ص د ف

سألتني صحفية نابهة كانت قد اجرت معي حواراً بصحيفة (الجريدة) حول إذا كان ما نكتبه يقوم المسئولون بقراءته والتفاعل معه فأجبتها بأن المسالة تعتمد على سماكة وتخانة (جلد) المسئول ولو شئت حينها الدقة لقلت لها بانه من حكم (النادر) أن يجد ما نكتبه صدى ومتابعة من المسئولين وما (كسرتنا الثابتة بإذن الله) إلا مثلاً حياً (لطناش) المسئولين !! هذا الطناش الذي يمكن أن يؤدي إلى كثير من (الإحن) والمآسي ودونكم أعزائي القراء هذا الخبر الذي يقول أن مدير عام وزارة التوجيه والتنمية الاجتماعية بولاية الخرطوم (التجاني الأصم) قد كشف عن دراسات توصلت إلى وجود 140 ألف تلميذ وتلميذة بولاية الخرطوم لا يتناولون وجبة الإفطار !تأمل عزيزي القارئ هذا الرقم جيداً حتى تدرك حجم هذه المأساة وإلى اي مدى وصل بنا الحال المخزي وآل إلينا المآل المحزن إذ يذهب هؤلاء الصغار وهم يرتجفون من زمهرير شتاء (البكور) يتأبطون كتبهم وعند (فسحة الفطور) لا يجدون ما يدخلونه إلى بطونهم الصغيرة الخاوية !
لا تسألني يا صاحبي عن مسئولية الدولة في إطعام هؤلاء الآلاف من التلاميذ الجياع فالدولة يا عزيزي ليست مسئولة عن المواطن ألا تطالع في الصحف المواطنون المرضي وهم يناشدون (ذوى القلوب الرحيمة)؟ كي يمدوا لهم يد العون حتى يبقوا على قيد الحياة ؟ ثم أن الدولة ممثلة في (أمنا الحكومة) مشغولة بمحاربة الفساد الذي اوصلنا إلى هذه الحالة (المزرية)فهاهي تضع خمسة ملفات فساد (كتيره والله) أوليس هذا العدد من ملفات الفساد التي هي حصيلة 23 عاماً من تولي العمل العام مؤشراً لطهارة اليد التى ظهرت نتائجها وبان حصادها في هذه الأجساد الصغيرة التى تحتاج إلى النمو ؟ ألم تسمع يا صاحبي بتلك المقولة التى تنسب إلى سيدنا علي كرم الله وجهه والتي تقول (ما أغتنى غني إلا بفقر فقير) !! وهل هنالك بشاعة أكثر من خواء هذه المصارين الصغيرة من كسرات خبز تقمن أصلابهم النحيفة ؟ نعم يا صاح ها هو الفقر يطل عياناً بياناً في أبشع صوره كما تطل الدراهم بأعناقها (ذات العماد) !
لا تسلنى يا صاح عن المئات من منظمات (البر والشهوة) الخيرية الطوعية لماذا لا تقوم بمساعدة هؤلاء التلاميذ الفقراء ؟ فهذه المنظمات يا صديقى قد قام بإنشائها مواطنون (بررة) من أجل الإستفادة من الإعفاءآت الجمركية وشيكات الدعم (الخليجية) وهم من بعد ذلك يرجون من الله ثواباً !
أما إن سالتني يا صديق عن (الرأسمالية الوطنية) ودورها الذي يجب أن تقوم به من أجل توفير (لقمة) لهؤلاء الصغار فأقول لك رحم الله (الرأسمالية الوطنية) التي كنا نعرفها والتى كانت تقوم بتشييد المستشفيات والمراكز الصحية والمدارس ، رأسماليو اليوم (هم فاضين من تسجيل اللعيبة) !
لا تسألنى يا صاحبي (الحل شنو؟) لانني سوف أقول لك ببساطة (هي يعنى بقت على فطور الأولاد ديل) ؟ ما القصة كوووولها بايظة .. عشان الأولاد ديل يفطروا لازم قروش (كتيره) ترجع وتساهم في حل الأزمة دى .. زى قروش الإنقاذ الغربي ، قروش المدينة الرياضية ، قروش قناة الضحى،قروش الأقطان ،قروش الشنو ما بعرف داك ، القروش دي لازم ترجع عشان الأولاد ديل يفطروا ، هو أصلو (اللبع البدون رحمة ده) هو الأوصلنا للحتة دى !!
لعلك ايضاً تسألنى يا صاح : طيب أفرض (القروش) القلتا عليها دى ما رجعت ، العمل شنو؟ أقول ليك : بسيطة طواااالي نعمل (ص د ف) .. صندوق دعم الفطور .. ما قبل يومين تلاته نادينا بعمل (ص د ق) صندوق دعم القسطرة .. وقبل أيه مش تعرف كده نادينا بعمل (ص د ر) صندوق دعم الرادار … نحنا تطير عيشتنا ما حياتنا كوووولها بقت عاوزه ليها (صناديق دعم) !!

كسرة :
نسيت .. وقروش الخط كمان ترجع !
كسرة ثابتة :
أخبار خط هيثرو شنو؟

Advertisements

17 تعليق

  1. اللهم أغننا بحلالك عن حرامك وبفضلك عمن سواك. آمين

  2. لتفعيل تلك الصناديق لازم ص د ص صندوق دعم الصناديق ……….. والله المستعان

  3. يااخي الفاتح خط
    هاااااااااااااااانت باقي لينا 21 سنه

  4. فال الله لا فالك يا بت وراق … !!!!

    1. معادلة مخيييييييييييفة
      1-جمال عبد الناصر ولد سنة 1918 وحكم 18 سنة من عام 52 وحتى عام 70 وجاء الى الحكم بانقلاب عسكري عام 52 ومات وعمره 52 سنة
      2-حافظ الأسد ولد سنة 1930 وحكم 30 سنة من عام 70 وحتى 2000 وجاء للحكم بانقلاب عسكري عام 70 ومات وعمره 70 سنة
      3-صدام حسين ولد سنة 1937 وحكم 37 سنة من عام 79 وحتى 2006 وجاء للحكم بانقلاب عسكري عام 79 ومات وعمره 79 سنة
      4-معمر القذافي ولد سنة 1942 وحكم 42 سنة من عام 69 وحتى 2011 وجاء للحكم بانقلاب عسكري عام 69 وقتل وعمره 69 سنة
      5-نأتي الى عمر البشير ولد سنة 1944 بالمعادلة دي حيحكم 44 سنة من عام 89 وحتى 2033 جاء للحكم بانقلاب عسكري في 89 ويمكن ان يموت وعمره 89 سنة
      أهاااااااااا شنو رأيك يابروف
      أها انت يا أب أحمد إنت رأيك شنو ؟؟؟؟؟؟؟

  5. السلام عليكم ، البرف و الاخوان ، جانى احد الاخوه وقال انو فى ولد شرير فى المدرسه ، و بيخطف فطور الاولاد الاخرين ، ذهبنا الى المدرسه ولما استفسرنا علمنا ان الشرير هذا عامل محمود المليجى لانو ابوهو بيديه الصباح تلاته بلحات للفطور ، يعنى الابو ده شغال شنو ؟ شغال فكى ؟ طيب لما يشوف سندوتشات الفول والطعميه ده مش يعمل المليجى بس ده لازم يكون رامبو!!! سؤال ثقيل: الولد ده و لا كان الباقين ، صحابه ديل عشان ما يفطرو بى تلاته بلحات ……………… عجبى

  6. والله قربت ابكى يا بروف وناديت ولدى عشان يقرا الموضوع واللى بنق كل يوم عشان يزيد قروش الفطور من 5 دراهم الى عشرة وقلت ليهو تانى مافى لحد ما اخوانك اللى فى السودان يفطروا زيك وحرام والله العظيم.. رجعت بذاكرتى بداية الثمانينات فى الامارات ويمكن صديقنا ابو الجعافر يقول ليك.. كل طالب كان بستلم 600 ريال .. المواطن والوافد +الفطور ما طاب ولذ..
    تعرف حسع فى الامارات كل ولد مواطن بمجرد ولادته عنده مرتب 600 درهم واى شخص عنده جمل..كل راس 200 ريال والغنماية 50 ريال والنخلة 100 ريال و تسويق منتجاتك من المزرعة عن طريقهم وطبعا كل المنتجات تتكب فى الصحراء (ليس للاستهلاك الادمى) عشان الاسمدة وكدا .. ونحن لو زرعته بياخدوا ولو عندك بيت برضو بياخدوا وعن كل نخلة برضو بياخدوا.. ويمكن بياخدوا عن الاولاد كمان؟؟

  7. هل صدقت ان الرقم 140 ألف بس يعني مثلا ما مضروب في 10 لان الجماعة عندنا الفاجعة قاعدين يصغروا ارقامها ..

  8. عشان نكون حقانيين الغلط كان من أووول
    زمن الحيكومات الفاتت كانوا بيأكلوا
    طلبة الجامعة 3 وجبات بي تحليتن …
    ويخلوا شفع الابتدائي المحتاجين للغذاء جيعانين
    وجاتنا المفجوعة دي جوّعتم ضغار وكبار ..
    نحنا حيكومة وشعب مركبين غلط !!
    حاجة شامة ست الفطور في مدرسة العباسية
    كان سندوتش فول او طعمية بي قرش والفسيخ
    بي قرش ونص حلاوة فولية او حلاوة شعيرية بي
    تعريفة .. مدرسة العرضة كان ست الفطور ترص
    السندوتشات قداما وتقول ليك شيل براك وانت
    وحظك يا طلعت محشية يا فاضية ولو فاضية ما
    تحتج لانك عزلت براااك …اييييه زمن !!!

  9. سلامات
    اسئلة للجميع ال140000 ديل مش قطع شك بينهم يتامي ؟؟؟؟؟ والدينه عايشين ديل خليهم…….. وبديهي انه الاموال العايزة ابراء زمة دي اليتامي ديل عندهم نصيب فيها طيب سؤال تان
    وين من ياكل حق ديل من قوله نعالي بان من ياكل اموال اليتامي انما ياكل في بطنه نار؟؟؟؟؟؟؟؟؟؟؟ انتو الناس ديل اخر افتاءات فقه الضرورة بتاعهم تقول شنو عشان نكوت واضحين ومايكون نفت شي من الثوابت واركان الايمان النحن بقينا راجنها وماسكين فيها وماف حل غيرها ؟؟؟؟؟؟؟؟؟؟؟؟؟؟؟؟؟؟؟

  10. لا اجد قولا سوى قول ست الدار بت احمد جابر : هاكم دى يا اولاد الهرمة !!!

    1. شمباتي .. بعد اذنك دي عجبتني داير استلفا
      منك .. محتاج ليها في الراكوبة ….استأذن
      لي من ست الدار بت احمد جابر ..

  11. اخى اب احمد سلامات
    باقى ليك موش اخير نكون عارفين النهايه متين ولا اخير الجرجره بتاعت المسلسلات المكسيكى
    ح اترشح ماح اترشح ح اترشح ماح اترشح اخير نكون عارفين ونتيقن

  12. الحبيب جنوبى….سلام…
    ست الدار بتسلم عليك وقالت ليك ما تنسى الاشارة !
    دول جماعة السى آى ايه…

  13. عشنا وياما حانشوف ، نفسي ادخل في راس واحد من الجماعة ديل وأركب اكبر فهامة (مركبة) وأشوف اثر حديث رسولنا الكريم (من ولي منكم من أمر أمتي شيئا……) في نفوسهم شنو ، وهل سمع بي حاجة إسمها القبور والموت وحساب الآخرة وللا الجماعة ديل قايلين الحساب دا مقصود بيه حساب سري في سويسرا وبس ، وللأسف واثق إنو الفهامة حاتطرشق وتعود لي (بدون خفي حنين)،،،

  14. السلام عليكم يا ناس
    هذا يعني أيها السادة أن المشكلة تقتصر على عدم تناول 140 ألف تلميذ للإفطار…. وإكتفائهم بالغداء والعشاء… لو كانت مصيبتنا بمثل هذه البساطة لهانت …. هناك الملايين في هذه البلاد ا(لتي كانت تحب أن توصف بأنها سلة غذاء العالم) لا يتناولون الفطور أو غيره …. نعم لأنهم ياكلون ما تيسر حينما يتيسر… (إن تيسر) وفي أي وقت من الليل أو النهار بحيث لا يمكن وصف ما يتناولونه بأنه فطور أو غداء أو سحور…..: الرأسمالية الوطنية التي كانت وكانت قضت عليها الإنقاذ وجاءت بلفيف من محدثي النعمة الذين يحرصون على المال والدنيا حرص من لا يتوقع خيرا بعدها…. وجلّ ما نستطيع فعله هو أن نكتب ونتباكى…. ونستخدم الكلمات التي لا تعد من الدارجة ولا من الفصحى… لأنهم انسونا ما تعلمناه…. لنا الله

  15. الحبيب

    والله قصه اليمه والكلام ده حاصل حاصل والله فى قلب العاصفه عفوأ العاصمه وداخل اجعص المدارس لكن دحين نعمل شنو لو مدرسه واحده فيها ستين طالب حق الفطور بح

    لكن البلد لسه فيها ولو قدر صغيرون من اخوات فاطنه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: