في رقبتكم

قمت قبل أيام بالذهاب إلى أحد المستوصفات الخاصة في احد احياء امدرمان وذلك لإجراء كشف علي العيون وقد كانت زوجتي برفقتى واثناء إنتظار دورنا للدخول لمقابلة الطبيب لاحظت زوجتي وجود ام تحمل طفللاً في شهوره الأولى وهو يعاني من ضيق تنفس حاد ، فأخبرات الأم بأن هذا المستوصف لايحتوي علي اسعافات الحالات الطارئه وطفلك ده شكلو مضايق ، ردت الام : نحن جايبنو لطبيب الاطفال هنا ، قامت زوجتي علي سبيل المساعده بالذهاب إلى موظف الاستقبال في (عيادة الاطفال) وسالته هل عندكم اسعافات مستعجله في عياده الاطفال ولا بتعملو شنو في الحالة دي؟ رد عليها الموظف : اذا الطفل متضايق الاخصائي بحولو (مستشفي البلك للاطفال) طوالي, فذهبت زوجتي وأخبرت المرأة فارتبكت المرأة وقالت : لكن الطفل متضايق شديد وعندي طفلين ماتو بضيق التنفس ده .
جاءتني زوجتي وطلبت مني مساعدة هذه الأسرة وايصالهم الي مستشفي البلك بسرعه ، فوافقت على الفور وكانت حاله الطفل تتدهور ثانيه بعد أخري وعند وصولنا مستشفي البلك وجدنا الظلام يلف المستشفى وعندما سألنا عن السبب عرفنا أن الكهرباء قاطعة والمولد متعطل !
عند دخولنا إلى قسم الطوارئ صرخت الأم (طفلي متضايق حصلوهو ) وعندها حضرت ثلاثه طبيبات علي الفور وبعد الكشف السريع (بإستخدام أنوار الموبايلات) اتضح ان الطفل محتاج اسعافات سريعه تبدا بالاكسجين فقمن بحمله الي الغرفه الموجود بها الاكسجين وهنالك اتضح ان الاسطوانه فيها اكسجين لكن عند فتحها وجدوا ان هناك كسر في صمام اسطوانة الاكسجين مما يودي الي تسريب كل الاكسجين قبل ان يصل رئتى الطفل المسكين وحاول الاطباء حل الموضوع لكن استعصي عليهم وعندها طلب الأطباء من الام المسكينه ان تذهب به سريعا الي مستشفي امدرمان للاطفال وهنا بدات الام تنهار وكانت معها امها اي (جدة الطفل) فسلمت لها الطفل وقالت لها (انا ماقادره اشيلو بعد ده لانو حايطلع الروح قبل ما نصل) واسرعوا الي بوابة المستشفي لاستئجار امجاد للذهاب الي مستشفي امدرمان للاطفال وهنا قلنا لهم أنا وزوجتي بأننا سوف نقوم بتوصيلهم وبالفعل ركبوا معنا في العربة التى حاولت أن أقودها بسرعة من أجل إنقاذ حياة الطفل ولكن خيل لي لحظتها بأن الرحلة من مستشفى البلك إلى مستشفى أمدرمان كانت طويله كانها الي مستشفي سوبا وذلك لسببين السبب الاول بسبب زحمة الطريق (زحمه شارع الدومه) وصينيه ازهري وماادراك ماصينيه ازهري الذي قادنا الي الاستقلال فاصبحنا في ضيق امام منزله وشارع الحوادث ام درمان الذي لايخلو من الزحمه ليل نهار ,(هايسات ,حافلات وبكاسي ورقشات..) والسبب الثاني ان الطفل اصبح يتقيا دمآ واصبحت الام في انهيار تام تسلم الطفل الي امها ثم تقول لها (عليك الله يا امي كان طلع الروح اديني النحضنو شويه قبل مايدفن) والجده تقول ليها (اصبري يابتي لسه فيهو نفس)ثم لا تلبث الأم أن تخاطب والدتها (عليك الله يمه كان مات اديني النحضنو قبل مايشيلوه مني) !
واصبحت لقطه تراجيديه حتي ان العبرات قد شقت حلق الجميع وإنهمرت الدموع ، وعند وصلولنا مستشفي امدرمان لم نتمكن أنا وزوجتي من النزول من العربه لخوفنا من النهايه المحزنه وتركنا الام والجده تهرولان بالطفل الذي كان في حاله يرثي لها .
هذه القصة (المأساوية) وصلتني عبر رسالة إليكترونية من أحد القراء وهذا ما يستفاد منها:
1- مستوصفات خاصه لكنها لاتحتوي علي اسعافات اوليه او اسعاف لتحويل المريض الي اقرب طواري .(دي صدقوا ليها كيف؟ ) !
2- لا تتم صيانة (المولدات) والتحقق من جاهزيتها لتعمل متى ما قطعت الكهرباء
3- لايوجد اسعاف لتحويل المريض لمستشفي امدرمان للاطفال في حاله لم يتوفر العلاج في مستشفى البلك
4- لايوجد من يتمم علي عمل اسطوانات الاكسجين حتي ياتي المريض ويكتشف ان الصمام مكسور.
5- الشوارع التي تؤدي إلى اقسام الطواري في كل المستشفيات الكبري وليس اطفال امدرمان فقط (حوادث الخرطوم,حوادث بحري وغيرها) ضيقه بحيث يمكن ان يصبح المريض من شده الزحمه جثه متحلله قبل الوصول الي طبيب الحوادث.
6- بيئه العمل بالنسبة للطبيب بيئة سيئه ومحبطة .

كسرة :

لقد كان سلمان الفارسي يرفض الإمارة ويقول إن استطعت أن تأكل التراب ولا تكونن أميرا على اثنين فافعل .. وناسنا هنا يجرو عليها جري .. يلا خمو وصرو .. الأرواح دي كووولها في رقبتكم !

كسرة ثابتة :
أخبار خط هيثرو شنو؟

Advertisements

28 تعليق

  1. ………………………… سكوت بس .. !!
    الله أعلم شخص يقدر يعلق بد القصة دي !!!

  2. هذا غيض من فيض وعادي جدا في بلد ماعندها وجيع ولا رقيب

  3. لا اله الا الله
    حسبنا الله ونعم الوكيل

  4. لا حول ولا قوة الا بالله
    حسبنا الله ونعم الوكيل ….

  5. هذا غيض من فيض في بلد ماعندها وجيع ولا رقيب ودا موقف واحد من مواقف متكرره كتير انا طبيبه عملت في هذه المستشفيات لمن تشبعت وكلو من هذا القبيل وكدي اشتكي قول مافي حاجه.زمان كان في حاله كنت متابعاها في طواري بحري والحاله عايزه غسيل مستعجل ياالموت مستعجل كلمت المدير الطبي يطلع اسعاف رفض في النهايه جبتا اهل العيانه عند مكتبو وقلت ليهم الحل عند الراجل دا ماتخلو كل كلو قلع بس ماطب ولا انسانيه هذا ماتعودناه في بلدنا

  6. في السعودية توجد لجنة من الشئون الصحية وتمر
    بصفة دورية علي المستوصفات والمستشفيات
    للتأكد من صلاحية المعدات وبالذات المتعلقة
    باسعاف الحالات الطارئة والحرجة وكل مستوصف
    ملزم بتأمين سيارة اسعاف مجهزة بالكامل لنقل
    المرضي الذين يستعصي علي المستوصف علاجهم لمكان
    خدمة افضل … كل ما يدفعه المستوصف من
    رسوم حكومية زكاة وتجديد ترخيص لا يتعدي عشرة
    الف ريال سنويا بينما يتم تغريم المستوصف
    الذي يخالف اجراءت السلامة غرامة قد تصل
    50 الف ريال في المخالفة الواحدة …
    في السودان يدفع المستوصف ملايين الجنيهات في
    الترخيص والرسوم الحكومية ولا يدفع شئ في
    المخالفات لأن اصلا مافي لجنة متابعة …

  7. السلام عليكم يا احباب…
    عليكم بالدعااااااااء ان يسلط الله عليهم من انفسهم من يزعزع استقرارهم ويقلق منامهم وينتقم لنا منهم,,اصلو مرقة شارع بقت ماف !
    وانا محتار ! بين التار وبين الشارع الما ثار !
    رحمك الله يا حميد..

  8. السلام عليكم ، البرف والاخوان ، هو فضل فيها فهم ، ما كمل زمان ، الله واحد ، حيكومه كل همها جبابة الفلوس من الناس ، و الفشخره الفارغه على المساكين ، الطبيب يعمل شنو ؟ غير فهم التحاليل و كتابة الادويه ، وديت البنت المستشفى ، فاذا بى الدكتور يرسلنى لاحضار كونتينر بتاع الفحص ، ثم اخذ العينات للمختبر ، ثم احضار النتائج ، وده كلو ادخل و امرق من داخل المختبر زى ما عايز ، جبانه و هايصه ، و بعد داك امشى جيب الدواء ، وده فى وده مافى وده تلقاهو فى المك نمر و التالت تلقاه فى كوينز ولا علياء وهلمجرا …… سؤال فى غير محلو : سعادة الطبيب كاتب الدواء ليه اذا كان مافى ؟؟؟ …………… عجبى

  9. لا حول ولا قوة الا بالله …………
    نبشر ناس الحكومة بانو النهاية قربت ……….
    ان الله يمهل ولا يهمل ……….

  10. السلام عليكم :

    السبب الاول للوفاة في السودان مردة الي وزاراة حكومتنا الرشيدة ,اولهم الدفاع و دي ابادة جماعية .الداخلية عديل كدة وقدام بيتكم دة غير الاجهزة الامنية اللة لا يوريكم.وزارة المالية جبايات ساكت بنشفوا ريقك دة اصلا لو فضل ليك شوية ريق .الصحة ودي تفننت في طرق الموت و كل يوم حدوتة تختلف عن سابقتها .الاعلام وديل عندهم قنوات متعددة لو طلعت من دي التانية بتجين خبرك .التعليم الاسم التاني لية التأليم تقعد يألموا فيك لحدي ما تحصل امات طة .الزراعة مبيدات فاسدة علي شوية اقطان …الصناعة :الحمد للة كلها قفلت .الاوقاف و الشئون الدينية فتوة قوىة بتجيب خبرك..باقي الوزارات تصريحاتهم بس تؤدي للوفاة…باللة ورونا شنو الما بكتل؟؟؟

  11. انعل ابوك بلد !!!

    1. سوداني … سلام
      تعديل بسيط : أبوكي حكومة ملعونة !!
      البلد مغتصبة والاغتصاب لا يعيب الفتاة
      تلك أوطانا وحبها الخالد يجري في دمانا

    2. البلد عبارة عن تراب لكن وين الناس المسؤوله والمسؤوليه هنا بتبقى مسؤولية فرديه لأن المواطن برضو عندو دور في الحاصل في البلد دي إذا عرف كل مواطن حقه مش بس يعرفو لازم ما يخليهو لكن الحاصل انو أي واحد مننا تحصل ليهو حاجه ما بكلف نفسو حتى يكورك ويعبر عن مجرد غضبو خليك من ملاحقة ذاك الحق عشان كده اي مسؤول نايم في عسل سكوت الناس

    3. البلد ماله الناس هى السبب البلد مسكينه ؟؟؟؟؟؟؟؟؟؟؟؟؟؟؟؟؟

  12. فى الامارات وخاصة ابوظبى لو مواطن مريض فى منطقة نائية ممكن يرسلوا هيلكوبتر لانقاذ حياة المريض على وجه السرعة واهم شئ عندهم انسان البلد وهى دولة صغيرة ولكنها كبيرة بكل شئ ..ناس تتقدم ونحن نمشى لوراء سنين ولمتين حنكون كدا؟؟

  13. غايتو لا يسعنا إلا أن نقول حسبنا الله ونعم الوكيل ولا حول ولا قوة إلا بالله ..

  14. حاج أحمد السلاوى | رد

    ما أرخص الإنسان فى دولة التوجه الحضارى ..

  15. طارق بابكر احمد عبيد | رد

    حاجه مؤلمه جداً جداً ، اسأل زملائي في وزاره الصحه السودانيه التحقيق في هذا الامر وياحبذا لو طرحت للقضاء ، كسره من الكسرات هل عندنا قانون طبي ارجو الإفادة

  16. حسبنا الله ونعم الوكيل —–
    كل البلد تستغفر وتتوب و تترك النوم على وسائد اللئام —

  17. هوى ياااا طارق ,,تحقيق شنو !!؟
    انت اظنك ما مشيت البلد قريب ! كع…
    والله والله وما طالبنى حليفة ولد اخويا لينا هنا فى المدونة دى يادووووبو فى الامتياز استدعوهو للتحقيق معاهو فى عملية جراحية اتعملت وهو لسه تلميذ وخاتينو انو نائب نساء وتوليد !
    تقول لى قانون !! واااااااااااااااااااااااااااااااااى..
    كيف معاك الافادة دى؟؟

  18. سلامات للجميع
    انتظر يااستاذ الفاتح في واحد من المقالات الجاية انه تتكلم عن النسبة المتزايدة من الشباب المهاجرين الاكيد انه مافي احصائية للحاجة دي لكن لو استطعت انك تمشي وتشوف بعينيك العدد دة وبالاخص من اعمارهم بين ال25 وال35 سنة يعني كلها كم سنة وتتحول البلد الي بلد استهلاكية حقيييييييييقة حتي في العمالة ( اعمار انتاجية ذي دي تخدم في غير بلدها ؟؟؟؟؟؟؟؟؟؟؟؟؟؟؟؟) وحتي الخريجين الما مؤهلين ديل على حسب ماقال اطال الله بقاءه لا يصلحو لشي هنا لكنهم يصلحو خارجا ؟؟؟؟؟؟؟؟؟؟

    اما بالنسبة للموضوع الكتبت فيه عن الطفل وامه لا يمكن التعليق لا عن الموقف ولا عن الاهمال حتي وان كان من وحي خيال الراوي الحاجات البتحصل عندنا تجعله ممكن

    رد

  19. الحبيب

    ماعارف هو الاهمال فى فى دة موضوع منتهى لا ريب فيه
    لكن قصه الاسطوانه دى بينى بينك كتيره حبه يعنى ( لصقه ) ممكن تقفل
    عمومأ الحوادث كتييييييييييييييييييييييره لكن يظل الطبيب السودانى يعمل فى اردبئه عمل ورغم زلك لا نبخسه حقه فله التحيه والتجله

    لكن شوف لكن دى كيف عجبتنى انا زاتى والله الوجع راااااااااااااااااااااااااااااااااااااااااااااااااااااقد

  20. الاخ الفاتح خط والاخوه الاعزاء
    ااااااه وااااه من وجعي الملخبط نصه بقاق والباقي مظلط

  21. تخلت إحدى الأسر عن أحد أطفالها ويدعى شعيب أبكر شعيب، و تركته أمام مكاتب وزير الصحة الاتحادي بعد رفض أحد المستشفيات الحكومية إجراء عملية جراحية عاجلة عجزت أسرته عن دفع تكاليفها البالغة (5.200) ألف جنيه إثر إصابته بورم في المخ تسبب في إصابته بتشنجات وشلل نصفي وفقد إحدى عينيه للبصر.
    ( نقلا عن الراكوبة)
    كسرة :
    في رقبتك يا وزير الصحة !!

  22. وفى رقبة (فقرة) المبهدل داااك برضو !!

  23. الاخ جبرا
    قبل ايام ذهبت الى مستشفى لاخذ عينة للبروستات للوالد و التي كلفة 800 ج و نفاجأ بعد اخذ العينة ان الفني يعطيها لنا لكي نذهب بها الى المعمل لكي نحللها و طيب انا شايل ليهو عينة علشان داير ابروزة و لا اعملها شرموط ما اخدتها علشان يحللوها و يدوني نتيجة, ما علينا اخدنا العينة لي بتاع المعمل و علشان التحليل دفعنا تاني 150 ج طيب لو كان العينة باظت في السكة نعمل شنو يعني ميتة و خراب ديار, يا اخوانا دة اسمو استهتار و سرقة عدييييييييييييييييييل ولاكيف.

    1. شرقاوي .. سلام
      في دكاترة يطلبوا منك تعمل تحليل ويكتبوا
      ليك العلاج قبل نتيجة التحليل تطلع !!!
      وبرضو في دكاترة ليهم كل احترامي مثل
      بروفيسور ريتشارد …

  24. ههههههههههههههه,,والله ي اشرقاوى دى بالغت فيها,كان بعد تنشفها تسحنها وتجلطها لى الدكتور دا فى صلعتو ! اكيد عندو صلعة فى مكان ما ! هههههههههههههه..
    سلامة للوالد…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: