بدون لساتك

لم يكن العبدلله يعلم بان هنالك جانباً مشرقاً للإخفاق إلا في عهد (وريتنا جديد) هذا الذي نعيشة فما أن تقع واقعة (سوداء) متلتلة إلا وبحث الباحثون وفلفل (المفلفلون) حتى يجدوا شيئاً يبعد الناس عن عمق المأساة ويليهم عن قساوتها وذلك بتوجيه الضوء لجزئية تبرز الجانب المشرق للإخفاق !
والأمثلة على قفا من يشيل ففي مطلع أكتوبر من العام الماضي نجا «45» شخصاً من كارثة جوية بسبب عطل فني أصاب الإطار الأيسر لطائرة ركاب صغيرة تتبع لشركة )سودانير( مما أدى لعدم أخذ وضعه الطبيعي في مرحلة الهبوط. احتشد عدد كبير من المواطنين شرق المطار وغربه بعد سماع نبأ العطب الذي أصاب الطائرة وهم يتضرعون إلى الله بالدعاء أن تهبط بسلام وقد تقبل الله دعواتهم ونجت تلك الأرواح من ميتة بشعة !
طيب حصل أيه؟ هل إمتلأت الصحف بالمقالات التى تطالب بمعاقبة الجهات المسؤولة عن صيانة هذه الطائرة والتأكد من جاهزيتها للإقلاع؟ هل إمتلأت الإذاعات والفضائيات بتصريحات المسؤولين التى تؤكد أن المسألة لن تمر بسلام وأن التحقيق سوف يشمل كل من له دخل (في إنو اللستك ما نزل؟) .. بالطبع لا .. فحسب نظرية الجانب المشرق للإخفاق فقد إمتلأت الصحف والإذاعات والفضائيات بالأحاديث والمقالات والتصريحات والمقابلات التى تشيد بقائد الطائرة ومعاونيه وتأكد على كفاءة الطيارين السودانيين (لأنو ممكن ينزلو الطيارة بدون لساتك) ولم ينس (جماعة الجانب المشرق للإخفاق) أن يسلطوا الضوء على فعالية إجراءات السلامة والطوارئ بالمطار، ولك عزيزي القارئ أن تعلم أن السيد وزير النقل لم ينظر إلى الجانب المظلم للإخفاق فيقدم إستقالته بوصفه مسؤولاً عن (خمسين روح كانت ح تروح) بل نظر إلى الجانب المشرق للإخفاق فأصدر قرارًا بترقية كابتن الطائرة ولسان حاله يقول (هسه لو ما دربنا الطيار ده كويس كان نزلا بدون لساتك) !
لعل أبرز مثال لنظرية الجانب المشرق للإخفاق هو تقديم السيد وزير الصناعة عبدالوهاب عثمان لإستقالته بعد الإخفاق الذي صاحب تأجيل إفتتاح مصنع سكر النيل الأبيض فالرجل بعد أن إمتلأت الصحف وكل وسائل الإعلام بالإعلانات التي تشير إلى تاريخ موعد الإفتتاح ورغم أن الرجل يعلم تمام العلم بان المصنع لم يمر بفترة تجريبية (إن شاء الله يوم واحد) إلا أنه قد إكتشف (فجأتن) إنو مسالة الإفتتاح دي لسه بدري عليها وفي (الثواني الأخيرة) قام سيادته بتقديم إستقالته !
على الرغم من أن الفشل في تعثر إفتتاح وتسليم (المصنع) في موعده أو الفترة الزمنية المحددة لتنفيذه يعد إخفاقاً يشير إلى عدم التخطيط الجيد والمتابعة اللصيقة للسيد الوزير ومن ثم (المنطق) يقول أن يتم قبول إستقالته والتحقيق معه حول هذا الإخفاق ! إلا أن جماعة (الجانب المشرق من الإخفاق) قد تركوا مسالة التعثر والتأخير وعدم الجاهزية والإلتزام بالموعد المحدد لبدء التشغيل فإمتلات الصحف بشكر الرجل لأرسائه (أدب الإستقالة) وأخذت تكيل له المدح والثناء وضاعت مسالة الإخفاق وسط عبارات الشكر والإستحسان كما ضاعت قصة (اللستك الما نزل) وسط زحمة التكريم والإشادة بشجاعة الطيار .

كسرة :
يعني شنو؟ نعتبر الوزير ده نزل الطيارة بدون لساتك !

كسرة ثابتة :
أخبار خط هيثرو شنووووو؟

Advertisements

26 تعليق

  1. مبروووووووووووك البرنجيه ……………..عجبى

    1. ده اليوم الدايرنو ليك
      يا كوكو مبروك عليييك ..

  2. السلام عليكم ، البرف و الاخوان ، المشكله وضع الرجل المناسب فى المكان المناسب ، الوزير ده ما كان بتاع بناء و ردميات وتوزيع اراضى الجابو شنو للصناعه ، هذا البرنامج يمكن شراؤه داخل الولايات الامريكيه و احضاره الى الخرتوم ، ولا كتابة برنامج بديل ، يمكن ما بى نفس الجوده ، لكن مع الممارسه على الارض حيبقى احسن من الاصلى ، خصوصا خصوصا لو ادو العمال حقها ، عندنا آلاف من بتاعين الرقميات و الكمبيوتر شوية تدريب على عمليات التشغيل و يعملوا لينا احسن البرامج ، نعلن عن قيام كورس Pre-Instrumentation بمركز الواحه للتدريب المتقدم ، 0155281607 ، لفهم نظريات الكنترول ، سؤال : لى متين نحن فى الاكاديميات و مخلين التقنيات …………………. عجبى ثم عجبى ثم عجبى

  3. يعني الراجل الما بيقدر يتحمل مسئولية اولاده
    ويقوم يشرد منهم ده نقدر نقول ( ادب شرده )؟
    هو لو عندو احساس بالمسئولية اول حاجة كان
    يحقق في الموضوع ويعرف السبب والمتسبب ويعاقبو
    وبعد داك يقدم استقالته اعترافا بغلطتو في
    عدم المتابعة من اول !!
    هو زاتو يا كافي البلاء الشئ ده معمول بدون
    عقد اتفاق يضمن حقوق الطرفين ..
    ولا آآآآآآآآآ ( مسيار وكده )ولا ياربي إيثار !!
    غايتو الكابلي تاني لو غنا غيرو يكون في سُكّر
    ناس الامن ح يفهموه غلط ..
    هو زااااتو السُكّر مضر بالصحة …

  4. اخي الفاتح والاخوه الاعزاء
    سلامااااااااااااااااااااات
    هو انت فى دا ولا فى العمل موضوع البكور وجر الزمن وخلانا خارج المجموعه الشمسيه حقتنا زول واحد ساله مافى يعنى بالواضح كده نحن خارج الزمن مصنع يفتح مصنع يقفل ما مهم
    ياريت يرجعوا لينا الزمن القديم عشان نعمل لينا سور للاخلاق والمبادى والكرم وطبع السودانى العفيف
    الخيره لااهله قبل نفسو
    كسره
    اااه ياوجعى الملخبط نصه بقاق والباقى مظلط

  5. يا جماعة ما تخلوا الراجل يصرف راتيه مع البدلات لاخر لحظة !!!!!!! لعلها تفرج

  6. البرووف والسمار .
    سلام .
    لنا عبرة فى قصة سيدنا موسى مع بنى إسرائيل حينما أرادو الدخول الى القدس فحرمها عليهم أربعين سنة يتيهون فى الارض أشار العلماء الى أن الاربعين سنة دليل على أن هؤلاء القوم لاخير فيهم ولافائدة ترجى منهم وإنما الامل والرجاء فى أبنائهم واحفادهم من بعدهم (الفرق بين الجيل والذى يلية أربعين سنة ).وبالنظر الى كلام أخونا ودالخلاء عن تغيير مابالنفوس نقول إن مابنفوسنا لايمكن تغيرة بقناعاتنا الذاتية وإنما يجب أن نرحل عن هذة الفانية ونترك المجال لأبنائنا ليأتو بقناعات جديدة وآمال ورؤى مغايرة فجيلنا هذا لايمكن أن يغير أفكارة ولايمكن أن يترك الانانية وحب الذات …
    والله شنو …

    1. للا يا اخوانا نعمل لينا انتحار جماعي كده.

  7. حاج أحمد السلاوى | رد

    هنالك مقولة مشهورة جدن .. بتقول من أمِن العقوبة اساء الأدب ..
    لكن بالرغم من ترحيبنا بإرساء قاعدة أدب الإستقالة بس مش كفاية ..لابد من التحقيق للوصول إلى الأسباب والمسببات لأنها أكيد ما حصلت فجأتاً .. دا مصنع كلف ملايين الدولارات … فى عقد عمل وعقد تشغيل وصيانة ..وعقد ضمان حسن تنفيذ الأعمال وهلمجرا .. فهل ضاعت كل الحقوق المترتبة على العقود دى ..ولا شنو ؟
    التحقيق عن طريق جهة محايدة لا علاقة لها بالسلطة ولا بالوزارة دراءً للدغمسة ولفلفة الأمور وتسجيل الموضوع ضد مجهول ..
    وبعدين بينى وبينكم المسالة دى حتكون زى إستراحة المحارب إياها..وبكرة يتعين وزير للخارجية ..
    وخلونا النشوف آخرتا شنو ..!!!

  8. السلام عليكم ، ونحنو بنفتش فى التالته يا جنوبى ، ولا واقعه ، تانى ادب شرده حقت ناس الغرب ، ناس خلانا بقولو خليته لى ولده ، و ولده ده عمره عشره بالكتير ، اذا عرف السبب بطل العجب ، باقى ليك السبب كان صعب ، لكن الهبرو ملو ، ضربوا الحوافز والكومشنات وعايزين يزوغو…………..عجبى

  9. ههههههههههههههههههههههه,,والله لما قريت رفض الرئيس للاستقالة دى ضحكت لمن وقعت على قفاى..
    لكن رجعت وقلت اكييييد خايف انو الجماعة يكونوا خايفين انها تبقى موضة وتبقى عليهم استقالة وعقاب بلد ! كع كرع رع..

  10. كوكو..سلام…
    مبارك البرنجية وعقبال نبارك ليك الهناى ….

    1. حاج أحمد السلاوى | رد

      شنباتى ..وانت متين … يا مولاى ؟؟؟؟؟؟؟؟؟؟؟

  11. قال تعالي : ( ولا تأكلوا اموالكم بينكم
    بالباطل وتدلوا بها الي الحكام لتأكلوا فريقا
    من اموال الناس بالاثم وانتم تعلمون )
    اتضح ان من المساهمين في مصنع سكر النيل الابيض
    صندوقي المعاشات والضمان الاجتماعي !!!
    بأي حق استباح القائمين علي امر الصندوقين ان
    يعطوا من اموال المعاشيين ؟ وهل تم استشارة
    المعاشيين ؟
    يا ناس دي دعوة المظلوم دعوة ناس بايته
    ( القوا ) وكايسه حق الدوا ..

  12. انتوا المطار الجديد و صل وين ؟؟؟

  13. الناس ديل ادمنوا الفشل بدليل عندما احرز السودان الدولة الثالثة من الاخير لاكثر الدول قشلا واحد قال ليهم ( حتي في الفشل ما نطلع الاوائل….) عشان كدة هم مصرين و ملحين يحرزوا هزا الرقم…

  14. الشماعة معروفة ، العقوبات الامريكية السبب في وقوع أي طيارة او موت أي مواطن مع انه هنالك مصنع لصيانة وصناعة الطيران ؟؟؟؟ .
    كسرة : البرلمان يوافق على زيادة المعاناة اي زيادة اسعار المحروقات التي تؤثر على كل بيت بصورة مباشرة او غير مباشرة ، كل مسئول يملك سيارة او اثنين اعضاء البرلمان الوزراء بانواعهم واقاربهم الولاء واقاربهم المحافظين اقاربهم ووووو نوقف عنهم مخصص بدل محروقات فقط وسيتم توفير اضعاف ما يمكن توفيره في رفع الدعم , بالعربي كده المواطن أن لم يمت بالحرب يموت بالغلاء والجوع

  15. سلاوى..
    ابييييييييييييييييييييييييييت

    1. شمباتى
      مابى مالك ، الهناى ده فرحنا الوحيد و مد الحياه بى اللبنات الاساسيه …………. عجبى

  16. قال رئيس البرلمان؛ أحمد إبراهيم الطاهر إن قرار رفع الدعم عن المحروقات قرار نافذ، وسينزل في مقبل الأيام، مشيراً إلى أنه سيتم تطبيق القرار تدريجياً حتى لا يؤثر ذلك على المواطنين. وأضاف الطاهر أن معالجة الآثار ستكون بالوسائل العلمية والدراسة المتأنية والتطبيق الذى يراعي الظروف الحرجة التي تمر بها البلاد بعد ذهاب نفط الجنوب.

    والله ىابروف نحن قلنا الروووووووووووووووووووووووووب, يااخوانا هسه من قبل انفصال الجنوب – المغسة الكبيرة – الناس حالها ضايق والدولة رفعت الدعم عن المحروقات للتذكير جالون البنزين من 6 لي 8 محل واحد وبرضو الموضوع ما نجح والدولة دايرة تاني ترفع شنو يعني يابروف, نحن ماعندنا مشكلة بس اول ياسعادة رئيس البرلمان تشوف البشكة الادارية والترهل الوظيفي والمخصصات وكمية الولاة المهوووووولة دي بعداك كان ما نفع نبقي نحن الغلطانين ولا الراي شنو؟؟؟؟؟؟؟؟؟؟؟؟؟؟؟؟؟؟؟؟؟؟؟
    احي احيييييييييييييييييي عليك يابلد

    1. يا مجاهد رئيس البرلمان ده راتبه ( في اليوم الوااااااااحد ) مليون جنيه !!! وبعد ده بنزين عربيتو علي الحكومة وثرو علينا نحنا !!!
      الروووووب قلناها لكن البيسمع منو ؟
      إنت سمعت نكتة العزابي الاطرش لمن ناس الحلة كسروا الباب وجوهو خاشين , عاين ليهم في استغراب وقال : مالو ؟ كورك ؟
      مافي طريقة يعملوا مادة في الدستور تمنع الجمع بين الحكومة والبرلمان وتبقي المسألة هلال مريخ بدل ما نقعد عمرنا كلو نحضر في تمرين فريق وااحد .!!!!!

  17. كوكو…
    لموا لبناتكم وهناياتكم عليكم,,انا لسه صغير وما بقدر على جنس عمايل (الحيكومات) دى ! وى وى وى

  18. انا بقترح نعمل صندوق لوزير عشان قدم الاستقاله حسي احتمال مفلس .

    1. ابو سمره … واحتمال ناوي يتوب ..

  19. الله ياذاهم زي ما اذونا وطلعو روحنا ديل ناس عواليق وماعندهم ضمير ولا ذمة نصرف علي روحنا لحدي مانتخرج وبعدا يشغلونا سخرة نخدمهم وقالو خدمة وطنية وبعد دا مافي شغل .
    داير قوش لازم تلبس كاكي وبعد دا كلو الكاكي لي ناسهم تقول دي ما اجهزة قومية وحقت بلد
    كل يوم الحاجات زايدة في السما ولما تزيد بتزيد دبل دبل متواليات هندسية ولسة ماشة تصل وين ماعارفين

    زهجنا وقرفنا دي عدت زماااااااااااااااااااان نحن وصلنا حد المرونة بعد الكسر ابقوا جاهزين

  20. الحبيب
    اسى نحن اسي ماشين من دون لاساتك ودن عجل حديد زاتوووووووو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: