القال كده منو؟

أموت وأعرف اسم الكوكب الذي يعيش فيه السيد وزير المالية ؟ فالرجل (قطع شك) ما قاعد معانا في (السخانة) والرهق والغلاء و(الفلس) والتعب النحنا فيهو ده وهذا واضح وظاهر وجلي في التصريحات التى يطلقها بين الفينة والأخرى .. فقد صرح سيادته يوماً ذلك التصريح الذى سار به الركبان وتداولته المجالس والأسافير ذلك التصريح الذى دعا فيه أفراد الشعب السوداني (الفضل) إلى التقشف وذلك بالعودة لـ (الكسرة) و(العواسة) !
وقد طالبنا حينها من (الشعب الفضل) الإمتثال لدعوة السيد الوزير وترك أكل (الأجبان الدنماركية) و (المربات الفرنسية) و(الألبان الهولندية) والفواكه المستوردة و (الطواجن) واللحوم (الضانى) المشوية والمقليه والمتبلة والمهرية والسلطات والمكرونات (الحلزونية) والإكتفاء بأكل (الكسرة) الذي لا يعلم الوزير (ويعلم كيف وهو في كوكب تاني) بأنها أغلي سعراً من (المايكروعيش) الذى تنتجه المخابز !
لم يمر على تصريح السيد الوزير وقت قصير حتى صرح لنا (من كوكبه) تصريحاً (يقول لبتاع الكسرة شنو) إذ قال (بأن توظيف الخريجين أصبح عبئاً على الدولة وأن الدولة لن تستفيد منهم إذ ليس لديهم شغلة أو فكرة عن أى حاجة!) ! السيد الوزير لا فض فوه ينعت ويصف الخريجين بأنهم (ما عندهم فكرة عن أى حاجة) .. يعنى بالعربي كده (ما ناقشين حاجه ومستواهم تعبان) ؟ العبد لله يعتقد بأن هذا التصريح قد أراد من خلاله السيد الوزير بأن يرسل رسالة للمجتمع تقول بأن فرص التوظيف موجودة (وهى بالطبع غير كذلك ) رامياً باللوم على الخريجين وضعف مستواهم ولسان حاله يقول (لو كنتو شطار كان شغلناكم) ! لكن القصة طبعن ما كده ! فبتصريحه هذا إنما يعلن صراحة عن تردى مؤسسات التعليم العالى وفشل ما يسمى (بثورة التعليم العالى)وعدم قدرتها على تخريج طلاب مؤهلين تستفيد منهم الدولة لا أن يكونوا عبئاً عليها .
بعد هذين التصريحين إعتقد العبدلله أن السيد الوزير سوف (يوزن تصريحاتو) قبل أن يدلي بها لكن عادت حليمة لعادتها القديمة وها هو يتساءل مستنكراً في تصريح له أدلى به قبل أيام (منو القال في ضائقة مالية؟) ثم أضاف (كيف يعني الناس ما قادرة تاكل؟!) والسيد الوزير في دى عندو حق فجميع سكان الكوكب الذي يعيش فيه يأكلون (ما لذ وطاب) ويسكنون (ناطحات السحاب) ويتعلمون في مدارس وجامعات (مش زى حقتنا الهباب) ثم يجدون الوظيفة في الإنتظار دون الدخول في لجان الإختيار ! ليقبضو ما شاء لهم الله من مرتبات ومخصصات ويمتطوا فاره الجياد من العربات ثم يتزوجون ما طاب لهم من النساء !
نعم للسيد الوزير الف حق في أن يوصينا بترك أكل (الأطايب) والإتجاه للعواسة و(أكل) الكسرة ثم له ألفين حق بأن يتساءل مستنكراً (كيف يعني الناس ما قادرة تاكل) فالسيد الوزير يعيش في كوكب (المسئولين) الذى يدور في فلك (الترطيب) والذي يبعد عن كوكب (الشعب الفضل) ستين مليون سنة ضوئية !

كسرة:
في حوار السيد الرئيس التلفزيوني الأخير وفي سؤال عن المخرج من الأزمة الإقتصادية الآن؟
أجاب سيادتة (في الدقيقة 29 و40 ثانية من اللقاء) مقراً بوجودها : الأرزاق بيد الله !
أها يا سعادة (وزير ماليتنا) .. إن شاء الله تكون عرفتا القال (كده) منو؟

كسرة ثابتة :
أخبار خط هيثرو شنو؟

25 تعليق

  1. السلام عليكم ، البرف و الاخوان ، نسجل قبال ناس ود الخلا و حاج السلاوى ولنا عوده …………….عجبى

    1. النعمان الحسين | رد

      بصراحه شديدة الشعب السوداني يستاهل اكتر من كده
      لانو ممكن يطلعوا الشارع وتخرج الثورة الشعبية ضد هذا الظلم الي ان ترد المظالم لهذا الشعب

  2. كلامة صاح لانة مستوى دخل الفرد اعلي من مستوي دخل الفرد في السويد ..المشكلة الشعب عندة فقدان شهية:: يا ربي يكون السبب شنو؟؟
    اخبار المسبك شنو؟
    الباعة منو ؟ و الاشتراة منو؟

  3. السلام عليكم ، البرف و الاخوان ، الارزاق بيد الله مؤمنين بيه ، والنهب بى يد منو ؟ قال لك موش بس مستشفى العيون لكن شارع النيل كله اتباع ، بس البيع حيظهر تباعاً ، عشان الناس ما تدبرس ، و فى الوكت ده يكونو شافو ليهم بيعه تانيه ، سؤال عجيب : جنينة الحيوانات وينى؟؟؟ ………… عجبى

  4. الخوف يبيعوا الشعب الفضل …
    حيقابلك واحد لابس عقال يقول ليك انت فلان الفلاني ؟ تفتكر الحكاية فيها فيزا, يقول ليك : انا اشتريتك من الجماعة ديل و هي دي شهادة البحث……

  5. ود المبشر سلام عليك ، ماسمعت بى : عبداً بى سيدو و لا ود عرباً مجهجه ……………. عجبى

  6. بروف والشباب جميعا مرحبتين حبابكم
    نفسكم تعرفوا اكوكب الزول بتاع الماليةده وين ؟؟؟؟؟
    بسيطة ا !!ينما وجد الفساد والمفسدين فذلك كوكب المؤتمرية والمتأسلمين.
    واينما وجدت الضنك وعزة النفس التي لا تلين فذلك كوكب أهلنا الطيبين الذين يمووتوا ولا يمد يدهم كما يفعل الراقصين , وهنا الفرق ما بين المفتتين وبين من يبحثون عن ما الذي جرى لخط هثرو والاقطان. وشتان ما بين كوكب اخوان الشيطان , وكوكب شعبنا الهمام.

  7. التحية والاحترام
    هو اصلا فى شغل عندنا بدون واسطة وبالطريقة العادية؟؟ واحد قال لى مشى معاينة واللجنة المحترمة وعشان تزحلقه قربت تساله اسئلة من ضمنها
    كم سمكة بلطى فى البحر وبكل دقة؟؟
    ما اسم ابن جار من الغرب لسفير البرتغال فى نيكاراجوا؟؟
    والاسئلة التعجيزية دى طبعا عشان فى مكالمة جات للمدير بحجز الوظيفة ذاتها لنجل شخص واصل

  8. سلامات للجميع والله وقفت زمن ما عارف اشارك بي تعليق شنو احساس بانه كتر كلامنا استاذن استاذ الفاتح والاخرين في ان اكتب مقالة صغيرة عن احساسنا شكله كيف ونحن في البلد دي .

    السودان = بيت عزابه كبير
    الأمل في انه الحالة العليها بلدنا دى انصلح يحتاج لزول يفرط في تناول جرعات التفاؤل وحبذا لوكان طيب لدرجة العبط ويفضل الهبل أحيانا دة ماقنوط لكن لأنه المحتاجنه كتير انه نتغير نحن حتى بعد داك نغير غيرنا ؟
    كتير جدا بحس إننا في البلد دى أشبه مانكون ساكنين في بيت عزابه كبير ( وبيت عزابه دة قلته لضعف المسؤولية العامة فيى99.9% من تلك البيوت وعدم الاهتمام لا بالبيت ولا بالغير) ، أضيف كمان البيت دة نفسه تخيل انه ماسورة الحوش محلوجة ليها يومين زول شغال بيها مافى إضافة الى انه (البلاعة ) بتاعة الحمام العزابة نسو محلها وين من كثرة وطول فترة عدم شطفها آخر مرة قبل 8 سنين بعد بتاع الجبكسين مازلاهم زلة كلب في حي فلاته المهم أضيف للإهمال دة انه السادة العزابة ديل حرامية يسرقوا من بعض سرقة الكحل من العين يعنى دقست ماتلوم إلا نفسك كما انه كل يوم داخل زول ومارق زول تانى وجنسيات مختلفة وكمان ولا يوجد حصر للعدد أخر تعداد مانهائى لأنه اخو سيد البيت باع نص نصيبه في البيت بى العزابة الفيه لاخوه الكبير وسافر ليبيا قبل الثورة وهسا جاء يد وراء واليد الثانية ذاتها ماف عشان تكون قدام والمأساة ماهنا بس انه الزول بى بناته ربنا يرحمه توفى مؤخرا من الهم وكيف يعيش فى بلد اخير ليبيا ، المهم انه البيع لاخوه الكبير تم بدون أوراق( اخوي وأخوك) والبيت بقى ورثة هسا طبعا ماف ورق ، والاخ الكبير زول معاشى تمانينى كفيف وعزير ( مشلول يعنى) كمان هو برضو ولادتو بنات ساااى في صعوبة في تعاملهم مع العزابة يعنى.
    السادة العزابة مامشكلتهم المطوحة فى الايجار بس يعنى وجرجرة عمك شهرين ورا شهرين فى الإيجار بل اكبر بأنه ناس الحي إلفيه بيت العزابة قالوا انه في حركات مشبوهة في البيت خاصة بالمساء وقاموا ناس الحلة اشتكوا العزابة لناس الهناى وناس الهناى ماعملوا حاجة لأنه تحت تحت جات أخبار انه في زملاء من النظام العام ساكنين مع السادة العزابة ( يعنى الحتة دى بالذات مابتشبه سرقة العساكر لأجهزة الطلاب في جامعة الخرطوم بعد اقتحامها – يعنى لو كنت طالب وعامل فيها مثقف داير تاخد اجراء قانونى وتفتح بلاغ فى اقرب قسم للداخلية او الجامعة وقت وقوع الحادث تمشى القسم لى منو وتقول ليهو شنوا مادام زول القسم زاته ياهو الجاك فى الجامعة وشال جهازك ) ، خلينا مع العزابة الطلعوا مسنودين بالقانون ديل الا انه ابداعهم ماوقف هنا كيف يعنى ؟؟؟
    تخيل انه السادة اجلهم الله العزابة بصلوا العشاء جمااااااااااعة وفى برش فى الشارع عديييييييل وماكدة بس الصلاة بعدها فاتحة انه ربنا يهدى جميع أهل الحلة ويهدى سرهم بس تخييييل ( التراويح في رمضان كمان ) يعنى مكملين الدين للنهاية ( دة طبعا قبل الحركات المشبوهة بى زمن معقول حسب فقه الضرورة بتاعهم – يعنى ذى الشغالين بمبدا ما لله لله وما لقيصر لقيصر عكس مبدا كل شي لله )(يعنى منو فينا ماسمع بمشروع سندس الزراعي جنة المغتربين ) المهم برضو سيد الكان دكانه بقى فاضى ذى دكاكين تجار العملة ، العزابة ديونهم خشت فى راس المال والبلاغ بتاعه شدة ماطول لما سيد الدكان شاكى بضرورة تدخل المحكمة الجنائية راجل بسيط طبعا مافاهم قانون لانه لو فاهم ماكان دينهم اصلا.
    لو انت ذاتك بقيت مسئول عن حل المشكلة دى يعنى اهل الحلة تنصحهم بى شنو ويجو من ياتو مدخل للعزابة القانون وجربو لقوهو مع العزابة ، بالنصح والارشاد والدين قلنا ليك صلاة عشاء وجماااااااعة فى برش فى الشارع وكمان فيها فاتحة هداية وتهدئة سر (ورمضان تراويحه بى الاجزاء كمان ) ، امشو لعمك سيد البيت عمك مشلول وعميان والولادة بنات بس والبيت ورثة ومشاكل مع زوجة المرحوم فى انه غاشى راجلها وماكل حقه وشوية كدة تصل المحكمة ( يعنى عمك كان داير اتفك ذاتو وابيع مافى طريقة البيت ورثة ) ( حاول تلقى لعمك الراجل الطيب الغلبان دة حل معاك اثناء مفاوضاتك) ، والعزابة نفسهم مشكلتهم انه مافى ثقة بيناتهم حرامية دى هواية يعنى كيف تلقى ليهم طريق لارضية تفاهم مشترك ( كلام كبااااار صاح) ويأمنو بعض كيف ، المهم حاول أصل لحل بأسرع مايمكن قبل الخريف لأنه البيت ماعنده مصرف العزابة مابفتحوه علشان الموية تمرق فى الخريف البيت ببقى مفاعل باعوض وملاريا ذى الخدمة الوطنية مابتستثنى صغير ولا كبير من ناس الحلة الغريبة الا العزابة بس نزلة ساى ماتجيهم ( اقتنع جزء كبير من أهل الحلة بأنه العزابة ديل قدرهم عديل وبستشهدوا خاطئين بانه كيفما تكونوا يولى عليكم )
    لو كنت مسئول عالي المستوى وعندك خبرة في قيادة مفاوضات مع جماعات مختلفة يعنى خبرة ذي خبرة المستشارين بتاعين اللجنة الشعبية ديل حاتوصى توصية بسيطة جدا وبطرف لسانك لنجاع الحل حسب وجهة نظرك طبعا بأنه نوصى عمك ان يزوج بناته لمن يرغب في العزابة بدون مهر وبدون مستلزمات زواج مكلفة تيسيرا للزواج ومن مبدأ (اقلهن مهرا أكثرهن بركة ) المنطلق بتاعك ديني طبعا ( شوف لمن يرغب رفعت أسهم العزابة كيف وغطست حجر بنات عمك كيف الاصلا غاطس)
    يعنى عمك بدل إيجار وجرجرة ومشاكل الورثة وزوجة المرحوم المنكدة عليه عيشته يبقى فيها بنات مهملات وشفع مستقبل واضح انه عامل كيف ماداير شرح حتى ، (وين أهل الحلة من حلك دة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟)
    بعد طباعتك للمقال دة وتعريضه لأشعة ( اكس) ( أشعة شنو هو الناس في مستشفى بحري تموت عشان ماف أوكسجين هواء الله دة بقى في البلد دى فيه أزمة الحمد لله على كل حال يعنى لسه قبل مرحلة الخطر الحقيقي لا حقنة لا تخدير لا عملية لا قروش، علق بينك وبين نفسك على الحادث دة حاتلقى نفسك تنقنق واكثر الكلمات استخداما فى نقنقتك كلمة كيف – للإجابة على نقنقتك تم تكوين لجنة لكن لسة فى انتظار انبثاق لجان أخرى يعنى اللجنة والمنصرفات شنو الموضوع ماواضح والتقصير اوضح ولا هو تخدير للناس البرة اكتر من المرضى المحتاجين تخدير بس انتهى وماحاتنتهى دهشتنا فى بلد ولدنا فقط للاندهاش فيه الغريب برضو لا اندهاشنا بنتهى ولا الحاجات البتدهش برضو ) ، في حالة عدم الأشعة بتاعة ( اكس ) اكوي الورقة بمكوة فحم بس حاتلقى النتائج التالية:
    أهل الحلة = الشعب المغلوب على أمره
    العزابة = حضرات السادة المسئولين
    سيد البيت = ظاهر مافى داعي تكوى تانى
    زوجة المرحوم = دولة الجنوب
    ( البلاعـــــــــة ) = التعدي على المال العام
    الماسورة المحلوجة (مكسورة )= التعليم ، الصحة ، الغذاء ……..الخ (في حال مكسور اكتر منهم )
    سيد الدكان = الديون الداخلية خاصة اسأل من مديونيات الشركات الخاصة الدولة تتعامل معاها كيف
    سرقة العزابة من بعض = تنقل الوزراء والمحسوبين من وزارة لأخرى أفضل منها بعد إفراغ التي قبلها
    الملا ريا = الفقر والمرض والجوع والأمية
    مسئول عالي المستوى = كل المستشارين وبالأخص المستشارين الجدد
    توصية المسئول = القرارات اليومية للسادة المسؤلين هي في وادي ومشاكل الناس في وادي ( برج بورتسودان القال المسئول عنه أنه حا يضعنا فجأة كده بى خمومنا دة كلو في مصافي آى مصافي الدول المتقدمة يعنى ناقصنا برج ونبقى دولة متقدمة ويشجع المستثمر بأنه الاستثمار في البرج ولا المدينة دى حايحقق الكلام البقول فيه دة اها ماتوصية بالله)
    رئيس اللجنة الشعبية = مرق اجيب اشتراكات الصيوان

  9. من أهل الحلة فريق ورا ولى هسة ماجا راجع

  10. اهو شفت رئيس الللجنة الشعبية دة هو وزير المالية بالظبط الناس في شنو وهو ماشي يجيب ويعمل شنو كانه فعلا من كوكب غير

  11. كوكب منزه في علوك كيف يجهلوك …
    وزير المالية ده زي السواق البقع في الحفر
    ويلوم ناس الطرق .. لحدي هسع ما عمل أي شئ
    يتفادي بيهو حفرة … ( مع الاعتذار لسايق
    البوباي ) لانو كان بيرمي الاشارة جاي ولا جاي
    الزول ده وهو لسع جديييد كرت كرتونة في لقاء
    تلفزيوني ومعاه محافظ بنك السودان كان بيختف
    الاجابة من المحافظ ويجاوب بأنو انفصال الجنوب
    وخروج ايرادات البترول ما ح يأثر في الميزانية
    وكتها قلنا الزول ده يا مسيلمة يا هبنقا
    واصلوا ما خذل احتمالاتنا ..
    امهاتنا كلهن كان مصاريف بيوتن 30 الف في
    اليوم قبل الانفصال ولحدي هسع نفس المصاريف
    هسع أمي دي ما وزيرة مالية ضايعة ساااكت !!!

  12. عليك الله يا بروف فلانة قالت كدة !؟
    الارزاق بيد الله ! ونعم بالله ,,والله باذنه وحوله ح يذلكم يا غجر يا انجاس !
    حسبى الله عليهم…

  13. كوكو..سلام….
    لقيتك بمبى لكن ! اضرب الحمام الميت..

    علاء…سلام..
    الزعلك منو يا دا !؟

  14. والله يا جماعه أنا وزيرنا دا ماعارف اسم منو ولا بعرفو
    لكن من أقواله دي أظن انو يكون ماري أنطوانيت صاحبه المقوله المشهورة “إذا لم يكن هناك خبزٌ للفقراء.. دعهم يأكلون كعكاً”

  15. بروف و الشله / سلام

    فىواحد قبل كده كتب فى الجرايد و قال انو جعان و ليه يومين ما اكل ، الجماعة قالوا ليه ما تتكلم ساى لو الكلام دا صاح جيب مستنداتك و تعال و و زولك للان ما رجع.
    ماعارفين وزيرنا بفسر الجوع دا كيف !!!
    عموما الظاهر ولاة الامر كلهم ( فاقد تربوى ) بالرغم انهم كلهم دكاترة و بروفسيرات .
    معليش عين و صابتنا.
    كسرة
    اخبار الحريات السبعة شنو؟؟؟؟

  16. متعك الله بالصحة والعافية وزادك من نعمه نعما

    كلام في محلو وفي الصميم
    ولكن ………. اذا ناديت حيا ولكن لا حياة لمن تنادي

    وزير المالية وأمثاله لا يحصون ولا يعدوا

    وكل منهم يزداد مدا في ضلاله وتحديه للمغلوب على أمرهم المواطن البسيط المسكين

  17. تسلم حبيبنا الرائع الفاتح جبرا

    انشاء الله وزير المالية والزيو كتار يحسو ويخافو حساب ربنا في البسطاء والمغلوبين على امرهم يوم لا ينفع مال ولا بنون

  18. سلامات ياسين تصدق الزعل جماااااااااااااااااااعي حتي من انفسنا لانه العلينا ايوة نعم ماقايمين بيه لكن يجي سيادتو اطال الله بقاءه يزعلنا من اي شي غير انفسنا والحمدلله

  19. جبرا والسمار .
    سلامات .
    هو الموضوع كان شنو ؟…
    آآآآآآآآآ الكسرة والعواسة .
    الله فى …

  20. تعرف ياجبرة قصتك دى ذكرتنى بقصة البابا لمن زار اثيوبيا ايام المجاعة ديك بتاعت بداية الثمانينيات ..قالوا شاف ليهو طفل هيكل عظمى بس قال ليهم ده مالو؟ قالوا ليهو ماقاعد ياكل! فاقترب منه وقرصه فى خده بحنان مسيحى (كان لقى خد ينقرص) وقال ليهو بكل ابوية انتا لازم تاكل!!!
    اما اخونا علاء …تعرف انا من زمان كنت بفكر انو السودان بيت عزابة ، واحسن وصف قالوا لى واحد صاحبى (انو البلد جبانة وهايصة) ملحوظة : جبانة = مقبرة
    دمتم ايها المبدعون

  21. لا لا لا لا ياحنين الموضوع كان العواسه والكسره
    ترتيب اولويات العواسه اول وتانى يطلع كسره يطلع بطيخ ما مهم

  22. الأخوة الأفاضل القدامى والجدد ….أنقذوني… اشفعوا لي لدى البروف ….تعليقي دائما في انتظار الموافقة بالنشر بالرغم من أنني من القدامى.. فقد حجبني البروف لأنني أرى مسألة (خط هيثرو) تمام الإنصرافية والطعن في ظل الفيل

  23. هاشم..سلام..
    امكن دخلت اسم المستخدم او الايميل خطا !
    طوااالى جارى على الحجب والرؤية ! شكلو الغبار اثر عليك ! كع
    جنس طعنى هو لكن !

  24. سوداني مغلوب علي امره | رد

    الاستاذ / الفاتح جبرا
    اولا : ابناءهم خريجين جامعات في الدول الاوربية ( برضوا مانافعين )
    ثانيآ : بحساب من (الشعب السوداني )
    ثالثآ : الوزير ذات نفسو ( ما ناقش ابو النوم ) عقله جوفا كفؤاد ام موسي ) او بالمثل السوداني ( دلوكة ام الحسن )

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: