واحد من اتنين

مدخل :
مستشفي العيون الذي تود الحكومة بيعه هو المركز الوحيد لخدمات طوارئ العيون الذي يعمل يومياً دون توقف على مدار الساعة بولاية الخرطوم إذ تستقبل العيادة الخارجية للمستشفي سنوياً (ثمانية وستين ألفاً ومائتين ثلاثة وعشرين) حالة كما أن المستشفي يحتوى على عدد من العيادات التخصصية كعيادة الشبكية ، الحول، الجلكوما والجراحة التجميلية ، كما أن المستشفى يضم وحدة للبصريات تضم في داخلها وحدة لقياس إعتدال البصر وقياس العدسات اللاصقة والموجات الصوتية وتقويم البصر الذى لا يوجد في أى مستشفى عيون آخر ، كما يقوم المستشفى بتدريب طلاب اكثر من عشر جامعات إضافة إلى تدريب النواب والكوادر الطبية المساعدة كما أن للمستشفى دور مقدر في مكافحة والوقاية من كثير من أمراض العيون في كافة ولايات السودان كالتراكوما والجلوموما وعمى الجور والكتراكت ويعمل بالمستشفي حوالى 374 من الأطباء والتقنيين والفنيين والممرضين والموظفين والعمال !
مخرج :
• إذا كانت الحكومة تريد بيع مستشفي العيون فواحد من إتنين يا المستشفى ده ما بيقدم اى خدمة للمرضي ووجودو ذى عدم وجودو وأحسن تبيعو والمواطن يستفيد من قروشو يا كمان بيقدم خدمة للمواطنين .
• إذا كان المستشفى ده ما بيقدم اى خدمة للمرضي ووجودو ذى عدم وجودو مافي مشكلة لكن إذا بيقدم خدمة للمواطنين المرضى (ذى ما ذكرنا فوق) فواحد من إتنين يا الحكومة عندها بديل جاهز للمستشفى والمرضى ما ح (يتجهجهو) وطواااالي ح يلاقو الخدمات في البديل ده أو ما عندها بديل جاهز .
• لو الحكومة عندها بديل جاهز للمستشفى والمرضى طوااالي ح يمشوا يتعالجو فيهو ما مشكلة لكن لو ما عندها بديل جاهز يكون في واحد من إتنين يا الحكومة ح تخصص واطة وتقوم تشيل القروش الباعت بيها المستشفى ده وتعمل بيها مستشفي عيون تاااانى للمواطنين أو كمان القروش دي ح تحصل أمات طه ! (الحصلوا أمات طه شوية؟)
• لو الحكومة ح تخصص واطة وتشيل القروش تعمل بيها مستشفي عيون تاني للمواطنين ما مشكلة (مع أنو ما فيها منطق) لكن إذا القصة فيها أمات طه يبقى في واحد من إتنين يا القصة لحقت المطار الجديد أو كمان حصلت المدينة الرياضية
• لوالقصة لحقت المطار الجديد ما مشكلة (القروش قالو مشت مشاريع) لكن لو حصلت أرض المدينة الرياضية فواحد من إتنين يا الحكومة ح تعمل تحقيق في الموضوع وتعرف الباع الواطه منو وترجع القروش وللا صهينت وعملت أضان الحامل طرشة
• لو الحكومة عملت تحقيق في الموضوع وعرفت الباع الواطه منو ورجعت منو القروش ما مشكلة لكن لو صهينت وعملت أضان الحامل طرشا فواحد من إتنين يا الناس ديل عارفه إنو في قيامة وسؤال وكده يا كمان ما عارفه
• لو الناس دي عارفة إنو في قيامة وسؤال وكده ما مشكلة لكن لو ما عارفين يبقى واحد من إتنين يا نقول الروووب يا كمان …… (نقول الروووب) !

كسرة : الله يكضب الشينة والكسرة ما تبقى كسرتين .. !

كسرة ثابتة :
أخبار خط هيثرو شنو؟

Advertisements

35 تعليق

  1. سلام ياقبيلة،،،
    يا جبرا يا صديقي المحن والسحن بقن يمشن ويردحن!!!!!

  2. البروف و السمار الكرام سلام . .
    إنت يا الفاتح مستشفى العيون البتتكلم عنو دا يا هو ظاااتو الفي شارع النيل جنب البركس بتاع الجامعه و اللا واحداً تاني في الكلاكله و اللا الحاج يوسف يا ربي؟
    لو كان ياهو الجنب البركس داك يبقى واحد من إتنين ، يا يكون واحد من الناس الشالوهم للصالح العام خاتي عينو عليهو عشان يبني في محلو فندق سبعه نجوم ، يا واحد من ناس ( مؤتمر الخريجين ) عايز يعمل فيهو برج ( شعبي ).
    ود الخلا إزيك يا سديقي اللدود ، شايفك بقيت واحد من إتنين ، يا اقتنعت بأنو ما نحن السبب يا إقتنعت بأنو ( مؤتمر الخريجين ) هو السبب.
    تحياتي يا هندسه.

  3. يا أستاذ جبرا المشكلة إنو ولا واحد من الإتنين ، ده واحد تالت وانت الصادق ، الله يكضب الشينة أحسن الشينات كتروا.

  4. سديقي اللدود سنكلوني لك تحياتي العطرات، وماك طالبني حليفة ، لكن تصدق وأنا بكتب في مداخلتي الأولي دي (البرنجية) خطر علي بالي شخصك الكريم من دون العالمين ديل من غير أي مناسبة، اللهم إلا يكون واحد من إتنين، يا إما يكون توارد خواطر وده ليهو معناهو، ويا إما تكون ياكا إنت الزمان لا تغيرت لا تبدلت لا هزتك محنة،،،،
    تحياتي لك أخي الغالي سنكلوني، وعبرك للصديق اللدود الغائب أبكرونا ليكم وحشة والله!!

  5. البروف والسمار … دي لمة محضورة شيخنا ود الخلا واستاذنا علي سنكل … والله ايام يازمان

  6. عزيزي ودالخلا . .
    تحياتي تاني مره ألف مره . .
    والله من يوم الفاتح جبرا دا طعن الفيل ، أقول أهبشك لكن واحد من إتنين يا ما ألقى وقت يا الزهايمر يزهمر و كتر اليومين ديل.
    و الله شوق ليكم ولي ناس أبكرونا و لكل حبان القمردينه القدامى و الجدد وربنا يلمنا بيكم في ساعة خير و نيلنا جاري قدامنا تحت أقدامنا و ديل أولادنا و ديل جيرانا و بلدنا يرجع تاني مليون ميل ، ومنقو قل لا عاش من يفصلنا. و ربك على كل شئ قدير.
    و دمت يا عزيزي

  7. اخي الفاتح خط والاخوه الاعزاء
    يا نقول الروووب يا كمان …… (نقول الروووب) !
    ولو الاولى مافى مشكله الروووب الاحمر صلصته جاهزه من دمنا الفاير ولو الروووب الابيض تبقى دى المشكله لانو بيكون داير لبن والبن زايدنو بنسلين مما يوثر على شبكية العيون
    كسره
    هو نحن الشايفين ليها شنو والشفناهو عملنا بيهو شنو

  8. ويقام الماتم بمنزل الشاعر عبد الله النجيب
    بام درمان .. ولا عزاء للكيزان …
    طالما جداد البيت اتجمع كده سوقونا نحنا ناس
    جداد الوادي ونمشي لي سلفا ونغني ليهو لا داير
    إنت تحن ولا ترحم حالي إنت ليه قافل علي آباري
    .. قطرة .. قااااااااااطرة …
    والله سلفاكير لو ما فتح الابار دي السعرانين
    ديل يبيعوا النيل زااااتو ….
    سنكل .. سلام .. وحات الله من فصلنا عايش عيشة
    الهنا … ومشكلتنا اننا كنا بنقولوا نشيد ما
    دعاء .. عشان كدا ماااا استجاب !!!

  9. وجدتها .. وجدتها .. الأخ جبرا ألم أقل أن قصة بيع مستشفى العيون ليست واحد من إتنين بل هى واحد تالت .. مش لقوا ثعابين فى غرفة العمليات ..آه والله ثعابين، شفت ظلمنا الجماعة كيف ؟ وأحيل سعادتكم الى تصريحات د. كمال عبدالقادر المنشورة على صحيفة الرأى العام عدد اليوم ص 5 تحت عنوان ( بيع مستشفى العيون .. وجهات نظر).

  10. ( بيع مستشفى العيون .. وجهات نظر).
    النظر ياتو السليم ولا النظر الاليم

  11. انتو بالمناسبه (موش الثعابين ما بتشوف داخله مستشفى العيون لشنو )يكون ناس الحكومه ديل قالو ليها بنعمل ليك عملية عيون وبدل السمع يبقى شوووووووف

  12. والله انتو ظريفين كلكم ماشا الله الله يكضب الشينه الله يكضب الشينه الله يكضب الشينه

  13. واحد من اثنين يا ثوره يا طناش اذا كان ثوره فلننهض واذا كان طناش فاليوم 5 وخلاص

  14. البروووف والسمار .
    سلامات .
    لمن يكون فى مشروع حكومى ناجح (زى المستشفى دى) فى ناس حاسدين بيحسدو البلد دى على الحاجات الناجحة وبيرفعو تقارير لخصخصة تلك المشاريع وهم بيقدموا عطاءات الشراء أول ناس وبيشتروها وتتحول لمستشفى خاص . ولو مادفعت مبلغ عشرة مليون من الباب ولا تخش تكشف
    كسرة بى ملاح بامية بايت .
    إنتو العيون دى فيها رقاد والغرفة بى كام فى اليوم .

  15. الاخ الفاتح و السمار
    الحكومة دي واحد مت اتنين يا اما انو كلهم اغبياء يا اما انو البعملو فيهو دة قاصدينو
    لو كولهم اغبياء اذا ظالمنهم الغباء دة من الله و ما بنقدر نغير فيهوو دي قسمة
    ولو البعملو فيهو دة مقصود يعني كلهم عملاء ( والاتحاد السوفيتي سابقا خير دليل)
    ولو كلهم عملاء و احد من اتنين يا تكون معاهم و تريح نفسك و عيالك و تبيع بالرخيص
    يا كمان تعاين بعيونك و تتحسر على البلد البتتشرتم و نقول مع اخونا جبرا(الروووووووووووووووب)

  16. حاج أحمد السلاوى | رد

    البروف الفاتح .. أنا غايتو شايف واحد من إتنين .. يا إنت بتاع مشاكل … أو إنت بتاع مشاكل ..وتاعب روحط وبتنفخ فى قربة مليانة كوووولها قدود .. يعنى هو الباعوهو شوية ..ولا شوية .. والمستشفى دا يكون من ضمن البيعة ..وبكرة الناس تنسى موضوع المستشفى زى موضوع خط هيثرو ..
    قدامى المحاربين فى القمردينة ..إن شاء الله ملمومين كدا فى الحرم ويوم جمعة ..
    سديقى اللدود بن الفلاة ..التحول الخطير فى مسيرتك دا يكون واحد من إتنين إما إنك إقتنعت أخيراً إنو العيب مش فى الشعب المسكين الفضل إو يكون راس السوط هبشك ويكون راح ليك خط من الخطوط الراحت ..وقربنا نغنى يا حليل الراحو وخلو الريح تنوح فوق النخل …
    ويا ها دى آخرتا يا الفاتح خطوط رايحة ومستشفيات رايحة ..

  17. حشكرم جيك لا نام تو بس لوكا ما

    لو فهمتو الجمله دي تكونو عرفتو مستشفي العيون
    حيتباع مالو
    والفهم اترجم لينا عشان نفهم

    والله خطك ببقي خطوط صبرك بس يا مان

    1. بالله يا محمد علي هم عشان كده دايرين
      يبيعوهو !!! ياخي ما بصدق !!

  18. يابروف واحد من اتنين يا المستشفى بعيدة ومافى ليها مواصلات ياالصحة كلها انتهت ومافى داعى للعوينات اذا الاولى مافى مشكلة يحولوها لكن اذا التانية نحن قطرنا فات

  19. التحية لكل الحلوين هنا .. دون فرز .. قدامى محاربين وجدد
    والله ناس (هي لله) ديل رهيبين .. فعلا موقع مستشفى العيون دا فيهو حلاة فندق .. !! وحتى لو خلوهو مستشفى عيون .. 68 ألف مريض في السنة يعني الواحد لو دفع متوسط 100 جنيه دي تطلع قريب السبعة مليار بالقديم … يعني نص مليار شهرياً ..
    برضو قرشين حلوات .. بطلو حسادة وخلوا خلفاء الله في الأرض ديل يتنعموا بما كتبه الله لهم …

    لو ما عاجبكم … شوفوا ليكم ميدان تحرير … لو رجال !!!!

    كسرة:
    الله يستر على جامعة الخرطوم .. ما يمشوا يبيعوها كمان !!!!

    1. اتخيل انو داخليات جامعة الخرطوم معروضة
      للبيع ويوم دقوا الطلبه ومرقوهم دغش
      داك كان المشتري جاي يعاين الموقع !!!
      ومستشفي الخرطوم برضو معروض بعد ما
      يقسموهو زي ما قسمو البلد بس قسمتو
      حتكون شرق غرب والمضحك قالوا عشان
      يفتحوا شارع لكبري المسلمية يعني يكون
      بين ش / المك النمر والمسلمية 20 متر !!
      الهادي الضلالي قال هسع الناس ديل كان
      غلطوا علينا يشتكوهم لي منو ؟
      والطيب صالح قال من اين اتوا هؤلاء

  20. ياسين شمباتى | رد

    البروف والاحباب…سلام….
    امانة قصة البيع دى عاجبانى كيف !!!

  21. الإخوة الأعزاء
    السلام عليكم يا اخوان عاوز أعرف حاجة واحدة بس البلد دي ماشية علي وين. انهيار وتردي في كل حاجة، عاوزكم توروني نحن ناجحين في شنو؟

  22. سلام للقبيلة جديدة وقديمة قادمين وقدامي ،،،،
    والله يا بروف لاغيرت مكنة ولا هزتني محنة ، ويا نا الزمان يا ناس!!!!
    تعرفوا يا أسدقائي الأعزاء وقعت علي حكاية المثل المصري وما كنت فاهم معناه إلا بعد أن أعيتني الحيلة ولقيت نفسي عايشو صورة وصوت، والمثل القديم سائر: تحلف لي أصدقك أشوف أمورك أستعجب!!!!
    واما يا سديقي اللدود سنكولني يا عازف الأوتار وعاشق الوحدة والوطن الواحد الحدادي مدادي فأنت وأفليقا فلنا موعد ولقاء قريب مع إرهاصات الوحدة الممكنة، والتي سيكون لها وقع ولكن أكثرهم للحق كارهون،،،
    أين هؤلاء الثلاث سهيل وأبكرونا وبنت مصطفي نورا،،،،،
    والزمن الجميل سيعود لو…….

  23. والله يابروف الكسرة التانية دى مفروض يدوك عليها اوسكار

    مبالغة

  24. البروف جبرا والاحباب :
    يا جماعه عاينو للنصف المليان من الكوب
    ما زال هناك ملايين الاحسبونيين واقفين فى صف الغنا السريع واهو مستشفى العيون حيحل ليهم مشكلة كم واحد !!! كده باقى كمممممممم يعنى زى 850 احسبونى لسه ما غنى .. يلا بعد يتباع شارع النيل الازرق يقبلو على شارع النيل الابيض وشارع نهر عطبرة وشارع نهر النيل الكبير يكون فضل بس زى 5 احسبونى بس ما غنو وديل يبيعونا نحنا ونخلص مره واحده ..
    يا جماعه اتفاءلوا لسه فى اصول كتير ما اتباعت يعنى حيخلونا كم سنه تانى مش دى نعمه برضو ؟؟
    سمعت تحت تحت انو الثعابين الظهرت فى غرفة العمليات مامون حميده كان شايل منها قروش عمليات مويه بيضا وعمل نايم قامت اتظاهرت . ههههه
    تحياتى للاحبه جميعا

  25. السلام عليكم ، البرف و الاخوان ، بى مناسبة الذكريات اين بتاع البطيخ بيقوفتش و صاحب البرنجيه د/ ياسر اما بت مصطفى نورا حتجيك ناطه فورا ، و بمناسبة العيون و ود الخلا و الرجوع لمؤامرة الخارجين و الثعابين: يقول لك واحد ثعبان اعمش كان بيحب ليهو ثعبانه ، قام مشى مستشفى العيون ركب ليهو نضاره و لا عدسات ملونه ، لما رجع لقى نفسو كان بيحب خرطوش !!! سؤال ثقيل : وقروش الحاجات الاتباعت وينى ؟؟؟ …………..عجبى

  26. أ خونا الفاتح عملا يأحكام المادة ٨٩ من الدستور الطلع ما من شرع الله في شئ ركبت الفهامة وخليتها راااااكبة طواااالي لقيت نفسي بليد ما فهمت اي حاجة وقلت الرووووب

  27. جبرا :
    ايه رايك نوافق على بيع مستشفى العيون بشروط :
    تتباع فى مزاد علنى كبير فى الساحه الخضرا ويحضرو الشعب بواقع من كل حته سته انفار .
    القروش تتلم وتتخت رزم خمسينات كل رزمه فيها مليون جنيه بالقديم .
    تتكون لجنة من كل حته سته واى زول فى حتتو معاهو ستتو يوزع لناس الحله حقهم ناشف .
    اى زول يقول ليك مشروع ولا صندوق ممنوع .
    خلونا لاول مره ناكل حقنا ناشف مش هو مال الشعب . ادو الشعب منو حته والباقى ينفعكم بالهنا .
    بعدين الشعب ذاتو يكون حساس شوية يعنى القصه تتوزع جغرافيا
    ناس الخرطوم يشيلو قروش بيع عفش الخرطوم وناس امدرمان برضو يشيلو قروش بيع عفش امدرمان بس يدوهم فرق لانو الخرطوم مقيمه وغاليه شوية .
    بعد فترة ممكن نلقى اعلان بيقول :
    مواطنى امدرمان الكرام سيتم مساء الغد باستاد المورده بيع بيت الخليفه فى مزاد علنى واى زول ما استلم حقو فى بيع مبنى البلدية الاثرى يجيب ما يثبت عشان يدوهو حقو القديم والجديد .
    ايه رايكم ؟؟

  28. يا خوفي احنا الشعب السوداني زاتو يبيعونا واحنا ما عارفين هههههههههههههههههههههههههههههههههههههههههههههههههه ياربي ح بييعونا ب الدولار ولا اليورو ههههههههههههههههههههههههههه تعيش كتير تشوف كتير

  29. أخونا الفاتح والجميع سلام
    غايتو أنا متعرف لكين واحد من اتنين يا اما الحكومة تنقلب ولا تنقلب …..
    وبعدين ياسنكل الكلاكلة مالا ..
    بالمناسبة هاكم دي
    هل من الصدفه أن يكون مدمر ليبيا معمرها
    وقبيح تونس زينها
    وجبان سوريا أسدها
    ومفسد اليمن صالحها
    وملعون مصر مباركها
    والأغرب من ذلك أن يكون نذير السودان بشيرها
    وضرر السودان نافعها
    وعطش السودان كيزانها
    ومارض السودان متعافيها
    واوع من سفر الطيارات قالو السفر اليومين دي بصات سااااكت …

  30. السؤال من هو الشاري ؟؟؟ مش زيتنا في بيتنا

    اكيد هو واحد نفعي يكسب و يقسم مع الحكومة

    و الله نحنا المساكين و بندعي الغباء

  31. البروف و شلته الكريمة السلام والإكرام
    قبل ربع قرن تقريبا كنت أسكن بجوار مستشفى العيون في البركس – وكنت أمر علي المستشفى كل يوم لأن احد أقربائي كان يعمل فيه – أو بالأحرى يدرس فيه لكي يصير مساعد طبي عيون- وكنت أجده ملما بتشريح العين وأمراضها و كأنه في كلية طب جامعة الخرطوم، وبالإضافة لدور المستشفى التعليمي تسنى لي أن أتابع عن قرب دوره العلاجي – ولم يخطر ببالي أبدا أن يأتي يوم يفكرون فيه في تدمير هذا المستشفى بدلا من إعادة تأهيله أو ترقيته إلى جامعة – وهو في الحقيقة أفضل من كل جامعات الإنقاذ في مستواه – ولكن المشكلة أن (المستعمر) الذي يفترض أنه استعمر البلاد لمصلحته كان يفكر في مصلحة المواطنين فيختار الأماكن المناسبة للأشياء المناسبة – فيبني المستشفى في منطقة هادئة قبالة شط النيل لراحة المرضى دون أن يفكر في أن هذه المنطقة سياحية وأنها قد تجلب دخلا بالدولار – للحكومة وليس للمواطنين- وهذا يعني واحد من أثنين : أما أن المستعمر – الذي ظنناه – هو صاحب البلاد وأن من يحكم الآن هو المستعمر أو أن صاحب البلد لا يهدف إلى خدمة مواطنيه وأولاده وأحفاده ويظن أن الدنيا تنتهي بانتهائه – هذا إذا انتهى قبل ظهور عيسى – فإذا كانت الأولى فالروب روب وإذا كانت الثانية فالروب (دو شامبر)

  32. طارق بابكر احمد عبيد | رد

    سلامات يا ودعمي ،
    واحد من اتنين وكسره من كسرتين ده شبيحه سوداني عدييييل

  33. الحبيب

    لا تعليق

    لنا الله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: