لجنة الإحتيار

أستاذي الجليل : الفاتح جبرا
السلام عليكم ورحمة الله تعالى وبركاته
أنا إبنتك (س) تخرجت من إحدى الجامعات المرموقه دفعة 2002 التخصص أقتصاد ، الدرجة جيد جداً مرتبة الشرف التانية القسم الاول ، قامت مفوضية لجنة الإختيار الإتحادية بالإعلان عن فرص وظيفية بديوان الضرائب (على الدرجة التاسعة)
وقد إنطبقت كل شروط التقديم على شخصي الضعيف ، قمت بتقديم أوراقي ومتابعة الأمر حتى أعلم متى تبدأ المعاينات ، إنتظرت بفارق الصبر وعلى الرغم من مستواي الأكاديمي الجيد الذي يعززه تقديري إلا أننى عكفت على مراجعة كتب الإقتصاد من جديد لإنعاش الذاكرة إذ مرت عشر سنوات قبل أن أترك مقاعد الدراسة .
عندما علمت أن المعاينات سوف تبدأ في 19 من الشهر الجاري كدت أطير من الفرح ، وبعد تحديد الكشوفات وجدت إسمي في (اليوم الفلاني) ، صدقني يا أستاذي لم يعرف النوم طريقه لعيني تلك الليلة ، وفي الصباح الباكر تحركت من المنزل ترافقنى دعوات كل ناس البيت .
وأنا في المواصلات التى وجدتها بعد صعوبة كنت أطوف بخيالي مسترجعة كل المقررات التى درسناها وأسائل نفسي كيف سيكون شكل المعاينة ؟ في أى المواضيع الإقتصادية سوف يتم سؤالي؟ وهل سوف تكون مثل تلك المعاينيات التى خضتها من قبل والتى كانت شكلية ساكت وتحصيل حاصل !
وجاءت ساعة الصفر .. دخلت إلى اللجنة .. حجرة مكيفة يتوسطها مكتب خشبي طويل خلفه رجل في العقد الخامس وإمرأة في العقد الرابع .. تربيزه صغيره عليها صينية بها عدد من كبابي الشاي يتوسطهم سيرميس .. طلبا منى الجلوس على كرسى امامهما ثم طلبا مني اصل الشهادات وبطاقة تسجيل لجنة الاختيار ففعلت
بدا الرجل بالأسئلة :
• اى صلوات تقصر فى السفر؟ وهل تقصر صلاة المغرب؟
• كم هى عدة المراة المطلق والمتوفى زوجها؟
• من هى السيدة عائشة؟ وما لقبها؟ اذكر حديث عنها؟ الفقه الذى كان فى احاديثها ماهى نوعيته؟
• ما الحكمه من الفرق بين عدة المراة المطلقة والارملة؟
• أدينا جملة مبنية للمجهول؟
• ماهى حروف الجزم؟
• ان لما تدخل على الجملة ماذا تفعل؟
• من هم ابناء السيدة عائشة؟
طبعا يا أستاذى انا (إتهجمتا) وقلتا إحتمال أكون دخلتا لجنة غلط .. وزارة الأوقاف تكون عاوزة دعاة مثلاً … لكنني أفقت من هجمتي بعد أن قامت المرأة بطرح سؤالين فقط لهم علاقة بتخصصي ولم تستغرق كل المعاينة أكثر من عشرة دقائق 7 دقائق (دينية) و3 دقايق (دنيوية) يعنى أقصد في تخصصي !
أستاذي : الأسئلة الدينية دى ما كنتا عامله حسابا ؟ تفتكر ح يشيلوني؟
الرد :
إبنتي العزيزة (س) لعلك لم تقرئي قصة إبن أخي (بدرالدين) خريج الهندسة الكهربائية والذي تخصص في (أبراج الضغط العالي) وكان كلما يدخل إلى معاينة يتم سؤاله عن الغزوات والمعارك الإسلامية .. أين كانت ومتى؟ كم عدد المسلمين؟ لمن كانت الغلبه؟ قائد المسلمين ؟ قائد الكفار ؟ فأنكب (بدرالدين) على قراءة كتب السيرة والغزوات والمعارك ولم يترك صغيرة ولا كبيرة إلا قام بتسجيلها وحفظها .. مساحة وإحداثيات أرض المعركة .. عدد وأنواع الأسلحة المستخدمة .. تاريخ ومكان ميلاد القادة من الطرفين .. عدد الخيول والبغال والحصين المستخدمة .. عدد القتلى والجرحى من الطرفين ، نوع التكتيك القتالي المستخدم ؟ بداية المعركة والمده التي أستغرقتها (بتوقيت قريش) !
وعندما دخل (بدرالدين) المعاينة أذهل اللجنة بردوده الدقيقة الحاسمة مما جعل رئيس اللجنة يقوم بسؤاله شؤالاً في تخصصه عن خطوات الأمان الذي يجب على المهندس إتخاذها عندما يعتلي أحد أبراج الضغط العالي ، فأجابه (بدرالدين) بثقة بكل الخطوات التي يجب إتباعها .. وهنا قال له رئيس اللجنة:
– افرض في مهندس ما عمل حاجات الأمان دي وضربتو كهرباء ومات .. أدينا حديثين صحيحين وأية تبين إنو المهندس ده مات شهيد !

كسرة :

طبعاً يا إبنتي ما ح يشيلوك لأنو الجماعة ديل عاوزين ناس (عارفين الدين) وإنتي معلوماتك (الدينية ضعيفة) خاصة ونحنا مقبلين على مرحلة تطبيق الشريعة بالنص .

كسرة ثابتة :
أخبار خط هيثرو شنووو؟

Advertisements

59 تعليق

  1. برنجيييييييييييييييييييييييييييية

  2. السلام عليكم ، نسجل البرنجيه قبال ناس اب احمد …………………. عجبى

  3. طبعا يا بروف (قصة بدرالدين) دى كانت بداية قراءاتى ليك,واذكر وقتها انى فطست على روحى من الضحك ومن ديك وعيك…
    لكن (س) طلعت رقيقة الدين بشكل !!

  4. هههههه والله يا (س) انا شايف احسن ماتضيعي وكتك ساي مع لجنه الاختيار دي..العبد لله حاول الموضوع ده لم فتر وكل مره بطلع في Short List , لكن في النهايه بدوني بالجزمه.
    حقيقه الناس ديل هم اصلا عارفين زولم الح يشيلوهو مسبقا ودي كلها فبركه سااااااي.
    انا قنعت بعد طول عناء لكن ربنا كريم واتوفقت في وظيفه ماعندها علاقه بلجنه الاخيتار دي ووقعت في شركه صينيه لحدي الان لي معاهم 7 سنين والحمدلله.
    كسره : اقعي في الصيني ده احسن ليك
    كسره تانيه: والله الصيني برضو بقي مشبوه

  5. السلام عليكم ، البرف الاخوان ، د/ شمباتى ختفه من خشمى ، مبروووك ، طلع اعلان زمان ، عايزين مراسلات شرط يكونو بيعرفوا يركبوا عجله ( اقصد بسكليت ) اها الجماعه قدموا ، المهم صفت الحكايه على اتنين واحد وسخان و شين و التانى قيافه و نظيف ، الممتحن قال خلاص اركبوا العجله دى عشان نشوف ، الوسخان دردق العجله و راح ناطى فوقه وقايم سدارى ، عمل ليها نص بدال و راح لافى و رجع للممتحن ، التانى يادوب رفع رجله فوق الماسوره العجله قربت تقع ،المهم يا الله ياالله طلع بى العجله و جاء راجع قرب يدقش الممتحن ، الممتحن قال ليه تمام ده العاوزنه وقال للوسخان نحن عاوزين مراسلات مش عجلاتيه ، سؤال مش فى محله : يكون يا برف قريبك عجلاتى ؟؟؟ …………………….. عجبى

  6. السلام عليكم أنا كنت بتابق بي فوق الصريق وبعمل زغبير الا الليلة دي قررت أدخل بي الباب عشان العجلاتي حق أخوي كوكو ده الحين العجلاتي ده عجلاتي زمان ولا عجلاتي جديد عجلاتي زمان كان عندو عجلتين يا رالي يا دبل رالي العجلاتي الحالي من كثرة العجلات هو ذاتو ما عارف تصنيفو شنو ماونتين بايك وهاكو بايك وتشاينيز بايك ورالي باريس ورالي ايطاليا فلازم تخصص تخصص دقيق جدا في اي العجلات انت عايز تبقي عجلاتي ………. وعجينا

  7. Salam..please tell me that its not a true stories and you are just kidding

  8. شكرا يا استاذنا الجليل وربنا يكترمن امثالك

  9. طارق بابكر عبيد | رد

    افتكر انها مجرد تمثيليه و بكونوا اصلا عندهم واحد مختار للوظيفه، الواسطات بتلعب دور كبير مش تفوقك الدراسي او اجاباتك الصحيحة ،، تم تعيينا سنه ٨٧ خريجين وبشهادتتنا وبدون واسطه، كانوا الموظفين كويسين وسمعتهم كويسه ، الحصل شنو ، ليه اي حاجه بقت غلط ،، فعلا يجب فهم الدين
    لأنو المشكله تكمن في الفهم الغير صحيح للدين

  10. كلمها خليها تمشي القطاع الخاص ……. والله العظيم انا مشيت عملت معاينة في مكتب رجل اعمال ( كبير جدا ) وعندو جامعة متطورة جدا …قام سألني قال لي اقرأ سورة العصر انا حقيقة ما عرفت بداية شنو … يمكن من مفاجأة السؤال .. قمت ضحكت وقلت ليهو كدي قول لي بدايتها ……. والله العظم ضحك ضحكة ( مجلجلة ) وقال لي الحمد لله ما من الجماعة … سلم شهاداتك شئون العاملين .والله تم تعييني في نفس اليوم …وقضيت معاهم اجمل فترات حياتي العملية ….الحكومة لو قفلت باب ربنا بيفتح الف باب … والقطاع الخاص استفاد من المحالين للصالح العام استفادة كبيرة جدا … مع العلم انا واحد منهم .. ولا ذلت اشكر فيهم لانهم احالوني للصالح العام قبل ما اصل سن المعاش

  11. الاعزاء سلام ….
    اكيد اللجان دي ما عندها فكرة عن الموضوع …23 سنة تركوا تخصصهتهم تفتكري بكونوا ناقشين حاجة دة غير انشغالهم بالاعمال الخاصة و محاولاتهم الدؤوبة لحل مشكلة العنوسة…كل واحد فيهم قرا لية كتابين وعمال يهري في العالم….اللة غالب.

  12. متعكم الله جميعا بالصحة والعافية
    ربنا يعينك أختنا ( س ) وما ضاقت الا لتفرج وانشاء الله الفرج آت لا محالة ……. كررته وكرره لي أهلي وأحبتي وأصدقائي — تخرجت بمرتبة الشرف الدرجة الثانية القسم الأول – ودخلت 32 معاينة بين الخرطوم ودنقلا بالولاية الشمالية – والحق يقال كنت أكاديمي بحت ليست لي أي انتماءات – في المعاينة التالتة وكانت محل القروش زاتو – ( صك العملة ) في 2003 – بعد السلام والترحيب وفضل واسمي وما أدراك كان سؤال واحد والله واحد – من لجنة ثلاثية نايرين وناعمين وسمان عيني باردة عليهم – السؤال : في يوم الاتنين 21 ديسمبر 1993 الساعة تمانية وربع ممكن تورينا بالضبط كدا الحصل شنو ؟؟؟ ( من القاعد في النص – واليمينو يواصل – بالضبط وتحديدا في الزمن دا — …….. رديت عليهم سنة كم ؟؟؟ فرد واحد 94 – قلت يا ريس والله بالتاريخ والزمن لو قلت لي الاسبوع الفات ما بتذكرو – ناهيك عن قبل تسعة سنة …. للتبسيط ذكرني بأسماء كانو طلاب في الدفعة القدامنا في الثانوية وهم كانو ضد الجماعة وبالرجوع مع الاسماء والزمن تذكرت أنني كنت ضمن عدد من طلاب داخلية من ذكروهم أدينا الجماعة علقة نظيفة ما بينسوها لى جنيات جنياتهم والحق يقال أنا أديت واحد منهم خرطوش على ظهرو فقط ……. وباقي المعاينة بقت ونسة وجيب لينا بلح الشمالية لمن تجي تستلم الشغل – فمع العبرة الخانقاني كان الرد – بس طلعوني من هنا زي الشغلتوني وصرفتو لي صناعة سنة من القروش – وكسرة أخيرة يا بتنا انشاء الله بتلقي حظك ودي الحياة وسنتا

    1. ايهاب يا ود اخوي ما تراكا فاشي مغصتك
      فيهم ( بالله من خرطوشكِي توكون دَبِر مِنْ )

      1. يمكن لو كنتو ناس جادين وصحي مظلومين كانت دعواتكم عليهم جابت فايدة لكن الظاهر الله عارفكم عشان كدة وكلكم لأنفسكم. الشايف روحو مظلوم بس يرفع شكيتو لي الله القادر القوي من يذل الظالمين ويجعلهم عبرة

  13. هسع لو نحنا كنا حافظين القران ومتفقهين في دينا
    ما كان ده حصل .. يا ناس ارجعوا للدين وتوبوا
    الي الله .. العيب فينا ما في الحكومة ..
    ما يمكن دي لجنة اختيار ناس للجنة بس طوالي
    انتو ماشين للامور الدنيوية الزايلة دي !!

    1. السلام عليكم الاخ جنوبي والاخوان
      والله دي مسالة غابت عن أذهانا لكن ذي ما قلت حقو نرجع للدين ونباري اللجان دي امكن ……..

  14. سلام عليكم يا ناس ……… اولاً اهنئ الاخت س على دخولها المعاينة وبعد داك ما مشكلة تكون كسبت احتكاك وخبرة ، حصلت لي قصة قريبة من هذه فانا خريج اقتصاد ودخلت معاينات في احد البنوك الاسلامية وكانت الاسئلة كلها دينية واجبتها وعلى ما اذكر كان هنالك سؤال اقرأ اطول سورة تحفظها وكنت احفظ جزئين من سورة البقرة وبدأت اقرأ لغاية ما الجماعة قالوا حسبك والحمد لله انا ما قطعت ذهبت مبسوط امني نفسي بالشكة والكرافيتة ولكن ما حدث هو ان اخذوا من هم اجدر مني وكان لي شخص يعمل في البنك وحاولت ابحت في القصة وعندما ذهب معي الى رئيس اللجنة قال له انني جيد جدا وقد احرزت المرتبة الحادية عشر وهم يرغبون في عشرة يعني جليت بي نمرة يعني لو كان في الاول مشترك كان هسة اكون موظف الان صاحب كرشة وكرفتة ولكن الحمد لله الان انا خارج البلاد يعني مغترب وكدا .
    كسرة
    الاخت س ستحرزين المرتبة الاولى وهم لا يرغبون في احد

    1. أرفعي أرفعي يدينك لي الله وأدعي عليهم الله يكسرهم في محلهم ويسلط عليهم اليذلهم ويجعلهم عبرة لمن يعتبر قاااااااااااااادر ياكرييييييييييم

  15. اصلا اللى عايزنه ما بسالوه..بس بقولو ليهو كيف الوالد والوالدة والامورة هنايااا.. واما تعيس الحال فالاسئلة بتكون من النوع اللى تعمل فشل كلوى:
    مثلا: نابليون بونابرت لمن مات كم سنا كان فى فكه الاسفل ما اسم جاره السابع من الناحية الشرقية

  16. البروف الفاتح و السمار الكرام . . .
    تحيه و سلام . . .
    اليوم أظنه جنوبي ماسك ورديه بدل ود الخلا و كده.
    تحياتي لهما.

  17. ياسين شمباتى | رد

    كوكو…
    هههههههههههههههههههه,,انحنا بنختفها ختف من خشم الاسد ! قايلنا عجلايتة ولا شنو !!؟ كع..

    مخير..
    اممممممم,,انت من زمن الصالح العام ! اى لا حولااااااااااااااااااااااااااااااااا

  18. صاحبنا في ٧٨ لمن ظهر البنك البرمكي والولد كان متخرج من اقتصاد وشايف نفسو دخل معاينة الجماعة السؤال الاول كان هل تحفظ سورة النمل زهل لانو كان متوقع يسالوه عن العرض والطلب والأوراق المالية وقطعها والمرابحة وشروط عقدها المهم كانت إجابته نعم سمعت بهذه السورة لكن اكون كضاب لو قلت ليك حافظها. السؤال التاني كم حديثاً روته السيده عائشة عن الرسول صل الله عليه وسلم وكانت إجابته والله نا عارف لكن تخمين كده يمكن خمسين ولا ستين حديث. وكانت الطامة الاخيرة هل لك شخص يثنيك هنا في البنك. وقف حيلو وقال ليهم انا دا طرفي من وظيفة الامام دي.

  19. سلامات
    للجميع
    اذا كان اتوفقتي وطلعتي قبل ما تقري اقتصاد عندك بكلاريوس بتاع شريعة ودراسات اسلامية وابوك امام جامع كمان يعني قدرتي تجاوبي على الاجابات كان حاتكون المرحلة التانية الاسئلة
    اذكر اسماء اللاعبين في منتخب هولندا لعام 78 في المبارة النهائية مع الارجنتين فى نهائيات كاس العالم وكم النتيجة ومنو الحكم ( مع العلم انه هذه الاسئلة لللبنات فقط ) مافي داعي نتخيل انه للاولاد المرحلة التانية حاتكون كيف ؟؟؟؟؟ ، الله يكسر خاطر اي زول يحرم زول من حقه لمجرد الحرمان مش عدم كفاءة

  20. جنوبى..
    هههههههههههههههههههههههههههههههههههههههاااو,,النيولوك بتاعك خطير عدييييل كدة !!

  21. شمباتي ده شامي لي ريحة زول … يا ربي يكون منو ؟؟؟
    كسره : كوني مريسه

  22. حاج أحمد السلاوى | رد

    يا جماعة الخير .. تفتكروا لو جاء نظام حكم غير الموجود حالياً .. أحزاب أو غيره .. هل حيمارس نفس النظرية الموجودة فى لجنة افختيار دى .. أم حيكون الوضع غير ؟
    مجرد شمارات .. ناشفة ..
    كسرة سغيرونة .. الدكتور شنباتى .. شهادته مجروحة .. يمتنع عن الإجابة …

  23. حاج السلاوي .. سلام …. حضرت ستة حكومات منهن انتفاضتين وانقلابين غير الحيكومات التي انبتت بضع حيكومات في كل حكومة بضع احزاب والائتلاف ضاعف لمن شاء وكان التمكين محصور في الوزارات ما سمعتلي زول اعلن التمكين الشامل الا العواليق ديل مسكوها من الدرجة 14 ..
    شمباتي .. غدا سوف أربي دقني و أشرب عرق الشعب و أنسي ديدمونة …..

  24. يا جماعة الخير .. مقياس الاختيار هو (التقوى) .. و(خير من إستأجرت القوي الأمين) .. فدي المؤشرات البتدل على ذلك .. ما تتعبوا نفسكم ساي .. أنا مرة في معاينة لشغل في بنك الراجل قال لي أقرأ دعاء القنوت .. قلت ليهو دعاء شنو؟ قال لي القنوت .. لملمت ورقي وقمت منو .. قلت ليهو إنت عايز تشغلني معاك شنو؟ .. قال لي نحنا عايزين ناس ملتزمين .. قلت ليهو أنا ملتزم أكتر من حبوبتك ….وكانت هذه آخر معاينة خشيتها في أمازونيا .. والله كريم.

  25. طارق بابكر عبيد | رد

    الفهم الصحيح للدين وتطبيقه هو ما نريده، و اذا كنا فاهمينوا كويس فربنا ح يوقينا شر الكسرات ، ما اكثر الكسرات في زماننا هذا ، كسره خط هيثرو وحتي كسره وزاره الأوقاف التي تم تناولها في الصحف( مبلغ الاتنين مليون ريال)، ودي حتي الان ماذا تم فيها نرجو الإفادة

  26. ربنا يعينك ويعينا بس الاسئله السالوك ليها دي موضوعيه وما في كلام بس الما موضوعي هو سؤال في معاينه علي ماعتقد2003 الفتره طولت والمعاينات كتيره وقصصها تعمل كتاب كوميدي نحن مهندسين كل التخصصات كانت مطلوبه في المعاينه دي جات واحده تبكي وتندب في حظها والسنين الضيعتها في الجامعه والسهر للمذاكره ليوم المعاينه كما علت صاحبتنا دي تتخيلوا السؤال التخصص كان شنو؟ الارنب يلد ام يبيض؟ والي يومي هذا لم اعرف علاقة الارنب بالهندسه شنو افيدوني

  27. حاج أحمد السلاوى | رد

    الأخت هدى .. غايتو صاحبتك دى لو كان سالوها هل الثعلب يلد أم يبيض كانت تكون الأجابة أسهل بكتير .. كانت ترد وتقول ليهم الثعلب دا مكاااااااااااااااار .. وممكن يعمل أى حاجة .. ممكن يلد وممكن يبيض .لاكين الجماعة صعبوها خالس .. مسكينة .. طبعن طلعت آوت لعبة قون بعد المعاينة !!
    يمكن كانوا عاوزين يشغلوها فى حديقة الحيوانات .. مهندسة حيوانات ..

  28. لو الارنب ببيض يبقي ما عندو علاقة ومن حقكم
    تسخطوا علي اللجنة لكن الارنب بيلد وعشان يلد
    لازم يحفر تحت الارض وطبعا الحفريات بتهدد سلامة
    الطرق والجسور والمباني وبي كده يبقي الارنب
    عندو علاقة بالهندسة .. وهي لو جاوبت علي
    مدخل السؤال كان سألوها ..وجزاكم الله خير ..
    آية في رقصك يا رئيس .. لما ايديك يتفدعو
    انت فيها براك صول وجول في الرقيص ورينا
    الاصول .. ( لحدي ما يطلع لينا واحد تاني
    وياخد عرضتو فوقنا ونحنا نشبلو )

  29. جنوبي جنا جن كلكي لابس ميري ورابط نصو .

  30. هههههههههههههههههههههههههاااى,,,دستووووووركم يا اسياد

  31. خالد..
    هههههههههههههههههههه,,والله شممان جد,,لكن اديها صنة وبعضا من محنة..
    ونادوه نادوه,,نادوه ليا…

    سلاوى..
    الجرحها منو كمان !؟؟ هووووووووى يا بتاع الخلطات انت,,تسكت ولا امزل الصور هنا ؟؟ هيييييق

  32. جنوبى..
    دقن تجيبها من وين كمان !؟؟ والعرق جف والشمش غايت وووينو الحبيب طيب؟؟
    اما عن ديدمونة فلقد لحسوها الليمونة ! واااااااااااااااااااااااااااااااااااى..
    لكن اجاباتك الارنبية اللولبية فى السلك,,عينة يا ميرى !

    خالد..
    لكن جنس البسووا فوقو الناس ديل ما بجنن ويلبسك بلا هدوم!؟
    حسبى الله عليهم…

  33. خالد .. ما الصبر ما نافع في ايام كركيه
    ذات وضع همباتي واحوال متل ديّه ..
    شمباتي .. عين العدو وصابت سوداني يا حبيّب ..
    ولا اقول ليك خايفين نغني يجينا الزي (علوب)
    حفلات داك ويرقص لينا !!!

  34. وا ورا ورا ورا ..
    ههههههههههههههههههههههههههههههههه

  35. إنت جنوبى ولا شايقى .
    شمباتى .
    قلت بتختفا من خشم منو ؟

  36. لجنه الاحباط

  37. كل واحد ولا واحدة تفشل في أهدافها بغض النظر عن السبب …تضرب في البلد دا وكمان البروف يقعد يعاين .ويحمي في الدارة …لكن مثلها كتيرررر .. عشان كل واحد يتعين خاصة قراية الزمن يحلم يجي يقعد ليك في التربيزة ..ويفكر في المرتب ..ولا غير دون تطوير نفسه وما تقولوا لي انا بنظر ..لكن انا بتحدث بتجارب والله كوارث كان من الجماعة كما تقولون , او غيرهم تعالوا شوفوا الفضائح بتاعت المهندسين ..عجائب !!! قال لجنة إختيار قال!! وغقتصاد شنو ؟! وبعدين غقتصادنا ذاتو ما بتحمل مرتب واحدة تاني ..وكمان في الدرجة التاسعة ..دي لو فكوها تساوي أربعة محاسبين او مراجعين ما بتاعين المراجع العام البقبضوا حافز الميزانية السنوي ويعملوا نايمين !!!!

  38. حنين..
    بختفها كف نجف ,,ومن خشم البقرة كمان ! ههههههههههههههههههه

  39. وبعدين معاكم؟ خط هيثرو أخبارو شنو؟
    أخبار خط هيثرو شنووو؟
    يالفاتح ياخوي كسرتك دي بقت ماثابته مااااااااااله

  40. الاخت (س)
    انته اصلا البدخلك لجنة الانتحاااااااار شنو

  41. يا شمباتي جنوبي بعرف علوب … زولا لينا .

  42. الحبيب

    وحات ربى بقا لا دين نافع ولا قرايه نافعه كلووووووووووووووو واسط بى الباسطه

  43. خالد…
    اصلو لا !!؟؟ امممممممممممممممممم,,ممكن فى رسالة خاصة؟

    1. ما تفهمني غلط … بس لانو جاب سيرت علوب فانا قلت كده .

      1. بعدين الحركة الجديده دي بتاعت ترد لي الزول في حنانو دي عاجباني شديد.

  44. الأستاذ الفاتح جبرا
    السلام عليكم ورحمة الله وبركاته
    للأسف اسمح لي هذه المرة أن أقول لك أن معينك قد نضب … وأنك أردت أن تبيض وجه الجماعة.. فلم تدر من أين تبدا واختلط عليك الأمر ….. وذلك لأنه لم يعد هناك من يذهب إلى لجنة الاختيار من بابها … كما لم يعد يوجد من قومك هؤلاء من يعرف إجابة هذه الأسئلة ( اللهم إلا السؤال الأول) لأنهم تخلصوا منهم في الجنوب ثم تنازلوا عنه … ويفتعلون الآن المعارك…. نعم .. الكثيرين من المسلمين يعرفون ‘جابات هذه الأسئلة وهم ليسوا جبهجية ولم يقرأوا في كليات شريعة …فكم من مهندس وطبيب وكهربائي يعلم من امور دينه ما لا يعلمه وزير أوقافهم …. أما إذا كان هناك من عرف الإسلام مع الإنقاذ أو ظن أن الإنقاذ هو الإسلام فيا لضيعته… ولو كان قومك هؤلاء يعينون بناءا على ثقافة الخريج الدينية ومدى تدينه لما وجدت من حالات السرقة والاختلاس والبيع ما تكتب عنه… نحن نعلم وأنت أيضا أن لهؤلاء مقاييسهم الخاصة في التعيين … وليس للدين والإيمان علاقة بتلك المقاييس … فلا تحاول أن تطبل للجماعة وتوهمنا بأنك تنتقدهم

  45. هههههههههههههههههههه,حنانك,,,حبيبى وين حنانك,حبيييييى…
    سيب الجفا يا خالد مدنى وقوووووووووووووووووووووووووووول..
    بلا حنانيات معاك…

  46. خالد .. وشمباتي .. هووووي تغمزكم ده ماااا
    مريحني .. ولا تفهمو بعضكم غلط ولا تفهموني غلط
    علوب ده بشوفو في اعراس اهلنا الصحافة جبره
    الحلة والسجانة والديم .. غايتو يا اولاد
    الخرطوم عليكم حركات …!!!
    كمان جابت ليها خصخصة !!!!

    1. طيب دي ما مناطق نفوذنا ذاااااتا … الجابك هنا شنو ؟؟؟

      1. شقي تقول شنو !!
        …لكن فوق الحلة دي انا تاني ما
        بجي … ما عارف روحي ليه مشهية تشوف شمبات
        وود مدني قبل يفنيهو الانقاذ بدني ..
        امشو يا شيوعيين ….

  47. ههههههههههههههههههههههههههه,,,تبرا من الشقاوة انت…
    لكن هل تصدق انى ما من شمبات وانو خالد ما من مدنى !؟؟
    بعدين قصة الشيوعية دى مباريانى من زمان رفاعة ! ههههههههههههههه

    1. عجيييييب !! وبرضو جبرا ما من جبرة وجنوبي ما من الجنوب وود الخلا ما من الخلا !! لكن اريتني كنت من الجنوب اقلو كنت اكون عايش نشوة النصر بدل مرارات الانهزام العايشنها دي ..
      لكن برضو بيناتكم انتو الاتنين تاني ما بجي .. لقيتكم خترين خلاس …
      يا ناس ود الخلا ما باين مالو ؟ عليكم النبي طمنونا عليهو .. الزول ده بيشبه لي ابو ذر الغفاري .. وخوفي من نفس المصير ……

      1. لكن يا جنوبي شمباتي باراك مباراة الباك للجناح الشمال … عجبتني مساجلاتكم وذكرتني الزمن القمردين … لما كان حتى لعدد علامات التعجب معني وكذلك عدد حروف واو الزووووووول … ربنا يحظكم وسعيدين بيك يا جنوبي يا رايع … نرفع .

  48. هههههههههههههههههه,امكن مشى الخلا !
    كع..

  49. والله يا(س) إنتى طيبة وعلى نياتك ربنا يديك العافية ويخلى ليك طيبتك وبراءتك دى ويكتر فى السودان من أمثالك البراءيين الطيبين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: