عادي بالزبادي

ماذا لو أن (المراجع العام) في أحد الدول (الكافرة) أكتشف اثناء مراجعته أن أحد الوزراء لديه حساب بنكى (ملياري) شخصى (يعنى بإسمو) يجنب فيه بعض إيرادات وزارته ويتصرف فيهو (زي البتاعتو) دون وزارة مالية أو يحزنون؟
بالطبع عزيزي القارئ سوف تمتلئ الصحف بمانشتات من شاكلة (وزير يتصرف في أموال الدولة بطريقته) ، (دافعو الضرائب يتمسكون بإقالة الوزير) وربما إتجه عدد من المواطنين إلى مبنى البرلمان في وقفة إحتجاجية على سلوك هذا الوزير وهم يحملون اللافتات التي كتب عليها (إستقيل يا وزير) ، (أعد لنا فلوسنا الآن) !
بالطبع سوف تصبح القضية قضية رأي عام مما يجعل البرلمان يستدعى ذلك الوزير لبحث الأمر ومعرفة حكاية الحسابات (الجمباوية دى) ، وسوف يخرج الوزير من مبنى البرلمان (غير مبتسم) وهو يضع يده على وجهه تفادياً لعدسات المصورين قبل أن يقوم بتقديم إستقالته ونزع الحصانة عنه لمحاكمته وفق القانون بعد أن تتم مراجعة ذلك (الحساب) على داير (البنس) !
طيب ده في الدول (الكفرانية) خلونا نجي نشوف ماذا لو أن (المراجع العام) في أحد الدول (الإسلامية) أكتشف اثناء مراجعته أن أحد الوزراء لديه حساب بنكى (ملياري) شخصى ، سوف يقوم المراجع العام (يقوي قلبو) ويخاطب السيد الوزير طالباً منه إعمالاً لسلطاته الممنوحه له بمراجعة الحساب إلا أن السيد المراجع العام يفاجأ بأن السيد الوزير ح يرفض (مال أبوهو وكده) !
على الرغم من أن هنالك خطوات قانونية يفترض أن يقوم بها (المراجع) تجاه أي جهة ترفض المراجعة إلا إنو في الحتة دى (يعمل رايح) ، يتسرب الخبر فتخرج صحف اليوم التالي وهى تحمل خبراً صغيراً يفيد بان المراجع العام قد إكتشف حساباً خاصاً للوزير (الفلتكاني) بالبنك (الفلاني) مفتوح من السنة (الفلانية) والرصيد فيهو (كم وكمين مليار وألفومية) ويستمر الخبر ليؤكد أن السيد الوزير قد رفض مراجعة الحساب من قبل المرجع العام .
بالطبع عزيزي القارئ سوف يمر هذا الخبر مرور الكرام ، لن يطالب أحد بإقالة الوزير (هو عمل حاجة كعبة) ولن تمتلئ الصحف بمانشتات من شاكلة (بالله مش بالغتا يا سعادتك؟) ، كما ولن يتجه المواطنين إلى مبنى البرلمان يحملون اللافتات أحتجاجاً على هذا (النهب المصلح) والسلوك المشين لأنهم ما فاضيين (وكده) !
ويموت الموضوع … سنة … سنتين .. تلاته وما أن يكثر الحديث عن الفساد حتي تمتلئ الصحف بخبر يقول (البرلمان يقرر إغلاق الحسابات المخالفة وإحالتها للعدل) وتصريح آخر يقول (اهتمام البرلمان بجميع القضايا التي أبرزها المراجع العام فيما يتعلق بوجود حسابات مفتوحة بأسماء بعض الوزراء الذين رفضوا إخضاعها للمراجعة ) !
هنا تبرز (سخانة قلب الكفار) في التعامل مع الذين يتعدون على (المال العام)
كما يبرز (القلب الميت) الذي تتعامل به الحكومات (الإسلامية) لمن يتعدى على أموال المسلمين ويضعها في حسابو (الخاص) خارج رقابة الدولة ويعمل فيها العاوزو وكمان يرفض إخضاعها للمراجعة؟
أكثر ما يدعو للدهشة والحيرة معاً هو هذا التعامل (الباااارد) مع هكذا أمر .. هل يا تري لو أن موظفاً صغيراً قام بتجنيب (كم ألف جنيه) من الإيرادات التى يتحصل عليها وقام بوضعها في حسابه الخاص سوف يعامل هذا التعامل (الراقي) الذي إستغرق سنوات ؟ (ولسه على بال ما تتم إحالة المسألة لوزارة العدل وكده) !
بالطبع لا .. سوف يقبض على المسكين ويودع الحراسة ويتم التدقيق في أي (مليم) منذ فتح الحساب وحتي تقديمه (تاني يوم) للمحكمة ونشر صورة الحكم عليه في (أخبار الحوادث) لأنو ببساطه كده مسألة تجنيب موظف لأيرادات الدولة ووضعها في حسابو الخاص دى (جريمة) أما تجنيب وزير لأيرادات الدولة (بالمليارات) ووضعها في حسابو الخاص فده (عااادي بالزبادي) !

كسرة :
الشئ المستغرب ليهو إنو (الكفار ديل) ما عندهم (دين) !

كسرة ثابتة :
وبعدين معاكم؟ خط هيثرو أخبارو شنو؟

Advertisements

26 تعليق

  1. الفرق بينا وبين الكفار انهم مطبقين الدين
    دينا زاااااتو معاني ونحنا نصوص بدون معني ..
    كسرة :
    داير بتاعين التكنولوجيا يخترعوا لينا جهاز
    كشف ( الصدق ) عشان نقدر نعرف الصادق
    منو , الصوارمي ولآ العطا !!؟؟

  2. يعني يا جبرا إنت لازم كل يوم تمغسني كدة ؟؟؟

    الله يهديك !!!

  3. جنوبى ما سجلت البرنجيه نعلك ما خايف تسجل و بعدين تلقا اب أحمد ناطى فيها

    1. طارق .. هي بالله برنجية الليلة طلعت من نصيبي !!! أيووووووووي جنوبي كسح ..

  4. الكفار ما عندهم دين و أمورم ماشيه صاح لكن ما تنسى إنو ايضا الجوع كافر و ماعندو دين و حيمشَى الإمور صاح
    خليهم يواصلوا فى غيهم لكن يخلوا فى بالم خازوق القذافى

  5. البروف والاحباب….سلام…
    صباحكم زين….
    كما قال حميد عليه رحمة الله : اى عوج مبدى ومختوم باسم الدين والامريكان…
    اها هنا الدين بتاع الكيزان بقول بتجنيب المال دا واستخدامو للصالح الخاص,انتو يا جماعة ما قريتو الدين الكيزانى ولا شنو !؟؟ اما حاجة عجيبة !!

  6. السلام عليكم :
    منو القال ما عندهم دين ؟ الفرق بينا و بينهم انهم يؤمنوا و يلتزموا بالقيم الفي دينهم يعني لا يكزبوا لا يسرقوا…..اما نحن نقول ليك ربنا غفور رحيم و نسينا شدىد العقاب.
    الناس دي مش خصخصوا كل مؤسسات الدولة و قالوا لانها فاشلة,و تيب ما يخصخصوا لينا الحكومةوهي اكثر مؤسسة فاشلة في العالم.
    اخر تصنيف لانظف عاصمة في الدول العربية احتلينا اخر القايمة .احمدوا ربكم انة نحن ضمن القائمة.الجماعة قالوا كنا عيزين نطلع الاوائل لكن العيال ما بدونا فرقة…

  7. البرووف والسمار .
    سلام .
    المتعافى قال: أنا قبل ماأجى الوزارة أو الولاية كانت عندى أعمال ومشاريع ناجحة والمفروض أى وزير ماعندو شركات وراس مال وناجح مابيستاهل إنو يكون وزير ) إنتهى كلام الوزير .
    طبيعى أى مسؤول يكون عندو حساب فى البنوك الجوة والبرة وبالعملة المحلية والحرة . إنتو موجعكم وين …
    لكن الله فى …

  8. بالله الحبايب بي هنا ونحنا ما عارفين وكمان قمردينة صفراء فاقع لونها تسر الناظرين….

    الغريبة المفروض يكون بالعكس اذ أعملنا الكلام بأن الكفار جنتهم هنا في الأرض والمسلمين عندهم حساب وجنة يعدين يكون الدخول لها بما يفعله الكفار الآن في دنيتهم من ادارة شؤونهم بكل شفافية ولا يسرقوا ولا يكذبوا ولا يطنعون أخوهم الكافر من الخلف

  9. سلامات للجميع
    ماذال الاحساس باننا في بيت عزابة كبير مستمر ، وياريت انه يتوقف تحفيز السيد الوزير الناهب علي كدة مايتم تحويله الي وزارة اخرى اكثر دسامة وسمنة من التي افرغها واظهر ابداعه المتناهي في استعراض عضلات ظهره المسنودة للسيد المراجع العام
    سؤال للأئمة الامس ديل مافي اي افتاء او حاجة في الحتة الذي دي ولا فقه الضرورة ليهو كلام تاني ؟؟؟؟؟؟

  10. الجماعة بيدو الوزير فرصة علشان يشغل القروش وياخد الفائدة وبعدين يرجعها ده بزنيس والبلاوي حا تعم الجميع لانو فى ناس كثيرين من الشعب السوداني حا يستفيدوا من استثمار المال المنهوب .. مش الوزير ده عندو أهل وأقارب والأقارب ديل مش من الشعب وشجرة العائلة بتاعتومش برضو من الشعب كلهم حا يكالوا المال الحرام ده ودي الفائدة الحا تعود على الشعب السوداني المغلوب على أمره لانو فى النهايه ربنا حا يسلط عليهم جنده وبكده نكون ارتحنا من عائلة كاملة .. ربنا ياخدهم جميعاً وويورينا فيهم يوم

  11. جبرا : حرّم كان الدين المعامله بدون نطق الشهادة نحنا الما عندنا دين والخواجات كان نطقوا الشهادتين مع عمايلن دي يكسحونا كسح ..!! زي الكسحة اللتي دي لي ناس القمردينة الليلة ..
    كلنتون علاقتو مع البنية ديك شالتو من رئاسة امريكا وده حالتو تحرش ساااااكت وين لي بتاع تشريعي القضارف المسكوهو مع البنية جوه عربيتو وعيان بيان والموضوع مره عااااادي زي الزبادي الليلك ده . .
    هو بالله اسمو وزير الزراعة يمين انا قايل اسمو ودّير الزراعة !!

  12. حاج أحمد السلاوى | رد

    إنتو المراجع العاد دا بيسكتوهو بالترغيب …ولا بالترهيب …؟
    مجرد … حبة شمارات ناشفة ..

  13. السلام عليكم . الاستاذ الفاتح جبرا . القراء الكرام
    انا من اشد المعجبين بكتابات الفاتح التي تمتاز باظهار الحقيقة كاملة وواضحة للمواطن بطريقة ساخرة ودون الخوف من العواقب
    ربنا يوفقك يا استاذ

  14. السلام عليكم ، البرف و الاخوان ، اهلين عزت ، اياك بيقوفتش بتاع البطيخ ولا عزتاً آخر ، ناس الحيكومه ما يسرقوا ، هم بدو و لا تمو ، ما قالو الاعمى لمن يفتح بجيب لى اهله شبكه ، وناس كانت على الحديده لقو الاقرع المخنفس و الاخدر الليمونى يقيفوا يستنوكم ولا نئم البدرو ، سؤال بايخ : المتعافى كان تاجر شاطر و بقى حرامى بليد من زمن تنمية النيل الابيض و نحنا البلوم انضربنا فيها !!! ……………… عجبى

  15. والكفر في اللغة ستر النعمة وأصله الكفر ـ بالفتح ـ أي: الستر. ومنه قيل للزراع والليل: كافِرٌ. قال تعالى: (كَمَثَلِ غَيْثٍ أَعْجَبَ الْكُفَّارَ نَبَاتُهُ [الحديد:20]. وعليه قول لبيد: “في ليلة كَفَرَ النجومَ غمامُها”. ومنه: المتكفِّر بسلاحة، وهو الشاكي الذي غطى السلاحُ بدنه.

    وفي الشرع: “إنكار ما عُلِم بالضرورة مجيءُ الرسول ـ صلى الله عليه وسلم ـ به. ( يا أخوانا خلوها مستورة أو مكفورة بفقه السترة أو بفقه الكفر) .

    1. السلام عليكم ورحمة الله وبركاته
      أخونا أو أختنا الصبر الليلة جبتوها لينا تقيلة خلاص وده الكلام البيعجب أخونا (ودالخلا)، مش كان قال في مداخلةما بأن اللغة العربية هي أصل اللغات الأنسانية كلها وأنا الكلام ده حايص لي في رأسي لي هسي، لكن بكلام الصبر عن (الكفر)بالفتح وهو كما قال التغطية أو الستر وهي بهذا تعادل الكلمة الأنجليزية COVER فقد تأكد لي بما لا يدع مجالا” للشك بصحة تلك المقالة،،،،
      شكرا” أحبابنا أهل الهوي الذين رحلوا وما تركو خبر علي هذه المعلومات الضافية والقيمة وأهو كل يوم بنزيد معرفة وعلم من معين اخونا البروف جبرا، وبالمناسبة اخبار الخط شنو ونحن معاك يا غرق يا جيت حازمة ولا جبتها ضكلة يكركب!!!!

  16. طارق بابكر عبيد | رد

    وزير بريطاني قدم استقالته عند تجاوزه السرعه المقرره للسيارات. ، لوكنتا وزير للوحتا ليكم استقالتي

  17. عادى بالزبادى حال كل الوزراء بالاجماع
    نحن عندنا اسلام بدون مسلمين
    وهم عندهم مسلمين بدون اسلام
    تقبل مرورى عزيزى
    شكرا

  18. وبعدين معاكم؟ خط هيثرو أخبارو شنو؟
    شكلك كده نفسك بقي يقوم

  19. السلام عليكم جميعا …
    من سنين بقرأ بدون ما اعلق …
    والسؤال البطرح نفسو حنفضل ساكتين كدة لحدى متين ,احلى ما فى الموضوع انو اختى الصغيرة 8سنة براها عرفت الحاصل ووالله ده نص كلامها (مفروض نطلع نعمل درامات للراجل ده لانو غلا الحاجات الطعمية والماربيلا بقو واحدة بمية بدل 3 بمية ) اها تانى فى كلام

  20. كوكو…
    اممممممممممممممممممممممم,,,اظهر وبان وخلى الحركات دى !!

  21. عادي بالذبادي مستر جبرا والأعزاء
    والله اظهار الحقيقة وقول الحق في هذا الزمان والسودان خاصة بقى من أصعب الامور فحياك الله عزيزنا جبرا لاظهار الحقائق وكشفها على الملأ بالرغم من علم أكثر من 99% من الشعب السوداني بما يحدث من فساد وهرج ومرج ظاهر
    أما عن الوزراء والله منهم من يترقى اذا أكل وضرب ومنهم من ينقل الى موقع ضرب أحسن وأفضل وأسرع – والزي زولنا دا كتار و قصة ( دا زولنا زاتو) صدقني لو قروهو كل السادة الوزراء والقيادات ما ظنيت واحد فيهم حيقعد في كرسيهو الا من أبى ……. اللهم أرنا في الفاسدين عجائب قدرتك يا رب

  22. البروف
    كان وقفت فى ميدان ( نقد ) وهتفت عايزين هيثرو ماحتلقى اخبار ——–
    —–
    ابوقناية دة ماشايف شغلو – طيب بياخد مرتب ولا شغال لله ؟

  23. سلام ياقبيلة،،،،
    صديقي العزيز بروف جبرا، بطريقتك دي يوم بطق فيك عرق وتبقي الحكاية باظت، لذلك يا صديقي نرجوك أن تخفف شوية من الضرب علي الميت لأن ذلك حرام، ونتمني أن تعود لكتاباتك القديمة، كتلك التي تفش الغبينة وتنفس عن المحرومين والمهمومين، وصدقني هي أقوي شكيمة وأمضي سلاحا” من أن تتحدث بمثل هذه الصورة المباشرة، فالبث المباشر هذا لن يجدي فتيلا”لأن هؤلاء الناس قلوبها ماتت أو ليس لهم قلوب من أصلو، وبالطبع فلن تجد فيهم رجل رشيد لأنهم كلهم يهرولون لا هثون خلف السراب في هذه الفانية وينسون أن هنالك يوما” مهولا!!!!
    تحياتي ايها الرفيق أقصد الفريق …

  24. سؤال بريء اذا كان الناقل الوطني ومن زمان من سنه شخته وفي السبورة بتاعه مطار الخرطوم لندن ذهاب واياب بالخطوط السودانيه وكيف يعني حسه الناقل الوطني ما موجود في خط هثرو ومنو الزول ده اللي باع ال
    واذا مافي زول باعو يبقي ليه ما في ناقل وطني، فيدونا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: