يكونوا غلطانين

لإعتبارات كثيرة ينأى العبد لله التعرض لعلماء الدين وأئمة المساجد لما لهم من توقير وتبجيل لدينا ، لكن أعتقد أن القصة (جاطت) ووصلت حد لا يمكن السكوت عليه فقد كثرت في الآونة الأخيرة تفلتات كثيرة تؤكد بوضوح تام بأن بعض أئمة المساجد غير أكفاء للقيام بهذه المهمة التى تتطلب قدراً واسعاً من التفقه في الأمور الدينية والشرعية .
قبل أسابيع طالعتنا الصحف بخبر يقول (خطيب أحد المساجد يمنع أحد المطربين من الصلاة في الصفوف الأمامية ويطلب منه الصلاة في الصفوف خلفية ) ! وهذا فعل لم يسبقه عليه الأولون ولا الآخرون ، إذ لم نقرأ منذ صدر الإسلام وحتى تاريخه كما لم نسمع بإمام مسجد يقوم بتقسيم المسجد إلى (مقصورة) يصلى فيها وجهاء القوم الذين هم من وجهة نظره الأشد تديناً و(مساطب شعبية) يصلي فيها عامة المواطنين (ناس قريعتى راحت) من الرجرجة والدهماء و(المطربين) وهذا لعمري ينفي صفة المساواة بين الناس هذه الصفة التى هي من أجمل صفات الإسلام .
لم نفق من (قصة أرجع ورا) حتى فوجئنا قبل أيام قلائل بإمام آخر يشن هجوماً صاروخياً مستخدماً فيه كل ألفاظ الدمار الشامل تجاه الفنان عبدالعزيز المبارك (بالإسم) ويوظف خطبته للحديث عن أغنية ظلت تردد قرابة النصف قرن وهى أغنية (أحلى جارة)
وبعيدا عما إذا كانت كلمات الأغنية تحتوى على مفاهيم تعارض المفاهيم الإسلامية يبقى السؤال الذي يفرض نفسه وهو ألم يجد هذا الإمام أى موضوع من مواضيع الساحة الملتهبة للحديث فيه ؟ يعني هسه لو إتكلم لينا عن خط هيثرو ده مثلاً مش كان أجدى وأنفع ؟ وأين كان هذا الشيخ طوال الأربعين عاما ويزيد التى كانت تبث فيها هذه الأغنية؟ وإذا كان هذا الشيخ يري بان كلمات الأغاني هي (موضوعات الساعة) فعليه بمكتبة الإذاعة فهنالك الكثير من الأغنيات التى نظمها شعراؤها بحسن نية والتى يمكن للشيخ أن يقوم بإفراغها من مقاصدها وصولاً إلى (تكفير) قائلها ومن تغنى بها وجعله يتبوأ منزلة متقدمة في الدرك الأسفل من النار !
وفي خضم هذه الأفعال غير المسؤولة من قبل بعض الأئمة تجئ قاصمة الظهر من أحد خطباء الجمعة الماضية والذي ركز في خطبته على وفاة الراحل (محمد أبراهيم نقد) عليه رحمة الله ، واصفاً إياه بالكفر (مرة واحدة كده) مطالباً بعدم الصلاة عليه ودفنه في مقابر غير المسلمين ! وكأني بهذا (الإمام) لم يقرأ حديث رسول الله صلى الله عليه : (“من رمى مسلمًا بالكفر أو قال عدوّ الله إلا عادت إليه إن لم يكن كما قال) ، فقد حذّرنا رسول الله صلّى الله عليه وسلّم في هذا الحديث من أن نصف مسلماً بالكفر أو أنه عدو الله وبيّن لنا أنّ من قال ذلك لمسلم يعود عليه وبال هذه الكلمة، يعني (لو زول قال لمسلم يا كافر بلا سبب شرعيّ فقد خرج عن دين الله والعياذ بالله تعالى، لأنّه سمّى الإسلام الذي عليه ذاك المسلم كفرًا ) !
الأمثلة السابقة توضح بما لا يدع مجالا للشك أن هؤلاء الائمة (كل واحد شغال على كيفو) ومن (راسو ساااكت) دون أي (مرجعية دينية) وده كوووولو كوم وحكاية (الرئيس ما يسافر) دى كوم تاني ، فقد تحولت معظم منابر المساجد في الآونة الأخيرة من منابر لتبصير العباد بأمور دينهم ودنياهم إلى منابر لتبصير الأجهزة السياسية والأمنية بما يجب عليها القيام به وقد تناسى هؤلاء الأئمة أن مثل هذه الأمور إنما تحددها أجهزة (ده شغلا) وهى التى تتخذ القرار المناسب بعد دراسات وتحليل للواقع ، يعني ده شغل (أمنى) و(إستخباراتي) ما ليهو أي علاقة بـ (يا أحلى جارة) أو (أرجع الصف الورا) !

كسرة :
لو الأئمة ديل قايلين مفيش واحد ح يقول ليهم تلت التلاته كم يكونوا غلطانين

كسرة ثابتة :
خط هيثرو أخبارو شنو؟

Advertisements

23 تعليق

  1. برنجييييييييييييييييييييييييييييية

  2. والله حال البلد كل ما ليهو ماشى لى ورا…
    لكن الائمة ديل متوقع منهم اى شئ,ما ياهم القالوا ليهو ما تمشى قطر !؟؟
    ما ياهم الما بعرفوا يدعوا على الظلم والظالمين ؟؟
    ما ياهم الساكتين عن اكل اموال النس بالباطل ؟
    عاااااااااااااااااااااادى يا بروف,شيل نفس عميييق بس..

  3. مبرووووووووووووووووووووووك د/ شمباتى

  4. تحياتي .. ونسأل الله الرحمة للمناضل الأستاذ محمد إبراهيم نقد .. ولعل أئمة أحلى جارة هؤلاء صعدوا تلك المنابر في هذا العهد الذي صعد فيه كل وضيع لأعلى الأماكن .. فلا ينضح الإناء إلا بما فيه .. ولا يكلف الله نفساً إلا وسعها … فخليهم في غيهم يعمهون إلى ميقات يوم معلوم .. نسأل الله أن يعجل بفنائهم ولا يغادر منهم أحداً .. وهو القادر على ذلك .. آمين.
    .
    .
    كسرة يا أبو علي:
    شمباتي إن شاء الله البرنجية تضوي ليك ..وتستاهلا ..

  5. الحبيب
    الجديد شنو الدين بقا تفصيل

  6. اللهم اغفر لنقد ولا تغفر لهذا الامام الجاهل
    اللهم تقبل من فرفور ولا تتقبل من هذا الامام الجاهل الذي يحفظ و‘ن كنت غليظ القلب فظا لانفضوا من حولك ولا يعرف المعني ..
    اتمنيت يوم اسمع امام مسجد يقول لناس الحكومة اخواننا الجنوبيين المسلمين ما ترجعوهم جوبا وادوهم الجنسية السودانية الاصلن حقتم عشان ما يفتنوا في دينهم والمسلم للمسلم كالبنيان يشد بعضه بعضا واذا اشتكي منه عضوا تداعي له سائر الجسد بالسهر والحمي ..
    لو داير روحك تفرحا وتنسي هموم وتبارحا ودع قوم سيب الخرطوم قوم قوم قووووووم قوم بارحا …. قاعدلنا زي حجر بلال لاكين احدُ احد وحيرجع المليون مٌوحّد ..
    قرار شجاع بقفل مصانع الباسطة ويرجعوا ناس المؤمن حلوي جحورم ….
    كسرة : خط هيثرو ده الا يجيبوكم انت وناس حاج السلاوي في برنامج ألو مرحبا تبكوا وتندهولوا ويجيبوا كوكو وشمباتي ويقولوا ليهو نحنا الكنا شفع كبرنا يا هيثرو ومشتاقين ليك …

  7. السلام عليكم ، البرفو الاخوان ، قال صلى الله عليه و سلم ( ليلنى منكم اولى الاحلام والنهى ) ظاهر ما داير ليهو قرايه ، يقول لك الرئيس الاسبق جعفر نميرى ركب الهليكوبتر بتاعت الجيش ومشى كركوج يوم جمعه ما عشان يصلى مع الشيخ الجمعه ، الشيخ ناداه جوه الخلوه ، شويه و جعفر جاء طالع وشه يلعن قفاه ، وقال للجماعه نسافر الخرطوم حسه قبال الصلاه ، اتارى الشيخ قال ليهو ماعاوزين ناس سكرانه و ما ملتزمه بى الشريعه يصلوا فى جامعنا ده ، سؤال بليد : من قال لاخيه ياكافر فقد باء بها احدهما ، عرفنا الفاسد فمن هو المفسد ؟؟؟ …………….. عجبى

  8. يعني بقت على الأئمة ؟؟؟

    الصادق المهدي زاتو كلامو كان معناهو إنو كافر

    الله يرحمنا من جنس ديل بس !!!

  9. نقد ده مش شيوعي ياأخوانا !!! وطيب هم شنو معروفين

  10. الكاتب اللذيذ الفاتح جبرا والله الواحد بيرتاح لكتاباتك جدا وموضيعك في الصميم لكن نحن والله اختلف علينا الاختصاص ماعرفنا المعانا من الضدنا أنا مواطن سوداني بسيط تهمني مصلحه بلدى وأنا حسب فهمي العادي بقول ليك أنوا البلد واطاته اصبحت وماشه في تدهور سريع وأصحاب المناصب رافضين التخلي من مقاعدن ياجماعه نحن السودان ده بنحبوا وماعندنا معاكم رغم اختلاف كتير من الناس معاي في الموضوع ده لكن عأيزين نحصل الباقي من السودان نرجع للفاتح جبرا ماشكيت ولو للحظة بأنوا أئمتنا ديل متفقين معاهم في الشغلة دي لأني أنا بعتبره شغله لأنها شغلت الناس عن الهموم الأساسية وأنتبهوا لاحلي جاره

  11. الخطاب الديني في مسرحيه ارثر ميللر (The crucible) و محاوله استخدام تهمه السحر كوسيله دينيه شرعيه لتصفيه الحسابات و التعبير عن الاحقاد الاجتماعيه بطريقه مبرره للتخلص من قبضه الشيطان ما اشبه المجتمعات حين تحاول استفراغ عجزها و انحطاطها بالخطاب الديني العدائي!!!

  12. طارق بابكر احمد عبيد | رد

    ياسلام الفنان عبدالعزيز المبارك اغنياتو اكثر من رائعه ولأكثر من ثلاثين سنه استمع لجميع اغانيهو يعني من زمن موضه القميص الذي ظهر به في تلك الايام(تحرمني منك) ، وطبعا للذين لا يعرفون القميص فهو كان موضه(قميص مخطط بالعرض) وكنا بنقشر بيهو في المناسبات،، التحيه للفنان العظيم عبدالعزيز المبارك ومع كل تقديري واحترامي لهذا الفنان السوداني الأصيل الرائع

  13. السلام عليكم :
    انتظروا الشريعة بالنص الناس ديل حيريحوكم خالص و يحددوا ليكم الجوامع الحتصلوا فيها يعني مثلا مسجد المسؤلين-مسجد العسكريين -مسجد الفنانين و هكزا علي ان يكون الدحول بالبطاقة …

  14. الحبيب كوكو….
    الله يبارك فيك وعقبال ما نبارك ليك برنجيتك وفرحة استقلالنا ! كع..

    الحبيب طارق..
    مالها ما بتضوى !؟؟ اظنك قايلة برنجية عادية؟؟ياخوى انا حاريها لى كم شهر,احححححححح يا برنجيتى..وبركة بالطلة…

    1. مصر أصحح كل مرة .. بأني (أب أحمد) حاف .. وليس (طارق أب أحمد) حتى لا تتلخبط الكيمان .. لذا لزم التنويه.

  15. الحبيب جنوبى..
    اممممممممممممممممممممممممممم,,انا من زماااان قلبى ماكلنى منك ! اسه كيف عرفت انو السلاوى كومر قدييييم وانو انا لسه غض ويافع !؟؟ امممممممممممم…

    الحبيب ود المبشر..
    مرحب بيك كتييير واقتراحك دا لازم نرفعو للمسعولين من الشر ديل,,سُب عليهم..

    1. شنباتى ..مادام طلعوك غض ويافع ..خليك وقرط على كدا …

  16. شكرا اخي الحبيب ياسين شمباتي …
    ينوبك ثواب لانة الواحد بقي كل يوم جمعةعندة مشكلة يصلي وين؟ اللة غالب….

  17. الاحب سلامات :
    لا الدين دين ولا الاسلام اسلام
    الدين مطاط يتمطا معاك زى ما عايز
    مطو مقاسك تقلب بيهو الباطل جائز
    يحيى كيرى ياهو يحيى قطر ود امبده ذاتو
    افليقا يحييك ومرحب حبابك يا ود كيرى مشتاقين .

  18. جبرا والسمار اللزاز.
    سلامات .
    فى الاسبوع الماضى لاقيت أحد الاعراب وهو يعمل فى مهنة حفر الآبار فسألتة عن ثمن حفر متر البير . قالى المتر بنحفرو بى مية وخمسين ألف جنية .إزبهليت وقلتليهو .يازول ماتخاف الله .قال لى (هى بقت على أنا وحيدى .الناس دى كلها بقت مابتخاف من الله .)
    لا حول ولا قوة إلا بالله …
    أياربى ؟؟؟؟

  19. والله أنا لو كنت محل فرفور كان مسكت المايك وصليت بالناس والامام لو ما عاجبو يشرب من البحر وخوفي الامام ذاتو يرتاح لصوت فرفور وهو برتل القرآن .. القصة ما كده يكون الامام بس زعلان من فرفور وكده خايف من المنافسة .. بعدين قصة اغنية عبد العزيز المبارك دي شنو .. أنا أبصم ليكم بالعشرة لو الامام ده ما كان زمان بيرقص وهو طربان على انغام احلى جارة ويمكن يكون معاها كشف ، وأظنوا لمن كبر قال تاب ومسك الدين لا نو ما يحقدر يكشف وكده ، قال فى الاغنية الخلتو زمان يرقص وينطط فيها خطبه كاملة .. يعني خلاص بقت دي مشكلتنا .. ياخي ما يشوف المويه الملوثة والأدوية المغشوشة والنهب المسلح على المال العام .. لو مشكلة الأغاني بتحل مشاكلنا كلها تبقى أسهل حاجة نتخلص منها .. لكن مشكلتنا النفوس الضعيفة الغير مسئولة .. ما نسمع الأخبار بتوقيع اتفاقية فى أديس أبابا ونشوف التلفزيون ويطلع لينا مسئول ينفي الخبر .. الحا يسألوا منو .. البلد ماشه كده والله يعينا على ما بلانا

  20. يعنى يابروفراجى ليك امام جامع يتكلم عن خط هيترو ولا عن فساد ولا عن اهمال يعنى يقطع عيشو ويجى يدون معانا ؟ مالازم يكسرو تلج ويهببو المكيفات لى ناس الانقاذ عشان يمكن يلقو ليهم وزارة ولاحتى مستشارية

  21. السلام عليكم
    أن الصلاة تنهي عن الفحشاء والمنكــــــر
    فقد روى مسلم في صحيحه عَنْ أَبِي هُرَيْرَةَ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ خَيْرُ صُفُوفِ الرِّجَالِ أَوَّلُهَا وَشَرُّهَا آخِرُهَا وَخَيْرُ صُفُوفِ النِّسَاءِ آخِرُهَا وَشَرُّهَا أَوَّلُهَا.هـ. والحديث رواه ـ أيضا ـ أحمد وأهل السنن الأربعة فهو حديث ثابت صحيح.
    وكذالك قال رسول الله صلى الله عليه وسلم : ((إذا رأيتم الرجل يعتاد المسجد فاشهدوا له بالإيمان))
    يعني الفنان دا ما رجل ولاشنو , في المسجد لا فرق بين فنان ولا وزير ولامدرس ولا مدير بنك ولا قفير متي مع حضرت مبكر يصلي في الصف الذي انت فيه .
    يعني لو المدير اتاجر واقامو الصلاة والمدير في الصف الاخير الامام يناديو الي الصف الاول وكدا !!!!!
    لاحوة ولاقوة اله بالله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: