أهو برضو تعاون

لو أن صمويل بيكيت رائد مسرح العبث واللا معقول الأيرلندى الأصل (1906-1989) يعيش بين ظهرانينا الآن لأحنى هامته لنا من فرط العروض المسرحية العبثية واللامعقولة التى أصبحنا نشاهدها على مسرح حياتنا البائس !
والمضحك المبكي أن يمارس معظم هذا العبث باسم الدين وياتو دين؟ الإسلام الذي إذا إبتغي احداً دينا غيره فلن يقبل منه وهو في الآخرة من الخاسرين !
في خطوة غير مسبوقة (في العالم كلو) قامت الأستاذة إشراقة سيد محمود – وزيرة التعاون الدولي – بتعيين شقيقها (مجدي) مديراً لمكتبها وتقول الصحيفة التى أوردت الخبر بأن المعلومات التى توفرت لديها فإن وجود (شقيق إشراقة) معها بالمكتب يعود لقرار أسري على سبيل وجود المحرم ! (لا خلااس إقتنعنا) !!

ويقول الخبر أيضاً ان (مجدي ) ظل يتنقل مع (إشراقة) مع كل منصب فقد كان معها عند توليها منصب وزارة الرعاية الاجتماعية بالولاية الشمالية ثم إنتقل معها حينماأصبحت وزيرة في الحكومة ثم إنتقل معها حينما أختيرت معتمداً للرئاسة بولاية الخرطوم والآن (حط معها الرحال) بوزارة التعاون الدولي!
عليكم الله في عبث أكتر من كده؟ ولا أيه ؟ وعشان أى (فعل غير رشيد) في الزمن الأغبر ده لابد أن يتم تبريره بالقرآن والآيات وكده (على الرغم من أنو الآيات منها براء) تعالوا نقرأ تبرير (الست الوزيرة) لهذه (الجريرة) بس قبل كده (العندو ضغط يبلع حبتو) : لقد بررت الست الوزيرة مسألة التعيين هذه بقصة سيدنا موسى حينما طلب من الله تعالى أن يجعل له من أخيه هارون نصيراً فخاطبه الله جل وعلا مستجيباً لطلبه قائلاً : { سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا فَلَا يَصِلُونَ إِلَيْكُمَا بِآيَاتِنَا أَنتُمَا وَمَنِ اتَّبَعَكُمَا الْغَالِبُونَ } .
العبد لله (ركَّب الفهامة في راسو) حاول أن يعرف أوجه الشبه بين (سيدنا موسى) و (الست إشراقة) وبين (هارون) والسيد (مجدي) وبين (وزارة التعاون الدولي) و(الوادي المقدس) لكنه فشل فشلاً ذريعاً !
فالمسألة ليست لها علاقة بالدين (من أساسو) ولو كان لها علاقة فهى (الإفساد في الأرض) أوليس تعيين الأقارب هكذا ودون منافسة (فساد) في بلد يعاني آلاف الخريجين (الأكفاء المؤهلين) فيه من العطالة والبطالة ؟
وعلى ذكر (التأهيل) ، ذى ناس (هارون) ديل مؤهلاتهم شنو؟ وتعيينهم بيتم كيف؟ وعلى أى أساس ؟ يعني أى (موسي) يجيب أخوهو (هارون) والسلام وللا الحكاية خاضعة لمؤهلات تناسب الوظيفة؟ !
طالما ان هذا الأمر طبيعي ولم يعترض عليه أحد (إلا نحنا ديل) فالعبدلله يقترح علي القائمين بأمر الخدمة المدنية (الما شايفين المسألة دى غلط) وضع لوائح خاصة لتنظييم عمل وتعيين (المحارم) و(الهوارين) إذ أن الأمر لن يقتصر على هذه الوزيرة وأخيها (هارون) فهنالك الكثير من النساء العاملات بالخدمة المدنية اللواتي لديهن (مدراء مكاتب) وسوف يستفدن من هذه السابقة (غير المسبوقة) وكل واحدة سوف تطالب بـ(أخوها) نصيراً لها ! (ينصر في شنو أنا ما عارف؟) !

على كل السيدة الوزيرة يجب ألا تلام على اصدارهذا القرار المشار اليه فهى تدرك وتؤمن ايمانا راسخا بأن (الأقربون أولى بالمعروف) وطالما أنو (الحكاية كده) والأمر كذلك والمسألة كووولها (تعاون) فالعبدلله يقترح عليها انتداب كافة أفراد العائلة الكريمة وتعينهم فى مناصب تتناسب ومؤهلاتهم فى وزارة (التعاون) الدولي التى تجلس على قمتها ولن يعجزها التبرير والإستدلال حينها بالآية الكريمة من سورة المائدة: {وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ} !! وأهو كلو تعاون على بر الأقربين !!
كسرة :
ما عارف ليه في مثل هذه الأمور بتذكر قول الشاعر المايوي (وريتنا جديد ما كان على بال) !!

كسرة ثابتة :
أخبار خط هيثرو شنو؟

24 تعليق

  1. سلام ياقبيلة،،،
    جبرا يا صديقي جاء في الحديث النبوي عن أبي مسعود رضي الله عنه قال : قال رسول الله صلى الله عليه وسلم : ( إن مما أدرك الناس من كلام النبوة الأولى : إذا لم تستح فاصنع ما شئت ) رواه البخاري .
    فالحياء يا صديقي هو زينة النفس البشرية ، وتاج الأخلاق بلا منازع ، وهو البرهان الساطع على عفّة صاحبه وطهارة روحه ، ولئن كان الحياء خلقا نبيلا يتباهى به المؤمنون ، فهو أيضا شعبة من شعب الإيمان التي تقود صاحبها إلى الجنة ، كما قال رسول الله صلى الله عليه وسلم : ( الحياء من الإيمان ، والإيمان في الجنة ) رواه أحمد والترمذي .
    ما قلنا ليكم الناس فكت الدرب زمان و تاهت في متاهات الدنيا ولن ينصلح حالها إلا بالتوبة والعودة للجذور!!

    1. حاج أحمد السلاوى | رد

      أخونا ودالخلا .. سؤال سغيرووووونى كدا (زى كل مرة ) الناس منو الفكت الدرب وتاهت فى متاهات الدنيا … الشعب …ولا الحيكومة ؟؟؟؟؟؟؟؟؟؟؟

      1. الشعب طبعا” يا سلولو، لأن الحكومة يا ها (سرورة) ويا هو حالا من عرفناها فماذا أنتم فاعلون؟؟؟

  2. كلو من ( ذات الشجون الدفينة ) ديك الدايرة تخليك تغرد في سربها …
    هي الادتم التبرير ده والغريب انو بالنص زي ما هي قالت قالتو الوزيرة …
    لكن هارون تم تعيينه لأنو افصح من موسي وبمفهومنا في الزمن ده يعني مؤهل اكتر من موسي هل اخو الوزيرة ده مؤهل اكتر منها ؟ ولا فاقد تربوي ؟ زي اخوها ده طالما مباريها في اي حتة معناها ما عندو التكتح وكل مؤهلاته انو اخوها .. واظنو قاري الروضة بالمساء والابتدائي اتحاد معلمين والمتوسطة من منازلهم وعلاقته بالجامعة انو بيمشي بي شارعا ….. اييييه دي آخرة البمشي وراء الشُفع …يلا سجارة واحدة لا تكفي اهو برضو تنفيس !!!

  3. عشنا وشفنا .. قال محرم قال .. حقيقى إذا لم تستح فافعل ما تشاء ، جبهات حرب الفساد مفتوحة على الفساد والمفسدين والست أعطت الفساد إسم دلع (محرم)، ليها حق تعمل أكتر من كده، هو أصلاً التعاون الدولى كان ناقص وزير دولة؟ هذا زمانك يا مهازل فامرحى .. يارب رحمتك وعفوك..

  4. و الله يا جبرا كلامك مضمونه سمح و شكواك و بكاك على حق. لكن اعتب عليك في اشياء جوهرية, نتمنى في كتاباتك الجميلة ان لاتنسى ان تنزل الرسل منازلهم من التقدير و ان لم تفعل الوزيرة, فبعد زكرك لموسى عليه السلام و هارون عليه السلام كان من الواجب ان تاتي عبارة عليهم السلام, استخدامك لعبارة “زي ناس ….” قبل اسم المرسلين بالجد تنكره الاذن. افهم جيدا انك لم تقصد التقليل من رسول الله هارون علية السلام بل قصدت مجدي اخ الوزيرة تهكما من تشبيه الوزيرة لنفسها و اخيها برسولين كريمين, ولكن اعرف اناس تابى انفسهم ان يسب احدا باسمه اذا صادف و كان اسمه يطابق اسم نبي اجلالا و تقديرا, و لنفس الاسباب الرمزية هنا مستنكرة جدا. تقبل تعقيبي و شكرا

  5. حاج أحمد السلاوى | رد

    معليش للسؤال ( اصلو نحنا بقينا ما بنعرف الوزراء ولا الوزارات البيشتغلوا فيها ) وزيرة التعاون الدولى دى توصيف وظيفتها شنو ؟ يعنى المهام الوظيفية البتقوم بيها شنو ..؟ وبتتعاون دولياً مع منو ..؟ وببتعاون فى شنو ؟ وناس وزارة الخارجية والسفراء الكتاااااااااااااااااار ديل بيسووا فى شنو ؟ والملحقيين التجاريين ( كدا صاح ؟؟) القاعدين فى السفارات الخارجية قاعدين يعملوا فى شنو ؟وأسئلة كتييييرة عاوزة إجابة .. حد عارف يا قِدعان ويجاوب لينا وينوبو ثواب رب العالمين ؟
    بقت اى حاجة يفسروها من القرآن بما يتناسب ومصالحهم .. حتى أحد الصدقاء جابوا ليهو ولد قام سماهو إسم موجود فى القرآن لاكين استطرد وقال لى ما تسألنى معناتو شنو ..
    وخلونا النشوف آخرتا شنو … !!!

  6. جبرا والسمار .
    سلام .
    ياجماعه كدى إستهدوابالله وروقو وأسمعوا.
    الاخت الوزيرة دى لو مانجحت فى ماقلد إليها من مناصب سابقة ماكانت الحكومة أوكلت ليها المهمه دى وطالما نجحت مسبقا فهذا النجاح شاركها فية أخيها طالما تبعها فى جميع وظائفا . وعلية يجب الرضوخ الى أمرها بتعيين أخيها حتى لو ياكل نصو …
    مالك ياخ …

  7. يا استاذ اول شي احيك علي الحلقة الجمعت بينك وبين الاستاذ ابو الجعافر المهم مسلسل الفساد شكلو كل مرة بضيفو لي حلقات ممكن نكون احنا في الجزو الثالث علي قرار ليالي الحلمية كسرة / بي المناسبة
    أخبار خط هيثرو شنو؟ هههههه تحياتي لي كل احباك

  8. لا لا لا دي ما صارت وزارة التعاون الدولي ، دي صارت وزارة التهاون،
    أهو كلوا في الدين كلوا كلوا محصل بعضوا ،
    ممكن تكون وزراة مفروشة ؟؟؟

  9. البروف والسمار الكرام
    ألف تحية وسلام
    أولا : كيف تكون وزيرة للتعاون الدولي لو لم تهتم بالتعاون الأسري؟
    ثانيا: أثبتت الوزيرة أنها الرجل المناسب في المكان المناسب (عفوا أقصد المرأة المناسبة في المكانةة المناسبة).. وستثبت جدارتها أكثر لو تعاونت مع كل أخوتها وأبناء عمومتها وعينتهم في الوزارة … بل في كل الوزارات .. وصولا إلى مناديب في الأمم المتحدة… وما فعلته ليس سوى خطوة أولى من الألف ميل..
    ثالثا: أمثال الوزيرة يستحقون مننا الثناء والتشجيع… لأنهم يروننا الحاصل كما هو … بلا رياء أو نفاق وليس مثل أوائك الذين يعينون أقاربهم وأصحابهم في وزاراتهم وغيرها ويتظاهرون بالدعوة إلى الله والإلتزام بشرعه….
    رابعا: يدعوهم الأخ ود الخلا إلى العودة للجذور… وما يدريك أنهم قد عادوا إلى جذروهم الجاهلية فعلا ونفضوا عنهم رداء الإسلام الذي ارتدوه لخداعنا زمنا؟ …. لا يمكن لجذور الصبار ان تثمر تفاحا

  10. يا حماعة الخير
    الوزيرة قصدها خير
    لكن سؤالى لماذا لم تعين سيدة او آنسة مساعدة لها
    بتعيين سيدة او آنسة تكون سدت الزرائع وتكون مؤهلة تشد بها عضدها

    المصيبة تعين اختها
    كسرة
    انت مالك نسيت موضوع قناة الضحى وال 50 الف دولار + ارباح المبلغ

  11. التحية ليكم ولكبيرنا جبرا
    احنا وقت قلنا ليكم الشارع قمتو تنقنقو اهو شوفو وبكرة كمان تجيب
    ولد اخوها دا ذاتو بودي غارد
    كسرة
    يا استاذ حضرنا الحلقة امبارح وكمان الصباح برضو
    لكن ما لقينا جديد (عشان ضياء الدين بوظا انا ما عارف انت وجعفر رضيتو انو الزول دا يستضيفكم كيف.
    المعلومة الوحيدة الكنا دايرين نعرفا اتدخل الزول دا وحرمنا منها(sendication) انشاء تكون صحيحة ومعناها شنو
    كسرة اخيرة:-
    ما قلنا ليك ماشين السوق (والله دي قوية جد جد)
    واكتشفنا حاجة جديدة انك فنان ورسام ربنا يحفظك

  12. معليش يا استاذ رفعنا التكليف (انت وجعفر) وبرضو بنقول انت والاستاذ جعفر
    مع الاعتذار
    دي دايرة ليها نسايم (عصام محمد نور)

  13. حرام عليك رفعت لي الضغط يا جبره انا اتخرجت من 99 ولحد الان ما لقيت وظيفه وناس يغيرو الوظيفه زي تغيير القميص حسبنا الله ونعم والوكيل فيهم

  14. وما خفي أعظم !!!!!!!!!!!!!!!!يظهر الوزارة دي ورثوها جماعة الهندي ديل ونحن الضايعين @@@@@@@@@@

  15. علاء الدين - ودمدني | رد

    سلامات للجميع
    انا واعوذ بالله من كلمة انا (سوداني) بالميلاد ابا عن جد والحمدلله لكن تصرفات ولاة امورنا ومن قاربهم وسهولة قضاء امورهم بالوساطة فيما بينهم للتعيين ولحل اشكالاتهم كتيييييييييير ماتديني احساس باننا ( حبش ) وما عندنا اي حق في البلد دي ذينا ذي الجماعة الوافدين وااااااااااااااااااااااحد

  16. كيف حيكون في تعاون اذا الوزيره لم تتعاون مع اخيها وكيف يكون وزير الماليه وزيرا ولم يستطيع اخاه ان يدخل المطار وكيف وكيف وكيف بالمناسبه الوظائف داير ليها كيف عالي كدا . اللكلام ما بتعروفه الا بعد الوظيفة الا بعد الوزراه ولا كيف يا جبرا

  17. هارون دا عندو راتب ولا موسى بيقسم ليو معاو؟؟؟؟

  18. سيد جبرا

    اعتقد جحا اولى بلحم تورو / بتاع الاعلام زوجتة شغالة شغلتين مدير البيت و مديرة المكتب
    وبتاع الخارجية زى ما سمعنا انو مرتوا الصغيرة سفيرة و طبعا دا الوصلنا و اذا كان هنالك لم يفصح عنه لاندرى؟؟؟
    وما فيش حد احسن من حد !!!
    وتبقى حكاية زيتنا فى بيتنا !!!!!!!!

  19. الاستاذ جبرا عدد من الموظفين بما فيهم السيد الوزير بوزاره الصناعه لديهم رواتب تحت تحت موازيه لرواتبهم بشركه السكر السودانيه التي تمررها علي انها من ضمن المنصرفات السنويه انا شفت الورقه بس الراجل قال لي اكان اديتك ليها للتصوير الجماعه بصفوني!!!

  20. الحبيب

    والله يابروف انا زعلان منك جنس زوعليه شنو تعين اخوها ما فيها حاجه لكن دحين البلد زاتها قسموها والغنى غنا وانت عارف الباقى اها عقب جلى الموضوع ده عشانا وشوف لينا خبر الموضوع بتاع الزول القالو عرس ده شان نعرف الموضوع ده صوح ولا اشاعه ؟؟؟؟

  21. صووووووح

  22. هل وجد طوال الأعوام السابقة، أي وزير مؤهل . و حتى الذي يعين الوزراء هل هو مؤهل ؟؟
    عينكم للفيل تطعنوا في ضلو ، ماذا تتوقع من وزير غير مؤهل و غير أمين لايريد الخير و لا يعرف أصلاً أين مصلحة البلد أو مصلحته الشخصية . النتيجة واضحة :
    دمار شامل ، تخلف ، فلس ، فساد ، غياب الأمن و تفشي الجريمة ( إذا كان حاميها حراميها ) ، مشردين ترعرعوا في الخيران و يأكلوا في أفخم الكوش ( ديل مواطنين سودانيين) ، تهجير للشباب و الأسر ، نزوح من الأطراف و تزاحم في الوسط و لا فائدة من ( النص) مليون ميل ، تفشى الفكر الإنتهازي و إضمحلال المروءة و الشهامة و الأخلاق الفاضلة ، الإبتعاد عن الدين بل توريطه في كافة الجرائم ( بإختيار و إنتقاء بعض الآيات لتبرير الأفعال اللا إنسانية التي يرتكبونها ) . إنهم بلاشك كبني إسرائيل يؤمنون ببعض الكتاب و يكفرون بكل ما لا يناسب (الكسرة )

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: