مش فكرة؟

أخيراً وبعد أن (باظت أعصابنا) قطعت وزارة السياحة والآثار الطريق أمام بيع مستشفى العيون المركزي الذي تم طرحه فعلياً لعطاءات بعد أن صرح بذلك السيد وكيل وزارة السياحة علي محجوب عطا المنان في حوار للزميلة (ألوان) إذ قال إنه وحسب القانون لا يجوز بيع أثر تاريخي تجاوز عمره قرناً من الزمان كاشفاً عن اجتماع عقدته الوزارة مع مصلحة الآثار، وأن الأخيرة رفضت بيع المستشفى بإعتبار أن المستشفى يقع في دائرة المبنى التاريخي الذي يمثل قيمة تاريخية في حياة السودانيين، وارتبط في الأذهان بشخصية عبدالفضيل ألماظ.

ساق المسئولون تبريرات كثيرة من أجل بيع هذا المستشفي قال أحدهم بأن المباني (منتهية) وأن تكلفة صيانتها (باهظة) ومن ثم احسن (نبيعا) ونعمل بي قروشا مستشفي حديث آخر وكمان القروش (البتفضل) ممكن نعمل بيها مستشفيات في الأقاليم !

كلام زى العسل ولكن (دقيقة نمسح الريالة) .. ولكن ألم يكن نفس الوعد عندما تم بيع حديقة الحيوان (وقالو لينا) (نبيعا) ونعمل بي قروشا حديقة (حديثة) في منطقة الغابة وبمواصفات عالمية؟ وإتباعت الحديقة التى كانت جزءاً من ذاكرة الأمة ومتنفساً للمواطنين يتعرفون فيها على حيوانات وطنهم المترامي الاطراف بأقاليمه المختلفة ويقضون فيها أجمل الأوقات !

(طبعن) إتباعت الحديقة (ليه ما تعرف) وأنشئ في مكانها (برج الفاتح) وطلعنا إحنا (العاوزين لينا حديقة)!

طيب أيه لزوم الكلام ده كووولو ؟ اقول ليكم .. بما إنو مباني المستشفى تحتاج لاموال طائلة للصيانة وانها بشكلها الحالي لا تصلح كمستشفي كما صرح بذلك بعض المسئولين .. وبما انو مساحتها تزيد عن 20000 متر مربع .. وبما إنو موقعها موقع سياحى وجميل فالعبد لله يقترح
أن يتم تحويل المستشفي إلى حديقة حيوانات مع الابقاء على المبانى بعد صيانتها كمكاتب للإدارة .

علما بان هذه الفكرة قد ألهمنى أياها تصريح صرح به أحد الأطباء الذين يصرون على بيع المستشفي إذ قال (لصحيفة الراى العام) أن غرفة العمليات يوجد بها (ثعابين) … وعلى كده وحسب تصريح هذا الطبيب المسئول (عن البيع طبعن) تكون هذه الثعابين هى النواة الأولى من لهذه الحديقة !

طبعا ح (تنطوا ليا في حلقى) وتقولوا ليا طيب الحكومة دى تجيب من وين قروش عشان تبنى بيها مستشفي عيون تااانى؟ .. واقول ليكم والله إنتو ناس طيبين شديد .. القروش الباعت بيها (أمنا الحكومة) الحديقة (الزماااان) تقوم تبنى بيها المستشفى .. والقروش الباعت بيها (الحيوانات) الزمااان تقوم تشتري لينا بيها (حيوانات لى حديقتنا الجديدة) ! أيه رأيكم مش فكرة !

كسرة :
أموت واعرف حيوانات (جنينة الحيوانات) مشت وين؟ شفتو ليكم إعلانات في الصحف عن بيع (أفيال واسود) ؟

كسرة ثابتة :
أخبار خط هيثرو شنو؟

Advertisements

38 تعليق

  1. الله !! هي وزارة السياحة والاثار دي ما طالا
    التمكين ولا شنو ؟؟؟
    غايتو اول حاجة يشتروا التمساح عشان البلد
    الما فيها التمساح ماها سمحي ..

    1. حاج أحمد السلاوى | رد

      هياااااا جنوبى .. كيف يشتروا تمساح ..وليه يشتروا تمساح .. ما البلد كوووووولها بقت تماسيح ..يعنى عاوز تنشفها عالآخر ..ولا شنو ؟
      قال يشتروا تمساح … قال ..

      1. حاج السلاوي ياخوي نحنا ما باقيلنا شيتا نخاف
        عليهو من التمساح !! عِلا باقي ليك ما بيخرب
        علي الورل قدلتو ؟؟

  2. البرنجية كان حقتي عافيتا لي كوكو …

  3. علي ما اذكر كان في وحيد قرن ابيض وهو من اندر الفصائل واعتقد انو ( أهدوهو) لحديقة حيوانات لندن .
    كسره :
    اهديك كل الكون
    تهديني منك لون
    ومساحه بين عينيك
    تبقى المساحة وطن
    ويبقي الوطن واديك .

    1. أريتني كنت بكانو !! اقلو كان حسسوني بي
      وحيديت قرني !!

      1. يا جنوبي وانا اقول البلد مالها واقفه قرون قرون … اتاريهم دايرين يلحقوهو .

  4. يا بروف والله بي حجم الخط البنكتب بيهو تعليقاتنا ده الا التعليق يتنشر حتى ترجع تصححو .

  5. البلد ما كلها بقت حديقة حيوان كبيرة .. لزوم الحديقة الكلها 20 ألف متر شنو ؟؟ ما شاء الله حديقة البلد مليانة بالتماسيح والتيوس والكلاب والثعالب … وحتى الطير اليجيكا جعان(ديل نحنا). فالفكرة يا بروف ما لذيذة .. أحسن نعملا مسجد شهيد .. !!

  6. الحبيب
    الحيوانات لحقت امهات طه
    والارض لحقت امهات طه

    ونحنا لحقنا امهات طه

    لمن اهات طه فترن

  7. هههههههه بتتذكروا الحيوانات الظهرت في الخرطوم ومناطق متفرقة من البلاد توتي والقضارف وحكاية حيوانات القرنتي اللي عملت رعب في توتي وكده والكلاب المتوحشة….ماتفتحوا شوية وشكلا الكسرة الاكلتوها دي قديمة ولا رايك شنو يا استاذنا الجليل…..تحياتي ليك.

  8. Iiههههههههههههههههههههههههههههه,,حتة الريالة موبااااالغا ….
    الله لا كسبهم,انا اوفقهم على البيع والاستثمار,لكن اليبيعوا كل الوزارات افى شارع النيل دى,,بس

  9. الحبيب خالد…
    آه لو آه تفيد محزون..

    اب احمد…
    اممممممممممممممممم,انتو النصيحة دى بتمرقوها سريع كدة ليييه؟؟هههههههههههههههههههههههه..

    جنوبى..
    تستاهلها والله…مبرووووكة وبخيتة عليك…

  10. شفتو ليكم إعلانات في الصحف عن بيع (أفيال واسود) ؟
    انته السوال دى بي جدك
    ومال الاسود البتنهش فينا دى شنو
    والافيالل العماله تدوس فينا دي ماياها ذاااااته

    1. بِلاي ديل هم زاتم أنا شبهت على التماسيح بس الفيل دا ما عرفتو ؟
      ؛-)

  11. والله انا اضم صوتى للاخ خالد مدنى فى موضوع الخط دى
    والا انته قاصد كل الخطوط يابروف

  12. طارق بابكر عبيد | رد

    اذكر من هذه الحيوانات والقصه حقيقيه ويمكنك التأكد منها،، وانو في سنه 1964 الامبراطور هيلاسلاسي أهدي قمندان بوليس كسلا نمر صغير وذلك لدوره في حل بعض المشاكل القبليه، هذا القمندان ما باع النمر الصغير ولكنو طوالي رسلو لجنينه الحيوانات في الخرطوم، اها النمر ده وينو حسه وهل اسره هذا الضابط لها الحق بان تطالب به؟؟؟!

  13. الأستاذ الفاتح والشلة الكريمة
    السلام عليكم
    يبدو أن لديك أمل … فأنت لا تفتأ تكتب … ربما بألم …فتخطيء أحيانا وتصيب أخرى … ولكننا فقدنا الأمل وسأمنا حتي من التعليق … نتمنى فقط أن يبيعوا آخر ما يمكن ان يباع ويرحلوا إلى بلادهم … لأن هذا الذي يبيعونه لو كان وطنهم لما باعوه … وعندما تباع آخر قطعة سيتركونه لنا نحن السودانيين … وحينئذ يكون خناك أمل .. أن نحرره من المشترين كما حررناه من المستعمرين …الآن لا امل كلما حررنا قطعة أعادوا بيعها … وأنت … تبكي على خط هيثرو… وكأن بيتك ووطنك ومستقبل أولادك لم يباع … فقط يوجعك خط هيثرو؟ أم هذه شماتة فينا؟

  14. هو بالله في وزارة اسمها السياحة والاثار وعندها وزير ووكيل وكمان موظفين..؟؟!! غايتو ان شاء الله المرة الجاية الوكيل دا يتكلم لينا عن المتحف القومي شوية

  15. شمباتي .. يباركولك زوال هذا الحكم الغاشم الجاسم .. قادر يا كريم … يباركوا ليك ويباركوا لي ..

    حديقة الحيوان ( الجنينة ) لمن باعوها اتذكر كان ودوا ليهم كم قرد كده وكم ببغاء وكم حمامة رقاصة وابو القدح ويحيد ودوهم حدائق 6 ابريل ( رغم فرحة ستة ابريل لكن انا بحب اقول حدائق مايو ) وبعد داك اختفت هذه الحيوانات وقالوا وكتها انهم بصدد بناء حديقة حيوان غرب سوق ليبيا ام بده وحتي في قرد لمن سمع سيرة ام بده اكتأب وبقي يعمل حركات ما كويسة للزائرات من البنات قرد قليل ادب خلاص !!
    الجماعة بكونوا متحسرين شديد خلاص انهم ما مكّنوا وزارة الاثار يمكن اول شافوها هايفة لكن ظهر انو الدهن في العتاقي والشجر الكبار فوقو الصمغ .. هنيئا لجامعة الخرطوم .. طيّب شجر اللبخ الفوق شارع النيل الزرعو غردون ده بدخل ضمن الاثار !!؟ الخوف يطمعوا في حديد كبري ام درمان القديم ده !!! ويخيروا الاثار بين الكبري ومستشفي العيون وبين الكبري ومستشفي العيون شارع ظلط طويييل .
    اولادي الافارقة شافوا الاسد والنمر والفيل والاصلة وكل الحيوانات لاول مرة في حياتهم في السعودية ما عدا الجدادة والكلب والكديس شافوهم في السودان !!!!
    مستشفي العيون كان ما باعوهو ح يدمرهوا الناس ديل عينهم كعبه ونفسهم دنية وليهم نافرية …
    نشكر وكيل وزارة الاثار ونتمني بيقي عشرة علي المبادئ ..
    جبرا : مع جهجة مستشفي العيون دي انا بضم صوتي لمجموعة طشاش باقي عيونا خدمت كتيير ..
    كسرة : شوف عيني في كدايس في حوش القصر الجمهوري … بيعوهو !! علي الاقل مستشفي العيون مستفيدين منو حاليا …

  16. التحايا و الود ….
    انتو عارفين لية الجماعة ديل مركزين علي بيع المؤسسات لية ؟ اولا لان الكومشن كبير , ثانيا يوضع في الحسابات برة ولا من شاف ولا من دري…..يعني الجن الاحمر ما يكتشفها ….

  17. السلام عليكم ، البرف و الاخوان ، جنوبى ان شاء الله برنجيتاً ما تختاك ، و جزاك الله خير على الهديه ، د/ شمباتى زمان كان مكابسنا فيها د/ ياسر ، ان الليله كنت فى مهرجان التشغيل ببرى ، عارضين مستوردات ، و هناك تمساح محنط مكتوب عليه من فلكلور شمال كردفان ، اى تمساح ما ورل خلوى ، سؤال : تماسيح النيل هاجرت اظنها بعد ما باعوا بيوتها ؟؟؟ ……………. عجبى

    1. تماسيح شمال كردفان دي ما سمعنا بيها الا في العهد الما عايز يبيد ده … اكيد ديل الكسرو في سوق المواسير .

    2. هو النيل الزحا من بكانو ؟ ولا ناس شمال
      كردفان الزحوا ؟ ولا آآآآآ يكون التمساح
      ده طش يوم نميري دفق الهناي في النيل وباري
      خور ابو عنجه لامن مرقا في كردفان ..
      آآآآآخ يا النيل امانة ماك شلت عزاز
      علينا ……

  18. ﻳﺎ ﺍﺧﻮﺍﻧﺎ ﻭﺍﻟﻠﻪ ﺍﻟﻮﺍﺣﺪ ﺑﻘﻲ ﻣﺎ ﺑﻘﺪﺭ ﻳﺴﺘﺤﻤﻞ ﺍﻟﻜﻠﺎﻡ ﺩﻩ ﻭﺟﻌﺘﺎ ﻗﻠﺒﻨﺎ ﻳﺍ ﻭﺩ ﺟﺒﺮﻩ ﻫﻮ ﻧﺤﻦ ﻧﺎﻗﺼﻴﻦ ﺑﺲ ﺍﻟﺎ ﻛﻞ ﻳﻮﻡ ﺗﺬﻛﺮﻧﺎ ﺑﺨﻴﺒﺘﻨﺎ ﻭﺣﺎﻟﻨﺎ ﺍﻟﻤﺎﺋﻞ ﺍﺭﺣﻤﻨﺎ ﺍﻧﺖ ﺍﺳﻪ ﻓﺮﻗﻚ ﺷﻨﻮ ﻣﻦ ﻧﺎﻓﻊ ﻛﻞ ﻳﻳﻮﻡﻗﺎﻋﺪ ﺗﻌﺬﺏ ﻓﻴﻨﺎ .. ﻭﺍﻟﻠﻪ ﻋﺎﺭﻓﻴﻦ ﺍﻟﻜﻠﺎﻡ ﺍﻟﺒﺘﻘﻮﻝ ﻓﻴﻬﻮ ﺩﻩ ﻛﻠﻪ ﻭﻛﻤﺎﻥ ﺯﻳﺎﺩﺓ.. ﺑﺲ ﻋﺎﻣﻠﻴﻦ ﺭﺍﻳﺤﻴﻦ ﻋﺸﺎﻥ ﻣﺎ ﻋﻨﺪﻧﺎ ﺣﻖ ﺩﻭﺍﺀ ﺍﻟﻀﻐﻄ ﻭﺍﻟﺴﻜﺮﻱ ﺑﺎﻟﻤﻨﺎﺳﺒﺔ ﺍﻱ ﻭﺍﺣﺪ ﺣﻴﻂﻖ ﻣﻦ ﻣﻘﺎﻟﺎﺗﻚ ﺩﻱ ﺯﻧﺒﻮ ﺣﻴﻜﻮﻥ ﻣﻌﻠﻖ ﻓﻲ ﺭﻗﺒﺘﻚ ﻭﺩﻱ ﺗﻌﺘﺒﺮ ﺍﺍﺑﺎﺩﺓ ﺟﻤﺎﻋﻴﺔ ﻭﺍﻥ ﺷﺎﺀ ﺍﻟﻠﻪ ﺣﺎﻛﺘﺐ ﻟﺤﻘﻮﻕ ﺍﻟﺎﻧﺴﺎﻥ ﻭﺍﻛﺎﻣﺒﻮ .. ﻃﻴﺐ ﺃﻣﻨﺎ ﺍﻟﺤﻜﻮﻣﺔ ﻣﺎ ﻋﻨﺪﻫﺎ ﺭﺣﻤﺔ ﻭﻟﺎ ﺍﻧﺴﺎﻧﻴﺔ .. ﺑﺲ ﺍﺍﻧﺖ ﺗﻌﻤﻞ ﺯﻳﻬﺎ ﻭﺗﻘﻌﺪ ﺗﻜﺘﺐ ﻟﻴﻨﺎ ﻋﻦ ﻣﺎ ﺗﻔﻌﻠﻪ ﺑﻨﺎ…

  19. والله يا الفاتح لو ما بعرفك كان قلت إنت ذانك راكب فيل

  20. طارق اب احمد —
    والله يا الفاتح لو ما بعرفك كان قلت إنت ذانك راكب فيل—- يعنى ياطارق انت ماشايف الامة دى كوووولها راكبة الفيل بس عينك مانقع الا فى الفاتح الراكب جنب الشباك — ما انت قدام جنب الاضنين وعزت ماسك الدركسون وسلاوى واقف شماعة —
    وباقى الخلق راجنكم تنزلو فى السندة الجاية عشان يركبو

    1. بشبش … الله يكفينا شر الحته الانت راكب فيها .

  21. سلام
    الحيوانات الكانت في الحديقة اكلوها الحيوانات البره الحديقة

  22. كوكو…..
    امممممممممممممممممم,جنس حسادة عليكم !!

  23. سلام للكرام
    ومستشفي الخرطوم مالقت ليها وزير سياحه يافع عنها

  24. الاخ جبرا
    طيب عرفنا مستشفى العيون و وقوفو بيعو محلية القضارف العمرها اكتر من 100 سنة و اتباعت و اتقسمت دكاكين و اراضي تقول فيها شنو.

  25. لى مستشفى العيون ماعوزننا نشوف حاجه نسمع بس احسن ولا شنو

  26. المر الما بتبلع | رد

    طيب نحنا نقول شنو للسيد أحمد عباس الكسر السينما فى سنار وقال ( هدمنا الصنم )
    ووزعها عمارات للتجار

  27. البلمان ده يشيلوهوا من حتة الهمبريب دي عشان النواب ديل يصحصحوا معانا ..
    هيئة القادة والاركان دي قاعدة فوق النيل تسوي شنو !؟ يودوهم هجليج وكل سنة ينقلوهم حسب بكان الدواس وبعد يأمنو البلد كلها ان شاء الله بعد داك يبنو ليهم فوق جزيرة الفيل مانا قايلين شئ .
    القصر الجمهوري ده مافي أييييييي داعي ليهو ..
    مسجد الشهيد ده زاااااااتو ما بكانو ..
    بعد تكملوا الحاجات دي ونفسكم الدنية ما تشبع بعد داك بيعوا مستشفاياتنا وجامعاتنا ..
    هو زااااااتو تعالوا نسعلكم نحنا بتين قلنا يا أبو مروه عشان تجو تنغذونا !!!!!؟

    1. هسع برلمان دي يصلحوها كيف يا جبرا ؟

  28. ههههههههههههههههههه,يصلحوها برضو !
    انت قصدك بلمان من المبلمين ! واااااااااااااااااااااى

  29. والله العظيم حكاية البيع دى حكاية ، لو واحد منهم عندو مترين ملك مابفكر لحظة فى البيع ، لكن ان تبيع مالا تملك ساهل جداً عليهم كيتاً فى الشريعة القالت بعدم جواز بيع ما لاتملك ، البضحك الواحد ببيع وياخذمكافاة من الدولة ويسف من المشترى وبعد ده كلو يرقد ينوم ويشخر ،نحمد الله ان جعل يوم القيامة بالاف السنين عشان التفاصيل بتاعت الجماعة ديل طويلة والعرض نفر نفر وبمهل وما مستعجلين لاحقين شنو، وحساب جد ، وبكى شديد ، وضحك شديد ، وجنس جرس ، نسال العافية فى اليوم داك ،وبس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: