والله حيرتوووونا

قبل عدة أيام كتبنامقالاً بعنوان (القصة ما دستور) أوضحنا فيه أن الدساتير إن لم تصان ويتم العمل بها والتمسك بنصوصها ومبادئها تصبح غير ذات فائدة ويستوى فيها أن يكون الدستور علمانياً أو إسلامياً أو حتى بوذياً وكان قد دعانى لكتابة ذلك المقال هو أن هنالك جهة تسمى (جبهة الدستور الإسلامي) بوضع وثيقة (دستور إسلامى) أمام طاولة الحكومة !
حقيقة لم يدخل في راس العبد لله بعد 23 سنة (ثانوية عامة) أن نكون قد ظللنا محكومين بدستور (غير إسلامي) بعد كل هذه الشعارات والهتافات والشنو ما بعرف وقلت في داخلي (ناس جبهة الدستور ديل ببالغوا ساااى) معقولة بلد رافعة شعار الإسلام ليها 23 سنة تكون كل المدة دى لا تحكم بما أنزل الله ؟
هل هذا معقول ومقبول علي الرغم من أمر الله سبحانه وتعالى الوااااضح بالتحاكم إليه وتحكيم شرعه وتحريم الحكم بغيره كقوله تعالى ( وأن احكم بينهم بما أنزل الله ) : المائدة 49 وتحذيره جل وعلا من التحاكم إلى غير ما أنزل الله كما في قوله عز وجل : ( ولا تتبع أهواءهم ) المائدة 49 بل التحذير من التنازل عن شيء من الشريعة مهما قلّ كما في قوله تعالى : ( واحذرهم أن يفتنوك عن بعض ما أنزل الله إليك ) آية 49
الآن فقط عرفت عرفت حقيقة المسألة وذلك بعد أن قرأت اليوم فى إحدى الصحف خبراً يقول : قطع السيد أحمد أبراهيم الطاهر (رئيس المجلس الوطني) بأن الدستور القادم للبلاد سيكون دستوراً دائماً وليس إنتقالياً وقال أنه حان الوقت لتطبيق الشريعة الإسلامية بالنص بعد إنفصال جنوب السودان .
إنتهي تصريح السيد رئيس المجلس الوطني والذي فهمت منه (والفهم قسمة) أن هنالك شريعتين .. شريعة بالنص .. وشريعة (أم من دون نص) .. للحظة قررت أن أتوجه نحو مكتبتي التى تضم بعضاً من كتب الشريعة والفقه لمراجعتها والبحث فيها عن أنواع الشرائع الإسلامية علني أجد شريعة (أم بدون نص) لكنني بعد أن ذهبت عني دهشة (التصريح) عدت لأراجع حصيلتي المعرفية الإسلامية لأجد أن هنالك شريعة واحدة منذ نزول الوحي على نبينا الأمين وحتى قيام الساعة !
لقد أثلج صدري كثيرا هذا التصريح الذي أطلقة رئيس المجلس الوطني بأنه قد حان تطبيق (الشريعة بالنص) فخلال الفترة التى لم نطبق فيها (الشريعة بالنص) عم الفساد البر والبحر (والجو كمان) فكثرت حالات الاختلاس المالي المباشر من الدولة والمؤسسات العامة وأمتلأت تقارير المراجع العام بحالات الإعتداء على المال العام ، وإنتشرت الرشوة والمحسوبية و(الكومشنات) وتم إحتكار فئة محدودة من رجال الاعمال والاشخاص للامتيازات التمويلية من الجهاز المصرفي وعانت الخدمة العامة من التمييز رغم التساوي في المؤهل وأصبح التمييز على أساس العرق والجهة في التعيين في الوظائف العامة بالدولة شيئاً مألوفاً وإستشرت ظاهرة الثراء الشخصي المشبوه أو غير المبرر، خاصة لمن هم في الوظيفة العامة وأصبح للمسئولين شركات وبيزنس لا يخفونها مما جعل الفساد قضية عامة تلوكها الألسن في المجالس ويتم إنشاء مفوضية لها .. لذلك يا سيدى رئيس المجلس الوطنى (لا فض فوك) إني أوافقك الرأي تماما لقد حان أوان تطبيق الشريعة (أم نص) حتي يرعوي كل من تسول له نفسه العبث بمقدرات هذا الشعب الذي عانى كثيراً خلال الـ23 سنة الماضية التى كنتم تطبقون فيها الشريعة (أم من دون نص) !.

كسرة: والله حيرتونا !

كسرة ثابتة:
أخبار خط هيثرو شنو؟ وإن شاء الله بعد ما نطبق الشريعة بالنص (يتلقي) !

Advertisements

29 تعليق

  1. و ما فى شريعه بالوادى

  2. الشريعة بالنص والشريعة بالشنقيطي والشريعة بالوادي وهكذا!!!!!

  3. السلام عليكم ، البرف و الاخوان ، كدى النسجل البرنجيه اول وبعدين نرجع تانى …………… عجبى

  4. السلام عليكم ، البرف والاخوان ، البرنجيه قطعه اب احمد ، القصه ما شريعه ، القصه تطبيق الشريعه ، على الط لو طبقنا اى نظام ان شاء الله حكم قراقوش ، حيكون احسن من الفوضى نهب اكل تماسيح البر سماسرة شارع النيل ، تخيل ردموا النيل قال شنو عشان يوسعوا الشارع ، حق الردميات كان بنى شوارع و عمارات ، مافى سؤال : امال قروش البترول عشره سنين وينى ؟؟؟ ………….. عجبى

  5. بروف / صباحك نص .. نص

    طبعا ز عمائنا كانت شريعتهم خلال 23 سنة الفاتت دى / تجربة فى تطبيق الشريعه لذلك مرة نص ومرات بدون نص يعنى ارتجال ساكت . و الشطار منهم استغلوا الارتجال فى كل شىء فى الاقتصاد فى السياسة فى الاجتماع لذلك تجد اغلب قراراتنا و سياساتنا ارتجالية و الباقى رجاله ساى – الزارعنا غير الله يجى يقلعنا . عموما هذه هى الحياة مرة تصيب ومرات كتيرة تخيب .

    والسودان غير محظوظ حتى تطبيق الشريعة فيه كان بلانص يعنى نص … نص.

  6. صلاح البلال
    ديل حمباته

  7. السلام عليكم
    الجماعة ديل بشريعة خالية من النص قعدوا 23 سنة ومال لو طبقوها بالنص حيكمونا كم ؟
    تصوروا الزمن دة كلة الجماعة كانوا خارج النص ……

  8. الاخ اب احمد : انا بفتكر بالشنقيطي اقرب…..

  9. اخي جبرا والاخوه الاعزاء
    خوف الكبيييييييييييييييييير يطلعوا تصريح يقولو فيهو( نحن دايرين نحكمكم بعد دى لانو الفتره التدريبيه انتهت)
    اهن يالفاتح اخوى ح تمشي على المكتبه ولاتمشي وين………

  10. نفسي أكون سوبرمان !!!!!!!!!!!!!!

  11. نعزي انفسنا والجميع برحيل شيخ الصابرين ولسان حال المقلوبين والتعابه الشاعر الكبير محمد سالم حميد
    وانا لله وانا اليه راجعون

  12. السلام عليكم يابلد

    تعرفوا البخوف شنو؟
    شيوخ أخر موديل ؟؟؟؟؟؟؟؟؟

  13. يعني 23 سنة بسخنو ساكت النشوف لامن ينزلو الميدان و يلعبو البحصل شنو بس صحونا لامن الحكم يصفر و البرلمان يجيز الدستور الاسلامي و عليك الله اليورونا 23 سنة بس كان شنو من باب الشمار ليس الا

  14. على ما أظن دى مكنه جديده بعد ما كيسم بقا فاضى
    ولا مو هيك

  15. والله هيييييييييييييييييييييييييييييييييييييييك

  16. خدونى على قد عقلى
    ما يمكن مقرر جديد ونحن ما عارفين , مش ديل ناس الحكومة ؟؟

  17. يا جماعة مالكم زعلانين لسة في باقي زمن للحكم بالشريعة الدنيا طايرة انتو ما سمعتو بالمعادلة البتقول :
    (*) جمال عبدالناصر
    ولد عام ١٩١٨م حكم ١٨ سنة من ١٩٥٢ الى ١٩٧٠ = ١٨ سنة وجاء للحكم بإنقلاب عام ١٩٥٢ ومات وعمره ٥٢ عاما.
    (*) حافظ الأسد
    ولد عام ١٩٣٠م حكم ٣٠ سنة من ١٩٧٠ الى ٢٠٠٠م جاء للحكم بإنقلاب عام ١٩٧٠م ومات وعمره ٧٠ عاما.
    صدام حسين
    ولد عام ١٩٣٧م حكم ٣٧ سنة من ١٩٧٩ الى ٢٠٠٦ جاء للحكم عام ١٩٧٩ ومات وعمره ٧٩ عاما.
    (*) القذافي
    ولد عام ١٩٤٢م حكم ٤٢ عاما من ١٩٦٩ الى ٢٠١١ وقتل وعمره ٦٩ عاما.
    (*) رئيس دولة النص نص حفظه الله
    ولد عام ١٩٤٤م بالمعادلات السابقة إن شاء الله سيحكم ٤٤ سنة من ١٩٨٩ الى ٢٠٣٣ إن شاء الله وجاء للحكم ١٩٨٩ أي سيعمر في رأس دولة الشريعة الإسلامية إن شاء الله حتى سن ٨٩ سنة ليكون رإس الدولة الفخري ويؤمن راية الجهاد والشريعة لشباب المجاهدين يقودهم بكتاب الله قائدا سائرا على خطى الحبيب المصطفى والله أكبر ولن تجد لسنة الله تبديلا (وَلَقَدْ كَتَبْنَا فِي الزَّبُورِ مِنْ بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ إِنَّ فِي هَذَا لَبَلَاغًا لِقَوْمٍ عَابِدِينَ” )
    بس انتو اصبرو وصابرو ولكم الجنة يا مساكين

    1. يعني يا وجدي نفهم من كلامك ده انو الشريعة
      ح تطبق بعد عام 2033م ؟

  18. زمااااااان في الابتدائي قرينا في المطالعة قصة
    زيدان الكسلان وكان بقول غدا سوف افلح الارض
    من هنا الي هناااااك وكان بيأشر بي دقنو !!!
    *****
    اتخيلوا يقوموا يجيبوا لينا البت الجلدوها ديك
    ويقولوا ليها كان معاك الكاميرا الخفية نذيع
    ولا ما نذيع !!!!!
    عيّوشة ما بترقص لكنها الدوشة !!!

  19. سلامات للجميع
    الغريبة انه لسة بنقول شريعة شن خبرك يا استاذ الفاتح بعد تطبيق الشريعة ( النص دي )انه ماحايجي المجلس الوطني بعد (23 سنة ) تاني ويقول انها برضو ماكانت شريعة ونحن بريالتنا تطير عيشتنا ننتظر شريعة جديدة اعتقد وليس كل الاعتقاد حقيقة انه ابليس محتاج لفهامة لفهم اللعب بالدين دة ، يعني الا نمضي الحكومة شرط جزائي لو ماطلعت الشريعة الجديدة دي اسلامية بعد 23 سنة كل المسؤلين يخشو الاسلام ولا…………

  20. ههههههههههههههههههههههههههه,,نصو للكلاب ان شاءالله !

  21. جنوبى..سلام…
    رحم الله ابو عيوشة ومبدعها,,,لكنها الدوشة فعلا…

    بت وراق…سلام…
    لا حول ولا قوة الا بالله,,ان العين لتدم وان القلب ليحزن وانا بقضاء الله راضون…

  22. يكون دي فتره انتقاليه كانت؟
    يكون الدستور الجاي ياهو الدائم ؟
    ولا يكون نُزِلَت عليهم شريعه جديده؟
    ولا يكون
    ولا ما يكون
    ورق دستور ورق قانون
    كلوا محروق في كانون

    كان خلو الكلام وسرقوا في صمت المشكله شنو ؟؟؟؟
    و ثمن الورق دا إدو لي ص.د.ف.
    نحن نتطلع لي قيمه الورق فقط

    * الناس بقت غاز بس ولا لسه في كوانين

  23. البروف والكرام …. تحية واحترام
    والله أقلقتني معادلات الأخ وجدي …. ولكن………… حتى لو تنحوا اليوم فلن نستطيع إصلاح النفوس التي أفسدوها ولو بعد 5000سنة…. لقد صار الفساد والنفاق ساريا في الدماء ويرضعه الرضع مع حليب الأمهات …. وتنقية هذه الدماء تحتاج أجيالا وأجيالا…. أما دعوتهم الآن للشريعة والنفير وغير ذلك فما هي إلا نذير بمصائب أخرى قادمة … وسيكون عجبا لو كان فينا من يصدقهم بعد كل ما فعلوه للإسلام والمسلمين…. حسبنا الله ونعم الوكيل

  24. عابدين الطاهر و ود المبشر و السمار
    في ظني أن أقرب طريق هو (( الثوره )) بالنص

    جنوبي

    الناس ديل مالم جايبين سيرة النص كتير كدا
    صحي الضرس بتاور

    1. طارق أب أحمد .. سلام
      ماني خابر ترا كل زولا جانا بي نصو
      إلا لا شفنالنا ترمس ولا فولا مدمس !!
      الغريبة انو ناس الجنوب نصهم التحت لاكين
      شالوا أول .. دي تجي كيف !!؟

  25. ماتنسو توظفوني بعد الشريعة تجي
    لما كانت ماف شريعة كانت هي لله بعد الشريعة تبقي هي لمنو؟

  26. دوله اسلاميه ولااااااااااا موبايل صيني

  27. الحبيب

    ام نص ام ام نص؟؟؟؟؟؟؟؟؟؟؟؟؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: