تشليح محلي

كتبنا من قبل منبهين إلى خطورة لجوء بعض المواطنين إلى بيع أعضائهم وبخاصة (الكلى) وقد رأئت بعينى كيف ان هذه التجارة تزدهر منذ سنوات في (القاهرة) بل لقد أصبح لها مقاهى بعينها يرتادها البائعون والمشترون والوسطاء وهنالك من القصص المحزنة في هذا الأمر ما يقطع نياط القلب (لو فضل فيها نياط) !
قلنا وقتها أن (أمنا الحكومة) يعني ح تعمل شنو عشان توقف عمليات التشليح دي ؟ فالجريمة تتم خارج الحدود ، أما أن تنتقل (القصة) ويكون عندنا (تشليح محلي) تحت بصر المسئولين بل أن هذا التشليخ يتم في مستشفي يمتلكه وزير الصحة الولائي (ذاااتو) وأمنا الحكومة تسد دى بي طينة ودى بي عجينة (وتعمل رايحة) وكأنو (مافي حاجة) فهذا والله لم نسمع به في الأمم الغابرة !
فقد اوردت الزميلة (الوطن) في عددها الصادر بتاريخ 2 أبريل 2012م انها قد تحصلت على معلومات خطيرة حول عملية نقل وزراعة كلية طرفها شاب سوداني والطرف الآخر أجنبي حيث تمت العملية بمستشفى الزيتونة بالخرطوم التي تتبع ملكيته إلى الدكتور مأمون حميدة وزير الصحة الولائي وتحت إشراف أحد أشهر الجراحين في مجال نقل وزراعة الكلى وقد تسللت (الصحيفة) إلى المستشفى المذكور وتحدثت إلى الشاب (البائع) الذي أفاد فيما أفاد بأنه لا صلة ولا رابط بينه وبين الأجنبي المتبرع له،بل انه حتى لايعرف حتى اسم الطرف الثاني في العملية مضيفاً بأن المسألة برمتها عملية «بيع وشراء» حيث تم الشراء بمبلغ «50 1 مليون» جنيه بالقديم
توقع العبدلله أن هذا الخبر سوف (يقوم الدنيا) وسوف يهب علماء (السفر) بإصدار فتوى وبيان حول هذه الجريمة غير الإنسانية وان السلطات سوف تباشر إجراءآتها وتحرياتها حول الواقعة وسوف يسارع السيد وزير الصحة و(مالك الزيتونة) بإصدار بيان للناس يوضح فيه ملابسات الخبر وينفي فيه علم المستشفي التى تمت فيها العملية بهذه (البيعة) !
ولكن أياً من هذا لم يحدث ومرت المسألة مرور الكرام مما يفيد شرعية وقانونية (الموضوع) إذن لا تتعجب عزيزي القارئ إذا تعدت عملية البيع والشرأء (الكلي) إلى كامل بقية الأعضاء وإمتلأت الصحف الإعلانية بأسماء وعناوين ومستشفيات الشركات المتخصصة قي بيع الأعضاء فهذه شركة (يا سارية) لشراء وبيع (ألاضنين) .. عضان (كومبليت) .. إذن خارجية بس .. أذن وسطى.. طبلة .. ! شنو يعني لو مواطن باع ليهو أضان بي كم مليون وخلا التانية يعني ح يحصل ليهو شنو؟ اقل حاجة يستريح من سماع تصريحات المسئولين وسماع الغناء الهابط والإزعاج بتاع اليومين ده!
أما شركة (الحلقوم) فقد تخصصت في شراء وبيع (الحبال الصوتية) هو ذاااتو المتكلمين ليها شنو؟ ما أهو قاعدين نتكلم ونسال (خط هيثرو أخبارو شنو) ومافيش زول قاعد يهببوا لينا .. بلا (حبال) بلا كلام فارغ .. إنتا قايل نفسك (هاني شاكر) يعنى حبالك دى لو خليتا ح تدفع ليك متأخرات الإيجار وللا رسوم الجامعات وللا الأكل والشراب البقى غالي ده !
أما شركة (تبصرون) فهى متخصصة في شراء (أسبيرات العيون) وبيعها لمن يعانون .. كل أنواع الشبكيات والقرنيات والعدسات الملونة والعادية .. أيها المواطنون يا افراد لشعب السوداني الفضل الشايفين ليها شنو؟ من لا يملك (قرنيته) لا يملك قراره .. أهو تاخد ليك مية ميتين مليون وتستريح من قراية الجرايد الكلها بقت فضائح دى !
أما شركة (شريان الحياة) فقد تخصصت في شراء (الشرايين) والاوردة وبيعها لمرضي القلب والجلطات (المرطبين) العاوزين يعملوا غمليات (بايباص) .. يعني ح يحصل ليك شنو لو بعتا ليك ياردة ياردتين من شريان (كراعك الشمال) وحليت مشاكلك؟ شريان كراع ايه اللي إنتا جاي تقول عليه ؟ إنتا قايل نفسك (رولاندو) وللا (ميسي)؟

كسرة :
بالطبع لن تكون هنالك شركات (مخ واعصاب) لأنو الشعب كلو مخو بقى تالف وأعصابو بايظة وبيكلم في روحو وكده … بالطبع لن تكون هنالك شركات لشراء وبيع المرارة عشان مرارتنا إتفقعت من زمااااااااااان

كسرة ثابتة :
أخبار خط هيثرو شنو؟

Advertisements

41 تعليق

  1. في مسؤولين كتار في البلد دي ما عندهمدم..انا مستعد ابيع دمي يمكن الحال ينصلح شوية ويختشوا على دمهم

  2. سلاماااااااااااااااات للجمييع
    الجديد في الموضوع هو علم الناس بانه في عمليات ذي دى ومال طال انه الموضوع اتنشر في الجرايد ومافي اي رد فعل اعتقد وكل اعتقاد ما حقيقي انه التجارة دي جد حا تزدهر في البلد دي لضيق الظروف وعدم وجود حلول بالعائد الهلامي دة وحقيقة حتى الفتاوى ماحتنفع هنا لانه الدين لايعالج النتائج فقط بل المسببات وطالما الائمة ساكتين من الاسباب فليسكتو عن النتائج والحساب قدام

  3. يا سعادتك القربة البتنفخ فيها دي وثقب الأوزون وااااااحد.

  4. الزول ده باع قبل قرار حظر قطع الغيار
    المستعمل ولا بعده ؟ عشان ما تبقي كلية
    وخراب ديار ………..
    حكمت فأفسدت وفصلت وشلحت فرقصت يا … هناي !!

  5. البيع ما مشكلة … المشكلة في النشالين .. يلم فيك واحد وإنت نايم تصحى تلقى روحك واقف على عجل الحديد …
    الله يجازي الكان السبب .. والله يقطع كاريهم محل ما قبلوا … والله يخلص لينا حقنا منهم بركة من صلى وقال يا الله … آمين

  6. تعرف يا أستاذ إنه الظلمة من أمثال صاحب الزيتونة ، كل ما كتر إنتقاده زاد إنتشاره وتوسعت مملكته‘ فوضنا أمرنا لله ..
    كسرة :
    اختفت الكسرة بتاعت خط هيثرو من الصحيفة، ياربى يكون لقوهو ؟

  7. السلام عليكم ، البرف والاخوان ، اها و الزول الباع ده قبض و لا غشوهو ن وناس الضرايب حضروا العمليه دى ، و الرخص و النفايات و الرسوم ، 150 مل بى القديم كعبه ، تلقى الطبيب و ناس الزيتون و كمان السم سار هبروا هبر ، نوصى بوضع لائحه بالاسعار ، سؤال طبى : ممكن المخ يتغير لانو اغلبهم ما عندهم فنركب ليهم واحد ؟؟؟ ………………… عجبى

  8. عم جبرا :
    زمان كانت هى اشياء لا تشترى اترى ان فقاوا عينيك ووضعو مكانهما جوهرتين اكنت ترى ؟؟؟
    الاجابة ما لازم ارى المهم الحاجات تشترى !!!! والمهم الجوهرتين بتسد جوع المرا !!! ههههههههههههه

  9. استاذنا والسمار تحياتي
    والله الحكومه ما قصرت اهو عملت ليكم
    سوق جديد احسن من سوق المواسير
    بعدين انتو زعلانين مالكم اساسا انت لو
    احتفظت بكليتك دي حتعيش كم سنه مع
    المويه الكلها طمي وحاجات ما شايفنا
    ما احسن تقبض ليك كم مليون قبل ما
    تتلف برااااااااااها كده

  10. منهم لله البقو لينا سبب عشان نبيع اعضانا

  11. لا حول ولا قوة الا بالله…
    خيبك الله يا مامون ويا ولى الامر …
    سُب عليكم..

  12. الحلوين ازيكم :
    اعتقد انو الجماعه ديل اخترعو فكرة جديده لرفع المعاناه عن كاهل الشعب قامو وفرو مشترين لاسبيرات الشعب
    طبعا فى حاجات زى ما قال جبرا ما بتشترى لانها معرفه ضاربة ( المصارين اللاتهردت – القلب الباظ – العيون الجفت مويتن من الحزن وهو كظيم !! – الكرعين الفترن من المساسكه للمعيشه ) .
    شمباتى : اى نعم سب على كل من تاجر بقوت هذا الشعب واوصله لبيع الاسبيرات .. تحياتى وتعازى فى حميد ونقد وفى الشعب الفضل

  13. حاج أحمد السلاوى | رد

    إنتو يا جماغعة الخير الناس ديل ناسين يوم الحساب ..ولا شنو ؟ الحاجات ما قاعدين يسمعوا بيها ..ولا ما فاضين من اللغف والهبر ..ولسان حالهم يقول وإن شاء الله ما يفضل فيها نفاخ النار..
    غايتو حسبنا الله ونعم الوكيل ..و كلو أول ليهو آخر ..

  14. اللهم جازى من كان السبب واحفظ عبادك اهل السودان فانهم صبرو وصابرو ورابطو فاحفظهم من الاشرار اميييييييييييييييييين

  15. هههههههههههههههه ، والله يا جبرا انتا رائع غستمة تقيلة

  16. اصلا الشعب دة مشلح مشلح فالاحسن الواحد ياخد لية قرشين حلوين زي ما قال عدل امام (يا تنتن يا تنتن) …فعلا ازيتونا ( الاسم الجديد لل-الزيتونا)

  17. الجماعة ديل فشلوا في زراعة الارض خلوهم امكن ينجحوا في زراعة الاعضاء….و يصبح الاسم الجديد لوزارة الزراعة : وزارة زراعة الاعضاء…ناس موسوعة جينس قرروا يعملوا موسوعة خاصة بالسودان ……

  18. جبرا والسمار
    سلامات.
    يا جماعه كدى روقو وأصبروا شوية . اليومين دى الجماعه ديل عندهم ثقافة جديدة بتاعه الاستقالات .يمكن مامون حميدة دة يقرا الخبر دة يقوم يقدم إستقالتو من إدارة المستشفى .
    لكن المشكلة الوزير مامون حميدة يرفض الاستقالة بتاعه مامون حميدة ريئس مجلس الادارة ونرجع لى حجوة أم ضبيبينة …
    الله فى …

    1. بالله مصنع بي مليار دولار يشتروهو بدون ما
      يطلبوا من البائع ( نظام التشغيل ) ياخي
      ده المواطن العادي لمن يشتري موبايل تلقاه
      سالي روح البائع ( السوفت وير / الهارد وير
      والذاكرة وينا ؟ وحجما كم ؟

  19. اخى جبرا ان شاءالله المانع خير بقيت ما داخل معانا فى الخط ولا حتى خط المرور السريع
    بس مايكون حاجزنك ناس المرور

  20. ما يكونوا حاجزنك ناس المرور ويمرقوق لينا مشلح

  21. حاج أحمد السلاوى | رد

    كسرة جديدة .. إضافة إلى كسرة خط هيثرو ..الضائع

    اخبار تشغيل المصنع شنو ؟

  22. أزيكم يا ناس وكيفنكم يا ناس أنا لي زمن منكم …
    هو بالله يا جنوبي حكاية المصنع كانت سوفت وير ما جابوهو ليهو، أوعاك تكون أن كمان صدقت الحكاية!!!!!
    يا اخي الراجل ده رجل واضح ودوغري وواضح ـن الماعة عايزين يخموهو ويلحقوا أجتماعات بنك التنمية ويفتحوا المصنع وبأي طريقة،حتي ولو جابو سكر جاهز بصبابة التعبئة، ويجو الجماعة ويهللو ويكبرو ويقصوا الشريط ويعبوا السكر في جوالات ولا يهم أن كان من النيل الأبيض أو النيل الأزرق، المهم سكر وأتعبأ وشافوهو الناس وخلاس، في واحد حا يجي يتابع الموضوع،،،،،
    لكن صاحبنا هذا طلع مفتح ورفض هذه المسخرة، والقصة ليس ليست سوفت وير ولا هارد وير ولا يحزنون، القصة يا صديقي أنو في انسان صبح قصة وفي هناك عبرة لن تزيل غُصة!!!!!
    قصة هذا الوزير قصة فريدة ياجنوبي يا صديقي، وما ينط ليك زول ويقول ليك دي حركة في شكل وردة!!!!!!

  23. حاج أحمد السلاوى | رد

    بس الخوف قصة الإستقالة دى تكون زى الإستقالة إياها .. إستراحة وزير ..
    طيب يا جماعة إذا آمنا أن السيد الوزير فعلن راجل مخلص وإستقال عشان المشكلة إياها اياً كان نوعها ومصدرها .. أموال الشعب دى راحت شمار فى مرقة فى حال عدم إمكانية التشغيل ؟ وكيف نرجع الفلوس قبال ما تمشى وتروح زى خط هيثرو ..
    ألا توجد محاسبة ؟..وسؤال ..مين المسئول عن الشى اللى حصل دا ؟ اين الوكيل واين بقية كبار الموظفين ..ولا الحكاية كوووولها حتروح دغمسة فى دغمسة .. وتسجل القضية ضد مجهول ..
    وفى احسن الحالات يقولوا يظل الوضع كما هو عليه وعلى المتضرر ( الشعب السودانى الفضل ) اللجؤ إلى القضاء ..وعيش .. يا ………… لحد ا ما تخلص القضية ..والناس تنسى الموضوع كما المواضيع الراحت ..

    1. حاج السلاوي يا خوي اتخيل انو الناس ديل
      اعلنو الافتتاح قبل ما يجربو المصنع !!
      وكهربة سد مروي برضو حصل فيها مشكلة
      يوم الافتتاح ..
      شفتا شفقة بت صديق البتلبس توبا في
      نص الطريق !!!
      ياخي عوم الوز ده ما سمح ورايق ياخ
      الناس دي مالا بتجلبق كده !؟

  24. هدهد سليمان .. عجيييب !! هو بالله الشغلة ما
    كده ؟ وشووووف ودروني كيف !! الهند وامريكا
    وشنو ما عارف ..
    انا غايتو سمعت انهم كانو دايرين يجيبو كم طن
    من سكر كنانة ويغيرو الشوالات من شوالات المصنع
    الجديد لكن القصة انكشفت ..
    كدي بالله ادينا النبأ الاكيد باقي انت موثوق
    فيك من زمن سيدنا سليمان ..
    بس النبي ما تقول لينا طلع دلالة يا دُللي بيع
    فللي زبون ما يجلي يشيل ما يخلي …

  25. سلام ياقبيلة،،،
    هوووووي يا جنوبي ويا سلولو ويا هدهدنا البتجيب لينا خباراتنا وشماراتنا (مش الهدهد ده هو شعار الجهاز داك ولا انا غلتان)،،
    شوفوا يا ناس يا متشائمين أنتو، لماذا أنتم هكذا دائما” تنظرون للنصف الفارغ من الكوب ولا تنظرون للنصف المليء وساقط من الكوب يا سلولو ويا جنوبي ورفاقهم من المتشائمين ديمة،،،،
    الزول ده طلع تفيحة ووزير وأبن ناس كمان وماعاوز يضحك عليكم كما ضحك اللذين من قبله ولا زالو يضحكون وأنتم في غيكم سادرون!!!
    قلنا ليكم أصحو وصلحوا ما بكم علشان أموركم تبقي ألسطة!!
    قوموا لفو كدا لا دا قاعدين بس تنقوا وتنفخو في الفارغة والمقدودة، ديل عالم شنو ديل يا عالم يا هووووووو!!!!!!!!!

  26. يا جماعة وزير الصحة الولائي معروف عنه أنه مخلب لكبار آخرين فهو عندما قرر و شركاه افتتاح جامعته الخاصة استقال من وظيفة مدير جامعة الخرطوم بعدما حول جميع الأجهزة و المعامل التي أرسلتها الحكومة الأمريكية لجامعة الخرطوم و التي خسرت الكثير من معاملها و معداتها أثناء فيضانات الخريف .. أي إنه متعود على مص دماء الشعب السوداني لدلك لا غرابة في أن تزدهر في عهده الميمون كوزير صحة ولائي تجارة الأعضاء علناً فحكومة الإنقاذ لا فض فوهها و فوه رئيسها لم تتواني في تسويق الفقر و تعميق مفهومه بدلا من المشروع الحضاري الذي أسقطوه بالضربة القاضية لترضى عنهم أمريكا .. هههههه حكومة بلا قيم أو أخلاق

  27. ودالخلا .. اولا حمدلاك بالسلامة .. وتاني لا تكتر
    غيابك عشان ما يبقي عادي ..
    النصف الفارغ من الكوب هو المقاصدنا انت
    دايرنا نخلي المقاصدنا ونعاين الجنبة التانية ؟
    الوزير ود الناس ده الجابو لينا شنو وعمايلنا
    ياها زااااتا …..
    وحات الله بي طريقتك دي الخلا محمّدك ….

  28. الدانقويون الاعزاء —
    التشليح يابروف يدأ من بدرى – ناس البرج العاجى شلحوا الاخلاق السودانية وبدلوها بى عدة صينية لابتحمل سخونة ولابرودة تتشق وتتطق فى كرتونتا ==
    ودالخلا — (ولا الرفيق الفسل– )عليك النبى الطير مابيحن لى حالنا ؟ وبعد دة سائلين الله الهداية — كدى شوف لينا الجماعة ديل سائلين فى شنو ؟
    سلولو ———————————————————- شوق شديد — ابكرونا ويييييين ؟

  29. عليكم الله يا جماعة انت زعلانين عشان الجماعة اياهم وصلوا الشعب لي مرحلة بيع الاعضاء ، هو الجماعة ديل من زمان باعوا روحهم كلها للشيطان عايزنهم يزعلوا عشان واحد باع كليتو ولا عشان واحد باع كراعوا ، وبعدين ببيني وبينكم كدا الواحد مننا لو باع اسبيراتو واستفاد منها مش احسن من ما يصيبوا العمى والطرش والكساح بسبب الفقر والجوع والمرض والتصريحات الحكومية البتهجم الواحد وتفقع مرارتوا .
    مع خالص حبي
    صديق قديم

  30. سلام ياقبيلة،،،
    جنوبي آند بيشبش، ده أنتو ليكو وحشة بشكل، أبقو تيجو، وما تقطعو مننا الجوابات، وفعلا” يا أسدقائي الخلا ولا الرفيق الفسل، خسوسا” بعد ماأنهد الجبل وأتشتت المعمور، باقي ليكم الحكاية دي فيها أمل ، نحن ترانا مقاصدين النص المليان عكس جنوبي لكن المصيبة أنو ماشي حسيان!!!

  31. يااااااااااااا بن الفلاة ..
    كدى خلينا نحنا ومن عمايلنا وقول لينا الحقيقة الغائبة فى موضوع المصنع دا ..الحصل شنو ؟
    الوزير دا إستقال عشان شنو ؟ الناس عاوزة تعرف الحقيقة بدون دغمسة ولف دوران وضحك على الدقون ..
    ممكن .. تورينا الحاصل شنو ؟؟؟؟؟

  32. برضو تشليح يا بروف

    إستقالة وزير الصناعة ودقسة المتفتح جريمة

    زمان ما قلنا ليك ………………..

    العقرب ولاد جنس ولادة – ان جيت بكانو أكتل الجنون

    يا سيادة الوزير يا سيادة الباشمهندس – قالولك – ان كان لقيت جنى ال …….. وجنى ال……… أكتل جنى ال ………. وخلى جنى ال………….

    السستم سستمنا يا بابا مين يقدر يقلعنا يا بابا

    الزارعنا غير الله اليقلعنا

    سستم ( system ) مين يا عمك ؟؟؟

    دي معقولة – والله كلام !!!

    والله لو جبت 3 خريجين كرت كرتون يعملوا ليك سستم في ست ساعات ل 6 مصانع سكر وزيت وصابون وأدوية وأسلحة ومتفجرات وطائرات

    كسرة : سيادة الوزير كان ماسك مالية جمهورية السودان لمن كان مليون ميل مربع يقيف قدامو سستم ؟؟؟ معقولة ياسكر النيل الابيض ؟؟؟

    يا باشمهندس بطنا جابتك والله ما بتندم ……. القدم السبت رجع ليهو الأحد في وشو من أكبر راس عندك لأصغرهم…………… وعلي وعلى أعدائي ويا فيها يا في ال…………….

    وأرمي قدام وراك مؤمن – والريس عارف البيحفرولك بى تحت تحت – ومع قائل كيف يصل البنيان حده اذا كنت تبني وغيرك يهدم أبقى عشرة على البصيبك !!!

    وناس السستم ديل لازم تسستمهم بالعندك والماعندك

    وتقولي شنو وتقولي منو سستم وزير الصناعة ( الفلم يتكرر – تأجيل افتتاح مصنع سكر عسلاية – بسبب…………… ( برضو سستم يا ربي ؟؟؟ وسيادة الوزير واحد من المقربين يقولو يا ريس – والله نميري لو سمع بيشيل رقبتك ) ……… ويتم افتتاح مصنع سكر عسلاية في موعده ….. بس الزمن داك ماكانش عندنا عقارب – كانو وطاويط وجعران والكل سواسية لاوزير لا غفير لا حد يعلو على الآخر

    اللهم هذا حالنا لا يخفى عليك وضعفنا ظاهر بين يديك
    توفنا مسلمين وألحقنا بالصالحين

  33. يا بروف سلااااااااااااام ومليون سلام

    يعني بالحساب كدا وريدين وقرنية وأضان حيخلوني مقندل وراكب زي وزير ال…………… في الشمالية – وأكون عندي عربية للخضار وتانية للأولاد يوديهم المدرسة وتالتة لمرتي توديها الحنانة كل تلات يوم ورابعة واقفة احتياطي نظام شوفو مافي زول راكب زيو لا فتحي خليل لا عبد الرحمن الخضر زاتو

    وبباقي القريشات اشتري لي كم بيت ومشاريع كدا في الختوم مجل الريس ينوم والطيارة تقوم

    وكسرة أخيرة : ممكن نزيد وريدين وقرنية وأضان من المرة وشافعين تلاتة يعني تحسين وضع بس

  34. حاج أحمد السلاوى | رد

    البشاوى .. إنت مسجل غياب شديد .. عايزين إيضاح سبب الغياب قبال نطبق عليك القانون..
    عارف ردك حيكون .. يعنى بس بقت عليا أنا يطبقوا فينى القانون ..
    لو كان فعلن فى تطبيق وتفعيل للقانون .. ما كان حصل الحصل فى مصنع النيل الأبيض..
    بس أنا مستغرب إنو المهندس عثمان ميرغنى لم يعلق ولو بكلمة على موضوع المصنع دا مع إنو هو راجل مهندس ومفترض يكون بيفهم فى الحاجات دى أكتر من المنظراتية التانيين ..بس دا يوريك إنو الراجل دا مسير من فوق وبيكتب بتعليمات عليا .. اكتب كدا …وما تكتب كدا ..

    كسرة مشابهة لكسرة أخونا جبرا … أخبار المصنع شنو .. حصلبوا ليهو سوفت وير …ولا لسه ؟؟

  35. زمااااااااااااان ( حلااتو ) لمن جاء ما قال ليكم جاي يحل مشكلة النيل الابيض وقعدتو تضحكوا فوقو .. اها خموا وصروا .. مدد مدد يا ابو هاشم .. يا ربي شمال كردفان ح يحصل فيها شنو ؟
    هسع قصب السكر الزرعو ده ما بيخرب !؟
    الحكومة دي معمول ليها عمل .. كل حاجة تمسكا يبقي تراب .. يا سيدي الحسن تنجدا ما عشانا هي عشانا نحنا نحن فترنا يا سيدي الحسن …
    زي ما عرستو لي دِبي عرسو لي سلفاكير وريحونا .. واهو كلو اسمو حق الرد اقلو يمكن يدينا المهر 20 مليون برميل والتحلية تكون ( بالحلو ) ..
    وكان للعروس تعالوا اديكم بتي دي لكن علي الطلاق ما يبقي وكيلا لو يلحس كوعو …ما عشان حاجة عشان ما ينحسا …

  36. شكيتهم على الله رب العباد اللا نام ولا أكل الزاد …

    بعد ما فلَّونا … بدوا يشلحونا …

  37. سوداني مغلوب علي امره | رد

    والله بالطريقة دي كمان خمس سنوات بس ما حتلقي زول صايم رمضان لانو شنو ؟؟؟؟؟؟؟؟؟؟؟؟؟؟؟ يا سبحان الله الحاجات الزي دي كنا بنشوفوا في الافلام والخيال العلمي والمعابعرف ايه

  38. تحت خط الفقر القاسي؛ تنتشر تجارة الأعضاء البشرية وبيع الأجنة المجهضة.. تجارة في ظاهرها طوعية وإنسانية وفي باطنها استغلال بشع لحاجة المعطي وظروف المتلقي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: