ما بتشوف؟

تربطنى علاقة صداقة وزمالة دراسية مع كثير من الإخوة في الشرطة بمختلف الرتب وقد كان الحادث الذى تعرضت له وأسرتي بشارع الحرية بالخرطوم قبل حوالى عامين موضوعاً للتحاور والتفاكر معهم حول التجاوزات التى يقوم بها بعض المنتسبين لهذا الجهاز الحساس .
والموقف الذى كنت قد تعرضت له كان محاولة إبتزاز وإستفزاز وترويع قام بها فردان من (الشرطة) وهما (يركبان) دفار يجمل لوحات الشرطة الزرقاء وقد قامت قيادة الشرطة بالتحقيق في الأمر ومحاكمة من قاموا بهذا الفعل المشين رغم البطء الذى لازم المسألة (سنة وشوية) !
لقد قلتها لبعض قيادات الشرطة صراحة فعلى الرغم من وجود بعض العناصر الشرطية المميزة إلا أن هنالك تفلتات ذات حجم مقدر لبعض المنتسبين لهذا الجهاز وأن على القائمين بالأمر عمل (فلترة) لإقصاء هؤلاء الأشخاص حتى لا يفقد المواطن مصداقيته فى الشرطة التى يأمنها على ماله ونفس وعرضه وممتلكاته !
ورغم أن هذه التجاوزات (خشم بيوت) فدعونى أسرد لكم بعض التجاوزات (السغيرونة) التى حدثت لي مؤخراً وأختصرهم في حادثتين إستدلالا لما أقول :
الحادثة الأولي وأنا أحاول (ركن) عربتى مساء أحد الأيام أمام (حديقة الريفيرا) بأ مدرمان حيث كنت والأسرة مدعوون لحضور حفل تخريج ابنة قريب لنا ، وأنا أحاول ركن العربة وجدت مساحة خالية وقفت فيها ولم ألاحظ (والدنيا ضلمة) أن هذه المساحة قد تم وضع شريطاً (حبل) عليها منعاً لدخول العربات وما هي إلا ثوان حتى هرع نحوي (جندى شرطة) لا يتجاوز عمره العشرين قائلاً :
– إنتا عميان ما بتشوف !!
صعقت من نوع المخاطبه لهذا الفتي اليافع فرددت عليه غاضباً :
– إنتا يا ولد قليل أدب ؟ أتكلم كويس !
صعق الفتى من ردي الغاضب ,ولم يرد وقد كنت حينها أود أن أعطيه محاضرة في (الأدب) لولا أننى كنت على عجلة من أمري حيث أدرت محرك العربة بحثاً عن مكان آخر !
الحادثة الثانية تشابه الأولي فبينما كنت أقود عربتي ظهراً عائداً للمنزل برفقة زوجتى بعد أن قمت بعمل بعض الفحوصات بمستشفي القلب أحسست ببعض الإنهاك فطلبت من زوجتى أن تتولي القيادة وبالفعل توقفت أمام وزارة الثقافة بشارع الجامعة وقمت بفتح باب العربة خارجاً لنتبادل المواقع وما أن فتحت الباب حتى هب شرطيان كانا في حراسة الوزارة واقفين حيث بادرني احدهما :
– يا زول الوقوف هنا ممنوع يلا أمشي !
قلت له :
– يا ابنى حقو تنتظر ثواني بس لأني ما عاوز أقيف !
وهنا (شطح) ولدنا التاني المعاهو (وزاد المحلبية شوية) إذ إنتهرني قائلاً :
– يا زول إنتا ما بتسمع ؟ قلنا ليك أمشي الكلام ده بالياباني !
بالطبع فوجئت أيما مفاجأة من كلام ولدنا (العسكري) ده وكان ممكن يطق فينى (عرق) يوديني (أحمد شرفي) خاصة وأني مجهد وجاي من (من فحوصات قلب وكده) ! غير أنني رديت عليه بمثل ردي على زميلة في الحادثة الأولى (بتاع إنتا ما بتشوف) ! مما إضطره أن يسألنى وقد فغر فاه دهشة وهو غير مصدق لما سمعه من رد :
– إنتا منو؟
الشاهد أن هنالك خللاً ما يجب على قيادات الشرطة سرعة تداركه وما (حادث الديم) الأخير ألا شاهداً علي ذلك وخليكم من حكاية (أعيرة نارية في الهواء اصيبت على اثرها احدي المواطنات) !
كسرة :
طيب لو ما كانت في الهواء كان حصل شنو؟

كسرة ثابتة :
أخبار خط هيثرو شنو؟

35 تعليق

  1. السلام عليكم ، البرف و الاخوان ، اولا العسكرى ده موجه توجيهات معروفه اقصد زى الوصل ده انكتب خلاص يعنى تدفع تدفع ، اقبض المواطن لانو مجرم كبير ، ايه رايك فى بتاع الضرايب البجى سايق معاه عسكرى بى كلاشنكوف ، بتاع النفايات ، زى كانه اسد علينا ، بتاع المويه ، انا ما عارف المؤسسات مهى ملك للشعب لماذا يستاسد علينا المتحصل ، سؤال بطئ الفهم : الحاصل فى الدنيا دى شنو ، كل موظف معتبر نفسه سيد المحل !!! ……………. عجبى

  2. 9 AM
    وكالات قررت شركتا «بيبسي» و«كوكا كولا» في كاليفورنيا إضفاء تغييرات في مكون تستخدمانه لتلوين المشروبات الغازية لتفادي وضع تحذير من الإصابة بالسرطان.
    وذكرت وسائل إعلام في كاليفورنيا أن الشركتين ستضفيان تغييرات على طريقة تلوين الكراميل في المشروبات على مستوى الولايات المتحدة وليس في الولاية فقط بعد أن أقرت كاليفورنيا قانونا يعتبر مركب «4 ق ام إي»، «4 و ام إي أي» مادة مسرطنة والإضافات المستخدمة في التلوين تحتوي عليه.

    وبموجب القانون ستضطر الشركتان إلى وضع تحذير من السرطان على منتجاتهما المبيعة في كاليفورنيا ولتفادي ذلك قررتا تغيير التركيبة.

    غير أن رابطة المشروبات الأميركية أكدت أن المادة لا تسبب السرطان للبشر وان الدراسات التي أجريت عليها شملت الجرذان فقط.

  3. الشرطي هو بمثابة قاضي مناوب في الشارع
    والقاضي لمن يكون فاقد تربوي مشكلة كبيرة !!
    فترة كدة كان شرط القبول لافراد الشرطة مؤهل
    شهادة سودانية ما عارف ليه خلوا الشرط ده ؟
    بيان الشرطة في مقتل الفقيدة عوضية قالوا انو
    بيتها مشبوه ومكان لترويج الخمور وطلعت
    عوضية نائبة امانة المرأة بالمؤتمر الوطني !!!
    زول تفوح منه ريحة الخمر وماشي في حالة وآخر
    تفوح منه ريحة الكركدي وماشي ويشتم في خلق
    الله لو انت شرطي تمسك منو ؟ وتخلي منو ؟
    وكتين بيت مشبوه والي الخرطوم ووزير الداخلية
    ماشين يعزوا ليييييه !!؟؟
    يقتلوا القتيل ويمشوا في جنازته ..
    فنان يطردوه من الصلاة في الصف الاول وفنان
    يصلي عليهو امير المؤمنين السوداني !!!
    جهجهتونا الله يجهجهكم …..

  4. وليه ما يعلموهم اولا كيفية مخاطبة الناس لانهم حيتعاملوا مع الجمهور فى كل لحظة ومش ممكن شرطى يقل ادبه مع اى مواطن سواء كان صغيرا او كبيرا بهذا الاسلوب الخرسانى ويا ريت يرسلوهم للامارات عشان يتعلموا كيف يتعاملوا مع الناس والا يكون ديل دربوهم فى السعودية

  5. طارق بابكر احمد عبيد | رد

    الفاتح ود عمي ارجو تسليط الضو برضو علي رجال الشرطه الشرفاء لانو فعلا مهنه حساسه ويجب ان يرضخ التعيين الي هاي استاندرد زي ما كان زمان

  6. ياسين شمباتى | رد

    ههههههههههههههههههههههه,عدم الشوف عرفناهو يا بروف,كمان عدم السمع شنو !!؟؟

  7. سلامات . اذا قام كل من مر بمواقف مع الشرطة بسرد مرارة التعامل وسوءه كنت يا استاذ الفاتح تشوف مواقفك دي نقرشة تسالي خصوصا والموقف معاك شخصيا ما مع زول تحترمه والدك مثلا ودة مريت بيه انا شخصيا يعني هي مواقف قد تكون من بعض الناقصين في تربيتهم وتاهيلهم ( فاقد تربوي ) دة اذا كان التربية بعدها الزول في زمنا مافاقد الا انه تكيل هذه المواقف في صدرك من الحقد والكراهية تجاه تلك الفئات الشرطية والتي من المفروض ان تكون علاقتك معاها ودية وتعاونية تكاملية ماداير اتكلم انا ذاتي بمركب نقص المقارنة مع الخارج لكن هل يجي يوم الاطفال تاخد صور تزكارية مع رجال الشرطة كما في بريطانيا ،( الجواب لجميع) ، ودي صورة واضحة لانه المشكلة ما حكومة بس ولا دستور فعلا المشكلة في النفوس والضماير ( الغريبة انه نفس الموقف المريت بيه يمكن ان تكون صاحب معارف وواسطة ماتمر بي ربعه دلالة علي انه الموقف لا يوجبه عليك القانون بل استضعاف من بيده القانون لشخص زول الله ساي )

  8. أخونا الفاتح
    الأخوة الاعزا تحياتي لكم جميعا
    أنتا يا اخوي الفاتح بقيت تخاف ولا شنو ؟؟؟
    عامل ليا أصدقائي الضباط واولادي العساكر انت ماعوز تقول انهم مش كويسين . اكتر ناس مرتشين ناس المرور والله القانون الوحيد الذي تتجاوز فيه الغني والفقير يعني اعمل ماتعمل مادام عندك قروش ماعندك مشكلة اذا كان الحكومة نفسها مرتشية من ناحية قانون المرور كل التجاوزات قصادها قروش ……. يعني ارتشا في ارتشا …..
    يا الفاتح اخوي اعمل ماتعمل وخالف ماتخالف بس ادفع وامشي ……

  9. كدي اسالك هو شعار الشرطه عندنا شنو الشرطه في خدمه الشعب ولا انا زوله قديمه صراحه ما عارفه لكن امس القريييييييبه دي انا كنت في شارع النيل وفجاء قامت ليك شكله بين رجلين من الشرطه وزول قال ليو انت واقف غلط طيب يعملو ليو مخالفه ولا يتشابكو معاو بالايدي والناس التلمو سبحان الله هو الداير الدق زاتو ما عرفناو منو في البلد دي انا صراحه من الضحك مت عدييييييل شر البليه ما يضحك

  10. أبي وأستاذي العزيز الفاتح جبرا ..
    أولا لك التحية ولكل الموجودين هنا،، وتاني حاجة الموضوع ما انو بس (أفراد) من الشرطة هم البيتجاوزوا، انا في حياتي ما لاقاني عسكري بيتكلم باحترام كان مع صغير ولا مع كبير، العسكري لما يتكلم معاك بيفترض نفسو حاجة مقدسة لدرجة هو مسموح ليهو يتلفظ بأي كلمة معاك وانتا مفروض ما ترد لأنو هو -عندو دبووووووورة- زي ما بقول !!!!
    وانا بدرس في جامعة الخرطوم والأحداث الأخيرة دي صدمتني للأسف ما في الشرطة بس في كل المسئولين، نفسي أعرف بس ليــــــــــــــــــــــــه أي زول بيدوه سلطة في السودان دا بيستغلها وينتقم من الناس الما ليها ذنب ؟؟!!
    المفروض هم يوجهونا ولا نحنا نربيهم !!!!

  11. حاج أحمد السلاوى | رد

    مع الأسف الشديد تنقصنا ثقافات عديدة بالرغم من الحاجات الكويسة العندنا ( مع قلتها .. يعنى قليلة لمن فاتهم الإستماع ) مثلاً ..ثقافة التعامل مع الجمهور حال كونك موظف فى مرفق خدمى عام .. الموظف يكون عواطف زعلته يطلع من البيت وشه يلعن قفاه ويجى يفش خلقه فى المراجعين المساكين ..تنقصنا ثقافة الإعتذار عن الخطأ ( عموماً) بنشوفها حاجة تقيلة إنك تعتذر لزول وخصوصاً لو كان أصغر منك سناً ..ثقافة تقول شكراً لزول عمل ليك خدمة ولو بسيطة والحديث النبوى يقول ( فى ما معناه.. عشان ما ينط زول فى حلقى .. ) تبسمك فى وجه أخيك صدقة ..( حتى الصدقة البسيطة دى الناس ما عاوزاها .. دا شنو دا ؟ )وأهم من دا كوووولو ثقافة الإستقالة ..ودى ما داير أتكلم فيها كتير وكلكم عارفنها .. لأنها زى ما قال الراجل هى عاوزة ليها كتابة ؟
    وعشان ما نبتدى نطبق الثقافات دى لازم نعلمها لأولادنا السُغار ( أى مقصودة بالسين.. راحة للمصححين ) فى مدارس الأساس لأنو الناس الكبار ديل خلاس وبلغة الطب أصبحوا حالة ميئوس منها .. عشان نطلع جيل جديد ..ولا رايكم شنو يا جماعة الخير ..
    كسرة سغيروووونة ( زى كسرة البروف جبرا ..إياها ) .. خلونا النشوف آخرتا شنو ..!!!

  12. أجب على هذا السؤال : شرطى المرور يسجل ليك مخالفة تجاوز إشارة حمراء وتقول ليهو ما عندى غير خمسة وعشرين جنيه، ياخدها منك ويديك إيصال ب ثلاثون جنيه ، هل سيدفع الشرطى الخمسة جنيه نيابة عنك ؟؟ علماً بأنه يورد وفقاً لكعب الإيصال.

  13. البروف والسمار … سلاااااام وحب شديد
    اعزائي لفت نظري ملاوزة حاج سلولو والوسواس القهري الذي يظهر في تعليقو … يا زول اكتب ساي هي حصة املاء … بعدين اليغلطك ده ما دقس معانا … اكتب غلط وادفع المخالفة وامشي في غلطك … زي مخافلت المرور … ما بيحجزو منك العربية او يدوك زمن معين تصلح فيهو سبب المخالفة عشان تاني بكره يخالفوك بيها … بتاعين الامجاد كانو اول حاجة الصباح يكبو البنزين وبعدو طوالي اقرب طاره ويقطع ايصال بتلاتين جنيه ويدور اليوم كلو .
    كسره : هل تعلم انو شاعر نشيد امة الامجاد ما سوداني …لكن الشعراء يتبعهم الغاوون .

  14. أم أيمن .. سلام .. يا يكون الشرطي ده باقي ليهو ايصال وااحد ويحقق الربط بتاعو عشان يدوهو العمولة حقتو وبي كده ممكن يدفع الخمسة جنيه من جيبو عشان يستلم العمولة او كمان يكون دفتر الايصالات ده مضروب وما ح يورد منو تعريفة …
    ود الخلا .. سلام … البروف قال القصة في نفوسنا او كما قال القصة ما دستور وحاج احمد السلاوي قال نقنع من الكبار ونمسكا من شُفع الاساس .. أفرد شراعك ضمني ….
    كسرة : عسكري نقلوه من البوليس لشرطة المرور عمل ( بارتي ) ابتهاجا بالمناسبة وعرفت انه دفع رشوه ايضا ليتم نقله الي المرور اندهشت اولا وزال الاندهاش عندما رأيت أثر النعمة فيه بعد مدة وجيزة …
    انتو وين هنايا ديك سارة الضارة ولا منو كده ما عارف الكانت مخصصة في ناس الحلة الجديدة والسجانة ديك ؟
    والوجه الاخر لشرطة المرور عمنا معاوية الابجر وآخر كان في شوارع الخرطوم يمازح السائقين واصحي يا بريش … السودان كان حلو ياخ .. الله ياذانا نحنا كلو مننا نحنا ..

  15. اخي الفاتح خط
    تحيه طيبه
    انا ما عارفه اليله كتابتك دى حننتنى شديييييد

  16. خالد مدنى…
    ههههههههههههههههههههههههههههههههههه,,,رونقك الصباحى بديييييع…

    بت وراق…
    بركة اللقيتى ليك حنة فى صمة خشمك !

  17. هنالك خللاً ما
    اخي شمباتى انت ما معاى انو الليله البرف كتابته دى زى ما قال اخونا ود الخلا ماطعن الفيل صاح
    يقول هنالك خللا ما (هناك فساد وافساد )
    شوفوا الفاتح خط دى مالو الليله كلامه مهادن وبروااااااااقه
    هههههههههههههههههههههههههه معليش ما نعصر عليك شديد

  18. حاج أحمد السلاوى | رد

    ودالمدنى .. صدقنى مش ملاوزة بس ما بنحب الغلط حتى فى الإملاء لأنو علمونا كدا ( فى مرحلة الأساس بتاعة زماااااااان ) وبزعل شدييد لامن واحد يبدل الغين بالقاف أو العكس ويكون خريج ومتعلم .. عليك الله مش بتغيظ ..
    نفهم من كدا إنو شرطة المرور دى شغلة مرغوبة شديييييد .. لاكين العسكرى دا ما عارف إنو المسألة دى ممكن تسبب ليهو ضرر لقدام فى روحو وفى بيته وفى أولاده لامن يأكلهم من مال زى دا ؟..ولا الحكاية بقت اللهم أغننا بحلالك أو حرامك بدلاً من اللهم أغننا بحلالك عن حرامك..
    ونرجع نقول ربنا يجازى الكان سبب ( ود الخلا وين .. ما يسمعنى ..) ..ابوكم آدم سنّ المعاصى وعلمكم مفارقة الجنان ..
    وخلونا النشوف آخرتا شنو.. !!

  19. طلب مني شرطي المطار إبراز كرت الحمى الصفراء .. رديت: ما عندي .. قال لي جيب خمسين جنيه غرامة .. قلت ليهو … لو دفعت الخمسين جنيه ما حتكون عندي حمى صفراء فاقع لونها ؟؟ قال لي .. ما كدا .. لكن دي رسوم إستخراج الكرت .. دفعتها .. وقلت ليهو وينو الكرت؟ … قال لي ما مشكلة ما بسألوك منو ..!! طيب مدفعني ليه؟ .. رد بزهج: والله إنت عكليت جنس عكلتة .. ودخل مكتباً قريبا لبرهة وجاني طالع بكرت أصفر بإسمي وموقع من القومسيون الطبي … شنو ليكم …!!!!
    ….
    ياخ الناس ديل طيبين لكن مندسين بينهم (بعض) الأشرار… !!!! (بنفس لهجة البروف المروضة) …

    كسرة وملاح:
    يا ربي الكتل عوضية دا يكون صديق ولا زميل دراسة للبروف؟؟

  20. النروف وسماره الكرام ======== لكم التحية
    اول تبادى يابروف العساكر ديل عرفوك مابتشوف ومابتسمع من الزمن داك ونجنا مبارنك وماعارفين ؟
    ياحليل الخوة
    اب احمد
    جمى صفراء ولا مستردة ولا فوشى لازم يكون عندك كرت ( عبور )

  21. سلام ياقبيلة،،،،
    مشتاقون وبكل حروف العِّلة يا سلولو وعلشان ما تقول ليا في ياتو لغة بقول ليك بألوان الطيف السبعة!!
    يقول البروف (المروّض) بأن هنالك خلل ما…
    يا سلام،،،،،، ومن متين الخلل ده ظهر يا صحبي، وأنتا كنتا وين من زمان يا شيخنا؟؟؟؟
    قلناها من قبل ونقولها تاني وتالت الخلل فينا (نحن) في الشعب الفضيل ده، مش الشرطة دي من الشعب وإلي الشعب، وأنها في خدمته ساهرووووووون، يعني ما جابوا حاجة من عندهم ،،،،
    صححوا الأوراق دي من تاني وزي ما قال ليكم سلولو وقبال ما يرجع في كلامو، أنسو الموضوع ده ولنبدأ من الأول، ولن ننتظر لنشوف آخرتها يا سلولو لأنها معروفة ومكشوفة وشوف ليك طريقة تانية يا (سديقي)!!
    كسرة بايتة/
    زمن الناس هداوة بال وكان الترحال بالقطر درجة رابعة وكل الناس كانوفي تلك الدرجة الرابعة في القطر ولكنهم درجة أولي في الأخلاق والعفة وإيثار الآخر،،،
    تصادف أن سرقت من إحدي المسافرات (في قطر كريمي) محفضتها وصاحت نادوا لي البوليص.. نادو البوليس،،،
    فجاء البوليص علي عجل وهو يسأل الحاجة : مالك يا حاجة إن شاء الله خير!!
    فردت الحاجة وهي مغتاظة أنتو بنادوكم لي خير!!!
    أها يا جبرا يا صاحبي هل ما زلت عند رأيك بأن أسدقاءك عسل؟؟

  22. حاج أحمد السلاوى | رد

    أب احمد .. غايتو لاكين جنس عكلته ..

  23. اها يا شمباتي رايك شنو في رونق العصر البديع والمزاج الرااااايق بتاع ود الخلا ده … يكون اتغدي كسره والحلو بطيخ … شنو ليك

  24. عربية الكجر
    جفلة الحمار
    وعم عبدالرحيم
    طوح زي حجر

  25. البروف وسماره الكرام
    عليكم السلام
    المطلوب أن يفهم شرطي المرور أن الهدف الأساسي من وجوده ووجود قوانين المرور هو الحفاظ على سلامة المواطنين … وأن كل الإشارات والعساكر وربط الحزام وغيره.. يجب أن تكون من أجل سلامة المواطنين وليس من أجل الجباية … ومن يفهم هذا للعسكري إذا كان رئيسه فاهم الموضوع غلط؟ تخيّل عسكري يطارد سائق ما رابط الحزام ختى يوديهو في داهية حسب تعبيركم!
    والملاحظ أن البروف تعامل مع عساكر حضاريين لا مثيل لهم في السودان … أما عندنا فيجب أن تدفع أولا ثم تعرف ما هي المخالفة…. أما عسكري الحمى الصفراء الخاص بأب أحمد فهذه هي النوعية التي يجب مكافأتها لأنها تؤدي خدمات جليلة للناس وبرسوم التكلفة!!!

  26. خالد…هههههههههههههههههههههههههههههههههههههه…دا عصر بلا رونق او طعم !

    بت وراق…..اممممممممممم,,المعصور عذرو معاهو !

    اب احمد…..كعب كعب ومُر انت ! قبلك وحدك..

  27. فى السعودية الرشوة يمكن العن من السودان..وطبعا الشرطى السعودى ما يكره ليك الا المصرى ولو فى اى حادث الشرطى وقبل وصوله لمكان الحادث بقول الاجنبى غلطان ولو قالوا ليهو الطرفين اجانب طوالى بقول ليك المصرى غلطان.. حتى لو كان واحد من بنغلاديش والتانى من نيبال.. وبعدين ناس الشرطة بكون عندهم ايصالات خاصة ومطبوعة بطريقتهم

  28. يا أبو عفراء إنت قلت الرشوة في السعودية ألعن من السودان، خلاس ياصحبي سدأناك، لكن السؤال الهام والفارض نفسه عنوة وإقتدارا” من هم أولئك المعلمين؟؟؟؟
    ونحن من نفتخر بأننا صانعوا نهضة الخليج، أوووول إنت بأااااه!!!!
    قلنا ليكم أنتو الساس وإنتو الرأس، وإنتو سبب البلاوي وحصاوي الكلاوي، قلتوا لينا مالناش دعوة,,,,
    أهو جنت علي نفسها براقش,,,,

  29. عزيزنا ود الخلا يا كاره ذاتك … من الجميل ان تكون رؤياك واضحة امامك ولكن الضؤ الكاشف يعمي العيون عن رؤية ما هو خارج الفوكس … تراجع للخلف قليلا تتسع دائرة الرؤيا … رأي صواب يحتمل الخطأ ورأي غيري خطأ يحتمل الصواب … وليس الشعب السوداني بهذا السؤ … أو لم يكن .

  30. بيشاوي(إن شاء الله الترجمة تكون صاح للإسم) .. ديل دايرين يكونوا كاثوليك أكتر من البابا بنيديكت ذاتو .. يعني يطلعو منك قروش بس دا المهم ..!
    ود السلاوي لكن رايك شنو في عكلتت العسكري؟ طالماهو قدم خدمة لمواطن -زي ما قال أخونا هاشمو2-اليديهو المستند المقابل …

    ياسين شمباتي لقيتني كيف عليك الله .. ماختري ؟؟؟

  31. يا حليل ايام زمان والقمردينة الحنينة … شايف اب احمد اتغابى فيك العرفه يا بشاوي … سؤال سغيروونني : يا ترى هل يعود ذا الزمن ؟؟؟

  32. انت يا جبرة الناس في السودان بقو يطيرو واللا شنو ؟ الاعيرة النارية الفي الهواء دي مالها بقت تكتل ؟

  33. معقولة يا خالد مدني يكون أب أحمد أتغابي العِرفه في بشبش ، أكان أكدى واطاتكم ما أصبحت إلذا كان ناس الفمردينة بقو يتغابو العرفة في ناس البيت ناس (جداد الوادي) يعملو فيكم شنو؟؟؟
    سؤالك يا خالد ما هو (سخيير) لكن العودة ممكنة برغم أن الماضي لا يعود، ولكن إمكانية العودة لذات الزمان ممكنة إذا ما غيير الناس ما بأنفسهم!!!!
    تاااااااني!!!!!

  34. الحبيب خالد..
    براااااك وقعت فى الخية !
    لو كنت (مواظب) كان عرفت انو اب احمد ما عندو علاقة بى طارق اب احمد !
    طااااااااااااااااااااااااااااااخ…

  35. الله يخليك للزي ده انت … قلت احمد ما حاج احمد ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: