهاز الهام بالمستشفيات العامة لا يعنى أصحاب (القزاز المظلل) في شئ !
(خلي الفهامة مركَّبة لسه) .. هل تعلم عزيزي القارئ أن تكاليف إجراء عملية بهذا الجهاز يتراوح بين 11 -12 مليون جنيه بالمستوصفات الخاصة؟ طيب في ظل عدم وجود هذا الجهاز بالمستشفيات (العامة) كيف يستطيع المواطن الذي يكتوى بغلاء الأسعار وتدني الأجور أن يوفر هذا المبلغ و(دقات القلب لا تنتظر) ! يعنى الواحد لو عاوزين يعملو ليهو (كشف) الـ 12 مليون دى لم يلقطوها ليهو يكون حصَّل أمات طه ؟
من الواضح البين الجلي الما عاوز ليهو (أي درس عصر) أن (كوكب المسئولين) يختلف كثيراً عن هذا الكوكب الذي نعيش فيه .. ففي كوكب المسئولين يمكن لوزير الصحة أن يمتلك مشاف مزودة بأحدث الأجهزة بما فيها هذا الجهاز الذى تتوقف عليه حياة (قلوب) المواطنين بينما لا يوجد غير جهاز واحد في جميع مشاف العاصمة(العامة) الخاضعة لوزارته !
طيب .. نعمل أيه عشان ما نوفر (كاش) نشترى بيهو كم جهاز قسطرة قلب للمستشفيات العامة حتى نوقف معاناة المواطنين المرضي من أفراد الشعب السوداني الفضل في ظل عدم وجود (قروش) لدى (امنا الحكومة) لتشتري لنا بها جهاز جهازين يفكوا الأزمة دى ؟ العبد لله لديه عدة إقتراحات :
العبد لله يقوم بوضع بعض الإقتراحات :
– إقتراح 1 : ص د ج ق ق إنشاء صندوق دعم جهاز قسطرة القلب ! (يعنى أيه لو المغترب دفع ما هو أصلا بيدفع مساهمة وطنية ورسوم الفضائية وضريبة دفاع ودمغة جريح ولترعة الرهد وكنانة وللمجهود الحربي وضرائب وزكاة ولدعم الفريق القومي !)
– إقتراح 2 : بيع باقي المدينة الرياضية وشراء كم جهاز (أصلو بعد الشرتمة دى ما ح تنفع وكده) !
– إقتراح 3 : سحب سيارة من كل مسئول (يعنى أيه لو فضلوا أربعة) !
– أقتراح 5 : بيع اليخت الرئاسي (مش طلع بتاع بحار وليس أنهار ودولاراتنا راحت شمار في مرقة) !!
– إقتراح 6 : تستعجل الحكومة في إستعادة الكم مليون ريال التى أختلسها مسئول (الأوقاف) وتقوم تشتري لينا بيها أجهزة !! ( عملة حرّةَ جاااهزة)
– إقتراح 7 : بيع كل شاشات البلازما في مكاتب المسئولين (المتفرجين ليها شنو؟)
كسرة :
خلاس فك الفهَّامة ! وللا أقول ليك خليك مركبا لأنو حياتنا كوووولها بقت عاوزه ليها فهامة !!
كسرة ثابتة :
أخبار خط هيثرو شنو ؟

Advertisements

22 تعليق

  1. يا بروف ارحمنااااااااا … نحن زي الواحد قريب واحده من اياهم وعامل رايح … يقوم يجي واحد زيك كده ويكشف قدامو المستور .

  2. وقسما يا جبره نحنا المغتربين ديل – حلوه وملعوبه – لو نضمن انو مساهاتنا حتمشي لشراء هذا الجهاز وامثاله لما ترددنا للحظة ولكن سندفع وسيلخذ جهاز المغتربين ما دفعناهو ويصرفه على مركز دراسات الهجرة غير الشرعية والاتجار بالبشر … بلالمناسبة شكلكم كده ما سمعتو بالمركز ده .

  3. حسبنا الله ونعم الوكيل

    1. شباب ضد الفساد

  4. جبرا : اسهل حل انو الحكومة دي تقوم من فوق
    صدورنا الهي جاثمة عليها دي ..
    وبكده قلوبنا ترتاح والجهاز الواااحد ده
    بيكفينا لانو الحالات ح تقل ..
    هيييييي قسطرة وزير الصحة حلو حلا …
    قالوا قردة مسح بيهو الواطة ..

  5. الاخ جبرا و المنكوبين
    اقتراحاتك من 2 لي 6 مرفوضة لانو منها البأثر على راحة و رفاهية المسئولين و دي جريرة تدخل تحت فتاوى التكفير لانو راحة الولاة من المقدسات و المسلمات في عهد الانقاذ و شيوخها و كمان بعض المقترحات بتتعارض مع فقه السترة و سترة المسلم واجبة ناهيك لمن يكون مسئول اذا يفضل اقتراح رقم واحد وهو انو المغتربين يدفعو و الشعب يدفع و دة الطبيعي انو الشعب موجود لراحة الحكام و يحبذا اذا كانو اصحاب مشروع حضاري و عليك الله فهامتك ذاتة باقي لي محتاجة يفهموها الحاصل علينا.
    كسرة:
    خط هيثرو ما لقيتو

  6. حسبى الله عل ىراس الدولة والقائمين بامرها..
    بعدين يا بروف برااااااك قلتها ,,وزير الصحة مستفيد من عدم وجود الجهاز دا فى المستشفيات الحكومية ,تقول لى يجيب ليكم واحد تانى !؟!؟؟ ياخى تخ…

  7. قسطرة يالقسطرة يا رحتا وما رجعتا ، ونحن ليك فشتنا لما ودرنا
    عليك النبي يا ود جبرا هو القلوب موجوعة من القسطرة بس !!!!!!!!!!!!!!!!!!!!!!! اسكت خلي ساكت
    والله ممكنونيين وصابرين لما الصبر زاطتو فتر مننا ؟؟؟؟؟؟؟؟؟؟؟؟؟؟؟؟؟؟؟؟؟؟؟
    حلفتط بي الله ان في زول قال ليك ساي سمع انهم ح يلمو في خط الخواجات ده بس كتب هنا في بيتك بمش اصلو الزول وقول بس عايزة اسافر عشان اعرف قلبي ده فيهو شنو باقي برف علي شديد ما بعرف موديني لوين !!!!!!!!!!!!!!!!!!!

  8. يابروف هم لمن اشتروا جهاز جديد الحيشغل ليهم جهاز مستشفى الخمسة نجوم منو يعني المريض واهلو ديل مالازم اضربوا راسهم في الف حيط وبعده الله يرحمو وبعدين يابروف الفهامة دي حتلحق جهاز القسطرة وهي على وشك.
    وبعدين الكسرة الثابتة دي والله كل يوم بتوجع بيها قلبي عشان كده ارحمنا منها لانو بقت كان ياماكان

  9. حاج أحمد السلاوى | رد

    البروف .. وكما قال خالد مدنى .. ما عندنا أى مانع ندفع عشان أهلنا الغبش المساكين يتعالجوا من العليهم بس الضمان شنو إنو الجماعة يجيبوا الجهاز الصاح …ومن غير عمولات وحاجات تانية حاميانى …وبا ما دفعنا لحفر الترعة ودفعنا عشان نردم الترعة ودفعنا عشان دعم المجهود الحربى ودفعان عشان السلام ..والخازوق يقوموا يدفعونا تاااااااااااااانى عشان البترول الراح شمار فى مرقة.. الله يجازيك يا سلفكير ..وبعد دا كووووولو اليوم أى مغترب لو رجع ( أكان عودة طوعية أم قسرية ) لو ما عندو واحد من أهل التمكين يقيف معاهو ويساندو والله ما يلقا التكتح ..
    إايتو .. خلونا النشوف آخرتا شنو ..

  10. السلام عليكم ، البرف و الاخوان ، يعنى يجيبوا اجهزه للمستشفيات العامه ، و اجهزتهم تبور ، لا و الف لا ، القسطره فى الاردن بى اربعمية دولار ، و الباقى تتفسح بيهو ، يقولك حيجيبوا مكنات ما تشتغل الا مع المسعووووولين ، سؤال مسعووول : الخط الكوفى ما منو خبر ، سوق المواسير اخبارو شنو ؟؟؟ …………… عجبى

  11. البروووف والسمار .
    سلام.
    قالو لى (على ذمة القائل) فى دكاترة متفقين مع صيدليات خارجية لتوزيع الدواء يعنى الدكتور يكتب ليك روشتة ويقول ليك الدواء دة ماحتلقاهو إلا فى صيدلية (فهو يشفين) عشان كدة الجهاز بتاع القصطرة دة بكون بوظو واحد عندو جهاز فى مستشفاهو الخاص .
    مانتعب رقبتنا ساهى ونقوم نقترح إقتراحات لجلب مثل هذا الجهاز ولو عملنا موضوع الجهاز دة راى عام حايعملو ليهو لجنة تجتمع لتنبثق منها لجنة تطلب كوتيشن من الجهات المصنعه للجهاز وترفع فواتيرها وعملة حرة والدولارات تروح فى الوسطاء ويجو ناس التيار يكتبو عن الفساد فى جهاز القصطرة وتقوم المرة تموت و…..
    الله فى …

  12. خالد مدنى…سلام وبركة بالطلة…
    الحمدلله الرجعت معانا فى (حظيرة) الوطن ! كع كرع رع…

  13. عشان الجهاز بتاع القسطرة ده وقف ياعمنا حقو الواحد مايقراء العمود بتاعك ده

    عشان ماتجيهو جلطة من الوضع الحاصل ده

    وبعدين يحصل امات طه

  14. ياشمباتي حظيرة الوطن دي زي زريبة الهوامل بلمو فيها المحظور عليهم لقمة العيش في السودان … مش كده ؟

  15. علاءالدين - ودمدني | رد

    سلامات اكتر حاجة تعابين قلوبنا الناس ديل فابسط حاجة يوفرو ليها علاجها ، طيب تعرف الفرق بينا وبين اي دولة قامت فيها ثورة الان سببين وفي واحد انتهي
    الاول قناعة بان الاننقلابات لا تاتي بالافضل بل كمان المتربصين حاليا ناس لاتهمتهم الاانفسهم وملكياتهم بس ( ودة خلاص شبه الناس وصلو لي انه اي زول ولا ديل ) علي الرغم من الظروف الصعبة الممكن تتوفر في حال حصلت ثورة ( ودة انتهي الناس تاكدت انه ماف اسوا منهم )
    اما السب التاني احساس جماعي لكل الناس بانهم كلهم يتم التمتع باموالهم امامهم مع الحرمان الكامل من ابسط حقوقهم يعني مايحس اي زول كانه لوحده ودة قسمته ورببنا كريم كعادتنا ( ثقة في بعض يعني)
    دي حسب وجهة نظري البسيطة

  16. علاءالدين - ودمدني | رد

    تكملة للاول الظروف الحالية اصعب مايمكن انه تقوم فيها ثورة لانه الكل متربص بينا يعني الحمدلله مصيبتنا داخلية في تعامل حكومتنا معانا بالاهمال دة والتنانية خارجية بتربص من هم بالخارج بحكوتنا وبينا طبعا ( رايحين في الكرعين ) اذا ما انعدم الامن

  17. الأخ جبرا والإخوة الأكارم
    السلام عليكم ورحمة الله في البدأ أشكر البروف لتسليطه الضوء علي هذه المسائل الخطيرة التي تعني كل مسلم يحمل في قلبه شيئ من الإسلام أو كل إنسان في قلبه شيئ من الإنسانية.
    تعليقا علي الموضوع أقول
    اللهم لا تسلط علينا بذنوبنا من لا يخافك ولا يرحمنا.

  18. الحبيب خالد…سلام وشوق ومحبة..
    اى والله,,فعلا صبحنا هوامل وبقينا زى النبق والشنو كدة ما عارف !!
    والله اشد ما يؤلمنى هجرة الزيك ممن عادوا بطوعهم واختيارهم وهم فى وضع يحسدون عليه من الاستقرار والامن والمادة,عادوا بفهم الوطن والمسئولية,لكنه لفظهم ورفسهم بالاحرى !
    وبركة انك نفدت بجلدك قبل ما يبيعوك الوراك والقدامك !
    حسبى الله عليهم…

  19. دين أبوهم إسمه إيه ؟

    دين أبونا يا مسلمين
    في يقيني أعز دين
    كلمة النور الأمين
    كلمة الحق المبين
    حكمة يكتبها الإله
    فوق جبين الطيبين
    دين أبونا يا محمد
    انت سره ومبتداه
    انت إحساسه ومداه
    دقة عارفينها في قلوبنا
    لما نخشع للإله
    لما نطلب يوم رضاه
    لما نركع لما نسجد
    لما نفرح بالحياة
    دين أبونا إبراهيم
    رش جمر النار حنين
    ع الخرايط والأماكن
    اتولدنا طوافين ذاكرين
    دين أبويا دين إلهي
    أينما كان اتجاهي
    حتى لو كان مش إلهي
    للبقر ناس يعبدوه
    ويدينوله بالولاء
    مش غباء
    تعرفوا في البقرة إيه بيقدسوه ؟
    العطاء
    اللي انا بقى معرفوش
    الوحوش الكروش اللي لو طالوا رقابينا
    بينهشوا مبيرحموش
    دين أبوهم إسمه إيه ؟
    اللي داسوا فوق رؤوسنا بالبيادة
    اللي مشيوا بالببلاد للبلادة
    اللي فتاويهم فساد للعقل
    يقضى على العبادة
    اللي مسحوا من الآيات معنى الشهادة
    دين أبوهم اسمه إيه؟
    اللي باع وطن بحاله
    بهجته ودمه وعياله
    خطوته وسنين نضاله
    ثورته ضد احتلاله
    دين أبوهم اسمه إيه؟خضرته وصفرة رماله
    مين إلهه ؟
    مين رسوله؟
    فين كتابه؟
    فيه ملايكة وللا غابوا؟
    فيه شياطين وللا تابوا ؟
    شرهم زاد عن جهنم شر لا يمكن حسابه
    دين أبوهم اسمه إيه؟

    الشاعر الكبير : جمال بخيت

  20. البروف والسمار الكرام …. ألف تحية وسلام
    أولا كون أن المسئولين وأقاربهم ونسايبهم لا يتعالجون في المستشفيات العامة ( إن بقى لدينا ما يمكن تسميته هكذا) – حقيقة … وقد سبقناك غليها في مداخلة سابقة
    وبما أن العلاج في المستشفيات الخاصة … والتعليم في المدارس الخاصة… وبناء الطرق والجسور يتم بالصناديق الخاصة التي ترض المساهمة فيها على (المتغربين)….فما هي الوزارة الخدمية أو الخدمة االتي تقدمها هذه الحكومة لنسميها حكومة؟ هل هي الدفاع عن السودان؟ لقد ضحوا بجنوبه من أجل أن يستمروا في الحكم… ولا مانع لديهم في التضحية بأكثر من ذلك. هل هي الأمن؟ … بربك هل تشعر بالأمن عندما ترى رجل الشرطة أو المرور أم تصيبك الخشية منه؟… لقد انتهى السودان… اسما ورسما… ولم يعد سوى ذكرى مبهمة في مخيلة الشيوخ من أمثالنا… وإعادته لن تكون باقتراح الصناديق… و لا بدعوة ذوي العلا من الغرانيق…
    الجهاز المذكور لو وجد… من يضمن له العمل؟ في أحد مستشياتنا جهاز موجاتصوتية للقلب… كتبه لي الدكتور .. وكلما طلبته قالوا لي (الجهاز عطلان!) وأخيرا اكتشفت أن الجهاز لم يبدأ العمل بعد … لنه ليس لديهم من يعرف كيف يشغله..عجبا بعد أن كنا نصدر الأخصائيين والمهندسين صرنا في حاجة إلى استيرادهم .. واقتصر تصديرنا على رعاة الأبل والشاه..

  21. تحية طيبه
    من غير فهامة زي ما قال سعادو نخصم من مرتبات العملين بس بدل القرية الرياضية يكون لي الاجهزة الحياتية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: